ಅಬ್ಯಾಕತಸಂಯುತ್ತ

ಖೇಮಾಸುತ್ತ

ಪುಚ್ಛಾ – ಅಬ್ಯಾಕತಸಂಯುತ್ತೇ ಪನಾವುಸೋ ಪೋರಾಣಕೇಹಿ ಧಮ್ಮಸಂಗಾಹಕ ಮಹಾಥೇರೇಹಿ ಪಠಮಂ ಸಂಗೀತಂ ಖೇಮಾಸುತ್ತಂ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕೇನ ಕಥಞ್ಚ ಭಾಸಿತಂ. ಕಥಞ್ಚ ತಂ ಭಗವತಾಪಿ ಪುನ ಭಾಸಿತಂ.

ವಿಸ್ಸಜ್ಜನಾ – ಅನ್ತರಾ ಚ ಭನ್ತೇ ಸಾವತ್ಥಿಂ ಅನ್ತರಾ ಚ ಸಾಕೇತಂ ತೋರಣವತ್ಥುಸ್ಮಿಂ ಪದೇಸೇ ರಾಜಾನಂ ಪಸೇನದಿಂ ಕೋಸಲಂ ಆರಬ್ಭ ಖೇಮಾಯ ಭಿಕ್ಖುನಿಯಾ ಭಾಸಿತಂ. ರಾಜಾ ಭನ್ತೇ ಪಸೇನದಿ ಕೋಸಲೋ ಯೇನ ಖೇಮಾ ಭಿಕ್ಖುನೀ ತೇನುಪಸಙ್ಕಮಿ, ಉಪಸಙ್ಕಮಿತ್ವಾ ಅಭಿವಾದೇತ್ವಾ ಏಕಮನ್ತಂ ನಿಸೀದಿ, ಏಕಮನ್ತಂ ನಿಸಿನ್ನೋ ಖೋ ಭನ್ತೇ ರಾಜಾ ಪಸೇನದಿಕೋಸಲೋ ಖೇಮಂ ಭಿಕ್ಖುನಿಂ ಏತದವೋಚ ‘‘ಕಿಂ ನುಖೋ ಅಯ್ಯೇ ಹೋತಿ ತಥಾಗತೋ ಪರಂಮರಣಾ’’ತಿ. ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ಅಬ್ಯಾಕತಂ ಖೋ ಏತಂ ಮಹಾರಾಜ ಭಗವತಾ ಹೋತಿ ತಥಾಗತೋ ಪರಂ ಮರಣಾ’’ತಿ ಏವಮಾದಿನಾ ಖೇಮಾಯ ಭಿಕ್ಖುನಿಯಾ ಭಾಸಿತಂ. ಭಗವತಾ ಚ ಭನ್ತೇ ಅಪರೇನ ಸಮಯೇನ ರಞ್ಞಾ ಪಸೇನದಿಕೋಸಲೇನ ಪುಟ್ಠೇನ ಏವಮೇವ ಪುನ ಭಾಸಿತಂ.

ಕಿಂ ಪನಯ್ಯೇ ನಹೋತಿ ತಥಾಗತೋ ಪರಂ ಮರಣಾ.

ಕುತೂಹಲಸಾಲಾಸುತ್ತ

ಪುಚ್ಛಾ – ತತ್ಥೇವ ಆವುಸೋ ಪೋರಾಣಕೇಹಿ ಧಮ್ಮಸಂಗಾಹಕಮಹಾಥೇರೇಹಿ ನವಮಂ ಸಂಗೀತಂ ಕುತೂಹಲಸಾಲಾಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ.

ವಿಸ್ಸಜ್ಜನಾ – ವೇಸಾಲಿಯಂ ಭನ್ತೇ ವಚ್ಛಗೋತ್ತಂ ಪರಿಬ್ಬಾಜಕಂ ಆರಬ್ಭ ಭಾಸಿತಂ. ವಚ್ಛಗೋತ್ತೋ ಭನ್ತೇ ಪರಿಬ್ಬಾಜಕೋ ಭಗವನ್ತಂ ಉಪಸಙ್ಕಮಿತ್ವಾ ‘‘ಪುರಿಮಾನಿ ಭೋ ಗೋತಮ ದಿವಸಾನಿ ಪುರಿಮತರಾನಿ ಸಮ್ಬಹುಲಾನಂ ನಾನಾತಿತ್ಥಿಯಾನಂ ಸಮಣಬ್ರಾಹ್ಮಣಾನಂ ಪರಿಬ್ಬಾಜಕಾನಂ ಕುತೂಹಲಸಾಲಾಯಂ ಸನ್ನಿಸಿನ್ನಾನಂ ಸನ್ನಿಪತಿತಾನಂ ಅಯಮನ್ತರಕಥಾ ಉದಪಾದೀ’’ತಿ ಏವಮಾದಿಕಂ ವಚನಂ ಅವೋಚ. ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ಅಲಞ್ಹಿ ತೇ ವಚ್ಛ ಕಙ್ಖಿತುಂ, ಅಲಂ ವಿಚಿಕಿಚ್ಛಿತುಂ. ಕಙ್ಖನೀಯೇ ಚ ಪನ ತೇ ಠಾನೇ ವಿಚಿಕಿಚ್ಛಾ ಉಪ್ಪನ್ನಾ’’ತಿ ಏವಮಾದಿನಾ ಭಗವತಾ ಭಾಸಿತಂ.