ಗಾಮಣಿಸಂಯುತ್ತ

ಚಣ್ಡಸುತ್ತ

ಪುಚ್ಛಾ – ತೇನಾವುಸೋ ಭಗವತಾ…ಪೇ… ಸಮ್ಮಾಸಮ್ಬುದ್ಧೇನ ಗಾಮಣಿಸಂಯುತ್ತೇ ಪಠಮಂ ಚಣ್ಡಸುತ್ತಂ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಚಣ್ಡಂ ಗಾಮಣಿಂ ಆರಬ್ಭ ಭಾಸಿತಂ. ಚಣ್ಡೋ ಭನ್ತೇ ಗಾಮಣಿ ಭಗವನ್ತಂ ಏತದವೋಚ ‘‘ಕೋ ನು ಖೋ ಭನ್ತೇ ಹೇತು ಕೋ ಪಚ್ಚಯೋ, ಯೇನ ಮಿಧೇಕಚ್ಚೋ ಚಣ್ಡೋ ಚಣ್ಡೋತ್ವೇವ ಸಙ್ಖಂ ಗಚ್ಛತಿ. ಕೋ ಪನ ಭನ್ತೇ ಹೇತು ಕೋ ಪಚ್ಚಯೋ, ಯೇನ ಮಿಧೇಕಚ್ಚೋ ಸೋರತೋ ಸೋರತೋತ್ವೇವ ಸಙ್ಖಂ ಗಚ್ಛತೀ’’ತಿ. ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ಇಧ ಗಾಮಣಿ ಏಕಚ್ಚಸ್ಸ ರಾಗೋ ಅಪ್ಪಹೀನೋ ಹೋತಿ, ರಾಗಸ್ಸ ಅಪ್ಪಹೀನತ್ತಾ ಪರೇ ಕೋಪೇನ್ತಿ, ಪರೇಹಿ ಕೋಪಿಯಮಾನೋ ಕೋಪಂ ಪಾತುಕರೋತಿ, ಸೋ ಚಣ್ಡೋತ್ವೇವ ಸಙ್ಖಂ ಗಚ್ಛತೀ’’ತಿ ಏವಮಾದಿನಾ ಭಗವತಾ ಭಾಸಿತಂ.

ಖೇತ್ತೂಪಮಸುತ್ತ

ಪುಚ್ಛಾ – ತತ್ಥೇವ ಆವುಸೋ ಪೋರಾಣಕೇಹಿ ಧಮ್ಮಸಂಗಾಹಕಮಹಾಥೇರೇಹಿ ಸತ್ತಮಂ ಸಂಗೀತಂ ಖೇತ್ತೂಪಮಸುತ್ತಂ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ.

ವಿಸ್ಸಜ್ಜನಾ – ನಾಳನ್ದಾಯಂ ಭನ್ತೇ ಪಾವಾರಿಕಮ್ಬವನೇ ಅಸಿಬನ್ಧಕಪುತ್ತಂ ಗಾಮಣಿಂ ಆರಬ್ಭ ಭಾಸಿತಂ. ಅಸಿಬನ್ಧಕಪುತ್ತೋ ಭನ್ತೇ ಗಾಮಣಿ ಭಗವನ್ತಂ ಏತದವೋಚ ‘‘ನನು ಭನ್ತೇ ಭಗವಾ ಸಬ್ಬಪಾಣಭೂತಹಿತಾನುಕಮ್ಪೀ ವಿಹರತೀತಿ. ಏವಂ ಗಾಮಣಿ ತಥಾಗತೋ ಸಬ್ಬಪಾಣಭೂತಹಿತಾನುಕಮ್ಪೀ ವಿಹರತೀತಿ. ಅಥ ಕಿಞ್ಚರಹಿ ಭನ್ತೇ ಭಗವಾ ಏಕಚ್ಚಾನಂ ಸಕ್ಕಚ್ಚಂ ಧಮ್ಮಂ ದೇಸೇತಿ, ಏಕಚ್ಚಾನಂ ನೋ ತಥಾ ಸಕ್ಕಚ್ಚಂ ಧಮ್ಮಂ ದೇಸೇತೀ’’ತಿ. ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ತೇನ ಹಿ ಗಾಮಣಿ ತಞ್ಞೇವೇತ್ಥ ಪಟಿಪುಚ್ಛಿಸ್ಸಾಮಿ, ಯಥಾ ತೇ ಖಮೇಯ್ಯ, ತಥಾ ನಂ ಬ್ಯಾಕರೇಯ್ಯಾಸೀ’’ತಿ ಏವಮಾದಿನಾ ಭಗವತಾ ಭಾಸಿತಂ.

ಸಙ್ಖಧಮಸುತ್ತ

ಪುಚ್ಛಾ – ತತ್ಥೇವ ಆವುಸೋ ಪೋರಾಣಕೇಹಿ ಧಮ್ಮಸಂಗಾಹಕ ಮಹಾಥೇರೇಹಿ ಅಟ್ಠಮಂ ಸಂಗೀತಂ ಸಙ್ಖಧಮಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ.

ವಿಸ್ಸಜ್ಜನಾ – ನಾಳನ್ದಾಯಂಯೇವ ಭನ್ತೇ ಪಾವಾರಿಕಮ್ಬವನೇ ಅಸಿಬನ್ಧಕಪುತ್ತಂ ಗಾಮಣಿಂ ನಿಗಣ್ಠಸಾವಕಂ ಆರಬ್ಭ ಭಾಸಿತಂ. ಭಗವಾ ಭನ್ತೇ ಅಸಿಬನ್ಧಕಪುತ್ತಂ ಗಾಮಣಿಂ ನಿಗಣ್ಠಸಾವಕಂ ಏತದವೋಚ ‘‘ಕಥಂ ನು ಖೋ ಗಾಮಣಿ ನಿಗಣ್ಠೋ ನಾಟಪುತ್ತೋ ಸಾವಕಾನಂ ಧಮ್ಮಂ ದೇಸೇತೀ’’ತಿ. ಏವಂ ಖೋ ಭನ್ತೇ ನಿಗಣ್ಠೋ ನಾಟಪುತ್ತೋ ಸಾವಕಾನಂ ಧಮ್ಮಂ ದೇಸೇತಿ ‘‘ಯೋ ಕೋಚಿ ಪಾಣಂ ಅತಿಪಾತೇತಿ, ಸಬ್ಬೋ ಸೋ ಆಪಾಯಿಕೋ ನೇರಯಿಕೋ. (ಪೇಯ್ಯಾಲ) ಯಂಬಹುಲಂ ಯಂಬಹುಲಂ ವಿಹರತಿ, ತೇನ ತೇನ ನೀಯತೀ’’ತಿ. ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ಯಂಬಹುಲಂ ಯಂಬಹುಲಞ್ಚ ಗಾಮಣಿ ವಿಹರತಿ, ತೇನ ತೇನ ನೀಯತಿ, ಏವಂ ಸನ್ತೇ ನ ಕೋಚಿ ಆಪಾಯಿಕೋ ನೇರಯಿಕೋ ಭವಿಸ್ಸತಿ, ಯಥಾ ನಿಗಣ್ಠಸ್ಸ ನಾಟಪುತ್ತಸ್ಸ ವಚನ’’ನ್ತಿ ಏವಂ ಖೋ ಭಗವತಾ ಸಂಖಿತ್ತೇನ ಭಾಸಿತಂ.

ಯಂ ಬಹುಲವಾದ

ಪುಚ್ಛಾ – ಕಥಞ್ಚಾವುಸೋ ತತ್ಥ ಭಗವತಾ ಯಂಬಹುಲವಾದೇ ದೋಸೋ ಪಕಾಸಿತೋ.

ವಿಸ್ಸಜ್ಜನಾ – ತಂ ಕಿಂ ಮಞ್ಞಸಿ ಗಾಮಣಿ, ಯೋ ಸೋ ಪುರಿಸೋ ಪಾಣಾತಿಪಾತೀ ರತ್ತಿಯಾ ವಾ ದಿವಸಸ್ಸ ವಾ ಸಮಯಾಸಮಯಂ ಉಪಾದಾಯ ಕತಮೋ ಬಹುತರೋ ಸಮಯೋ ಯಂ ವಾಸೋ ಪಾಣಮತಿಪಾತೇತಿ. ಯಂ ವಾ ಸೋ ಪಾಣಂ ನಾತಿಪಾತೇತೀತಿ ಏವಮಾದಿನಾ ಭನ್ತೇ ತತ್ಥ ಭಗವತಾ ಅಸಿಬನ್ಧಕಂ ನಿಗಣ್ಠನಾಟಪುತ್ತಸ್ಸ ಸಾವಕಂ ಗಾಮಣಿಂ ಪುಚ್ಛಿತ್ವಾ ಪುಚ್ಛಿತ್ವಾ ಯಂಬಹುಲವಾದೇ ದೋಸೋ ಪಕಾಸಿತೋ.

ಪುಚ್ಛಾ – ಕಥಞ್ಚಾವುಸೋ ತತ್ಥ ಭಗವತಾ ಅನೇಕಂಸ ವಿಪಾಕಕಮ್ಮಸ್ಸ ಏಕಂ ಸವಿಪಾಕವಾದೇ ದೋಸೋ ಪಕಾಸಿತೋ.

ವಿಸ್ಸಜ್ಜನಾ – ಇಧ ಗಾಮಣಿ ಏಕಚ್ಚೋ ಸತ್ಥಾ ಏವಂವಾದೀ ಹೋತಿ ಏವಂದಿಟ್ಠಿ ಯೋ ಕೋಚಿ ಪಾಣಮತಿಪಾತೇತಿ, ಸಬ್ಬೋ ಸೋ ಆಪಾಯಿಕೋ ನೇರಯಿಕೋತಿ ಏವಮಾದಿನಾ ಭನ್ತೇ ತತ್ಥ ಭಗವತಾ ಅನೇಕಂಸ ಕಮ್ಮವಿಪಾಕಸ್ಸ ಏಕಂಸವಿಪಾಕವಾದೇ ದೋಸೋ ವಿತ್ಥಾರೇತ್ವಾ ಪಕಾಸಿತೋ.

ಪುಚ್ಛಾ – ಕಥಞ್ಚಾವುಸೋ ತತ್ಥ ಭಗವತಾ ಯಥಾಧಮ್ಮಸಾಸನೇ ಗುಣೋವಿಭಜಿತ್ವಾ ಪಕಾಸಿತೋ.

ವಿಸ್ಸಜ್ಜನಾ – ಇಧ ಪನ ಗಾಮಣಿ ತಥಾಗತೋ ಲೋಕೇ ಉಪ್ಪಜ್ಜತಿ ಅರಹಂ ಸಮ್ಮಾಸಮ್ಬುದ್ಧೋ ವಿಜ್ಜಾಚರಣಸಮ್ಪನ್ನೋ ಸುಗತೋ ಲೋಕವಿದೂ ಅನುತ್ತರೋಪುರಿಸ ದಮ್ಮಸಾರಥಿ ಸತ್ಥಾದೇವಮನುಸ್ಸಾನಂ ಬುದ್ಧೋ ಭಗವಾ, ಸೋ ಅನೇಕಪರಿಯಾಯೇನ ಪಾಣಾತಿಪಾತಂ ಗರಹತಿ ವಿಗರಹತಿ. ‘‘ಪಾಣಾತಿಪಾತಾ ವಿರಮಥಾ’’ತಿ ಚಾಹಾತಿ ಏವಮಾದಿನಾ ಭನ್ತೇ ಭಗವತಾ ತತ್ಥ ಯಥಾಧಮ್ಮಸಾಸನೇ ಗುಣೋ ವಿತ್ಥಾರೇತ್ವಾ ಪಕಾಸಿತೋ.

ಭದ್ರಕಸುತ್ತ

ಪುಚ್ಛಾ – ತತ್ಥೇವ ಆವುಸೋ ಪೋರಾಣಕೇಹಿ ಧಮ್ಮಸಂಗಾಹಕಮಹಾಥೇರೇಹಿ ಏಕಾದಸಮಂ ಸಂಗೀತಂ ಭದ್ರಕಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ.

ವಿಸ್ಸಜ್ಜನಾ – ಮಲ್ಲೇಸು ಭನ್ತೇ ಉರುವೇಲಕಪ್ಪೇನಾಮ ಮಲ್ಲಾನಂ ನಿಗಮೇ ಭದ್ರಕಂ ಗಾಮಣಿಂ ಆರಬ್ಭ ಭಾಸಿತಂ. ಭದ್ರಕೋ ಭನ್ತೇ ಗಾಮಣಿ ಭಗವನ್ತಂ ಏತದವೋಚ ‘‘ಸಾಧು ಮೇ ಭನ್ತೇ ಭಗವಾ ದುಕ್ಖಸ್ಸ ಸಮುದಯಞ್ಚ ಅತ್ಥಙ್ಗಮಞ್ಚ ದೇಸೇತೂ’’ತಿ. ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ಅಹಞ್ಚೇ ತೇ ಗಾಮಣಿ ಅತೀತಮದ್ಧಾನಂ ಆರಬ್ಭ ದುಕ್ಖಸ್ಸ ಸಮುದಯಞ್ಚ ಅತ್ಥಙ್ಗಮಞ್ಚ ದೇಸೇಯ್ಯಂ ‘ಏವಂ ಅಹೋಸಿ ಅತೀತಮದ್ಧಾನ’ನ್ತಿ. ತತ್ರ ತೇ ಸಿಯಾ ಕಙ್ಖಾ ಸಿಯಾ ವಿಮತೀ’’ತಿ ಏವಮಾದಿನಾ ಭಗವತಾ ಭಾಸಿತಂ.

ಸಾಧು ಮೇ ಭನ್ತೇ ಭಗವಾ ದುಕ್ಖಸ್ಸ

ಸಮುದಯಞ್ಚ ಅತ್ಥಙ್ಗಮಞ್ಚ ದೇಸೇತು–

‘‘ತಂ ಕಿಂ ಮಞ್ಞಸಿ ಗಾಮಣಿ, ಅತ್ಥಿ ಉರುವೇಲಕಪ್ಪೇ ಮನುಸ್ಸಾ’’ –

ರಾಸಿಯಸುತ್ತ

ಪುಚ್ಛಾ – ತೇನಾವುಸೋ ಭಗವತಾ…ಪೇ… ಸಮ್ಮಾಸಮ್ಬುದ್ಧೇನ ಗಾಮಣಿಸಂಯುತ್ತೇ ದ್ವಾದಸಮಂ ಸಂಗೀತಂ ರಾಸಿಯಸುತ್ತಂ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ.

ವಿಸ್ಸಜ್ಜನಾ – ಮಲ್ಲೇಸು ಭನ್ತೇ ಉರುವೇಲಕಪ್ಪೇನಾಮ ಮಲ್ಲಾನಂ ನಿಗಮೇ ರಾಸಿಯಂ ಗಾಮಣಿಂ ಆರಬ್ಭ ಭಾಸಿತಂ. ರಾಸಿಯೋ ಭನ್ತೇ ಗಾಮಣಿ ಭಗವನ್ತಂ ಉಪಸಙ್ಕಮಿತ್ವಾ ಏತದದೋಚ ‘‘ಸುತಂ ಮೇ ಭನ್ತೇ ‘ಸಮಣೋ ಗೋತಮೋ ಸಬ್ಬಂ ತಪಂ ಗರಹತಿ, ಸಬ್ಬಂ ತಮಸ್ಸಿಂ ಲೂಖಜೀವಿಂ ಏಕಂಸೇನ ಉಪವದತಿ ಉಪಕ್ಕೋಸತೀ’’ತಿ. ಯೇ ತೇ ಭನ್ತೇ ಏವಮಾಹಂಸು ‘ಸಮಣೋ ಗೋತಮೋ ಸಬ್ಬಂ ತಪಂ ಗರಹತಿ, ಸಬ್ಬಂ ತಪಸ್ಸಿಂ ಲೂಖಜೀವಿಂ ಏಕಂಸೇನ ಉಪವದತಿ ಉಪಕ್ಕೋಸತೀ’’ತಿ. ಕಚ್ಚಿ ತೇ ಭನ್ತೇ ಭಗವತೋ ವುತ್ತವಾದಿನೋ, ನ ಚ ಭಗವನ್ತಂ ಅಭೂತೇನ ಅಬ್ಭಾಚಿಕ್ಖನ್ತಿ, ಧಮ್ಮಸ್ಸ ಚಾನುಧಮ್ಮಂ ಬ್ಯಾಕರೋನ್ತೀ’’ತಿ. ತಸ್ಮಿಂ ಭನ್ತೇ ವತ್ಥುಸ್ಮಿಂ ಯೇ ತೇ ಗಾಮಣಿ ಏವಮಾಹಂಸು ‘‘ಸಮಣೋ ಗೋತಮೋ ಸಬ್ಬಂ ತಪಂ ಗರಹತಿ, ಸಬ್ಬಂ ತಪಸ್ಸಿಂ ಲೂಖಜೀವಿಂ ಏಕಂಸೇನ ಉಪವದತಿ ಉಪಕ್ಕೋಸತೀ’’ತಿ ಏವಮಾದಿನಾ ಭಗವತಾ ಭಾಸಿತಂ.

ಪುಚ್ಛಾ – ಕಥಞ್ಚಾವುಸೋ ತತ್ಥ ಭಗವತಾ ಗರಹಿತಬ್ಬಾಗರಹಿತಬ್ಬಾ ಕಾಮಭೋಗಿನೋ ವಿತ್ಥಾರೇನ ವಿಭಜಿತ್ವಾ ಪಕಾಸಿತಾ.

ವಿಸ್ಸಜ್ಜನಾ – ತಯೋ ಖೋ ಮೇ ಗಾಮಣಿ ಕಾಮಭೋಗಿನೋ ಸನ್ತೋ ಸಂವಿಜ್ಜಮಾನಾ ಲೋಕಸ್ಮಿಂ. ಕತಮೇ ತಯೋ. ಇಧ ಗಾಮಣಿ ಏಕಚ್ಚೋ ಕಾಮಭೋಗೀ ಅಧಮ್ಮೇನ ಭೋಗೇ ಪರಿಯೇಸತಿ ಸಾಹಸೇನ, ಅಧಮ್ಮೇನ ಭೋಗೇ ಪರಿಯೇಸಿತ್ವಾ ಸಾಹಸೇನ ನ ಅತ್ತಾನಂ ಸುಖೇತಿ ನ ಪೀಣೇತಿ, ನ ಸಂವಿಭಜತಿ ನ ಪುಞ್ಞಾನಿ ಕರೋತೀತಿ ಏವಮಾದಿನಾ ಭನ್ತೇ ತತ್ಥ ಭಗವತಾ ಗರಹಿತಬ್ಬಾಗರಹಿತಬ್ಬಾ ಕಾಮಭೋಗಿನೋ ವಿತ್ಥಾರೇನ ವಿಭಜಿತ್ವಾ ಪಕಾಸಿತಾ.

ಪುಚ್ಛಾ – ಕಥಞ್ಚಾವುಸೋ ತತ್ಥ ಭಗವತಾ ಗರಹಿತಬ್ಬಾಗರಹಿತಬ್ಬಾ ತಪಸ್ಸಿನೋ ಲೂಖಜೀವಿನೋ ವಿತ್ಥಾರೇನ ವಿಭಜಿತ್ವಾ ಪಕಾಸಿತಾ.

ವಿಸ್ಸಜ್ಜನಾ – ತಯೋ ಮೇ ಗಾಮಣಿ ತಪಸ್ಸಿನೋ ಲೂಖಜೀವಿನೋ ಸನ್ತೋ ಸಂವಿಜ್ಜಮಾನಾ ಲೋಕಸ್ಮಿಂ. ಕತಮೇ ತಯೋ. ಇಧ ಗಾಮಣೀ ಏಕಚ್ಚೋ ತಪಸ್ಸೀ ಲೂಖಜೀವೀ ಸದ್ಧಾ ಅಗಾರಸ್ಮಾ ಅನಗಾರಿಯಂ ಪಬ್ಬಜಿತೋ ಹೋತಿ ‘‘ಅಪ್ಪೇವ ನಾಮ ಕುಸಲಂ ಧಮ್ಮಂ ಅಧಿಗಚ್ಛೇಯ್ಯಂ, ಅಪ್ಪೇವ ನಾಮ ಉತ್ತರಿಮನುಸ್ಸಧಮ್ಮಾ ಅಲಮರಿಯಞಾಣದಸ್ಸನವಿಸೇಸಂ ಸಚ್ಛಿಕರೇಯ್ಯ’’ನ್ತಿ, ಸೋ ಅತ್ತಾನಂ ಆತಾಪೇತಿ ಪರಿತಾಪೇತಿ, ಕುಸಲಞ್ಚ ಧಮ್ಮಂ ನಾಧಿಗಚ್ಛತಿ, ಉತ್ತರಿ ಚ ಮನುಸ್ಸಧಮ್ಮಾ ಅಲಮರಿಯಞಾಣದಸ್ಸನವಿಸೇಸಂ ನ ಸಚ್ಛಿಕರೋತೀತಿ ಏವಮಾದಿನಾ ಭನ್ತೇ ತತ್ಥ ಭಗವತಾ ಗರಹಿತಬ್ಬಾಗರಹಿತಬ್ಬಾ ತಪಸ್ಸಿನೋ ಲೂಖಜೀವಿನೋ ವಿತ್ಥಾರೇನ ವಿಭಜಿತ್ವಾ ಪಕಾಸಿತಾ.