ಪಞ್ಚಪಞ್ಞಾಸತಿಮ ಪರಿಚ್ಛೇದ

ರೋಹಣಾರಾತಿ ವಿಜಯೋನಾಮ

೧. ಲೋಕನಾಮೋ ಚಮೂನಾಥೋ, ಮಕ್ಖಕುದ್ರೂಸವಾಸಿಕೋ;

ಸಚ್ಚಪಟಿಞ್ಞೋ ಧೀತಿಮಾ, ಚೋಳದಪ್ಪವಿಘಾತನೋ.

೨. ಅಭಿಭೂಯ ಜನೇ ಪತ್ವಾ, ರಜ್ಜಂ ರೋಹಣಮಣ್ಡಲೇ;

ವಸೀ ಕಾಜರಗಾಮಮ್ಹಿ, ಚಾರಿತ್ತವಿಧಿಕೋವಿದೋ.

೩. ಅಹು ತದಾ ಕಿತ್ತಿನಾಮೋ, ರಾಜಪುತ್ತೋ ಮಹಬ್ಬಲೋ;

ತಸ್ಸ ವಂಸಾದಿಸಮ್ಪತ್ತೀ, ನುಪುಬ್ಬೇನ ಪವುಚ್ಚತೇ.

೪. ಸುತೋ ಕಸ್ಸಪಭೂಪಸ್ಸ, ಮಾಣನಾಮೇನ ವಿಸ್ಸುತೋ;

ಆದಿಪಾದೋ ಅಹು ಧೀರೋ, ಸದಾಚಾರವಿಭೂಸಿತೋ.

೫. ತಸ್ಸಾ’ಥ ಜೇಟ್ಠಕೋ ಭಾತಾ, ಮಾಣವಮ್ಮೋ ಮಹಾಮತಿ;

ಗೋಕಣ್ಣಕಸಮೀಪಟ್ಠ-ನದೀತೀರೇ ನಿಸೀದಿಯ.

೬. ಕತಮನ್ತುಪಚಾರೋ ಸೋ, ಯಥಾವಿಧಿಮಸೇಸತೋ;

ಅಕ್ಖಮಾಲಂ ಗಹೇತ್ವಾನ, ಮನ್ತಂ ಜಪ್ಪಿತುಮಾರಭಿ.

೭. ಕುಮಾರೋ ಕಿರ ಭತ್ತಗ್ಗೇ, ಪಾತುರಾಸಿ ಸವಾಹನೋ;

ಸಿಖಣ್ಡಿ ಮುಖತುಣ್ಡೇನ, ಬಲಿಪಟ್ಟಂ ವಿಖಣ್ಡಿಯ.

೮. ಸಚ್ಛಿದ್ದಕೇ ನಾಳಿಕೇರ-ಕಪಾಲೇ ವಿಚ್ಚುನೋದಕೇ;

ಲೂಖೇ ಜಲಮಪಸ್ಸನ್ತೋ, ಜಪನ್ತಸ್ಸ ಮುಖಂಗತೋ.

೯. ತತೋ ಭಾವಿನಿಂ ಸಿದ್ಧಿ, ಮಪೇಕ್ಖಂ ನಯನಂ ಸಕಂ;

ತಸ್ಸೋಪನೇಸಿ, ನಿಬ್ಭಿಜ್ಜ, ಸೋಪಿ ತಂ ಸಹಸಾಪಿಚಿ.

೧೦. ಕುಮಾರೋ ತಸ್ಸ ಸನ್ತುಟ್ಠೋ, ಕುಮಾರಸ್ಸಾಭಿಪತ್ಥಿತಂ;

ವರಂ ಪದಾಯ ನಭಸಾ, ರಾಜಮಾನೋ ಗತೋ ತತೋ.

೧೧. ಭಿನ್ನೇಕನಯನಂ ದಿಸ್ವಾ, ಸಚಿವಾತಂ ಪರೋ ದಿಸುಂ;

ವರಲಾಭಂ ಪಕಾಸೇತ್ವಾ, ಸಮಸ್ಸಾಸೇಸಿ ಸೋ ಜನೇ.

೧೨. ತತೋ ಸೋ ಸಚಿವಾತಸ್ಸ, ಸನ್ತುಟ್ಠಾರಾಧಯಿಂಸು ತಂ;

ಅನುರಾಧಪುರಂ ಪತ್ವಾ, ಭಿಸೇಕೋ ಕಾರಿಯೋ ಇತಿ.

೧೩. ಅತ್ಥೋ ಕೋ ಮಮರಜ್ಜೇನ, ವಿಕಲಙ್ಗಸ್ಸ ಸಮ್ಪತಿ;

ತಪೋಕಮ್ಮಂ ಕರಿಸ್ಸಾಮಿ, ಪಬ್ಬಜ್ಜಮುಪಗಮ್ಮಹಂ.

೧೪. ಕಣಿಟ್ಠೋ ಮಾಣನಾಮೋ ಚ, ಲಙ್ಕಾರಜ್ಜಂ ಕಮಾಗತಂ;

ಪಾಲೇತು ಇತಿ ಸೋ ರಜ್ಜಂ, ಸಮ್ಪತ್ತಂ ಸಮ್ಪಟಿಕ್ಖಿಪಿ.

೧೫. ವಿಞ್ಞಾತಚಿತ್ತಸಞ್ಚಾರಾ, ಸಚಿವಾ ತಸ್ಸ ಸಬ್ಬಥಾ;

ವತ್ತುಮೇತಂ ಕಣಿಟ್ಠಸ್ಸ, ಪೇಸೇಸುಂ ಪುರಿಸೇ ತದಾ.

೧೬. ಸುತ್ವಾ ತಂ ಸೀಘಮಾಗಮ್ಮ, ಪಸ್ಸಿತ್ವಾ ಸಕಭಾತರಂ;

ಪತಿತ್ವಾ ಪಾದಮೂಲಮ್ಹಿ, ಬಹುಂ ಕನ್ದಿಯ ರೋದಿಯ.

೧೭. ಜೇಟ್ಠೇನ ಭಾತರಾ ಸದ್ಧಿ-ಮನುರಾಧಪುರಂ ಗತೋ;

ಮಕುಟಂ ತತ್ಥ ಧಾರೇಸಿ, ಜೇಟ್ಠಚಿತ್ತಾನುವತ್ತಕೋ.

೧೮. ತತೋ’ಭಯಗಿರಿಂ ಗನ್ತ್ವಾ, ಪಬ್ಬಜ್ಜಂ ಸಕಭಾತುನೋ;

ಯತ ಯೋ ತತ್ಥ ಯಾಚಿತ್ಥ, ಬಹುಮಾನಪುರಸ್ಸರಂ.

೧೯. ತತೋ ತೇ ಯತಯೋ ತಸ್ಸ, ಪಬ್ಬಜ್ಜಮುಪಸಮ್ಪದಂ;

ಅಕಂಸು ವಿಕಲಙ್ಗಸ್ಸ, ಸಿಕ್ಖಾಪದನಿರಾದರಾ.

೨೦. ಪರಿವೇಣಮುತ್ತರೋಳ-ಮುಳಾರಂ ತಸ್ಸ ಕಾರಿಯ;

ಕತ್ವಾ ತಂ ಪರಿವೇಣಸ್ಸ, ಸಾಮಿಕಂ ಧರಣೀ ಪತಿ.

೨೧. ಭಿಕ್ಖೂನಂ ಛಸತಂ ತತ್ಥ, ವಿಧಾಯ ತದಧೀನಕಂ;

ಪರಿಹಾರೇ ಅದಾ ತಸ್ಸ, ಪೇಸ್ಸವಗ್ಗೇ ಚ ಪಞ್ಚ ಸೋ.

೨೨. ಸಮಪ್ಪೇಸಿ ಚ ಸೋ ನಾನಾ-ಸಿಪ್ಪಕಮ್ಮವಿಚಕ್ಖಣೇ;

ಜನೇ ಚಾಕಾ ತದಾಯತ್ತೇ, ಸೋ ದಾಠಾಧಾತುರಕ್ಖಿಯೇ.

೨೩. ತಸ್ಸೇವಾದಕರಾ’ಹೇಸುಂ, ಭಿಕ್ಖೂ’ಭಯಗಿರಿಮ್ಹಿ ತೇ;

ರಾಜಾ ಚ ಲೋಕಂ ಪಾಲೇಸಿ, ಸಮ್ಮಾ ತಸ್ಸಾನುಸಿಟ್ಠಿಯಾ.

೨೪. ಜನಾ ತಬ್ಬಂಸಜಾ ಕೇಚಿ, ತಂ ರಜ್ಜನಿರಪೇಕ್ಖಕಾ;

ನಿವಸಿಂಸು ಯಥಾಕಾಮಂ, ಮಹಾಸಾಮಿ ಪದಂಸಿತಾ.

೨೫. ಏತಸ್ಸ ಮಾಣವಮ್ಮಸ್ಸ, ರಞ್ಞೋ ಧಮ್ಮನಯಞ್ಞುನೋ;

ಅಗ್ಗಬೋಧಿಕುಮಾರಾದಿ-ಪುತ್ತನತ್ತುಕ್ಕಮಾಗತೇ.

೨೬. ವಂಸೇ ವಿಸುದ್ಧೇ ಜಾತಸ್ಸ, ಭೂಪಾಲನ್ವಯಮುದ್ಧನಿ;

ಸಮಾಸೋಳಸಕಙ್ಕಾಯಂ, ಸಮ್ಮಾ ರಜ್ಜಾನುಸಾಸಿನೋ.

೨೭. ಮಹೀಪಸ್ಸ ಮಹಿನ್ದಸ್ಸ, ದುವೇ ಮಾಕುಲಧೀತರೋ;

ದೇವಲಾ ಲೋಕಿಕಾ ಚಾತಿ, ನಾಮತೋ ವಿಸ್ಸುತಾ ಸುಭಾ.

೨೮. ಏತಾಸು ದ್ವೀಸು ಧೀತಾಸು, ಲೋಕಿಕಾ ಮಾತುಲತ್ತಜಂ;

ಪಟಿಚ್ಚ ರಾಜತನಯಂ, ಸುಭಂ ಕಸ್ಸಪನಾಮಕಂ.

೨೯. ಸಾ ಮೋಗ್ಗಲ್ಲಾನ ಲೋಕವ್ಹೇ, ಪುತ್ತೇ ದ್ವೇ ಲಭಿ ಸೋಭನೇ;

ತೇಸು ಜೇಟ್ಠಸುತೋ ಲೋಕ-ಸಾಸನಾಧಾರಕೋವಿದೋ.

೩೦. ಮಹಾಸಾಮೀತಿ ಪಞ್ಞಾತೋ, ಸಙ್ಘುಪಾಸನಪಾಲಯೋ;

ನೇಕಸಾರಗುಣಾವಾಸೋ, ವಾಸಂ ಕಪ್ಪೇಸಿ ರೋಹಣೇ.

೩೧. ದಾಠೋಪತಿಸ್ಸ ರಾಜಸ್ಸ, ನತ್ತಾ ಸುಗತಸಾಸನೇ;

ಪಬ್ಬಜ್ಜೂಪಗತೋ ಸದ್ಧೋ, ಧುತವಾ ಸೀಲಸಂವುತೋ.

೩೨. ಪಹಿತತ್ತೋ ವಿಚಿತ್ತೋಸೋ, ಪನ್ತಸೇನಾಸನೇ ವಸೀ;

ಗುಣಂ ಸಬ್ಬತ್ಥ ವಣ್ಣೇಸುಂ, ತಸ್ಮಿಂ ದೇವಾ ಪಸೀದಿಯ.

೩೩. ಗುಣಂ ಸುಣಿತ್ವಾ ಲಂಕಿನ್ದೋ, ತದಾ ಸಬ್ಬತ್ಥ ಪತ್ಥಟಂ;

ಉಪಸಙ್ಕಮ್ಮ ತಂ ನತ್ವಾ, ಕಾತುಮತ್ತಾನುಸಾಸನಂ.

೩೪. ಆರಾಧಯಮನಿಚ್ಛನ್ತಂ, ಯಾಚಿತ್ವಾನ ಪುನಪ್ಪುನಂ;

ಆನೀಯ ವಾಸಯಿತ್ವಾ ತಂ, ಪಾಸಾದೇ ಸಾಧುಕಾರಿತೇ.

೩೫. ಯತಿಸ್ಸರಸ್ಸ ವಸತೋ, ಕತ್ಥ ರಾಜಾಗುಣಪ್ಪಿಯೋ;

ತಸ್ಸಾನುಸಿಟ್ಠಿಮಗ್ಗಟ್ಠೋ, ಲೋಕಂ ಧಮ್ಮೇನ ಪಾಲಯಿ.

೩೬. ಉದ್ದಿಸ್ಸಾರಾಧನಂ ಸಮ್ಮಾ, ಲಂಕಿನ್ದೇನ ಕತಂ ತದಾ;

ಸೇಲನ್ತರಾಭಿನಿಕ್ಖಮ್ಮ, ಯತಿನ್ದೋ ಸೋ ದಯಾನುಗೋ.

೩೭. ಯತೋ ಭಿಕ್ಖೂ ಸಮೂಹೇತ್ವಾ, ವಾಸಂ ಕಪ್ಪೇಸಿ ಯತ್ಥ ಸೋ;

ಸೇಲನ್ತರಸಮೂಹೋ’ತಿ, ವಿಕ್ಖ್ಯಾತಿಂ ಸೋ ತತೋ ಗತೋ.

೩೮. ತತೋ ಪಟ್ಠಾಯ ವಾಸೇತ್ವಾ, ರತ್ತಿಯಂ ದೇವಪಲ್ಲಿಯಂ;

ದೇವತಾನುಮತಂ ಭಿಕ್ಖುಂ, ಮೂಲಠಾನೇ ಠಪೇನ್ತಿ ಹಿ.

೩೯. ಮೂಲತ್ತಮಾವಸನ್ತಾನಂ, ಯತೀನಮನುಸಾಸನಾ;

ಲಂಕಿಸ್ಸರಾ ಪವತ್ತನ್ತಿ, ಪಾಲೇನ್ತಾ ಲೋಕಸಾಸನಂ.

೪೦. ತಸ್ಸ ದಾಠೋಪತಿಸ್ಸಸ್ಸ, ವಂಸಜಂ ರಾಜಪುತ್ತಕಂ;

ಬೋಧಿಂ ಪಟಿಚ್ಚ ತಬ್ಬಂಸಾ, ಬುದ್ಧನಾಮಾ ಕುಮಾರಿಕಾ.

೪೧. ಅಲತ್ಥ ಲೋಕಿತಂ ನಾಮ, ಧೀತರಂ ವರಲಕ್ಖಣಂ;

ಕಾಲೇನ ಸಾ ಪದಿನ್ನಾ’ಸಿ, ಮೋಗ್ಗಲ್ಲಾನಸ್ಸ ಧೀಮತೋ.

೪೨. ಸಾ ತಂ ಪಟಿಚ್ಚ ಕಿತ್ತಿಞ್ಚ, ಮಿತ್ತಂ ನಾಮ ಕುಮಾರಿಕಂ;

ಮಹಿನ್ದಂ ರಕ್ಖಿತಂ ಚಾಪಿ, ಲತಿತ್ಥ ಚತುರೋ ಪಜಾ.

೪೩. ಅಹು ಜೇಟ್ಠಸುತೋ ಧೀರೋ, ವೀರೋ ತೇರಸವಸ್ಸಿಕೋ;

ಕತಹತ್ಥೋ ವಿಸೇಸೇನ, ಧನುಸಿಪ್ಪಮ್ಹಿ ಸೋ ತತೋ.

೪೪. ಕಥಂ ಲಙ್ಕಂ ಗಹೇಸ್ಸಾಮಿ, ದೂರೇತ್ವಾ’ರಾತಿ ಕಣ್ಟಕಂ;

ಇತಿ ಚಿನ್ತಾಪರೋಗಾಮೇ, ಮೂಲಸಾಲವ್ಹಯೇ ವಸೀ.

೪೫. ಏಕೋ ಮಹಾಬಲೋ ವೀರೋ, ಬುದ್ಧರಾಜೋತಿ ವಿಸ್ಸುತೋ;

ವಿಲೋಮವತ್ತೀ ಹುತ್ವಾನ, ಲೋಕಸೇನಾನಿನೋ ತದಾ.

೪೬. ಪಲಾತೋ ಚುಣ್ಣಸಾಲವ್ಹಂ, ಖಿಪ್ಪಂ ಜನಪದಂ ತಹಿಂ;

ಕಿತ್ತಾದಿಕೇ ಜನೇ ನೇಕೇ, ವಸೇ ವತ್ತಿಯ ಸಬ್ಬಥಾ.

೪೭. ಸದ್ಧಿಂ ಬನ್ಧೂಹಿ ಸಙ್ಗಾಮ-ಸೂರೇಹಿ ಬಹುಕೇಹಿ ಸೋ;

ಮಲಯಾಚಲಪಾದೇಸು, ವಸೀ ದುಪ್ಪಸಹೋ ತದಾ.

೪೮. ತಸ್ಸ’ನ್ತಿಕಮುಪಾಗಮ್ಮ, ಸಂವಚ್ಛರಿಕನಾಯಕೋ;

ಸಙ್ಘೋ ನಾಮ ಕುಮಾರಸ್ಸ, ಸರೂಪಂ ಸಾಧುವಂ ಬ್ರವಿ.

೪೯. ಮಹಾಸಾಮಿಸ್ಸ ತನಯೋ, ಜೇಟ್ಠೋ ಕಿತ್ತಿ ಸನಾಮಕೋ;

ಧಞ್ಞಲಕ್ಖಣಸಮ್ಪನ್ನೋ, ಸಮ್ಪನ್ನಮತಿವಿಕ್ಕಮೋ.

೫೦. ಜಮ್ಬುದೀಪೇಪಿ ತಂ ರಜ್ಜಂ, ಕತ್ತುಮೇಕಾತಪತ್ತಕಂ;

ಸಮತ್ಥೋತಿ ವಿಚಿನ್ತೇಪಿ, ಲಙ್ಕಾದೀಪಮ್ಹಿ ಕಾ ಕಥಾ.

೫೧. ತಸ್ಸ ಸೋ ವಚನಂ ಸುತ್ವಾ, ಸೇವಿತಬ್ಬೋ ಕುಮಾರಕೋ;

ಇತಿ ನಿಚ್ಛಿಯ ಪೇಸೇಸಿ, ಕುಮಾರಸ್ಸ’ನ್ತಿಕಂ ಜನೇ.

೫೨. ಸುಣಿತ್ವಾ ಸೋ ವಚೋ ತೇಸಂ, ನಿವತ್ತನಭಯಾ ವಿಭೂ;

ಅಜಾನಹಂ ಪಿತುನ್ನಂ ಸೋ, ವೀರೋ ಧನುಸಹಾಯಕೋ.

೫೩. ಗೇಹಾ ನಿಕ್ಖಮ್ಮ ಪಸ್ಸನ್ತೋ, ಸುನಿಮಿತ್ತಾನಿನೇಕಧಾ;

ಅಗಾಲಹುಂ ಸರೀವಗ್ಗ-ಪಿಟ್ಠಿಗಾಮಂ ಮಹಾಮತಿ.

೫೪. ತಹಿಂ ಸೋ ನಿವಸಂ ವೀರೋ, ಪೇಸಯಿತ್ವಾ ಸಸೇವಕೇ;

ವಿಪಕ್ಖಾಧಿಟ್ಠಿತಂ ಜೇಸಿ, ಬೋಧಿವಾಲವ್ಹಗಾಮಕಂ.

೫೫. ತತೋ’ಭಿಮಾನೀ ಸೇನಾನೀ, ಸೇನಂ ಸೋ ತತ್ಥ ಪೇಸಯಿ;

ಸಾ ಪರಿಕ್ಖಿಪತಂ ಗಾಮಂ, ಸಙ್ಗಾಮಾಯ ಸಮಾರಭೀ.

೫೬. ಕುಮಾರೋ ತೇಹಿ ಯುಜ್ಝನ್ತೋ, ಸುಭಟೋ ಪಟುವಿಕ್ಕಮೋ;

ದಿಸಾಸು ವಿಕಿರೀಸಬ್ಬೇ, ತುಲಂ ಚಣ್ಡೋವ ಮಾಳುತೋ.

೫೭. ಚುಣ್ಣಸಾಲಂ ಜನಪದಂ, ಗನ್ತ್ವಾ ಠಾನವಿದೂ ತದಾ;

ತಹಿಂ ವಸಂ ವಸೇಕಾಸಿ, ಸಬ್ಬಂ ಮಲಯಮಣ್ಡಲಂ.

೫೮. ತದಾಪಿ ಸೇನಂ ಸೇನಿನ್ದೋ, ಪೇಸೇತ್ವಾ ಅಸಕಿಂ ಸಕಂ;

ಅಭಿಭೂತಿಮಸಕ್ಕೋನ್ತೋ, ಕಾತುಂ ದುಮ್ಮನತಂ ಗತೋ.

೫೯. ಮಕ್ಖಕುದ್ರುಸವಾಸಿಸ್ಸ, ಸಚಿಪಸ್ಸಾಥ ಕಿತ್ತಿನೋ;

ಸುತೋ ಮಹಬ್ಬಲೋ ದೇವ-ಮಲ್ಲೋತಿ ವಿದಿತೋ ತದಾ.

೬೦. ಸಹಿತೋ ಬನ್ಧುಮಿತ್ತೇಹಿ, ಬಹೂ ರೋಹಣವಾಸಿನೋ;

ಸಮಾದಾಯಾ’ಭಿಗನ್ತ್ವಾನ, ಕುಮಾರಂ ಪಸ್ಸಿ ಸಾದರೋ.

೬೧. ಬನ್ಧಿಯ ಛುರಿಕಂ ಛೇಕೋ, ಸೋ ಪನ್ನರಸವಸ್ಸಿಕೋ;

ಆದಿಪಾದಪದಂ ತತ್ಥ, ಸಮ್ಪಾಪುಣಿ ಮಹಾಯಸೋ.

೬೨. ತತೋ ಹಿರಞ್ಞಮಲಯ, ಮುಪಾಗಮ್ಮ ಮಹಬ್ಬಲೋ;

ತಹಿಂ ರೇಮುಣಸೇಲಮ್ಹಿ, ಖನ್ಧಾವಾರಂ ನಿಬನ್ಧಯಿ.

೬೩. ತತ್ಥಾಪಿ ಸೇನಂ ಪೇಸೇತ್ವಾ, ಸಙ್ಗಾಮೇನ್ತೋ ಚಮೂಪತಿ;

ಅಲದ್ಧವಿಜಯೋ ಛನ್ದಂ, ಪುನಯುದ್ಧೇ ಜಹಿತತೋ.

೬೪. ಲೋಕನಾಮೋ ಚಮೂನಾಥೋ, ಲೋಕಂ ಹಿತ್ವಾ ಸಕಂ ತದಾ;

ಅಹು ವಸ್ಸಮ್ಹಿ ಛಟ್ಠೇಸೋ, ಪರಲೋಕಪರಾಯನೋ.

೬೫. ತದಾ ಕಸ್ಸಪನಾಮೇಕೋ, ಕೇಸಧಾತುಕನಾಯಕೋ;

ಜನೇ’ಭಿಭೂಯವತ್ತೇಸಿ, ನೀಜಾಣಂ ರೋಹಣೇ ತದಾ.

೬೬. ಸುತ್ವಾ ತಂ ಚೋಳಸಾಮನ್ತೋ, ಪುಳತ್ಥಿನಗರಾ ತದಾ;

ನಿಕ್ಖಮ್ಮ ಯುದ್ಧಸನದ್ಧೋ, ಗನ್ತ್ವಾ ಕಾಜರಗಾಮಕಂ.

೬೭. ಕೇಸಾಧಾತು ತತೋ ಯುದ್ಧೇ, ಭಿನ್ದಿತ್ವಾ ದಮಿಳಂ ಬಲಂ;

ರಕ್ಖಪಾಸಾಣಸೀಮಾಯಂ, ಠಪೇತ್ವಾ ರಕ್ಖಿಯೇ ಜನೇ.

೬೮. ಪಟಿಲದ್ಧಜಯುದ್ದಾಮೋ, ಮಹಾಸೇನಾ ಪುರಕ್ಖತೋ;

ಪುನರಾಗಮ್ಮ ಪಾವೇಕ್ಖಿ, ವೀರೋ ಕಾಜರಗಾಮಕಂ.

೬೯. ತದಾದಿಪಾದೋ ಸುತ್ವಾನ, ಸಬ್ಬಂ ಸುತ್ಥೀರಧಾತುಕೋ;

ಕೇಸಧಾತುಂ ನಿಘಾತೇತುಂ, ಬಲಂ ಸನ್ನಯ್ಹಿ ವೇಗಸಾ.

೭೦. ಪವತ್ತಿಂ ತಂ ಸುಣಿತ್ವಾ ಸೋ, ಸಾಭಿಮಾನೋ ಭುಸಂತತೋ;

ಸಮತ್ತಂ ಬಲಮಾದಾಯ, ಸಿಪ್ಪತ್ಥಲಕಮಾಗಮಾ.

೭೧. ಪಞ್ಚಯೋಜನರಟ್ಠಾದಿ-ವಾಸಿಕೇಸು ಬಹೂಜನೇ;

ಸಮಾದಾಯ ಸಮಾಸನ್ನೇ, ರಾಜಪುತ್ತೇ ಸುದುಜ್ಜಯೇ.

೭೨. ವಿರತ್ತತಞ್ಚ ಸೋ ಞತ್ವಾ, ಬಹುನ್ನಂ ರಟ್ಠವಾಸಿನಂ;

ದುಕ್ಕರಂ ಏತ್ಥ ಯುದ್ಧನ್ತಿ, ಗತೋ ಸೋ ಖದಿರಙ್ಗಣಿಂ.

೭೩. ಮಹಾಸೇನಾಯ ಭೂಪಾಲ ಸುತೋ ಸೋಳಸವಸ್ಸೀಕೋ;

ಖಿಪ್ಪಂ ವಾಪೇಕ್ಖಿ ಸೋ ವೀತ-ದರೋ ಕಾಜರಗಾಮಕಂ.

೭೪. ಛಮ್ಮಾಸಮನುಭೋತ್ವಾನ, ರೋಹಣಂ ರುಟ್ಠಮಾನಸೋ;

ಕೇಸಧಾತುಕನಾಥೋಪಿ, ಸಙ್ಗಾಮತ್ಥಾಯ ತತ್ಥಗಾ.