ಬಾಲದುಜ್ಜನಕಣ್ಡ

೨೦೬. ಕಾಯದುಚ್ಚರಿತಾದೀಹಿ, ಸಮ್ಪನ್ನೋ ಪಾಪಮಾನುಜೋ;

ಬಾಲೋತಿ ಲೋಕನಾಥೇನ, ಕಿತ್ತಿತೋ ಧಮ್ಮಸಾಮಿನಾ.

೨೦೭. ದುಚಿನ್ತಿತಚಿನ್ತೀ ಚೇವ, ದುಬ್ಭಾಸಿತಭಾಸೀಪಿ ಚ;

ದುಕ್ಕಟಕಮ್ಮಕಾರೀ ಚ, ಪಾಪಕೋ ಬಾಲಮಾನುಜೋ.

೨೦೮. ಅತಿಪಿಯೋ ನ ಕಾತಬ್ಬೋ, ಖಲೋ ಕೋತುಹಲಂ ಕರೋ;

ಸಿರಸಾ ವಹಮಾನೋಪಿ, ಅಡ್ಢಪೂರೋ ಘಟೋ ಯಥಾ.

೨೦೯. ಸಪ್ಪೋ ದುಟ್ಠೋ ಖಲೋ ದುಟ್ಠೋ, ಸಪ್ಪಾ ದುಟ್ಠತರೋ ಖಲೋ;

ಮನ್ತೋಸಧೇಹಿ ತಂ ಸಪ್ಪಂ, ಖಲಂ ಕೇನುಪಸಮ್ಮತಿ.

೨೧೦. ಯೋ ಬಾಲೋ ಮಞ್ಞತಿ ಬಾಲ್ಯಂ, ಪಣ್ಡಿತೋ ವಾಪಿ ತೇನಸೋ;

ಬಾಲೋ ಚ ಪಣ್ಡಿತಮಾನೀ, ಸ ವೇ ಬಾಲೋತಿ ವುಚ್ಚತಿ.

೨೧೧. ಮಧೂವ ಮಞ್ಞತಿ ಬಾಲೋ, ಯಾವ ಪಾಪಂ ನ ಪಚ್ಚತಿ;

ಯದಾ ಚ ಪಚ್ಚತಿ ಪಾಪಂ, ಅಥ ದುಕ್ಖಂ ನಿಗಚ್ಛತಿ.

೨೧೨. ನ ಸಾಧು ಬಲವಾ ಬಾಲೋ, ಸಾಹಸಾ ವಿನ್ದತೇ ಧನಂ;

ಕಾಯಸ್ಸ ಭೇದಾ ದುಪ್ಪಞ್ಞೋ, ನಿರಯಂ ಸೋಪಪಜ್ಜತಿ.

೨೧೩. ಘರೇ ದುಟ್ಠೋ ಮೂಸಿಕೋ ಚ, ವನೇ ದುಟ್ಠೋ ಚ ವಾನರೋ;

ಸಕುಣೇ ಚ ದುಟ್ಠೋ ಕಾಕೋ, ನರೇದುಟ್ಠೋ ಚ ಬ್ರಾಹ್ಮಣೋ.

೨೧೪. ದೀಘಾ ಜಾಗರತೋ ರತ್ತಿ, ದೀಘಂ ಸನ್ತಸ್ಸ ಯೋಜನಂ;

ದೀಘೋ ಬಾಲಾನಸಂಸಾರೋ, ಸದ್ಧಮ್ಮಂ ಅವಿಜಾನತಂ.

೨೧೫. ತಿಲಮತ್ತಂ ಪರೇಸಞ್ಚ, ಅಪ್ಪದೋಸಞ್ಚ ಪಸ್ಸತಿ;

ನಾಳಿಕೇರಮ್ಪಿ ಸದೋಸಂ, ಖಲಜಾತೋ ನ ಪಸ್ಸತಿ.

೨೧೬. ನತ್ತದೋಸಂ ಪರೇ ಜಞ್ಞಾ, ಜಞ್ಞಾ ದೋಸಂ ಪರಸ್ಸತು;

ಗುಯ್ಹೋ ಕುಮ್ಮಾವ ಅಙ್ಗಾನಿ, ಪರದೋಸಞ್ಚ ಲಕ್ಖಯೇ.

೨೧೭. ಲುದ್ಧಂ ಅತ್ಥೇನ ಗಣ್ಹೇಯ್ಯ, ಥದ್ಧಂ ಅಞ್ಜಲಿಕಮ್ಮುನಾ;

ಛನ್ದಾನುವತ್ತಿಯಾ ಮೂಳ್ಹಂ, ಯಥಾಭೂತೇನ ಪಣ್ಡಿತಂ.

೨೧೮. ಯಥಾ ಉದುಮ್ಬರಪಕ್ಕಾ, ಬಹಿ ರತ್ತಕಾ ಏವ ಚ;

ಅನ್ತೋಕಿಮಿಲ ಸಮ್ಪುಣ್ಣಾ, ಏವಂ ದುಜ್ಜನಹದಯಾ.

೨೧೯. ಯಾವಜೀವಮ್ಪಿ ಚೇ ಬಾಲೋ, ಪಣ್ಡಿತಂ ಪಯಿರುಪಾಸತಿ;

ನ ಸೋ ಧಮ್ಮಂ ವಿಜಾನಾತಿ, ದಬ್ಬೀ ಸೂಪರಸಂ ಯಥಾ.

೨೨೦. ಚರಞ್ಚೇ ನಾಧಿಗಚ್ಛೇಯ್ಯ, ಸೇಯ್ಯಂ ಸದಿಸಮತ್ತನೋ;

ಏಕಚರಿಯಂ ದಳ್ಹಂ ಕಯಿರಾ, ನತ್ಥಿ ಬಾಲೇ ಸಹಾಯತಾ.

೨೨೧. ಅಜಾತಮತಮೂಳ್ಹಾನಂ, ವರಮಾದಯೋ ನ ಚನ್ತಿಮೋ;

ಸಕಿಂ ದುಕ್ಖಕರಾವಾದ-ಯೋನ್ತಿಮೋ ತು ಪದೇ ಪದೇ.

೨೨೨. ದುಜ್ಜನೇನ ಸಮಂ ವೇರಂ, ಸಖ್ಯಞ್ಚಾಪಿ ನ ಕಾರಯೇ;

ಉಣ್ಹೋ ದಹತಿ ಚಙ್ಗಾರೋ, ಸೀತೋ ಕಣ್ಹಾಯತೇ ಕರಂ.

೨೨೩. ದುಜ್ಜನೋ ಪಿಯವಾದೀ ಚ, ನೇತಂ ವಿಸ್ಸಾಸಕಾರಣಂ;

ಮಧು ತಿಟ್ಠತಿ ಜಿವ್ಹಗ್ಗೇ, ಹದಯೇ ಹಲಾಹಲಂ ವಿಸಂ.

೨೨೪. ದುಜ್ಜನೋ ಪರಿಹಾತಬ್ಬೋ, ವಿಜ್ಜಾಯಾಲಙ್ಕತೋಪಿ ಚ;

ಮಣಿನಾ ಭೂಸಿತೋ ಸಪ್ಪೋ, ಕಿಮೇಸೋ ನ ಭಯಙ್ಕರೋ.

೨೨೫. ನಾಳಿಕೇರಸಮಾಕಾರಾ, ದಿಸ್ಸನ್ತೇಪಿ ಹಿ ಸಜ್ಜನಾ;

ಅಞ್ಞೇ ಬದರಿಕಾಕಾರಾ, ಬಹಿರೇವ ಮನೋಹರಾ.

ಯಥಾಪಿ ಪನ ಸಪಕ್ಕಾ, ಬಹಿ ಕಣ್ಟಕಮೇವ ಚ;

ಅನ್ತೋ ಅಮತಸಮ್ಪುಣ್ಣಾ, ಏವಂ ಸುಜನಹದಯಾ.

ಯಥಾ ಉದುಮ್ಬರಪಕ್ಕಾ, ಬಹಿ ರತ್ತಕಮೇವ ಚ;

ಏವಂ ಕಿಮಿಲಸಮ್ಪುಣಾ, ಏವಂ ದುಜ್ಜನಹದಯಾ.

೨೨೬. ದೋಸಭೀತೋ ಅನಾರಮ್ಭೋ, ತಂ ಕಾ ಪುರಿಸಲಕ್ಖಣಂ;

ಕೋಹ್ಯಜಿಣ್ಣಭಯಾ ನನು, ಭೋಜನಂ ಪರಿಹೀಯತೇ.

೨೨೭. ಪಯೋಪಾನಂ ಭುಜಙ್ಗಾನಂ, ಕೇವಲಂ ವಿಸವಡ್ಢನಂ;

ಉಪದೇಸೋ ಹಿ ಮೂಳ್ಹಾನಂ, ಪಕೋಪಾಯ ನ ಸನ್ತಿಯಾ.

೨೨೮. ನ ಠಾತಬ್ಬಂ ನ ಗನ್ತಬ್ಬಂ, ದುಜ್ಜನೇನ ಸಮಂ ಕ್ವಚಿ;

ದುಜ್ಜನೋ ಹಿ ದುಕ್ಖಂ ದೇತಿ, ನ ಸೋ ಸುಖಂ ಕದಾಚಿಪಿ.

೨೨೯. ಅಬದ್ಧಾ ತತ್ಥ ಬಜ್ಝನ್ತಿ, ಯತ್ಥ ಬಾಲಾ ಪಭಾಸರೇ;

ಬದ್ಧಾಪಿ ತತ್ಥ ಮುಚ್ಚನ್ತಿ, ಯತ್ಥ ಧೀರಾ ಪಭಾಸರೇ.

೨೩೦. ಪರಿತ್ತಂ ದಾರುಮಾರುಯ್ಹ, ಯಥಾ ಸೀದೇ ಮಹಣ್ಣವೇ;

ಏವಂ ಕುಸಿತಮಾಗಮ್ಮ, ಸಾಧು ಜೀವಿಪಿ ಸೀದತಿ;

ತಸ್ಮಾ ತಂ ಪರಿವಜ್ಜೇಯ್ಯ, ಕುಸೀತಂ ಹೀನವೀರಿಯಂ.

೨೩೧. ಸದ್ಧಾಸೀಲಾದಿಸಮ್ಪನ್ನೋ, ಸುಮಿತ್ತೋ ಸಾಧುಮಾನುಸೋ;

ತಾದಿಸಂ ಮಿತ್ತಂ ಸೇವೇಯ್ಯ, ವುದ್ಧಿಕಾಮೋ ವಿಚಕ್ಖಣೋ.

೨೩೨. ದಾನಾದಿಗುಣಸೇಟ್ಠೇಹಿ, ಮಿದಿತಬ್ಬೋ ಮಿತ್ತೋ ಹಿ ಖೋ;

ತಾದಿಸಂ ಅವಙ್ಕೇನೇವ, ಮನಸಾ ಭಜೇಯ್ಯ ಸುಧೀ.

೩೩೩. ಹಿತಕ್ಕರೋ ಪರೋ ಬನ್ಧು, ಬನ್ಧುಪಿ ಅಹಿತೋ ಪರೋ;

ಅಹಿತೋ ದೇಹಜೋ ಬ್ಯಾಧಿ, ಹಿತಂ ಅರಞ್ಞಮೋಸಧಂ.

೨೩೪. ಪರೋಕ್ಖೇ ಕಿಚ್ಚಹನ್ತಾರಂ, ಪಚ್ಚಕ್ಖೇ ಪಿಯವಾದಿನಂ;

ವಜ್ಜಯೇ ತಾದಿಸಂ ಮಿತ್ತಂ, ವಿಸಕುಮ್ಭಂ ಪಯೋಮುಖಂ.

೧೩೫. ಧನಹೀನೇ ಚಜೇ ಮಿತ್ತೋ, ಪುತ್ತದಾರಾ ಸಹೋದರಾ;

ಧನವನ್ತೇವ ಸೇವನ್ತಿ, ಧನಂ ಲೋಕೇ ಮಹಾಸಖಾ.

೨೩೬. ಜಾನಿಯಾ ಪೇಸನೇ ಭಚ್ಚೇ, ಬನ್ಧವೇ ಬ್ಯಸನಾಗಮೇ;

ಮಿತ್ತಞ್ಚ ಆಪದಿಕಾಲೇ, ಭರಿಯಞ್ಚ ವಿಭವಕ್ಖಯೇ.

೨೩೭. ಉಸ್ಸವೇ ಬ್ಯಸನೇ ಚೇವ, ದುಬ್ಭಿಕ್ಖೇ ಸತ್ತುವಿಗ್ಗಹೇ;

ರಾಜದ್ವಾರೇ ಸುಸಾನೇ ಚ, ಯೋ ತಿಟ್ಠತಿ ಸೋ ಬನ್ಧವಾ.

೨೩೮. ನ ೨ ವಿಸ್ಸಸೇ ಅಮಿತ್ತಸ್ಸ, ಮಿತ್ತಞ್ಚಾಪಿ ನ ವಿಸ್ಸಸೇ;

ಕದಾಚಿ ಕುಪಿತೇ ಮಿತ್ತೇ, ಸಬ್ಬದೋಸಂ ಪಕಾಸತಿ.

೨೩೯. ಮಾತಾ ಮಿತ್ತಂ ಪಿತಾ ಚೇತಿ, ಸಭಾವಾ ತಂ ತಯಂ ಹಿತಂ;

ಕಮ್ಮಕರಣತೋ ಚಞ್ಞೇ, ಭವನ್ತಿ ಹಿತಬುದ್ಧಿಯೋ.

೨೪೦. ಆಪದಾಸು ಮಿತ್ತಂ ಜಞ್ಞಾ, ಯುದ್ಧೇ ಸೂರಂ ಇಣೇ ಸುಚಿಂ;

ಭರಿಯಂ ಖೀಣೇಸು ವಿತ್ತೇಸು, ಬ್ಯಸನೇಸು ಚ ಬನ್ಧವಂ.

೨೪೧. ಸಕಿಂ ದುಟ್ಠಞ್ಚ ಯೋ ಮಿತ್ತಂ, ಪುನ ಸನ್ಧಾತುಮಿಚ್ಛತಿ;

ಸ ಮಚ್ಚುಮುಪಗಣ್ಹಾತಿ, ಗಬ್ಭಂ ಅಸ್ಸತರೀ ಯಥಾ.

೨೪೨. ಇಣಸೇಸೋ ಅಗ್ಗಿಸೇಸೋ, ರೋಗಸೇಸೋ ತಥೇವ ಚ;

ಪುನಪ್ಪುನಂ ವಿವಡ್ಢನ್ತಿ, ತಸ್ಮಾ ಸೇಸಂ ನ ಕಾರಯೇ.

೨೪೩. ಪದುಮಂವ ಮುಖಂ ಯಸ್ಸ, ವಾಚಾ ಚನ್ದನಸೀತಲಾ;

ತಾದಿಸಂ ನೋ ಪಸೇವೇಯ್ಯ, ಹದಯೇ ತು ಹಲಾಹಲಂ.

೨೪೪. ನ ಸೇವೇ ಫರುಸಂ ಸಾಮಿಂ, ನ ಚ ಸೇವೇಯ್ಯ ಮಚ್ಛರಿಂ;

ತತೋ ಅಪಗ್ಗಣ್ಹ ಸಾಮಿಂ, ನೇವ ನಿಗ್ಗಹಿತಂ ತತೋ.

೨೪೫. ಕುದೇಸಞ್ಚ ಕುಮಿತ್ತಞ್ಚ, ಕುಕುಲಞ್ಚ ಕುಬನ್ಧವಂ;

ಕುದಾರಞ್ಚ ಕುದಾಸಞ್ಚ, ದೂರತೋ ಪರಿವಜ್ಜಯೇ.

೨೪೬. ಸೀತವಾಚೋ ಬಹುಮಿತ್ತೋ, ಫರುಸೋ ಅಪ್ಪಮಿತ್ತಕೋ;

ಉಪಮಾ ಏತ್ಥ ಞಾತಬ್ಬಾ, ಸೂರಿಯಚನ್ದರಾಜೂನಂ.

೨೪೭. ಅಹಿತಾ ಪಟಿಸೇಧೋ ಚ, ಹಿತೇಸು ಚ ಪಯೋಜನಂ;

ಬ್ಯಸನೇ ಅಪರಿಚ್ಚಾಗೋ, ಇತಿದಂ ಮಿತ್ತಲಕ್ಖಣಂ.

೨೪೮. ಪಿಯೋ ಗರು ಭಾವನೀಯೋ, ವತ್ತಾ ಚ ವಚನಕ್ಖಮೋ;

ಗಮ್ಭೀರಞ್ಚ ಕಥಂ ಕತ್ತಾ, ನೋ ಚಟ್ಠಾನೇ ನಿಯೋಜಕೋ;

ತಾದಿಸಂ ಮಿತ್ತಂ ಸೇವೇಯ್ಯ, ಭೂತಿಕಾಮೋ ವಿಚಕ್ಖಣೋ.

ಪಿಯೋ ಗರು ಭಾವ ನೀಯೋ, ವತ್ತಾ ಚ ವಚನಕ್ಖಮೋ;

ಗಮ್ಭಿರಞ್ಚ ಕಥಂ ಕತ್ತಾ, ನೋ ಚಟ್ಠಾನೇ ನಿಯೋಜಕೋ.

ಯಮ್ಹಿ ಏತಾನಿ ಠಾನಾನಿ, ಸಂವಿಜ್ಜನ್ತಿಧ ಪುಗ್ಗಲೇ;

ಸೋ ಮಿತ್ತೋ ಮಿತ್ತಕಾಮೇನ, ಅತ್ಥಕಾಮಾನುಕಮ್ಪತೋ;

ಅಪಿ ನಾಸಿಯಮಾನೇನ, ಭಜಿತಬ್ಬೋ ತಥಾವಿಧೋ.

೨೪೯. ಓರಸಂ ಕತಸಮ್ಬನ್ಧಂ, ತಥಾ ವಂಸಕ್ಕಮಾಗತಂ;

ರಕ್ಖಕೋ ಬ್ಯಸನೇಹಿ, ಮಿತ್ತಂ ಞೇಯ್ಯಂ ಚತುಬ್ಬಿಧಂ.

೨೫೦. ಪಿಯೋ ಗರು ಭಾವನಿಯೋ, ವತ್ತಾ ಚ ವಚನಕ್ಖಮೋ;

ಗಮ್ಭಿರಞ್ಚ ಕಥಂ ಕತ್ತಾ, ನ ಚಟ್ಠಾನೇ ನಿಯೋಜಕೋ;

ತಂ ಮಿತ್ತಂ ಮಿತ್ತಕಾಮೇನ, ಯಾವಜೀವಮ್ಪಿ ಸೇವಿಯಂ.

ಪಿಯೋ ಗರು ಭಾವನೀಯೋ, ವತ್ತಾ ಚ ವಚನಕ್ಖಮೋ;

ಗಮ್ಭಿರಞ್ಚ ಕಥಂ ಕತ್ತಾ, ನೋ ಚಟ್ಠಾನೇ ನಿಯೋಜಕೋ;

ತಾದಿಸಂ ಮಿತ್ತಂ ಸೇವೇಯ್ಯ, ಭೂತಿಕಾಮೋ ವಿಚಕ್ಖಣೋ.