೨. ನಾಮಕಣ್ಡ

ವಿಭತ್ತಿರಾಸಿ

ಅಥ ಲಿಙ್ಗಮ್ಹಾ ಸ್ಯಾದಿವಿಭತ್ತಿವಿಧಾನಂ ದೀಪಿಯತೇ.

ಲಿಙ್ಗಂ, ನಾಮಂ, ಪಾಟಿಪದಿಕನ್ತಿ ಅತ್ಥತೋ ಏಕಂ, ದಬ್ಬಾಭಿಧಾನಸ್ಸ ಪುರಿಸಾದಿಕಸ್ಸ ಪಕತಿರೂಪಸ್ಸೇತಂ ನಾಮಂ. ತಞ್ಹಿ ಸತ್ತನ್ನಂ ವಿಭತ್ತೀನಂ ವಸೇನ ವಿಭಾಗಂ ಪತ್ವಾ ಕಿಞ್ಚಿ ವಿಸದರೂಪಂ ಹೋತಿ, ಕಿಞ್ಚಿ ಅವಿಸದರೂಪಂ, ಕಿಞ್ಚಿ ಮಜ್ಝಿಮರೂಪನ್ತಿ ಏವಂ ತಿವಿಧೇನ ಲಿಙ್ಗರೂಪೇನ ಯುತ್ತತ್ತಾ ಲಿಙ್ಗನ್ತಿ ವುಚ್ಚತಿ.

ತದೇವ ಕಿಞ್ಚಿ ಸದ್ದಲಿಙ್ಗಾನುರೂಪಂ, ಕಿಞ್ಚಿ ಅತ್ಥಲಿಙ್ಗಾನುರೂಪಞ್ಚ ಪರಿಣಮನ್ತಂ ಪವತ್ತತಿ, ತಸ್ಮಾ ನಾಮನ್ತಿ ಚ ವುಚ್ಚತಿ.

ತದೇವ ಧಾತು, ಪಚ್ಚಯ, ವಿಭತ್ತಿಪದೇಹಿ ಚೇವಸದ್ದಪದತ್ಥಕಪದೇಹಿ ಚ ‘ವಿಸುಂ ಭೂತಂ ಪದ’ನ್ತಿ ಕತ್ವಾ ಪಾಟಿಪದಿಕನ್ತಿ ಚ ವುಚ್ಚತಿ.

ತತ್ಥ ಧಾತುಪದಂ ನಾಮ ಬ್ರೂ, ಭೂ, ಹೂಇಚ್ಚಾದಿ.

ಪಚ್ಚಯಪದಂ ನಾಮ ಣ, ತಬ್ಬ, ಅನೀಯ ಇಚ್ಚಾದಿ.

ವಿಭತ್ತಿಪದಂ ನಾಮ ಸಿ, ಯೋ, ಅಂ, ಯೋ,ತಿ, ಅನ್ತಿ ಇಚ್ಚಾದಿ.

ಸದ್ದಪದತ್ಥಕಪದಾನಿ ನಾಮ ರಾಜಸ್ಸ, ಸಖಸ್ಸ, ಪುಮಸ್ಸ ಇಚ್ಚಾದೀನಿ. ಏತ್ಥ ಚ ರಾಜಸ್ಸಇಚ್ಚಾದೀನಿ ಸದ್ದಸುತ್ತೇ ಸದ್ದಪದತ್ಥಕಾನಿ ಹೋನ್ತಿ, ಪಯೋಗೇ ಅತ್ಥಪದತ್ಥಕಾನಿ. ಧಾತುಪಚ್ಚಯವಿಭತ್ತಿಪದಾನಿ ಪನ ನಿಚ್ಚಂ ಸದ್ದಪದತ್ಥಕಾನಿ ಏವ ಹೋನ್ತಿ, ಸದ್ದಸುತ್ತೇಸ್ವೇವ ಚ ಲಬ್ಭನ್ತಿ, ನ ಪಯೋಗೇತಿ, ಇದಂ ದ್ವಿನ್ನಂ ನಾನತ್ತಂ.

ಯದಿಏವಂ ಭುಸ್ಸ, ಬ್ರುಸ್ಸ, ಭೂತೋ, ಹೂತೋ, ಣೇ, ತಬ್ಬೇ, ಸಿಮ್ಹಿ, ತಿಮ್ಹಿ ಇಚ್ಚಾದಿನಾ ತೇಹಿ ಕಥಂ ವಿಭತ್ತುಪ್ಪತ್ತಿ ಹೋತೀತಿ? ಅನುಕರಣಪದಾನಿ ನಾಮ ತಾನಿ ಅತ್ಥಿಸ್ಸ, ಕರೋತಿಸ್ಸ ಇಚ್ಚಾದೀನಿ ವಿಯ, ತಸ್ಮಾ ತಾನಿ ಚ ರಾಜಸ್ಸ ಇಚ್ಚಾದೀನಿ ಚ ಅನುಕರಣಲಿಙ್ಗಭಾವೇನ ಏತ್ಥ ಸಙ್ಗಯ್ಹನ್ತಿ, ನ ಏಕನ್ತಲಿಙ್ಗಭಾವೇನಾತಿ. ಏವಞ್ಚ ಕತ್ವಾ ‘ಧಾತು- ಪಚ್ಚಯ, ವಿಭತ್ತಿವಜ್ಜಿತಮತ್ಥವಂ ಲಿಙ್ಗ’ನ್ತಿ ಅವೋಚುಂ. ತತ್ಥ ಅತ್ಥವನ್ತಿ ಅತ್ಥಪದತ್ಥಕಂ ವುಚ್ಚತಿ, ರಾಜಸ್ಸಇಚ್ಚಾದಿಕಂ ಸದ್ದಪದತ್ಥಕಂ ವಿವಜ್ಜೇತಿ, ಏತೇನ ಅತ್ಥಪದತ್ಥಕೇ ಸತಿ ತದ್ಧಿತ, ಸಮಾಸ, ಕಿತಕಪದಾನಮ್ಪಿ ಏಕನ್ತಲಿಙ್ಗಭಾವಂ ಸಾಧೇನ್ತಿ. ನ ಹಿ ತೇಸಂ ಲಿಙ್ಗನಾಮಬ್ಯಪದೇಸಕಿಚ್ಚಂ ಅತ್ಥಿ, ಯಾನಿ ಚ ನಾಮಸ್ಸ ವಿಸೇಸನಾನಿ ಭವಿತುಂ ಅರಹನ್ತಿ, ತಾನಿ ಉಪಸಗ್ಗ, ನಿಪಾತಪದಾನಿ ತ್ವಾನ್ತಾದಿಪದಾನಿ ಚ ಇಧ ವಿಸೇಸನನಾಮಭಾವೇನ ಸಙ್ಗಯ್ಹನ್ತೀತಿ.

೬೧. ದ್ವೇ ದ್ವೇಕಾನೇಕೇಸು ನಾಮಸ್ಮಾ ಸಿ ಯೋ ಅಂಯೋ ನಾ ಹಿ ಸ ನಂ ಸ್ಮಾಹಿ ಸನಂಸ್ಮಿಂಸು [ಕ. ೫೫; ರೂ. ೬೩; ನೀ. ೨೦೦].

ಏಕಸ್ಮಿಂ ಅತ್ಥೇ ಚ ಅನೇಕೇಸು ಅತ್ಥೇಸು ಚ ಪವತ್ತಾ ನಾಮಸ್ಮಾ ದ್ವೇ ದ್ವೇ ಸಿ, ಯೋ…ಪೇ… ಸ್ಮಿಂ, ಸುವಿಭತ್ತಿಯೋ ಹೋನ್ತಿ.

ವಿಭಜನ್ತೀತಿ ವಿಭತ್ತಿಯೋ, ಏಕಮೇಕಂ ಪಕತಿನಾಮಪದಂ ನಾನಾರೂಪವಿಭಾಗವಸೇನ ಕತ್ತು, ಕಮ್ಮಾದಿನಾನಾಅತ್ಥವಿಭಾಗವಸೇನ ಏಕತ್ತ, ಬಹುತ್ತಸಙ್ಖ್ಯಾವಿಭಾಗವಸೇನ ಚ ವಿಭಜನ್ತೀತಿ ಅತ್ಥೋ. ಸಿ, ಲೋ ಇತಿ ಪಠಮಾ ನಾಮ…ಪೇ… ಸ್ಮಿಂ, ಸು ಇತಿ ಸತ್ತಮೀ ನಾಮ. ದ್ವೀಸು ದ್ವೀಸು ಪುಬ್ಬಂ ಪುಬ್ಬಂ ‘ಏಕಸ್ಮಿಂ ಅತ್ಥೇ ಪವತ್ತಂ ವಚನ’ನ್ತಿ ಏಕವಚನಂ ನಾಮ. ಪರಂ ಪರಂ ‘ಅನೇಕೇಸು ಅತ್ಥೇಸು ಪವತ್ತಂ ವಚನ’ನ್ತಿ ಅನೇಕವಚನಂ ನಾಮ. ಬಹುವಚನನ್ತಿ ಚ ಪುಥುವಚನನ್ತಿ ಚ ಏತಸ್ಸ ನಾಮಂ. ಸಬ್ಬಮಿದಂ ಇಮಿನಾ ಸುತ್ತೇನ ಸಿದ್ಧಂ.

೬೨. ಪಠಮಾತ್ಥಮತ್ತೇ [ಕ. ೨೮೪; ರೂ. ೬೫; ನೀ. ೫೭೭; ಚಂ. ೨.೧.೯೩; ಪಾ. ೨.೩.೪೬].

ಕತ್ತು, ಕಮ್ಮಾದಿಕಂ ಬಾಹಿರತ್ಥಂ ಅನಪೇಕ್ಖಿತ್ವಾ ಲಿಙ್ಗತ್ಥಮತ್ತೇ ಪವತ್ತಾ ನಾಮಸ್ಮಾ ಪಠಮಾವಿಭತ್ತಿ ಹೋತಿ.

ಅಯಂ ಮಮ ಪುರಿಸೋ, ಇಮೇ ಮಮ ಪುರಿಸಾ.

೬೩. ಆಮನ್ತನೇ [ಕ. ೨೮೫; ರೂ. ೭೦; ನೀ. ೫೭೮; ಚಂ. ೨.೧.೯೪; ಪಾ. ೨.೩.೪೭].

ಆಮನ್ತನಂ ವುಚ್ಚತಿ ಆಲಪನಂ. ಆಮನ್ತನವಿಸಯೇ ಲಿಙ್ಗತ್ಥಮತ್ತೇ ಪವತ್ತಾ ನಾಮಸ್ಮಾ ಪಠಮಾವಿಭತ್ತಿ ಹೋತಿ.

ಭೋ ಪುರಿಸ, ಭೋನ್ತೋ ಪುರಿಸಾ.

೬೪. ಕಮ್ಮೇ ದುತಿಯಾ [ಕ. ೨೯೭; ರೂ. ೭೬, ೨೮೪; ನೀ. ೫೮೦; ಚಂ. ೨.೧.೪೩; ಪಾ. ೧.೪.೪೯-೫೧].

ನಾಮಸ್ಮಾ ಕಮ್ಮತ್ಥೇ ದುತಿಯಾವಿಭತ್ತಿ ಹೋತಿ.

ಪುರಿಸಂ ಪಸ್ಸತಿ, ಪುರಿಸೇ ಪಸ್ಸನ್ತಿ.

೬೫. ಕತ್ತುಕರಣೇಸು ತತಿಯಾ [ಕ. ೨೮೬, ೨೮೮; ರೂ. ೮೩; ನೀ. ೫೯೧, ೫೯೪; ಚಂ. ೨.೧.೬೨, ೬೩; ಪಾ. ೨.೩.೧೮].

ನಾಮಸ್ಮಾ ಕತ್ತರಿ ಚ ಕರಣೇ ಚ ತತಿಯಾವಿಭತ್ತಿ ಹೋತಿ.

ಪುರಿಸೇನ ಕತಂ, ಪುರಿಸೇಹಿ ಕತಂ, ಪುರಿಸೇನ ಕುಲಂ ಸೋಭತಿ, ಪುರಿಸೇಹಿ ಕುಲಂ ಸೋಭತಿ.

೬೬. ಚತುತ್ಥೀ ಸಮ್ಪದಾನೇ [ಕ. ೨೯೩; ರೂ ೮೫, ೩೦೧; ನೀ. ೬೦೫; ಚಂ. ೨.೧.೭೩; ಪಾ. ೨.೩.೧೩].

ನಾಮಸ್ಮಾ ಸಮ್ಪದಾನತ್ಥೇ ಚತುತ್ಥೀವಿಭತ್ತಿ ಹೋತಿ.

ಪುರಿಸಸ್ಸ ದೇತಿ, ಪುರಿಸಾನಂ ದೇತಿ.

೬೭. ಪಞ್ಚಮ್ಯಾವಧಿಸ್ಮಿಂ [ಕ. ೨೯೫; ರೂ. ೮೯, ೩೦೭; ನೀ. ೬೦೭ ಚಂ. ೨.೧.೮೧; ಪಾ. ೨.೩.೨೮; ೧.೪.೨೪ ಪಞ್ಚಮ್ಯವಧಿಸ್ಮಾ (ಬಹೂಸು)].

ಅವಧಿ ವುಚ್ಚತಿ ಅಪಾದಾನಂ. ನಾಮಸ್ಮಾ ಅವಧಿಅತ್ಥೇ ಪಞ್ಚಮೀವಿಭತ್ತಿ ಹೋತಿ.

ಪುರಿಸಸ್ಮಾ ಅಪೇತಿ, ಪುರಿಸೇಹಿ ಅಪೇತಿ.

೬೮. ಛಟ್ಠೀ ಸಮ್ಬನ್ಧೇ [ಕ. ೩೦; ರೂ. ೯೨, ೩೧೫; ನೀ. ೬೦೯; ಚಂ. ೨.೧.೯೫; ಪಾ. ೨.೩.೫೦].

ನಾಮಸ್ಮಾ ಸಮ್ಬನ್ಧತ್ಥೇ ಛಟ್ಠೀವಿಭತ್ತಿ ಹೋತಿ.

ಪುರಿಸಸ್ಸ ಧನಂ, ಪುರಿಸಾನಂ ಧನಂ.

೬೯. ಸತ್ತಮ್ಯಾಧಾರೇ [ಕ. ೩೧೨; ರೂ. ೯೪, ೩೧೯; ನೀ. ೬೩೦; ಚಂ. ೨.೧.೮೮; ಪಾ. ೨.೩.೩೬; ೧.೩.೪೫].

ನಾಮಸ್ಮಾ ಆಧಾರತ್ಥೇ ಸತ್ತಮೀವಿಭತ್ತಿ ಹೋತಿ.

ಪುರಿಸಸ್ಮಿಂ ತಿಟ್ಠತಿ, ಪುರಿಸೇಸು ತಿಟ್ಠತಿ.

ವಿಭತ್ತಿರಾಸಿ ನಿಟ್ಠಿತೋ.

ಇತ್ಥಿಪಚ್ಚಯರಾಸಿ

೭೦. ಇತ್ಥಿಯಮತ್ವಾ [ಕ. ೨೩೭; ರೂ. ೧೭೬; ನೀ. ೪೬೬; ಚಂ. ೨.೩.೧೫; ಪಾ. ೪.೧.೪].

ಇತ್ಥಿಯಂ+ಅತೋ+ಆತಿ ಛೇದೋ. ಅಕಾರನ್ತನಾಮಮ್ಹಾ ಇತ್ಥಿಯಂ ಆಪಚ್ಚಯೋ ಹೋತಿ.

ಅಭಾಸಿತಪುಮೇಹಿ ಕೇಹಿಚಿ ಸಞ್ಞಾಸದ್ದೇಹಿ ನಿಚ್ಚಂ –

ಕಞ್ಞಾ, ಪಞ್ಞಾ, ಸಞ್ಞಾ, ನಾವಾ, ಸಾಲಾ, ತಣ್ಹಾ, ಇಚ್ಛಾ, ಭಿಕ್ಖಾ, ಸಿಕ್ಖಾ, ಗೀವಾ, ಜಿವ್ಹಾ, ವೀಸಾ, ತಿಂಸಾ, ಚತ್ತಾಲೀಸಾ, ಪಞ್ಞಾಸಾ ಇಚ್ಚಾದಿ.

ಭಾಸಿತಪುಮೇಹಿಪಿ ಸಬ್ಬನಾಮೇಹಿ ತಬ್ಬಾ, ನೀಯ, ತಪಚ್ಚಯನ್ತೇಹಿ ಚ ನಿಚ್ಚಂ –

ಸಬ್ಬಾ, ಕತರಾ, ಕತಮಾ, ಅನುಭವಿತಬ್ಬಾ, ಅನುಭವನೀಯಾ, ಗತಾ, ಜಾತಾ, ಭೂತಾ, ಹೂತಾ ಇಚ್ಚಾದಿ.

ಅಞ್ಞೇಹಿ ಪನ ಅನಿಚ್ಚಂ –

ಕಲ್ಯಾಣಾ, ಕಲ್ಯಾಣೀ, ಸುನ್ದರಾ, ಸುನ್ದರೀ, ಸೋಭಣಾ, ಸೋಭಣೀ, ಕುಮ್ಭಕಾರಾ, ಕುಮ್ಭಕಾರೀ, ಕುಮ್ಭಕಾರಿನೀ, ಅತ್ಥಕಾಮಾ, ಅತ್ಥಕಾಮೀ, ಅತ್ಥಕಾಮಿನೀ, ಪರಿಬ್ಬಾಜಿಕಾ, ಪರಿಬ್ಬಾಜಿಕಿನೀ, ಏಕಾಕಾ, ಏಕಾಕಿನೀ, ದೀಪನಾ, ದೀಪನೀ ಇಚ್ಚಾದಿ.

ಸುತ್ತವಿಭತ್ತೇನ ಸಮಾಸೇ ಮಾತು, ಧೀತು ಇಚ್ಚಾದೀಹಿ ಆಪಚ್ಚಯೋ ಹೋತಿ. ನನ್ದಮಾತಾ, ಉತ್ತರಮಾತಾ, ದೇವಧೀತಾ, ರಾಜಧೀತಾ, ಅಸ್ಸಮಣೀ ಹೋತಿ ಅಸಕ್ಯಧೀತರಾ ಇಚ್ಚಾದಿ.

ಏತ್ಥ ಚ ‘ಇತ್ಥಿಯ’ನ್ತಿ ಕತ್ಥಚಿ ಸದ್ದಮತ್ತಸ್ಸ ವಾ, ಕತ್ಥಚಿ ಅತ್ಥಮತ್ತಸ್ಸ ವಾ ಇತ್ಥಿಭಾವೇ ಜೋತೇತಬ್ಬೇತಿ ಅತ್ಥೋ. ಏವಞ್ಚ ಸತಿ ಇತ್ಥಿಪಚ್ಚಯಾಪಿ ಸ್ಯಾದಯೋ ವಿಯ ಜೋತಕಮತ್ತಾ ಏವ ಹೋನ್ತಿ, ನ ವಾಚಕಾತಿ ಸಿದ್ಧಂ ಹೋತಿ.

೭೧. ನದಾದೀಹಿ ಙೀ [ಕ. ೨೩೮; ರೂ. ೧೮೭; ನೀ. ೪೬೭; ನದಾದಿತೋ ವೀ (ಬಹೂಸು)].

ನದಾದೀಹಿ ಇತ್ಥಿಯಂ ಙೀ ಹೋತಿ. ಙಾನುಬನ್ಧೋ ‘ನ್ತನ್ತೂನಂ ಙೀಮ್ಹಿ ತೋ ವಾ’ತಿ ಏತ್ಥ ವಿಸೇಸನತ್ಥೋ.

ನದೀ, ಮಹೀ, ಇತ್ಥೀ, ಕುಮಾರೀ, ತರುಣೀ, ವಾಸೇಟ್ಠೀ, ಗೋತಮೀ, ಕಚ್ಚಾನೀ, ಕಚ್ಚಾಯನೀ, ಮಾಣವೀ, ಸಾಮಣೇರೀ, ನಾವಿಕೀ, ಪಞ್ಚಮೀ, ಛಟ್ಠೀ, ಚತುದ್ದಸೀ, ಪಞ್ಚದಸೀ, ಸಹಸ್ಸೀ, ದಸಸಹಸ್ಸೀ, ಸತಸಹಸ್ಸೀ, ಕುಮ್ಭಕಾರೀ, ಮಾಲಕಾರೀ, ಚಕ್ಖುಕರಣೀ, ಞಾಣಕರಣೀ, ಧಮ್ಮದೀಪನೀ ಇಚ್ಚಾದಿ.

೭೨. ನ್ತನ್ತೂನಂ ಙೀಮ್ಹಿ ತೋ ವಾ [ಕ. ೨೩೯, ೨೪೧; ರೂ. ೧೯೦, ೧೯೧; ನೀ. ೪೬೮, ೪೭೧].

ನ್ತ, ನ್ತೂನಂ ತೋ ಹೋತಿ ವಾ ಙೀಮ್ಹಿ ಪರೇ.

ಗಚ್ಛತೀ, ಗಚ್ಛನ್ತೀ, ಸತೀ, ಸನ್ತೀ, ಭವಿಸ್ಸತೀ, ಭವಿಸ್ಸನ್ತೀ, ಗುಣವತೀ, ಗುಣವನ್ತೀ, ಸತಿಮತೀ, ಸತಿಮನ್ತೀ, ಸಬ್ಬಾವತೀ, ಸಬ್ಬಾವನ್ತೀ, ಯಾವತೀ, ಯಾವನ್ತೀ, ತಾವತೀ, ತಾವನ್ತೀ, ಭುತ್ತವತೀ, ಭುತ್ತವನ್ತೀ.

೭೩. ಗೋತೋ ವಾ [ಕ. ೨೩೮; ರೂ. ೧೮೭; ನೀ. ೪೬೭].

ಗೋಸದ್ದಮ್ಹಾ ಇತ್ಥಿಯಂ ವೀ ಹೋತಿ ವಾ.

ಗಾವೀ.

ವಾತಿ ಕಿಂ? ಗೋಕಾಣಾ ಪರಿಯನ್ತಚಾರಿನೀತಿ ಪಾಳಿ. ತತ್ಥ ಕಾಣಾತಿ ಅನ್ಧಾ.

೭೪. ಯಕ್ಖಾದೀಹಿನೀ ಚ [ಕ. ೨೩೮, ೨೪೦; ರೂ. ೨೮೭, ೧೯೩; ನೀ. ೪೬೭, ೪೬೯; ಯಕ್ಖಾದಿತ್ವಿನೀ ಚ (ಬಹೂಸು)].

ಯಕ್ಖಾದೀಹಿ ಅಕಾರನ್ತೇಹಿ ಇತ್ಥಿಯಂ ವೀ ಚ ಹೋತಿ ಇನೀ ಚ.

ಯಕ್ಖೀ, ಯಕ್ಖಿನೀ, ನಾಗೀ, ನಾಗಿನೀ, ಮಹಿಂಸೀ, ಮಹಿಂಸಿನೀ, ಮಿಗೀ, ಮಿಗಿನೀ, ಸೀಹೀ, ಸೀಹಿನೀ, ದೀಪೀ, ದೀಪಿನೀ, ಬ್ಯಗ್ಘೀ, ಬ್ಯಗ್ಘಿನೀ, ಕಾಕೀ, ಕಾಕಿನೀ, ಕಪೋತೀ, ಕಪೋತಿನೀ, ಮಾನುಸೀ, ಮಾನುಸಿನೀ ಇಚ್ಚಾದಿ.

೭೫. ಆರಾಮಿಕಾದೀಹಿ [ಕ. ೨೪೦; ರೂ. ೧೯೩; ನೀ. ೪೬೯].

ಆರಾಮಿಕಾದೀಹಿ ಅಕಾರನ್ತೇಹಿ ಇತ್ಥಿಯಂ ಇನೀ ಹೋತಿ.

ಆರಾಮಿಕಿನೀ, ಅನ್ತರಾಯಿಕಿನೀ, ನಾವಿಕಿನೀ, ಓಲುಮ್ಬಿಕಿನೀ, ಪಂಸುಕೂಲಿಕಿನೀ, ಪರಿಬ್ಬಾಜಿಕಿನೀ, ರಾಜಿನೀ, ಏಕಾಕಿನೀ ಇಚ್ಚಾದಿ.

ಸಞ್ಞಾಯಂ –

ಮಾನುಸಿನೀ ಮಾನುಸಾ ವಾ, ಅಞ್ಞತ್ರ ಮಾನುಸೀ ಸಮ್ಪತ್ತಿ.

೭೬. ಘರಣ್ಯಾದಯೋ [ಕ. ೨೪೦; ರೂ. ೧೯೩; ನೀ. ೪೬೯].

ಘರಣೀಇಚ್ಚಾದಯೋ ಇತ್ಥಿಯಂ ನೀಪಚ್ಚಯನ್ತಾ ಸಿಜ್ಝನ್ತಿ.

ಘರಣೀ, ವೇತ್ರಣೀ, ಪೋಕ್ಖರಣೀ-ಏಸು ನಸ್ಸ ಣತ್ತಂ. ಆಚರಿನೀಯಲೋಪೋ, ಆಚರಿಯಾ ವಾ.

೭೭. ಮಾತುಲಾದಿತ್ವಾನೀ ಭರಿಯಾಯಂ [ಕ. ೯೮; ರೂ. ೧೮೯; ನೀ. ೨೬೧].

ಮಾತುಲಾದೀಹಿ ಅಕಾರನ್ತೇಹಿ ಭರಿಯಾಯಂ ಆನೀ ಹೋತಿ.

ಮಾತುಭಾತಾ ಮಾತುಲೋ, ತಸ್ಸ ಭರಿಯಾ ಮಾತುಲಾನೀ, ಏವಂ ವರುಣಾನೀ, ಗಹಪತಾನೀ, ಆಚರಿಯಾನೀ, ಖತ್ತಿಯಾನೀ.

‘ಬಹುಲಾ’ಧಿಕಾರಾ ಖತ್ತಿಯೀ ಖತ್ತಿಯಾ ಚ.

೭೮. ಯುವಣ್ಣೇಹಿ ನೀ.

ಇವಣ್ಣನ್ತೇಹಿ ಉವಣ್ಣನ್ತೇಹಿ ಚ ಇತ್ಥಿಯಂ ನೀ ಹೋತಿ.

ಛತ್ತಪಾಣಿನೀ, ದಣ್ಡಪಾಣಿನೀ, ದಣ್ಡಿನೀ, ಛತ್ತಿನೀ, ಹತ್ಥಿನೀ, ಮಾಲಿನೀ, ಮಾಯಾವಿನೀ, ಮೇಧಾವಿನೀ, ಪಿಯಪಸಂಸಿನೀ, ಬ್ರಹ್ಮಚಾರಿನೀ, ಭಯದಸ್ಸಾವಿನೀ, ಅತ್ಥಕಾಮಿನೀ, ಹಿತಚಾರಿನೀ, ಭಿಕ್ಖುನೀ, ಖತ್ತಿಯಬನ್ಧುನೀ, ಪಟುನೀ, ಪರಚಿತ್ತವಿದುನೀ, ಮತ್ತಞ್ಞುನೀ, ಅತ್ಥಞ್ಞುನೀ, ಧಮ್ಮಞ್ಞುನೀ ಇಚ್ಚಾದಿ.

೭೯. ತಿಮ್ಹಾಞ್ಞತ್ಥೇ [ಕ್ತಿಮ್ಹಾಞ್ಞತ್ಥೇ (ಬಹೂಸು), ಮೋಗ್ಗಲ್ಲಾನೇ ೩೧ ಸುತ್ತಙ್ಕೇ].

ಅಞ್ಞಪದತ್ಥಸಮಾಸೇ ತಿಪಚ್ಚಯನ್ತಮ್ಹಾ ಇತ್ಥಿಯಂ ನೀ ಹೋತಿ.

ಅಹಿಂಸಾರತಿನೀ, ಧಮ್ಮರತಿನೀ, ವಚ್ಛಗಿದ್ಧಿನೀ, ಪುತ್ತಗಿದ್ಧಿನೀ, ಮುಟ್ಠಸ್ಸತಿನೀ, ಮಿಚ್ಛಾದಿಟ್ಠಿನೀ, ಸಮ್ಮಾದಿಟ್ಠಿನೀ, ಅತ್ತಗುತ್ತಿನೀ ಇಚ್ಚಾದಿ.

ಅಞ್ಞತ್ಥೇತಿ ಕಿಂ? ಧಮ್ಮೇ ರತಿ ಧಮ್ಮರತಿ.

೮೦. ಯುವಾತಿ.

ಯುವತೋ ಇತ್ಥಿಯನ್ತಿ ಹೋತಿ.

ಯುವತಿ.

ಏತ್ಥ ಚ ‘ತಿ’ ಇತಿ ಸುತ್ತವಿಭತ್ತೇನ ವೀಸ, ತಿಂಸತೋಪಿತಿ ಹೋತಿ ವಾ. ವೀಸತಿ, ವೀಸಂ, ತಿಂಸತಿ, ತಿಂಸಂ.

೮೧. ಉಪಮಾ ಸಂಹಿತ ಸಹಿತ ಸಞ್ಞತ ಸಹ ಸಫ ವಾಮಲಕ್ಖಣಾದಿತೂರುತ್ವೂ [ಚಂ. ೨.೩.೭೯; ಪಾ. ೪.೧.೬೯, ೭೦ ತೂರುತೂ (ಬಹೂಸು)].

ಲಕ್ಖಣಾದಿತೋ+ಊರುತೋ+ಊತಿ ಛೇದೋ.

ಅಞ್ಞಪದತ್ಥಸಮಾಸೇ ಉಪಮಾದಿಪುಬ್ಬಾ ಊರುಸದ್ದಮ್ಹಾ ಇತ್ಥಿಯಂ ಊ ಹೋತಿ.

ನಾಗಸ್ಸ ನಾಸಾ ವಿಯ ಊರೂ ಯಸ್ಸಾತಿ ನಾಗನಾಸೂರೂ, ಸಂಹಿತಾ ಸಮ್ಬನ್ಧಾ ಊರೂ ಯಸ್ಸಾತಿ ಸಂಹಿತೋರೂ, ಸಹಿತಾ ಏಕಬದ್ಧಾ ಊರೂ ಯಸ್ಸಾತಿ ಸಹಿತೋರೂ, ಸಞ್ಞತಾ ಅಲೋಲಾ ಊರೂ ಯಸ್ಸಾತಿ ಸಞ್ಞತೋರೂ, ಊರುಯಾ [ಊರುನಾ?] ಸಹ ವತ್ತತೀತಿ ಸಹೋರೂ, ಸಫೋ ವುಚ್ಚತಿ ಖುರೋ, ಸಂಸಿಲಿಟ್ಠತಾಯ ಸಫಭೂತಾ ಊರೂ ಯಸ್ಸಾತಿ ಸಫೋರೂ, ವಾಮಾ ಸುನ್ದರಾ ಊರೂ ಯಸ್ಸಾತಿ ವಾಮೋರೂ, ಲಕ್ಖಣಸಮ್ಪನ್ನಾ ಊರೂ ಯಸ್ಸಾತಿ ಲಕ್ಖಣೋರೂ.

ಸುತ್ತವಿಭತ್ತೇನ ಬ್ರಹ್ಮಬನ್ಧೂತಿ ಸಿಜ್ಝತಿ.

‘‘ಸಚೇ ಮಂ ನಾಗನಾಸೂರೂ, ಓಲೋಕೇಯ್ಯ ಪಭಾವತೀ’’ತಿ [ಜಾ. ೨.೨೦.೧೪] ಚ ‘‘ಏಕಾ ತುವಂ ತಿಟ್ಠಸಿ ಸಹಿತೂರೂ’’ತಿ [ಜಾ. ೧.೧೬.೨೯೭] ಚ ‘‘ಸಞ್ಞತೂರೂ ಮಹಾಮಾಯಾ, ಕುಮಾರಿ ಚಾರುದಸ್ಸನಾ’’ತಿ [ಜಾ. ೨.೧೭.೧೦೯] ಚ ‘‘ವಾಮೋರೂ ಸಜ ಮಂ ಭದ್ದೇ’’ತಿ [ದೀ. ನಿ. ೨.೩೪೮] ಚ ‘‘ಕಾರಣಂ ನಪ್ಪಜಾನಾಮಿ, ಸಮ್ಮತ್ತೋ ಲಕ್ಖಣೂರುಯಾ’’ತಿ [ದೀ. ನಿ. ೨.೩೪೮] ಚ ‘‘ಗಾರಯ್ಹಸ್ಸಂ ಬ್ರಹ್ಮಬನ್ಧುಯಾ’’ತಿ [ಜಾ. ೨.೨೨.೨೧೦೯] ಚ ಪಾಳಿಪದಾನಿ ದಿಸ್ಸನ್ತಿ.

ತತ್ಥ ‘ಸಜಾ’ತಿ ಆಲಿಙ್ಗಾಹಿ, ‘ಗಾರಯ್ಹಸ್ಸ’ನ್ತಿ ಅಹಂ ಗಾರಯ್ಹೋ ಭವೇಯ್ಯಂ.

ಏತ್ಥ ಚ ತಾಪಚ್ಚಯನ್ತಾ ಸಭಾವಇತ್ಥಿಲಿಙ್ಗಾ ಏವ – ಲಹುತಾ, ಮುದುತಾ, ಗಾಮತಾ, ಜನತಾ, ದೇವತಾ ಇಚ್ಚಾದಿ.

ತಥಾ ತಿಪಚ್ಚಯನ್ತಾ – ಗತಿ, ಮತಿ, ರತ್ತಿ, ಸತಿ, ತುಟ್ಠಿ, ದಿಟ್ಠಿ, ಇದ್ಧಿ, ಸಿದ್ಧಿ ಇಚ್ಚಾದಿ, ತಥಾ ಯಾಗು, ಧಾತು, ಧೇನು, ಕಣ್ಡು, ಕಚ್ಛು, ಮಾತು, ಧೀತು, ದುಹಿತು ಇಚ್ಚಾದಿ, ಜಮ್ಬೂ, ವಧೂ, ಚಮೂ, ಸುತನೂ, ಸರಬೂ ಇಚ್ಚಾದಿ ಚ. ಸಕ್ಕತಗನ್ಥೇಸು ಪನ ಸುತನೂ, ಸರಬೂ ಇಚ್ಚಾದೀಸುಪಿ ಊಪಚ್ಚಯಂ ವಿದಹನ್ತಿ.

ತತ್ಥ ಇತ್ಥಿಲಿಙ್ಗಭೂತಾ ಸಬ್ಬೇ ‘ಇವಣ್ಣುವಣ್ಣಾ ಪಿತ್ಥಿಯ’ನ್ತಿ ಸುತ್ತೇನ ನಿಚ್ಚಂ ಪಸಞ್ಞಾ ಹೋನ್ತಿ. ‘ಆಕಾರೋ ಚ ಘಾ’ತಿ ಸುತ್ತೇನ ನಿಚ್ಚಂ ಘಸಞ್ಞೋ.

ಇತ್ಥಿಪಚ್ಚಯರಾಸಿ ನಿಟ್ಠಿತೋ.

ಆಕಾರನ್ತಿತ್ಥಿಲಿಙ್ಗರಾಸಿ

ಇತ್ಥಿಲಿಙ್ಗಂ ಛಬ್ಬಿಧಂ ಆಕಾರನ್ತಂ, ಇಕಾರನ್ತಂ, ಈಕಾರನ್ತಂ, ಉಕಾರನ್ತಂ, ಊಕಾರನ್ತಂ, ಓಕಾರನ್ತಂ. ತತ್ಥ ಕಞ್ಞಾಸದ್ದಮ್ಹಾ ಅತ್ಥಮತ್ತೇ ಪಠಮಾ.

೮೨. ಗಸೀನಂ [ಕ. ೨೨೦; ರೂ. ೭೪; ನೀ. ೪೪೭].

ಕೇನಚಿ ಸುತ್ತೇನ ಅಲದ್ಧವಿಧೀನಂ ಗಸೀನಂ ಲೋಪೋ ಹೋತೀತಿ ಸಿಲೋಪೋ.

ಕಞ್ಞಾ ತಿಟ್ಠತಿ.

೮೩. ಜನ್ತುಹೇತ್ವೀಘಪೇಹಿ ವಾ [ಕ. ೧೧೮; ರೂ. ೧೪೬; ನೀ. ೨೯೩].

ಜನ್ತು, ಹೇತೂಹಿ ಚ ಪುನ್ನಪುಂಸಕೇಸು ಈಕಾರನ್ತೇಹಿ ಚ ಘತೋ ಚ ಪಸಞ್ಞೇಹಿ ಇವಣ್ಣುವಣ್ಣೇಹಿ ಚ ಯೋನಂ ಲೋಪೋ ಹೋತಿ ವಾ.

ಕಞ್ಞಾ ತಿಟ್ಠನ್ತಿ, ಕಞ್ಞಾಯೋ ತಿಟ್ಠನ್ತಿ.

ಆಮನ್ತನತ್ಥೇ ಪಠಮಾ, ‘ಗೋಸ್ಯಾಲಪನೇ’ತಿ ಗಸಞ್ಞಾ.

೮೪. ಘಬ್ರಹ್ಮಾದಿತ್ವೇ [ಕ. ೧೧೪, ೧೯೩; ರೂ. ೧೨೨, ೧೭೮; ನೀ. ೨೮೮; ಘಬ್ರಹ್ಮಾದಿತೇ (ಬಹಸು)].

ಘತೋ ಚ ಬ್ರಹ್ಮಾದಿತೋ ಚ ಗಸ್ಸ ಏ ಹೋತಿ ವಾ. ಆದಿಸದ್ದೇನ ಇಸಿ, ಮುನಿ, ರೇವತೀ, ಕತ್ತು, ಖತ್ತುಇಚ್ಚಾದಿತೋಪಿ.

ಭೋತಿ ಕಞ್ಞೇ, ಭೋತಿ ಕಞ್ಞಾ, ಭೋತಿಯೋ ಕಞ್ಞಾಯೋ, ಭೋತೀ ಕಞ್ಞಾಯೋ, ‘‘ಉಟ್ಠೇಹಿ ಪುತ್ತಿಕ ಪಬ್ಬಜ್ಜಾ ದುಕ್ಕರಾ ಪುತ್ತಿಕ’’ ಇತಿ ಥೇರೀಪಾಳಿ [ಥೇರೀಗಾ. ೪೬೫], ತಸ್ಮಾ ಗೇ ಪರೇ ಮಹಾವುತ್ತಿನಾ ರಸ್ಸೋಪಿ ಯುಜ್ಜತಿ. ಕುಸಜಾತಕೇ ‘‘ನ ಮೇ ಅಕಾಸಿ ವಚನಂ, ಅತ್ಥಕಾಮಾಯ ಪುತ್ತಿಕೇ’’ತಿಪಿ [ಜಾ. ೨.೨೦.೪೭] ಅತ್ಥಿ.

ಕಮ್ಮತ್ಥೇ ದುತಿಯಾ, ‘ಸರೋ ಲೋಪೋ ಸರೇ’ತಿ ಪುಬ್ಬಸರಲೋಪೋ.

ಕಞ್ಞಂ ಪಸ್ಸತಿ, ಕಞ್ಞಾ ಪಸ್ಸತಿ, ಕಞ್ಞಾಯೋ ಪಸ್ಸತಿ.

ಕತ್ತರಿ ತತಿಯಾ.

೮೫. ಘಪತೇಕಸ್ಮಿಂ ನಾದೀನಂ ಯಯಾ [ಕ. ೧೧೧, ೧೧೨; ರೂ. ೧೭೯, ೧೮೩ ನೀ. ೨೮೩, ೨೮೪].

ಘತೋ ಚ ಪಸಞ್ಞೇಹಿ ಇವಣ್ಣುವಣ್ಣೇಹಿ ಚ ಏಕತ್ತೇ ಪವತ್ತಾನಂ ನಾದೀನಂ ಪಞ್ಚನ್ನಂ ಏಕವಚನಾನಂ ಕಮೇನ ಯ, ಯಾ ಹೋನ್ತಿ.

ಕಞ್ಞಾಯ ಕತಂ, ಕಞ್ಞಾಹಿ ಕತಂ. ಏತ್ಥ ಚ ಘತೋಪಿ ಯಾಆದೇಸೋ ದಿಸ್ಸತಿ. ‘‘ತೇ ಚ ತತ್ಥ ನಿಸೀದಿತ್ವಾ, ತಸ್ಸ ರುಕ್ಖಸ್ಸ ಛಾಯಯಾ’’ [ಜಾ. ೧.೧೪.೧೮೨] ತಿ ಚ ‘‘ಸಮನ್ತಾ ಪರಿವಾರಿಂಸು, ತಸ್ಸ ರುಕ್ಖಸ್ಸ ಛಾಯಯಾ’’ [ಜಾ. ೧.೧೪.೧೮೯] ತಿ ಚ ಪಾಳಿ, ತಥಾ ‘‘ಸಕ್ಖರೋಪಮಯಾ ವದೇ’’ [ಸಚ್ಚಸಙ್ಖೇಪ ೧೭೬ ಗಾಥಾ], ‘‘ಬಾಲದಾರಕಲೀಲಯಾ’’ತಿ [ವಿಭಾವಿನೀ ೧೫೪] ಚ ದಿಸ್ಸನ್ತಿ. ಮಹಾವುತ್ತಿನಾ ಘಸ್ಸ ರಸ್ಸೋ.

೮೬. ಸ್ಮಾಹಿಸ್ಮಿಂನಂ ಮ್ಹಾಭಿಮ್ಹಿ ವಾ [ಕ. ೯೯; ರೂ. ೮೧].

ತೇಸಂ ಕಮೇನ ಮ್ಹಾ, ಭಿ, ಮ್ಹಿ ಹೋನ್ತಿ ವಾ. ಏತೇ ಆದೇಸಾ ಗಾಥಾಸು ಬಹುಲಂ ದಿಸ್ಸನ್ತಿ.

ಕಞ್ಞಾಹಿ ಕತಂ, ಕಞ್ಞಾಭಿ ಕತಂ.

ಸಮ್ಪದಾನೇ ಚತುತ್ಥೀ, ಕಞ್ಞಾಯ ದೇತಿ, ಕಞ್ಞಾನಂ ದೇತಿ, ಕಞ್ಞಾಯ ಆಭತಂ ವತ್ಥಂ, ಕಞ್ಞಾನಂ ಆಭತಂ ವತ್ಥಂ.

ಅಪಾದಾನೇ ಪಞ್ಚಮೀ, ಕಞ್ಞಾಯ ಅಪೇತಿ, ಕಞ್ಞಮ್ಹಾ ಅಪೇತಿರಸ್ಸತ್ತಂ, ಕಞ್ಞಾಹಿ ಕಞ್ಞಾಭಿ ಅಪೇತಿ.

ಸಮ್ಬನ್ಧೇ ಛಟ್ಠೀ, ಕಞ್ಞಾಯ ಸನ್ತಕಂ, ಕಞ್ಞಾನಂ ಸನ್ತಕಂ.

ಓಕಾಸೇ ಸತ್ತಮೀ, ಕಞ್ಞಾಯ ತಿಟ್ಠತಿ.

೮೭. ಯಂ [ಕ. ೧೧೬; ರೂ. ೧೮೦; ನೀ. ೪೪೩].

ಘತೋ ಚ ಪಸಞ್ಞೇಹಿ ಇವಣ್ಣುವಣ್ಣೇಹಿ ಚ ಸ್ಮಿಂನೋ ಯಂ ಹೋತಿ ವಾ.

ಕಞ್ಞಾಯಂ ತಿಟ್ಠತಿ, ಕಞ್ಞಾಯ ತಿಟ್ಠತಿ, ಕಞ್ಞಾಸು ತಿಟ್ಠತಿ.

ಸದ್ಧಾ ಮೇಧಾ ಪಞ್ಞಾ ವಿಜ್ಜಾ, ಚಿನ್ತಾ ಮನ್ತಾ ವೀಣಾ ತಣ್ಹಾ.

ಇಚ್ಛಾ ಮುಚ್ಛಾ ಏಜಾ ಮಾಯಾ, ಮೇತ್ತಾ ಮತ್ತಾ ಸಿಕ್ಖಾ ಭಿಕ್ಖಾ.

ಜಙ್ಘಾ ಗೀವಾ ಜಿವ್ಹಾ ವಾಚಾ, ಛಾಯಾ ಆಸಾ ಗಙ್ಗಾನಾವಾ.

ಗಾಥಾ ಸೇನಾ ಲೇಖಾ ಸಾಖಾ, ಮಾಲಾ ವೇಲಾ ಪೂಜಾ ಖಿಡ್ಡಾ.

ಪಿಪಾಸಾ ವೇದನಾ ಸಞ್ಞಾ, ಚೇತನಾ ತಸಿಣಾಪಜಾ.

ದೇವತಾ ವಟ್ಟಕಾ ಗೋಧಾ, ಬಲಾಕಾ ಪರಿಸಾ ಸಭಾ.

ಊಕಾ ಸೇಫಾಲಿಕಾ ಲಙ್ಕಾ, ಸಲಾಕಾ ವಾಲಿಕಾ ಸಿಖಾ.

ವಿಸಾಖಾ ವಿಸಿಖಾ ಸಾಖಾ, ಗಚ್ಛಾ ವಞ್ಝಾ ಜಟಾ ಘಟಾ.

ಜೇಟ್ಠಾ ಸೋಣ್ಡಾ ವಿತಣ್ಡಾ ಚ, ವರುಣಾ ವನಿತಾ ಲತಾ.

ಕಥಾ ನಿದ್ದಾ ಸುಧಾ ರಾಧಾ, ವಾಸನಾ ಸೀಸಪಾ ಪಪಾ.

ಪಭಾ ಸೀಮಾ ಖಮಾ ಜಾಯಾ, ಖತ್ತಿಯಾ ಸಕ್ಖರಾ ಸುರಾ.

ದೋಲಾ ತುಲಾ ಸಿಲಾ ಲೀಲಾ, ಲಾಲೇ’ಲಾ ಮೇಖಲಾ ಕಲಾ.

ವಳವಾ’ ಲಮ್ಬುಸಾ ಮೂಸಾ, ಮಞ್ಜೂಸಾ ಸುಲಸಾ ದಿಸಾ.

ನಾಸಾ ಜುಣ್ಹಾ ಗುಹಾ ಈಹಾ, ಲಸಿಕಾ ವಸುಧಾದಯೋ.

೮೮. ನಮ್ಬಾದೀಹಿ [ನಮ್ಬಾದೀಹಿ (ಬಹೂಸು)].

ಗಸಞ್ಞೇಹಿ ಅಮ್ಬ, ಅನ್ನ, ಅಮ್ಮಇಚ್ಚೇತೇಹಿ ಗಸ್ಸ ಏ ನ ಹೋತಿ.

೮೯. ರಸ್ಸೋ ವಾ.

ಅಮ್ಬಾದೀನಂ ರಸ್ಸೋ ಹೋತಿ ವಾ ಗೇ ಪರೇ.

ಭೋತಿ ಅಮ್ಬ, ಭೋತಿ ಅಮ್ಬಾ, ಭೋತಿ ಅನ್ನ, ಭೋತಿ ಅನ್ನಾ, ಭೋತಿ ಅಮ್ಮ, ಭೋತಿ ಅಮ್ಮಾ, ಸೇಸಂ ಕಞ್ಞಾಸಮಂ.

ಏತ್ಥ ವಿಸೇಸವಿಧಾನಮುಚ್ಚತೇ.

೯೦. ತಿ ಸಭಾಪರಿಸಾಯ.

ಸಭಾಪರಿಸಾಹಿ ಸ್ಮಿಂನೋತಿ ಹೋತಿ. ‘ಘೋ ಸ್ಸಂಸ್ಸಾಸ್ಸಾಯ ತೀಸೂ’ತಿ ಸುತ್ತೇನ ತಿಮ್ಹಿ ರಸ್ಸೋ.

ಸಭತಿ, ಸಭಾಯ, ಸಭಾಯಂ, ಸಭಾಸು, ಪರಿಸತಿ, ಪರಿಸಾಯ, ಪರಿಸಾಯಂ, ಪರಿಸಾಸು, ತಮದ್ದಸ ಮಹಾಬ್ರಹ್ಮಾ, ನಿಸಿನ್ನಂ ಸಮ್ಹಿ ಪರಿಸತಿ, ಇತಿ ಭಗವಾ ತಸ್ಮಿಂ ಪರಿಸತಿ ಸುವಣ್ಣವಣ್ಣಂ ಕಾಯಂ ವಿವರಿ [ಮ. ನಿ. ೧.೩೫೯].

ನನ್ದಮಾತಾ, ರಾಜಧೀತಾಇಚ್ಚಾದೀಸು ‘ಘಬ್ರಹ್ಮಾದಿತ್ವೇ’ತಿ ಘಸ್ಸ ಏತ್ತಂ.

ಅಚ್ಛರಿಯಂ ನನ್ದಮಾತೇ, ಅಬ್ಭುತಂ ನನ್ದಮಾತೇ [ಅ. ನಿ. ೭.೫೩], ಭೋತಿ ದೇವಧೀತೇ, ಭೋತಿ ಸಕ್ಯಧೀತರೇ-ಮಹಾವುತ್ತಿನಾ ಸಮಾಸೇ ಸ್ಯಾದೀಸು ಆರತ್ತಂ ರಸ್ಸತ್ತಞ್ಚ. ಲ್ತುಪಚ್ಚಯನ್ತಾ ಪನ ಯೇಭುಯ್ಯೇನ ತೀಸು ಲಿಙ್ಗೇಸು ಸಮಾನರೂಪಾ ಹೋನ್ತಿ, ‘‘ಅತ್ಥಧಮ್ಮಂ ಪರಿಪುಚ್ಛಿತಾ ಚ ಉಗ್ಗಹೇತಾ ಚ ಧಮ್ಮಾನಂ ಸೋತಾ ಚ ಪಯಿರೂಪಾಸಿತಾ ಚಾ’’ತಿ ಥೇರೀಪಾಳಿ. ತಥಾ ಕ್ವಚಿ ಗಚ್ಛನ್ತಾದಿಸದ್ದಾಪಿ. ತಮೋಖನ್ಧಂ ಪದಾಲಯಂ, ಏವಂ ದುಬ್ಭಾಸಿತಂ ಭಣಂ ಇಚ್ಚಾದಿ-ತತ್ಥ ಪದಾಲಯನ್ತಿ ಪದಾಲಯನ್ತೀ, ಭಣನ್ತಿ ಭಣನ್ತೀತಿ ಅತ್ಥೋ.