ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ

ಅಭಿಧಮ್ಮಪಿಟಕ

ಸಂಗಾಯನಸ್ಸ ಪುಚ್ಛಾ ವಿಸ್ಸಜ್ಜನಾ

ಪುಚ್ಛಾ – ಪಠಮಮಹಾಸಂಗೀತಿಕಾಲೇ ಆವುಸೋ ಧಮ್ಮಸಂಗಾಹಕಾ ಮಹಾಕಸ್ಸಪಾದಯೋ ಮಹಾಥೇರವರಾ ಪೋರಾಣಸಂಗೀತಿಕಾರಾ ಪಠಮಂ ವಿನಯಪಿಟಕಂ ಸಂಗಾಯಿತ್ವಾ ಸುತ್ತನ್ತಪಿಟಕೇ ಚ ದೀಘಮಜ್ಝಿಮಸಂಯುತ್ತಅಙ್ಗುತ್ತರಸಂಖಾತೇ ಚತ್ತಾರೋ ಮಹಾನಿಕಾಯೇ ಸಂಗಾಯಿತ್ವಾ ತದನನ್ತರಂ ಕಿಂ ನಾಮ ಪಾವಚನಂ ಸಂಗಾಯಿಂಸು.

ವಿಸ್ಸಜ್ಜನಾ – ಪಠಮಮಹಾಸಂಗೀತಿಕಾಲೇ ಭನ್ತೇ ಧಮ್ಮಸಂಗಾಹಕಾ ಮಹಾಕಸ್ಸಪಾದಯೋ ಮಹಾಥೇರವರಾ ಪೋರಾಣಸಂಗೀತಿಕಾರಾ ಪಠಮಂ ವಿನಯಪಿಟಕಂ ಸಂಗಾಯಿತ್ವಾ ಸುತ್ತನ್ತಪಿಟಕೇ ಚ ದೀಘಮಜ್ಝಿಮಸಂಯುತ್ತಅಙ್ಗುತ್ತರಸಂಖಾತೇ ಚತ್ತಾರೋ ನಿಕಾಯೇ ಸಂಗಾಯಿತ್ವಾ ತದನನ್ತರಂ ಅಭಿಧಮ್ಮಪಿಟಕಂ ನಾಮ ಪಾವಚನಂ ಸಂಗಾಯಿಂಸು.

ಪುಚ್ಛಾ – ಇಮಿಸ್ಸಮ್ಪಿ ಆವುಸೋ ಛಟ್ಠಸಂಗೀತಿಯಂ ಸಕಲಞ್ಚೇವ ವಿನಯಪಿಟಕಂ ಸಂಗೀತಂ, ತೇ ಚ ಚತ್ತಾರೋ ಮಹಾನಿಕಾಯಾ. ಕಾಲೋ ದಾನಿ ಆವುಸೋ ಸಮ್ಪತ್ತೋ ಅಭಿಧಮ್ಮಪಿಟಕಂ ಸಂಗಾಯಿತುಂ, ತಸ್ಮಾಹಂ ತಂ ತತ್ಥ ಪುಚ್ಛಿತಬ್ಬಾನಿ ಪುಚ್ಛಿಸ್ಸಾಮಿ. ಅಭಿಧಮ್ಮೋ ನಾಮೇಸ ಆವುಸೋ ಕೇನಟ್ಠೇನ ಅಭಿಧಮ್ಮೋತಿ ವುಚ್ಚತಿ.

ವಿಸ್ಸಜ್ಜನಾ – ಧಮ್ಮಾತಿರೇಕ ಧಮ್ಮವಿಸೇಸಟ್ಠೇನ ಭನ್ತೇ ಅಭಿಧಮ್ಮೋತಿ ವುಚ್ಚತಿ.

ಪುಚ್ಛಾ – ಸೋ ಪನೇಸ ಆವುಸೋ ಅಭಿಧಮ್ಮೋ ಕೇನ ಕತ್ಥ ಕದಾ ಚ ಅಧಿಗತೋ.

ವಿಸ್ಸಜ್ಜನಾ – ಸೋ ಖೋ ಭನ್ತೇ ಅಭಿಧಮ್ಮೋ ಸಬ್ಬಞ್ಞುಬುದ್ಧೇನ ಮಹಾಬೋಧಿಮಣ್ಡಮೂಲೇ ವೇಸಾಖಪುಣ್ಣಮಿಯಂ ಯಥಾಭೂತಂ ಅಧಿಗತೋ.

ಪುಚ್ಛಾ – ಕತ್ಥ ಪನೇಸ ಆವುಸೋ ಅಭಿಧಮ್ಮೋ ಭಗವತಾ ಕದಾ ಚ ವಿಚಿತೋ.

ವಿಸ್ಸಜ್ಜನಾ – ಸೋ ಖೋ ಭನ್ತೇ ಅಭಿಧಮ್ಮೋ ಭಗವತಾ ಮಹಾಬೋಧಿಮಣ್ಡೇ ರತನಘರಸತ್ತಾಹೇ ವಿಚಿತೋ.

ಪುಚ್ಛಾ – ಕತ್ಥ ಪನೇಸ ಆವುಸೋ ಅಭಿಧಮ್ಮೋ ಭಗವತಾ ಕದಾ ಕಸ್ಸತ್ಥಾಯ ಚ ದೇಸಿತೋ.

ವಿಸ್ಸಜ್ಜನಾ – ಸೋ ಖೋ ಭನ್ತೇ ಅಭಿಧಮ್ಮೋ ಭಗವತಾ ದೇವೇಸು ತಾವತಿಂಸೇಸು ಪಾರಿಚ್ಛತ್ತಕಮೂಲಮ್ಹಿ ಪಣ್ಡುಕಮ್ಬಲಸಿಲಾಯಂ ಅಭಿಸಮ್ಬೋಧಿತೋ ಸತ್ತಮೇ ವಸ್ಸೇ ಮಾತರಂ ಪಮುಖಂ ಕತ್ವಾ ದಸಹಿ ಚಕ್ಕವಾಳಸಹಸ್ಸೇಹಿ ಆಗಮ್ಮ ಸನ್ನಿಸಿನ್ನಾನಂ ದೇವತಾನಂ ಚತುರೋಘನಿತ್ಥರಣತ್ಥಾಯ ಅನ್ತೋ ವಸ್ಸಂ ದೇಸಿತೋ.

ಪುಚ್ಛಾ – ಕೇನೇಸ ಆವುಸೋ ಅಭಿಧಮ್ಮೋ ಪಠಮಂ ಮನುಸ್ಸಲೋಕೇ ಪತಿಗ್ಗಹಿತೋ, ಕಸ್ಸ ಚ ಪುನ ತೇನ ದೇಸಿತೋ.

ವಿಸ್ಸಜ್ಜನಾ – ಆಯಸ್ಮತಾ ಭನ್ತೇ ಸಾರಿಪುತ್ತತ್ಥೇರೇನ ಧಮ್ಮಸೇನಾಪತಿನಾ ಏಸ ಅಭಿಧಮ್ಮೋ ಪಠಮಂ ಮನುಸ್ಸಲೋಕೇ ಪತಿಗ್ಗಹಿತೋ, ತೇನೇವ ಭನ್ತೇ ಆಯಸ್ಮತಾ ಸಾರಿಪುತ್ತತ್ಥೇರೇನ ಅತ್ತನೋ ಸದ್ಧಿವಿಹಾರಿಕಾನಂ ಪಞ್ಚನ್ನಂ ಭಿಕ್ಖುಸತಾನಂ ದೇಸಿತೋ.

ಪುಚ್ಛಾ – ಕೇ ಆವುಸೋ ಸಿಕ್ಖನ್ತಿ.

ವಿಸ್ಸಜ್ಜನಾ – ಸೇಖಾ ಚ ಭನ್ತೇ ಪುಥುಜ್ಜನಾ ಕಲ್ಯಾಣಕಾ ಚ ಸಿಕ್ಖನ್ತಿ.

ಪುಚ್ಛಾ – ಕೇ ಆವುಸೋ ಸಿಕ್ಖಿತಸಿಕ್ಖಾ.

ವಿಸ್ಸಜ್ಜನಾ – ಅರಹನ್ತೋ ಭನ್ತೇ ಸಿಕ್ಖಿತಸಿಕ್ಖಾ.

ಪುಚ್ಛಾ – ಕೇ ಆವುಸೋ ಧಾರೇನ್ತಿ.

ವಿಸ್ಸಜ್ಜನಾ – ಯೇಸಂ ಭನ್ತೇ ವತ್ತತಿ, ತೇ ಧಾರೇನ್ತಿ.

ಪುಚ್ಛಾ – ಕಸ್ಸ ಆವುಸೋ ವಚನಂ.

ವಿಸ್ಸಜ್ಜನಾ – ಭಗವತೋ ಭನ್ತೇ ವಚನಂ ಅರಹತೋ ಸಮ್ಮಾಸಮ್ಬುದ್ಧಸ್ಸ.

ಪುಚ್ಛಾ – ಕೇನಾವುಸೋ ಆಭತಂ.

ವಿಸ್ಸಜ್ಜನಾ – ಪರಂಪರಾಯ ಭನ್ತೇ ಆಭತಂ.

ಧಮ್ಮಸಙ್ಗಣೀ

ಪುಚ್ಛಾ – ಸೋ ಪನೇಸ ಆವುಸೋ ಅಭಿಧಮ್ಮೋ ಧಮ್ಮಸಙ್ಗಣಿವಿಭಙ್ಗಾದಿಪಕರಣಪರಿಚ್ಛೇದವಸೇನ ಸತ್ತವಿಧೋ. ತೇಸು ಪಠಮಂ ಭಗವತಾ ಕತರಂ ಪಕರಣಂ ದೇಸಿತಂ.

ವಿಸ್ಸಜ್ಜನಾ – ಪಠಮಂ ಭನ್ತೇ ಧಮ್ಮಸಙ್ಗಣಿಪಕರಣಂ ಭಗವತಾ ದೇಸಿತಂ.

ಪುಚ್ಛಾ – ಧಮ್ಮಸಙ್ಗಣಿಯಂ ಆವುಸೋ ಅತ್ಥಿ ಮಾತಿಕಾ, ಅತ್ಥಿ ಪದಭಾಜನೀಯಂ. ತೇಸು ಮಾತಿಕಂ ನಿಕ್ಖಿಪನ್ತೇನ ಭಗವತಾ ಕತಂ ನಿಕ್ಖಿತ್ತಾ.

ವಿಸ್ಸಜ್ಜನಾ – ಮಾತಿಕಂ ಭನ್ತೇ ನಿಕ್ಖಿಪನ್ತೇನ ಭಗವತಾ ‘‘ಕುಸಲಾ ಧಮ್ಮಾ ಅಕುಸಲಾ ಧಮ್ಮಾ ಅಬ್ಯಾಕತಾ ಧಮ್ಮಾ. ಸುಖಾಯ ವೇದನಾಯ ಸಮ್ಪಯುತ್ತಾ ಧಮ್ಮಾ ದುಕ್ಖಾಯ ವೇದನಾಯ ಸಮ್ಪಯುತ್ತಾ ಧಮ್ಮಾ ಅದುಕ್ಖಮಸುಖಾಯ ವೇದನಾಯ ಸಮ್ಪಯುತ್ತಾ ಧಮ್ಮಾ. ವಿಪಾಕಾ ಧಮ್ಮಾ ವಿಪಾಕಧಮ್ಮಧಮ್ಮಾ ನೇವವಿಪಾಕನವಿಪಾಕಧಮ್ಮಧಮ್ಮಾ’’ತಿ ಏವಮಾದಿನಾ ದ್ವಾವೀಸತಿಯಾ ತಿಕಾನಂ ವಸೇನ. ‘‘ಹೇತೂ ಧಮ್ಮಾ ನ ಹೇತೂ ಧಮ್ಮಾ. ಸಹೇತುಕಾ ಧಮ್ಮಾ ಅಹೇತುಕಾ ಧಮ್ಮಾ.

ಹೇತುಸಮ್ಪಯುತ್ತಾ ಧಮ್ಮಾ ಹೇತುವಿಪ್ಪಯುತ್ತಾ ಧಮ್ಮಾ. ಹೇತೂ ಚೇವ ಧಮ್ಮಾ ಸಹೇತುಕಾ ಚ ಸಹೇತುಕಾ ಚೇವ ಧಮ್ಮಾ ನ ಚ ಹೇತೂ. ಹೇತೂ ಚೇವ ಧಮ್ಮಾ ಹೇತುಸಮ್ಪಯುತ್ತಾ ಚ ಹೇತುಸಮ್ಪಯುತ್ತಾ ಚೇವ ಧಮ್ಮಾ ನ ಚ ಹೇತೂ. ನ ಹೇತೂ ಖೋ ಪನ ಧಮ್ಮಾ ಸಹೇತುಕಾಪಿ ಅಹೇತುಕಾಪೀ’’ತಿ ಏವಮಾದಿನಾ ದುಕಸತಾನಞ್ಚ ವಸೇನ ಮಾತಿಕಾ ನಿಕ್ಖಿತ್ತಾ.

ಕಾಮಾವಚರಕುಸಲ

ಪುಚ್ಛಾ – ಅಭಿಧಮ್ಮಪಿಟಕೇ ಆವುಸೋ ಧಮ್ಮಸಙ್ಗಣಿಯಂ ಪದಭಾಜನೀಯೇ ಚಿತ್ತುಪ್ಪಾದಕಣ್ಡೇ ಕುಸಲಾ ಧಮ್ಮಾತಿಪದಸ್ಸ ಅತ್ಥಂ ವಿಭಜನ್ತೇನ ಭಗವತಾ ಕಥಂ ಕಾಮಾವಚರಕುಸಲಂ ವಿತ್ಥಾರತೋ ವಿಭಜಿತ್ವಾ ದೇಸಿತಂ.

ವಿಸ್ಸಜ್ಜನಾ – ಅಭಿಧಮ್ಮಪಿಟಕೇ ಭನ್ತೇ ಧಮ್ಮಸಙ್ಗಣಿಪಕರಣೇ ಚಿತ್ತುಪ್ಪಾದಕಣ್ಡೇ ಕುಸಲಾ ಧಮ್ಮಾತಿ ಪದಸ್ಸ ಅತ್ಥಂ ವಿಭಜನ್ತೇನ ಭಗವತಾ ‘‘ಕತಮೇ ಧಮ್ಮಾ ಕುಸಲಾ. ಯಸ್ಮಿಂ ಸಮಯೇ ಕಾಮಾವಚರಂ ಕುಸಲಂ ಚಿತ್ತಂ ಉಪ್ಪನ್ನಂ ಹೋತಿ ಸೋಮನಸ್ಸಸಹಗತಂ ಞಾಣಸಮ್ಪಯುತ್ತಂ ರೂಪಾರಮ್ಮಣಂ ವಾ ಸದ್ದಾರಮ್ಮಣಂ ವಾ ಗನ್ಧಾರಮ್ಮಣಂ ವಾ ರಸಾರಮ್ಮಣಂ ವಾ ಫೋಟ್ಠಬ್ಬಾರಮ್ಮಣಂ ವಾ ಧಮ್ಮಾರಮ್ಮಣಂ ವಾ ಯಂ ಯಂ ವಾ ಪನಾರಬ್ಭ. ತಸ್ಮಿಂ ಸಮಯೇ ಫಸ್ಸೋ ಹೋತಿ ವೇದನಾ ಹೋತಿ ಸಞ್ಞಾ ಹೋತಿ ಚೇತನಾ ಹೋತಿ ಚಿತ್ತಂ ಹೋತಿ ವಿತಕ್ಕೋ ಹೋತಿ ವಿಚಾರೋ ಹೋತಿ ಪೀತಿ ಹೋತಿ ಸುಖಂ ಹೋತಿ ಚಿತ್ತಸ್ಸೇಕಗ್ಗತಾ ಹೋತೀ’’ತಿ ಏವಮಾದಿನಾ ಕಾಮಾವಚರಕುಸಲಂ ತೀಹಿ ಮಹಾವಾರೇಹಿ ವಿಭಜಿತ್ವಾ ದೇಸಿತಂ.

ರೂಪಾವಚರಕುಸಲ

ಪುಚ್ಛಾ – ಅಭಿಧಮ್ಮಪಿಟಕೇ ಆವುಸೋ ಧಮ್ಮಸಙ್ಗಣೀಪಾಳಿಯಂ ಚಿತ್ತುಪ್ಪಾದಕಣ್ಡೇ ಕುಸಲಾ ಧಮ್ಮಾತಿ ಪದಸ್ಸ ಅತ್ಥಂ ವಿಭಜನ್ತೇನ ಭಗವತಾ ಕಥಂ ರೂಪಾವಚರಕುಸಲಞ್ಚ ಅರೂಪಾವಚರಕುಸಲಞ್ಚ ವಿತ್ಥಾರತೋ ವಿಭಜಿತ್ವಾ ದೇಸಿತಂ.

ವಿಸ್ಸಜ್ಜನಾ – ರೂಪಾವಚರಕುಸಲಞ್ಚ ಅರೂಪಾವಚರಕುಸಲಞ್ಚ ಭನ್ತೇ ‘‘ಕತಮೇ ಧಮ್ಮಾ ಕುಸಲಾ. ಯಸ್ಮಿಂ ಸಮಯೇ ರೂಪೂಪಪತ್ತಿಯಾ ಮಗ್ಗಂ ಭಾವೇತಿ ವಿವಿಚ್ಚೇವ ಕಾಮೇಹಿ ವಿವಿಚ್ಚ ಅಕುಸಲೇಹಿ ಧಮ್ಮೇಹಿ ಸವಿತಕ್ಕಂ ಸವಿತಕ್ಕಂ ವಿವೇಕಜಂ ಪೀತಿಸುಖಂ ಪಠಮಂ ಝಾನಂ ಉಪಸಮ್ಪಜ್ಜ ವಿಹರತಿ ಪಥವೀಕಸಿಣ’’ನ್ತಿ ಏವಮಾದಿನಾ ಭಗವತಾ ವಿತ್ಥಾರತೋ ದೇಸಿತಂ.

ಲೋಕುತ್ತರಾಕುಸಲ

ಪುಚ್ಛಾ – ಅಭಿಧಮ್ಮಪಿಟಕೇ ಆವುಸೋ ಧಮ್ಮಸಙ್ಗಣೀಪಾಳಿಯಂ ಚಿತ್ತುಪ್ಪಾದಕಣ್ಡೇ ಕುಸಲಾ ಧಮ್ಮಾತಿ ಪದಸ್ಸ ಅತ್ಥಂ ವಿಭಜನ್ತೇನ ಭಗವತಾ ಕಥಂ ಲೋಕುತ್ತರಕುಸಲಂ ವಿತ್ಥಾರತೋ ವಿಭಜಿತ್ವಾ ದೇಸಿತಂ.

ವಿಸ್ಸಜ್ಜನಾ – ಅಭಿಧಮ್ಮಪಿಟಕೇ ಭನ್ತೇ ಧಮ್ಮಸಙ್ಗಣಿಯಂ ಚಿತ್ತುಪ್ಪಾದಕಣ್ಡೇ ಕುಸಲಾ ಧಮ್ಮಾತಿ ಪದಸ್ಸ ಅತ್ಥಂ ವಿಭಜನ್ತೇನ ಭಗವತಾ ‘‘ಕತಮೇ ಧಮ್ಮಾ ಕುಸಲಾ. ಯಸ್ಮಿಂ ಸಮಯೇ ಲೋಕುತ್ತರಂ ಝಾನಂ ಭಾವೇತಿ ನಿಯ್ಯಾನಿಕಂ ಅಪಚಯಗಾಮಿಂ ದಿಟ್ಠಿಗತಾನಂ ಪಹಾನಾಯ ಪಠಮಾಯ ಭೂಮಿಯಾ ಪತ್ತಿಯಾ ವಿವಿಚ್ಚೇವ ಕಾಮೇಹಿ…ಪೇ… ಪಠಮಂ ಝಾನಂ ಉಪಸಮ್ಪಜ್ಜ ವಿಹರತಿ ದುಕ್ಖಪಟಿಪದಂ ದನ್ಧಾಭಿಞ್ಞ’’ನ್ತಿ ಏವಮಾದಿನಾ ಭಗವತಾ ಲೋಕುತ್ತರಕುಸಲಂ ವಿತ್ಥಾರತೋ ವಿಭಜಿತ್ವಾ ದೇಸಿತಂ.

ಅಕುಸಲ

ಪುಚ್ಛಾ – ತತ್ಥೇವ ಆವುಸೋ ಅಕುಸಲಾ ಧಮ್ಮಾತಿ ಮಾತಿಕಾಪದಸ್ಸ ಅತ್ಥಂ ವಿಭಜನ್ತೇನ ಭಗವತಾ ಕಥಂ ಅಕುಸಲಂ ವಿತ್ಥಾರತೋ ವಿಭಜಿತ್ವಾ ದೇಸಿತಂ.

ವಿಸ್ಸಜ್ಜನಾ – ತತ್ಥೇವ ಭನ್ತೇ ಅಕುಸಲಾ ಧಮ್ಮಾತಿ ಮಾತಿಕಾಪದಸ್ಸ ಅತ್ಥಂ ವಿಭಜನ್ತೇನ ಭಗವತಾ ‘‘ಕತಮೇ ಧಮ್ಮಾ ಅಕುಸಲಾ. ಯಸ್ಮಿಂ ಸಮಯೇ ಅಕುಸಲಂ ಚಿತ್ತಂ ಉಪ್ಪನ್ನಂ ಹೋತಿ ಸೋಮನಸ್ಸಸಹಗತಂ ದಿಟ್ಠಿಗತಸಮ್ಪಯುತ್ತಂ ರೂಪಾರಮ್ಮಣಂ ವಾ ಸದ್ಧಾರಮ್ಮಣಂ ವಾ ಗನ್ಧಾರಮ್ಮಣಂ ವಾ ರಸಾರಮ್ಮಣಂ ವಾ ಫೋಟ್ಠಬ್ಬಾರಮ್ಮಣಂ ವಾ ಧಮ್ಮಾರಮ್ಮಣಂ ವಾ ಯಂ ಯಂ ವಾ ಪನಾರಬ್ಭ. ತಸ್ಮಿಂ ಸಮಯೇ ಫಸ್ಸೋ ಹೋತಿ ವೇದನಾ ಹೋತಿ ಸಞ್ಞಾ ಹೋತಿ ಚೇತನಾ ಹೋತಿ ಚಿತ್ತಂ ಹೋತೀ’’ತಿ ಏವಮಾದಿನಾ ಅಕುಸಲಂ ವಿತ್ಥಾರತೋ ವಿಭಜಿತ್ವಾ ದೇಸಿತಂ.

ಅಬ್ಯಾಕತ

ಪುಚ್ಛಾ – ಅಭಿಧಮ್ಮಪಿಟಕೇ ಆವುಸೋ ಧಮ್ಮಸಙ್ಗಣೀಪಾಳಿಯಂ ಚಿತ್ತುಪ್ಪಾದಕಣ್ಡರೂಪಕಣ್ಡೇಸು ಅಬ್ಯಾಕತಾ ಧಮ್ಮಾತಿ ಮಾತಿಕಾಪದಸ್ಸ ಅತ್ಥಂ ವಿಭಜನ್ತೇನ ಭಗವತಾ ಕಥಂ ಅಬ್ಯಾಕತಾ ಧಮ್ಮಾ ವಿತ್ಥಾರತೋ ವಿಭಜಿತ್ವಾ ದೇಸಿತಾ.

ವಿಸ್ಸಜ್ಜನಾ – ಅಭಿಧಮ್ಮಪಿಟಕೇ ಭನ್ತೇ ಧಮ್ಮಸಙ್ಗಣಿಯಂ ಅಬ್ಯಾಕತಾ ಧಮ್ಮಾತಿ ಪದಸ್ಸ ಅತ್ಥಂ ವಿಭಜನ್ತೇನ ಭಗವತಾ ‘‘ಕತಮೇ ಧಮ್ಮಾ ಅಬ್ಯಾಕತಾ. ಯಸ್ಮಿಂ ಸಮಯೇ ಕಾಮಾವಚರಸ್ಸ ಕುಸಲಸ್ಸ ಕಮ್ಮಸ್ಸ ಕತತ್ತಾ ಉಪಚಿತತ್ತಾ ವಿಪಾಕಂ ಚಕ್ಖುವಿಞ್ಞಾಣಂ ಉಪ್ಪನ್ನಂ ಹೋತಿ ಉಪೇಕ್ಖಾಸಹಗತಂ ರೂಪಾರಮ್ಮಣಂ. ತಸ್ಮಿಂ ಸಮಯೇ ಫಸ್ಸೋ ಹೋತಿ ವೇದನಾ ಹೋತಿ ಸಞ್ಞಾ ಹೋತಿ ಚೇತನಾ ಹೋತಿ ಚಿತ್ತಂ ಹೋತೀ’’ತಿ ಏವಮಾದಿನಾ ಚ ಚಿತ್ತುಪ್ಪಾದಕಣ್ಡೇ, ರೂಪಕಣ್ಡೇ ಚ ‘‘ಕತಮೇ ಧಮ್ಮಾ ಅಬ್ಯಾಕತಾ. ಕುಸಲಾಕುಸಲಾನಂ ಧಮ್ಮಾನಂ ವಿಪಾಕಾ ಕಾಮಾವಚರಾ ರೂಪಾವಚರಾ ಅರೂಪಾವಚರಾ ಅಪರಿಯಾಪನ್ನಾ ವೇದನಾಕ್ಖನ್ಧೋ ಸಞ್ಞಾಕ್ಖನ್ಧೋ ಸಙ್ಖಾರಕ್ಖನ್ಧೋ ವಿಞ್ಞಾಣಕ್ಖನ್ಧೋ. ಯೇ ಚ ಧಮ್ಮಾ ಕಿರಿಯಾ ನೇವ ಕುಸಲಾ ನಾಕುಸಲಾ ನ ಚ ಕಮ್ಮವಿಪಾಕಾ. ಸಬ್ಬಞ್ಚ ರೂಪಂ ಅಸಙ್ಖತಾ ಚ ಧಾತು. ಇಮೇ ಧಮ್ಮಾ ಅಬ್ಯಾಕತಾ’’ತಿ ಏವಮಾದಿನಾ ಚ ಅಬ್ಯಾಕತಾ ಧಮ್ಮಾ ವಿತ್ಥಾರತೋ ವಿಭಜಿತ್ವಾ ದೇಸಿತಾ.

ವಿಭಙ್ಗ

ಪುಚ್ಛಾ – ಸತ್ತಸು ಆವುಸೋ ಅಭಿಧಮ್ಮಪ್ಪಕರಣೇಸು ವಿಭಙ್ಗಪ್ಪಕರಣೇ ಭಗವತಾ ಕತಿ ವಿಭಙ್ಗಾ ದೇಸಿತಾ.

ವಿಸ್ಸಜ್ಜನಾ – ಅಭಿಧಮ್ಮಪಿಟಕೇ ಭನ್ತೇ ಸತ್ತಸು ಪಕರಣೇಸು ದುತಿಯೇ ವಿಭಙ್ಗಪ್ಪಕರಣೇ ಖನ್ಧವಿಭಙ್ಗೋ ಆಯತನವಿಭಙ್ಗೋ ಧಾತುವಿಭಙ್ಗೋ ಸಚ್ಚವಿಭಙ್ಗೋ ಇನ್ದ್ರಿಯವಿಭಙ್ಗೋ ಪಟಿಚ್ಚಸಮುಪ್ಪಾದವಿಭಙ್ಗೋ ಸತಿಪಟ್ಠಾನವಿಭಙ್ಗೋ ಸಮ್ಮಪ್ಪಧಾನವಿಭಙ್ಗೋ ಇದ್ಧಿಪಾದವಿಭಙ್ಗೋ ಬೋಜ್ಝಙ್ಗವಿಭಙ್ಗೋ ಮಗ್ಗಙ್ಗವಿಭಙ್ಗೋ ಝಾನವಿಭಙ್ಗೋ ಅಪ್ಪಮಞ್ಞಾವಿಭಙ್ಗೋ ಸಿಕ್ಖಾಪದವಿಭಙ್ಗೋ ಪಟಿಸಮ್ಭಿದಾವಿಭಙ್ಗೋ ಞಾಣವಿಭಙ್ಗೋ ಖುದ್ದಕವತ್ಥುವಿಭಙ್ಗೋ ಧಮ್ಮಹದಯವಿಭಙ್ಗೋತಿ ಭಗವತಾ ಅಟ್ಠಾರಸ ವಿಭಙ್ಗಾ ದೇಸಿತಾ.

ಖನ್ಧವಿಭಙ್ಗ

ಪುಚ್ಛಾ – ತೇಸು ಆವುಸೋ ಅಟ್ಠಾರಸಸು ವಿಭಙ್ಗೇಸು ಪಠಮೇ ಖನ್ಧವಿಭಙ್ಗೇ ಭಗವತಾ ಕಥಂ ಖನ್ಧಾ ವಿತ್ಥಾರತೋ ವಿಭಜಿತ್ವಾ ದೇಸಿತಾ.

ವಿಸ್ಸಜ್ಜನಾ – ತೇಸು ಭನ್ತೇ ಅಟ್ಠಾರಸಸು ವಿಭಙ್ಗೇಸು ಪಠಮೇ ಖನ್ಧವಿಭಙ್ಗೇ ‘‘ಪಞ್ಚಕ್ಖನ್ಧಾ ರೂಪಕ್ಖನ್ಧೋ ವೇದನಾಕ್ಖನ್ಧೋ ಸಞ್ಞಾಕ್ಖನ್ಧೋ ಸಙ್ಖಾರಕ್ಖನ್ಧೋ ವಿಞ್ಞಾಣಕ್ಖನ್ಧೋ. ತತ್ಥ ಕತಮೋ ರೂಪಕ್ಖನ್ಧೋ, ಯಂಕಿಞ್ಚಿ ರೂಪಂ ಅತೀತಾನಾಗತಪಚ್ಚುಪ್ಪನ್ನಂ ಅಜ್ಝತ್ತಂ ವಾ ಬಹಿದ್ಧಾ ವಾ ಓಳಾರಿಕಂ ವಾ ಸುಖುಮಂ ವಾ ಹೀನಂ ವಾ ಪಣೀತಂ ವಾ ಯಂ ದೂರೇ ಸನ್ತಿಕೇ ವಾ, ತದೇಕಜ್ಝಂ ಅಭಿಸಞ್ಞೂಹಿತ್ವಾ ಅಭಿಸಙ್ಖಿಪಿತ್ವಾ ಅಯಂ ವುಚ್ಚತಿ ರೂಪಕ್ಖನ್ಧೋ’’ತಿ ಏವಮಾದಿನಾ ಸುತ್ತನ್ತಭಾಜನೀಯಅಭಿಧಮ್ಮಭಾಜನೀಯಪಞ್ಹಾಪುಚ್ಛಕಸಙ್ಖಾತೇಹಿ ತೀಹಿ ಮಹಾನಯೇಹಿ ಭಗವತಾ ಖನ್ಧಾ ವಿತ್ಥಾರತೋ ವಿಭಜಿತ್ವಾ ದೇಸಿತಾ.

ಆಯತನವಿಭಙ್ಗ

ಪುಚ್ಛಾ – ದುತಿಯೇ ಪನ ಆವುಸೋ ಆಯತನವಿಭಙ್ಗೇ ಭಗವತಾ ಕಥಂ ಆಯತನಾನಿ ವಿತ್ಥಾರತೋ ವಿಭಜಿತ್ವಾ ದೇಸಿತಾನಿ.

ವಿಸ್ಸಜ್ಜನಾ – ದುತಿಯೇ ಭನ್ತೇ ಆಯತನವಿಭಙ್ಗೇ ‘‘ದ್ವಾದಸಾಯತನಾನಿ ಚಕ್ಖಾಯತನಂ ರೂಪಾಯತನಂ ಸೋತಾಯತನಂ ಸದ್ದಾಯತನಂ ಘಾನಾಯತನಂ ಗನ್ಧಾಯತನಂ ಜಿವ್ಹಾಯತನಂ ರಸಾಯತನಂ ಕಾಯಾಯತನಂ ಫೋಟ್ಠಬ್ಬಾಯತನಂ ಮನಾಯತನಂ ಧಮ್ಮಾಯತನಂ. ಚಕ್ಖುಂ ಅನಿಚ್ಚಂ ದುಕ್ಖಂ ಅನತ್ತಾ ವಿಪರಿಣಾಮಧಮ್ಮಂ, ರೂಪಾ ಅನಿಚ್ಚಾ ದುಕ್ಖಾ ಅನತ್ತಾ ವಿಪರಿಣಾಮಧಮ್ಮಾ’’ತಿ ಏವಮಾದಿನಾ ಭಗವತಾ ಸುತ್ತನ್ತಭಾಜನೀಯಅಭಿಧಮ್ಮಭಾಜನೀಯಪಞ್ಹಾಪುಚ್ಛಕಸಙ್ಖಾತೇಹಿ ತೀಹೇವ ಆಯತನಾನಿ ವಿತ್ಥಾರತೋ ವಿಭಜಿತ್ವಾ ದೇಸಿತಾನಿ.

ಧಾತುವಿಭಙ್ಗ

ಪುಚ್ಛಾ – ಅಭಿಧಮ್ಮಪಿಟಕೇ ಆವುಸೋ ವಿಭಙ್ಗಪ್ಪಕರಣೇ ತತಿಯೇ ಧಾತುವಿಭಙ್ಗೇ ಭಗವತಾ ಕಥಂ ಧಾತುಯೋ ವಿತ್ಥಾರೇನ ವಿಭಜಿತ್ವಾ ದೇಸಿತಾ.

ವಿಸ್ಸಜ್ಜನಾ – ತತಿಯೇ ಭನ್ತೇ ಧಾತುವಿಭಙ್ಗೇ ‘‘ಛ ಧಾತುಯೋ ಪಥವೀಧಾತು ಆಪೋಧಾತು ತೇಜೋಧಾತು ವಾಯೋಧಾತು ಆಕಾಸಧಾತು ವಿಞ್ಞಾಣಧಾತೂ’’ತಿ ಭನ್ತೇ ಸುತ್ತನ್ತಭಾಜನೀಯಅಭಿಧಮ್ಮಭಾಜನೀಯಪಞ್ಹಾಪುಚ್ಛಕಸಙ್ಖಾತೇಹಿ ತೀಹಿ ಮಹಾನಯೇಹಿ ಭಗವತಾ ಧಾತುಯೋ ವಿತ್ಥಾರತೋ ವಿಭಜಿತ್ವಾ ದೇಸಿತಾ.

ಸಚ್ಚವಿಭಙ್ಗ

ಪುಚ್ಛಾ – ಚತುತ್ಥೇ ಪನ ಆವುಸೋ ಸಚ್ಚವಿಭಙ್ಗೇ ಭಗವತಾ ಕಥಂ ಸಚ್ಚಾನಿ ವಿತ್ಥಾರತೋ ವಿಭಜಿತ್ವಾ ದೇಸಿತಾನಿ.

ವಿಸ್ಸಜ್ಜನಾ – ಚತುತ್ಥೇ ಭನ್ತೇ ಸಚ್ಚವಿಭಙ್ಗೇ ‘‘ಚತ್ತಾರಿ ಅರಿಯಸಚ್ಚಾನಿ ದುಕ್ಖಂ ಅರಿಯಸಚ್ಚಂ, ದುಕ್ಖಸಮುದಯಂ ಅರಿಯಸಚ್ಚಂ, ದುಕ್ಖನಿರೋಧಂ ಅರಿಯಸಚ್ಚಂ, ದುಕ್ಖನಿರೋಧಗಾಮಿನೀ ಪಟಿಪದಾ ಅರಿಯಸಚ್ಚಂ. ತತ್ಥ ಕತಮಂ ದುಕ್ಖಂ ಅರಿಯಸಚ್ಚಂ, ಜಾತಿಪಿ ದುಕ್ಖಾ, ಜರಾಪಿ ದುಕ್ಖಾ, ಮರಣಮ್ಪಿ ದುಕ್ಖಂ, ಸೋಕಪರಿದೇವದುಕ್ಖದೋಮನಸ್ಸುಪಾಯಾಸಾಪಿ ದುಕ್ಖಾ, ಅಪ್ಪಿಯೇಹಿ ಸಮ್ಪಯೋಗೋ ದುಕ್ಖೋ, ಪಿಯೇಹಿ ವಿಪ್ಪಯೋಗೋ ದುಕ್ಖೋ, ಯಮ್ಪಿಚ್ಛಂ ನ ಲಭತಿ, ತಮ್ಪಿ ದುಕ್ಖಂ, ಸಂಖಿತ್ತೇನ ಪಞ್ಚುಪಾದಾನಕ್ಖನ್ಧಾ ದುಕ್ಖಾ’’ತಿ ಏವಮಾದಿನಾ ಸುತ್ತನ್ತಭಾಜನೀಯಅಭಿಧಮ್ಮಭಾಜನೀಯಪಞ್ಹಾಪುಚ್ಛಕಸಙ್ಖಾತೇಹಿ ತೀಹಿ ಮಹಾನಯೇಹಿ ಭಗವತಾ ಸಚ್ಚಾನಿ ವಿತ್ಥಾರತೋ ವಿಭಜಿತ್ವಾ ದೇಸಿತಾನಿ.

ಇನ್ದ್ರಿಯವಿಭಙ್ಗ

ಪುಚ್ಛಾ – ಪಞ್ಚಮೇ ಪನ ಆವುಸೋ ಇನ್ದ್ರಿಯವಿಭಙ್ಗೇ ಭಗವತಾ ಕಥಂ ಇನ್ದ್ರಿಯಾನಿ ವಿತ್ಥಾರತೋ ವಿಭಜಿತ್ವಾ ದೇಸಿತಾನಿ.

ವಿಸ್ಸಜ್ಜನಾ – ಪಞ್ಚಮೇ ಪನ ಭನ್ತೇ ಇನ್ದ್ರಿಯವಿಭಙ್ಗೇ ‘‘ಬಾವೀಸತಿನ್ದ್ರಿಯಾನಿ ಚಕ್ಖುನ್ದ್ರಿಯಂ ಸೋತಿನ್ದ್ರಿಯಂ ಘಾನಿನ್ದ್ರಿಯಂ ಜಿವ್ಹಿನ್ದ್ರಿಯಂ ಕಾಯಿನ್ದ್ರಿಯಂ ಮನಿನ್ದ್ರಿಯಂ…ಪೇ… ಅಞ್ಞಾತಾವಿನ್ದ್ರಿಯ’’ನ್ತಿ ಏವಮಾದಿನಾ ಅಭಿಧಮ್ಮಭಾಜನೀಯಪಞ್ಹಾಪುಚ್ಛಕಸಙ್ಖಾತೇಹಿ ದ್ವೀಹಿ ಮಹಾನಯೇಹಿ ಭಗವತಾ ಇನ್ದ್ರಿಯಾನಿ ವಿತ್ಥಾರತೋ ವಿಭಜಿತ್ವಾ ದೇಸಿತಾನಿ.

ಪಟಿಚ್ಚಸಮುಪ್ಪಾದ ವಿಭಙ್ಗ

ಪುಚ್ಛಾ – ಅಭಿಧಮ್ಮಪಿಟಕೇ ಆವುಸೋ ವಿಭಙ್ಗಪ್ಪಕರಣೇ ಛಟ್ಠೇ ಪಟಿಚ್ಚಸಮುಪ್ಪಾದವಿಭಙ್ಗೇ ಭಗವತಾ ಕಥಂ ಪಟಿಚ್ಚಸಮುಪ್ಪಾದೋ ವಿತ್ಥಾರೇನ ವಿಭಜಿತ್ವಾ ದೇಸಿತೋ.

ವಿಸ್ಸಜ್ಜನಾ – ಛಟ್ಠೇ ಭನ್ತೇ ಪಟಿಚ್ಚಸಮುಪ್ಪಾದವಿಭಙ್ಗೇ ‘‘ಅವಿಜ್ಜಾಪಚ್ಚಯಾ ಸಙ್ಖಾರಾ…ಪೇ… ಸಮುದಯೋ ಹೋತೀ’’ತಿ ಏವಮಾದಿನಾ ಭಗವತಾ ಪಟಿಚ್ಚಸಮುಪ್ಪಾದೋ ಸುತ್ತನ್ತಭಾಜನೀಯಅಭಿಧಮ್ಮಭಾಜನೀಯಸಙ್ಖಾತೇಹಿ ದ್ವೀಹಿ ಮಹಾನಯೇಹಿ ವಿತ್ಥಾರತೋ ವಿಭಜಿತ್ವಾ ದೇಸಿತೋ.

ಸತಿಪಟ್ಠಾನವಿಭಙ್ಗ

ಪುಚ್ಛಾ – ಸತ್ತಮೇ ಪನ ಆವುಸೋ ಸತಿಪಟ್ಠಾನವಿಭಙ್ಗೇ ಭಗವತಾ ಕಥಂ ಸತಿಪಟ್ಠಾನಾ ವಿತ್ಥಾರತೋ ವಿಭಜಿತ್ವಾ ದೇಸಿತಾ.

ವಿಸ್ಸಜ್ಜನಾ – ಸತ್ತಮೇ ಭನ್ತೇ ಸತಿಪಟ್ಠಾನವಿಭಙ್ಗೇ ‘‘ಚತ್ತಾರೋ ಸತಿಪಟ್ಠಾನಾ ಇಧ ಭಿಕ್ಖು ಅಜ್ಝತ್ತಂ ಕಾಯೇ ಕಾಯಾನುಪಸ್ಸೀ ವಿಹರತಿ, ಬಹಿದ್ಧಾ ಕಾಯೇ ಕಾಯಾನುಪಸ್ಸೀ ವಿಹರತಿ, ಅಜ್ಝತ್ತಬಹಿದ್ಧಾ ಕಾಯೇ ಕಾಯಾನುಪಸ್ಸೀ ವಿಹರತಿ ಆತಾಪೀ ಸಮ್ಪಜಾನೋ ಸತಿಮಾ ವಿನೇಯ್ಯ ಲೋಕೇ ಅಭಿಜ್ಝಾದೋಮನಸ್ಸ’’ನ್ತಿ ಏವಮಾದಿನಾ ಸುತ್ತನ್ತಭಾಜನೀಯಅಭಿಧಮ್ಮಭಾಜನೀಯಪಞ್ಹಾಪುಚ್ಛಕಸಙ್ಖಾತೇಹಿ ತೀಹಿ ಮಹಾನಯೇಹಿ ಭಗವತಾ ಸತಿಪಟ್ಠಾನಾ ವಿತ್ಥಾರತೋ ವಿಭಜಿತ್ವಾ ದೇಸಿತಾ.

ಸಮ್ಮಪ್ಪಧಾನವಿಭಙ್ಗ

ಪುಚ್ಛಾ – ಅಟ್ಠಮೇ ಪನ ಆವುಸೋ ಸಮ್ಮಪ್ಪಧಾನವಿಭಙ್ಗೇ ಭಗವತಾ ಕಥಂ ಸಮ್ಮಪ್ಪಧಾನಾ ವಿತ್ಥಾರತೋ ವಿಭಜಿತ್ವಾ ದೇಸಿತಾ.

ವಿಸ್ಸಜ್ಜನಾ – ಅಟ್ಠಮೇ ಭನ್ತೇ ಸಮ್ಮಪ್ಪಧಾನವಿಭಙ್ಗೇ ‘‘ಚತ್ತಾರೋ ಸಮ್ಮಪ್ಪಧಾನಾ ಇಧ ಭಿಕ್ಖು ಅನುಪ್ಪನ್ನಾನಂ ಪಾಪಕಾನಂ ಅಕುಸಲಾನಂ ಧಮ್ಮಾನಂ ಅನುಪ್ಪಾದಾಯ ಛನ್ದಂ ಜನೇತಿ ವಾಯಮತಿ ವೀರಿಯಂ ಆರಭತಿ ಚಿತ್ತಂ ಪಗ್ಗಣ್ಹಾತಿ ಪದಹತಿ, ಉಪ್ಪನ್ನಾನಂ ಪಾಪಕಾನಂ ಅಕುಸಲಾನಂ ಧಮ್ಮಾನಂ ಪಹಾನಾಯ ಛನ್ದಂ ಜನೇತಿ ವಾಯಮತಿ ವೀರಿಯಂ ಆರಭತಿ ಚಿತ್ತಂ ಪಗ್ಗಣ್ಹಾತಿ ಪದಹತಿ, ಅನುಪ್ಪನ್ನಾನಂ ಕುಸಲಾನಂ ಧಮ್ಮಾನಂ ಉಪ್ಪಾದಾಯ ಛನ್ದಂ ಜನೇತಿ ವಾಯಮತಿ ವೀರಿಯಂ ಆರಭತಿ ಚಿತ್ತಂ ಪಗ್ಗಣ್ಹಾತಿ ಪದಹತಿ, ಉಪ್ಪನ್ನಾನಂ ಕುಸಲಾನಂ ಧಮ್ಮಾನಂ ಠಿತಿಯಾ ಅಸಮ್ಮೋಸಾಯ ಭಿಯ್ಯೋಭಾವಾಯ ವೇಪುಲ್ಲಾಯ ಭಾವನಾಯ ಪಾರಿಪೂರಿಯಾ ಛನ್ದಂ ಜನೇತಿ ವಾಯಮತಿ ವೀರಿಯಂ ಆರಭತಿ ಚಿತ್ತಂ ಪಗ್ಗಣ್ಹಾತಿ ಪದಹತೀ’’ತಿ ಏವಮಾದಿನಾ ಭಗವತಾ ಸಮ್ಮಪ್ಪಧಾನಾ ವಿತ್ಥಾರತೋ ವಿಭಜಿತ್ವಾ ದೇಸಿತಾ.

ಇದ್ಧಿಪಾದವಿಭಙ್ಗ

ಪುಚ್ಛಾ – ನವಮೇ ಪನ ಆವುಸೋ ಇದ್ಧಿಪಾದವಿಭಙ್ಗೇ ಭಗವತಾ ಕಥಂ ಇದ್ಧಿಪಾದಾ ವಿತ್ಥಾರತೋ ವಿಭಜಿತ್ವಾ ದೇಸಿತಾ.

ವಿಸ್ಸಜ್ಜನಾ – ನವಮೇ ಭನ್ತೇ ಇದ್ಧಿಪಾದವಿಭಙ್ಗೇ ‘‘ಚತ್ತಾರೋ ಇದ್ಧಿಪಾದಾ ಇಧ ಭಿಕ್ಖು ಛನ್ದಸಮಾಧಿಪಧಾನಸಙ್ಖಾರಸಮನ್ನಾಗತಂ ಇದ್ಧಿಪಾದಂ ಭಾವೇತಿ…ಪೇ… ವೀಮಂಸಾಸಮಾಧಿಪಧಾನಸಙ್ಖಾರಸಮನ್ನಾಗತಂ ಇದ್ಧಿಪಾದಂ ಭಾವೇತೀ’’ತಿ ಏವಮಾದಿನಾ ತೀಹಿ ಮಹಾನಯೇಹಿ ಭಗವತಾ ಇದ್ಧಿಪಾದಾ ವಿತ್ಥಾರತೋ ವಿಭಜಿತ್ವಾ ದೇಸಿತಾ.

ಬೋಜ್ಝಙ್ಗವಿಭಙ್ಗ

ಪುಚ್ಛಾ – ಅಭಿಧಮ್ಮಪಿಟಕೇ ಆವುಸೋ ವಿಭಙ್ಗಪ್ಪಕರಣೇ ದಸಮೇ ಬೋಜ್ಝಙ್ಗವಿಭಙ್ಗೇ ಭಗವತಾ ಕಥಂ ಬೋಜ್ಝಙ್ಗಾ ವಿತ್ಥಾರತೋ ವಿಭಜಿತ್ವಾ ದೇಸಿತಾ.

ವಿಸ್ಸಜ್ಜನಾ – ದಸಮೇ ಭನ್ತೇ ಬೋಜ್ಝಙ್ಗವಿಭಙ್ಗೇ ‘‘ಸತ್ತ ಬೋಜ್ಝಙ್ಗಾ ಸತಿಸಮ್ಬೋಜ್ಝಙ್ಗೋ ಧಮ್ಮವಿಚಯಸಮ್ಬೋಜ್ಝಙ್ಗೋ ವೀರಿಯಸಮ್ಬೋಜ್ಝಙ್ಗೋ ಪೀತಿಸಮ್ಬೋಜ್ಝಙ್ಗೋ ಪಸ್ಸದ್ಧಿಸಮ್ಬೋಜ್ಝಙ್ಗೋ ಸಮಾಧಿಸಮ್ಬೋಜ್ಝಙ್ಗೋ ಉಪೇಕ್ಖಾಸಮ್ಬೋಜ್ಝಙ್ಗೋ. ತತ್ಥ ಕತಮೋ ಸತಿಸಮ್ಬೋಜ್ಝಙ್ಗೋ, ಇಧ ಭಿಕ್ಖು ಸತಿಮಾ ಹೋತಿ ಪರಮೇನ ಸತಿನೇಪಕ್ಕೇನ ಸಮನ್ನಾಗತೋ ಚಿರಕತಮ್ಪಿ ಚಿರಭಾಸಿತಮ್ಪಿ ಸರಿತಾ ಹೋತಿ ಅನುಸ್ಸರಿತಾ, ಅಯಂ ವುಚ್ಚತಿ ಸತಿಸಮ್ಬೋಜ್ಝಙ್ಗೋ’’ತಿ ಏವಮಾದಿನಾ ಭಗವತಾ ಸುತ್ತನ್ತಭಾಜನೀಯಅಭಿಧಮ್ಮಭಾಜನೀಯಪಞ್ಹಾಪುಚ್ಛಕಸಙ್ಖಾತೇಹಿ ತೀಹಿ ನಯೇಹಿ ಬೋಜ್ಝಙ್ಗಾ ವಿತ್ಥಾರತೋ ವಿಭಜಿತ್ವಾ ದೇಸಿತಾ.

ಮಗ್ಗಙ್ಗವಿಭಙ್ಗ

ಪುಚ್ಛಾ – ಏಕಾದಸಮೇ ಪನ ಆವುಸೋ ಮಗ್ಗಙ್ಗವಿಭಙ್ಗೇ ಭಗವತಾ ಕಥಂ ಮಗ್ಗಙ್ಗಾ ವಿತ್ಥಾರತೋ ವಿಭಜಿತ್ವಾ ದೇಸಿತಾ.

ವಿಸ್ಸಜ್ಜನಾ – ಏಕಾದಸಮೇ ಭನ್ತೇ ಮಗ್ಗಙ್ಗವಿಭಙ್ಗೇ ‘‘ಅರಿಯೋ ಅಟ್ಠಙ್ಗಿಕೋ ಮಗ್ಗೋ. ಸೇಯ್ಯಥಿದಂ, ಸಮ್ಮಾದಿಟ್ಠಿ ಸಮ್ಮಾಸಙ್ಕಪ್ಪೋ ಸಮ್ಮಾವಾಚಾ ಸಮ್ಮಾಕಮ್ಮನ್ತೋ ಸಮ್ಮಾಆಜೀವೋ ಸಮ್ಮಾವಾಯಾಮೋ ಸಮ್ಮಾಸತಿ ಸಮ್ಮಾಸಮಾಧೀ’’ತಿ ಏವಮಾದಿನಾ ಭಗವತಾ ಸುತ್ತನ್ತಭಾಜನೀಯಅಭಿಧಮ್ಮಭಾಜನೀಯಪಞ್ಹಾಪುಚ್ಛಕಸಙ್ಖಾತೇಹಿ ತೀಹಿ ಮಹಾನಯೇಹಿ ಮಗ್ಗಙ್ಗಾ ವಿತ್ಥಾರತೋ ವಿಭಜಿತ್ವಾ ದೇಸಿತಾ.

ಝಾನವಿಭಙ್ಗ

ಪುಚ್ಛಾ – ದ್ವಾದಸಮೋ ಪನ ಆವುಸೋ ಝಾನವಿಭಙ್ಗೋ ಭಗವತಾ ಕಥಂ ವಿತ್ಥಾರೇನ ವಿಭಜಿತ್ವಾ ದೇಸಿತೋ.

ವಿಸ್ಸಜ್ಜನಾ – ದ್ವಾದಸಮೋ ಭನ್ತೇ ಝಾನವಿಭಙ್ಗೋ ‘‘ಇಧ ಭಿಕ್ಖು ಪಾತಿಮೋಕ್ಖಸಂವರಸಂವುತೋ ವಿಹರತಿ ಆಚಾರಗೋಚರಸಮ್ಪನ್ನೋ ಅಣುಮತ್ತೇಸು ವಜ್ಜೇಸು ಭಯದಸ್ಸಾವೀ ಸಮಾದಾಯ ಸಿಕ್ಖತಿ ಸಿಕ್ಖಾಪದೇಸು ಇನ್ದ್ರಿಯೇಸು ಗುತ್ತದ್ವಾರೋ ಭೋಜನೇ ಮತ್ತಞ್ಞೂ ಪುಬ್ಬರತ್ತಾಪರರತ್ತಂ ಜಾಗರಿಯಾನುಯೋಗಮನುಯುತ್ತೋ’’ತಿ ಏವಮಾದಿನಾ ಭಗವತಾ ವಿತ್ಥಾರತೋ ವಿಭಜಿತ್ವಾ ದೇಸಿತೋ.

ಅಪ್ಪಮಞ್ಞಾವಿಭಙ್ಗ

ಪುಚ್ಛಾ – ತೇರಸಮೇ ಪನ ಆವುಸೋ ಅಪ್ಪಮಞ್ಞಾವಿಭಙ್ಗೇ ಭಗವತಾ ಕಥಂ ಅಪ್ಪಮಞ್ಞಾಯೋ ವಿತ್ಥಾರತೋ ವಿಭಜಿತ್ವಾ ದೇಸಿತಾ.

ವಿಸ್ಸಜ್ಜನಾ – ತೇರಸಮೇ ಭನ್ತೇ ಅಪ್ಪಮಞ್ಞಾವಿಭಙ್ಗೇ ‘‘ಚತಸ್ಸೋ ಅಪ್ಪಮಞ್ಞಾಯೋ ಇಧ ಭಿಕ್ಖು ಮೇತ್ತಾಸಹಗತೇನ ಚೇತಸಾ ಏಕಂ ದಿಸಂ ಫರಿತ್ವಾ ವಿಹರತಿ, ತಥಾ ದುತಿಯಂ. ತಥಾ ತತಿಯಂ. ತಥಾ ಚತುತ್ಥಂ. ಇತಿ ಉದ್ಧಮಧೋ ತಿರಿಯಂ ಸಬ್ಬಧಿ ಸಬ್ಬತ್ತತಾಯ ಸಬ್ಬಾವನ್ತಂ ಲೋಕಂ ಮೇತ್ತಾಸಹಗತೇನ ಚೇತಸಾ ವಿಪುಲೇನ ಮಹಗ್ಗತೇನ ಅಪ್ಪಮಾಣೇನ ಅವೇರೇನ ಅಬ್ಯಾಪಜ್ಜೇನ ಫರಿತ್ವಾ ವಿಹರತೀ’’ತಿ ಏವಮಾದಿನಾ ಭಗವತಾ ಸುತ್ತನ್ತಭಾಜನೀಯಅಭಿಧಮ್ಮಭಾಜನೀಯಪಞ್ಹಾಪುಚ್ಛಕಸಙ್ಖಾತೇಹಿ ತೀಹಿ ಮಹಾನಯೇಹಿ ಅಪ್ಪಮಞ್ಞಾಯೋ ವಿತ್ಥಾರತೋ ವಿಭಜಿತ್ವಾ ದೇಸಿತಾ.

ಸಿಕ್ಖಾಪದವಿಭಙ್ಗ

ಪುಚ್ಛಾ – ಅಭಿಧಮ್ಮಪಿಟಕೇ ಆವುಸೋ ವಿಭಙ್ಗಪ್ಪಕರಣೇ ಚುದ್ದಸಮೇ ಸಿಕ್ಖಾಪದವಿಭಙ್ಗೇ ಭಗವತಾ ಕಥಂ ಸಿಕ್ಖಾಪದಾನಿ ವಿತ್ಥಾರತೋ ವಿಭಜಿತ್ವಾ ದೇಸಿತಾನಿ.

ವಿಸ್ಸಜ್ಜನಾ – ಚುದ್ದಸಮೇ ಭನ್ತೇ ಸಿಕ್ಖಾಪದವಿಭಙ್ಗೇ ‘‘ಪಞ್ಚ ಸಿಕ್ಖಾಪದಾನಿ ಪಾಣಾತಿಪಾತಾ ವೇರಮಣೀ ಸಿಕ್ಖಾಪದಂ, ಅದಿನ್ನಾದಾನಾ ವೇರಮಣೀ ಸಿಕ್ಖಾಪದಂ, ಕಾಮೇಸುಮಿಚ್ಛಾಚಾರಾ ವೇರಮಣೀ ಸಿಕ್ಖಾಪದಂ, ಮುಸಾವಾದಾ ವೇರಮಣೀ ಸಿಕ್ಖಾಪದಂ, ಸುರಾಮೇರಯಮಜ್ಜಪಮಾದಟ್ಠಾನಾ ವೇರಮಣೀ ಸಿಕ್ಖಾಪದಂ. ತತ್ಥ ಕತಮಂ ಪಾಣಾತಿಪಾತಾ ವೇರಮಣೀ ಸಿಕ್ಖಾಪದಂ, ಯಸ್ಮಿಂ ಸಮಯೇ ಕಾಮಾವಚರಂ ಕುಸಲಂ ಚಿತ್ತಂ ಉಪ್ಪನ್ನಂ ಹೋತಿ ಸೋಮನಸ್ಸಸಹಗತಂ ಞಾಣಸಮ್ಪಯುತ್ತಂ ಪಾಣಾತಿಪಾತಾ ವಿರಮನ್ತಸ್ಸಾ’’ತಿ ಏವಮಾದಿನಾ ಅಭಿಧಮ್ಮಭಾಜನೀಯಪಞ್ಹಾಪುಚ್ಛಕಸಙ್ಖಾತೇಹಿ ದ್ವೀಹಿ ಮಹಾನಯೇಹಿ ಭಗವತಾ ಸಿಕ್ಖಾಪದಾನಿ ವಿತ್ಥಾರತೋ ವಿಭಜಿತ್ವಾ ದೇಸಿತಾನಿ.

ಪಟಿಸಮ್ಭಿದಾವಿಭಙ್ಗ

ಪುಚ್ಛಾ – ಪನ್ನರಸಮೇ ಪನ ಆವುಸೋ ಪಟಿಸಮ್ಭಿದಾವಿಭಙ್ಗೇ ಭಗವತಾ ಕಥಂ ಪಟಿಸಮ್ಭಿದಾಯೋ ವಿತ್ಥಾರತೋ ವಿಭಜಿತ್ವಾ ದೇಸಿತಾ.

ವಿಸ್ಸಜ್ಜನಾ – ಪನ್ನರಸಮೇ ಭನ್ತೇ ಪಟಿಸಮ್ಭಿದಾವಿಭಙ್ಗೇ ‘‘ಚತಸ್ಸೋ ಪಟಿಸಮ್ಭಿದಾ ಅತ್ಥಪಟಿಸಮ್ಭಿದಾ ಧಮ್ಮಪಟಿಸಮ್ಭಿದಾ ನಿರುತ್ತಿಪಟಿಸಮ್ಭಿದಾ ಪಟಿಭಾನಪಟಿಸಮ್ಭಿದಾ. ಅತ್ಥೇ ಞಾಣಂ ಅತ್ಥಪಟಿಸಮ್ಭಿದಾ, ಧಮ್ಮೇ ಞಾಣಂ ಧಮ್ಮಪಟಿಸಮ್ಭಿದಾ, ತತ್ರ ಧಮ್ಮನಿರುತ್ತಾಭಿಲಾಪೇ ಞಾಣಂ ನಿರುತ್ತಿಪಟಿಸಮ್ಭಿದಾ, ಞಾಣೇಸು ಞಾಣಂ ಪಟಿಭಾನಪಟಿಸಮ್ಭಿದಾ’’ತಿ ಏವಮಾದಿನಾ ಭಗವತಾ ಚತಸ್ಸೋ ಪಟಿಸಮ್ಭಿದಾಯೋ ಸುತ್ತನ್ತಭಾಜನೀಯಅಭಿಧಮ್ಮಭಾಜನೀಯಪಞ್ಹಾಪುಚ್ಛಕಸಙ್ಖಾತೇಹಿ ತೀಹಿ ಮಹಾನಯೇಹಿ ವಿತ್ಥಾರತೋ ವಿಭಜಿತ್ವಾ ದೇಸಿತಾ.

ಞಾಣವಿಭಙ್ಗ

ಪುಚ್ಛಾ – ಸೋಳಸಮೇ ಪನ ಆವುಸೋ ಞಾಣವಿಭಙ್ಗೇ ಭಗವತಾ ಕಥಂ ಞಾಣಾನಿ ವಿತ್ಥಾರತೋ ವಿಭಜಿತ್ವಾ ದೇಸಿತಾನಿ.

ವಿಸ್ಸಜ್ಜನಾ – ಸೋಳಸಮೇ ಭನ್ತೇ ಞಾಣವಿಭಙ್ಗೇ ‘‘ಏಕವಿಧೇನ ಞಾಣವತ್ಥು ಪಞ್ಚವಿಞ್ಞಾಣಾ ನ ಹೇತೂ, ಅಹೇತುಕಾ, ಹೇತುವಿಪ್ಪಯುತ್ತಾ, ಸಪ್ಪಚ್ಚಯಾ, ಸಙ್ಖತಾ, ಅರೂಪಾ, ಲೋಕಿಯಾ, ಸಾಸವಾ’’ತಿ ಏವಮಾದಿನಾ ಏಕಕತೋ ಪಟ್ಠಾಯ ಯಾವ ದಸಕಾ ಭಗವತಾ ಞಾಣಾನಿ ವಿತ್ಥಾರತೋ ವಿಭಜಿತ್ವಾ ದೇಸಿತಾನಿ.

ಖುದ್ದಕವತ್ಥುವಿಭಙ್ಗ

ಪುಚ್ಛಾ – ಅಭಿಧಮ್ಮಪಿಟಕೇ ಆವುಸೋ ವಿಭಙ್ಗಪ್ಪಕರಣೇ ಸತ್ತರಸಮೋ ಖುದ್ದಕವತ್ಥುವಿಭಙ್ಗೋ ಭಗವತಾ ಕಥಂ ದೇಸಿತೋ.

ವಿಸ್ಸಜ್ಜನಾ – ಅಭಿಧಮ್ಮಪಿಟಕೇ ಭನ್ತೇ ದುತಿಯೇ ವಿಭಙ್ಗಪ್ಪಕರಣೇ ಸತ್ತರಸಮೋ ಖುದ್ದಕವತ್ಥುವಿಭಙ್ಗೋ ‘‘ಜಾತಿಮದೋ, ಗೋತ್ತಮದೋ, ಆರೋಗ್ಯಮದೋ, ಯೋಬ್ಬನಮದೋ, ಜೀವಿತಮದೋ’’ತಿ ಏವಮಾದಿನಾ ಏಕಕತೋ ಪಟ್ಠಾಯ ಯಾವ ಅಟ್ಠಸತತಣ್ಹಾವಿಚರಿತಂ ಭಗವತಾ ವಿತ್ಥಾರತೋ ವಿಭಜಿತ್ವಾ ದೇಸಿತೋ.

ಧಮ್ಮಹದಯವಿಭಙ್ಗ

ಪುಚ್ಛಾ – ತತ್ಥ ಆವುಸೋ ಅಟ್ಠಾರಸಮೋ ಧಮ್ಮಹದಯವಿಭಙ್ಗೋ ಭಗವತಾ ಕಥಂ ವಿಭಜಿತ್ವಾ ದೇಸಿತೋ.

ವಿಸ್ಸಜ್ಜನಾ – ಅಟ್ಠಾರಸಮೋ ಭನ್ತೇ ಧಮ್ಮಹದಯವಿಭಙ್ಗೋ ‘‘ಕತಿ ಖನ್ಧಾ, ಕತಿ ಆಯತನಾನಿ, ಕತಿ ಧಾತುಯೋ, ಕತಿ ಸಚ್ಚಾನಿ, ಕತಿ ಇನ್ದ್ರಿಯಾನಿ, ಕತಿ ಹೇತೂ, ಕತಿ ಆಹಾರಾ, ಕತಿ ಫಸ್ಸಾ, ಕತಿ ವೇದನಾ, ಕತಿ ಸಞ್ಞಾ, ಕತಿ ಚೇತನಾ, ಕತಿ ಚಿತ್ತಾನಿ. ಪಞ್ಚಕ್ಖನ್ಧಾ, ದ್ವಾದಸಾಯತನಾನಿ, ಅಟ್ಠಾರಸ ಧಾತುಯೋ, ಚತ್ತಾರಿ ಸಚ್ಚಾನಿ, ಬಾವೀಸತಿನ್ದ್ರಿಯಾನಿ, ನವ ಹೇತೂ, ಚತ್ತಾರೋ ಆಹಾರಾ, ಸತ್ತ ಫಸ್ಸಾ, ಸತ್ತ ವೇದನಾ, ಸತ್ತ ಸಞ್ಞಾ, ಸತ್ತ ಚೇತನಾ, ಸತ್ತ ಚಿತ್ತಾನೀ’’ತಿ ಏವಮಾದಿನಾ ಸಬ್ಬಸಙ್ಗಾಹಕಾದೀಹಿ ದಸಹಿ ವಾರೇಹಿ ಭಗವತಾ ವಿತ್ಥಾರೇನ ವಿಭಜಿತ್ವಾ ದೇಸಿತೋ.

ಪುಚ್ಛಾ – ಕಥಞ್ಚಾವುಸೋ ತತ್ಥ ಭಗವತಾ ಉಪ್ಪಾದಕಕಮ್ಮಆಯುಪ್ಪಮಾಣವಾರೋ ವಿತ್ಥಾರೇನ ವಿಭಜಿತ್ವಾ ದೇಸಿತೋ.

ವಿಸ್ಸಜ್ಜನಾ – ದಾನಂ ದತ್ವಾ ಸೀಲಂ ಸಮಾದಿಯಿತ್ವಾ ಉಪೋಸಥಕಮ್ಮಂ ಕತ್ವಾ ಕತ್ಥ ಉಪಪಜ್ಜನ್ತಿ. ದಾನಂ ದತ್ವಾ, ಸೀಲಂ ಸಮಾದಿಯಿತ್ವಾ ಉಪೋಸಥಕಮ್ಮಂ ಕತ್ವಾ ಅಪ್ಪೇಕಚ್ಚೇ ಖತ್ತಿಯಮಹಾಸಾಲಾನಂ ಸಹಬ್ಯತಂ ಉಪಪಜ್ಜನ್ತಿ, ಅಪ್ಪೇಕಚ್ಚೇ ಬ್ರಾಹ್ಮಣಮಹಾಸಾಲಾನಂ, ಅಪ್ಪೇಕಚ್ಚೇ ಗಹಪತಿಮಹಾಸಾಲಾನಂ, ಅಪ್ಪೇಕಚ್ಚೇ ಚಾತುಮಹಾರಾಜಿಕಾನಂ ದೇವಾನಂ, ಅಪ್ಪೇಕಚ್ಚೇ ತಾವತಿಂಸಾನಂ ದೇವಾನಂ, ಅಪ್ಪೇಕಚ್ಚೇ ಯಾಮಾನಂ ದೇವಾನಂ, ಅಪ್ಪೇಕಚ್ಚೇ ತುಸಿತಾನಂ ದೇವಾನಂ ಸಹಬ್ಯತಂ ಉಪಪಜ್ಜನ್ತೀತಿ ಏವಮಾದಿನಾ ಭನ್ತೇ ತತ್ಥ ಭಗವತಾ ಉಪ್ಪಾದಕಕಮ್ಮಆಯುಪ್ಪಮಾಣವಾರೋ ವಿತ್ಥಾರೇನ ವಿಭಜಿತ್ವಾ ದೇಸಿತೋ.

ಉಕ್ಖಿತ್ತಾ ಪುಞ್ಞತೇಜೇನ, ಕಾಮರೂಪಗತಿಂ ಗತಾ;

ಭವಗ್ಗತಮ್ಪಿ ಸಮ್ಪತ್ತಾ, ಪುನಾಗಚ್ಛನ್ತಿ ದುಗ್ಗತಿಂ –

ಧಾತುಕಥಾ

ಪುಚ್ಛಾ – ತೇನಾವುಸೋ ಭಗವತಾ ಅಟ್ಠಾರಸಹಿ ಬುದ್ಧಧಮ್ಮೇಹಿ ಸಮನ್ನಾಗತೇನ ಅಭಿಧಮ್ಮೇ ಅಟ್ಠಾರಸಹಿ ವಿಭಙ್ಗೇಹಿ ಪಟಿಮಣ್ಡಿತಂ ದುತಿಯಂ ವಿಭಙ್ಗಪ್ಪಕರಣಂ ದೇಸೇತ್ವಾ ತದನನ್ತರಂ ಧಾತುಕಥಂ ನಾಮ ತತಿಯಂ ಪಕರಣಂ ಕಥಂ ವಿಭಜಿತ್ವಾ ದೇಸಿತಂ.

ವಿಸ್ಸಜ್ಜನಾ – ತತಿಯಂ ಭನ್ತೇ ಧಾತುಕಥಂ ನಾಮ ಅಭಿಧಮ್ಮಪಿಟಕಂ ‘‘ಸಙ್ಗಹೋ ಅಸಙ್ಗಹೋ, ಸಙ್ಗಹಿತೇನ ಅಸಙ್ಗಹಿತಂ, ಅಸಙ್ಗಹಿತೇನ ಸಙ್ಗಹಿತಂ, ಸಙ್ಗಹಿತೇನ ಸಙ್ಗಹಿತಂ, ಅಸಙ್ಗಹಿತೇನ ಅಸಙ್ಗಹಿತಂ. ಸಮ್ಪಯೋಗೋ ವಿಪ್ಪಯೋಗೋ, ಸಮ್ಪಯುತ್ತೇನ ವಿಪ್ಪಯುತ್ತಂ, ವಿಪ್ಪಯುತ್ತೇನ ಸಮ್ಪಯುತ್ತಂ, ಸಮ್ಪಯುತ್ತೇನ ಸಮ್ಪಯುತ್ತಂ, ವಿಪ್ಪಯುತ್ತೇನ ವಿಪ್ಪಯುತ್ತಂ. ಸಙ್ಗಹಿತೇನ ಸಮ್ಪಯುತ್ತಂ ವಿಪ್ಪಯುತ್ತಂ, ಸಮ್ಪಯುತ್ತೇನ ಸಙ್ಗಹಿತಂ ಅಸಙ್ಗಹಿತಂ, ಅಸಙ್ಗಹಿತೇನ ಸಮ್ಪಯುತ್ತಂ ವಿಪ್ಪಯುತ್ತಂ, ವಿಪ್ಪಯುತ್ತೇನ ಸಙ್ಗಹಿತಂ ಅಸಙ್ಗಹಿತ’’ನ್ತಿ ಏವಮಾದಿನಾ ಪಞ್ಚ ಮಾತಿಕಾಯೋ ಪಠಮಂ ನಿಕ್ಖಿಪಿತ್ವಾ ಸಙ್ಗಹಾಸಙ್ಗಹಾದೀಹಿ ಚುದ್ದಸಹಿ ನಯೇಹಿ ಭಗವತಾ ವಿತ್ಥಾರತೋ ವಿಭಜಿತ್ವಾ ದೇಸಿತಂ.

ಪುಗ್ಗಲಪಞ್ಞತ್ತಿ

ಪುಚ್ಛಾ – ತೇನಾವುಸೋ ಭಗವತಾ ಸಬ್ಬಧಾತುಕುಸಲೇನ ಅಭಿಧಮ್ಮಪಿಟಕೇ ತತಿಯಂ ಧಾತುಕಥಾಪಕರಣಂ ದೇಸೇತ್ವಾ ತದನನ್ತರಂ ಚತುತ್ಥಂ ಪುಗ್ಗಲಪಞ್ಞತ್ತಿಪ್ಪಕರಣಂ ಕಥಂ ವಿಭಜಿತ್ವಾ ದೇಸಿತಂ.

ವಿಸ್ಸಜ್ಜನಾ – ಅಭಿಧಮ್ಮಪಿಟಕೇ ಭನ್ತೇ ಚತುತ್ಥಂ ಪುಗ್ಗಲಪಞ್ಞತ್ತಿಪ್ಪಕರಣಂ ‘‘ಛ ಪಞ್ಞತ್ತಿಯೋ ಖನ್ಧಪಞ್ಞತ್ತಿ ಆಯತನಪಞ್ಞತ್ತಿ ಧಾತುಪಞ್ಞತ್ತಿ ಸಚ್ಚಪಞ್ಞತ್ತಿ ಇನ್ದ್ರಿಯಪಞ್ಞತ್ತಿ ಪುಗ್ಗಲಪಞ್ಞತ್ತಿ. ಕಿತ್ತಾವತಾ ಖನ್ಧಾನಂ ಖನ್ಧಪಞ್ಞತ್ತಿ, ಯಾವತಾ ಪಞ್ಚಕ್ಖನ್ಧಾ, ರೂಪಕ್ಖನ್ಧೋ ವೇದನಾಕ್ಖನ್ಧೋ ಸಞ್ಞಾಕ್ಖನ್ಧೋ ಸಙ್ಖಾರಕ್ಖನ್ಧೋ ವಿಞ್ಞಾಣಕ್ಖನ್ಧೋ. ಏತ್ತಾವತಾ ಖನ್ಧಾನಂ ಖನ್ಧಪಞ್ಞತ್ತೀ’’ತಿ ಏವಮಾದಿನಾ ಖನ್ಧಾಯತನಧಾತುಸಚ್ಚಇನ್ದ್ರಿಯಪಞ್ಞತ್ತಿಯೋ ಸಂಖಿತ್ತೇನ ಉದ್ದಿಸಿತ್ವಾ ಪುಗ್ಗಲಪಞ್ಞತ್ತಿಂ ಚ ಏಕಕದುಕತಿಕಚತುಕ್ಕಪಞ್ಚಕಛಕ್ಕಸತ್ತಕಅಟ್ಠಕನವಕದಸಕವಸೇನ ವಿತ್ಥಾರತೋ ವಿಭಜಿತ್ವಾ ಭಗವತಾ ದೇಸಿತಾ.

ಕಥಾವತ್ಥು

ಪುಚ್ಛಾ – ತೇನಾವುಸೋ ಭಗವತಾ ಸಬ್ಬಪರಮತ್ಥಪಞ್ಞತ್ತಿಧಮ್ಮಕುಸಲೇನ ಅಭಿಧಮ್ಮಪಿಟಕೇ ಚತುತ್ಥಂ ಪುಗ್ಗಲಪಞ್ಞತ್ತಿಪ್ಪಕರಣಂ ದೇಸೇತ್ವಾ ತದನನ್ತರಂ ಪಞ್ಚಮಂ ಕಥಾವತ್ಥುಪ್ಪಕರಣಂ ಕಥಂ ದೇಸಿತಂ.

ವಿಸ್ಸಜ್ಜನಾ – ಸಬ್ಬಪರಮತ್ಥಪಞ್ಞತ್ತಿಧಮ್ಮಕುಸಲೇನ ಭನ್ತೇ ಭಗವತಾ ಲೋಕೇ ಅಗ್ಗಪುಗ್ಗಲೇನ ಅಭಿಧಮ್ಮಪಿಟಕೇ ಚತುತ್ಥಂ ಪುಗ್ಗಲಪಞ್ಞತ್ತಿಪ್ಪಕರಣಂ ದೇಸೇತ್ವಾ ತದನನ್ತರಂ ಕಥಾವತ್ಥುದೇಸನಾಯ ವಾರೇ ಸಮ್ಪತ್ತೇ ‘‘ಅನಾಗತೇ ಮಮ ಸಾವಕೋ ಮೋಗ್ಗಲಿಪುತ್ತತಿಸ್ಸತ್ಥೇರೋ ನಾಮ ಉಪ್ಪನ್ನಂ ಸಾಸನಮಲಂ ಸೋಧೇತ್ವಾ ತತಿಯಸಙ್ಗೀತಿಂ ಕರೋನ್ತೋ ಭಿಕ್ಖುಸಙ್ಘಸ್ಸ ಮಜ್ಝೇ ನಿಸಿನ್ನೋ ಸಕವಾದೇ ಪಞ್ಚ ಸುತ್ತಸತಾನಿ ಪರವಾದೇ ಪಞ್ಚಾತಿ ಸುತ್ತಸಹಸ್ಸಂ ಸಮೋಧಾನೇತ್ವಾ, ಇಮಂ ಪಕರಣಂ ಭಾಜೇಸ್ಸತೀ’’ತಿ ತಸ್ಸೋಕಾಸಂ ಕರೋನ್ತೇನ ಪುಗ್ಗಲವಾರೇ ಅಟ್ಠಮುಖಾ ವಾದಯುತ್ತಿಂ ಆದಿಂ ಕತ್ವಾ ಸಬ್ಬಕಥಾಮಗ್ಗೇಸು ಅಸಮ್ಪುಣ್ಣಭಾಣವಾರತ್ಥಾಯ ತನ್ತಿಯಾ ಮಾತಿಕಾ ನಿಕ್ಖೇಪಮತ್ತೇನ ಪಞ್ಚಮಂ ಕಥಾವತ್ಥುಪ್ಪಕರಣಂ ಸಂಖೇಪತೋ ದೇಸಿತಂ.

ಪುಚ್ಛಾ – ಅಧುನಾ ಪಾಕಟಂ ಪನಾವುಸೋ ವಿತ್ಥಾರಂ ಕಥಾವತ್ಥುಪ್ಪಕರಣಂ ಕದಾ ಕೇನ ಕತ್ಥ ಕಥಞ್ಚ ವಿತ್ಥಾರತೋ ವಿಭಜಿತ್ವಾ ದೇಸಿತಂ.

ವಿಸ್ಸಜ್ಜನಾ – ತಂ ಖೋ ಭನ್ತೇ ಭಗವತೋ ನಯಮುಖಂ ನಿಸ್ಸಾಯ ಆಯಸ್ಮತಾ ಮಹಾಮೋಗ್ಗಲಿಪುತ್ತತಿಸ್ಸತ್ಥೇರೇನ ತತಿಯಸಂಗೀತಿಕಾಲೇ ಪಾಟಲಿಪುತ್ತೇ ಅಸೋಕಾರಾಮೇ ಸಟ್ಠಿಭಿಕ್ಖುಸತಸಹಸ್ಸಾನಂ ಸಮಾಗಮೇ ಭಗವತಾ ದಿನ್ನನಯವಸೇನ ತಥಾಗತೇನ ಠಪಿತಮಾತಿಕಂ ವಿಭಜನ್ತೇನ ಸಕವಾದೇ ಪಞ್ಚಸುತ್ತಸತಾನಿ ಪರವಾದೇ ಪಞ್ಚಾತಿ ಸುತ್ತಸಹಸ್ಸಂ ಆಹರಿತ್ವಾ ಇದಂ ಪರವಾದಮಥನಂ ಅಧುನಾ ಪಾಕಟಂ ಕಥಾವತ್ಥುಪ್ಪಕರಣಂ ವಿತ್ಥಾರತೋ ವಿಭಜಿತ್ವಾ ದೇಸಿತಂ.

ಪುಚ್ಛಾ – ಕತಿ ಆವುಸೋ ತತ್ಥ ಕಥಾಯೋ ತೇನ ಆಯಸ್ಮತಾ ಮಹಾಮೋಗ್ಗಲಿಪುತ್ತತಿಸ್ಸತ್ಥೇರೇನ ವಿತ್ಥಾರತೋ ವಿಭಜಿತ್ವಾ ಕಥಿತಾ.

ವಿಸ್ಸಜ್ಜನಾ – ತತ್ಥ ಭನ್ತೇ ವಾಚನಾಮಗ್ಗತೋ ದ್ವೇ ಚ ಸತಾನಿ ಸತ್ತವೀಸತಿ ಚ ಕಥಾಯೋ ಆಯಸ್ಮತಾ ಮಹಾಮೋಗ್ಗಲಿಪುತ್ತತಿಸ್ಸತ್ಥೇರೇನ ವಿತ್ಥಾರತೋ ವಿಭಜಿತ್ವಾ ಕಥಿತಾ.

ಪುಗ್ಗಲಕಥಾ

ಪುಚ್ಛಾ – ಕಥಞ್ಚಾವುಸೋ ತತ್ಥ ಪಠಮಾ ಪುಗ್ಗಲಕಥಾ ಆಯಸ್ಮತಾ ಮಹಾಮೋಗ್ಗಲಿಪುತ್ತತಿಸ್ಸತ್ಥೇರೇನ ವಿತ್ಥಾರತೋ ವಿಭಜಿತ್ವಾ ಕಥಿತಾ.

ವಿಸ್ಸಜ್ಜನಾ – ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾತಿ, ಆಮನ್ತಾ. ಯೋ ಸಚ್ಚಿಕಟ್ಠೋ ಪರಮತ್ಥೋ, ತತೋ ಸೋ ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾತಿ, ನ ಹೇವಂ ವತ್ತಬ್ಬೇ. ಆಜಾನಾಹಿ ನಿಗ್ಗಹಂ ಹಞ್ಚಿ ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನ, ತೇನ ವತ ರೇ ವತ್ತಬ್ಬೇ ‘‘ಯೋ ಸಚ್ಚಿಕಟ್ಠೋ ಪರಮತ್ಥೋ, ತತೋ ಸೋ ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’’ತಿ. ಯಂ ತತ್ಥ ವದೇಸಿ ‘‘ವತ್ತಬ್ಬೇ ಖೋ ‘ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನ’, ನೋ ಚ ವತ್ತಬ್ಬೇ ‘ಯೋ ಸಚ್ಚಿಕಟ್ಠೋ ಪರಮತ್ಥೋ, ತತೋ ಸೋ ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’’ತಿ, ಮಿಚ್ಛಾತಿ ಏವಮಾದಿನಾ ಭನ್ತೇ ತತ್ಥ ಪಠಮಾ ಪುಗ್ಗಲಕಥಾ ಪಞ್ಚ ಭಾಣವಾರಮತ್ತಾಯ ತನ್ತಿಯಾ ಆಯಸ್ಮತಾ ಮಹಾಮೋಗ್ಗಲಿಪುತ್ತತಿಸ್ಸತ್ಥೇರೇನ ವಿತ್ಥಾರತೋ ವಿಭಜಿತ್ವಾ ಕಥಿತಾ.

ಅಞ್ಞಾಣಕಥಾ

ಪುಚ್ಛಾ – ಅಭಿಧಮ್ಮಪಿಟಕೇ ಆವುಸೋ ಕಥಾವತ್ಥುಪ್ಪಕರಣೇ ದುತಿಯವಗ್ಗೇ ದುತಿಯಾ ಅಞ್ಞಾಣಕಥಾ ಆಯಸ್ಮತಾ ಮಹಾಮೋಗ್ಗಲಿಪುತ್ತತಿಸ್ಸತ್ಥೇರೇನ ಕಥಂ ವಿತ್ಥಾರತೋ ವಿಭಜಿತ್ವಾ ಕಥಿತಾ.

ವಿಸ್ಸಜ್ಜನಾ – ಅಭಿಧಮ್ಮಪಿಟಕೇ ಭನ್ತೇ ಪಞ್ಚಮೇ ಕಥಾವತ್ಥುಪ್ಪಕರಣೇ ದುತಿಯವಗ್ಗೇ ದುತಿಯಾ ಅಞ್ಞಾಣಕಥಾ ‘‘ಅತ್ಥಿ ಅರಹತೋ ಅಞ್ಞಾಣನ್ತಿ, ಆಮನ್ತಾ. ಅತ್ಥಿ ಅರಹತೋ ಅವಿಜ್ಜಾ ಅವಿಜ್ಜೋಘೋ ಅವಿಜ್ಜಾಯೋಗೋ ಅವಿಜ್ಜಾನುಸಯೋ ಅವಿಜ್ಜಾಪರಿಯುಟ್ಠಾನಂ ಅವಿಜ್ಜಾಸಂಯೋಜನಂ ಅವಿಜ್ಜಾನೀವರಣನ್ತಿ, ನ ಹೇವಂ ವತ್ತಬ್ಬೇ. ನತ್ಥಿ ಅರಹತೋ ಅವಿಜ್ಜಾ ಅವಿಜ್ಜೋಘೋ ಅವಿಜ್ಜಾಯೋಗೋ ಅವಿಜ್ಜಾನುಸಯೋ ಅವಿಜ್ಜಾಪರಿಯುಟ್ಠಾನಂ ಅವಿಜ್ಜಾಸಂಯೋಜನಂ ಅವಿಜ್ಜಾನಿವರಣನ್ತಿ, ಆಮನ್ತಾ. ಹಞ್ಚಿ ನತ್ಥಿ ಅರಹತೋ ಅವಿಜ್ಜಾ ಅವಿಜ್ಜೋಘೋ ಅವಿಜ್ಜಾಯೋಗೋ ಅವಿಜ್ಜಾನುಸಯೋ ಅವಿಜ್ಜಾಪರಿಯುಟ್ಠಾನಂ ಅವಿಜ್ಜಾಸಂಯೋಜನಂ ಅವಿಜ್ಜಾನೀವರಣಂ, ನೋ ಚ ವತ ರೇ ವತ್ತಬ್ಬೇ ‘‘ಅತ್ಥಿ ಅರಹತೋ ಅಞ್ಞಾಣ’’ನ್ತಿ ಏವಮಾದಿನಾ ಆಯಸ್ಮತಾ ಮಹಾಮೋಗ್ಗಲಿಪುತ್ತತಿಸ್ಸತ್ಥೇರೇನ ವಿತ್ಥಾರತೋ ವಿಭಜಿತ್ವಾ ಭಾಸಿತಾ.

ಅಸಞ್ಞಕಥಾ

ಪುಚ್ಛಾ – ಅಭಿಧಮ್ಮಪಿಟಕೇ ಆವುಸೋ ಪಞ್ಚಮೇ ಕಥಾವತ್ಥುಪ್ಪಕರಣೇ ತತಿಯವಗ್ಗೇ ಏಕಾದಸಮಾ ಅಸಞ್ಞಕಥಾ ಆಯಸ್ಮತಾ ಮಹಾಮೋಗ್ಗಲಿಪುತ್ತತಿಸ್ಸತ್ಥೇರೇನ ಕಥಂ ವಿತ್ಥಾರತೋ ವಿಭಜಿತ್ವಾ ಕಥಿತಾ.

ವಿಸ್ಸಜ್ಜನಾ – ಅಭಿಧಮ್ಮಪಿಟಕೇ ಭನ್ತೇ ಪಞ್ಚಮೇ ಕಥಾವತ್ಥುಪ್ಪಕರಣೇ ತತಿಯವಗ್ಗೇ ಏಕಾದಸಮಾ ಅಸಞ್ಞಕಥಾ ‘‘ಅಸಞ್ಞಸತ್ತೇಸು ಸಞ್ಞಾ ಅತ್ಥೀತಿ, ಆಮನ್ತಾ. ಸಞ್ಞಾಭವೋ ಸಞ್ಞಾಗತಿ ಸಞ್ಞಾಸತ್ತಾವಾಸೋ ಸಞ್ಞಾಸಂಸಾರೋ ಸಞ್ಞಾಯೋನಿ ಸಞ್ಞತ್ತಭಾವಪಟಿಲಾಭೋತಿ, ನ ಹೇವಂ ವತ್ತಬ್ಬೇ’’ತಿ ಏವಮಾದಿನಾ ಆಯಸ್ಮತಾ ಮಹಾಮೋಗ್ಗಲಿಪುತ್ತತಿಸ್ಸತ್ಥೇರೇನ ವಿತ್ಥಾರತೋ ವಿಭಜಿತ್ವಾ ಕಥಿತಾ.

ಅಸಞ್ಞಸತ್ತೇಸು ಸಞ್ಞಾ ಅತ್ಥಿ.

ಸಞ್ಞಾಭವೋ ಸಞ್ಞಾಗತಿ ಸಞ್ಞಾಸತ್ತಾವಾಸೋ ಸಞ್ಞಾಸಂಸಾರೋ ಸಞ್ಞಾಯೋನಿ ಸಞ್ಞತ್ತಭಾವಪಟಿಲಾಭೋ.

ನ ಹೇವಂ ವತ್ತಬ್ಬೇ.

ನನು ಅಸಞ್ಞಭವೋ ಅಸಞ್ಞಗತಿ ಅಸಞ್ಞಸತ್ತಾವಾಸೋ ಅಸಞ್ಞಸಂಸಾರೋ ಅಸಞ್ಞಯೋನಿ ಅಸಞ್ಞತ್ತಭಾವಪಟಿಲಾಭೋ.

ಹಞ್ಚಿ ಅಸಞ್ಞಭವೋ ಅಸಞ್ಞಗತಿ ಅಸಞ್ಞಸತ್ತಾವಾಸೋ ಅಸಞ್ಞಸಂಸಾರೋ ಅಸಞ್ಞಯೋನಿ ಅಸಞ್ಞತ್ತಭಾವಪಟಿಲಾಭೋ, ನೋ ಚ ವತ ರೇ ವತ್ತಬ್ಬೇ ಅಸಞ್ಞಸತ್ತೇಸು ಸಞ್ಞಾ ಅತ್ಥಿ.

ಅಸಞ್ಞಸತ್ತೇಸು ಸಞ್ಞಾ ಅತ್ಥಿ.

ಪಞ್ಚವೋಕಾರಭವೋ ಗತಿ ಸತ್ತಾವಾಸೋ ಸಂಸಾರೋ ಯೋನಿ ಅತ್ತಭಾವಪಟಿಲಾಭೋ.

ನನು ಏಕವೋಕಾರಭವೋ ಗತಿ ಸತ್ತಾವಾಸೋ ಸಂಸಾರೋ ಯೋನಿ ಅತ್ತಭಾವಪಟಿಲಾಭೋ.

ಹಞ್ಚಿ ಏಕವೋಕಾರಭವೋ ಗತಿ ಸತ್ತಾವಾಸೋ ಸಂಸಾರೋ ಯೋನಿ ಅತ್ತಭಾವಪಟಿಲಾಭೋ, ನೋ ಚ ವತ ರೇ ವತ್ತಬ್ಬೇ ಅಸಞ್ಞಸತ್ತೇಸು ಸಞ್ಞಾ ಅತ್ಥಿ.

ಛಟ್ಠವಗ್ಗ

ಪಥವೀಧಾತುಸನಿದಸ್ಸನಾತಿಆದಿಕಥಾ

ಪುಚ್ಛಾ – ಛಟ್ಠವಗ್ಗೇ ಪನ ಆವುಸೋ ಅಟ್ಠಮಾ ಪಥವೀಧಾತು ಸನಿದಸ್ಸನಾತಿಆದಿಕಥಾ ಆಯಸ್ಮತಾ ಮಹಾಮೋಗ್ಗಲಿಪುತ್ತತಿಸ್ಸತ್ಥೇರೇನ ಕಥಂ ವಿತ್ಥಾರತೋ ವಿಭಜಿತ್ವಾ ಕಥಿತಾ.

ವಿಸ್ಸಜ್ಜನಾ – ಛಟ್ಠವಗ್ಗೇ ಭನ್ತೇ ಅಟ್ಠಮಾ ಪಥವೀಧಾತು ಸನಿದಸ್ಸನಾತಿಆದಿಕಥಾ ‘‘ಪಥವೀಧಾತು ಸನಿದಸ್ಸನಾತಿ ಆಮನ್ತಾ. ರೂಪಂ ರೂಪಾಯತನಂ ರೂಪಧಾತು ನೀಲಂ ಪೀತಕಂ ಲೋಹಿತಕಂ ಓದಾತಂ ಚಕ್ಖುವಿಞ್ಞೇಯ್ಯಂ ಚಕ್ಖುಸ್ಮಿಂ ಪಟಿಹಞ್ಞತಿ ಚಕ್ಖುಸ್ಸ ಆಪಾಥಂ ಆಗಚ್ಛತೀತಿ, ನ ಹೇವಂ ವತ್ತಬ್ಬೇ’’ತಿ ಏವಮಾದಿನಾ ಆಯಸ್ಮತಾ ಮಹಾಮೋಗ್ಗಲಿ ಪುತ್ತತಿಸ್ಸತ್ಥೇರೇನ ವಿತ್ಥಾರತೋ ವಿಭಜಿತ್ವಾ ಕಥಿತಾ.

ಪಥವೀಧಾತು ಸನಿದಸ್ಸನಾ.

ಚಕ್ಖುಞ್ಚ ಪಟಿಚ್ಚ ಪಥವೀಧಾತುಞ್ಚ ಉಪ್ಪಜ್ಜತಿ ಚಕ್ಖುವಿಞ್ಞಾಣಂ.

ತೇನ ಹಿ ನ ವತ್ತಬ್ಬಂ ಚಕ್ಖುಞ್ಚ ಪಟಿಚ್ಚ ಪಥವೀಧಾತುಞ್ಚ ಉಪ್ಪಜ್ಜತಿ ಚಕ್ಖುವಿಞ್ಞಾಣಂ.

ಅನ್ತರಾಭವಕಥಾ

ಪುಚ್ಛಾ – ಅಭಿಧಮ್ಮಪಿಟಕೇ ಆವುಸೋ ಪಞ್ಚಮೇ ಕಥಾವತ್ಥುಪ್ಪಕರಣೇ ಅಟ್ಠಮವಗ್ಗೇ ದುತಿಯಾ ಅನ್ತರಾಭವಕಥಾ ಆಯಸ್ಮತಾ ಮಹಾಮೋಗ್ಗಲಿಪುತ್ತತಿಸ್ಸತ್ಥೇರೇನ ಕಥಂ ವಿತ್ಥಾರತೋ ವಿಭಜಿತ್ವಾ ಕಥಿತಾ.

ವಿಸ್ಸಜ್ಜನಾ – ಅಭಿಧಮ್ಮಪಿಟಕೇ ಭನ್ತೇ ಪಞ್ಚಮೇ ಕಥಾವತ್ಥುಪ್ಪಕರಣೇ ಅಟ್ಠಮವಗ್ಗೇ ದುತಿಯಾ ಅನ್ತರಾಭವಕಥಾ ‘‘ಅತ್ಥಿ ಅನ್ತರಾಭವೋತಿ, ಆಮನ್ತಾ. ಕಾಮಭವೋತಿ, ನ ಹೇವಂ ವತ್ತಬ್ಬೇ…ಪೇ… ಅತ್ಥಿ ಅನ್ತರಾಭವೋತಿ, ಆಮನ್ತಾ. ರೂಪಭವೋತಿ, ನ ಹೇವಂ ವತ್ತಬ್ಬೇ…ಪೇ… ಅತ್ಥಿ ಅನ್ತರಾಭವೋತಿ, ಆಮನ್ತಾ. ಅರೂಪಭವೋತಿ, ನ ಹೇವಂ ವತ್ತಬ್ಬೇ’’ತಿ ಏವಮಾದಿನಾ ಆಯಸ್ಮತಾ ಮಹಾಮೋಗ್ಗಲಿಪುತ್ತತಿಸ್ಸತ್ಥೇರೇನ ವಿತ್ಥಾರತೋ ವಿಭಜಿತ್ವಾ ಕಥಿತಾ.

ಅತ್ಥಿ ಅನ್ತರಾಭವೋ.

ನ ಹೇವಂ ವತ್ತಬ್ಬೇ.