೭. ಕಿಬ್ಬಿಧಾನಕಪ್ಪ

ಪಠಮಕಣ್ಡ

(ಕ)

ಬುದ್ಧಂ ಞಾಣಸಮುದ್ದಂ, ಸಬ್ಬಞ್ಞುಂ ಲೋಕಹೇತು’ಖೀಣಮತಿಂ;

ವನ್ದಿತ್ವಾ ಪುಬ್ಬಮಹಂ, ವಕ್ಖಾಮಿ ಸಸಾಧನಂ ಹಿ ಕಿತಕಪ್ಪಂ.

(ಖ)

ಸಾಧನಮೂಲಂ ಹಿ ಪಯೋಗಂ,

ಆಹು ಪಯೋಗಮೂಲಮತ್ಥಞ್ಚ;

ಅತ್ಥೇಸು ವಿಸಾರದಮತಯೋ,

ಸಾಸನಸ್ಸುಧರಾ ಜಿನಸ್ಸ ಮತಾ.

(ಗ)

ಅನ್ಧೋ ದೇಸಕವಿಕಲೋ,

ಘತಮಧುತೇಲಾನಿ ಭಾಜನೇನ ವಿನಾ;

ನಟ್ಠೋ ನಟ್ಠಾನಿ ಯಥಾ,

ಪಯೋಗವಿಕಲೋ ತಥಾ ಅತ್ಥೋ.

(ಘ)

ತಸ್ಮಾ ಸಂರಕ್ಖಣತ್ಥಂ, ಮುನಿವಚನತ್ಥಸ್ಸ ದುಲ್ಲಭಸ್ಸಾಹಂ;

ವಕ್ಖಾಮಿ ಸಿಸ್ಸಕಹಿತಂ, ಕಿತಕಪ್ಪಂ ಸಾಧನೇನ ಯುತಂ.

೫೨೪. , ೫೬೧. ಧಾತುಯಾ ಕಮ್ಮಾದಿಮ್ಹಿ ಣೋ.

ಧಾತುಯಾ ಕಮ್ಮಾದಿಮ್ಹಿ ಣಪಚ್ಚಯೋ ಹೋತಿ.

ಕಮ್ಮಂ ಕರೋತೀತಿ ಕಮ್ಮಕಾರೋ, ಏವಂ ಕುಮ್ಭಕಾರೋ, ಮಾಲಾಕಾರೋ, ಕಟ್ಠಕಾರೋ, ರಥಕಾರೋ, ರಜತಕಾರೋ, ಸುವಣ್ಣಕಾರೋ, ಪತ್ತಗ್ಗಾಹೋ, ತನ್ತವಾಯೋ, ಧಞ್ಞಮಾಯೋ, ಧಮ್ಮಕಾಮೋ, ಧಮ್ಮಚಾರೋ.

೫೨೫. , ೫೬೫. ಸಞ್ಞಾಯಮ ನು.

ಸಞ್ಞಾಯಮಭಿಧೇಯ್ಯಾಯಂ ಧಾತುಯಾ ಕಮ್ಮಾದಿಮ್ಹಿ ಅಕಾರಪಚ್ಚಯೋ ಹೋತಿ, ನಾಮಮ್ಹಿ ಚ ನುಕಾರಾಗಮೋ ಹೋತಿ.

ಅರಿಂ ದಮೇತೀತಿ ಅರಿನ್ದಮೋ, ರಾಜಾ. ವೇಸ್ಸಂ ತರತೀತಿ ವೇಸ್ಸನ್ತರೋ, ರಾಜಾ. ತಣ್ಹಂ ಕರೋತೀತಿ ತಣ್ಹಙ್ಕರೋ, ಭಗವಾ. ಮೇಧಂ ಕರೋತೀತಿ ಮೇಧಙ್ಕರೋ, ಭಗವಾ. ಸರಣಂ ಕರೋತೀತಿ ಸರಣಙ್ಕರೋ, ಭಗವಾ. ದೀಪಂ ಕರೋತೀತಿ ದೀಪಙ್ಕರೋ, ಭಗವಾ.

೫೨೬. , ೫೬೭. ಪುರೇ ದದಾ ಚ ಇಂ.

ಪುರಸದ್ದೇ ಆದಿಮ್ಹಿ ದದಇಚ್ಚೇತಾಯ ಧಾತುಯಾ ಅಕಾರಪಚ್ಚಯೋ ಹೋತಿ, ಪುರಸದ್ದಸ್ಸ ಅಕಾರಸ್ಸ ಚ ಇಂ ಹೋತಿ.

ಪುರೇ ದಾನಂ ಅದಾಸೀತಿ ಪುರಿನ್ದದೋ ದೇವರಾಜಾ.

೫೨೭. , ೫೬೮. ಸಬ್ಬತೋ ಣ್ವು ತ್ವಾವೀ ವಾ.

ಸಬ್ಬತೋ ಧಾತುತೋ ಕಮ್ಮಾದಿಮ್ಹಿ ವಾ ಅಕಮ್ಮಾದಿಮ್ಹಿ ವಾ ಅಕಾರ ಣ್ವು ತು ಆವೀಇಚ್ಚೇತೇ ಪಚ್ಚಯಾ ಹೋನ್ತಿ.

ತಂ ಕರೋತೀತಿ ತಕ್ಕರೋ, ಹಿತಂ ಕರೋತೀತಿ ಹಿತಕರೋ, ವಿನೇತಿ ಏತ್ಥ, ಏತೇನಾತಿ ವಾ ವಿನಯೋ ನಿಸ್ಸಾಯ ನಂ ವಸತೀತಿ ನಿಸ್ಸಯೋ.

ಣ್ವುಮ್ಹಿ – ರಥಂ ಕರೋತೀತಿ ರಥಕಾರಕೋ, ಅನ್ನಂ, ದದಾತೀತಿ ಅನ್ನದಾಯಕೋ, ವಿನೇತಿ ಸತ್ತೇತಿ ವಿನಾಯಕೋ, ಕರೋತೀತಿ ಕಾರಕೋ, ದದಾತೀತಿ ದಾಯಕೋ, ನೇತೀತಿ ನಾಯಕೋ.

ತುಮ್ಹಿ – ತಂ ಕರೋತೀತಿ ತಕ್ಕತ್ತಾ, ತಸ್ಸ ಕತ್ತಾತಿ ವಾ ತಕ್ಕತ್ತಾ. ಭೋಜನಂ ದದಾತೀತಿ ಭೋಜನದಾತಾ, ಭೋಜನಸ್ಸ ದಾತಾತಿ ವಾ ಭೋಜನದಾತಾ. ಕರೋತೀತಿ ಕತ್ತಾ. ಸರತೀತಿ ಸರಿತಾ.

ಆವೀಮ್ಹಿ – ಭಯಂ ಪಸ್ಸತೀತಿ ಭಯದಸ್ಸಾವೀ ಇಚ್ಚೇವಮಾದಿ.

೫೨೮. , ೫೭೭. ವಿಸ ರುಜ ಪದಾದಿತೋ ಣ.

ವಿಸ ರುಜ ಪದಇಚ್ಚೇವಮಾದೀಹಿ ಧಾತೂಹಿ ಣ ಪಚ್ಚಯೋ ಹೋತಿ.

ಪವಿಸತೀತಿ ಪವೇಸೋ, ರುಜತೀತಿ ರೋಗೋ, ಉಪ್ಪಜ್ಜತೀತಿ ಉಪ್ಪಾದೋ, ಫುಸತೀತಿ ಫಸ್ಸೋ, ಉಚತೀತಿ ಓಕೋ, ಭವತೀತಿ ಭಾವೋ, ಅಯತೀತಿ ಆಯೋ, ಸಮ್ಮಾ ಬುಜ್ಝತೀತಿ ಸಮ್ಬೋಧೋ, ವಿಹರತೀತಿ ವಿಹಾರೋ.

೫೨೯. , ೫೮೦. ಭಾವೇ ಚ.

ಭಾವತ್ಥಾಭಿಧೇಯ್ಯೇ ಸಬ್ಬಧಾತೂಹಿ ಣಪಚ್ಚಯೋ ಹೋತಿ.

ಪಚ್ಚತೇ, ಪಚನಂ ವಾ ಪಾತೋ, ಚಜತೇ, ಚಜನಂ ವಾ ಚಾಗೋ, ಏವಂ ಯಾಗೋ, ಯೋಗೋ, ಭಾಗೋ, ಪರಿದಾಹೋ.

೫೩೦. , ೫೮೪. ಕ್ವಿ ಚ.

ಸಬ್ಬಧಾತೂಹಿ ಕ್ವಿಪಚ್ಚಯೋ ಹೋತಿ.

ಸಮ್ಭವತೀತಿ ಸಮ್ಭೂ, ವಿಸೇಸೇನ ಭವತೀತಿ ವಿಭೂ, ಭುಜೇನ ಗಚ್ಛತೀತಿ ಭುಜಗೋ, ಸಂ ಅತ್ತಾನಂ ಖನತಿ, ಸಂ ಸಟ್ಠು ಖನತೀತಿ ವಾ ಸಙ್ಖೋ.

೫೩೧. , ೫೮೯. ಧರಾದೀಹಿ ರಮ್ಮೋ.

ಧರಇಚ್ಚೇವಮಾದೀಹಿ ಧಾತೂಹಿ ರಮ್ಮಪಚ್ಚಯೋ ಹೋತಿ.

ಧರತಿ ತೇನಾತಿ ಧಮ್ಮೋ, ಕರೀಯತೇ ತನ್ತಿ ಕಮ್ಮಂ.

೫೩೨. , ೫೯೦. ತಸ್ಸೀಲಾದೀಸು ಣೀತ್ವಾವೀ ಚ.

ಸಬ್ಬೇಹಿ ಧಾತೂಹಿ ತಸ್ಸೀಲಾದೀಸ್ವತ್ಥೇಸು ಣೀ ತು ಆವೀ ಇಚ್ಚೇತೇ ಪಚ್ಚಯಾ ಹೋನ್ತಿ.

ಪಿಯಂ ಪಸಂಸಿತುಂ ಸೀಲಂ ಯಸ್ಸ ರಞ್ಞೋ, ಸೋ ಹೋತಿ ರಾಜಾ ಪಿಯಪಸಂಸೀ, ಬ್ರಹ್ಮಂ ಚರಿತುಂ ಸೀಲಂ ಯಸ್ಸ ಪುಗ್ಗಲಸ್ಸ ಸೋ ಹೋತಿ ಪುಗ್ಗಲೋ ಬ್ರಹ್ಮಚಾರೀ, ಪಸಯ್ಹ ಪವತ್ತಿತುಂ ಸೀಲಂ ಯಸ್ಸ ರಞ್ಞೋ, ಸೋ ಹೋತಿ ರಾಜಾ ಪಸಯ್ಹಪವತ್ಥಾ, ಭಯಂ ಪಸ್ಸಿತುಂ ಸೀಲಂ ಯಸ್ಸ ಸಮಣಸ್ಸ, ಸೋ ಹೋತಿ ಸಮಣೋ ಭಯದಸ್ಸಾವೀ ಇಚ್ಚೇವಮಾದಿ.

೫೩೩. , ೫೯೧. ಸದ್ದ ಕು ಧ ಚಲ ಮಣ್ಡತ್ಥರುಧಾದೀಹಿಯು.

ಸದ್ದ ಕುಧ ಚಲ ಮಣ್ಡತ್ಥೇಹಿ ಚ ರುಚಾದೀಹಿ ಚ ಧಾತೂಹಿ ಯುಪಚ್ಚಯೋ ಹೋತಿ ತಸ್ಸೀಲಾದೀಸ್ವತ್ಥೇಸು.

ಘೋಸನಸೀಲೋ ಘೋಸನೋ, ಭಾಸನಸೀಲೋ ಭಾಸನೋ. ಏವಂ ವಿಗ್ಗಹೋ ಕಾತಬ್ಬೋ. ಕೋಧನೋ, ದೋಸನೋ, ಚಲನೋ, ಕಮ್ಪನೋ, ಫನ್ದನೋ, ಮಣ್ಡನೋ, ವಿಭೂಸನೋ, ರೋಚನೋ, ಜೋತನೋ, ವಡ್ಢನೋ.

೫೩೪. , ೫೬೨. ಪಾರಾದಿಗಮಿಮ್ಹಾ ರೂ.

ಗಮುಇಚ್ಚೇತಮ್ಹಾ ಧಾತುಮ್ಹಾ ಪಾರಸದ್ದಾದಿಮ್ಹಾ ರೂಪಚ್ಚಯೋ ಹೋತಿ ತಸ್ಸೀಲಾದೀಸ್ವತ್ಥೇಸು.

ಭವಸ್ಸ ಪಾರಂ ಭವಪಾರಂ, ಭವಪಾರಂ ಗನ್ತುಂ ಸೀಲಂ ಯಸ್ಸ ಪುರಿಸಸ್ಸ, ಸೋ ಹೋತಿ ಪುರಿಸೋ ಭವಪಾರಗೂ.

ತಸ್ಸೀಲಾದೀಸ್ವೀತಿ ಕಿಮತ್ಥಂ? ಪಾರಙ್ಗತೋ.

ಪಾರಾದಿಗಮಿಮ್ಹಾತಿ ಕಿಮತ್ಥಂ? ಅನುಗಾಮೀ.

೫೩೫. , ೫೯೩. ಭಿಕ್ಖಾದಿತೋ ಚ.

ಭಿಕ್ಖಇಚ್ಚೇವಮಾದೀಹಿ ಧಾತೂಹಿ ರೂಪಚ್ಚಯೋ ಹೋತಿ ತಸ್ಸೀಲಾದೀಸ್ವತ್ಥೇಸು.

ಭಿಕ್ಖನಸೀಲೋ ಯಾಚನಸೀಲೋ ಭಿಕ್ಖು, ವಿಜಾನನಸೀಲೋ ವಿಞ್ಞೂ.

೫೩೬. , ೫೯೪. ತನತ್ಯಾದೀನಂ ಣುಕೋ.

ಹನತ್ಯಾದೀನಂ ಧಾತೂನಂ ಅನ್ತೇ ಣುಕಪಚ್ಚಯೋ ಹೋತಿ ತಸ್ಸೀಲಾದೀಸ್ವತ್ಥೇಸು.

ಆಹನನಸೀಲೋ ಆಘಾತುಕೋ, ಕರಣಸೀಲೋ ಕಾರುಕೋ.

೫೩೭. , ೫೬೬. ನು ನಿಗ್ಗಹಿತಂ ಪದನ್ತೇ.

ಪದನ್ತೇ ನುಕಾರಾಗಮೋ ನಿಗ್ಗಹಿತಮಾಪಜ್ಜತೇ.

ಅರಿಂ ದಮೇತೀತಿ ಅರಿನ್ದಮೋ, ರಾಜಾ. ವೇಸ್ಸಂ ತರತೀತಿ ವೇಸ್ಸನ್ತರೋ, ರಾಜಾ. ಪಭಂ ಕರೋತೀತಿ ಪಭಙ್ಕರೋ, ಭಗವಾ.

೫೩೮. , ೫೯೫. ಸಂಹನಾಞ್ಞಾಯ ವಾ ರೋ ಘೋ.

ಸಂಪುಬ್ಬಾಯ ಹನಇಚ್ಚೇತಾಯ ಧಾತುಯಾ, ಅಞ್ಞಾಯ ವಾ ಧಾತುಯಾ ರಪಚ್ಚಯೋ, ಹನಸ್ಸ ಚ ಘೋ ಹೋತಿ.

ಸಮಗ್ಗಂ ಕಮ್ಮಂ ಸಮುಪಗಚ್ಛತೀತಿ ಸಙ್ಘೋ, ಸಮನ್ತತೋ ನಗರಸ್ಸ ಮಾಹಿರೇ ಖಞ್ಞತೀತಿ ಪರಿಖಾ, ಅನ್ತಂ ಕರೋತೀತಿ ಅನ್ತಕೋ.

ಸಂಇತಿ ಕಿಮತ್ಥಂ? ಉಪಹನನಂ ಉಪಘಾತೋ.

೫೩೯. , ೫೫೮. ರಮ್ಹಿ ರನ್ತೋ ರಾದಿನೋ.

ರಮ್ಹಿ ಪಚ್ಚಯೇ ಪರೇ ಸಬ್ಬೋ ಧಾತ್ವನ್ತೋ ರಕಾರಾದಿ ಲೋಪೋ ಹೋತಿ.

ಅನ್ತಕೋ, ಪಾರಗೂ, ಸತ್ಥಾ, ದಿಟ್ಠೋ ಇಚ್ಚೇವಮಾದಿ.

೫೪೦. , ೫೪೫. ಭಾವಕಮ್ಮೇಸು ತಬ್ಬಾನೀಯಾ.

ಭಾವಕಮ್ಮಇಚ್ಚೇತೇಸ್ವತ್ಥೇಸು ತಬ್ಬ ಅನೀಯಇಚ್ಚೇತೇ ಪಚ್ಚಯಾ ಹೋನ್ತಿ ಸಬ್ಬಧಾತೂಹಿ.

ಭವಿತಬ್ಬಂ, ಭವನೀಯಂ, ಆಸಿತಬ್ಬಂ, ಆಸನೀಯಂ, ಪಜ್ಜಿತಬ್ಬಂ, ಪಜ್ಜನೀಯಂ, ಕತ್ತಬ್ಬಂ, ಕರಣೀಯಂ, ಗನ್ತಬ್ಬಂ, ಗಮನೀಯಂ.

೫೪೧. , ೫೫೨. ಣ್ಯೋ ಚ.

ಭಾವಕಮ್ಮೇಸು ಸಬ್ಬಧಾತೂಹಿ ಣ್ಯಪಚ್ಚಯೋ ಹೋತಿ.

ಕತ್ತಬ್ಬಂ ಕಾರಿಯಂ, ಜೇತಬ್ಬಂ ಜೇಯ್ಯಂ, ನೇತಬ್ಬಂ ನೇಯ್ಯಂ, ಇಚ್ಚೇವಮಾದಿ.

ಚಗ್ಗಹಣೇನ ತೇಯ್ಯಪಚ್ಚಯೋ ಹೋತಿ. ಞಾತಬ್ಬಂ ಞಾತೇಯ್ಯಂ, ದಟ್ಠೇಯ್ಯಂ, ಪತ್ತೇಯ್ಯಂ ಇಚ್ಚೇವಮಾದಿ.

೫೪೨. , ೫೫೭. ಕರಮ್ಹಾ ರಿಚ್ಚ.

ಕರಇಚ್ಚೇತಮ್ಹಾ ಧಾತುಮ್ಹಾ ರಿಚ್ಚಪಚ್ಚಯೋ ಹೋತಿ ಭಾವಕಮ್ಮೇಸು.

ಕತ್ತಬ್ಬಂ ಕಿಚ್ಚಂ.

೫೪೩. , ೫೫೫. ಭೂತೋ’ಬ್ಬ.

ಭೂಇಚ್ಚೇತಾಯ ಧಾತುಯಾ ಣ್ಯಪಚ್ಚಯಸ್ಸ ಊಕಾರೇನ ಸಹ ಅಬ್ಬಾದೇಸೋ ಹೋತಿ ಭಾವಕಮ್ಮೇಸು.

ಭವಿತಬ್ಬೋ ಭಬ್ಬೋ, ಭವಿತಬ್ಬಂ ಭಬ್ಬಂ.

೫೪೪. , ೫೫೬. ವದ ಮದ ಗಮು ಯುಜ ಗರಹಾಕಾರಾದೀಹಿ ಜ್ಜ ಮ್ಮ ಗ್ಗ ಯ್ಹೇಯ್ಯಾ ಗಾರೋ ವಾ.

ವದ ಮದ ಗಮು ಯುಜ ಗರಹಾಕಾರನ್ತಇಚ್ಚೇವಮಾದೀಹಿ ಧಾತೂಹಿ ಣ್ಯಪಚ್ಚಯಸ್ಸ ಯಥಾಸಙ್ಖ್ಯಂ ಜ್ಜ ಮ್ಮ ಗ್ಗ ಯ್ಹ ಏಯ್ಯಾದೇಸಾ ಹೋನ್ತಿ ವಾ ಧಾತ್ವನ್ತೇನ ಸಹ, ಗರಸ್ಸಂ ಚ ಗಾರೋ ಹೋತಿ ಭಾವಕಮ್ಮೇಸು.

ವತ್ತಬ್ಬಂ ವಜ್ಜಂ, ಮದನೀಯಂ ಮಜ್ಜಂ, ಗಮನೀಯಂ ಗಮ್ಮಂ, ಯೋಜನೀಯಂ ಯೋಗ್ಗಂ, ಗರಹಿತಬ್ಬಂ ಗಾರಯ್ಹಂ, ದಾತಬ್ಬಂ ದೇಯ್ಯಂ, ಪಾತಬ್ಬಂ ಪೇಯ್ಯಂ, ಹಾತಬ್ಬಂ ಹೇಯ್ಯಂ, ಮಾತಬ್ಬಂ ಮೇಯ್ಯಂ, ಞಾತಬ್ಬಂ ಞೇಯ್ಯಂ, ಇಚ್ಚೇವಮಾದಿ.

೫೪೫. , ೫೪೮. ತೇ ಕಿಚ್ಚಾ.

ಯೇ ಪಚ್ಚಯಾ ತಬ್ಬಾದಯೋ ರಿಚ್ಚನ್ತಾ, ತೇ ಕಿಚ್ಚಸಞ್ಞಾತಿ ವೇದಿತಬ್ಬಾ.

ಕಿಚ್ಚಸಞ್ಞಾಯ ಕಿಂಪಯೋಜನಂ? ಭಾವಕಮ್ಮೇಸು ಕಿಚ್ಚತ್ತಖತ್ಥಾ.

೫೪೬. , ೫೬೨. ಅಞ್ಞೇ ಕಿತ.

ಅಞ್ಞೇ ಪಚ್ಚಯಾ ಕಿತ ಏವ ಸಞ್ಞಾ ಹೋನ್ತಿ.

ಕಿತ ಸಞ್ಞಾಯ ಕಿಂಪಯೋಜನಂ? ಕತ್ತರಿ ಕಿತ.

೫೪೭. , ೫೯೬. ನನ್ದಾದೀಹಿ ಯು.

ನನ್ದಾದೀಹಿ ಧಾತೂಹಿ ಯುಪಚ್ಚಯೋ ಹೋತಿ ಭಾವಕಮ್ಮೇಸು.

ನನ್ದೀಯತೇ ನನ್ದನಂ, ನಿನ್ದಿತಬ್ಬಂ ವಾ ನನ್ದನಂ, ಗಹಣೀಯಂ ಗಹಣಂ, ಚರಿತಬ್ಬಂ ಚರಣಂ, ಏವಂ ಸಬ್ಬತ್ಥ ಯೋಜೇತಬ್ಬಾ.

೫೪೮. , ೫೯೭. ಕತ್ತುಕರಣಪದೇಸೇಸು ಚ.

ಕತ್ತುಕರಣಪದೇಸಇಚ್ಚೇತೇಸ್ವತ್ಥೇಸು ಚ ಯುಪಚ್ಚಯೋ ಹೋತಿ.

ಕತ್ತರಿ ತಾವ – ರಜಂ ಹರತೀತಿ ರಜೋಹರಣಂ ತೋಯಂ.

ಕರಣೇ ತಾವ – ಕರೋತಿ ತೇನಾತಿ ಕರಣಂ.

ಪದೇಸೇ ತಾವ – ತಿಟ್ಠನ್ತಿ ತಸ್ಮಿನ್ತಿ ಠಾನಂ. ಏವಂ ಸಬ್ಬತ್ಥ ಯೋಜೇತಬ್ಬಾ.

೫೪೯. , ೫೫೦. ರಹಾದಿತೋ ಣ.

ರಕಾರಹಕಾರಾದ್ಯನ್ತೇಹಿ ಧಾತೂಹಿ ಅನಾದೇಸಸ್ಸ ನಸ್ಸ ಣೋ ಹೋತಿ.

ಕರೋತಿ ತೇನಾತಿ ಕರಣಂ, ಪೂರೇತಿ ತೇನಾತಿ ಪೂರಣಂ. ಗಹಣೀಯಂ ತೇನಾತಿ ಗಹಣಂ. ಏವಮಞ್ಞೇಪಿ ಯೋಜೇತಬ್ಬಾ.

ಇತಿ ಕಿಬ್ಬಿಧಾನಕಪ್ಪೇ ಪಠಮೋ ಕಣ್ಡೋ.

ದುತಿಯಕಣ್ಡ

೫೫೦. , ೫೪೬. ಣಾದಯೋ ತೇಕಾಲಿಕಾ.

ಣಾದಯೋ ಪಚ್ಚಯಾ ಯುಪಚ್ಚಯನ್ತಾ ತೇಕಾಲಿಕಾತಿ ವೇದಿತಬ್ಬಾ.

ಕುಮ್ಭಂ ಕರೋತಿ ಅಕಾಸಿ ಕರಿಸ್ಸತೀತಿ ಕುಮ್ಭಕಾರೋ, ಕರೋತಿ ಅಕಾಸಿ ಕರಿಸ್ಸತಿ ತೇನಾತಿ ಕರಣಂ. ಏವಮಞ್ಞೇಪಿ ಯೋಜೇತಬ್ಬಾ.

೫೫೧. , ೫೯೮. ಸಞ್ಞಾಯಂ ದಾ ಧಾತೋ ಇ.

ಸಞ್ಞಾಯಮಭಿಧೇಯ್ಯಾಯಂ ದಾ ಧಾತೋ ಇಪಚ್ಚಯೋ ಹೋತಿ.

ಪಠಮಂ ಆದೀಯತೀತಿ ಆದಿ, ಉದಕಂ ದಧಾತೀತಿ ಉದಮಿ, ಮಹೋದಕಾನಿ ದಧಾತೀತಿ ಮಹೋದಧಿ, ವಾಲಾನಿ ದಧಾತಿ ತಸ್ಮಿನ್ತಿ ವಾಲಧಿ, ಸಮ್ಮಾ ಧೀಯತೀತಿ ಸನ್ಧಿ.

೫೫೨. , ೬೦೯. ತಿ ಕಿತ ಚಾಸಿಟ್ಠೇ.

ಸಞ್ಞಾಯಮಭಿಧೇಯ್ಯಾಯಂ ಸಬ್ಬಧಾತೂಹಿ ತಿಪಚ್ಚಯೋ ಹೋತಿ, ಕಿತ ಚ ಆಸಿಟ್ಠೇ.

ಜಿನೋ ಜನಂ ಬುಜ್ಝತೂತಿ ಜಿನಬುದ್ಧಿ, ಧನಂ ಅಸ್ಸ ಭವತೂತಿ ಧನಭೂತಿ, ಭವತೂತಿ ಭೂತೋ, ಭವತೂತಿ ಭಾವೋ, ಧಮ್ಮೋ ಜನಂ ದದಾತೂತಿ ಧಮ್ಮದಿನ್ನೋ, ವಡ್ಢತೂತಿ ವಡ್ಢಮಾನೋ. ಏವಮಞ್ಞೇಪಿ ಯೋಜೇತಬ್ಬಾ.

೫೫೩. , ೫೯೯. ಇತ್ಥಿಯಮತಿಯವೋ ವಾ.

ಇತ್ಥಿಯಮಭಿಧೇಯ್ಯಾಯಂ ಸಬ್ಬಧಾತೂಹಿ ಅಕಾರ ತಿ ಯು ಇಚ್ಚೇತೇ ಪಚ್ಚಯಾ ಹೋನ್ತಿ ವಾ.

ಜೀರತೀತೀ ಜರಾ, ಮಞ್ಞತೀತಿ ಮತಿ, ಚೇತಯತೀತಿ ಚೇತನಾ, ವೇದಯತೀತಿ ವೇದನಾ. ಏವಮಞ್ಞೇಪಿ ಯೋಜೇತಬ್ಬಾ.

೫೫೪. , ೬೦೧. ಕರತೋ ರಿರಿಯ.

ಕರತೋ ಇತ್ಥಿಯಮನಿತ್ಥಿಯಂ ವಾ ಅಭಿಖೇಯ್ಯಾಯಂ ರಿರೀಯಪಚ್ಚಯೋ ಹೋತಿ ವಾ.

ಕತ್ತಬ್ಬಾ ಕಿರಿಯಾ, ಕರಣೀಯಂ ಕಿರಿಯಂ.

೫೫೫. , ೬೧೨. ಅತೀತೇ ತತವನ್ತುತಾವೀ.

ಅತೀತೇ ಕಾಲೇ ಸಬ್ಬಧಾತೂಹಿ ತತವನ್ತುತಾವೀಇಚ್ಚೇತೇ ಪಚ್ಚಯಾ ಹೋನ್ತಿ.

ಹುತೋ, ಹುತವಾ, ಹುತಾವೀ. ವುಸಿತೋ, ವುಸಿತವಾ, ವುಸಿತಾವೀ. ಭುತ್ತೋ, ಭುತ್ತವಾ, ಭುತ್ತಾವೀ.

೫೫೬. , ೬೨೨. ಭಾವಕಮ್ಮೇಸು ತ.

ಭಾವಕಮ್ಮೇಸು ಅತೀತೇ ಕಾಲೇ ತಪಚ್ಚಯೋ ಹೋತಿ ಸಬ್ಬಧಾತೂಹಿ.

ಭಾವೇ ತಾವ – ತಸ್ಸ ಗೀತಂ, ನಚ್ಚಂ, ನಟ್ಟಂ, ಹಸಿತಂ.

ಕಮ್ಮನಿ ತಾವ – ತೇನ ಭಾಸಿತಂ, ದೇಸಿತಂ.

೫೫೭. , ೬೦೬. ಬುಧಗಮಾದಿತ್ಥೇ ಕತ್ತರಿ.

ಬುಧಗಮುಇಚ್ಚೇವಮಾದೀಹಿ ಧಾತೂಹಿ ತದತ್ಥೇ ಗಮ್ಯಮಾನೇ ತಪಚ್ಚಯೋ ಹೋತಿ ಕತ್ತರಿ ಸಬ್ಬಕಾಲೇ.

ಸಬ್ಬೇ ಸಙ್ಖತಾಸಙ್ಖತೇ ಧಮ್ಮೇ ಬುಜ್ಝತಿ ಅಬುಜ್ಝಿ ಬುಜ್ಝಿಸ್ಸತೀತಿ ಬುದ್ಧೋ, ಸರಣಙ್ಗತೋ, ಸಮಥಙ್ಗತೋ, ಅಮಥಙ್ಗತೋ, ಜಾನಾತಿ ಅಜಾನಿ ಜಾನಿಸ್ಸತೀತಿ ಞಾತೋ, ಇಚ್ಚೇವಮಾದಿ.

೫೫೮. , ೬೦೨. ಜಿತೋ ಇನ ಸಬ್ಬತ್ಥ.

ಜಿಇಚ್ಚೇತಾಯ ಧಾತುಯಾ ಇನಪಚ್ಚಯೋ ಹೋತಿ ಸಬ್ಬಕಾಲೇ ಕತ್ತರಿ.

ಪಾಪಕೇ ಅಕುಸಲೇ ಧಮ್ಮೇ ಜಿನಾತಿ ಅಜಿನಿ ಜಿನಿಸ್ಸತೀತಿ ಜಿನೋ.

೫೫೯. , ೬೦೩. ಸುಪತೋ ಚ.

ಸುಪಇಚ್ಚೇತಾಯ ಧಾತುಯಾ ಇನಪಚ್ಚಯೋ ಹೋತಿ ಕತ್ತರಿ, ಭಾವೇ ಚ.

ಸುಪತೀತಿ ಸುಪಿನಂ, ಸುಪೀಯತೇ ಸುಪಿನಂ.

೫೬೦. , ೬೦೪. ಈಸಂದುಸೂಹಿ ಖ.

ಈಸಂದುಸುಸದ್ದಾದೀಹಿ ಸಬ್ಬಧಾತೂಹಿ ಖಪಚ್ಚಯೋ ಹೋತಿ.

ಈಸಸ್ಸಯೋ, ದುಸ್ಸಯೋ, ಸುಸ್ಸಯೋ ಭವತಾ, ಈಸಕ್ಕರಂ, ದುಕ್ಕರಂ, ಸುಕರಂ, ಭವತಾ.

೫೬೧. , ೬೩೬. ಇಚ್ಛತ್ಥೇಸು ಸಮಾನಕತ್ತುಕೇಸು ತವೇ ತುಂ ವಾ.

ಇಚ್ಛತ್ಥೇಸು ಸಮಾನಕತ್ತುಕೇಸು ಸಬ್ಬಧಾತೂಹಿತವೇತುಂಇಚ್ಚೇತೇ ಪಚ್ಚಯಾ ಹೋನ್ತಿ ಸಬ್ಬಕಾಲೇ ಕತ್ತರಿ.

ಪುಞ್ಞಾನಿ ಕಾತವೇ, ಸದ್ಧಮ್ಮಂ ಸೋತು ಮಿಚ್ಛತಿ.

೫೬೨. , ೬೩೮. ಅರಹಸಕ್ಕಾದೀಸು ಚ.

ಅರಹಸಕ್ಕಾದೀಸು ಚ ಅತ್ಥೇಸು ಸಬ್ಬಧಾತೂಹಿ ತುಂಪಚ್ಚಯೋ ಹೋತಿ.

ಕೋ ತಂ ನಿನ್ದಿತುಮರಹತಿ, ಸಕ್ಕಾ ಜೇತುಂ ಧನೇನ ವಾ. ಏವಮಞ್ಞೇಪಿ ಯೋಜೇತಬ್ಬಾ.

೫೬೩. , ೬೩೯. ಪತ್ತವಚನೇ ಅಲಮತ್ಥೇಸು ಚ.

ಪತ್ತವಚನೇ ಅಲಮತ್ಥೇಸು ಸಬ್ಬಧಾತೂಹಿ ತುಂಪಚ್ಚಯೋ ಹೋತಿ.

ಅಲಮೇವ ದಾನಾನಿ ದಾತುಂ, ಅಲಮೇವ ಪುಞ್ಞಾನಿ ಕಾತುಂ.