ಸಮುದ್ದವಗ್ಗ

ಬಾಳಿಸಿಕೋಪಮಸುತ್ತ

ಪುಚ್ಛಾ – ಸಮುದ್ದವಗ್ಗೇ ಪನಾವುಸೋ ತತಿಯಂ ಬಾಳಿಸಿಕೋಪಮಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಭಾಸಿತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಜೀವಕಮ್ಬವನೇ ಸಮ್ಬಹುಲೇ ಭಿಕ್ಖೂ ಆರಬ್ಭ ‘‘ಸೇಯ್ಯಥಾಪಿ ಭಿಕ್ಖವೇ ಬಾಳಿಸಿಕೋ ಆಮಿಸಗತಬಳಿಸಂ ಗಮ್ಭೀರೇ ಉದಕರಹದೇ ಪಕ್ಖಿಪೇಯ್ಯಾ’’ತಿ ಏವಮಾದಿನಾ ಭಗವತಾ ಭಾಸಿತಂ.

ಆದಿತ್ತಪರಿಯಾಯಸುತ್ತ

ಪುಚ್ಛಾ – ಸಳಾಯತನವಗ್ಗಸಂಯುತ್ತೇ ಸಮುದ್ದವಗ್ಗೇ ಪನಾವುಸೋ ಪೋರಾಣಕೇಹಿ ಧಮ್ಮಸಂಗಾಹಕಮಹಾಥೇರೇಹಿ ಸಂಗೀತಂ ಅಟ್ಠಮಂ ಆದಿತ್ತಪರಿಯಾಯಸುತ್ತಂ ಭಗವತಾ ಕಂ ಆರಬ್ಭ ಕಥಞ್ಚ ಭಾಸಿತಂ.

ವಿಸ್ಸಜ್ಜನಾ – ಸಮ್ಬಹುಲೇ ಭನ್ತೇ ಭಿಕ್ಖೂ ಆರಬ್ಭ ‘‘ಆದಿತ್ತಪರಿಯಾಯಂ ವೋ ಭಿಕ್ಖವೇ ಧಮ್ಮಪರಿಯಾಯಂ ದೇಸೇಸ್ಸಾಮಿ, ತಂ ಸುಣಾಥ. ಕತಮೋ ಚ ಭಿಕ್ಖವೇ ಆದಿತ್ತಪರಿಯಾಯೋ ಧಮ್ಮಪರಿಯಾಯೋ. ವರಂ ಭಿಕ್ಖವೇ ತತ್ತಾಯ ಅಯೋಸಲಾಕಾಯ ಆದಿತ್ತಾಯ ಸಮ್ಪಜ್ಜಲಿತಾಯ ಸಜೋತಿಭೂತಾಯ ಚಕ್ಖುನ್ದ್ರಿಯಂ ಸಮ್ಪಲಿಮಟ್ಠಂ, ನತ್ವೇವ ಚಕ್ಖುವಿಞ್ಞೇಯ್ಯೇಸು ರೂಪೇಸು ಅನುಬ್ಯಞ್ಜನಸೋ ನಿಮಿತ್ತಗ್ಗಾಹೋ’’ತಿಆದಿನಾ ಭಗವತಾ ಭಾಸಿತಂ.