ಛಪಞ್ಞಾಸತಿಮ ಪರಿಚ್ಛೇದ

ಅನುರಾಧಪುರಾಭಿಗಮನೋ

೧. ಯುವರಾಜಪದೇ ತಸ್ಸ, ಠಿತಸ್ಸಾ’ಥ ನಯಞ್ಞುನೋ;

ಅಹೂ ವಿಜಯಬಾಹೂತಿ, ನಾಮಂ ಸಬ್ಬತ್ಥ ಪಾಕಟಂ.

೨. ಮಹಾಞ್ಞಣೋ ನಿಜಾಣಾಯ, ತತ್ಥ ಭೇರಿಂ ಚರಾವಿಯ;

ಠಪೇನ್ತೋ ಸಚಿವೇ’ನೇಕೇ, ಪತಿರೂಪೇ ಪದನ್ತರೇ.

೩. ಚೋಳಾನಂ ಮದ್ದನತ್ಥಾಯ, ರಾಜರಟ್ಠಾಧಿವಾಸಿನಂ;

ಚತುರೋ ಚತುರೋಪಾಯೇ, ಯೋ ಜಯಂ ತತ್ಥ ಸೋ ವಸೀ.

೪. ಚೋಳರಾಜಾ ಸುಣಿತ್ವಾ ತಂ, ಪುಳತ್ಥಿನಗರೇ ಠಿತಂ;

ಸೇನಾಪತಿಮ ಪೇಸೇಸಿ, ದತ್ವಾನ ಬಲವಾಹನಂ.

೫. ಸೇನಿನ್ದಂ ಕಾಜರಗ್ಗಾಮ-ಸಮೀಪಂ ಸಮುಪಾಗತಂ;

ದುಪ್ಪಸಯ್ಹಂ ವಿದಿತ್ವಾನ, ಗಿರಿದುಗ್ಗಮಗಾ ತತೋ.

೬. ಸೇನಿನ್ದೋ ಕಾಜರಗ್ಗಾಮಂ, ವಿಲುಮ್ಪಿತ್ವಾನ ವೇಗಸಾ;

ತತ್ಥ ವತ್ಥುಮಸಕ್ಕೋನ್ತೋ, ಸದೇಸಂ ಪುನ ರಾಗಮಿ.

೭. ತತೋ ಮಹಾದಿಪಾದೋ’ಪಿ, ಆಗಮ್ಮ ಮಲಯಾ ಲಹುಂ;

ಮಹತಾ ಬಲಕಾಯೇನ, ಸಿಪ್ಪತ್ಥಲಕಮಾವಸಿ.

೮. ರಾಜಾ ರಾಮಞ್ಞವಿಸಯೇ, ರಾಜಿನೋ ಸನ್ತಿಕಂ ಜನೇ;

ಪೇಸೇಸಿ ಬಹುಕೇಸಾರಂ, ಧನಜಾತಞ್ಚ’ನಪ್ಪಕಂ.

೯. ವಿಚಿತ್ತವತ್ಥಕಪ್ಪೂರ-ಚನ್ದನಾದೀಹಿ ವತ್ಥೂಹಿ;

ಪರಿಪುಣ್ಣಾ ಚ ನಾವಾಯೋ, ನೇಕಾತಿತ್ಥೇ ಸಮೋಸಟಾ.

೧೦. ಧನಜಾ ತೇಹಿ ನೇಕೇಹಿ, ಕರೋನ್ತೋ ಭಟಸಙ್ಗಹಂ;

ತತೋ ತಮ್ಬಲಗಾಮಮ್ಹಿ, ನಿವಸಿತ್ಥ ಮಹಬ್ಬಲೋ.

೧೧. ಅಞ್ಞಮಞ್ಞವಿರುದ್ಧತ್ತಾ, ರಾಜಾರಟ್ಠಾಧಿವಾಸಿನೋ;

ಉಪಗ್ಗಮ್ಮ ಜನಾ ಸಬ್ಬೇ, ಕರಂ ನೋ ದೇನ್ತಿ ಸಬ್ಬಸೋ.

೧೨. ವಿಪಕ್ಖಾಚೋಳರಾಜಸ್ಸ, ಭಿನ್ದನ್ತಾ’ಣಂ ಮದುದ್ಧತಾ;

ಆಯುತ್ತಕೇ ವಿಹಿಂಸೇನ್ತೋ, ಯಥಾಕಾಮಂ ಚರನ್ತಿ ಚ.

೧೩. ತಂ ಸುತ್ವಾ ಚೋಳಭೂಪಾಲೋ, ಸಮ್ಪಕೋಪವಸೀಕತೋ;

ಸೇನಂ ಮಹನ್ತಿಂ ದತ್ವಾನ, ಪೇಸೇಸಿ ಸಚಿವಂ ನಿಜಂ.

೧೪. ಮಹಾತಿತ್ಥೇ’ವಹಿಣ್ಣೋ ಸೋ, ತತ್ಥ ತತ್ಥ ಬಹೂಜನೇ;

ಘಾತೇನ್ತೋ ಸವಸೇ ಕತ್ವಾ, ರಾಜಾರಟ್ಠಾಧಿವಾಸಿನೋ.

೧೫. ಅನುಕ್ಕಮೇನ ಗನ್ತ್ವಾನ, ಖರಾಣೋ ರೋಹಣಂ ತದಾ;

ಅಜ್ಝೋತ್ಥರಿ ಸಸೇನೋ ಸ, ಭಿನ್ನೋ ವೇಲೋವಸಾಗರೋ.

೧೬. ರಞ್ಞೋ ಪಚ್ಚತ್ಥಿಕಾ ಹುತ್ವಾ, ರವಿದೇವಚಲವ್ಹಯಾ;

ಉಭೋ ದಮಿಳಸೇನಿನ್ದ-ವಸಂ ಯಾತಾ ಮಹಬ್ಬಲಾ.

೧೭. ಮಹಾಪಕ್ಖಬಲೋಪೇತೇ, ತೇ ಪಸ್ಸಿಯ ಚಮೂಪತಿ;

ರೋಹಣಂ ಸಕಲಂ ಖಿಪ್ಪಂ, ಮಞ್ಞಿತ್ಥ ಸಕಹತ್ಥಗಂ.

೧೮. ಏಕಾದಸಮ್ಹಿ ಸೋ ವಸ್ಸೇ, ರಾಜಾ ಚೋಳಾಭಿಭೂತಿಯಾ;

ಪಲುಟ್ಠಪಬ್ಬತೇ ದುಗ್ಗಂ, ಪವಿಧಾಯ ತಹಿಂ ವಸೀ.

೧೯. ಚೋಳಸೇನಾ ತದಾಸೇಲಂ, ಸಮನ್ತಾ ಸಮ್ಪರಿಕ್ಖಿಪಿ;

ತತ್ಥೋ’ಭಯೇಸಂ ಸೇನಾನ-ಮಹೂ ಭಿಂಸನಕಂ ರಣಂ.

೨೦. ರಞ್ಞೋ ಭಟಾ ವಿನಾಸೇತ್ವಾ, ಸಬ್ಬಂ ತಂ ದಮಿಳಂ ಬಲಂ;

ಪಲಾಯನ್ತಂ ಮಹಾಚೋಳ-ಸಾಮನ್ತಞ್ಚಾನುಬನ್ಧಿಯ.

೨೧. ಗಹೇತ್ವಾನ ಸಿರಂ ತಸ್ಸ, ಗಾಮಸ್ಮಿಂ ತಮ್ಬವಿಟ್ಠಿಕೇ

ಸದ್ಧಿಂ ವಾಹನಯಾನೇಹಿ, ಸಾರಭೂತಧನೇಹಿ ಚ.

೨೨. ತಹಿಂ ತಂ ಸಕಲಂ ಭಣ್ಡಂ, ನೇತ್ವಾ ರಞ್ಞೋ ಪದಸ್ಸಿಯ;

ಪುಳತ್ಥಿನಗರಂ ಗನ್ತುಂ, ಕಾಲೋ ಇತಿ ಸಮಬ್ರವುಂ.

೨೩. ಮಹೀಪಾಲೋಪಿ ತಂ ಸುತ್ವಾ, ಸಚಿವಾನಂ ವಚೋ ತದಾ;

ಮಹತಾ ಬಲಕಾಯೇನ, ಪುಲತ್ಥಿನಗರಂ ಗತೋ.

೨೪. ಪವತ್ತಿಮೇತಂ ಸಕಲಂ, ಸುತ್ವಾ ಚೋಳನರಿಸ್ಸರೋ;

ತಿಬ್ಬಕೋಪವಸಂಯಾತೋ, ಭೂಪಾಲಗಹಣತ್ಥಿಕೋ.

೨೫. ಸಾಮಂ ಖಿಪ್ಪಂ ಸಮಾಗಮ್ಮ, ವೀರೋ ಸಾಗರಪಟ್ಟನಂ;

ಭಿಯ್ಯೋಪಿ ಮಹತಿಂ ಸೇನಂ, ಲಂಕಾದೀಪಮಪೇಸಯೀ.

೨೬. ತಂ ವಿಜಾನಿಯ ಭೂಮಿನ್ದೋ, ಸೇನಿನ್ದಂ ಪೇಸಯೀ ಸಕಂ;

ಬಲಂ ಮಹನ್ತಂ ದತ್ವಾನ, ಚೋಳಸೇನಾಯ ಯುಜ್ಝಿತುಂ.

೨೭. ಗಚ್ಛಮಾನೋ ಚಮೂನಾಥೋ, ಸೋ’ನುರಾಧಪುರನ್ತಿಕೇ;

ಸದ್ಧಿಂ ದಮಿಳಸೇನಾಯ, ವತ್ತೇಸಿ ತುಮುಲಂ ರಣಂ.

೨೮. ಪತಿಂಸು ತಸ್ಮಿಂ ಸಙ್ಗಾಮೇ, ಭೂಪಾಲಸ್ಸ ನರಾ ಬಹೂ;

ಭಿಯ್ಯೋಪಿ ದಮಿಳಾಯತ್ತಾ, ಜಾತಾ ತಂ ರಟ್ಠವಾಸಿನೋ.

೨೯. ವಿಹಾಯ ಧರಣೀಪಾಲೋ, ಪುಲತ್ಥಿನಗರಂ ತದಾ;

ವಿಲ್ಲಿಕಾಬಾಣಕಂ ರಟ್ಠಂ, ಸಮ್ಪಾಪುಣಿಯ ವೇಗಸಾ.

೩೦. ನಿಹಚ್ಚಾಮಚ್ಚಯುಗಲಂ, ತಂ ರಟ್ಠಾಧಿಟ್ಠಿತಂ ತದಾ;

ತಹಿಂ ವಾಸಮಕಪ್ಪೇಸಿ, ಸಭಟೇ ಸನ್ನಿಪಾತಯಂ.

೩೧. ಅತ್ತಾನಮನುಬನ್ಧನ್ತಂ, ಸುತ್ವಾ ಚೋಳಚಮೂಪತಿಂ;

ಗನ್ತ್ವಾ ವಾತಗಿರಿಂ ನಾಮ, ಸಮಯಞ್ಞೂ ಸಿಲುಚ್ಚಯಂ.

೩೨. ಉಪಚ್ಚಕಾಯ ಸೇಲಸ್ಸ, ತತ್ಥ ದುಗ್ಗಂ ನಿವೇಸಿಯ;

ರಣಂ ಕರೋನ್ತೋ ತೇಮಾಸಂ, ದಮಿಳೇ ಪಟಿಬಾಹಯಿ.

೩೩. ಕೇಸಧಾತುಕನಾಥಸ್ಸ, ಮಾರಿತಸ್ಸ ಪುರಾರಣೇ;

ಭಾತಾ ಕಣಿಟ್ಠೋ ಸಮ್ಪತ್ತ, ಮಹಾಪಕ್ಖಬಲೋ ತದಾ.

೩೪. ಮಾರಣಂ ಸಕಭಾತುಸ್ಸ, ಸರನ್ತೋ ರುಟ್ಠಮಾನಸೋ;

ಸಕಲಂ ಪರಿವತ್ತೇಸಿ, ಗುತ್ತಹಾಲಕಮಣ್ಡಲಂ.

೩೫. ಅಥೋ ಲಂಕಿಸ್ಸರೋ ತತ್ಥ, ಖಿಪ್ಪಂ ಗನ್ತ್ವಾ ಮಹಬ್ಬಲೋ;

ಠಾನೇ ಮಚ್ಚುತ್ಥಲೇ ನಾಮ, ಖನ್ಧಾವಾರಂ ನಿಬನ್ಧಿಯ.

೩೬. ಖದಿರಙ್ಗಣಿದುಗ್ಗಮ್ಹಾ, ಪಲಾಪೇತ್ವಾನ ತಂ ರಣೇ;

ಠಾನಾ ಕುಬುಲಗಲ್ಲಾ ಚ, ಯುಜ್ಝನ್ತೋ ತಂ ಪಲಾಪಯಿ.

೩೭. ವಿಹಾಯ ಪುತ್ತದಾರಾದಿ-ಸಬ್ಬಂ ನೇಕಧನಂ ಬಲಂ;

ಪಲಾಯಮಾನೋ ಸೋ ರಟ್ಠಂ, ಚೋಳಾಯತ್ತ ಮಗಾಲಹುಂ.

೩೮. ತದಾ ನರಿಸ್ಸರೋ ತತ, ತಸ್ಸ ಸಬ್ಬಂ ಸಮಾದಿಯ;

ಗನ್ತ್ವಾ ತಮ್ಬಲಗಾಮಮ್ಹಿ, ನವಂ ದುಗ್ಗಂ ನಿವೇಸಿಯ.

೩೯. ಅನುಕ್ಕಮೇನ ಗನ್ತ್ವಾನ, ಮಹಾನಾಗಹುಲವ್ಹಯೇ;

ಪುರೇವಸೀ ಸುಸಜ್ಜೇನ್ತೋ, ಬಲಂ ಚೋಳೇಹಿ ಯುಜ್ಝಿತುಂ.

೪೦. ತತೋ ರಾಜಾ ಸಮವ್ಹಾಯ, ಸಚೀವೇ ದ್ವೇ ಮಹಬ್ಬಲೇ;

ಪೇಸೇಸಿ ದಿಕ್ಖಿಣಂ ಪಸ್ಸಂ, ವಸಂ ನೇತುಂ ತಹಿಂ ಜನೇ.

೪೧. ಸಮ್ಪೇಸೇಸಿ ಮಹಾಮಚ್ಚ-ಯುಗಲಂ ಕಕ್ಖಲಂ ವಿಭೂ;

ಚೋಳದಪ್ಪವಿನಾಸಾಯ, ತತೋ ವೇಲಾ ಮಹಾಪಥೇ.

೪೨. ಪೇಸಿತಾ ದಕ್ಖಿಣಂ ಪಸ್ಸಂ, ಅಮಚ್ಚಾ’ಮೇ ಮಹಬ್ಬಲಾ;

ಮುಹುನ್ನರುಗ್ಗಮದುಗ್ಗಂ, ಬದಳತ್ಥಲಮೇವ ಚ.

೪೩. ವಾಪೀನಗರದುಗ್ಗಞ್ಚ, ಬುದ್ಧಗಾಮಕಮೇವ ಚ;

ತಿಲಗುಲ್ಲಂ ಮಹಾಗಲ್ಲಂ, ಮಣ್ಡಗಲ್ಲಕಮೇವ ಚ.

೪೪. ಅನುರಾಧಪುರಞ್ಚಾತಿ, ಗಹೇತ್ವಾನ ಕಮೇನ ತೇ;

ವತ್ತೇನ್ತಾ ಸವಸೇ ರಟ್ಠಂ, ಮಹಾತಿತ್ಥಮುಪಾಗತಾ.

೪೫. ಪೇಸಿತಾ ಸಚಿವಾದ್ವೇತು, ತತೋ ವೇಲಾ ಮಹಾಪಥೇ;

ವಿಲುಮ್ಪನ್ತಾ ಛಗಾಮಾದಿ-ಖನ್ಧಾವಾರೇ ತಹಿಂ ತಹಿಂ.

೪೬. ಪುಲತ್ಥಿನಗರಾಸನ್ನಂ, ಕಮೇನಾ’ಗಮ್ಮ ಪೇಸಯುಂ;

ದೂತೇ ರಾಜನ್ತಿಕಖಿಪ್ಪ-ಮಾಗನ್ತುಂ ವಟ್ಟತೀತಿಹ.

೪೭. ದಿಸಾಸಾ ದ್ವೀಸು ಯಾನೇಹಿ, ಸಚಿವೇಹಿ ಪವತ್ತಿತಂ;

ವಿಕ್ಕಮಾತಿ ಸಯಂ ಸುತ್ವಾ, ಕಾಲಞ್ಞೂ ಸೋ ಮಹೀಪಹಿ.

೪೮. ಸೀಘಂ ಸನ್ನಯ್ಹ ಸೇನಙ್ಗಂ, ಸಮಗ್ಗಂ ವಿದಿಕೋವಿದೋ;

ಉಮ್ಮೂಲನಾಯಚೋಳಾನಂ, ಪುರಾತಮ್ಹಾ’ಭಿನಿಕ್ಖಮಿ.

೪೯. ಗಚ್ಛಂ ಗಙ್ಗಾಯ ಮಹಿಯ-ಙ್ಗಣಥೂಪನ್ತಿಕೇ ವಿಭೂ;

ಸೇನಾನಿವೇಸಂ ಕಾರೇತ್ವಾ ಕಞ್ಚಿಕಾಲಂ ತಹಿಂ ವಸೀ.

೫೦. ಕಮೇನಾಗಮ್ಮ ಠಾನಞ್ಞೂ, ಪುಳತ್ಥಿನಗರನ್ತಿಕೇ;

ಬನ್ಧಾಪೇಸಿ ಮಹಾವೀರೋ, ಖನ್ಧಾವಾರಂ ಥಿರಂ ವರಂ.

೫೧. ತತ್ಥ ತತ್ಥ ಠಿತಾ ಸೂರಾ, ಚೋಳಾ ಯೇ ಕಕ್ಖಲಾ’ಖಿಲಾ;

ಪುಲತ್ಥಿನಗರೇ ಯುದ್ಧಂ, ಕಾತುಂ ಸನ್ನಿಪತಿಂಸು ತೇ.

೫೨. ನಿಕ್ಖಮ್ಮ ನಗರಾ ಗನ್ತ್ವಾ, ಚೋಳಾ ಬಹಿ ಮಹಾರಣಂ;

ಕತ್ವಾ ಪರಾಜಿತಾ ಭೀತಾ, ಪವಿಸ್ಸ ನಗರಂ ಸಕಂ.

೫೩. ಗುತ್ತಾ ಸೇಸಪುರದ್ವಾರಾ, ಗೋಪುರಟ್ಟಾಲನಿಸ್ಸಿತಾ;

ಮಹಾಹವಂ ಬಹುಸ್ಸಾಹಾ, ಪವತ್ತೇಸುಂ ಭಯಾವಹಂ.

೫೪. ದಿಯಡ್ಢಮಾಸಂ ಯುಜ್ಝನ್ತಿ, ನಗರಂ ತಮುಪರುನ್ಧಿಯ;

ಸಾಧೇತುಂ ನೇವಸಾ’ಸಕ್ಖಿ, ಭೂಪಾಲಸ್ಸ ಮಹಾಚಮೂ.

೫೫. ಮಹಾರಞ್ಞೋ ಮಹಾವೀರಾ, ಮಹಾಸೂರಾ ಮಹಬ್ಬಲಾ;

ಮಹಾಭಟಾ ಮಹಾಮಾನಾ, ರವಿದೇವಚಲಾದಯೋ.

೫೬. ಉಲ್ಲಙ್ಘಿತ್ವಾನ ಪಾಕಾರಂ, ಪವಿಸ್ಸ ಸಹಸಾ ಪುರಂ;

ಖಣೇನ ದಮಿಳೇ ಸಬ್ಬೇ, ಮೂಲಘಚ್ಚಮಘಾತಯುಂ.

೫೭. ಏವಂ ಲದ್ಧಜಯೋ ರಾಜಾ, ತದಾ ವಿಜಯಬಾಹುಸೋ;

ಚರಾಪೇಸಿ ನಿಜಾಣಾಯ, ಭೇರಿಂ ಭೂರಿಮತಿಪುರೇ.

೫೮. ತಂ ಸುತ್ವಾ ಸಕಸೇನಾಯ, ವಿನಾಸಂ ಚೋಳಭೂಪತಿ;

ಸೀಹಳಾ ಬಲವನ್ತೋತಿ, ಭಿಯ್ಯೋ ಸೇನಂ ನ ಪಾಹಿಣಿ.

೫೯. ವೀರೋ ಅಸೇಸನಿಹತುದ್ಧಟ ಚೋಳಸೇಟ್ಠೋ;

ವಿಞ್ಞೂ ಸುಸಾಧುಟ್ಠಪಿತಾಖಿಲರಾಜರಟ್ಠೋ;

ಇಟ್ಠನ್ನುರಾಧಪುರಸೇಟ್ಠಮತೀವ ಹಟ್ಠೋ;

ವಸ್ಸಮ್ಹಿ ಪಞ್ಚದಸಮೇ ಗಮಿ ರಾಜಸೇಟ್ಠೋ.

ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ

ಅನುರಾಧಪುರಾಭಿಗಮನೋ ನಾಮ

ಛಪ್ಪಞ್ಞಾಸತಿಮೋ ಪರಿಚ್ಛೇದೋ