ಆಸೀವಿಸವಗ್ಗ

ಪಠಮದಾರುಕ್ಖನ್ಧೋಪಮಸುತ್ತ

ಪುಚ್ಛಾ – ಆಸೀವಿಸವಗ್ಗೇ ಆವುಸೋ ಪೋರಾಣಕೇಹಿ ಧಮ್ಮಸಂಗಾಹಕಮಹಾಥೇರೇಹಿ ಚತುತ್ಥಂ ಸಂಗೀತಂ ಪಠಮದಾರುಕ್ಖನ್ಧೋಪಮಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ.

ವಿಸ್ಸಜ್ಜನಾ – ಕೋಸಮ್ಬಿಯಂ ಭನ್ತೇ ಗಙ್ಗಾಯ ನದಿಯಾ ತೀರೇ ಸಮ್ಬಹುಲೇ ಭಿಕ್ಖೂ ಆರಬ್ಭ ‘‘ಪಸ್ಸಥ ನೋ ತುಮ್ಹೇ ಭಿಕ್ಖವೇ ಅಮ್ಹಂ ಮಹನ್ತಂ ದಾರುಕ್ಖನ್ಧಂ ಗಙ್ಗಾಯ ನದಿಯಾ ಸೋತೇನ ವುಯ್ಹಮಾನ’’ನ್ತಿ ಏವಮಾದಿನಾ ಭಗವತಾ ಭಾಸಿತಾ.

ಉಪಚಾರವಚನಂ

ಪುಚ್ಛಾ – ಕಥಞ್ಚಾವುಸೋ ತತ್ಥ ಭಗವತಾ ಓರಿಮತೀರಾದೀನಂ ಉಪಚಾರವಚನಾನಂ ಅತ್ಥೋ ವಿತ್ಥಾರೇನ ವಿಭಜಿತ್ವಾ ಪಕಾಸಿತೋ.

ವಿಸ್ಸಜ್ಜನಾ – ಓರಿಮಂ ತೀರನ್ತಿ ಖೋ ಭಿಕ್ಖು ಛನ್ನೇತಂ ಅಜ್ಝತ್ತಿಕಾನಂ ಆಯತನಾನಂ ಅಧಿವಚನಂ. ಪಾರಿಮಂ ತೀರನ್ತಿ ಖೋ ಭಿಕ್ಖು ಛನ್ನೇತಂ ಬಾಹಿರಾನಂ ಆಯತನಾನಂ ಅಧಿವಚನಂ. ಮಜ್ಝೇ ಸಂಸೀದೋತಿ ಖೋ ಭಿಕ್ಖು ನನ್ದಿರಾಗಸ್ಸೇತಂ ಅಧಿವಚನಂ. ಥಲೇ ಉಸ್ಸಾದೋತಿ ಖೋ ಭಿಕ್ಖು ಅಸ್ಮಿಮಾನಸ್ಸೇತಂ ಅಧಿವಚನನ್ತಿ ಏವಮಾದಿನಾ ಭನ್ತೇ ಭಗವತಾ ತತ್ಥ ಓರಿಮತೀರಾದೀನಂ ಉಪಚಾರವಚನಾನಂ ಅತ್ಥೋ ವಿತ್ಥಾರೇನ ವಿಭಜಿತ್ವಾ ಪಕಾಸಿತೋ.

ಪುಚ್ಛಾ – ಇಮಸ್ಮಿಂ ಖೋ ಪನ ಆವುಸೋ ಸುತ್ತೇ ಭಗವತಾ ಭಾಸಿತೇ ವಿಸೇಸತೋ ಕಸ್ಸ ಕೀದಿಸೋ ಅತ್ಥೋ ಕಥಞ್ಚ ಪಟಿಲದ್ಧೋ.

ವಿಸ್ಸಜ್ಜನಾ – ಇಮಸ್ಮಿಂ ಭನ್ತೇ ಸುತ್ತೇ ಭಗವತಾ ಭಾಸಿತೇ ವಿಸೇಸತೋ ನನ್ದಸ್ಸ ಗೋಪಾಲಕಸ್ಸ ಪಬ್ಬಜ್ಜಾ ಚ ಉಪಸಮ್ಪದಾ ಚ ಯಾವ ಅರಹತ್ತಾಚ ವಿಸೇಸತೋ ಅತ್ಥೋ ಅಧಿಗತೋ.

ಲಭೇಯ್ಯಾಹಂ ಭನ್ತೇ ಭಗವತೋ ಸನ್ತಿಕೇ ಪಬ್ಬಜ್ಜಂ, ಲಭೇಯ್ಯಂ ಉಪಸಮ್ಪದಂ.

ತೇನ ಹಿ ತ್ವಂ ನನ್ದ ಸಾಮಿಕಾನಂ ಗಾವೋ ನಿಯ್ಯಾತೇಹಿ.

ಗಮಿಸ್ಸನ್ತಿ ಭನ್ತೇ ಗಾವೋ ವಚ್ಛಗಿದ್ಧಿನಿಯೋ.

ಕಿಂಸುಕೋಪಮಸುತ್ತ

ಪುಚ್ಛಾ – ತತ್ಥೇವ ಆವುಸೋ ಪೋರಾಣಕೇಹಿ ಧಮ್ಮಸಂಗಾಹಕಮಹಾಥೇರೇಹಿ ಅಟ್ಠಮಂ ಸಂಗೀತಂ ಕಿಂಸುಕೋಪಮಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ.

ವಿಸ್ಸಜ್ಜನಾ – ಸಕ್ಕೇಸು ಭನ್ತೇ ಕಪಿಲವತ್ಥುಸ್ಮಿಂ ನಿಗ್ರೋಧಾರಾಮೇ ಅಞ್ಞತರಂ ಕಾರಕಂ ಭಿಕ್ಖುಂ ಆರಬ್ಭ ಭಾಸಿತಂ. ಅಞ್ಞತರೋ ಭನ್ತೇ ಕಾರಕೋ ಭಿಕ್ಖು ಚತ್ತಾರೋ ಖಾಣಾಸವೇ ಭಿಕ್ಖೂ ಞಾಣದಸ್ಸನವಿಸುದ್ಧಂ ಪುಚ್ಛಿತ್ವಾ ಅಸನ್ತುಟ್ಠೋ ತೇಸಂ ಭಿಕ್ಖೂನಂ ಪಞ್ಹಾವೇಯ್ಯಾಕರಣೇನ ಯೇನ ಭಗವಾ ತೇನುಪಸಙ್ಕಮಿ. ಉಪಸಙ್ಕಮಿತ್ವಾ ಭಗವನ್ತಂ ಏತದವೋಚ ‘‘ಕಿತ್ತಾವತಾ ನು ಖೋ ಭನ್ತೇ ಭಿಕ್ಖುನೋ ದಸ್ಸನಂ ಸುವಿಸುದ್ಧಂ ಹೋತೀ’’ತಿ. ತಸ್ಮಿಂ ವತ್ಥುಸ್ಮಿಂ ‘‘ಸೇಯ್ಯಥಾಪಿ ಭಿಕ್ಖು ಪುರಿಸಸ್ಸ ಕಿಂಸುಕೋ ಅದಿಟ್ಠಪುಬ್ಬೋ ಅಸ್ಸ, ಸೋ ಯೇನಞ್ಞತರೋ ಪುರಿಸೋ ಕಿಂಸುಕಸ್ಸ ದಸ್ಸಾವೀ ತೇನುಪಸಙ್ಕಮೇಯ್ಯಾ’’ತಿ ಏವಮಾದಿನಾ ಭನ್ತೇ ಭಗವತಾ ಭಾಸಿತಂ.

ಛಪ್ಪಾಣಕೋಪಮಸುತ್ತ

ಪುಚ್ಛಾ – ತತ್ಥೇವ ಆವುಸೋ ಪೋರಾಣಕೇಹಿ ಧಮ್ಮಸಂಗಾಹಕಮಹಾಥೇರೇಹಿ ದಸಮಂ ಸಂಗೀತಂ ಛಪ್ಪಾಣಕೋಪಮಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ.

ವಿಸ್ಸಜ್ಜನಾ – ಸಕ್ಕೇಸುಯೇವ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ‘‘ಸೇಯ್ಯಥಾಪಿ, ಭಿಕ್ಖವೇ ಪುರಿಸೋ ಅರುಗತ್ತೋ ಪಕ್ಕಗತ್ತೋ ಸರವನಂ ಪವಿಸೇಯ್ಯಾ’ತಿ ಏವಮಾದಿನಾ ಭಗವತಾ ಭಾಸಿತಂ.

ಪುಚ್ಛಾ – ಕಥಞ್ಚಾವುಸೋ ತತ್ಥ ಭಗವತಾ ಅಸಂವರೋ ವಿತ್ಥಾರೇನ ವಿಭಜಿತ್ವಾ ದೇಸಿತೋ.

ವಿಸ್ಸಜ್ಜನಾ – ಕಥಞ್ಚ ಭಿಕ್ಖವೇ ಅಸಂವರೋ ಹೋತಿ, ಇಧ ಭಿಕ್ಖವೇ ಭಿಕ್ಖು ಚಕ್ಖುನಾ ರೂಪಂ ದಿಸ್ವಾ ಪಿಯರೂಪೇ ರೂಪೇ ಅಧಿಮುಚ್ಚತಿ, ಅಪ್ಪಿಯರೂಪೇ ರೂಪೇ ಬ್ಯಾಪಜ್ಜತಿ, ಅನುಪಟ್ಠಿತಕಾಯಸ್ಸತಿ ಚ ವಿಹರತಿ ಪರಿತ್ತಚೇತಸೋ. ತಞ್ಚ ಚೇತೋವಿಮುತ್ತಿಂ ಪಞ್ಞಾವಿಮುತ್ತಿಂ ಯಥಾಭೂತಂ ನಪ್ಪಜಾನಾತಿ, ಯತ್ಥಸ್ಸ ತೇ ಉಪ್ಪನ್ನಾ ಪಾಪಕಾ ಅಕುಸಲಾ ಧಮ್ಮಾ ಅಪರಿಸೇಸಾ ನಿರುಜ್ಝನ್ತೀತಿ ಏವಮಾದಿನಾ ಭನ್ತೇ ಭಗವತಾ ತತ್ಥ ಅಸಂವರೋ ವಿತ್ಥಾರೇನ ವಿಭಜಿತ್ವಾ ದೇಸಿತೋ.

ಪುಚ್ಛಾ – ಕಥಞ್ಚಾವುಸೋ ತತ್ಥ ಭಗವತಾ ಸಂವರೋ ವಿಭಜಿತ್ವಾ ವಿತ್ಥಾರೇನ ದೇಸಿತೋ.

ವಿಸ್ಸಜ್ಜನಾ – ಕಥಞ್ಚ ಭಿಕ್ಖವೇ ಸಂವರೋ ಹೋತಿ, ಇಧ ಭಿಕ್ಖವೇ ಭಿಕ್ಖು ಚಕ್ಖುನಾ ರೂಪಂ ದಿಸ್ವಾ ಪಿಯರೂಪೇ ರೂಪೇ ನಾಧಿಮುಚ್ಚತಿ, ಅಪ್ಪಿಯರೂಪೇ ರೂಪೇ ನ ಬ್ಯಾಪಜ್ಜತೀತಿ, ಏವಮಾದಿನಾ ಭನ್ತೇ ಭಗವತಾ ತತ್ಥ ಸಂವರೋ ವಿಭಜಿತ್ವಾ ವಿತ್ಥಾರೇನ ದೇಸಿತೋ.