ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ

ಸುತ್ತನ್ತಪಿಟಕ

ಅಙ್ಗುತ್ತರನಿಕಾಯೇ

ಸಂಗಾಯನಸ್ಸ ಪುಚ್ಛಾ ವಿಸ್ಸಜ್ಜನಾ

ಪುಚ್ಛಾ – ಪಠಮಮಹಾಸಂಗೀತಿಕಾಲೇ ಆವುಸೋ ಧಮ್ಮಸಂಗಾಹಕಾ ಮಹಾಕಸ್ಸಪಾದಯೋ ಮಹಾಥೇರವರಾ ಪೋರಾಣಸಂಗೀತಿಕಾರಾ ಪಠಮಂ ವಿನಯಪಿಟಕಂ ಸಂಗಾಯಿತ್ವಾ ಸುತ್ತನ್ತಪಿಟಕೇ ಚ ದೀಘಮಜ್ಝಿಮಸಂಯುತ್ತಸಙ್ಖಾತೇ ತಯೋ ನಿಕಾಯೇ ಸಂಗಾಯಿತ್ವಾ ತದನನ್ತರಂ ಕಿಂ ನಾಮ ಪಾವಚನಂ ಸಂಗಾಯಿಂಸು.

ವಿಸ್ಸಜ್ಜನಾ – ಪಠಮಮಹಾಸಂಗೀತಿಕಾಲೇ ಭನ್ತೇ ಧಮ್ಮಸಂಗಾಹಕಾ ಮಹಾಕಸ್ಸಪಾದಯೋ ಮಹಾಥೇರವರಾ ಪೋರಾಣಸಂಗೀತಿಕಾರಾ ಪಠಮಂ ವಿನಯಂ ಸಂಗಾಯಿತ್ವಾ ಸುತ್ತನ್ತಪಿಟಕೇ ಚ ದೀಘಮಜ್ಝಿಮಸಂಯುತ್ತಸಙ್ಖಾತೇ ತಯೋ ನಿಕಾಯೇ ಸಂಗಾಯಿತ್ವಾ ತದನನ್ತರಂ ನವಹಿ ಚ ಸುತ್ತಸಹಸ್ಸೇಹಿ ಪಞ್ಚಹಿ ಚ ಸುತ್ತಸತ್ತೇಹಿ ಸತ್ತಪಞ್ಞಾಸಾಯ ಚ ಸುತ್ತೇಹಿ ಪಟಿಮಣ್ಡಿತಂ ವೀಸತಿಭಾಣವಾರಸತಪರಿಮಾಣಂ ಅಙ್ಗುತ್ತರನಿಕಾಯಂ ನಾಮ ಪಾವಚನಂ ಸಂಗಾಯಿಂಸು.

ಪುಚ್ಛಾ – ಅಙ್ಗುತ್ತರನಿಕಾಯೇಪಿ ಆವುಸೋ ಏಕಕನಿಪಾತೋ ದುಕನಿಪಾತೋ ತಿಕನಿಪಾತೋತಿಆದಿನಾ ನಿಪಾತಪಕರಣಪರಿಚ್ಛೇದವಸೇನ ಏಕಾದಸವಿಧಾ. ತತ್ಥ ಕತರಂ ನಿಪಾತಪಕರಣಂ ಸಂಗಾಯಿಂಸು.

ವಿಸ್ಸಜ್ಜನಾ – ಅಙ್ಗುತ್ತರನಿಕಾಯೇ ಭನ್ತೇ ಏಕಾದಸಸು ನಿಪಾತಪಕರಣಪರಿಚ್ಛೇದೇಸು ಏಕಕನಿಪಾತಂ ಪಠಮಂ ಸಂಗಾಯಿಂಸು.

೧. ರೂಪಾದಿವಗ್ಗ

ಪುಚ್ಛಾ – ಏಕಕನಿಪಾತೇಪಿ ಆವುಸೋ ರೂಪಾದಿವಗ್ಗೋ ನೀವರಣಪ್ಪಹಾನವಗ್ಗೋ ಅಕಮ್ಮನಿಯವಗ್ಗೋತಿಆದಿನಾ ವಗ್ಗಭೇದವಸೇನ ಬಹುವಿಧಾ. ತತ್ಥ ಕತರಂ ವಗ್ಗಂ ಪಠಮಂ ಸಂಗಾಯಿಂಸು.

ವಿಸ್ಸಜ್ಜನಾ – ಏಕಕನಿಪಾತೇ ಭನ್ತೇ ರೂಪಾದಿವಗ್ಗೋ ನೀವರಣಪ್ಪಹಾನವಗ್ಗೋತಿಆದಿನಾ ವೀಸತಿಯಾ ವಗ್ಗೇಸು ರೂಪಾದಿವಗ್ಗಂ ಪಠಮಂ ಸಂಗಾಯಿಂಸು.

ಪುಚ್ಛಾ – ಸಾಧು ಸಾಧು ಆವುಸೋ, ಮಯಮ್ಪಿ ದಾನಿ ಆವುಸೋ ತತೋಯೇವ ಪಟ್ಠಾಯ ಸಂಗಾಹನತ್ಥಾಯ ಸಂಗೀತಿಪುಬ್ಬಙ್ಗಮಾನಿ ಧಮ್ಮಪುಚ್ಛನವಿಸ್ಸಜ್ಜನಕಿಚ್ಚಾನಿ ಆವಹಿತುಂ ಸಮಾರಭಾಮ. ತೇನಾವುಸೋ ಭಗವತಾ ಜಾನತಾ ಪಸ್ಸತಾ ಅರಹತಾ ಸಮ್ಮಾಸಮ್ಬುದ್ಧೇನ ಅಙ್ಗುತ್ತರನಿಕಾಯೇ ಏಕಕನಿಪಾತೇ ರೂಪಾದಿವಗ್ಗೇ ಪುರಿಮಾನಿ ಪಞ್ಚ ಸುತ್ತಾನಿ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಾನಿ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ರೂಪಾದಿಗರುಕಾನಂ ಪಞ್ಚನ್ನಂ ಪುರಿಸಾನಂ ಅಜ್ಝಾಸಯವಸೇನ ‘‘ನಾಹಂ ಭಿಕ್ಖವೇ ಅಞ್ಞಂ ಏಕರೂಪಮ್ಪಿ ಸಮನುಪಸ್ಸಾಮಿ, ಯಂ ಏವಂ ಪುರಿಸಸ್ಸ ಚಿತ್ತಂ ಪರಿಯಾದಾಯ ತಿಟ್ಠತಿ, ಯಥಯಿದಂ ಭಿಕ್ಖವೇ ಇತ್ಥಿರೂಪಂ, ಇತ್ಥಿರೂಪಂ ಭಿಕ್ಖವೇ ಪುರಿಸಸ್ಸ ಚಿತ್ತಂ ಪರಿಯಾದಾಯ ತಿಟ್ಠತೀ’’ತಿ ಏವಮಾದಿನಾ ಭಗವತಾ ಭಾಸಿತಾನಿ.

ನಾಹಂ ಭಿಕ್ಖವೇ ಅಞ್ಞಂ ಏಕರೂಪಮ್ಪಿ ಸಮನುಪಸ್ಸಾಮಿ, ಯಂ ಏವಂ ಪುರಿಸಸ್ಸ ಚಿತ್ತಂ ಪರಿಯಾದಾಯ ತಿಟ್ಠತಿ, ಯಥಯಿದಂ ಭಿಕ್ಖವೇ ಇತ್ಥಿರೂಪಂ, ಇತ್ಥಿರೂಪಂ ಭಿಕ್ಖವೇ ಪುರಿಸಸ್ಸ ಚಿತ್ತಂ ಪರಿಯಾದಾಯ ತಿಟ್ಠತಿ.

ಪುಚ್ಛಾ – ತತ್ಥೇವ ಆವುಸೋ ಪಚ್ಛಿಮಾನಿ ಪಞ್ಚ ಸುತ್ತಾನಿ ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಾನಿ.

ವಿಸ್ಸಜ್ಜನಾ – ತಸ್ಮಿಂಯೇವ ಭನ್ತೇ ಸಾವತ್ಥಿಯಂ ಸಮ್ಬಹುಲೇ ಭಿಕ್ಖೂ ಆರಬ್ಭ ರೂಪಾದಿಗರುಕಾನಂ ಪಞ್ಚನ್ನಂ ಇತ್ಥೀನಂ ಅಜ್ಝಾಸಯವಸೇನ ‘‘ನಾಹಂ ಭಿಕ್ಖವೇ ಅಞ್ಞಂ ಏಕರೂಪಮ್ಪಿ ಸಮನುಪಸ್ಸಾಮಿ, ಯಂ ಏವಂ ಇತ್ಥಿಯಾ ಚಿತ್ತಂ ಪರಿಯಾದಾಯ ತಿಟ್ಠತಿ, ಯಥಯಿದಂ ಭಿಕ್ಖವೇ ಪುರಿಸರೂಪಂ, ಪುರಿಸರೂಪಂ ಭಿಕ್ಖವೇ ಇತ್ಥಿಯಾ ಚಿತ್ತಂ ಪರಿಯಾದಾಯ ತಿಟ್ಠತೀ’’ತಿ ಏವಮಾದಿನಾ ಭಗವತಾ ಭಾಸಿತಾನಿ.

ನಾಹಂ ಭಿಕ್ಖವೇ ಅಞ್ಞಂ ಏಕರೂಪಮ್ಪಿ ಸಮನುಪಸ್ಸಾಮಿ, ಯಂ ಏವಂ ಇತ್ಥಿಯಾ ಚಿತ್ತಂ ಪರಿಯಾದಾಯ ತಿಟ್ಠತಿ, ಯಥಯಿದಂ ಭಿಕ್ಖವೇ ಪುರಿಸರೂಪಂ, ಪುರಿಸರೂಪಂ ಭಿಕ್ಖವೇ ಇತ್ಥಿಯಾ ಚಿತ್ತಂ ಪರಿಯಾದಾಯ ತಿಟ್ಠತಿ.

ನೀತತ್ಥವಸೇನ, ನೇಯ್ಯತ್ಥವಸೇನ

ಪುಚ್ಛಾ – ಇಮಸ್ಮಿಂ ಆವುಸೋ ರೂಪಾದಿವಗ್ಗೇ ಭಗವತಾ ನೀತತ್ಥವಸೇನ ಕಿಂ ಕಥಿತಂ, ನೇಯ್ಯತ್ಥವಸೇನ ಪನ ಕಿಂ ಞಾಪಿತಂ.

ವಿಸ್ಸಜ್ಜನಾ – ಇಮಸ್ಮಿಂ ಭನ್ತೇ ರೂಪಾದಿವಗ್ಗೇ ಭಗವತಾ ನೀತತ್ಥವಸೇನ ವಟ್ಟಂ ಕಥಿತಂ. ನೇಯ್ಯತ್ಥವಸೇನ ಪನ ವಿವಟ್ಟಮ್ಪಿ ಞಾಪಿತಂ.

೨. ನೀವರಣಪ್ಪಹಾನವಗ್ಗ

ಪುಚ್ಛಾ – ದುತಿಯೋ ಪನ ಆವುಸೋ ನೀವರಣಪ್ಪಹಾನವಗ್ಗೋ ಭಗವತಾ ಕತ್ಥ ಕಥಞ್ಚ ಭಾಸಿತೋ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ‘‘ನಾಹಂ ಭಿಕ್ಖವೇ ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ, ಯೇನ ಅನುಪ್ಪನ್ನೋ ವಾ ಕಾಮಚ್ಛನ್ದೋ ಉಪ್ಪಜ್ಜತಿ, ಉಪ್ಪನ್ನೋ ವಾ ಕಾಮಚ್ಛನ್ದೋ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತತಿ, ಯಥಯಿದಂ ಭಿಕ್ಖವೇ ಸುಭನಿಮಿತ್ತಂ, ಸುಭನಿಮಿತ್ತಂ ಭಿಕ್ಖವೇ ಅಯೋನಿಸೋ ಮನಸಿಕರೋತೋ ಅನುಪ್ಪನ್ನೋಚೇವ ಕಾಮಚ್ಛನ್ದೋ ಉಪ್ಪಜ್ಜತಿ, ಉಪ್ಪನ್ನೋ ಚ ಕಾಮಚ್ಛನ್ದೋ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತತೀ’’ತಿ ಏವಮಾದಿನಾ ಭಗವತಾ ಭಾಸಿತೋ.

ಪುಚ್ಛಾ – ಇಮಸ್ಮಿಂ ಪನ ಆವುಸೋ ದುತಿಯೇ ನೀವರಣಪ್ಪಹಾನವಗ್ಗೇ ಭಗವತಾ ಕಿಂ ಕಥಿತಂ.

ವಿಸ್ಸಜ್ಜನಾ – ಇಮಸ್ಮಿಂ ಪನ ಭನ್ತೇ ದುತಿಯೇ ನೀವರಣಪ್ಪಹಾನವಗ್ಗೇ ಭಗವತಾ ವಟ್ಟಮ್ಪಿ ವಿವಟ್ಟಮ್ಪಿ ಕಥಿತಂ.

೩. ಅಕಮ್ಮನಿಯವ

ಪುಚ್ಛಾ – ತೇನಾವುಸೋ…ಪೇ… ಸಮ್ಮಾಸಮ್ಬುದ್ಧೇನ ಅಙ್ಗುತ್ತರನಿಕಾಯೇ ಏಕಕನಿಪಾತೇ ತತಿಯೇ ಅಕಮ್ಮನಿಯವಗ್ಗೇ ಕೀದಿಸೀ ಧಮ್ಮದೇಸನಾಯೋ ದೇಸಿತಾ.

ವಿಸ್ಸಜ್ಜನಾ – ತತಿಯೇ ಭನ್ತೇ ಅಕಮ್ಮನಿಯವಗ್ಗೇ ‘‘ನಾಹಂ ಭಿಕ್ಖವೇ ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ, ಯಂ ಏವಂ ಅಭಾವಿತಂ ಅಕಮ್ಮನಿಯಂ ಹೋತಿ, ಯಥಯಿದಂ ಭಿಕ್ಖವೇ ಚಿತ್ತಂ, ಚಿತ್ತಂ ಭಿಕ್ಖವೇ ಅಭಾವಿತಂ ಅಕಮ್ಮನಿಯಂ ಹೋತಿ. ನಾಹಂ ಭಿಕ್ಖವೇ ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ, ಯಂ ಏವಂ ಭಾವಿತಂ ಕಮ್ಮನಿಯಂ ಹೋತಿ, ಯಥಯಿದಂ ಭಿಕ್ಖವೇ ಚಿತ್ತಂ. ಚಿತ್ತಂ ಭಿಕ್ಖವೇ ಭಾವಿತಂ ಕಮ್ಮನಿಯಂ ಹೋತೀ’’ತಿ ಏವಮಾದಿಕಾ ಭಗವತಾ ಧಮ್ಮದೇಸನಾಯೋ ದೇಸಿತಾ.

೪. ಅದನ್ತವಗ್ಗ

ಪುಚ್ಛಾ – ಚತುತ್ಥೇ ಪನಾವುಸೋ ಅದನ್ತವಗ್ಗೇ ಭಗವತಾ ಕೀದಿಸೀ ಧಮ್ಮದೇಸನಾಯೋ ದೇಸಿತಾ.

ವಿಸ್ಸಜ್ಜನಾ – ಚತುತ್ಥೇ ಭನ್ತೇ ಅದನ್ತವಗ್ಗೇ ‘‘ನಾಹಂ ಭಿಕ್ಖವೇ ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ, ಯಂ ಏವಂ ಅದನ್ತಂ ಮಹತೋ ಅನತ್ಥಾಯ ಸಂವತ್ತತಿ, ಯಥಯಿದಂ ಭಿಕ್ಖವೇ ಚಿತ್ತಂ, ಚಿತ್ತಂ ಭಿಕ್ಖವೇ ಅದನ್ತಂ ಮಹತೋ ಅನತ್ಥಾಯ ಸಂವತ್ತತಿ. ನಾಹಂ ಭಿಕ್ಖವೇ ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ, ಯಂ ಏವಂ ದನ್ತಂ ಮಹತೋ ಅತ್ಥಾಯ ಸಂವತ್ತತಿ, ಯಥಯಿದಂ ಭಿಕ್ಖವೇ ಚಿತ್ತಂ, ಚಿತ್ತಂ ಭಿಕ್ಖವೇ ದನ್ತಂ ಮಹತೋ ಅತ್ಥಾಯ ಸಂವತ್ತತೀ’’ತಿ ಏವಮಾದಿಕಾ ಭಗವತಾ ಧಮ್ಮದೇಸನಾಯೋ ದೇಸಿತಾ.

೫. ಪಣಿಹಿತಅಚ್ಛವಗ್ಗ

ಪುಚ್ಛಾ – ಪಞ್ಚಮೇ ಆವುಸೋ ಪಣಿಹಿತಅಚ್ಛವಗ್ಗೇ ಭಗವತಾ ಕೀದಿಸೀ ಧಮ್ಮದೇಸನಾಯೋ ದೇಸಿತಾ.

ವಿಸ್ಸಜ್ಜನಾ – ಪಞ್ಚಮೇ ಭನ್ತೇ ಪಣಿಹಿತಅಚ್ಛವಗ್ಗೇ ‘‘ಸೇಯ್ಯಥಾಪಿ ಭಿಕ್ಖವೇ ಸಾಲಿಸೂಕಂ ವಾ ಯವಸೂಕಂ ವಾ ಮಿಚ್ಛಾಪಣಿಹಿತಂ ಹತ್ಥೇನ ವಾ ಪಾದೇನ ವಾ ಅಕ್ಕನ್ತಂ ಹತ್ಥಂ ವಾ ಪಾದಂ ವಾ ಭೇಚ್ಛತಿ, ಲೋಹಿತಂ ವಾ ಉಪ್ಪಾದೇಸ್ಸತೀತಿ ನೇತಂ ಠಾನ ವಿಜ್ಜತಿ. ತಂ ಕಿಸ್ಸಹೇತು, ಮಿಚ್ಛಾಪಣಿಹಿತತ್ತಾ ಭಿಕ್ಖವೇ ಸೂಕಸ್ಸ. ಏವಮೇವ ಖೋ ಭಿಕ್ಖವೇ ಸೋ ವತ ಭಿಕ್ಖು ಮಿಚ್ಛಾಪಣಿಹಿತೇನ ಚಿತ್ತೇನ ಅವಿಜ್ಜಂ ಭೇಚ್ಛತಿ, ವಿಜ್ಜಂ ಉಪ್ಪಾದೇಸ್ಸತಿ, ನಿಬ್ಬಾನಂ ಸಚ್ಛಿಕರಿಸ್ಸತೀತಿ ನೇತಂ ಠಾನಂ ವಿಜ್ಜತಿ, ತಂ ಕಿಸ್ಸ ಹೇತು, ಮಿಚ್ಛಾಪಣಿಹಿತತ್ತಾ ಭಿಕ್ಖವೇ ಚಿತ್ತಸ್ಸಾ’’ತಿ ಏವಮಾದಿಕಾ ಭಗವತಾ ಧಮ್ಮದೇಸನಾಯೋ ದೇಸಿತಾ.

೬. ಅಚ್ಛರಾಸಙ್ಘಾತವಗ್ಗ

ಪುಚ್ಛಾ – ಅಚ್ಛರಾಸಙ್ಘಾತವಗ್ಗೇ ಆವುಸೋ ಪಠಮ ದುತಿಯಸುತ್ತಾನಿ ಭಗವತಾ ಕಥಂ ಭಾಸಿತಾನಿ.

ವಿಸ್ಸಜ್ಜನಾ – ಅಚ್ಛರಾಸಙ್ಘಾತವಗ್ಗೇ ಭನ್ತೇ ಭಗವತಾ ‘‘ಪಭಸ್ಸರಮಿದಂ ಭಿಕ್ಖವೇ ಚಿತ್ತಂ, ತಞ್ಚ ಖೋ ಆಗನ್ತುಕೇಹಿ ಉಪಕ್ಕಿಲೇಸೇಹಿ ಉಪಕ್ಕಿಲಿಟ್ಠಂ, ತಂ ಅಸ್ಸುತವಾ ಪುಥುಜ್ಜನೋ ಯಥಾಭೂತಂ ನಪ್ಪಜಾನಾತಿ, ತಸ್ಮಾ ‘ಅಸ್ಸುತವತೋ ಪುಥುಜ್ಜನಸ್ಸ ಚಿತ್ತಭಾವನಾ ನತ್ಥೀ’ತಿ ವದಾಮಿ. ಪಭಸ್ಸರಮಿದಂ ಭಿಕ್ಖವೇ ಚಿತ್ತಂ, ತಞ್ಚ ಖೋ ಆಗನ್ತುಕೇಹಿ ಉಪಕ್ಕಿಲೇಸೇಹಿ ವಿಪ್ಪಮುತ್ತಂ, ತಂ ಸುಭವಾ ಅರಿಯಸಾವಕೋ ಯಥಾಭೂತಂ ಪಜಾನಾತಿ. ತಸ್ಮಾ ‘ಸುತಪತೋ ಅರಿಯಸಾವಕಸ್ಸ ಚಿತ್ತಭಾವನಾ ಅತ್ಥೀ’ತಿ ವದಾಮೀ’’ತಿ. ಏವಂ ಖೋ ಭಗವತಾ ಭಾಸಿತಾನಿ.

ತತಿಯಸುತ್ತ

ಪುಚ್ಛಾ – ತತ್ಥೇವ ಆವುಸೋ ತತಿಯಸುತ್ತಾದೀನಿ ಭಗವತಾ ಕಥಂ ಭಾಸಿತಾನಿ.

ವಿಸ್ಸಜ್ಜನಾ – ತತ್ಥೇವ ಭನ್ತೇ ತತಿಯಸುತ್ತಾದೀನಿ ಪಞ್ಚಸುತ್ತಾನಿ ‘‘ಅಚ್ಛರಾಸಙ್ಘಾತಮತ್ತಮ್ಪಿ ಚೇ ಭಿಕ್ಖವೇ ಭಿಕ್ಖು ಮೇತ್ತಾಚಿತ್ತಂ ಆಸೇವತಿ, ಭಾವೇತಿ, ಮನಸಿಕರೋತಿ. ಅಯಂ ವುಚ್ಚತಿ ಭಿಕ್ಖವೇ ಭಿಕ್ಖು ಅರಿತ್ತಜ್ಝಾನೋ ವಿಹರತಿ ಸತ್ಥುಸಾಸನಕರೋ ಓವಾದಪತಿಕರೋ ಅಮೋಘಂ ರಟ್ಠಪಿಣ್ಡಂ ಭುಞ್ಜತಿ, ಕೋ ಪನ ವಾದೋ ಯೇ ನಂ ಬಹುಲೀಕರೋನ್ತಿ. ಯೇಕೇಚಿ ಭಿಕ್ಖವೇ ಧಮ್ಮಾ ಅಕುಸಲಾ ಅಕುಸಲಭಾಗಿಯಾ ಅಕುಸಲಪಕ್ಖಿಕಾ, ಸಬ್ಬೇತೇ ಮನೋಪುಬ್ಬಙ್ಗಮಾ, ಮನೋ ತೇಸಂ ಧಮ್ಮಾನಂ ಪಠಮಂ ಉಪ್ಪಜ್ಜತಿ, ಅನ್ವದೇವ ಅಕುಸಲಾಧಮ್ಮಾ, ಯೇಕೇಚಿ ಭಿಕ್ಖವೇ ಧಮ್ಮಾ ಕುಸಲಾ ಕುಸಲಭಾಗಿಯಾ ಕುಸಲಪಕ್ಖಿಕಾ, ಸಬ್ಬೇತೇ ಮನೋಪುಬ್ಬಙ್ಗಮಾ, ಮನೋ ತೇಸಂ ಧಮ್ಮಾನಂ ಪಠಮಂ ಉಪ್ಪಜ್ಜತಿ, ಅನ್ವದೇವ ಕುಸಲಾ ಧಮ್ಮಾ’’ತಿ ಏವಂ ಖೋ ಭನ್ತೇ ಭಗವತಾ ಭಾಸಿತಾನಿ.

ಅಟ್ಠಮಸುತ್ತ

ಪುಚ್ಛಾ – ತತ್ಥೇವ ಆವುಸೋ ಅಟ್ಠಮ ನವಮ ದಸಮಸುತ್ತಾನಿ ಚ ವೀರಿಯಾರಮ್ಭಾದಿವಗ್ಗೇ ದಸಸುತ್ತಾನಿ ಚ ಕಲ್ಯಾಣಮಿತ್ತಾದಿವಗ್ಗೇ ಪಠಮಸುತ್ತಞ್ಚ ಭಗವತಾ ಕಥಂ ಭಾಸಿತಾನಿ.

ವಿಸ್ಸಜ್ಜನಾ – ತತ್ಥೇವ ಭನ್ತೇ ಅಟ್ಠಮ ನವಮ ದಸಮಸುತ್ತಾನಿ ಚ ವೀರಿಯಾರಮ್ಭಾದಿವಗ್ಗೇ ದಸಸುತ್ತಾನಿ ಚ ಕಲ್ಯಾಣಮಿತ್ತಾದಿವಗ್ಗೇ ಪಠಮಸುತ್ತಞ್ಚ ‘‘ನಾಹಂ ಭಿಕ್ಖವೇ ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ, ಯೇನ ಅನುಪ್ಪನ್ನಾ ವಾ ಅಕುಸಲಾ ಧಮ್ಮಾ ಉಪ್ಪಜ್ಜನ್ತಿ, ಉಪ್ಪನ್ನಾ ವಾ ಕುಸಲಾ ಧಮ್ಮಾ ಪರಿಹಾಯನ್ತಿ, ಯಥಯಿದಂ ಭಿಕ್ಖವೇ ಪಮಾದೋ, ಪಮತ್ತಸ್ಸ ಭಿಕ್ಖವೇ ಅನುಪ್ಪನ್ನಾ ಚೇವ ಅಕುಸಲಾ ಧಮ್ಮಾ ಉಪ್ಪಜ್ಜನ್ತಿ, ಉಪ್ಪನ್ನಾ ಚ ಕುಸಲಾ ಧಮ್ಮಾ ಪರಿಹಾಯನ್ತೀ’’ತಿ ಏವಮಾದಿನಾ ಭನ್ತೇ ಭಗವತಾ ಭಾಸಿತಾನಿ.

ದುತಿಯಸುತ್ತ

ಪುಚ್ಛಾ – ಕಲ್ಯಾಣಮಿತ್ತಾದಿವಗ್ಗೇ ಆವುಸೋ ದುತಿಯ ತತಿಯಸುತ್ತಾನಿ ಭಗವತಾ ಕಥಂ ಭಾಸಿತಾನಿ.

ವಿಸ್ಸಜ್ಜನಾ – ಕಲ್ಯಾಣಮಿತ್ತಾದಿವಗ್ಗೇ ಭನ್ತೇ ದುತಿಯ ತತಿಯಸುತ್ತಾನಿ ‘‘ನಾಹಂ ಭಿಕ್ಖವೇ ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ, ಯೇನ ಅನುಪ್ಪನ್ನಾ ವಾ ಅಕುಸಲಾ ಧಮ್ಮಾ ಉಪ್ಪಜ್ಜನ್ತಿ, ಉಪ್ಪನ್ನಾ ವಾ ಕುಸಲಾ ಧಮ್ಮಾ ಪರಿಹಾಯನ್ತಿ, ಯಥಯಿದಂ ಭಿಕ್ಖವೇ ಅನುಯೋಗೋ ಅಕುಸಲಾನಂ ಧಮ್ಮಾನಂ ಅನನುಯೋಗೋ ಕುಸಲಾನಂ ಧಮ್ಮಾನ’’ನ್ತಿ ಏವಮಾದಿನಾ ಭಗವತಾ ಭಾಸಿತಾನಿ.

ಛಟ್ಠಸುತ್ತ

ಪುಚ್ಛಾ – ತತ್ಥೇವ ಆವುಸೋ ಛಟ್ಠಸುತ್ತಾದೀನಿ ಚ ಪಮಾದಾದಿವಗ್ಗೇ ಪಠಮಸುತ್ತಞ್ಚ ಭಗವತಾ ಕಥಂ ಭಾಸಿತಾನಿ.

ವಿಸ್ಸಜ್ಜನಾ – ತತ್ಥೇವ ಭನ್ತೇ ಛಟ್ಠಸುತ್ತಾದೀನಿ ಚ ಪಮಾದಾದಿವಗ್ಗೇ ಪಠಮಸುತ್ತಞ್ಚ ‘‘ಅಪ್ಪಮತ್ತಿಕಾ ಏಸಾ ಭಿಕ್ಖವೇ ಪರಿಹಾನಿ ಯದಿದಂ ಞಾತಿಪರಿಹಾನಿ. ಏತಂ ಪತಿಕಿಟ್ಠಂ ಭಿಕ್ಖವೇ ಪರಿಹಾನೀನಂ ಯದಿದಂ ಪಞ್ಞಾಪರಿಹಾನೀತಿ. ಅಪ್ಪಮತ್ತಿಕಾ ಏಸಾ ಭಿಕ್ಖವೇ ವುದ್ಧಿ ಯದಿದಂ ಞಾತಿವುದ್ಧಿ. ಏತದಗ್ಗಂ ಭಿಕ್ಖವೇ ವುದ್ಧೀನಂ ಯದಿದಂ ಪಞ್ಞಾವುದ್ಧಿ. ತಸ್ಮಾತಿಹ ಭಿಕ್ಖವೇ ಏವಂ ಸಿಕ್ಖಿತಬ್ಬಂ ‘ಪಞ್ಞಾವುದ್ಧಿಯಾ ವದ್ಧಿಸ್ಸಾಮಾ’ತಿ. ಏವಞ್ಹಿ ವೋ ಭಿಕ್ಖವೇ ಸಿಕ್ಖಿತಬ್ಬ’’ನ್ತಿ ಏವಮಾದಿನಾ ಭನ್ತೇ ಭಗವತಾ ಭಾಸಿತಾನಿ.

ಪಮಾದಾದಿವಗ್ಗ

ಪುಚ್ಛಾ – ತೇನಾವುಸೋ…ಪೇ… ಸಮ್ಮಾಸಮ್ಬುದ್ಧೇನ ಪಮಾದಾದಿವಗ್ಗೇ ದುತಿಯಸುತ್ತಾದೀನಿ ಕಥಂ ಭಾಸಿತಾನಿ.

ವಿಸ್ಸಜ್ಜನಾ – ನಾಹಂ ಭಿಕ್ಖವೇ ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ, ಯೋ ಏವಂ ಮಹತೋ ಅನತ್ಥಾಯ ಸಂವತ್ತತಿ, ಯಥಯಿದಂ ಭಿಕ್ಖವೇ ಪಮಾದೋ. ಪಮಾದೋ ಭಿಕ್ಖವೇ ಮಹತೋ ಅನತ್ಥಾಯ ಸಂವತ್ತತಿ. ನಾಹಂ ಭಿಕ್ಖವೇ ಅಞ್ಞಂ ಏಕಧಮ್ಮಮ್ಪಿ, ಯೋ ಏವಂ ಮಹತೋ ಅತ್ಥಾಯ ಸಂವತ್ತತಿ, ಯಥಯಿದಂ ಭಿಕ್ಖವೇ ಅಪ್ಪಮಾದೋ, ಅಪ್ಪಮಾದೋ ಭಿಕ್ಖವೇ ಮಹತೋ ಅನತ್ಥಾಯ ಸಂವತ್ತತೀತಿ ಏವಮಾದಿನಾ ಭನ್ತೇ ಭಗವತಾ ಭಾಸಿತಾನಿ.

ದುತಿಯ ಪಮಾದಾದಿವಗ್ಗ

ಪುಚ್ಛಾ – ದುತಿಯೇ ಪನಾವುಸೋ ಪಮಾದಾದಿವಗ್ಗೇ ಪಠಮಸುತ್ತಾದೀನಿ ಭಗವತಾ ಕಥಂ ಭಾಸಿತಾನಿ.

ವಿಸ್ಸಜ್ಜನಾ – ದುತಿಯೇ ಭನ್ತೇ ಪಮಾದಾದಿವಗ್ಗೇ ಅಜ್ಝತ್ತಿಕಂ ಭಿಕ್ಖವೇ ಅಙ್ಗನ್ತಿ ಕರಿತ್ವಾ ನಾಞ್ಞಂ ಏಕಙ್ಗಮ್ಪಿ ಸಮನುಪಸ್ಸಾಮಿ, ಯಂ ಏವಂ ಮಹತೋ ಅನತ್ಥಾಯ ಸಂವತ್ತತಿ, ಯಥಯಿದಂ ಭಿಕ್ಖವೇ ಪಮಾದೋ. ಪಮಾದೋ ಭಿಕ್ಖವೇ ಮಹತೋ ಅನತ್ಥಾಯ ಸಂವತ್ತತಿ. ಅಜ್ಝತ್ತಿಕಂ ಭಿಕ್ಖವೇ ಅಙ್ಗನ್ತಿ ಕರಿತ್ವಾ ನಾಞ್ಞಂ ಏಕಙ್ಗಮ್ಪಿ ಸಮನುಪಸ್ಸಾಮಿ, ಯಂ ಏವಂ ಮಹತೋ ಅತ್ಥಾಯ ಸಂವತ್ತತಿ, ಯಥಯಿದಂ ಭಿಕ್ಖವೇ ಅಪ್ಪಮಾದೋ. ಅಪ್ಪಮಾದೋ ಭಿಕ್ಖವೇ ಮಹತೋ ಅತ್ಥಾಯ ಸಂವತ್ತತೀತಿ ಏವಮಾದಿನಾ ಭನ್ತೇ ಭಗವತಾ ಭಾಸಿತಾನಿ.

ದಸಸುತ್ತ

ಪುಚ್ಛಾ – ತತ್ಥೇವ ಆವುಸೋ ತೇತ್ತಿಂಸಮಾದೀನಿಚ ದಸಸುತ್ತಾನಿ ಅಧಮ್ಮವಗ್ಗೇ ಚ ದಸಸುತ್ತಾನಿ ಭಗವತಾ ಕಥಂ ಭಾಸಿತಾನಿ.

ವಿಸ್ಸಜ್ಜನಾ – ತತ್ಥೇವ ಭನ್ತೇ ತೇತ್ತಿಂಸಮಾದೀನಿ ದಸಸುತ್ತಾನಿ ಚ ಅಧಮ್ಮವಗ್ಗೇ ದಸಸುತ್ತಾನಿ ಚ ಯೇ ತೇ ಭಿಕ್ಖವೇ ಭಿಕ್ಖೂ ಅಧಮ್ಮಂ ‘‘ಧಮ್ಮೋ’’ತಿ ದೀಪೇನ್ತಿ, ತೇ ಭಿಕ್ಖವೇ ಭಿಕ್ಖೂ ಬಹುಜನಅಹಿತಾಯ ಪಟಿಪನ್ನಾ ಬಹುಜನಅಸುಖಾಯ ಬಹುನೋ ಜನಸ್ಸ ಅನತ್ಥಾಯ ಅಹಿತಾಯ ದುಕ್ಖಾಯ ದೇವಮನುಸ್ಸಾನಂ. ಬಹುಞ್ಚ ತೇ ಭಿಕ್ಖವೇ ಭಿಕ್ಖೂ ಅಪುಞ್ಞಂ ಪಸವನ್ತಿ, ತೇ ಚಿಮಂ ಸದ್ಧಮ್ಮಂ ಅನ್ತರಧಾಪೇನ್ತೀತಿ ಏವಮಾದಿನಾ ಚ, ಯೇ ತೇ ಭಿಕ್ಖವೇ ಭಿಕ್ಖೂ ಅಧಮ್ಮಂ ‘‘ಅಧಮ್ಮೋ’’ತಿ ದೀಪೇನ್ತಿ, ತೇ ಭಿಕ್ಖವೇ ಭಿಕ್ಖೂ ಬಹುಜನಹಿತಾಯ ಪಟಿಪನ್ನಾ ಬಹುಜನಸುಖಾಯ ಬಹುಜನೋ ಜನಸ್ಸ ಅತ್ಥಾಯ ಹಿತಾಯ ಸುಖಾಯ ದೇವಮನುಸ್ಸಾನಂ. ಬಹುಞ್ಚ ತೇ ಭಿಕ್ಖವೇ ಭಿಕ್ಖೂ ಪುಞ್ಞಂ ಪಸವನ್ತಿ, ತೇ ಚಿಮಂ ಸದ್ಧಮ್ಮಂ ಠಪೇನ್ತೀತಿ ಏವಮಾದಿನಾ ಚ ಭನ್ತೇ ಭಗವತಾ ಭಾಸಿತಾನಿ.

ಏಕಪುಗ್ಗಲವಗ್ಗ

ಪುಚ್ಛಾ – ಏಕಪುಗ್ಗಲವಗ್ಗೇ ಆವುಸೋ ಭಗವತಾ ಕೀದಿಸೀ ಧಮ್ಮದೇಸನಾಯೋ ದೇಸಿತಾ.

ವಿಸ್ಸಜ್ಜನಾ – ಏಕಪುಗ್ಗಲವಗ್ಗೇ ಭನ್ತೇ ಭಗವತಾ ಏಕಪುಗ್ಗಲೋ ಭಿಕ್ಖವೇ ಲೋಕೇ ಉಪ್ಪಜ್ಜಮಾನೋ ಉಪ್ಪಜ್ಜತಿ ಬಹುಜನಹಿತಾಯ ಬಹುಜನಸುಖಾಯ ಲೋಕಾನುಕಮ್ಪಾಯ ಅತ್ಥಾಯ ಹಿತಾಯ ಸುಖಾಯ ದೇವಮನುಸ್ಸಾನಂ. ಕತಮೋ ಏಕಪುಗ್ಗಲೋ, ತಥಾಗತೋ ಅರಹಂ ಸಮ್ಮಾಸಮ್ಬುದ್ಧೋ, ಅಯಂ ಖೋ ಭಿಕ್ಖವೇ ಏಕಪುಗ್ಗಲೋ ಲೋಕೇ ಉಪ್ಪಜ್ಜಮಾನೋ ಉಪ್ಪಜ್ಜತಿ ಬಹುಜನಹಿತಾಯ ಬಹುಜನಸುಖಾಯ ಲೋಕಾನುಕಮ್ಪಾಯ ಅತ್ಥಾಯ ಹಿತಾಯ ಸುಖಾಯ ದೇವಮನುಸ್ಸಾನನ್ತಿ ಏವಮಾದಿಕಾ ಭಗವತಾ ಧಮ್ಮದೇಸನಾಯೋ ದೇಸಿತಾ.

ಏತದಗ್ಗವಗ್ಗ

ಅಞ್ಞಾಸಿಕೋಣ್ಡಞ್ಞ ವತ್ಥು

ಪುಚ್ಛಾ – ಏತದವಗ್ಗೇ ಆವುಸೋ ಆಗತೇಸು ಏಕಚತ್ತಾಲೀಸಾಯ ಥೇರೇಸು ಆಯಸ್ಮಾ ಅಞ್ಞಾಸಿಕೋಣ್ಡಞ್ಞತ್ಥೇರೋ ಕಥಂ ಭಗವತಾ ಏತದಗ್ಗಟ್ಠಾನೇ ಠಪಿತೋ.

ವಿಸ್ಸಜ್ಜನಾ – ಏತದಗ್ಗವಗ್ಗೇ ಭನ್ತೇ ಆಗತೇಸು ಏಕಚತ್ತಾಲೀಸಾಯ ಮಹಾಥೇರೇಸು ‘‘ಏತದಗ್ಗಂ ಭಿಕ್ಖವೇ ಮಮ ಸಾವಕಾನಂ ಭಿಕ್ಖೂನಂ ರತ್ತಞ್ಞೂನಂ ಯದಿದಂ ಅಞ್ಞಾಸಿಕೋಣ್ಡಞ್ಞೋ’’ತಿ, ಏವಂ ಖೋ ಭನ್ತೇ ಆಯಸ್ಮಾ ಅಞ್ಞಾಸಿಕೋಣ್ಡಞ್ಞತ್ಥೇರೋ ಭಗವತಾ ಏತದಗ್ಗಟ್ಠಾನೇ ಠಪಿತೋ.

ಅಗ್ಗಸಾವಕವತ್ಥು

ಪುಚ್ಛಾ – ತೇನಾವುಸೋ ಭಗವತಾ…ಪೇ… ಸಮ್ಮಾಸಮ್ಬುದ್ಧೇನ ಅಙ್ಗುತ್ತರನಿಕಾಯೇ ಏಕಕನಿಪಾತೇ ಏತದಗ್ಗವಗ್ಗೇ ಆಗತೇಸು ಏಕಚತ್ತಾಲೀಸಾಯ ಮಹಾಥೇರೇಸು ಆಯಸ್ಮಾ ಚ ಸಾರಿಪುತ್ತತ್ಥೇರೋ ಧಮ್ಮಸೇನಾಪತಿ ಪಠಮೋ ಅಗ್ಗಸಾವಕೋ ಆಯಸ್ಮಾ ಚ ಮಹಾಮೋಗ್ಗಲ್ಲಾನತ್ಥೇರೋ ದುತಿಯೋ ಅಗ್ಗಸಾವಕೋ ಕಥಂ ಏತದಗ್ಗಟ್ಠಾನೇ ಠಪಿತೋ.

ವಿಸ್ಸಜ್ಜನಾ – ಆಯಸ್ಮಾ ಭನ್ತೇ ಸಾರಿಪುತ್ತತ್ಥೇರೋ ಧಮ್ಮಸೇನಾಪತಿ ‘‘ಏತದಗ್ಗಂ ಭಿಕ್ಖವೇ ಮಮ ಸಾವಕಾನಂ ಭಿಕ್ಖೂನಂ ಮಹಾಪಞ್ಞಾನಂ ಯದಿದಂ ಸಾರಿಪುತ್ತೋ’’ತಿ. ಆಯಸ್ಮಾ ಪನ ಮಹಾಮೋಗ್ಗಲ್ಲಾನತ್ಥೇರೋ ‘‘ಏತದಗ್ಗಂ ಭಿಕ್ಖವೇ ಮಮ ಸಾವಕಾನಂ ಭಿಕ್ಖೂನಂ ಇದ್ಧಿಮನ್ತಾನಂ ಯದಿದಂ ಮಹಾಮೋಗ್ಗಲ್ಲಾನೋ’’ತಿ. ಏವಂ ಖೋ ಭನ್ತೇ ಭಗವತಾ ಏತದಗ್ಗಟ್ಠಾನೇ ಠಪಿತೋ.

ಇದಂ ತೇ ಆಸನಂ ವೀರ, ಪಞ್ಞತ್ತಂ ತವನುಚ್ಛವಿಂ;

ಮಮ ಚಿತ್ತಂ ಪಸಾದೇನ್ತೋ, ನಿಸೀದ ಪುಪ್ಫಮಾಸನೇ.

ಯೇ ವತ ಲೋಕೇ ಅರಹನ್ತೋ ವಾ ಅರಹತ್ತಮಗ್ಗಂ ವಾ ಸಮಾಪನ್ನಾ, ಅಯಂ ತೇಸಂ ಭಿಕ್ಖು ಅಞ್ಞತರೋ.

ಯಂನೂನಾಹಂ ಇಮಂ ಭಿಕ್ಖುಂ ಉಪಸಙ್ಕಮಿತ್ವಾ ಪಞ್ಹಂ ಪುಚ್ಛೇಯ್ಯಂ.

ಯೇ ಧಮ್ಮಾ ಹೇತುಪ್ಪಭವಾ,

ತೇಸಂ ಹೇತುಂ ತಥಾಗತೋ;

ಆಹ ತೇಸಞ್ಚ ಯೋ ನಿರೋಧೋ,

ಏವಂವಾದೀ ಮಹಾಸಮಣೋ –

ಲಭೇಯ್ಯಾಮ ಮಯಂ ಭನ್ತೇ ಭಗವತೋ ಸನ್ತಿಕೇ ಪಬ್ಬಜ್ಜಂ, ಲಭೇಯ್ಯಾಮ ಉಪಸಮ್ಪದಂ.

ಏತದಗ್ಗಂ ಭಿಕ್ಖವೇ ಮಮ ಸಾವಕಾನಂ ಭಿಕ್ಖೂನಂ ಮಹಾಪಞ್ಞಾನಂ ಯದಿದಂ ಸಾರಿಪುತ್ತೋ.

ಏತದಗ್ಗಂ ಭಿಕ್ಖವೇ ಮಮ ಸಾವಕಾನಂ ಭಿಕ್ಖೂನಂ ಇದ್ಧಿಮನ್ತಾನಂ ಯದಿದಂ ಮಹಾಮೋಗ್ಗಲ್ಲಾನೋ.

ಮಹಾಕಸ್ಸಪವತ್ಥು

ಪುಚ್ಛಾ – ಆಯಸ್ಮಾ ಪನ ಆವುಸೋ ಮಹಾಕಸ್ಸಪತ್ಥೇರೋ ಪಠಮಮಹಾಸಂಗೀತಿಕಾಲೇ ಪಾಮೋಕ್ಖಸಙ್ಘನಾಯಕಭೂತೋ ಭಗವತಾ ಕಥಂ ಏತದಗ್ಗಟ್ಠಾನೇ ಠಪಿತೋ.

ವಿಸ್ಸಜ್ಜನಾ – ಆಯಸ್ಮಾ ಭನ್ತೇ ಮಹಾಕಸ್ಸಪತ್ಥೇರೋ ಪಠಮಮಹಾಸಂಗೀತಿಕಾಲೇ ಸಙ್ಘಪಾಮೋಕ್ಖಭೂತೋ ‘‘ಏತದಗ್ಗಂ ಭಿಕ್ಖವೇ ಮಮ ಸಾವಕಾನಂ ಭಿಕ್ಖೂನಂ ಧುತವಾದಾನಂ ಯದಿದಂ ಮಹಾಕಸ್ಸಪೋ’’ತಿ. ಏವಂ ಖೋ ಭನ್ತೇ ಭಗವತಾ ಏತದಗ್ಗಟ್ಠಾನೇ ಠಪಿತೋ.

ಅನುರುದ್ಧತ್ಥೇರವತ್ಥು

ಪುಚ್ಛಾ – ತೇನಾವುಸೋ…ಪೇ… ಸಮ್ಮಾಸಮ್ಬುದ್ಧೇನ ಅಙ್ಗುತ್ತರನಿಕಾಯೇ ಏಕಕನಿಪಾತೇ ಏತದಗ್ಗವಗ್ಗೇ ಆಗತೇಸು ಏಕಚತ್ತಾಲೀಸಾಯ ಮಹಾಥೇರೇಸು ಆಯಸ್ಮಾ ಅನುರುದ್ಧತ್ಥೇರೋ ಕಥಂ ಏತದಗ್ಗಟ್ಠಾನೇ ಠಪಿತೋ.

ವಿಸ್ಸಜ್ಜನಾ – ಆಯಸ್ಮಾ ಭನ್ತೇ ಅನುರುದ್ಧತ್ಥೇರೋ ‘‘ಏತದಗ್ಗಂ ಭಿಕ್ಖವೇ ಮಮ ಸಾವಕಾನಂ ಭಿಕ್ಖೂನಂ ದಿಬ್ಬಚಕ್ಖುಕಾನಂ ಯದಿದಂ ಅನುರುದ್ಧೋ’’ತಿ ಏವಂ ಖೋ ಭನ್ತೇ ಭಗವತಾ ಏತದಗ್ಗಟ್ಠಾನೇ ಠಪಿತೋ.

ಸೀವಲಿವತ್ಥು

ಪುಚ್ಛಾ – ಆಯಸ್ಮಾ ಪನ ಆವುಸೋ ಸೀವಲಿತ್ಥೇರೋ ಭಗವತಾ ಕಥಂ ಏತದಗ್ಗಟ್ಠಾನೇ ಠಪಿತೋ.

ವಿಸ್ಸಜ್ಜನಾ – ಆಯಸ್ಮಾ ಭನ್ತೇ ಸೀವಲಿತ್ಥೇರೋ ‘‘ಏತದಗ್ಗಂ ಭಿಕ್ಖವೇ ಮಮ ಸಾವಕಾನಂ ಭಿಕ್ಖೂನಂ ಲಾಭೀನಂ ಯದಿದಂ ಸೀವಲೀ’’ತಿ ಏವಂ ಖೋ ಭನ್ತೇ ಭಗವತಾ ಏತದಗ್ಗಟ್ಠಾನೇ ಠಪಿತೋ.

ಸಮ್ಮಾಸಮ್ಬುದ್ಧೋ ವತ ಸೋ ಭಗವಾ, ಯೋ ಇಮಸ್ಸ ಏವರೂಪಸ್ಸ ದುಕ್ಖಸ್ಸ ಪಹಾನಾಯ ಧಮ್ಮಂ ದೇಸೇತಿ.

ಸುಪ್ಪಟಿಪನ್ನೋ ವತ ತಸ್ಸ ಭಗವತೋ ಸಾವಕಸಙ್ಘೋ, ಯೋ ಇಮಸ್ಸ ಏವರೂಪಸ್ಸ ದುಕ್ಖಸ್ಸ ಪಹಾನಾಯ ಪಟಿಪನ್ನೋ.

ಸುಸುಖಂ ವತ ನಿಬ್ಬಾನಂ, ಯತ್ಥಿದಂ ಏವರೂಪಂ ದುಕ್ಖಂ ನ ಸಂವಿಜ್ಜತಿ –

‘‘ಏತದಗ್ಗಂ ಭಿಕ್ಖವೇ ಮಮ ಸಾವಕಾನಂ ಭಿಕ್ಖೂನಂ ಲಾಭೀನಂ ಯದಿದಂ ಸೀವಲಿ’’ ಹು –

ಆನನ್ದಾಥೇರವತ್ಥು

ಪುಚ್ಛಾ – ಆಯಸ್ಮಾ ಪನ ಆವುಸೋ ಆನನ್ದತ್ಥೇರೋ ಧಮ್ಮಭಣ್ಡಾಗಾರಿಕೋ ಪಠಮಮಹಾಸಂಗೀತಿಕಾಲೇ ಧಮ್ಮವಿಸ್ಸಜ್ಜಕಥೇರಭೂತೋ ಕಥಂ ಭಗವತಾ ಏತದಗ್ಗಟ್ಠಾನೇ ಠಪಿತೋ.

ವಿಸ್ಸಜ್ಜನಾ – ಆಯಸ್ಮಾ ಭನ್ತೇ ಆನನ್ದತ್ಥೇರೋ ಧಮ್ಮಭಣ್ಡಾಗಾರಿಕೋ ಪಠಮಮಹಾಸಂಗೀತಿಕಾಲೇ ಧಮ್ಮವಿಸ್ಸಜ್ಜಕಭೂತೋ ‘‘ಏತದಗ್ಗಂ ಭಿಕ್ಖವೇ ಮಮ ಸಾವಕಾನಂ ಭಿಕ್ಖೂನಂ ಬಹುಸ್ಸುತಾನಂ ಯದಿದಂ ಆನನ್ದೋ. ಏತದಗ್ಗಂ ಭಿಕ್ಖವೇ ಮಮ ಸಾವಕಾನಂ ಭಿಕ್ಖೂನಂ ಸತಿಮನ್ತಾನಂ ಯದಿದಂ ಆನನ್ದೋ. ಏತದಗ್ಗಂ ಭಿಕ್ಖವೇ ಮಮ ಸಾವಕಾನಂ ಭಿಕ್ಖೂನಂ ಗತಿಮನ್ತಾನಂ ಯದಿದಂ ಆನನ್ದೋ. ಏತದಗ್ಗಂ ಭಿಕ್ಖವೇ ಮಮ ಸಾವಕಾನಂ ಭಿಕ್ಖೂನಂ ಧಿತಿಮನ್ತಾನಂ ಯದಿದಂ ಆನನ್ದೋ. ಏತದಗ್ಗಂ ಭಿಕ್ಖವೇ ಮಮ ಸಾವಕಾನಂ ಭಿಕ್ಖೂನಂ ಉಪಟ್ಠಾಕಾನಂ ಯದಿದಂ ಆನನ್ದೋ’’ತಿ ಏವಂ ಖೋ ಭನ್ತೇ ಭಗವತಾ ಪಞ್ಚಸು ಏತದಗ್ಗಟ್ಠಾನೇಸು ಠಪಿತೋ.

ಸತಸಹಸ್ಸೇನ ಮೇ ಕೀತಂ,

ಸತಸಹಸ್ಸೇನ ಮಾಪಿತಂ;

ಸೋಭನಂ ನಾಮ ಉಯ್ಯಾನಂ;

ಪಟಿಗ್ಗಣ್ಹ ಮಹಾಮುನಿ –

‘‘ಏತದಗ್ಗಂ ಭಿಕ್ಖವೇ ಮಮ ಸಾವಕಾನಂ ಭಿಕ್ಖೂನಂ ಬಹುಸ್ಸುತಾನಂ. ಸತಿಮನ್ತಾನಂ. ಗತಿಮನ್ತಾನಂ. ಧಿತಿಮನ್ತಾನಂ. ಉಪಟ್ಠಾಕಾನಂ ಯದಿದಂ ಆನನ್ದೋ’’ –

ಉಪಾಲಿವತ್ಥು

ಪುಚ್ಛಾ – ತೇನಾವುಸೋ ಭಗವತಾ…ಪೇ… ಸಮ್ಮಾಸಮ್ಬುದ್ಧೇನ ಅಙ್ಗುತ್ತರನಿಕಾಯೇ ಏಕಕನಿಪಾತೇ ಏತದಗ್ಗವಗ್ಗೇ ಆಗತೇಸು ಏಕಚತ್ತಾಲೀಸಾಯ ಮಹಾಥೇರೇಸು ಆಯಸ್ಮಾ ಉಪಾಲಿತ್ಥೇರೋ ಪಠಮಮಹಾಸಂಗೀತಿಕಾಲೇ ವಿನಯವಿಸ್ಸಜ್ಜಕಭೂತೋ ಕಥಂ ಏತದಗ್ಗಟ್ಠಾನೇ ಠಪಿತೋ.

ವಿಸ್ಸಜ್ಜನಾ – ಆಯಸ್ಮಾ ಭನ್ತೇ ಉಪಾಲಿತ್ಥೇರೋ ಪಠಮಮಹಾಸಂಗೀತಿಕಾಲೇ ವಿನಯವಿಸ್ಸಜ್ಜಕಭೂತೋ ‘‘ಏತದಗ್ಗಂ ಭಿಕ್ಖವೇ ಮಮ ಸಾವಕಾನಂ ಭಿಕ್ಖೂನಂ ವಿನಯಧರಾನಂ ಯದಿದಂ ಉಪಾಲೀ’’ತಿ ಏವಂ ಖೋ ಭನ್ತೇ ಭಗವತಾ ಏತದಗ್ಗಟ್ಠಾನೇ ಠಪಿತೋ.

ವಿನಯೋ ವಾಸಯೋ ಮಯ್ಹಂ,

ವಿನಯೋ ಠಾನಚಙ್ಕಮಂ;

ಕಪ್ಪೇಮಿ ವಿನಯೇ ವಾಸಂ,

ವಿನಯೋ ಮಮ ಗೋಚರೋ.

ಮಹಾಪಜಾಪತಿಗೋತಮೀಥೇರೀವತ್ಥು

ಪುಚ್ಛಾ – ಏತದಗ್ಗವಗ್ಗೇ ಆವುಸೋ ಆಗತಾಸು ತೇರಸಸು ಥೇರೀಸು ಮಹಾಪಜಾಪತಿ ಗೋತಮೀಥೇರೀ ಕಥಂ ಭಗವತಾ ಏತದಗ್ಗಟ್ಠಾನೇ ಠಪಿತಾ.

ವಿಸ್ಸಜ್ಜನಾ – ಏತದಗ್ಗವಗ್ಗೇ ಭನ್ತೇ ಆಗತಾಸು ತೇರಸಸು ಥೇರೀಸು ಮಹಾಪಜಾಪತಿಗೋತಮೀಥೇರೀ ‘‘ಏತದಗ್ಗಂ ಭಿಕ್ಖವೇ ಮಮ ಸಾವಿಕಾನಂ ಭಿಕ್ಖುನೀನಂ ರತ್ತಞ್ಞೂನಂ ಯದಿದಂ ಮಹಾಪಜಾಪತಿ ಗೋತಮೀ’’ತಿ ಏವಂ ಖೋ ಭನ್ತೇ ಭಗವತಾ ಏತದಗ್ಗಟ್ಠಾನೇ ಠಪಿತಾ.

‘‘ಏತದಗ್ಗಂ ಭಿಕ್ಖವೇ ಮಮ ಸಾವಿಕಾನಂ ಭಿಕ್ಖುನೀನಂ ರತ್ತಞ್ಞೂನಂ ಯದಿದಂ ಮಹಾಪಜಾಪತಿಗೋತಮೀ’’ –

ಪುಚ್ಛಾ – ಖೇಮಾಥೇರೀ ಪನ ಆವುಸೋ ಅಗ್ಗಸಾವಿಕಾ ಭಗವತಾ ಕಥಂ ಏತದಗ್ಗಟ್ಠಾನೇ ಠಪಿತಾ.

ವಿಸ್ಸಜ್ಜನಾ – ಖೇಮಾಥೇರೀ ಭನ್ತೇ ಪಠಮಾ ಅಗ್ಗಸಾವಿಕಾ ‘‘ಏತದಗ್ಗಂ ಭಿಕ್ಖವೇ ಮಮ ಸಾವಿಕಾನಂ ಭಿಕ್ಖುನೀನಂ ಮಹಾಪಞ್ಞಾನಂ ಯದಿದಂ ಖೇಮಾ’’ತಿ ಏವಂ ಖೋ ಭನ್ತೇ ಭಗವತಾ ಏತದಗ್ಗಟ್ಠಾನೇ ಠಪಿತಾ.

‘‘ಯೇ ರಾಗರತ್ತಾನುಪತನ್ತಿ ಸೋತಂ,

ಸಯಂಕತಂ ಮಕ್ಕಟೋವ ಜಾಲಂ,

ಏತಮ್ಪಿ ಛೇತ್ವಾನ ವಜನ್ತಿ ಧೀರಾ;

ಅನಪೇಕ್ಖಿನೋ ಸಬ್ಬದುಕ್ಖಂ ಪಹಾಯ’’ –

‘‘ಏತದಗ್ಗಂ ಭಿಕ್ಖವೇ ಮಮ ಸಾವಿಕಾನಂ ಭಿಕ್ಖುನೀನಂ ಮಹಾಪಞ್ಞಾನಂ ಯದಿದಂ ಖೇಮಾ’’ –

ಪುಚ್ಛಾ – ಉಪ್ಪಲವಣ್ಣಾ ಪನ ಆವುಸೋ ಥೇರೀ ದುತಿಯಅಗ್ಗಸಾವಿಕಾ ಭಗವತಾ ಕಥಂ ಏತದಗ್ಗಟ್ಠಾನೇ ಠಪಿತಾ.

ವಿಸ್ಸಜ್ಜನಾ – ಉಪ್ಪಲವಣ್ಣಾ ಭನ್ತೇ ಥೇರೀ ದುತಿಯಅಗ್ಗಸಾವಿಕಾ ‘‘ಏತದಗ್ಗಂ ಭಿಕ್ಖವೇ ಮಮ ಸಾವಿಕಾನಂ ಭಿಕ್ಖುನೀನಂ ಇದ್ಧಿಮನ್ತೀನಂ ಯದಿದಂ ಉಪ್ಪಲವಣ್ಣಾ’’ತಿ ಏವಂ ಖೋ ಭನ್ತೇ ಭಗವತಾ ಏತದಗ್ಗಟ್ಠಾನೇ ಠಪಿತಾ.

‘‘ಏತದಗ್ಗಂ ಭಿಕ್ಖವೇ ಮಮ ಸಾವಿಕಾನಂ ಭಿಕ್ಖುನೀನಂ ಇದ್ಧಿಮನ್ತೀನಂ ಯದಿದಂ ಉಪ್ಪಲವಣ್ಣಾ’’ –

ಪಟಾಚಾರಾಥೇರೀಭಿಕ್ಖುನೀಮವತ್ಥು

ಪುಚ್ಛಾ – ತೇನಾವುಸೋ ಭಗವತಾ…ಪೇ… ಸಮ್ಮಾಸಮ್ಬುದ್ಧೇನ ಅಙ್ಗುತ್ತರನಿಕಾಯೇ ಏಕಕನಿಪಾತೇ ಏತದಗ್ಗವಗ್ಗೇ ಆಗತಾಸು ತೇರಸಸು ಥೇರೀಸು ಪಟಾಚಾರಾನಾಮ ಥೇರೀ ಕಥಂ ಏತದಗ್ಗಟ್ಠಾನೇ ಠಪಿತಾ.

ವಿಸ್ಸಜ್ಜನಾ – ಏತದಗ್ಗವಗ್ಗೇ ಭನ್ತೇ ಆಗತಾಸು ತೇರಸಸು ಥೇರಿಕಾಸು ಪಟಾಚಾರಾ ಥೇರೀ ‘‘ಏತದಗ್ಗಂ ಭಿಕ್ಖವೇ ಮಮ ಸಾವಿಕಾನಂ ಭಿಕ್ಖುನೀನಂ ವಿನಯಧರಾನಂ ಯದಿದಂ ಪಟಾಚಾರಾ’’ತಿ ಏವಂ ಖೋ ಭನ್ತೇ ಭಗವತಾ ಏತದಗ್ಗಟ್ಠಾನೇ ಠಪಿತಾ.

‘‘ಉಭೋ ಪುತ್ತಾ ಕಾಲಙ್ಕತಾ,

ಪನ್ಥೇ ಮಯ್ಹಂ ಪತೀ ಮತೋ;

ಮಾತಾಪಿತಾ ಚ ಭಾತಾ ಚ,

ಏಕಚಿತಕಸ್ಮಿಂ ಡಯ್ಹರೇ’’ –

‘‘ಚತೂಸು ಸಮುದ್ದೇಸು ಜಲಂ ಪರಿತ್ತಕಂ,

ತತೋ ಬಹುಂ ಅಸ್ಸುಜಲಂ ಅನಪ್ಪಕಂ;

ದುಕ್ಖೇನ ಫುಟ್ಠಸ್ಸ ನರಸ್ಸ ಸೋಚನಾ,

ಕಿಂ ಕಾರಣಾ ಅಮ್ಮ ತುವಂ ಪಮಜ್ಜಸಿ’’ –

‘‘ನ ಸನ್ತಿ ಪುತ್ತಾ ತಾಣಾಯ,

ನ ಪಿತಾ ನಾಪಿ ಬನ್ಧವಾ;

ಅನ್ತಕೇನಾಧಿಪನ್ನಸ್ಸ,

ನತ್ಥಿ ಞಾತೀಸು ತಾಣತಾ;

ಏತಮತ್ಥವಸಂ ಞತ್ವಾ, ಪಣ್ಡಿತೋ ಸೀಲಸಂವುತೋ;

ನಿಬ್ಬಾನಗಮನಂ ಮಗ್ಗಂ, ಖಿಪ್ಪಮೇವ ವಿಸೋಧಯೇ’’ –

‘‘ಯೋ ಚ ವಸ್ಸಸತಂ ಜೀವೇ,

ಅಪಸ್ಸಂ ಉದಯಬ್ಬಯಂ;

ಏಕಾಹಂ ಜೀವಿತಂ ಸೇಯ್ಯೋ,

ಪಸ್ಸತೋ ಉದಯಬ್ಬಯಂ’’ –

‘‘ಏತದಗ್ಗಂ ಭಿಕ್ಖವೇ ಮಮ ಸಾವಿಕಾನಂ ಭಿಕ್ಖುನೀನಂ ವಿನಯಧರಾನಂ ಯದಿದಂ ಪಟಾಚಾರಾ’’ –

ಧಮ್ಮದಿನ್ನಾಥೇರೀಭಿಕ್ಖುನೀಮವತ್ಥು

ಪುಚ್ಛಾ – ಧಮ್ಮದಿನ್ನಾ ಪನ ಆವುಸೋ ಥೇರೀ ಭಗವತಾ ಕಥಂ ಏತದಗ್ಗಟ್ಠಾನೇ ಠಪಿತಾ.

ವಿಸ್ಸಜ್ಜನಾ – ಧಮ್ಮದಿನ್ನಾ ಭನ್ತೇ ಥೇರೀ ‘‘ಏತದಗ್ಗಂ ಭಿಕ್ಖವೇ ಮಮ ಸಾವಿಕಾನಂ ಭಿಕ್ಖುನೀನಂ ಧಮ್ಮಕಥಿಕಾನಂ ಯದಿದಂ ಧಮ್ಮದಿನ್ನಾ’’ತಿ ಏವಂ ಖೋ ಭನ್ತೇ ಭಗವತಾ ಏತದಗ್ಗಟ್ಠಾನೇ ಠಪಿತಾ.

‘‘ಯಸ್ಸ ಪುರೇ ಚ ಪಚ್ಛಾ ಚ,

ಮಜ್ಝೇಚ ನತ್ಥಿ ಕಿಞ್ಚನಂ;

ಅಕಿಞ್ಚನಂ ಅನಾದಾನಂ,

ತಮಹಂ ಬ್ರೂಮಿ ಬ್ರಾಹ್ಮಣಂ’’ –