ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ

ಅಟ್ಠಕಥಾ

ಸಂಗಾಯನಸ್ಸ ಪುಚ್ಛಾ-ವಿಸ್ಸಜ್ಜನಾ

ಸದೇವಕೋಪಿ ಚೇ ಲೋಕೋ, ಆಗನ್ತ್ವಾ ತಾಸಯೇಯ್ಯ ಮಂ;

ನ ಮೇ ಪಟಿಬಲೋ ಅಸ್ಸ, ಜನೇತುಂ ಭಯಭೇರವಂ.

ಸಚೇಪಿ ತ್ವಂ ಮಹಿಂ ಸಬ್ಬಂ, ಸಸಮುದ್ದಂ ಸಪಬ್ಬತಂ;

ಉಕ್ಖಿಪಿತ್ವಾ ಮಹಾನಾಗ, ಖಿಪೇಯ್ಯಾಸಿ ಮಮೂಪರಿ;

ನೇವ ಮೇ ಸಕ್ಕುಣೇಯ್ಯಾಸಿ, ಜನೇತುಂ ಭಯಭೇರವಂ;

ಅಞ್ಞದತ್ಥು ತವೇವಸ್ಸ, ವಿಘಾತೋ ಉರಗಾಧಿಪ.

ಮಾ ದಾನಿ ಕೋಧಂ ಜನಯಿತ್ಥ, ಇತೋ ಉದ್ಧಂ ಯಥಾ ಪುರೇ;

ಸಸ್ಸಘಾತಞ್ಚ ಮಾಕತ್ಥ, ಸುಖಕಾಮಾ ಹಿ ಪಾಣಿನೋ;

ಕರೋಥ ಮೇತ್ತಂ ಸತ್ತೇಸು, ವಸನ್ತು ಮನುಜಾ ಸುಖಂ.

ಚತ್ತಾರೋ ಆಸೀವಿಸಾ ಉಗ್ಗತೇಜಾ ಘೋರವಿಸಾತಿ ಖೋ ಭಿಕ್ಖವೇ ಚತುನ್ನೇತಂ ಮಹಾಭೂತಾನಂ ಅಧಿವಚನಂ.

ಪಞ್ಚ ವಧಕಾ ಪಚ್ಚತ್ಥಿಕಾತಿ ಖೋ ಭಿಕ್ಖವೇ ಪಞ್ಚನ್ನೇತಂ ಉಪಾದಾನಕ್ಖನ್ಧಾನಂ ಅಧಿವಚನಂ.

ಛಟ್ಠೋ ಅನ್ತರಚರೋ ವಧಕೋ ಉಕ್ಖಿತ್ತಾಸಿಕೋತಿ ಖೋ ಭಿಕ್ಖವೇ ನನ್ದೀರಾಗಸ್ಸೇತಂ ಅಧಿವಚನಂ.

ಸುಞ್ಞೋ ಗಾಮೋತಿ ಖೋ ಭಿಕ್ಖವೇ ಛನ್ನೇತಂ ಅಜ್ಝತ್ತಿಕಾನಂ ಆಯತನಾನಂ ಅಧಿವಚನಂ.

ಚೋರಾ ಗಾಮಘಾತಕಾತಿ ಖೋ ಭಿಕ್ಖವೇ ಛನ್ನೇತಂ ಬಾಹಿರಾನಂ ಆಯತನಾನಂ ಅಧಿವಚನಂ.

ಮಹಾಉದಕಣ್ಣವೋ ಖೋ ಭಿಕ್ಖವೇ ಚತುನ್ನೇತಂ ಓಘಾನಂ ಅಧಿವಚನಂ.

ಓರಿಮಂ ತೀರಂ ಸಾಸಙ್ಕಂ ಸಪ್ಪಟಿಭಯನ್ತಿ ಖೋ ಭಿಕ್ಖವೇ ಸಕ್ಕಾಯಸ್ಸೇತಂ ಅಧಿವಚನಂ.

ಪಾರಿಮಂ ತೀರಂ ಖೇಮಂ ಅಪ್ಪಟಿಭಯನ್ತಿ ಖೋ ಭಿಕ್ಖವೇ ನಿಬ್ಬಾನಸ್ಸೇತಂ ಅಧಿವಚನಂ.

ವೀರಿಯಾರಮ್ಭಸ್ಸೇತಂ ಅಧಿವಚನಂ.

ಗನ್ತ್ವಾ ಕಸ್ಮೀರಗನ್ಧಾರಂ, ಇಸಿ ಮಜ್ಝನ್ತಿಕಾ ತದಾ;

ದುಟ್ಠಂ ನಾಗಂ ಪಸಾದೇತ್ವಾ, ಮೋಚೇಸಿ ಬನ್ಧನಾ ಬಹೂ.

ಪುನಪಿ ಭನ್ತೇ ದಕ್ಖೇಮು ಸಙ್ಗತಿ ಚೇ ಭವಿಸ್ಸತಿ.

ಅಜ್ಜಾಪಿ ಸನ್ತಾನಮಯಂ, ಮಾಲಂ ಗನ್ಥೇನ್ತಿ ನನ್ದನೇ;

ದೇವಪುತ್ತೋ ಜವೋ ನಾಮ, ಯೋ ಮೇ ಮಾಲಂ ಪಟಿಚ್ಛತಿ.

ಮುಹುತ್ತೋವಿಯ ಸೋ ದಿಬ್ಬೋ, ಇಧ ವಸ್ಸಾನಿ ಸೋಳಸ;

ರತ್ತಿನ್ದಿವೋ ಚ ಸೋ ದಿಬ್ಬೋ, ಮಾನುಸಿಂ ಸರದೋ ಸತಂ.

ಇತಿ ಕಮ್ಮಾನಿ ಅನ್ವೇನ್ತಿ, ಅಸಙ್ಖೇಯ್ಯಾಪಿ ಜಾತಿಯೋ;

ಕಲ್ಯಾಣಂ ಯದಿ ವಾ ಪಾಪಂ, ನ ಹಿ ಕಮ್ಮಂ ವಿನಸ್ಸತಿ.

ಯೋ ಇಚ್ಛೇ ಪುರಿಸೋ ಹೋತುಂ, ಜಾತಿ ಜಾತಿ ಪುನಪ್ಪುನಂ;

ಪರದಾರಂ ವಿವಜ್ಜೇಯ್ಯ, ಧೋತಪಾದೋವ ಕದ್ದಮಂ.

ಯಾ ಇಚ್ಛೇ ಪುರಿಸೋ ಹೋತುಂ, ಜಾತಿ ಜಾತಿ ಪುನಪ್ಪುನಂ;

ಸಾಮಿಕಂ ಅಪಚಾಯೇಯ್ಯ, ಇನ್ದಂವ ಪರಿಚಾರಿಕಾ.

ಯೋ ಇಚ್ಛೇ ದಿಬ್ಬಭೋಗಞ್ಚ, ದಿಬ್ಬಮಾಯುಂ ಯಸಂ ಸುಖಂ;

ಪಾಪಾನಿ ಪರಿವಜ್ಜೇತ್ವಾ, ತಿವಿಧಂ ಧಮ್ಮಮಾಚರೇ.

ಯಂ ಭಿಕ್ಖವೇ ಸದೇವಕಸ್ಸ ಲೋಕಸ್ಸ ಸಮಾರಕಸ್ಸ ಸಬ್ರಹ್ಮಕಸ್ಸ ಸಸ್ಸಮಣಬ್ರಾಹ್ಮಣಿಯಾ ಪಜಾಯ ಸದೇವಮನುಸ್ಸಾಯ ದಿಟ್ಠಂ ಸುತಂ ಮುತಂ ವಿಞ್ಞಾತಂ ಪತ್ತಂ ಪರಿಯೇಸಿತಂ ಅನುವಿಚರಿತಂ ಮನಸಾ, ತಮಹಂ ಜಾನಾಮಿ ತಮಹಂ ಅಭಿಞ್ಞಾಸಿಂ, ತಂ ತಥಾಗತಸ್ಸ ವಿದಿತಂ, ತಂ ತಥಾಗತೋ ನ ಉಪಟ್ಠಾತಿ.

ಇತಿ ಖೋ ಭಿಕ್ಖವೇ ತಥಾಗತೋ ದಿಟ್ಠಸುತಮುತವಿಞ್ಞಾತಬ್ಬೇಸು ಧಮ್ಮೇಸು ತಾದೀಯೇವ ತಾದೀ, ತುಮ್ಹಾ ಚ ಪನ ತಾದಿಮ್ಹಾ ಅಞ್ಞೋ ತಾದೀ ಉತ್ತರಿತರೋ ವಾ ಪಣೀತತರೋ ವಾ ನತ್ಥೀತಿ ವದಾಮಿ.

ಸುವಣ್ಣಭೂಮಿಂ ಗನ್ತ್ವಾನ, ಸೋಣುತ್ತರಾ ಮಹಿದ್ಧಿಕಾ;

ಪಿಸಾಚೇ ನಿದ್ಧಮೇತ್ವಾನ, ಬ್ರಹ್ಮಜಾಲಮದೇಸಿಸುಂ.

ಸಮಣಾ ಮಯಂ ಮಹಾರಾಜ, ಧಮ್ಮರಾಜಸ್ಸ ಸಾವಕಾ;

ತವೇವ ಅನುಕಮ್ಪಾಯ, ಜಮ್ಬುದೀಪಾ ಇಧಾಗತಾ.

ಅಹಂ ಬುದ್ಧಞ್ಚ ಧಮ್ಮಞ್ಚ, ಸಙ್ಘಞ್ಚ ಸರಣಂ ಗತೋ,

ಉಪಾಸಕತ್ತಂ ದೇಸೇಸಿಂ, ಸಕ್ಯಪುತ್ತಸ್ಸ ಸಾಸನೇ.

ತೇನ ಸಮಯೇನ ಬುದ್ಧೋ ಭಗವಾ ವೇರಞ್ಜಾಯಂ ವಿಹರತಿ ನಳೇರುಪುಚಿ ಮನ್ದಮೂಲೇ.

ಸಗ್ಗಾರೋಹಣಸೋಪಾಣಂ, ಅಞ್ಞಂ ಸೀಲಸಮಂ ಕುತೋ;

ದ್ವಾರಂ ವಾ ಪನ ನಿಬ್ಬಾನ, ನಗರಸ್ಸ ಪವೇಸನೇ.

ಅಲಮೇವ ಕಾತುಂ ಕಲ್ಯಾಣಂ, ದಾನಂ ದಾತುಂ ಯಥಾರಹಂ;

ಪಾಣಿಂ ಕಾಮದದಂ ದಿಸ್ವಾ, ಕೋ ಪುಞ್ಞಂ ನಕರಿಸ್ಸತಿ.

ದಸ್ಸಾಮನ್ನಞ್ಚ ಪಾನಞ್ಚ, ವತ್ಥಸೇನಾಸನಾನಿ ಚ;

ಪಪಞ್ಚ ಉದಪಾನಞ್ಚ, ದುಗ್ಗೇ ಸಙ್ಕಮನಾನಿ ಚ.

ಮಹಾಅಟ್ಠಕಥಞ್ಚೇವ, ಮಹಾಪಚ್ಚರಿಮೇವಚ;

ಕುರುನ್ದಿಞ್ಚಾತಿ ತಿಸ್ಸೋಪಿ, ಸೀಹಳಟ್ಠಕಥಾ ಇಮಾ;

ಬುದ್ಧಮಿತ್ತೋತಿ ನಾಮೇನ, ವಿಸುತಸ್ಸ ಯಸಸ್ಸಿನೋ;

ವಿನಯಞ್ಞುಸ್ಸ ಧೀರಸ್ಸ, ಸುತ್ವಾ ಥೇರಸ್ಸ ಸನ್ತಿಕೇ.

ಉಪದ್ದವಾಕುಲೇ ಲೋಕೇ, ನಿರುಪದ್ದವತೋ ಅಯಂ;

ಏಕಸಂವಚ್ಛರೇನೇವ, ಯಥಾ ನಿಟ್ಠಂ ಉಪಾಗತಾ;

ಏವಂ ಸಬ್ಬಸ್ಸ ಲೋಕಸ್ಸ, ನಿಟ್ಠಂ ಧಮ್ಮೂಪಸಂಹಿತಾ;

ಸೀಘಂ ಗಚ್ಛನ್ತು ಆರಮ್ಭಾ, ಸಬ್ಬೇಪಿ ನಿರುಪದ್ದವಾ.

ಚಿರಟ್ಠಿತತ್ಥಂ ಧಮ್ಮಸ್ಸ, ಕರೋನ್ತೇನ ಮಯಾ ಇಮಂ;

ಸದ್ಧಮ್ಮಬಹುಮಾನೇನ, ಯಞ್ಚ ಪುಞ್ಞಂ ಸಮಾಚಿತಂ;

ಸಬ್ಬಸ್ಸ ಆನುಭಾವೇನ, ತಸ್ಸ ಸಬ್ಬೇಪಿ ಪಾಣಿನೋ;

ಭವನ್ತು ಧಮ್ಮರಾಜಸ್ಸ, ಸದ್ಧಮ್ಮರಸಸೇವಿನೋ.

ಚಿರಂ ತಿಟ್ಠತು ಸದ್ಧಮ್ಮೋ, ಕಾಲೇ ವಸ್ಸಂ ಚಿರಂ ಪಜಂ;

ತಪ್ಪೇತು ದೇವೋ ಧಮ್ಮೇನ, ರಾಜಾ ರಕ್ಖತು ಮೇದಿನಿಂ.

ತಾವ ತಿಟ್ಠತು ಲೋಕಸ್ಮಿಂ, ಲೋಕನಿತ್ಥರಣೇಸಿನಂ;

ದಸ್ಸೇನ್ತೀ ಕುಲಪುತ್ತಾನಂ, ನಯಂ ಸೀಲವಿಸುದ್ಧಿಯಾ;

ಯಾವ ಬುದ್ಧೋತಿ ನಾಮಮ್ಪಿ, ಸುದ್ಧಚಿತ್ತಸ್ಸ ತಾದಿನೋ;

ಲೋಕಮ್ಹಿ ಲೋಕಜೇಟ್ಠಸ್ಸ, ಪವತ್ತತಿ ಮಹೇಸಿನೋ.

ಕರುಣಾಸೀತಲಹದಯಂ, ಪಞ್ಞಾಪಜ್ಜೋತವಿಹತಮೋಹತಮಂ;

ಸನರಾಮರಲೋಕಗರುಂ, ವನ್ದೇ ಸುಗತಂ ಗತಿವಿಮುತ್ತಂ.

ಬುದ್ಧೋಪಿ ಬುದ್ಧಭಾವಂ, ಭಾವೇತ್ವಾ ಚೇವ ಸಚ್ಛಿಕತ್ವಾಚ;

ಯಂ ಉಪಗತೋ ಗತಮಲಂ, ವನ್ದೇ ತಮನುತ್ತರಂ ಧಮ್ಮಂ.

ಸುಗತಸ್ಸ ಓರಸಾನಂ, ಪುತ್ತಾನಂ ಮಾರಸೇನಮಥನಾನಂ;

ಅಟ್ಠನ್ನಮ್ಪಿ ಸಮೂಹಂ, ಸಿರಸಾ ವನ್ದೇ ಅರಿಯಸಙ್ಘಂ.

ದೀಘಸ್ಸ ದೀಘಸುತ್ತಙ್ಕಿತಸ್ಸ, ನಿಪುಣಸ್ಸ ಆಗಮವರಸ್ಸ;

ಬುದ್ಧಾನುಬುದ್ಧಸಂವಣ್ಣಿತಸ್ಸ, ಸದ್ಧಾವಹಗುಣಸ್ಸ.

ಸಮ್ಮಾಸಮ್ಬುದ್ಧೇನೇವ ಹಿ ತಿಣ್ಣಮ್ಪಿ ಪಿಟಕಾನಂ ಅತ್ಥವಣ್ಣನಾಕ್ಕಮೋ ಭಾಸಿತೋ, ಯಾಪಕಿಣ್ಣಕದೇಸನಾತಿ ವುಚ್ಚತಿ, ತತೋ ಸಂಗಾಯನಾದಿವಸೇನ ಸಾವಕೇಹೀತಿ ಆಚರಿಯಾ ವದನ್ತಿ.

ಅತ್ಥಪ್ಪಕಾಸನತ್ಥಂ, ಅಟ್ಠಕಥಾ ಆದಿತೋ ವಸಿಸತೇಹಿ;

ಪಞ್ಚಹಿ ಯಾಸಙ್ಗೀತಾ, ಅನುಸಙ್ಗೀತಾ ಚ ಪಚ್ಛಾಪಿ.

ಮಜ್ಝೇ ವಿಸುದ್ಧಿಮಗ್ಗಾ, ಏಸ ಚತುನ್ನಮ್ಪಿ ಆಗಮಾನಞ್ಹಿ;

ಠತ್ವಾ ಪಕಾಸಯಿಸ್ಸತಿ, ತತ್ಥ ಯಥಾ ಭಾಸಿತಮತ್ಥಂ;

ಇಚ್ಚೇವ ಕತೋ ತಸ್ಮಾ, ತಮ್ಪಿ ಗಹೇತ್ವಾನ ಸದ್ಧಿಮೇತಾಯ;

ಅಟ್ಠಕಥಾಯ ವಿಜಾನಾಥ, ದೀಘಾಗಮನಿಸ್ಸಿತಂ ಅತ್ಥಂ.

ಅತ್ಥಾನಂ ಸೂಚನತೋ, ಸುವುತ್ತತೋ ಸವನತೋಥಸೂದನತೋ,

ಸುತ್ತಾಣಾ ಸುತ್ತಸಭಾಗತೋಚ, ಸುತ್ತನ್ತಿ ಅಕ್ಖಾತಂ.

ಸುದುದ್ದಸಂ ಸುನಿಪುಣಂ, ಯತ್ಥಕಾಮನಿಪಾತಿನಂ;

ಚಿತ್ತಂ ರಕ್ಖೇಥ ಮೇಧಾವೀ, ಚಿತ್ತಂ ಗುತ್ತಂ ಸುಖಾವಹಂ.

ಸೋ ಏವಂ ಸಮಾಹಿತೇ ಚಿತ್ತೇ ಪರಿಸುದ್ಧೇ ಪರಿಯೋದಾತೇ ಅನಙ್ಗಣೇ ವಿಗತೂಪಕ್ಕಿಲೇಸೇ ಮುದುಭೂತೇ ಕಮ್ಮನಿಯೇ ಠಿತೇ ಆನಞ್ಜಪ್ಪತ್ತೇ ಞಾಣದಸ್ಸನಾಯ ಚಿತ್ತಂ ಅಭಿನೀಹರತಿ ಅಭಿನಿನ್ನಾಮೇತಿ –

ಯಂಹಿತಂ ಭಿಕ್ಖವೇ ಸಮ್ಮಾವದಮಾನೇ ವದೇಯ್ಯ ಸಮನ್ತಪಾಸೋ ಮಾರಸ್ಸಾತಿ, ಮಾತುಗಾಮಂಯೇವ ಸಮ್ಮಾ ವದಮಾನೋ ವದೇಯ್ಯ ಸಮನ್ತಪಾಸೋ ಮಾರಸ್ಸಾತಿ.

ಯೋ ಭಿಕ್ಖು ದಿವಸಂ ಚಙ್ಕಮೇನ ನಿಸಜ್ಜಾಯ ಚ ಆವರಣೀಯೇಹಿ ಧಮ್ಮೇಹಿ ಚಿತ್ತಂ ಪರಿಸೋಧೇತ್ವಾ.

ಇತಿ ಚಿತ್ತಕಿರಿಯವಾಯೋಧಾತುವಿಪ್ಫಾರವಸೇನ ಅಯಂ ಕಾಯಸಮ್ಮತೋ ಅಟ್ಠಿಸಙ್ಘಾತೋ ಅಭಿಕ್ಕಮತಿ.

ಕರುಣಾ ವಿಯ ಸತ್ತೇಸು, ಪಞ್ಞಾ ಯಸ್ಸ ಮಹೇಸಿನೋ;

ಞೇಯ್ಯಧಮ್ಮೇಸು ಸಬ್ಬೇಸು, ಪವತ್ತಿತ್ಥ ಯಥಾರುಚಿ.

ದಸಾಯ ತಾಯ ಸತ್ತೇಸು, ಸಮುಸ್ಸಾಹಿತಮಾನಸೋ;

ಪಾಟಿಹೀರಾವಸಾನಮ್ಹಿ, ವಸನ್ತೋ ತಿದಸಾಲಯೇ;

ಪಾರಿಚ್ಛತ್ತಕಮೂಲಮ್ಹಿ, ಪಣ್ಡುಕಮ್ಬಲನಾಮಕೇ;

ಸಿಲಾಸನೇ ಸನ್ನಿಸಿನ್ನೋ, ಆದಿಚ್ಚೋವ ಯುಗನ್ಧರೇ.

ಚಕ್ಕವಾಳಸಹಸ್ಸೇಹಿ, ದಸಾಹಾಗಮ್ಮ ಸಬ್ಬಸೋ;

ಸನ್ನಿಸಿನ್ನೇನ ದೇವಾನಂ, ಗಣೇನ ಪರಿವಾರಿತೋ;

ಮಾತರಂ ಪಮುಖಂ ಕತ್ವಾ, ತಸ್ಸಾ ಪಞ್ಞಾಯ ತೇಜಸಾ;

ಅಭಿಧಮ್ಮಕಥಾಮಗ್ಗಂ, ದೇವಾನಂ ಸಮ್ಪವತ್ತಯಿ.

ತಸ್ಸ ಪಾದೇ ನಮಸ್ಸಿತ್ವಾ, ಸಮ್ಬುದ್ಧಸ್ಸ ಸಿರೀಮತೋ;

ಸದ್ಧಮ್ಮಞ್ಚಸ್ಸ ಪೂಜೇತ್ವಾ, ಕತ್ವಾ ಸಙ್ಘಸ್ಸ ಚಞ್ಜಲಿಂ.

ಯಂ ದೇವದೇವೋ ದೇವಾನಂ, ದೇಸೇತ್ವಾ ನಯತೋ ಪುನ;

ಥೇರಸ್ಸ ಸಾರಿಪುತ್ತಸ್ಸ, ಸಮಾಚಿಕ್ಖಿ ವಿನಾಯಕೋ.

ಅನೋತತ್ತದಹೇ ಕತ್ವಾ, ಉಪಟ್ಠಾನಂ ಮಹೇಸಿನೋ;

ಯಞ್ಚ ಸುತ್ವಾನ ಸೋ ಥೇರೋ, ಆಹರಿತ್ವಾ ಮಹೀತಲಂ.

ಭಿಕ್ಖೂನಂ ಪರಿರುದಾಹಾಸಿ, ಇತಿ ಭಿಕ್ಖೂಹಿ ಧಾರಿತೋ;

ಸಙ್ಗೀತಿಕಾಲೇ ಸಂಙ್ಗೀತೋ, ವೇದೇಹಮುನಿನಾ ಪುನ.

ಯಂ ಕರೋಮಸಿ ಬ್ರಹ್ಮುನೋ, ಸಮಂ ದೇವೇಹಿ ಮಾರಿಸ;

ತದಜ್ಜ ತುಯ್ಹಂ ಕಸ್ಸಾಮ, ಹನ್ದ ಸಾಮಂ ಕರೋಮ ತೇ.

ಅತ್ಥಂ ಪಕಾಸಯಿಸ್ಸಾಮಿ, ಆಗಮಟ್ಠಕಥಾಸುಪಿ;

ಗಹೇತಬ್ಬಂ ಗಹೇತ್ವಾನ, ತೋಸಯನ್ತೋ ವಿಚಕ್ಖಣೇ.

ಇತಿಮೇ ಭಾಸಮಾನಸ್ಸ, ಅಭಿಧಮ್ಮಕಥಂ ಇಮಂ;

ಅವಿಕ್ಖಿತ್ತಾ ನಿಸಾಮೇಥ, ದುಲ್ಲಭಾಹಿಅಯಂಕಥಾ.

ಏತ್ಥೇತೇ ಪಾಪಕಾ ಅಕುಸಲಾ ಧಮ್ಮಾ ಅಪರಿಸೇಸಾ ನಿರುಜ್ಝನ್ತಿ.

ಚಕ್ಖುಂ ಚಾವುಸೋ ಪಟಿಚ್ಚ ರೂಪೇಚ ಉಪ್ಪಜ್ಜತಿ ಚಕ್ಖುವಿಞ್ಞಾಣಂ, ತಿಣ್ಣಂ ಸಙ್ಗತಿ ಫಸ್ಸೋ, ಫಸ್ಸಪಚ್ಚಯಾ ವೇದನಾ, ಯಂ ವೇದೇತಿ, ತಂ ಸಞ್ಜಾನಾತಿ. ಯಂ ಸಞ್ಜಾನಾತಿ, ತಂ ವಿತಕ್ಕೇತಿ, ಯಂ ವಿತಕ್ಕೇತಿ, ತಂ ಪಪಞ್ಚೇತಿ, ಯಂ ಪಪಞ್ಚೇತಿ, ತತೋ ನಿದಾನಂ ಪುರಿಸಂ ಪಪಞ್ಚಸಞ್ಞಾಸಙ್ಖಾ ಸಮುದಾಚರನ್ತಿ ಅತೀತಾನಾಗತಪಚ್ಚುಪ್ಪನ್ನೇಸು ಚಕ್ಖುವಿಞ್ಞೇಯ್ಯಸು ರೂಪೇಸು –

ಪುರಿಮಾ ಭಿಕ್ಖವೇ ಕೋಟಿ ನ ಪಞ್ಞಾಯತಿ ಅವಿಜ್ಜಾಯ.

ಅತ್ಥೇವ ಗಮ್ಭೀರಗತಂ ಸುದುಬ್ಬುಧಂ,

ಸಯಂ ಅಭಿಞ್ಞಾಯ ಸಹೇತುಸಮ್ಭವಂ;

ಯಥಾನುಪುಬ್ಬಂ ನಿಖಿಲೇನ ದೇಸಿತಂ,

ಮಹೇಸಿನಾ ರೂಪಗತಂವ ಪಸ್ಸತಿ.

ಅಭಿಕ್ಕಮಿಸ್ಸಾಮಿ ಪಟಿಕ್ಕಮಿಸ್ಸಾಮೀತಿ ಹಿ ಚಿತ್ತಂ ಉಪ್ಪಜ್ಜಮಾನಂ ರೂಪಂ ಸಮುಟ್ಠಾಪೇತಿ.

ನ ಅನ್ತಲಿಕ್ಖೇನ ನ ಸಮುದ್ದಮಜ್ಝೇ,

ನ ಪಬ್ಬತಾನಂ ವಿವರಂ ಪವಿಸ್ಸ;

ನ ವಿಜ್ಜತೇ ಸೋ ಜಗತಿಪ್ಪದೇಸೋ,

ಯತ್ಥಟ್ಠಿತೋ ಮುಚ್ಚೇಯ್ಯ ಪಾಪಕಮ್ಮಾ.

ಯಂ ಪತ್ತಂ ಕುಸಲಂ ತಸ್ಸ, ಆನುಭಾವೇನ ಪಾಣಿನೋ;

ಸಬ್ಬೇ ಸದ್ಧಮ್ಮರಾಜಸ್ಸ, ಞತ್ವಾ ಧಮ್ಮಂ ಸುಖಾವಹಂ;

ಪಾಪುಣನ್ತು ವಿಸುದ್ಧಾಯ, ಸುಖಾಯ ಪಟಿಪತ್ತಿಯಾ;

ಅಸೋಕಮನುಪಾಯಾಸಂ, ನಿಬ್ಬಾನಸುಖಮುತ್ತಮಂ.

ಚಿರಂ ತಿಟ್ಠತು ಸದ್ಧಮ್ಮೋ, ಧಮ್ಮೇ ಹೋನ್ತು ಸಗಾರವಾ;

ಸಬ್ಬೇಪಿ ಸತ್ತಾ ಕಾಲೇನ, ಸಮ್ಮಾ ದೇವೋ ಪವಸ್ಸತು;

ಯಥಾ ರಕ್ಖಿಂಸು ಪೋರಾಣಾ, ಸುರಾಜಾನೋ ತಥೇವಿಮಂ;

ರಾಜಾ ರಕ್ಖತು ಧಮ್ಮೇನ, ಅತ್ತನೋವ ಪಜಂಪಜಂ.

ತಾವ ತಿಟ್ಠತು ಲೋಕಸ್ಮಿಂ, ಲೋಕನಿತ್ಥರಣೇಸಿನಂ;

ದಸ್ಸೇನ್ತೀ ಕುಲಪುತ್ತಾನಂ, ನಯಂ ಪಞ್ಞಾವಿಸುದ್ಧಿಯಾ;

ಯಾವ ಬುದ್ಧೋತಿ ನಾಮಮ್ಪಿ, ಸುದ್ಧಚಿತ್ತಸ್ಸ ತಾದಿನೋ;

ಲೋಕಮ್ಹಿ ಲೋಕಜೇಟ್ಠಸ್ಸ, ಪವತ್ತತಿ ಮಹೇಸಿನೋ.

ದುತಿಯಸನ್ನಿಪಾತ

ಮಹಾಪದಾನಸುತ್ತ ಅಟ್ಠಕಥಾ

ಪುಚ್ಛಾ – ಅಟ್ಠಕಥಾ ಸಂಗೀತಿಯಾ ಆವುಸೋ ಪಠಮೇ ಸನ್ನಿಪಾತೇ ಸಕಲಾ ಚ ವಿನಯಸಂವಣ್ಣನಾ ದೀಘನಿಕಾಯೇ ಚ ಸೀಲಕ್ಖನ್ಧವಗ್ಗವಣ್ಣನಾ ಅಭಿಧಮ್ಮೇ ಚ ಧಮ್ಮಸಙ್ಗಹಸಂವಣ್ಣನಾ ಸಂಗೀತಾ ಥೇರೇಹಿ ಛಟ್ಠಸಂಗೀತಿಕಾರೇಹಿ. ಇದಾನಿ ಪನ ದುತಿಯೇ ಸನ್ನಿಪಾತೇ ದೀಘನಿಕಾಯೇ ಮಹಾವಗ್ಗವಣ್ಣನಾತೋ ಪಟ್ಠಾಯ ತದವಸೇಸಾನಂ ಯಥಾವವತ್ಥಿತಸಂವಣ್ಣನಾನಂ ಸಂಗಾಯನೋಕಾಸೋ ಅನುಪ್ಪತ್ತೋ. ತಸ್ಮಾ ಇಮಿಸ್ಸಾ ದುತಿಯಸನ್ನಿಪಾತಸಂಗೀತಿಯಾ ಪುಬ್ಬಕಿಚ್ಚವಸೇನ ಯಥಾನುಪ್ಪತ್ತಾಯ ಮಹಾವಗ್ಗೇ ಮಹಾಪದಾನಸುತ್ತಸಂವಣ್ಣನಾಯ ಪುಚ್ಛಾವಿಸ್ಸಜ್ಜನಂ ಕಾತುಂ ಸಮಾರಭಾಮ. ಮಹಾಪದಾನಸುತ್ತಸ್ಸ ಆವುಸೋ ನಿದಾನೇ ಪರಿಯಾಪನ್ನಸ್ಸ ‘‘ಕರೇರಿಕುಟಿಕಾಯ’’ನ್ತಿಪದಸ್ಸ ಅತ್ಥೋ ಕಥಂ ಅಟ್ಠಕಥಾಚರಿಯೇನ ಕಥಿತೋ.

ವಿಸ್ಸಜ್ಜನಾ – ಮಹಾಪದಾನಸುತ್ತಸ್ಸ ಭನ್ತೇ ನಿದಾನೇ ಪರಿಯಾಪನ್ನಸ್ಸ ಕರೇರಿಕುಟಿಕಾಯನ್ತಿಪದಸ್ಸ ಅತ್ಥೋ ‘‘ಕರೇರಿಕುಟಿಕಾಯ’’ನ್ತಿ ಕರೇರೀತಿ ವರುಣರುಕ್ಖಸ್ಸ ನಾಮಂ. ಕರೇರಿಮಣ್ಡಪೋ ತಸ್ಸಾ ಕುಟಿಕಾಯ ದ್ವಾರೇ ಠಿತೋ, ತಸ್ಮಾ ಕರೇರಿಕುಟಿಕಾತಿ ವುಚ್ಚತಿ. ಯಥಾ ಕೋಸಮ್ಬರುಕ್ಖಸ್ಸ ದ್ವಾರೇಠಿತತ್ತಾ ಕೋಸಮ್ಬಕುಟಿಕಾತಿ ಏವಮಾದಿನಾ ಭನ್ತೇ ಅಟ್ಠಕಥಾಚರಿಯೇನ ಕಥಿತೋ.

ಕರೇರಿಕುಟಿಕಾಯನ್ತಿ ಕರೇರೀತಿ ವರುಣರುಕ್ಖಸ್ಸ ನಾಮಂ.

ಕರೇರಿಮಣ್ಡಪೋ ತಸ್ಸಾ ಕುಟಿಕಾಯ ದ್ವಾರೇ ಠಿತೋ, ತಸ್ಮಾ ಕರೇರಿಕುಟಿಕಾತಿ ವುಚ್ಚತಿ. ಯಥಾ ಕೋಸಮ್ಬರುಕ್ಖಸ್ಸ ದ್ವಾರೇ ಠಿತತ್ತಾ ಏಕಾಸಮ್ಬಕುಟಿಕಾತಿ.

ಅನ್ತೋಜೇತವನೇ ಕಿರ ಕರೇರಿಕುಟಿ ಕೋಸಮ್ಬಕುಟಿ ಗನ್ಧಕುಟಿ ಸಲಳಾಗಾರನ್ತಿ ಚತ್ತಾರಿ ಮಹಾಗೇಹಾನಿ –

ಏಕೇಕಂ ಸತಸಹಸ್ಸಪರಿಚ್ಚಾಗೇನ ನಿಪ್ಫನ್ನಂ.

ತೇಸು ಸಲಳಾಗಾರಂ ರಞ್ಞಾ ಪಸೇನದಿನಾ ಕಾರಿತಂ.

ಪುಬ್ಬೇನಿವಾಸ