೫. ಪಞ್ಚಮೋ ಕಣ್ಡೋ (ಖಾದಿ)

೧. ತಿಜ ಮಾನೇಹಿ ಖ ಸಾ ಖಮಾ ವೀಮಂಸಾಸು.

ಖನ್ತಿಯಂ ತಿಜಾ ವೀಮಂಸಾಯಂ ಮಾನಾ ಚ ಖಸಪ್ಪಚ್ಚಯಾ ಹೋನ್ತಿ ಯಥಾಕ್ಕಮಂ, ತಿತಿಕ್ಖಾ, ವೀಮಂಸಾ, ತಿತಿಕ್ಖತಿ, ವೀಮಂಸತಿ. ಖಮಾವೀಮಂಸಾ, ಸೂತಿ ಕಿಂ? ತೇಜನಂ, ತೇಜೋ, ತೇಜಯತಿ, ಮಾನನಂ, ಮಾನೋಮಾನೇತಿ.

೨. ಕಿತಾ ತಿಕಿಚ್ಛಾಸಂಸಯೇಸು ಛೋ.

ತಿಕಿಚ್ಛಾಯಂ ಸಂಸಯೇ ಚ ವತ್ತಮಾನಾ ಕಿತಾ ಛೋ ಹೋತಿ. ತಿಕಿಚ್ಛಾ, ವಿಚಿಕಿಚ್ಛಾ, ತಿಕಿಚ್ಛತಿ, ವಿಚಿಕಿಚ್ಛತಿ. ಅಞ್ಞತ್ರ ನಿಕೇತೋ, ಸಂಕೇತೋ, ಕೇತನಂ, ಕೇತೋ, ಕೇತಯತಿ.

೩. ನಿನ್ದಾಯಂ ಗುಪ ಬಧಾ ಬಸ್ಸ ಭೋ ಚ.

ನಿನ್ದಾಯಂ ವತ್ತಮಾನೇಹಿ ಗುಪ ಬಧೇಹಿ ಛೋ ಹೋತಿ ಬಸ್ಸ ಭೋ ಚ. ಜಿಗುಚ್ಛಾ, ಬೀಭಚ್ಛಾ, ಜಿಗುಚ್ಛತಿ, ಬೀಭಚ್ಛತಿ, ಅಞ್ಞತ್ರ ಗೋಪನಂ, ಗೋಪೋ, ಗೋಪೇತಿ, ಬಧಕೋ.

೪. ತುಂಸ್ಮಾ ಲೋಪೋ ಚಿಚ್ಛಾಯಂ ತೇ.

ತುಮನ್ತತೋ ಇಚ್ಛಾಯಮತ್ಥೇ ತೇ ಖಸಛಾ ಹೋನ್ತಿ ಬಹುಲಂ, ಲೋಪೋ ಚ ತುಂಪಚ್ಚಯಸ್ಸ ಹೋತಿ ಸುತತ್ತಾ, ಬುಭುಕ್ಖಾ, ಜಿಗೀಸಾಂ, ಜಿಘಚ್ಛಾ, ಬುಭುಕ್ಖತಿ, ಜಿಗೀಸತಿ ಜಿಘಚ್ಛತಿ. ಇಧ ಕಸ್ಮಾ ನ ಹೋತಿ ‘ಭೋತ್ತುಮಿಚ್ಛತೀ’ತಿ? ಪದನ್ತರೇನಾಭಿಧಾನಾ. ತುಂಸ್ಮಾತಿ ಕಿಂ? ಭೋಜನಮಿಚ್ಛತಿ. ಇಚ್ಛಾಯನ್ತಿ ಕಿಂ? ಭುಞ್ಜಿತುಂ ಗಚ್ಛತಿ. ಕಥಂ ‘ಕೂಲಂ ವಿಪತಿ ಸತೀ’ತಿ? ಯಥಾ ಕೂಲಂ ಪತಿತು ಮಿಚ್ಛತೀತಿ ವಾಕ್ಯಂ ಹೋತಿ, ಏವಂ ವುತ್ತಿಪಿ ಹೋಸ್ಸತಿ. ವಾಕ್ಯಮೇವ ಚರಹಿ ಕಥಂ ಹೋತಿ? ಲೋಕಸ್ಸ ತಥಾ ವಚನಿಚ್ಛಾಯ.

೫. ಈಯೋ ಕಮ್ಮಾ.

ಇಚ್ಛಾಕಮ್ಮತೋ ಇಚ್ಛಾಯಮತ್ಥೇ ಈಯಪ್ಪಚ್ಚಯೋ ಹೋತಿ. ಪುತ್ತಮಿಚ್ಛತಿ ಪುತ್ಥೀಯತಿ. ಕಮ್ಮಾತಿ ಕಿಂ? ಅಸಿನೇಚ್ಛತಿ. ಇಧ ಕಸ್ಮಾ ನ ಹೋತಿ ‘ರಞ್ಞೋಪುತ್ತಮಿಚ್ಛತೀ’ತಿ? ಸಾಪೇಕ್ಖತ್ತಾ, ನ ಹಿ ಅಞ್ಞಮಪೇಕ್ಖಮಾನೋ ಅಞ್ಞೇನ ಸಹೇಕತ್ಥಿಭಾವಮನುಭವಿತುಂ ಸಕ್ಕೋತಿ. ಇಧಾಪಿ ಚರಹಿ ನ ಸಿಯಾ ‘ಅತ್ತನೋ ಪುತ್ತ ಮಿಚ್ಛತೀ’ತಿ? ನೇವೇತ್ಥ ಭವಿತಬ್ಬಂ, ನ ಹಿ ಭವತಿ ‘ಅತ್ತನೋ ಪುತ್ತೀಯತೀ’ತಿ, ಕಥಂ ಚರಹಿ ಪುತ್ತಸ್ಸ ಅತ್ತನಿಯತಾ-ವಗಮ್ಯತೇ? ಅಞ್ಞಸ್ಸಾಸುತತ್ತಾ ಇಚ್ಛಾಯ ಚ ತಬ್ಬಿಸಯತ್ತಾ.

೬. ಉಪಮಾನಾಚಾರೇ.

ಕಮ್ಮತೋ ಉಪಮಾನಾ ಆಚಾರತ್ಥೇ ಈಯೋ ಹೋತಿ. ಪುತ್ತಮಿ-ವಾ-ಚರತಿ ಪುತ್ತೀಯತಿ ಮಾಣವಕಂ, ಉಪಮಾನಾತಿ ಕಿಂ? ಪುತ್ತಮಾಚರತಿ.

೭. ಆಧಾರಾ.

ಆಧಾರತೂ-ಪಮಾನಾ ಆಚಾರತ್ಥೇ ಈಯೋ ಯೋತಿ. ಕುಟಿಯಮಿವಾ-ಚರತಿ ಕುಟೀಯತೀ ಪಾಸಾದೇ, ಪಾಸಾದೀಯತಿ ಕುಟಿಯಂ ಭಿಕ್ಖು.

೮. ಕತ್ತುತಾಯೋ.

ಕತ್ತುತೂ-ಪಮಾನಾ ಆಚಾರತ್ಥೇ ಆಯೋ ಹೋತಿ. ಪಬ್ಬತೋ ಇವಾಚರತಿ ಪಬ್ಬತಾಯತಿ.

೯. ಯ್ಚತ್ಥೇ.

ಕತ್ತುತೋ ಅಭೂತತಬ್ಭಾವೇ ಆಯೋ ಹೋತಿ ಬಹುಲಂ. ಭುಸಾಯತಿ, ಪಟಪಟಾಯತಿ, ಲೋಹಿತಾಯತಿ, ಕತ್ತುತೋತ್ವೇವ? (ಅಭುಸಂ) ಭುಸಂ ಕರೋತೀಹಿ, ಇಹ ಕಸ್ಮಾ ನ ಹೋತಿ ‘ಭುಸೀ ಭವತೀ’ತಿ? ವುತ್ತತ್ಥತಾಯ.

೧೦. ಸದ್ದಾದೀನಿ ಕರೋತಿ.

ಸದ್ದಾದೀಹಿ ದುತಿಯನ್ತೇಹಿ ಕರೋತೀತಿ ಅಸ್ಮಿಂ ಅತ್ಥೇ ಆಯೋ ಹೋತಿ. ಸದ್ದಾಯತಿ, ವೇರಾಯತಿ, ಕಲಹಾಯತಿ, ಧೂಪಾಯತಿ.

೧೧. ನುಮೋತ್ವ-ಸ್ಸೋ.

ನಮೋಇಚ್ಚಸ್ಮಾ ಕರೋತೀತಿ ಅಸ್ಮಿಂ ಅತ್ಥೇ ಅಸ್ಸೋ ಹೋತಿ. ನಮಸ್ಸತಿ ತಥಾಗ್ತಂ.

೧೨. ಧಾತ್ವತ್ಥೇ ನಾಮಸ್ಮಿ.

ನಾಮಸ್ಮಾ ಧಾತ್ವತ್ಥೇ ಬಹುಲಮಿಹೋತಿ. ಹತ್ಥಿನಾ ಅತಿಕ್ಕಮತಿ ಅತಿಹತ್ಥಯತಿ, ವೀಣಾಯ ಉಪಗಾಯತಿ ಉಪವೀಣಯತಿ, ದಳ್ಹಂ ಕರೋತಿ ವಿನಯಂ ದಳ್ಹಯತಿ, ವಿಸುದ್ಧಾ ಹೋತಿ ರತ್ತಿ ವಿಸುದ್ಧಯತಿ, ಕುಸಲಂ ಪುಚ್ಛತಿ ಕುಸಲಯತಿ.

೧೩. ಸಚ್ಚಾದೀಹಾಪಿ.

ಸಚ್ಚಾದೀಹಿ ಧಾತ್ವತ್ಥೇ ಆಪಿ ಹೋತಿ. ಸಚ್ಚಾಪೇತಿ, ಅತ್ಥಾಪೇತಿ, ವೇದಾಪೇತಿ, ಸುಕ್ಖಾಪೇತಿ, ಸುಖಾಪೇತಿ, ದುಕ್ಖಾಪೇತಿ.

೧೪. ಕ್ರಿಯತ್ಥಾ.

ಅಯಮಧಿಕಾರೋ ಆಸತ್ಥಪರಿಸಮತ್ತಿಯಾ. ಕ್ರಿಯಾ ಅತ್ಥೋ ಯಸ್ಸ ಸೋ ಕ್ರಿಯತ್ಥೋ ಧಾತು.

೧೫. ಚುರಾದಿತೋ ಣಿ.

ಚುರಾದೀಹಿ ಕ್ರಿಯತ್ಥೇಹಿ ಸಕತ್ಥೇ ಣಿ ಪರೋ ಹೋತಿ ಬಹುಲಂ. ಣಕಾರೋ ವುದ್ಧ್ಯತ್ಥೋ, ಏವಮಞ್ಞತ್ರಾಪಿ, ಚೋರಯತಿ, ಲಾಳಯತಿ, ಕಥಂ ‘ರಜ್ಜಂ ಕಾರೇತೀ’ತಿ? ಯೋಗವಿಭಾಗತೋ.

೧೬. ಪಯೋಜಕಬ್ಯಾಪಾರೇ ಣಾಪಿ ಚ.

ಕತ್ತಾರಂ ಯೋ ಪಯೋಜಯತಿ, ತಸ್ಸ ಬ್ಯಾಪಾರೇ ಕ್ರಿಯತ್ಥಾ ಣಿಣಾಪೀ ಹೋನ್ತಿ ಬಹುಲಂ, ಕಾರೇತಿ, ಕಾರಾಪೇತಿ. ನನು ಚ ಕತ್ತಾಪಿ ಕರಣಾದೀನಂ ಪಯೋಜಕೋತಿ ತಂಬ್ಯಾಪಾರೇಪಿ ಣಿಣಾಪೀ ಪಾಪುಣನ್ತಿ? ಪಯೋಜಕಗ್ಗಹಣಸಾಮತ್ಥಿಯಾ ನ ಭವಿಸ್ಸನ್ತಿ ಚುರಾದೀಹಿ ವಿಸುಂ ವಚನಸಾಮತ್ಥಿಯಾ ಚ. ಅತೋ ಭಿಯ್ಯೋ ಣಾಪಿಯೇವ, ಣಿಯೇವುವಣ್ಣತೋ, ದ್ವಯಮೇವಞ್ಞೇಹಿ.

೧೭. ಕ್ಯೋ ಭಾವಕಮ್ಮೇಸ್ವ-ಪರೋಕ್ಖೇಸು ಮಾನ ನ್ತ ತ್ಯಾದೀಸು. ಭಾವಕಮ್ಮವಿಹಿತೇಸು ಪರೋಕ್ಖಾವಜ್ಜಿತೇಸು ಮಾನನ್ತತ್ಯಾದೀಸು ಪರೇಸು ಕ್ಯೋ ಹೋತಿ ಕ್ರಿಯತ್ಥಾ. ನ್ತಗ್ಗಹಣಮುತ್ತರತ್ಥಂ, ಕಕಾರೋ ಅವುದ್ಧ್ಯತ್ಥೋ ಏವಮುತ್ತರತ್ರಾಪಿ. ಠೀಯಮಾನಂ, ಠೀಯತೇ, ಸೂಯಮಾನಂ, ಸೂಯತೇ, ಅಪರೋಕ್ಖೇಸು ಮಾನನ್ತತ್ಯಾದೀಸೂತಿ ಕಿಂ? ಬಭೂವ ದೇವದತ್ತೇನ, ಬಿಭಿದ ಕುಸುಲೋ. ಭಿಜ್ಜತೇ ಕುಸುಲೋ ಸಯಮೇವಾತಿ ‘ಭಿಜ್ಜತೇ’ತಿ ಸವನಾ ಕಮ್ಮತಾ-ವಗಮ್ಯತೇ, ‘ಸಯಮೇವಾ’ತಿ ಸವನತೋ ಕತ್ತುತಾ, ಕತ್ತುತಾವಚನಿಚ್ಛಾಯನ್ತು ‘ಭಿನ್ದತಿ ಕುಸುಲೋ ಅತ್ತಾನ’ನ್ತಿ ಭವತಿ, ಏವಮಞ್ಞಮ್ಪಿ ಯಥಾಗಮಮನುಗನ್ತಬ್ಬಂ. ‘ಅಪರೋಕ್ಖೇಸು ಮಾನನ್ತತ್ಯಾದೀಸೂ’ತಿ ಅಯಮಧಿಕಾರೋ ಆ ‘ತನಾದಿತ್ವೋ’ತಿ ೫.೨೬. ಅಪಿಚ ಏತೇ ಕ್ಯಾದಯೋ ತ್ಯಾದೀಸು ಪರಭೂತೇಸು ಕತ್ತುಕಮ್ಮಭಾವ ವಿಹಿತೇಸು ಕ್ಯಲಾದೀನಂ ವಿಧಾನತೋ ತೇಸ್ವೇವ ವಿಞ್ಞಾಯನ್ತೀತಿ ಅಕಮ್ಮಕೇಹಿ ಧಾತೂಹಿ ಕತ್ತುಭಾವೇಸು, ಸಕಮ್ಮಕೇಹಿ ಕತ್ತುಕಮ್ಮೇಸು, ಕಮ್ಮಾವಚನಿಚ್ಛಾಯಂ ಭಾವೇ ಚ ಭವನ್ತೀತಿ ವೇದಿತಬ್ಬಾ. ಯಸ್ಸ ಪನ ಧಾತುಸ್ಸ ಕಿರಿಯಾ ಕಮ್ಮಮಪೇಕ್ಖತೇ, ಸೋ ಸಕಮ್ಮಕೋ, ಯಸ್ಸ ತು ಕಿರಿಯಾ ಕತ್ತುಮತ್ತಮಪೇಕ್ಖತೇ, ಸ್ವಾಕಮ್ಮಕೋತಿ ಞಾತಬ್ಬಂ.

೧೮. ಕತ್ತರಿ ಲೋ.

ಕ್ರಿಯತ್ಥತೋ ಅಪರೋಕ್ಖೇಸು ಕತ್ತುವಿಹಿತಮಾನ ನ್ತತ್ಯಾದೀಸು ಲೋ ಹೋತಿ. ಲಕಾರೋ, ‘‘ಞಿಲಸ್ಸೇ’’ತಿ ೫-೧೬೩ ವಿಸೇಸನತ್ಥೋ. ಪಚಮಾನೋ, ಪಚನ್ತೋ, ಪಚತಿ.

೧೯. ಮಂ ಚ ರುಧಾದೀನಂ.

ರುಧಾದಿತೋ ಕತ್ತುವಿಹಿತಮಾನನ್ತ ತ್ಯಾದೀಸು ಲೋ ಹೋತಿ ಮಂ ಚ ಅನ್ತಸರಾ ಪರೋ. ಮಕಾರೋ-ನುಬನ್ಧೋ, ಅಕಾರೋ ಉಚ್ಚಾರಣತ್ಥೋ. ರುನ್ಧಮಾನೋ, ರುನ್ಧನ್ತೋ, ರುನ್ಧತಿ.

೨೦. ಣಿಣಾಪ್ಯಾಪೀಹಿ ವಾ.

ಣಿಣಾಪ್ಯಾಪೀಹಿ ಕತ್ತುವಿಹಿತಮಾನನ್ತ ತ್ಯಾದೀಸು ಲೋ ಹೋತಿ ವಿಭಾಸಾ, ಓರಯನ್ತೋ, ಚೋರೇನ್ತೋ, ಕಾರಯನ್ತೋ, ಕಾರೇನ್ತೋ, ಕಾರಾಪಯನ್ತೋ, ಕಾರಾಪೇನ್ತೋ, ಸಚ್ಚಾಪಯನ್ತೋ, ಸಚ್ಚಾಪೇನ್ತೋ, ಚೋರಯತಿ, ಚೋರೇತಿ, ಕಾರಯತಿ, ಕಾರೇತಿ, ಕಾರಾಪಯತಿ, ಕಾರಾಪೇತಿ, ಸಚ್ಚಾಪಯತಿ, ಸಚ್ಚಾಪೇತಿ. ವವತ್ಥಿತವಿಭಾಸತ್ಥೋ-ಯಂ ವಾಸದ್ದೋ, ತೇನ ಮಾನೇ ನಿಚ್ಚಂ, ಚೋರಯಮಾನೋ, ಕಾರಯಮಾನೋ, ಕಾರಾಪಯಮಾನೋ, ಸಚ್ಚಾಪಯಮಾನೋ.

೨೧. ದಿವಾದೀಹಿ ಯಕ.

ದಿವಾದೀಹಿ ಲವಿಸಯೇ ಯಕ ಹೋತಿ. ದಿಬ್ಬನ್ತೋ, ದಿಬ್ಬತಿ.

೨೨. ತುದಾದೀಹಿ ಕೋ.

ತುದಾದೀಹಿ ಲವಿಸಯೇ ಕೋ ಹೋತಿ. ತುದಮಾನೋ, ತುದನ್ತೋ, ತುದತಿ.

೨೩. ಜ್ಯಾದೀಹಿ ಕ್ನಾ.

ಜಿಆದೀಹಿ ಲವಿಸಯೇ ಕ್ನಾ ಹೋತಿ. ಜಿನನ್ತೋ, ಜಿನಾತಿ. ಕಥಂ ‘ಜಯನ್ತೋ’ ಜಯತೀ, ತಿ? ಭೂವಾದಿಪಾಠಾ.

೨೪. ಕ್ಯಾದೀಹಿ ಕ್ಣಾ.

ಕೀಆದೀಹಿ ಲವಿಸಯೇ ಕ್ಣಾ ಹೋತಿ. ಕಿಣನ್ತೋ, ಕಿಣಾತಿ.

೨೫. ಸ್ವಾದೀಹಿ ಕ್ಣೋ.

ಸುಆದೀಹಿ ಲವಿಸಯೇ ಕ್ಣೋ ಹೋತಿ. ಸುಣಮಾನೋ, ಸುಣನ್ತೋ, ಸುಣೋತಿ. ಕಥಂ ಸುಣಾತೀತಿ? ಕ್ಯಾದಿಪಾಠಾ.

೨೬. ತನಾದಿತ್ವೋ.

ತನಾದಿತೋ ಲವಿಸಯೇ ಓ ಹೋತಿ. ತನೋತಿ.

೨೭. ಭಾವಕಮ್ಮೇಸು ತಬ್ಬಾ-ನೀಯಾ.

ತಬ್ಬಅನೀಯಾ ಕ್ರಿಯತ್ಥಾ ಪರೇ ಭಾವಕಮ್ಮೇಸು ಬಹುಲಂ ಭವನ್ತಿ. ಕತ್ತಬ್ಬಂ, ಕರಣೀಯಂ, ಕತ್ತಬ್ಬೋ ಕಟೋ, ಕರಣೀಯೋ. ಬಹುಲಾಧಿಕಾರಾ ಕರಣಾದೀಸುಪಿ ಭವನ್ತಿ, ಸಿನಾನೀಯಂ ಚುಣ್ಣಂ, ದಾನೀಯೋ ಬ್ರಾಹ್ಮಣೋ, ಸಮ್ಮಾವತ್ತನೀಯೋ ಗುರು, ಪವಚನೀಯೋ ಉಪಜ್ಝಾಯೋ, ಉಪಟ್ಠಾನೀಯೋ ಸಿಸ್ಸೋ.

೨೮. ಘ್ಯಣ.

ಭಾವಕಮ್ಮೇಸು ಕ್ರಿಯತ್ಥಾ ಪರೋ ಘ್ಯಣ ಹೋತಿ ಬಹುಲಂ. ವಾಕ್ಯಂ, ಕಾರಿಯಂ, ಚೇಯ್ಯಂ, ಜೇಯ್ಯಂ.

೨೯. ಆಸ್ಸೇ ಚ.

ಆತೋಘ್ಯಣ ಹೋತಿ ಭಾವಕಮ್ಮೇಸು, ಆಸ್ಸ ಏ ಚ. ದೇಯ್ಯಂ.

೩೦. ವದಾದೀಹಿ ಯೋ.

ವದಾದೀಹಿ ಕ್ರಿಯತ್ಥೇಹಿ ಯೋ ಹೋತಿ ಬಹುಲಂ ಭಾವಕಮ್ಮೇಸು. ವಜ್ಜಂ, ಮಜ್ಜಂ, ಗಮ್ಮಂ. (೪೨) ‘‘ಭುಜಾನ್ನೇ’’, ಭೋಜ್ಜೋ ಓದನೋ, ಭೋಜ್ಜಾ ಯಾಗು, ಭೋಗ್ಗಮಞ್ಞಂ.

೩೧. ಕಿಚ್ಚ ಘಚ್ಚ ಭಚ್ಚ ಭಬ್ಬ ಲೇಯ್ಯಾ.

ಏತೇ ಸದ್ದಾ ಯಪ್ಪಚ್ಚಯನ್ತಾ ನಿಪಚ್ಚನ್ತೇ.

೩೨. ಗುಹಾದೀಹಿ ಯಕ.

ಗುತಾದೀಹಿ ಕ್ರಿಯತ್ತೇಹಿ ಭಾವಕಮ್ಮೇಸು ಯಕ ಹೋತಿ. ಗುಯ್ಹಂ, ದುಯ್ಹಂ, ಸಿಸ್ಸೋ. ಸಿದ್ಧಾ ಏವೇತೇ ತಬ್ಬಾದಯೋ ಪೇಸಾತಿಸಗ್ಗಪತ್ತಕಾಲೇಸುಪಿ ಗಮ್ಯಮಾನೇಸು ಸಾಮಞ್ಞೇನವಿಧಾನತೋ, ತ್ವಯಾ ಖಲು ಕಟೋ ಕತ್ತಬ್ಬೋ, ಕರಣೀಯೋ, ಕಾರಿಯೋ, ಕಿಚ್ಚೋ, ಏವಂ ತ್ವಯಾ ಕಟೋ ಕತ್ತಬ್ಬೋ, ಭೋತಾ ಕಟೋ ಕತ್ತಬ್ಬೋ, ಭೋತೋ ಹಿ ಪತ್ತೋ ಕಾಲೋ ಕಟಕರಣೇ. ಏವಂ ಉದ್ಧಮೋಹುತ್ತಿಕೇಪಿ ವತ್ತಮಾನತೋ ಪೇಸಾದೀಸು ಸಿದ್ಧಾ ಏವ. ತಥಾ ಅರಹೇ ಕತ್ತರಿ ಸತ್ತಿವಿಸಿಟ್ಠೇ ಚ ಪತೀಯಮಾನೇ ಆವಸ್ಸಕಾಧಮೀಣತಾವಿಸಿಟ್ಠೇ ಚ ಭಾವಾದೋ ಸಿದ್ಧಾ, ಉದ್ಧಂಮುಹುತ್ತತೋ-ಭೋತಾ ಕಟೋ ಕತ್ತಬ್ಬೋ, ಭೋತಾ ರಜ್ಜಂ ಕತ್ತಬ್ಬಂ. ಭವಂ ಅರಹೋ, ಭೋತಾ ಸಾರೋ ವಹಿತಬ್ಬೋ, ಭವಂ ಸಕ್ಕೋ, ಭೋತಾ ಅವಸ್ಸಂ ಕಟೋ ಕತ್ತಬ್ಬೋ, ಭೋತಾ ನಿಕ್ಖೋ ದಾತಬ್ಬೋ.

೩೩. ಕತ್ತರಿ ಲ್ತುಣಕಾ.

ಕತ್ತರಿ ಕಾರಕೇ ಕ್ರಿಯತ್ಥಾ ಲ್ತುಣಕಾ ಹೋನ್ತಿ ಬಹುಲಂ. ಪಠಿತಾ, ಪಾಠಕೋ. ಬಹುಲಮಿತ್ವೇವ? ಪಾದೇಹಿ ಹರೀಯತೀತಿ ಪಾದಹಾ-ರಕೋ, ಗಲೇ ಚುಪ್ಪತೇತಿ ಗಲೇಚೋಪಕೋ. ಸಿದ್ಧೋವ ಲ್ತು, ಅರಹೇ ಸೀಲಸಾಧುಧಮ್ಮೇಸು ಚ ಸಾಮಞ್ಞವಿಹಿತತ್ತಾ, ಭವಂ ಖಲು ಕಞ್ಞಾಯ ಪರಿಗ್ಗಹಿತಾ, ಭವಮೇತಂ ಅರಹತಿ. ಸೀಲಾದೀಸು-ಖಲ್ವಪಿ ಉಪಾದಾತಾ ಕುಮಾರಕೇ, ಗನ್ತಾ ಖೇಲಂ, ಮುಣ್ಡಯಿತಾರೋ ಸಾವಿಟ್ಠಾಯನಾ ವಧುಂ ಕತಪರಿಗ್ಗಹಂ.

೩೪. ಆವೀ.

ಕ್ರಿಯತ್ಥಾ ಆವೀ ಹೋತಿ ಬಹುಲಂ ಕತ್ತರಿ. ಭಯದಸ್ಸಾವೀ. ಅಪ್ಪವಿಸಯತಞ್ಞಾಪನತ್ಥಂ ಭಿನ್ನಯೋಗಕರಣಂ, ಸಾಮಞ್ಞವಿಹಿತತ್ತಾ ಸೀಲಾ ದೀಸು ಚ ಹೋತೇವ.

೩೫. ಆಸಿಂಸಾಯಮಕೋ.

ಆಸಿಂಸಾಯಂ ಗಮ್ಯಮಾನಾಯಂ ಕ್ರಿಯತ್ಥಾ ಅಕೋ ಹೋತಿ ಕತ್ತರಿ. ಜೀವತೂತಿ ಜೀವಕೋ, ನನ್ದತೂತಿ ನನ್ದಕೋ, ಭವತೂತಿ ಭವಕೋ.

೩೬. ಕರಾ ಣನೋ.

ಕರತೋ ಕತ್ತರಿ ಣನೋ ಹೋತಿ. ಕರೋತೀತಿ ಕಾರಣಂ, ಕತ್ತರೀತಿ ಕಿಂ? ಕರಣಂ.

೩೭. ಹಾತೋ ವೀಹಿಕಾಲೇಸು.

ಹಾತೋ ವೀಹಿಸ್ಮಿಂ ಕಾಲೇ ಚ ಣನೋ ಹೋತಿ ಕತ್ತರಿ. ಹಾಯನಾ ನಾಮ ವಿಹಯೋ, ಹಾಯನೋ ಸಂವಚ್ಛರೋ, ವೀಹಿಕಾಲೇಸೂತಿ ಕಿಂ? ಹಾತಾ.

೩೮. ವಿದಾ ಕೂ.

ವಿದಸ್ಮಾ ಕೂ ಹೋತಿ ಕತ್ತರಿ. ವಿದೂ, ಲೋಕವಿದೂ.

೩೯. ವಿತೋ ಞಾತೋ.

ವಿಪುಬ್ಬಾ ಞಾಇಚ್ಚಸ್ಮಾ ಕೂ ಹೋತಿ ಕತ್ತರಿ. ವಿಞ್ಞೂ. ವಿತೋತಿ ಕಿಂ? ಪಞ್ಞಾ.

೪೦. ಕಮ್ಮಾ.

ಕಮ್ಮತೋ ಪರಾ ಞಾಇಚ್ಚಸ್ಮಾ ಕೂ ಹೋತಿ ಕತ್ತರಿ. ಸಬ್ಬಞ್ಞೂ, ಕಾಲಞ್ಞೂ.

೪೧. ಕ್ವಚಣ.

ಕಮ್ಮತೋ ಪರಾ ಕ್ರಿಯತ್ಥಾ ಕ್ವಚಿ ಅಣ ಹೋತಿ ಕತ್ತರಿ. ಕುಮ್ಭಕಾರೋ, ಸರಲಾವೋ, ಮನ್ತಜ್ಝಾಯೋ, ಬಹುಲಾಧಿಕಾರಾ ಇಧ ನ ಹೋತಿ ಆದಿಚ್ಚಂ ಪಸ್ಸತಿ, ಹಿಮವನ್ತಂ ಸುಣೋತಿ, ಗಾಮಂ ಗಚ್ಛತಿ. ಕ್ವಚೀತಿ ಕಿಂ? ಕಮ್ಮಕರೋ.

೪೨. ಗಮಾ ರೂ.

ಕಮ್ಮತೋ ಪರಾ ಗಮಾ ರೂ ಹೋತಿ ಕತ್ತರಿ. ವೇದಗೂ ಪಾರಗೂ.

೪೩. ಸಮಾನಞ್ಞ ಭವನ್ತ ಯಾದಿತೂ-ಪಮಾನಾ ದಿಸಾ ಕಮ್ಮೇ ರೀರಿಕ್ಖಕಾ.

ಸಮಾನಾದೀಹಿ ಯಾದೀಹಿ ಚೋಪಮಾನೇಹಿ ಪರಾ ದಿಸಾ ಕಮ್ಮಕಾರಕೇ ರೀರಿಕ್ಖಕಾ ಹೋನ್ತಿ. ಸಮಾನೋ ವಿಯ ದಿಸ್ಸತೀತಿ ಸದೀ ಸದಿಕ್ಖೋ ಸದಿಸೋ. ಅಞ್ಞಾದೀ ಅಞ್ಞಾದಿಕ್ಖೋ ಅಞ್ಞಾದಿಸೋ. ಭವಾದೀ ಭವಾದಿಕ್ಖೋ ಭವಾದಿಸೋ. ಯಾದೀ ಯಾದಿಕ್ಖೋ ಯಾದಿಸೋ. ತ್ಯಾದೀ ತ್ಯಾದಿಕ್ಖೋ ತ್ಯಾದಿಸೋ. ಸಮಾನಾದೀಹೀತಿ ಕಿಂ? ರುಕ್ಖೋ ವಿಯ ದಿಸ್ಸತಿ. ಉಪಮಾನಾತಿ ಕಿಂ? ಸೋ ದಿಸ್ಸತಿ. ಕಮ್ಮೇತಿ ಕಿಂ? ಸೋ ವಿಯ ಪಸ್ಸತಿ. ರಕಾರಾ ಅನ್ತಸರಾದಿಲೋಪತ್ಥಾ, ಕಕಾರೋ ಏಕಾರಾಭಾವತ್ಥೋ.

೪೪. ಭಾವಕಾರಕೇಸ್ವ-ಘಣ ಘಕಾ.

ಭಾವೇ ಕಾರಕೇ ಚ ಕ್ರಿಯತ್ಥಾ ಅ ಘಣ ಘ ಕಾ ಹೋನ್ತಿ ಬಹುಲಂ. ಅ-ಪಗ್ಗಹೋ, ನಿಗ್ಗಹೋ, ಕರೋ, ಗರೋ, ಚಯೋ, ಜಯೋ, ರವೋ, ಭವೋ, ಪಚೋ, ವಚೋ, ಅನ್ನದೋ, ಪುರಿನ್ದದೋ, ಈಸಕ್ಕರೋ, ದುಕ್ಕರೋ, ಸುಕರೋ. ಘಣ-ಭಾವೇ ಪಾಕೋ, ಚಾಗೋ, ಭಾವೋ, ಕಾರಕೇಪಿ ಸಞ್ಞಾಯಂ ತಾವ ಪಜ್ಜತೇನೇನಾತಿ ಪಾದೋ, ರುಜತೀತಿ ರೋಗೋ, ವಿಸತೀತಿ ವೇಸೋ, ಸರತಿ ಕಾಲನ್ತರನ್ತಿ ಸಾರೋ ಥಿರಂಸೋ, ದರೀಯನ್ತೇ ಏತೇಹೀತಿ ದಾರಾ, ಜೀರಯತಿ ಏತೇನಾತಿ ಜಾರೋ, ಅಸಞ್ಞಾಯಮ್ಪಿ ದಾಯೋ ದತ್ತೋ, ಲಾಭೋ ಲದ್ಧೋ, ಘ-ವಕೋ, ನಿಪಕೋ, ಕ-ಪಿಯೋ, ಖಿಪೋ, ಭುಜೋ, ಆಯುಧಂ.

೪೫. ದಾಧಾತ್ವಿ.

ದಾಧಾಹಿ ಬಹುಲಮಿ ಹೋತಿ ಭಾವಕಾರಕೇಸು. ಆದಿ, ನಿಧಿ, ವಾಲಮಿ.

೪೬. ವಮಾದೀಯ್ಯಥು.

ವಮಾದೀಹಿ ಭಾವಕಾರಕೇಸ್ವಥು ಹೋತಿ. ವಮಥು, ವೇಪಥು, (ಅವಥು, ಸಯಥು).

೪೭. ಕ್ವಿ.

ಕ್ರಿಯತ್ಥಾ ಕ್ವಿ ಹೋತಿ ಬಹುಲಂ ಭಾವಕಾರಕೇಸು. ಕಕಾರೋ ಕಾನುಬನ್ಧಕಾರಿಯತ್ಥೋ, ಅಭಿಭೂ, ಸಯಮ್ಭೂ, ಭತ್ತಗ್ಗಂ, (ದಾನಗ್ಗಂ) ಸಲಾಕಗ್ಗಂ, ಸಭಾ, ಪಭಾ.

೪೮. ಅನೋ.

ಕ್ರಿಯತ್ತಾ ಭಾವಕಾರಕೇಸ್ವನೋ ಹೋತಿ. ಗಮನಂ, ದಾನಂ, ಸಮ್ಪದಾನಂ, ಅಪಾದಾನಂ, ಅಧಿಕರಣಂ, ಚಲನೋ, ಜಲನೋ, ಕೋಧನೋ, ಕೋಪನೋ, ಮಣ್ಡನೋ, ಭೂಸನೋ.

೪೯. ಇತ್ಥಿಯಮಣ ತ್ತಿ ಕ ಯಕ ಯಾ ಚ.

ಇತ್ಥಿಲಿಙ್ಗೇ ಭಾವೇ ಕಾರಕೇ ಚ ಕ್ರಿಯತ್ಥಾ ಅಆದಯೋ ಹೋನ್ತಿ ಅನೋ ಚ ಬಹುಲಂ. ಅ ತಿತಿಕ್ಖಾ, ವೀಮಂಸಾ, ಜಿಗುಚ್ಛಾ, ಪಿಪಾಸಾ, ಪುತ್ತಿಯಾ ಈಹಾ ಭಿಕ್ಖಾ, ಆಪದಾ, ಮೇಧಾ, ಗೋಧಾ, ಣಕಾರಾ, ಹಾರಾ, ತಾರಾ, ಧಾರಾ, ಆರಾ, ಕ್ತಿ-ಇಟ್ಠಿ, ಸಿಟ್ಠಿ, ಭಿತ್ತಿ, ಭತ್ತಿ, ತನ್ತಿ ಭೂತಿ, ಕ-ಗುಹಾ, ರುಜಾ, ಮುದಾ, ಯಕ-ವಿಜ್ಜಾ, ಇಜ್ಜಾ, ಯ-ಸೇಯ್ಯಾ, ಸಮಜ್ಜಾ, ಪಬ್ಬಜ್ಜಾ, ಪರಿಚರಿಯಾ, ಜಾಗರಿಯಾ, ಅನಕಾರಣಾ, ಹಾರಣಾ, ವೇದನಾ, ವನ್ದನಾ, ಉಪಾಸನಾ.

೫೦. ಜಾಹಾಹಿ ನಿ.

ಜಾಹಾಇಚ್ಚೇತೇಹಿ ನಿ ಹೋತಿತ್ಥಿಯಂ. ಜಾನಿ, ಹಾನಿ.

೫೧. ಕರಾ ರಿರಿಯೋ.

ಕರತೋ ರಿರಿಯೋ ಹೋತಿತ್ಥಿಯಂ. ಕರಣಂ ಕಿರಿಯಾ. ಕಥಂ ‘ಕ್ರಿಯಾ’ತಿ? ‘‘ಕ್ರಿಯಾಯಂ’’ತಿ ನಿಪಾತನಾ.

೫೨. ಇಕಿತೀ ಸರೂಪೇ.

ಕ್ರಿಯತ್ಥಸ್ಸ ಸರೂಪೇ-ಭಿಧೇಯ್ಯೇ ಕ್ರಿಯತ್ಥಾ ಪರೇ ಇಕಿತೀ ಹೋನ್ತಿ, ವಚಿ, ಯುಧಿ, ಪಚತಿ, ‘ಅಕಾರೋ ಕಕಾರೋ’ತಿ ಆದೀಸು ಕಾರಸದ್ದೇನ ಸಮಾಸೋ, ಯಥಾ ಏವಕಾರೋತಿ.

೫೩. ಸೀಲಾಭಿಕ್ಖಞ್ಞಾ-ವಸ್ಸಕೇಸು ಣೀ.

ಕ್ರಿಯತ್ಥಾ ಣೀ ಹೋತಿ ಸೀಲಾದೀಸು ಪತೀಯಮಾನೇಸು, ಉಣ್ಹಭೋಜೀ, ಖೀರಪಾಯೀ, ಅವಸ್ಸಕಾರೀ, ಸತನ್ದಾಯೀ.

೫೪. ಥಾವರಿತ್ತರ ಭಙ್ಗುರ ಭಿದುರ ಭಾಸುರ ಭಸ್ಸರಾ.

ಏತೇ ಸದ್ದಾ ನಿಪಚ್ಚನ್ತೇ ಸೀಲೇ ಗಮ್ಯಮಾನೇ.

೫೫. ಕತ್ತರಿ ಭೂತೇ ಕ್ತವನ್ತು ಕ್ತಾವೀ.

ಭೂತೇ-ತ್ಥೇ ವತ್ತಮಾನತೋ ಕ್ರಿಯತ್ಥಾ ಕ್ತವನ್ತುತ್ತಾವೀ ಹೋನ್ತಿ ಕತ್ತರಿ. ವಿಜಿತವಾ, ವಿಜಿತಾವೀ, ಭೂತೇತಿ ಅಧಿಕಾರೋ ಯಾವ ‘‘ಆಹಾರತ್ಥಾ’’ತಿ (೫-೬೦).

೫೬. ಕ್ತೋಭಾವಕಮ್ಮೇಸು.

ಭಾವೇ ಕಮ್ಮೇ ಚ ಭೂತೇ ಕ್ತೋ ಹೋತಿ. ಆಸಿತಂ ಭವತಾ. ಕತೋ ಕಟೋ ಭವತಾ.

೫೭. ಕತ್ತರಿ ಚಾರಮ್ಭೇ.

ಕ್ರಿಯಾರಮ್ಭೇ ಕತ್ತರಿ ಕ್ತೋ ಹೋತಿ ಯಥಾಪತ್ತಞ್ಚ. ಪಕತೋ ಭವಂ ಕಟಂ, ಪಕತೋ ಕಟೋ ಭವತಾ, ಪಸುತ್ತೋ ಭವಂ, ಪಸುತ್ತಂ ಭವತಾ.

೫೮. ಠಾ-ಸ ವಸ ಸಿಲಿಸ ಸೀ ರುಹ ಜರ ಜನೀಹಿ.

ಠಾದೀಹಿ ಕತ್ತರಿ ಕ್ತೋ ಹೋತಿ ಯಥಾಪತ್ತಞ್ಚ. ಉಪಟ್ಠಿತೋ ಗುರುಂ ಭವಂ, ಉಪಟ್ಠಿತೋ ಗುರು ಭೋತಾ, ಉಪಾಸಿತೋ ಗುರುಂ ಭವಂ, ಉಪಾಸಿತೋ ಗುರು ಭೋತಾ, ಅನುವುಸಿತೋ ಗುರುಂ ಭವಂ, ಅನುವುಸಿತೋ ಗುರು ಭೋತಾ, ಆಸಿಲಿಟ್ಠೋ ಗುರುಂ ಭವಂ, ಆಸಿಲಿಟ್ಠೋ ಗುರು ಭೋತಾ, ಅಧಿಸ್ಸಿತೋ ಖಟೋಪಿಕಂ ಭವಂ, ಅಧಿಸ್ಸಿತಾ ಖಟೋಪಿಕಾ ಭೋತಾ, ಆರಳ್ಹೋ ರುಕ್ಖಂ ಭವಂ, ಆರುಳ್ಹೋ ರುಕ್ಖೋ ಭೋತಾ, ಅನುಜಿಣ್ಣೋ ವಸಲಿಂ ದೇವದತ್ತೋ, ಅನುಜಿಣ್ಣಾ ವಸಲೀ ದೇವದತ್ತೇನ, ಅನುಜಾತೋ ಮಾಣವಕೋ ಮಾಣವಿಕಂ, ಅನುಜಾತಾ ಮಾಣವಿಕಾ ಮಾಣವಕೇನ.

೫೯. ಗಮನತ್ಥಾಕಮ್ಮಕಾಧಾರೇ ಚ.

ಗಮನತ್ಥತೋ ಅಕಮ್ಮಕತೋ ಚ ಕ್ರಿಯತ್ಥಾ ಆಧಾರೇ ಕ್ತೋ ಹೋತಿ ಕತ್ತರಿ ಚ ಯಥಾಪತ್ತಞ್ಚ, ಇದಮೇಸಂ ಯಾತಂ, ಇಹ ತೇ ಯಾತಾ, ಇಹ ತೇಹಿ ಯಾತಂ, ಅಯಂ ತೇಹಿ ಯಾತೋ ಪಥೋ, ಇದಮೇಸಮಾಸಿತಂ, ಇಹ ತೇ ಆಸಿತಾ, ಇಹತೇಹಿ ಆಸಿತಂ, ‘ದೇವೋ ಚೇ ವುಟ್ಠೋ ಸಮ್ಪನ್ನಾ ಸಾಲಯೋ’ತಿ ಕಾರಣಸಾಮಗ್ಗೀಸಮ್ಪತ್ತಿ ಏತ್ಥಾಭಿಮತಾ.

೬೦. ಆಹಾರತ್ಥಾ.

ಅಜ್ಝೋಹಾರತ್ಥಾ ಆಧಾರೇ ಕ್ತೋ ಹೋತಿ ಯಥಾಪತ್ತಞ್ಚ, ಇದಮೇಸಂ ಭುತ್ತಂ, ಇದಮೇಸಂ ಪೀತಂ, ಇಹ ತೇಹಿ ಭುತ್ತಂ, ಇಹ ತೇಹಿ ಪೀತಂ, ಓದನೋ ತೇಹಿ ಭುತ್ತೋ ಪೀತಮುದಕಂ, ಅಕತ್ತತ್ಥೋ ಯೋಗವಿಭಾಗೋ, ಕಥಂ ‘ಪೀತಾ ಗಾವೋ’ತಿ? ಪೀತಮೇಸಂ ವಿಜ್ಜತೀತಿ ಪೀತಾ, ಬಾಹುಲಕಾ ವಾ, ‘ಪಸ್ಸಿನ್ನೋ’ತಿ ಯಾ ಏತ್ಥ ಭೂತಕಾಲತಾ, ತತ್ರ ತ್ತೋ, ಏವಂ ರಞ್ಞಂ ಮತೋ ರಞ್ಞಂ ಇಟ್ಠೋ, ರಞ್ಞಂ ಬುದ್ಧೋ, ರಞ್ಞಂ ಪೂಜಿತೋ, ಏವಂ ಸೀಲಿತೋ, ರಕ್ಖಿತೋ, ಖನ್ತೋ, ಆಕುಟ್ಠೋ, ರುಟ್ಠೋ, ರುಸಿತೋ, ಅಭಿಬ್ಯಾಹಟೋ, ದಯಿಯೋ, ಹಟ್ಠೋ, ಕನ್ತಾ, ಸಂಯತೋ, ಅಮತೋ, ‘ಕಟ್ಠ’ನ್ತಿ ಭೂತತಾಯಮೇವ ಹೇತುನೋ, ಫಲಂ ತ್ವತ್ರ ಭಾವಿ.

೬೧. ತುಂ ತಾಯೇ ತವೇ ಭಾವೇ ಭವಿಸ್ಸತಿ ಕ್ರಿಯಾಯಂ ತದತ್ಥಾಯ.

ಭವಿಸ್ಸತಿ ಅತ್ಥೇ ವತ್ತಮಾನತೋ ಕ್ರಿಯತ್ಥಾ ಭಾವೇ ತುಂ ತಾಯೇ ತವೇ ಹೋನ್ತಿ ಕ್ರಿಯಾಯಂ ತದತ್ಥಾಯಂ ಪತೀಯಮಾನಾಯಂ. ಕಾತುಂ ಗಚ್ಛತಿ, ಕತ್ತಾಯೇ ಗಚ್ಛತಿ, ಕಾತವೇ ಗಚ್ಛತಿ, ಇಚ್ಛತಿ ಭೋತ್ತುಂ ಕಾಮೇತಿ ಭೋತ್ತುನ್ತಿ ಇಮೀನಾವ ಸಿದ್ಧಂ, ಪುನಬ್ಬಿಧಾನೇ ತ್ವಿಹಾಪಿ ಸಿಯಾ ‘ಇಚ್ಛನ್ತೋ ಕರೋತೀ’ತಿ, ಏವಂ ಸಕ್ಕೋತಿ ಭೋತ್ತುಂ, ಜಾನಾತಿ ಭೋತ್ತುಂ, ಗಿಲಾಯತಿ ಭೋತ್ತುಂ, ಘಟತೇ ಭೋತ್ತುಂ, ಆರಭತೇ ಭೋತ್ತುಂ, ಲಭತೇ ಭೋತ್ತುಂ, ಪಕ್ಕಮತಿ ಭೋತ್ತುಂ, ಉಸ್ಸಹತಿ ಭೋತ್ತುಂ, ಅರಹತಿ ಭೋತ್ತುಂ, ಅತ್ಥಿ ಭೋತ್ತುಂ, ವಿಜ್ಜತಿ ಭೋತ್ತುಂ, ವಟ್ಟ ತಿಭೋತ್ತುಂ, ಕಪ್ಪತಿ ಭೋತ್ತುನ್ತಿ. ತಥಾ ಪಾರಯತಿ ಭೋತ್ತುಂ, ಪಹು ಭೋತ್ತುಂ, ಸಮತ್ಥೋ ಭೋತ್ತುಂ, ಪರಿಯತ್ತೋ ಭೋತ್ತುಂ, ಅಲಂ ಭೋತ್ತುನ್ತಿ ಭವತಿಸ್ಸ ಸಬ್ಬತ್ಥ ಸಮ್ಭವಾ. ತಥಾ ಕಾಲೋ ಭೋತ್ತುಂ. ಸಮಯೋ ಭೋತುಂ, ವೇಲಾ ಭೋತುನ್ತಿ, ಯಥಾ ಭೋತ್ತುಂಮನೋ, ಸೋತ್ತುಂ ಸೋತೋ, ದಟ್ಠುಂ ಚಕ್ಖು, ಯುಜ್ಝಿತುಂ ಧನು, ವತ್ತುಂ ಜಳೋ, ಗನ್ತುಮನೋ, ಕತ್ತುಮಲಸೋತಿ, ಉಚ್ಚಾರಣನ್ತು ವತ್ತಾಯತ್ತಂ. ಭಾವೇತಿ ಕಿಂ? ಕರಿಸ್ಸಾಮೀತಿ ಗಚ್ಛತಿ, ಕ್ರಿಯಾಯನ್ತಿ ಕಿಂ? ಭಿಕ್ಖಿಸ್ಸಂ ಇಚ್ಚಸ್ಸ ಜಟಾ, ತದತ್ಥಾಯನ್ತಿ ಕಿಂ? ಗಚ್ಛಿಸ್ಸತೋ ತೇ ಭವಿಸ್ಸತಿ ಭತ್ತಂ ಭೋಜನಾಯ.

೬೨. ಪಟಿಸೇಧೇ-ಲಂಖಲೂನಂ ತುನ ತ್ವಾನ ತ್ವಾ ವಾ.

ಅಲಂ ಖಲುಸದ್ದಾನಂ ಪಟಿಸೇಧತ್ಥಾನಂ ಪಯೋಗೇ ತುನಾದಯೋ ವಾ ಹೋನ್ತಿ ಭಾವೇ. ಅಲಂ ಸೋತುನ, ಖಲು ಸೋತುನ, ಅಲಂ ಸುತ್ವಾನ, ಧಲು ಸುತ್ವಾನ, ಅಲಂ ಸುತ್ವಾ, ಖಲು ಸುತ್ವಾ, ಅಲಂ ಸುತೇನ, ಖಲು ಸೋತೇನ, ಅಲಂ ಖಲೂನನ್ತಿ ಕಿಂ? ಮಾ ಹೋತು, ಪಟಿಸೇಧೇತಿ ಕಿಂ? ಅಲಙ್ಕಾರೋ.

೬೩. ಪುಬ್ಬೇಕಕತ್ಥುಕಾನಂ.

ಏಕೋ ಕತ್ತಾ ಯೇಸಂ ಬ್ಯಾಪಾರಾನಂ, ತೇಸು ಯೋ ಪುಬ್ಬೋ, ತದತ್ಥತೋ ಕ್ರಿಯತ್ಥಾ ತುನಾದಯೋ ಹೋನ್ತಿ ಭಾವೇ, ಸೋತುನ ಯಾತಿ, ಸುತ್ವಾನ, ಸುತ್ವಾ ವಾ, ಏಕಕತ್ತುಕಾನನ್ತಿಕಿಂ? ಭುತ್ತಸ್ಮಿಂ ದೇವದತ್ತೇ ಯಞ್ಞದತ್ತೋ ವಜತಿ, ಪುಬ್ಬಾತಿ ಕಿಂ? ಭುಞ್ಜಭಿ ಚ ಪಚತಿ ಚ. ‘ಅಪ್ಪತ್ವಾ ನದಿಂ ಪಬ್ಬತೋ ಅತಿಕ್ಕಮ್ಮ ಪಬ್ಬತಂ ನದೀ’ತಿ ಭೂಧಾತುಸ್ಸ ಸಬ್ಬತ್ಥ ಸಮ್ಭವಾ ಏಕಕತ್ತುಕತಾ ಪುಬ್ಬಕಾಲತಾ ಚ ಗಮ್ಯತೇ. ‘ಭುತ್ವಾ ಭುತ್ವಾ ಗಚ್ಛತೀತಿ’ ಇಮಿನಾವ ಸಿದ್ಧಂ ಆಭಿಕ್ಖಞ್ಞನ್ತು ದ್ವಿಬ್ಬಚನಾವಗಮ್ಯತೇ. ಕಥಂ ‘ಜೀವಗ್ಗಾಹಂ ಅಗಾಹಯಿ, ಕಾಯಪ್ಪಚಾಲಕಂ ಗಚ್ಛನ್ತೀ’ತಿ ಆದಿ? ಘಣನ್ತೇನ ಕ್ರಿಯಾವಿಸೇಸನೇನ ಸಿದ್ಧಂ ಯಥಾ ‘ಓದನಪಾಕಂ ಸಯತೀ’ತಿ.

೬೪. ನ್ತೋ ಕತ್ಥರಿ ವತ್ತಮಾನೇ.

ವತ್ತಮಾನತ್ಥೇ ವತ್ತಮಾನತೋ ಕ್ರಿಯತ್ತಾ ನ್ತೋ ಹೋ ತಿ ಕತ್ತರಿ, ತಿಟ್ಠನ್ತೋ.

೬೫. ಮಾನೋ.

ವತ್ತಮಾನತ್ಥೇ ವತ್ತಮಾನತೋ ಕ್ರಿಯತ್ಥಾ ಮಾನೋ ಹೋತಿ, ಕತ್ತರಿ. ತಿಟ್ಠಮಾನೋ.

೬೬. ಭಾವಕಮ್ಮೇಸು.

ವತ್ತಮಾನತ್ಥೇ ವತ್ತಮಾನತೋ ಕ್ರಿಂಯತ್ಥಾ ಭಾವೇ ಕಮ್ಮೇಚ ಮಾನೋ ಹೋತಿ. ಠೀಯಮಾನಂ, ಪಚ್ಚಮಾನೋ ಓದನೋ.

೬೭. ತೇ ಸ್ಸಪುಬ್ಬಾನಾಗತೇ.

ಅನಾಗತತ್ಥೇ ವತ್ತಮಾನತೋ ಕ್ರಿಯತ್ಥಾ ತೇನ್ತಮಾನಾ ಸ್ಸಪುಬ್ಬಾ ಹೋನ್ತಿ. ಠಸ್ಸನ್ತೋ, ಠಸ್ಸಮಾನೋ, ಠೀಯಿಸ್ಸಮಾನಂ, ಪಚ್ಚಿಸ್ಸಮಾನೋ ಓದನೋ.

೬೮. ಣ್ವಾದಯೋ.

ಕ್ರಿಯತ್ಥಾ ಪರೇ ಬಹುಲಂ ಣ್ವಾದಯೋ ಹೋನ್ತಿ. ಚಾರು, ದಾರು.

೬೯. ಖಛಸಾನ ಮೇಕಸ್ಸರೋದಿ ದ್ವೇ.

ಖಛಸಪ್ಪಚ್ಚಯನ್ತಾನಂ ಕ್ರಿಯತ್ಥಾನಂ ಪಠಮೇಕಸ್ಸರಂ ಸದ್ದರೂಪಂ ದ್ವೇ ಭವತಿ. ತಿತಿಕ್ಖಾ, ಜಿಗುಚ್ಛಾ, ವೀಮಂಸಾ.

೭೦. ಪರೋಕ್ಖಾಯಞ್ಚ.

ಪರೋಕ್ಖಾಯಂ ಪಠಮೇಕಸ್ಸರಂ ಸದ್ದರೂಪಂ ದ್ವೇ ಭವತಿ. ಜಗಾಮ, ಚಕಾರೋ ಅನುತ್ತಸಮುಚ್ಚಯತ್ಥೋ, ತೇನಞ್ಞತ್ರಾಪಿ ಯಥಾಗಮಂ, ಜಹಾತಿ, ಜಹಿತಬ್ಬಂ, ಜಹಿತುಂ, ದದ್ದಲ್ಲತಿ, ಚಙ್ಕಮತಿ. ‘ಲೋಲುಪೋ, ಮೋಮೂಹೋತಿ ಓತ್ತಂ ತದಮಿನಾದಿಪಾಠಾ.

೭೧. ಆದಿಸ್ಮಾ ಸರಾ.

ಆದಿಭೂತಾ ಸರಾ ಪರಮೇಕಸ್ಸರಂ ದ್ವೇ ಹೋತಿ, ಅಸಿಸಿಸತಿ, ಆದಿಸ್ಮಾತಿ ಕಿಂ? ಜಜಗಾರ, ಸರಾತಿ ಕಿಂ? ಪಪಾಚ.

೭೨. ನ ಪುನ.

ಯಂ ದ್ವಿಭೂತಂ, ನ ತಂ ಪುನ ದ್ವಿತ್ತಮಾಪಜ್ಜತೇ, ತಿತಿಕ್ಖಿಸತಿ, ಜಿಗುಚ್ಛಿಸತಿ.

೭೩. ಯಥಿಟ್ಠಂ ಸ್ಯಾದಿನೋ.

ಸ್ಯಾದ್ಯನ್ತಸ್ಸ ಯಥಿಟ್ಠಮೇಕಸ್ಸರಮಾದಿಭೂತಮಞ್ಞಂ ವಾ ಯಥಾಗಮಂ ದ್ವಿತ್ತಪಜ್ಜತೇ, ಪುಪುತ್ತೀಯಿಸತಿ, ಪುತಿತ್ತೀಯಿಸತಿ, ಪುತ್ತೀಯಿಯಿಸತಿ.

೭೪. ರಸ್ಸೋ ಪುಬ್ಬಸ್ಸ.

ದ್ವಿತ್ತೇ ಪುಬ್ಬಸ್ಸ ಸರೋ ರಸ್ಸೋ ಹೋತಿ. ದದಾತಿ.

೭೫. ಲೋಪೋ-ನಾದಿಬ್ಯಞ್ಜನಸ್ಸ.

ದ್ವಿತ್ತೇ ಪುಬ್ಬಸ್ಸಾದಿತೋ-ಞ್ಞಸ್ಸ ಬ್ಯಞ್ಜನಸ್ಸ ಲೋಪೋ ಹೋತಿ. ಅಸಿಸಿಸತಿ.