ಸಚ್ಚಸಂಯುತ್ತ

ತಿರಚ್ಛಾನಕಥಾಸುತ್ತ

ಪುಚ್ಛಾ – ಸಚ್ಚಸಂಯುತ್ತೇ ಆವುಸೋ ಪೋರಾಣಕೇಹಿ ಧಮ್ಮಸಂಗಾಯಕಮಹಾಥೇರೇಹಿ ದಸಮಂ ಸಂಗೀತಂ ತಿರಚ್ಛಾನಕಥಾಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಮಾ ಭಿಕ್ಖವೇ ಅನೇಕವಿಹಿತಂ ತಿರಚ್ಛಾನಕಥಂ ಕಥೇಯ್ಯಾಥ. ಸೇಯ್ಯಥಿದಂ, ರಾಜಕಥಂ ಚೋರಕಥಂ ಮಹಾಮತ್ತಕಥಂ ಸೇನಾಕಥಂ ಭಯಕಥಂ ಯುದ್ಧಕಥಂ ಅನ್ನಕಥಂ ಪಾನಕಥಂ ವತ್ಥಕಥಂ ಸಯನಕಥಂ ಏವಮಾದಿನಾ ಭನ್ತೇ ಭಗವತಾ ಭಾಸಿತಂ.

ಇದಂ ದುಕ್ಖನ್ತಿ ಕಥೇಯ್ಯಾಥ.

ತಸ್ಮಾತಿಹ ಭಿಕ್ಖವೇ ಇದಂ ದುಕ್ಖನ್ತಿ ಯೋಗೋ ಕರಣೀಯೋ…ಪೇ… ಅಯಂ ದುಕ್ಖನಿರೋಧಗಾಮಿನೀ ಪಟಿಪದಾತಿ ಯೋಗೋ ಕರಣೀಯೋ.

ಧಮ್ಮಚಕ್ಕಪವತ್ತನಸುತ್ತ

ಪುಚ್ಛಾ – ತತ್ಥೇವ ಆವುಸೋ ಧಮ್ಮಚಕ್ಕಪ್ಪವತ್ತನವಗ್ಗೇ ಪೋರಾಣಕೇಹಿ ಧಮ್ಮಸಂಗಾಹಕಮಹಾಥೇರೇಹಿ ಪಠಮಂ ಸಂಗೀತಂ ಧಮ್ಮಚಕ್ಕಪವತ್ತನಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ.

ವಿಸ್ಸಜ್ಜನಾ – ಬಾರಾಣಸಿಯಂ ಭನ್ತೇ ಇಸಿಪತನೇ ಮಿಗದಾಯೇ ಪಞ್ಚವಗ್ಗಿಯೇ ಭಿಕ್ಖೂ ಆರಬ್ಭ ‘‘ದ್ವೇ ಮೇ ಭಿಕ್ಖವೇ ಅನ್ತಾ ಪಬ್ಬಜಿತೇನ ನಸೇವಿತಬ್ಬಾ. ಕತಮೇ ದ್ವೇ, ಯೋ ಚಾಯಂ ಕಾಮೇಸು ಕಾಮಸುಖಲ್ಲಿಕಾನುಯೋಗೋ ಹೀನೋ ಗಮ್ಮೋ ಪೋಥುಜ್ಜನಿಕೋ ಅನರಿಯೋ ಅನತ್ಥಸಂಹಿತೋ, ಯೋ ಚಾಯಂ ಅತ್ತಕಿಲಮಥಾನುಯೋಗೋ ದುಕ್ಖೋ ಅನರಿಯೋ ಅನತ್ಥಸಂಹಿತೋ, ಏತೇ ಖೋ ಭಿಕ್ಖವೇ ಉಭೋ ಅನ್ತೇ ಅನುಪಗಮ್ಮ ಮಜ್ಝಿಮಾಪಟಿಪದಾ ತಥಾಗತೇನ ಅಭಿಸಮ್ಬುದ್ಧಾ’’ತಿ ಏವಮಾದಿನಾ ಭಗವತಾ ಭಾಸಿತಂ.

ಆಸವಕ್ಖಯಸುತ್ತ

ಪುಚ್ಛಾ – ತತ್ಥೇವ ಆವುಸೋ ಕೋಟಿಗಾಮವಗ್ಗೇ ಪೋರಾಣಕೇಹಿ ಧಮ್ಮಸಂಗಾಹಕಮಹಾಥೇರೇಹಿ ಪಞ್ಚಮಂ ಸಂಗೀತಂ ಆಸವಕ್ಖಯಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ‘‘ಜಾನತೋಹಂ ಭಿಕ್ಖವೇ ಪಸ್ಸತೋ ಆಸವಾನಂ ಖಯಂ ವದಾಮಿ, ನೋ ಅಜಾನತೋ ಅಪಸ್ಸತೋ. ಕಿಞ್ಚ ಭಿಕ್ಖವೇ ಜಾನತೋ ಪಸ್ಸತೋ ಆಸವಾನಂ ಖಯೋ ಹೋತಿ, ಇದಂ ದುಕ್ಖನ್ತಿ ಭಿಕ್ಖವೇ ಜಾನತೋ ಪಸ್ಸತೋ ಆಸವಾನಂ ಖಯೋ ಹೋತಿ, ಅಯಂ ದುಕ್ಖಸಮುದಯೋತಿ, ಅಯಂ ದುಕ್ಖನಿರೋಧೋತಿ, ಅಯಂ ದುಕ್ಖನಿರೋಧಗಾಮಿನೀಪಟಿಪದಾತಿ ಜಾನತೋ ಪಸ್ಸತೋ ಆಸವಾನಂ ಖಯೋ ಹೋತಿ. ಏವಂ ಖೋ ಭಿಕ್ಖವೇ ಜಾನತೋ ಏವಂ ಪಸ್ಸತೋ ಆಸವಾನಂ ಖಯೋ ಹೋತಿ. ತಸ್ಮಾತಿಹ ಭಿಕ್ಖವೇ ‘‘ಇದಂ ದುಕ್ಖ’’ನ್ತಿ ಯೋಗೋ ಕರಣೀಯೋ, ಅಯಂ ದುಕ್ಖಸಮುದಯೋತಿ, ಅಯಂ ದುಕ್ಖನಿರೋಧೋತಿ, ಅಯಂ ದುಕ್ಖನಿರೋಧಗಾಮಿನೀಪಟಿಪದಾತಿ ಯೋಗೋ ಕರಣೀಯೋ’’ತಿ ಏವಂ ಖೋ ಭಗವತಾ ಭಾಸಿತಂ.

ಸೀಸಪಾವನಸುತ್ತ

ಪುಚ್ಛಾ – ತತ್ಥೇವ ಆವುಸೋ ಸೀಸಪಾವನವಗ್ಗೇ ಪೋರಾಣಕೇಹಿ ಧಮ್ಮಸಂಗಾಹಕಮಹಾಥೇರೇಹಿ ಪಠಮಂ ಸಂಗೀತಂ ಸೀಸಪಾವನಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ.

ವಿಸ್ಸಜ್ಜನಾ – ಕೋಸಮ್ಬಿಯಂ ಭನ್ತೇ ಸೀಸಪಾವನೇ ಸಮ್ಬಹುಲೇ ಭಿಕ್ಖೂ ಆರಬ್ಭ ‘‘ತಂ ಕಿಂ ಮಞ್ಞಥ ಭಿಕ್ಖವೇ, ಕತಮಂ ನುಖೋ ಬಹುತರಂ ಯಾನಿ ವಾ ಮಯಾ ಪರಿತ್ತಾನಿ ಸೀಸಪಾಪಣ್ಣಾನಿ ಪಾಣಿನಾ ಗಹಿತಾನಿ ಯದಿದಂ ಉಪರಿ ಸೀಸಪಾವನೇ’’ತಿ ಏವಮಾದಿನಾ ಭಗವತಾ ಭಾಸಿತಂ.

ಪಞ್ಚಗತಿಪೇಯ್ಯಾಲವಗ್ಗ

ಪುಚ್ಛಾ – ತತ್ಥೇವ ಆವುಸೋ ಪೋರಾಣಕೇಹಿ ಧಮ್ಮಸಂಗಾಹಕಮಹಾಥೇರೇಹಿ ಪರಿಯೋಸಾನಭಾವೇನ ಸಂಗೀತೋ ಪಞ್ಚಗತಿಪೇಯ್ಯಾಲವಗ್ಗೇ, ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತೋ.

ವಿಸ್ಸಜ್ಜನಾ – ವೇಸಾಲಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ‘‘ತಂ ಕಿಂ ಮಞ್ಞಥ ಭಿಕ್ಖವೇ, ಕತಮಂ ನು ಖೋ ಬಹುತರಂ, ಯೋ ವಾಯಂ ಮಯಾ ಪರಿತ್ತೋ ನಖಸಿಖಾಯಂ ಪಂಸು ಆರೋಪಿತೋ, ಅಯಂ ವಾ ಮಹಾಪಥವೀ’’ತಿ ಏವಮಾದಿನಾ ಭಗವತಾ ಭಾಸಿತೋ.

ಪುಚ್ಛಾ – ಕೇ ಆವುಸೋ ಸಿಕ್ಖನ್ತಿ.

ವಿಸ್ಸಜ್ಜನಾ – ಸೇಕ್ಖಾ ಚ ಭನ್ತೇ ಪುಥುಜ್ಜನಕಲ್ಯಾಣಕಾ ಚ ಸಿಕ್ಖನ್ತಿ.

ಪುಚ್ಛಾ – ಕೇ ಆವುಸೋ ಸಿಕ್ಖಿತಸಿಕ್ಖಾ.

ವಿಸ್ಸಜ್ಜನಾ – ಅರಹನ್ತೋ ಭನ್ತೇ ಸಿಕ್ಖಿತಸಿಕ್ಖಾ.

ಪುಚ್ಛಾ – ಕತ್ಥ ಆವುಸೋ ಠಿತಂ.

ವಿಸ್ಸಜ್ಜನಾ – ಸಿಕ್ಖಾಕಾಮೇಸು ಭನ್ತೇ ಠಿತಂ.

ಪುಚ್ಛಾ – ಕೇ ಆವುಸೋ ಧಾರೇನ್ತಿ.

ವಿಸ್ಸಜ್ಜನಾ – ಯೇಸಂ ಭನ್ತೇ ವತ್ತತಿ ತೇ ಧಾರೇನ್ತಿ.

ಪುಚ್ಛಾ – ಕಸ್ಸ ಆವುಸೋ ವಚನಂ.

ವಿಸ್ಸಜ್ಜನಾ – ಭಗವತೋ ಭನ್ತೇ ವಚನಂ ಅರಹತೋ ಸಮ್ಮಾಸಮ್ಬುದ್ಧಸ್ಸ.

ಪುಚ್ಛಾ – ಕೇನ ಆವುಸೋ ಆಭತಂ.

ವಿಸ್ಸಜ್ಜನಾ – ಪರಮ್ಪರಾಯ ಭನ್ತೇ ಆಭತಂ.