೮. ಉಣಾದಿಕಪ್ಪ

ಛಟ್ಠಕಣ್ಡ

೬೨೪. , ೫೬೩. ಕತ್ತರಿ ಕಿತ.

ಕತ್ತುಇಚ್ಚೇತಸ್ಮಿಂ ಅತ್ಥೇ ಕಿತ ಪಚ್ಚಯಾ ಹೋನ್ತಿ.

ಕಾರು, ಕಾರುಕೋ, ಕಾರಕೋ, ಪಾಚಕೋ, ಕತ್ತಾ, ಜನಿತಾ, ಪಚಿತಾ, ನೇತಾ.

೬೨೫. , ೬೦೫. ಭಾವಕಮ್ಮೇಸು ಕಿಚ್ಚತ್ತ ಖತ್ಥಾ.

ಭಾವಕಮ್ಮಇಚ್ಚೇತೇಸ್ವತ್ಥೇಸು ಕಿಚ್ಚ ತ್ತ ಖತ್ಥಇಚ್ಚೇತೇ ಪಚ್ಚಯಾ ಹೋನ್ತಿ.

ಉಪಸಮ್ಪಾದೇತಬ್ಬಂ ಉಪಸಮ್ಪಾದನೀಯಂ ಭವತಾ, ಸಯಿತಬ್ಬಂ ಭವತಾ, ಕತ್ತಬ್ಬಂ ಭವತಾ, ಭೋತ್ತಬ್ಬೋ ಓದನೋ ಭವತಾ, ಅಸಿತಬ್ಬಂ ಭೋಜನಂ ಭವತಾ, ಅಸಿತಂ ಭವತಾ, ಸಯಿತಂ ಭವತಾ, ಪಚಿತಂ ಭವತಾ, ಅಸಿತಂ ಅಸನಂ ಭವತಾ, ಸಯಿತಂ ಸಯನಂ ಭವತಾ, ಪಚಿತೋ ಓದನೋ ಭವತಾ, ಕಿಞ್ಚಿಸ್ಸಯೋ, ಈಸಸ್ಸಯೋ, ದುಸ್ಸಯೋ, ಸುಸ್ಸಯೋ ಭವತಾ.

೬೨೬. , ೬೩೪. ಕಮ್ಮನಿ ದುತಿಯಾಯ ತ್ತೋ.

ಕಮ್ಮನಿ ಇಚ್ಚೇತಸ್ಮಿಂ ಅತ್ಥೇ ದುತಿಯಾಯಂ ವಿಭತ್ತಿಯಂ ಕತ್ತರಿ ತ್ತಪಚ್ಚಯೋ ಹೋತಿ.

ದಾನಂ ದಿನ್ನೋ ದೇವದತ್ತೋ, ಸೀಲಂ ರಕ್ಖಿತೋ ದೇವದತ್ತೋ, ಭತ್ತಂ ಭುತ್ತೋ ದೇವದತ್ತೋ, ಗರುಂ ಉಪಾಸಿತೋ ದೇವದತ್ತೋ.

೬೨೭. , ೬೫೨. ಖ್ಯಾದೀಹಿ ಮಾನ ಮ ಚ ತೋ ವಾ.

ಖಿ ಭೀ ಸು ರು ಹು ವಾ ಧೂ ಹಿ ಲೂ ಪೀ ಅದಇಚ್ಚೇವಮಾದೀಹಿ ಧಾತೂಹಿ ಮನ ಪಚ್ಚಯೋ ಹೋತಿ, ಮಸ್ಸ ಚ ತೋ ಹೋತಿ ವಾ.

ಖೀಯನ್ತಿ ಉಪದ್ದವಾ ಏತ್ಥಾತಿ ಖೇಮೋ, ಭಾಯಿತಬ್ಬೋತಿ ಭೇಮೋ, ಭಾಯನ್ತಿ ಏತಸ್ಮಾತಿ ವಾ ಭೇಮೋ, ರಂಸಿಯೋ ಅಭಿಸ್ಸವೇತೀತಿ ಸೋಮೋ, ರವತಿ ಗಚ್ಛತೀತಿ ರೋಮೋ, ಹುವತಿ ಜುಹ್ವತಿ ಏತೇನಾತಿ ಹೋಮೋ, ಪಟಿಲೋಮವಸೇನ ವಾತಿ ಗಚ್ಛತೀತಿ ವಾಮೋ, ಲಾಮಕವಸೇನ ವಾತಿ ಗಚ್ಛತಿ ಪವತ್ತತೀತಿ ವಾ ವಾಮೋ, ಧುನಾತಿ ಕಮ್ಪತೀತಿ ಧೂಮೋ, ಸೇಟ್ಠಭಾವೇನ ಹಿನೋತಿ ಪವತ್ತತಿ ಚಿತ್ತಂ ಏತಸ್ಮಿನ್ತಿ ಹೇಮೋ, ಲುನಿತಬ್ಬೋತಿ ಲೋಮೋ, ಮಂಸಚಮ್ಮಾನಿ ಲುನಾತಿ ಛಿನ್ದತೀತಿ ವಾ ಲೋಮೋ, ಪಿಯನಂ ಪೇಮೋ, ಪಿಯಾಯಿತಬ್ಬೋತಿ ವಾ ಪೇಮೋ, ಸುಖದುಕ್ಖಂ ಅದತಿ ಭಕ್ಖತೀತಿ ಅತ್ತಾ, ಜಾತಿಜರಾಮರಣಾದೀಹಿ ಅದೀಯತೇ ಭಕ್ಖೀಯತೇತಿ ವಾ ಅತ್ತಾ, ಆತುಮಾ.

೬೨೮. , ೬೫೩. ಸಮಾದೀಹಿ ಥ ಮಾ.

ಸಮು ದಮು ದರ ರಹ ದು ಹಿ ಸಿ ಭೀ ದಾ ಯಾ ಸಾ ಠಾಭಸಇಚ್ಚೇವಮಾದೀಹಿ ಧಾತೂಹಿ ಥ ಮ ಪಚ್ಚಯಾ ಹೋನ್ತಿ.

ಸಮೇತೀತಿ ಸಮಥೋ, ದಮತೀತಿ ದಮಥೋ, ದಮನಂ ವಾ ದಮಥೋ, ದಮಿತಬ್ಬೋತಿ ವಾ ದಮಥೋ, ದರತೀತಿ ದರಥೋ, ಜಿಣ್ಣಭಾವಂ ರಹಿಸ್ಸತಿ ಗಣ್ಹಿಸ್ಸತೀತಿ ರಥೋ, ದಬ್ಬಸಮ್ಭಾರೇ ರಹತಿ ಗಣ್ಹಾತೀತಿ ವಾ ರಥೋ, ದವತಿ ಗಚ್ಛತೀತಿ ದುಮೋ, ದವತಿ ವುದ್ಧಿ ವಿರುಳ್ಹಿ ಗಚ್ಛತಿ ಪವತ್ತತೀತಿ ಉದ್ಧಂ ವಾ ದುಮೋ, ಪಥವೀಪಬ್ಬತಾದೀಸು ಗಚ್ಛತಿ ಪತತೀತಿ ಹಿಮೋ, ಕಮ್ಮವಾಚಾಯ ಬನ್ಧತಿ ಏತ್ಥಾತಿ ಸೀಮಾ. ಬನ್ಧಿತಬ್ಬಾತಿ ವಾ ಸೀಮಾ. ಭಾಯನ್ತಿ ಏತಸ್ಮಾತಿ ಭೀಮೋ, ಸತ್ತೇ ಅವಖಣ್ಡೇನ್ತಿ ನಿವಾರೇನ್ತಿ ಏತೇನಾತಿ ದಾಮೋ, ಮೂಸಿಕಾದೀಹಿ ಖಾದೀಯತಿ ಅವಖಣ್ಡೀಯತೀತಿ ವಾ ದಾಮೋ, ಯಾತಿ ಗಚ್ಛತೀತಿ ಯಾಮೋ, ಪರೇಸಂ ಚಿತ್ತಂ ಗಣ್ಹಿತುಂ ಸಮತ್ಥೇತೀತಿ ಸಾಮೋ, ತಿಟ್ಠನ್ತಿ ಏತೇನಾತಿ ಥಾಮೋ, ಭಸತಿ ಭಸ್ಮೀಕರೀಯತೀತಿ ಭಸ್ಮಾ.

೬೨೯. , ೫೬೯. ಗಹಸ್ಸು’ಪಧಸ್ಸೇ ವಾ.

ಗಹಇಚ್ಚೇತಸ್ಸ ಧಾತುಸ್ಸ ಉಪಧಸ್ಸ ಅಕಾರಸ್ಸ ಏತ್ತ ಹೋತಿ ವಾ.

ದಬ್ಬಸಮ್ಭಾರ ಗಣ್ಹಾತೀತಿ ಗೇಹಂ, ಗಹಂ.

೬೩೦. , ೬೫೪. ಮಸುಸ್ಸ ಸುಸ್ಸ ಚ್ಛರ ಚ್ಛೇರಾ.

ಮಸುಇಚ್ಚೇತಸ್ಸ ಪಾಟಿಪದಿಕಸ್ಸ ಸುಸ್ಸ ಚ್ಛರಚ್ಛೇರಾದೇಸಾ ಹೋನ್ತಿ.

ಮಚ್ಛರತೀತಿ ಮಚ್ಛರೋ, ಏವಂ ಮಚ್ಛೇರೋ.

೬೩೧. , ೬೫೫. ಆಪುಬ್ಬಚರಸ್ಸ ಚ.

ಆಪುಬ್ಬಸ್ಸ ಚರಇಚ್ಚೇತಸ್ಸ ಧಾತುಸ್ಸ ಚ್ಛರಿಯಚ್ಛರಚ್ಛೇರಾ ದೇಸಾ ಹೋನ್ತಿ, ಆಪುಬ್ಬಸ್ಸ ಚ ರಸ್ಸೋ ಹೋತಿ.

ಆಭುಸೋ ಚರಿತಬ್ಬನ್ತಿ ಅಚ್ಛರಿಯಂ. ಏವಂ ಅಚ್ಛರಂ, ಅಚ್ಛೇರಂ.

ಚಗ್ಗಹಣೇನ ಮಸುಸ್ಸ ಸುಸ್ಸಾಪಿ ಚ್ಛರಿಯಾದೇಸೋ ಹೋತಿ, ಮಚ್ಛರಿಯಂ.

೬೩೨. , ೬೫೬. ಅಲ ಕಲ ಸಲೇಹಿ ಲಯಾ.

ಅಲ ಕಲ ಸಲಇಚ್ಚೇತೇಹಿ ಧಾತೂಹಿ ಲ ಯಪಚ್ಚಯಾ ಹೋನ್ತಿ.

ಅಲತಿ ಸಮತ್ಥೇತೀತಿ ಅಲ್ಲಂ, ಕಲಿತಬ್ಬಂ ಸಙ್ಖ್ಯಾತಬ್ಬನ್ತಿ ಕಲ್ಲಂ, ಸಲತಿ ಗಚ್ಛತಿ ಪವಿಸತೀತಿ ಸಲ್ಲಂ. ಏವಂ ಅಲ್ಯಂ, ಕಲ್ಯಂ, ಸಲ್ಯಂ.

೬೩೩. , ೬೫೭. ಯಾಣ ಲಾಣಾ.

ತೇಹಿ ಕಲ ಸಲಇಚ್ಚೇತೇಹಿ ಧಾತೂಹಿ ಯಾಣ ಲಾಣಪಚ್ಚಯಾ ಹೋನ್ತಿ.

ಕಲಿತಬ್ಬಂ ಸಙ್ಖ್ಯಾತಬ್ಬನ್ತಿ ಕಲ್ಯಾಣಂ, ಗಣತೋ ಪಟಿಕ್ಕಮಿತ್ವಾ ಸಲನ್ತಿ ಏತ್ಥಾತಿ ಪಟಿಸಲ್ಯಾಣಂ. ಏವಂ ಸಲ್ಲಾಣೋ, ಪಟಿಸಲ್ಲಾಣೋ.

೬೩೪. , ೬೫೮. ಮಥಿಸ್ಸ ಥಸ್ಸ ಲೋ ಚ.

ಮಥಇಚ್ಚೇತಸ್ಸ ಧಾತುಸ್ಸ ಥಸ್ಸ ಲಾದೇಸೋಹೋತಿ. ಅಞ್ಞಮಞ್ಞಂ ಮಥತಿ ವಿಲೋಳತೀತಿ ಮಲ್ಲೋ, ಮಲ್ಲಂ.

ಚಗ್ಗಹಣೇನ ಲತೋ ಕೋ ಚ ಆಗಮೋ ಹೋತಿ. ಮಲ್ಲಕೋ, ಮಲ್ಲಕಂ.

೬೩೫. , ೫೫೯. ಪೇಸಾತಿಸಗ್ಗಪತ್ತಕಾಲೇಸುಕಿಚ್ಚಾ.

ಪೇಸ ಅತಿಸಗ್ಗ ಪತ್ತಕಾಲಇಚ್ಚೇತೇಸ್ವತ್ಥೇಸು ಕಿಚ್ಚಪಚ್ಚಯಾ ಹೋನ್ತಿ.

ಕತ್ತಬ್ಬಂ ಕಮ್ಮಂ ಭವತಾ, ಕರಣೀಯಂ ಕಿಚ್ಚಂ ಭವತಾ, ಭೋತ್ತಬ್ಬಂ ಭೋಜನಂ ಭವತಾ, ಭೋಜನೀಯಂ ಭೋಜನಂ ಭವತಾ, ಅಜ್ಝಯಿತಬ್ಬಂ ಅಜ್ಝೇಯ್ಯಂ ಭವತಾ, ಅಜ್ಝಯನೀಯಂ ಅಜ್ಝೇಯ್ಯಂ ಭವತಾ.

೬೩೬. , ೬೫೯. ಅವಸ್ಸಕಾ’ಧಮಿಣೇಸು ಣೀ ಚ.

ಅವಸ್ಸಕ ಅಧಮಿಣಇಚ್ಚೇತೇಸ್ವತ್ಥೇಸು ಣೀಪಚ್ಚಯೋ ಹೋತಿ, ಕಿಚ್ಚಾ ಚ.

ಅವಸ್ಸತೇ ತಾವ – ಕಾರೀಸಿ ಮೇ ಕಮ್ಮಂ ಅವಸ್ಸಂ ಹಾರೀಸಿ ಮೇ ಭಾರಂ ಅವಸ್ಸಂ.

ಅಧಮಿಣೇ – ದಾಯೀಸಿ ಮೇ ಸತಂ ಇಣಂ, ಧಾರೀಸಿ ಮೇ ಸಹಸ್ಸಂ ಇಣಂ.

ಕಿಚ್ಚಾ ಚ – ದಾತಬ್ಬಂ ಮೇ ಭವತಾ ಸತಂ ಇಣಂ. ಧಾರಯಿತಬ್ಬಂ ಮೇ ಭವತಾ ಸಹಸ್ಸಂ ಇಣಂ, ಕತ್ತಬ್ಬಂ ಮೇ ಭವತಾ ಗೇಹಂ, ಕರಣೀಯಂ ಮೇ ಭವತಾ ಕಿಚ್ಚಂ, ಕಾರಿಯಂ ಮೇ ಭವತಾ ಸಯನಂ.

೬೩೭. , ೦. ಅರಹಸಕ್ಕಾದೀಹಿ ತುಂ.

ಅರಹ ಸಕ್ಕ ಭಬ್ಬಇಚ್ಚೇವಮಾದೀಹಿ ಪಯೋಗೇ ಸತಿ ಸಬ್ಬಧಾತೂಹಿ ತುಂಪಚ್ಚಯೋ ಹೋತಿ.

ಅರಹಾ ಭವಂ ವತ್ತುಂ, ಅರಹಾ ಭವಂ ಕತ್ತುಂ, ಸಕ್ಕಾ ಭವಂ ಹನ್ತುಂ, ಸಕ್ಕಾ ಭವಂ ಜನೇತುಂ, ಜನಿತುಂ, ಭವಿತುಂ, ಸಕ್ಕಾ ಭವಂ ದಾತುಂ, ಸಕ್ಕಾ ಭವಂ ಗನ್ತುಂ, ತಬ್ಬೋ ಭವಂ ಜನೇತುಂ ಇಚ್ಚೇವಮಾದಿ.

೬೩೮. , ೬೬೦. ವಜಾದೀಹಿಪಬ್ಬಜ್ಜಾದಯೋ ನಿಪ್ಪಜ್ಜನ್ತೇ.

ವಜಇಚ್ಚೇವಮಾದೀಹಿ ಧಾತೂಹಿ, ಉಪಸಗ್ಗಪಚ್ಚಯಾದೀಹಿ ಚ ಪಬ್ಬಜ್ಜಾದಯೋ ಸದ್ದಾ ನಿಪ್ಪಜ್ಜನ್ತೇ.

ಪಠಮಮೇವ ವಜಿತಬ್ಬಾತಿ ಪಬ್ಬಜ್ಜಾ, ಇಞ್ಜನಂ ಏಜ್ಜಾ, ಸಮಜ್ಜನಂ ಸಮಜ್ಜಾ, ನಿಸೀದನಂ ನಿಸಜ್ಜಾ, ವಿಜಾನನಂ ವಿಜ್ಜಾ ವಿಸಜ್ಜನಂ ವಿಸಜ್ಜಾ, ಪದನಂ ಪಜ್ಜಾ, ಹನನಂ ವಜ್ಝಾ, ಏಸನಂ ಇಚ್ಛಾ, ಅತಿಏಸನಂ ಅತಿಚ್ಛಾ, ಸದನಂ ಸಜ್ಜಾ, ಸಯನ್ತಿ ಏತ್ಥಾತಿ ಸೇಯ್ಯಾ, ಸಮ್ಮಾ ಚಿತ್ತಂ ನಿಧೇತಿ ಏತಾಯಾತಿ ಸದ್ಧಾ, ಚರಿತಬ್ಬಾ ಚರಿಯಾ, ಕರಣಂ ಕಿರಿಯಾ, ರುಜನಂ ರುಚ್ಛಾ, ಪದನಂ ಪಚ್ಛಾ, ರಿಞ್ಚನಂ ರಿಚ್ಛಾ, ತಿಕಿಚ್ಛನಂ ತಿತಿಚ್ಛಾ, ಸಂಕೋಚನಂ ಸಂಕುಚ್ಛಾ, ಮದನಂ ಮಚ್ಛಾ, ಲಭನಂ ಲಚ್ಛಾ, ರದಿಹಬ್ಬಾತಿ ರಚ್ಛಾ, ರದನಂ ವಿಲೇಖನಂ ವಾರಚ್ಛಾ, ಅಧೋ ಭಾಗೇನ ಗಚ್ಛತೀತಿ ತಿರಚ್ಛಾ, ತಿರಚ್ಛಾನೋ, ಅಜನಂ ಅಚ್ಛಾ, ತಿತಿಕ್ಖತೀತಿ ತಿತಿಕ್ಖಾ, ಸಹ ಆಗಮನಂ ಸಾಗಚ್ಛಾ, ದುಟ್ಠು ಭಕ್ಖನಂ ದೋಭಚ್ಛಾ, ದುಟ್ಠು ರೋಸನಂ ದುರುಚ್ಛಾ, ಪುಚ್ಛನಂ ಪುಚ್ಛಾ, ಮುಹನಂ ಮುಚ್ಛಾ, ವಸನಂ ವಚ್ಛಾ, ಕಚನಂ ಕಚ್ಛಾ, ಸಹ ಕಥನಂ ಸಾಕಚ್ಛಾ, ತುದನಂ ತುಚ್ಛಾ, ವಿಸನಂ ವಿಚ್ಛಾ, ಪಿಸನಂ ಪಿಚ್ಛಿಲ್ಲಾ, ಸುಖದುಕ್ಖಂ ಮುದತಿ ಭಕ್ಖತೀತಿ ಮಚ್ಛೋ, ಸತ್ತಾನಂ ಪಾಣಂ ಮುಸೇತಿ ಚಜೇತೀತಿ ಮಚ್ಚು, ಸತನಂ ಸಚ್ಚಂ, ಉದ್ಧಂ ಧುನಾತಿ ಕಮ್ಪತೀತಿ ಉದ್ಧಚ್ಚಂ, ನಟನಂ ನಚ್ಚಂ, ನಿತನಂ ನಿಚ್ಚಂ, ತಥನಂ ತಚ್ಛಂ ಇಚ್ಚೇವಮಾದಿ.

೬೩೯. , ೫೮೫. ಕ್ವಿಲೋಪೋ ಚ.

ಕ್ವಿಲೋಪೋ ಹೋತಿ, ಪುನ ಚ ನಿಪ್ಪಜ್ಜನ್ತೇ.

ವಿವಿಧೇಹಿ ಸೀಲಾದಿಗುಣೇಹಿ ಭವತೀತಿ ವಿಭೂ, ವಿಸೇಸೇನ ವಾ ಭವತೀತಿ ವಿಭೂ, ಸಯಂ ಅತ್ತನಾ ಭವತೀತಿ ಸಯಮ್ಭೂ, ಅಭಿವಿತ್ವಾ ಭವತೀತಿ ಅಭಿಭೂ, ಸಂ ಸುಟ್ಠು ಧುನಾತಿ ಕಮ್ಪತೀತಿ ಸನ್ಧೂ, ವಿಸೇಸೇನ ಭಾತಿ ದಿಬ್ಬತೀತಿ ವಿಭಾ, ನಿಸ್ಸೇಸೇನ ಭಾತಿ ದಿಬ್ಬತೀತಿ ನಿಭಾ, ಪಕಾರೇನ ಭಾತಿ ದಿಬ್ಬತೀತಿ ಪಭಾ, ಸಹ ಭಾಸನ್ತಿ ಏತ್ಥಾತಿ ಸಭಾ, ಆಭುಸೋ ಭಾತಿ ದಿಬ್ಬತೀತಿ ಆಭಾ, ಭುಜೇನ ಕುಟಿಲೇನ ಗಚ್ಛತೀತಿ ಭುಜಗೋ, ತುರಿತತುರಿತೋ ಗಚ್ಛತೀತಿ ತುರಗೋ, ಸಂ ಸುಟ್ಠು ಪಥವಿಂ ಖನತೀತಿ ಸಙ್ಖೋ, ವಿಸೇಸೇನ ಯಮತಿ ಉಪರಮತೀತಿ ವಿಯೋ, ಸುಟ್ಠು ಮನತಿ ಜಾನಾತೀತಿ ಸುಮೋ, ಪರಿ ಸಮನ್ತತೋ ತನೋತಿ ವಿತ್ಥಾರೇತೀತಿ ಪರಿತೋ ಇಚ್ಚೇವಮಾದಿ.

೬೪೦. , ೦. ಸಚಜಾನಂ ಕಗಾ ಣಾನುಬನ್ಧೇ.

ಸಚ ಜಾನಂ ಧಾತೂನಮನ್ತಾನಂ ಚಜಾನಂ ಕಗಾದೇಸಾ ಹೋನ್ತಿ ಯಥಾಸಙ್ಖ್ಯಂ ಣಾನುಬನ್ಧೇ ಪಚ್ಚಯೇ ಪರೇ.

ಓಕೋ, ಪಾಕೋ, ಸೇಕೋ, ಸೋಕೋ, ವಿವೇಕೋ, ಚಾಗೋ, ಯೋಗೋ, ಭೋಗೋ, ರೋಗೋ, ರಾಗೋ, ಭಾಗೋ, ಭಙ್ಗೋ, ರಙ್ಗೋ, ಸಙ್ಗೋ.

೬೪೧. , ೫೭೨. ನುದಾದೀಹಿ ಯುಣ್ವೂನಮನಾನನಾಕಾನನಕಾ ಸಕಾರಿತೇಹಿ ಚ.

ನುದ ಸೂದ ಜನ ಸು ಲೂ ಹು ಪು ಭೂ ಞಾ ಅ ಸ ಸಮುಇಚ್ಚೇವಮಾದೀಹಿ ಧಾತೂಹಿ, ಫನ್ದ ಚಿತಿ ಆಣ ಇಚ್ಚೇವಮಾದೀಹಿ ಸಕಾರಿತೇಹಿ ಚ ಯುಣ್ವೂನಂ ಪಚ್ಚಯಾನಂ ಅನ ಆನನ ಅಕ ಆನನಕಾದೇಸಾ ಹೋನ್ತಿ ಯಥಾಸಙ್ಖ್ಯಂ ಕತ್ತರಿ, ಭಾವಕರಣೇಸು ಚ.

ಕತ್ತರಿ ತಾವ – ಪನುದತೀತಿ ಪನೂದನೋ. ಏವಂ ಸೂದನೋ, ಜನನೋ, ಸವಣೋ, ಲವನೋ, ಹವನೋ, ಪವನೋ, ಭವನೋ, ಞಾಣೋ, ಅಸನೋ, ಸಮಣೋ.

ಭಾವೇ ಚ – ಪನುದತೇ ಪನೂದನಂ. ಏವಂ ಸೂದನಂ, ಜನನಂ, ಸವಣಂ, ಲವನಂ, ಹವನಂ, ಪವನಂ, ಭವನಂ, ಞಾಣಂ, ಅಸನಂ, ಸಮಣಂ, ಸಞ್ಜಾನನಂ, ಕುಯತೇ ಕಾನನಂ.

ಕಾರಿತೇ ಚ – ಫನ್ದಾಪೀಯತೇ ಫನ್ದಾಪನಂ, ಚೇತಾಪೀಯತೇ ಚೇತಾಪನಂ, ಆಣಾಪೀಯತೇ ಆಣಾಪನಂ.

ಕರಣೇ – ನುದನ್ತಿ ಅನೇನಾತಿ ನೂದನಂ, ಏವಂ ಸೂದನಂ, ಜನನಂ, ಸವಣಂ, ಲವಣಂ, ಹವನಂ, ಪವನಂ, ಭಗನಂ, ಞಾಣಂ, ಅಸನಂ, ಸವಣಂ.

ಪುನ ಕತ್ತರಿ – ನುದತೀತಿ ನೂದಕೋ, ಸೂದತೀತಿ ಸೂದಧಕಾ, ಜನೇತೀತಿ ಜನಕೋ, ಸುಣೋತೀತಿ ಸಾವಕೋ, ಲುನಾತೀತಿ ಲಾವಕೋ, ಜುಹೋತೀತಿ ಹಾವಕೋ, ಪುನಾತೀತಿ ಪಾವಕೋ, ಭವತೀತಿ ಭಾವಕೋ, ಜಾನಾತೀತಿ ಜಾನಕೋ, ಅಸತೀತಿ ಅಸಕೋ, ಉಪಾಸತೀತಿ ಉಪಾಸಕೋ, ಸಮೇತೀತಿ ಸಮಕೋ.

ಕಾರಿತೇ ತು – ಫನ್ದಾಪಯತೀತಿ ಫನ್ದಾಪಯಕೋ. ಏವಂ ಆಣಾಪಯಕೋ, ಚೇತಾಪಯಕೋ, ಸಞ್ಜಾನನಕೋ.

೬೪೨. , ೫೮೮. ಇ ಯ ತ ಮ ಕಿ ಏ ಸಾನ’ಮನ್ತಸ್ಸರೋ ದೀಘಂ ಕ್ವಚಿ ದು ಸ ಸ್ಸ ಗುಣಂ ದೋ ರಂ ಸಕ್ಖೀ ಚ.

ಇಯ ತ ಮ ಕಿ ಏ ಸಇಚ್ಚೇತೇಸಂ ಸಬ್ಬನಾಮಾನಮನ್ತೋ ಸರೋ ದೀಘಮಾಪಜ್ಜತೇ, ಕ್ವಚಿ ದುಸಇಚ್ಚೇತಸ್ಸ ಧಾತುಸ್ಸ ಉಕಾರೋ ಗುಣಮಾಪಜ್ಜತೇ, ದಕಾರೋ ರಕಾರಮಾಪಜ್ಜತೇ, ಧಾತ್ವನ್ತಸ್ಸ ಸಸ್ಸ ಚ ಸ ಕ್ಖ ಈಇಚ್ಚೇತೇ ಆದೇಸಾ ಹೋನ್ತಿ ಯಥಾಸಮ್ಭವಂ. ಏತೇ ಸದ್ದಾ ಸಕೇನ ಸಕೇನ ನಾಮೇನ ಯಥಾನುಪರೋಧೇನ ಬುದ್ಧಸಾಸನೇ ಪಚ್ಛಾ ಪುನ ನಿಪ್ಪಜ್ಜನ್ತೇ.

ಇಮಮಿವ ನಂ ಪಸ್ಸತೀತಿ ಈದಿಸೋ, ಯಮಿವ ನಂ ಪಸ್ಸತೀತಿ ಯಾದಿಸೋ, ತಮಿವ ನಂ ಪಸ್ಸತೀತಿ ತಾದಿಸೋ, ಮಮಿವ ನಂ ಪಸ್ಸತೀತಿ ಮಾದಿಸೋ, ಕಿಮಿವ ನಂ ಪಸ್ಸತೀತಿ ಕೀದಿಸೋ, ಏತಮಿವ ನಂ ಪಸ್ಸತೀತಿ ಏದಿಸೋ, ಸಮಾನಮಿವ ನಂ ಪಸ್ಸತೀತಿ ಸಾದಿಸೋ. ಇಮಮಿವ ನಂ ಪಸ್ಸತೀತಿ ಈರಿಸೋ, ಯಮಿವ ನಂ ಪಸ್ಸತೀತಿ ಯಾರಿಸೋ, ತಮಿವ ನಂ ಪಸ್ಸತೀತಿ ತಾರಿಸೋ, ಮಮಿವ ನಂ ಪಸ್ಸತೀತಿ ಮಾರಿಸೋ, ಕಿಮಿವ ನಂ ಪಸ್ಸತೀತಿ ಕೀರಿಸೋ, ಏತಮಿವ ನಂ ಪಸ್ಸತೀತಿ ಏರಿಸೋ, ಸಮಾನಮಿವ ನಂ ಪಸ್ಸತೀತಿ ಸಾರಿಸೋ. ಇಮಮಿವ ನಂ ಪಸ್ಸತೀತಿ ಈದಿಕ್ಖೋ, ಯಮಿವ ನಂ ಪಸ್ಸತೀತಿ ಯಾದಿಕ್ಖೋ, ತಮಿವ ನಂ ಪಸ್ಸತೀತಿ ತಾದಿಕ್ಖೋ, ಏವಂ ಮಾದಿಕ್ಖೋ, ಕೀದಿಕ್ಖೋ, ಏದಿಕ್ಖೋ, ಸಾದಿಕ್ಖೋ. ಈದೀ, ಯಾದೀ, ತಾದೀ, ಮಾದೀ, ಕೀದೀ, ಏದೀ, ಸಾದೀ.

ಚಗ್ಗಹಣೇನ ತೇಸಮೇವ ಸದ್ದಾನಂ ಇಯಇಚ್ಚೇವಮಾದೀನಮನ್ತೋ ಚ ಸರೋ ಕ್ವಚಿ ದೀಘತ್ಥಮಾಹು. ಈದಿಕ್ಖೋ, ಯಾದಿಕ್ಖೋ, ತಾದಿಕ್ಖೋ, ಮಾದಿಕ್ಖೋ, ಕೀದಿಕ್ಖೋ, ಏದಿಕ್ಖೋ, ಸಾದಿಕ್ಖೋ. ಇದಿಸೋ, ಸದಿಸೋ, ಸರಿಸೋ, ಸರಿಕ್ಖೋ.

೬೪೩. , ೬೩೫. ಭ್ಯಾದೀಹಿ ಮತಿ ಬುಧಿ ಪೂಜಾದೀಹಿ ಚ ತ್ತೋ.

ಭೀಇಚ್ಚೇವಮಾದೀಹಿ ಧಾತೂಹಿ, ಮತಿ. ಬುಧಿ ಪೂಜಾದಿತೋ ಚ ತ್ತ ಪಚ್ಚಯೋ ಹೋತಿ.

ಭಾಯಿತಬ್ಬೋತಿ ಭೀತೋ, ಸುಪಿತಬ್ಬೋತಿ ಸುತ್ತೋ, ಮಿಜ್ಜಿತಬ್ಬೋ ಸಿನೇಹೇತಬ್ಬೋತಿ ಮಿತ್ತೋ, ಸಮ್ಮನ್ನಿತಬ್ಬೋತಿ ಸಮ್ಮತೋ, ಸಂ ಸುಟ್ಠು ಮಾನಿತಬ್ಬೋ ಪೂಜೇತಬ್ಬೋತಿ ಸಮ್ಮತೋ, ಸಮ್ಮಾನೀಯಿತ್ಥಾತಿ ಸಮ್ಮತೋ, ಸಂಕಪ್ಪೀಯತೇತಿ ಸಙ್ಕಪ್ಪಿತೋ, ಸಂಕಪ್ಪೀಯಿತ್ಥಾತಿ ಸಙ್ಕಪ್ಪಿತೋ, ಸಮ್ಪಾದೀಯತೇತಿ ಸಮ್ಪಾದಿತೋ, ಸಮ್ಪಾದೀಯಿತ್ಥಾತಿ ಸಮ್ಪಾದಿತೋ, ಅವಧಾರೀಯತೇತಿ ಅವಧಾರಿತೋ, ಅವಧಾರೀಯಿತ್ಥಾತಿ ಅವಧಾರಿತೋ, ಬುಜ್ಝಿತಬ್ಬೋ ಞಾತಬ್ಬೋತಿ ಬುದ್ಧೋ, ಅಜ್ಝಯಿತಬ್ಬೋತಿ ಇತೋ, ಏತಬ್ಬೋ ಗನ್ತಬ್ಬೋತಿ ಇತೋ, ವಿದಿತಬ್ಬೋ ಞಾತಬ್ಬೋತಿ ವಿದಿತೋ, ತಕ್ಕೀಯತೇತಿ ತಕ್ಕಿತೋ, ಪೂಜೀಯತೇತಿ ಪೂಜಿತೋ, ಪೂಜೀಯಿತ್ಥಾತಿ ಪೂಜಿತೋ, ಅಪಚಾಯಿತಬ್ಬೋತಿ ಅಪಚಾಯಿತೋ, ಮಾನಿತಬ್ಬೋ ಪೂಜೇತಬ್ಬೋತಿ ಮಾನಿತೋ, ಅಪಚೀಯತೇತಿ ಅಪಚಿತೋ, ವನ್ದೀಯತೇತಿ ವನ್ದಿತೋ, ವನ್ದೀಯಿತ್ಥಾತಿ ವನ್ದಿತೋ, ಸಕ್ಕರೀಯತೇತಿ ಸಕ್ಕಾರಿತೋ, ಸಕ್ಕರೀಯಿತ್ಥಾತಿ ಸಕ್ಕಾರಿತೋ.

೬೪೪. , ೬೬೧. ವೇಪು ಸೀ ದವ ವಮು ಕು ದಾ ಭೂ ಹ್ವಾದೀಹಿ ಥು ತ್ತಿಮ ಣಿಮಾ ನಿಬ್ಬತ್ತೇ.

ವೇಪು ಸೀ ದವ ವಮು ಕು ದಾ ಭೂ ಹುಇಚ್ಚೇವಮಾದೀಹಿ ಧಾತೂಹಿ ಯಥಾಸಮ್ಭವಂ ಥು ತ್ತಿಮ ಣಿಮಪಚ್ಚಯಾ ಹೋನ್ತಿ ನಿಬ್ಬತ್ತತ್ಥೇ.

ವೇಪನಂ ವೇಪೋ, ತೇನ ನಿಬ್ಬತ್ತೋ ವೇಪಥು, ಸಯನಂ ಸಯೋ, ತೇನ ನಿಬ್ಬತ್ತೋ ಸಯಥು, ದವನಂ ದವೋ, ತೇನ ನಿಬ್ಬತ್ತೋ ದವಥು. ವಮನಂ ವಮೋ, ತೇನ ನಿಬ್ಬತ್ತೋ ವಮಥು. ಕುತ್ತಿ ಕರಣಂ, ತೇನ ನಿಬ್ಬತ್ತಂ ಕುತ್ತಿಮಂ. ದಾತಿ ದಾನಂ, ತೇನ ನಿಬ್ಬತ್ತಂ ದತ್ತಿಮಂ. ಭೂತಿ ಭವನಂ, ತೇನ ನಿಬ್ಬತ್ತಂ ಭೋತ್ತಿಮಂ. ಅವಹುತಿ ಅವಹನಂ, ತೇನ ನಿಬ್ಬತ್ತಂ ಓಹಾವಿಮಂ.

೬೪೫. , ೬೬೨. ಅಕ್ಕೋಸೇ ನಮ್ಹಾನಿ.

ಅಕ್ಕೋಸಇಚ್ಚೇತಸ್ಮಿಂ ಅತ್ಥೇ ನಮ್ಹಿ ಪಟಿಸೇಧಯುತ್ತೇ ಆನಿಪಚ್ಚಯೋ ಹೋತಿ ಧಾತೂಹಿ.

ನ ಗಮಿತಬ್ಬಂ ಅಗಮಾನಿ ತೇ ಜಮ್ಮ ದೇಸಂ, ನ ಕತ್ತಬ್ಬಂ ಅಕರಾಣಿ ತೇ ಜಮ್ಮ ಕಮ್ಮಂ.

ನಮ್ಹೀತಿ ಕಿಮತ್ಥಂ? ವಿಪತ್ತಿ ತೇ ಜಮ್ಮ, ವಿಕತಿ ತೇ ಜಮ್ಮ.

ಅಕ್ಕೋಸೇತಿ ಕಿಮತ್ಥಂ? ನ ಗನ್ತಬ್ಬಾ ಅಗತಿ ತೇ.

೬೪೬. , ೪೧೯. ಏಕಾದಿತೋ ಸಕಿಸ್ಸ ಕ್ಖತ್ತುಂ.

ಏಕಾದಿತೋ ಸಕಿಸ್ಸ ಕ್ಖತ್ತುಂ ಹೋತಿ.

ಏಕಸ್ಸ ಪದತ್ಥಸ್ಸ ಸಕಿಂ ವಾರಂ ಏಕಕ್ಖತ್ತುಂ, ದ್ವಿನ್ನಂ ಪದತ್ಥಾನಂ ಸಕಿಂ ವಾರಂ ದ್ವಿಕ್ಖತ್ತುಂ, ತಿಣ್ಣಂ ಪದತ್ಥಾನಂ ಸಕಿಂ ವಾರಂ ತಿಕ್ಖತ್ತುಂ, ಏವಂ ಚತುಕ್ಖತ್ತುಂ, ಪಞ್ಚಕ್ಖತ್ತುಂ, ಛಕ್ಖತ್ತುಂ, ಸತ್ತಕ್ಖತ್ತುಂ, ಅಟ್ಠಕ್ಖತ್ತುಂ, ನವಕ್ಖತ್ತುಂ, ದಸಕ್ಖತ್ತುಂ. ಇಚ್ಚೇವಮಾದಯೋ ಸದ್ದಾ ಯೋಜೇತಬ್ಬಾ.

೬೪೭. , ೬೬೩. ಸುನಸ್ಸುನಸ್ಸೋಣ ವಾನುವಾನೂನುನಖುನಾನಾ.

ಸುನಇಚ್ಚೇತಸ್ಸ ಪಾಟಿಪದಿಕಸ್ಸ ಉನಸ್ಸ ಓಣ ವಾನ ಉವಾನ ಊನ ಉನಖ ಉನ ಆ ಆನಾದೇಸಾ ಹೋನ್ತಿ.

ಸಾಮಿಕಸ್ಸ ಸದ್ದಂ ಸುಣಾತೀತಿ ಸೋಣೋ, ಸಾಮಿಕಸ್ಸ ಸದ್ದಂ ಸುಣಾತೀತಿ ಸ್ವಾನೋ, ಏವಂ ಸುವಾನೋ, ಸೂನೋ, ಸುನಖೋ, ಸುನೋ, ಸಾ, ಸಾನೋ.

೬೪೮. , ೬೬೪. ತರುಣಸ್ಸ ಸುಸು ಚ.

ತರುಣಇಚ್ಚೇತಸ್ಸ ಪಾಟಿಪದಿಕಸ್ಸ ಸುಸು ಆದೇಸೋ ಹೋತಿ.

ಸುಸು ಕಾಳಕೇಸೋ.

೬೪೯. , ೬೬೫. ಯುವಸ್ಸುವಸ್ಸುವುವಾನುನೂನಾ.

ಯುವಇಚ್ಚೇತಸ್ಸ ಪಾಟಿಪದಿಕಸ್ಸ ಉವಸ್ಸ ಉವಉವಾನ ಉನಊನಾದೇಸಾ ಹೋನ್ತಿ.

ಯುವಾ, ಯುವಾನೋ, ಯುನೋ, ಯೂನೋ.

೬೫೦. , ೬೫೧. ಕಾಲೇ ವತ್ತಮಾನಾತೀತೇ ಣ್ವಾದಯೋ.

ಕಾಲೇ ವತ್ತಮಾನತ್ಥೇ ಚ ಅತೀತತ್ಥೇ ಚ ಣು ಯು ತಪಚ್ಚಯಾ ಹೋನ್ತಿ.

ಅಕಾಸಿ, ಕರೋತೀತಿ ಕಾರು, ಅಗಚ್ಛಿ, ಗಚ್ಛತೀತಿ, ವಾಯು, ಅಭವಿ, ಭವತೀತಿ ಭೂತಂ.

೬೫೧. , ೬೪೭. ತವಿಸ್ಸತಿ ಗಮಾದೀಹಿ ಣೀ ಘಿಣ.

ಭವಿಸ್ಸತಿಕಾಲತ್ಥೇ ಗಮು ಭಜ ಸು ಠಾಇಚ್ಚೇವಮಾದೀಹಿ ಧಾತೂಹಿ ಣೀ ಘಿಣ ಪಚ್ಚಯಾ ಹೋನ್ತಿ.

ಆಯತಿಂ ಗಮಿತುಂ ಸೀಲಂ ಯಸ್ಸ, ಸೋ ಹೋತೀತಿ ಗಾಮೀ, ಆಯತಿಂ ಭಜಿತುಂ ಸೀಲಂ ಯಸ್ಸ, ಸೋ ಹೋತೀತಿ ಭಾಜೀ, ಆಯತಿಂ ಪಸ್ಸಾಪಿತುಂ ಸೀಲಂ ಯಸ್ಸ, ಸೋ ಹೋತೀತಿ ಪಸ್ಸಾವಿ, ಆಯತಿಂ ಪಟ್ಠಾಯಿತುಂ ಸೀಲಂ ಯಸ್ಸ, ಸೋ ಹೋತೀತಿ ಪಟ್ಠಾಯಿ.

೬೫೨. , ೬೪೮. ಕ್ರಿಯಾಯಂ ಣ್ವು ತವೋ.

ಕ್ರಿಯಾಯಮತ್ಥೇ ಣ್ವು ತುಇಚ್ಚೇತೇ ಪಚ್ಚಯಾ ಹೋನ್ತಿ ಭವಿಸ್ಸತಿಕಾಲೇ.

‘‘ಕರಿಸ್ಸ’’ನ್ತಿ ಕಾರಕೋ ವಜತಿ, ‘‘ಭುಞ್ಜಿಸ್ಸ’’ನ್ತಿ ಭೋತ್ತಾ ವಜತಿ.

೬೫೩. , ೩೦೬. ಭಾವವಾಚಿಮ್ಹಿ ಚತುತ್ಥೀ.

ಭಾವವಾಚಿಮ್ಹಿ ಚತುತ್ಥೀವಿಭತ್ತಿ ಹೋತಿ ಭವಿಸ್ಸತಿಕಾಲೇ,

ಪಚಿಸ್ಸತೇ, ಪಚನಂ ವಾ ಪಾಕೋ, ಪಾಕಾಯ ವಜತಿ. ಭುಞ್ಜಿಸ್ಸತೇ, ಭೋಜನಂ ವಾ ಭೋಗೋ, ಭೋಗಾಯ ವಜತಿ. ನಚ್ಚಿಸ್ಸತೇ, ನಚ್ಚನಂ ವಾ ನಚ್ಚಂ, ನಚ್ಚಾಯ ವಜತಿ.

೬೫೪. , ೬೪೯. ಕಮ್ಮನಿ ಣೋ.

ಕಮ್ಮನಿ ಉಪಪದೇ ಣಪಚ್ಚಯೋ ಹೋತಿ ಭವಿಸ್ಸತಿಕಾಲೇ.

ನಗರಂ ಕರಿಸ್ಸತಿ ನಗರಕಾರೋ ವಜತಿ, ಸಾಲಿಂ ಲಾವಿಸ್ಸತಿ ಸಾಲಿಲಾವೋ ವಜತಿ, ಧಞ್ಞಂ ವಪಿಸ್ಸತಿ ಧಞ್ಞವಾಪೋ ವಜತಿ, ಭೋಗಂ ದದಿಸ್ಸತಿ ಭೋಗದಾಯೋ ವಜತಿ, ಸಿನ್ಧುಂ ಪಿವಿಸ್ಸತಿ ಸಿನ್ಧುಪಾಯೋ ವಜತಿ.

೬೫೫. , ೬೫೦. ಸೇಸೇ ಸ್ಸಂ ನ್ತುಮಾನಾನಾ.

ಸೇಸಇಚ್ಚೇತಸ್ಮಿಂ ಅತ್ಥೇ ಸ್ಸಂ ನ್ತು ಮಾನ ಆನ ಇಚ್ಚೇತೇ ಪಚ್ಚಯಾ ಹೋನ್ತಿ ಭವಿಸ್ಸತಿಕಾಲೇ ಕಮ್ಮೂಪಪದೇ.

ಕಮ್ಮಂ ಕರಿಸ್ಸತಿ ಕಮ್ಮಂ ಕರಿಸ್ಸಂ, ಏವಂ ಕಮ್ಮಂ ಕರೋನ್ತೋ, ಕಮ್ಮಂ ಕುರುಮಾನೋ, ಕಮ್ಮಂ ಕರಾನೋ ವಜತಿ. ಭೋಜನಂ ಭುಞ್ಜಿಸ್ಸತಿ ಭೋಜನಂ ಭುಞ್ಜಿಸ್ಸಂ, ಏವಂ ಭೋಜನಂ ಭುಞ್ಜನ್ತೋ, ಭೋಜನಂ ಭುಞ್ಜಮಾನೋ, ಭೋಜನಂ ಭುಞ್ಜಾನೋ ವಜತಿ. ಖಾದನಂ ಖಾದಿಸ್ಸತಿ ಖಾದನಂ ಖಾದಿಸ್ಸಂ, ಏವಂ ಖಾದನಂ ಖಾದನ್ತೋ, ಖಾದನಂ ಖಾದಮಾನೋ, ಖಾದನಂ ಖಾದಾನೋ ವಜತಿ. ಮಗ್ಗಂ ಚರಿಸ್ಸತಿ ಮಗ್ಗಂ ಚರಿಸ್ಸಂ, ಏವಂ ಮಗ್ಗಂ ಚರನ್ತೋ, ಮಗ್ಗಂ ಚರಮಾನೋ, ಮಗ್ಗಂ ಚರಾನೋ ವಜತಿ. ಭಿಕ್ಖಂ ಭಿಕ್ಖಿಸ್ಸತಿ ಭಿಕ್ಖಂ ಭಿಕ್ಖಿಸ್ಸಂ, ಏವಂ ಭಿಕ್ಖಂ ಭಿಕ್ಖನ್ತೋ, ಭಿಕ್ಖಂ ಭಿಕ್ಖಮಾನೋ, ಭಿಕ್ಖಂ ಭಿಕ್ಖಾನೋ ವಜತಿ.

೬೫೬. , ೬೬೬. ಛವಾದೀತಿ ತತ್ರಣ.

ಛ ದ ಚಿ ತಿ ಸು ನೀ ವಿ ದ ಪದ ತನು ಯತ ಅದ ಮದ ಯುಜ ವತುಮಿದ ಮಾ ಪು ಕ ಲ ವರ ವೇ ಪು ಗುಪ ದಾ ಇಚ್ಚೇವಮಾದೀಹಿ ಧಾತೂಹಿ ತತ್ರಣ ಇಚ್ಚೇತೇ ಪಚ್ಚಯಾ ಹೋನ್ತಿ ಯಥಾಸಮ್ಭವಂ.

ಆತಪಂ ಛಾದೇತೀತಿ ಛತ್ತಂ, ಛತ್ರಂ. ಆರಮ್ಮಣಂ ಚಿನ್ತೇತೀತಿ ಚಿತ್ತಂ, ಚಿತ್ರಂ. ಚಿನ್ತೇನ್ತಿ ಸಮ್ಪಯುತ್ತಧಮ್ಮಾ ಏಥೇನಾತಿ ವಾ ಚಿತ್ತಂ, ಚಿತ್ರಂ. ಅತ್ಥೇ ಅಭಿಸ್ಸವೇತೀತಿ ಸುತ್ತಂ, ಸುತ್ರಂ. ಅತ್ಥೇ ಸೂಚೇತೀತಿ ವಾ ಸುತ್ತಂ, ಸುತ್ರಂ. ಸತ್ತೇ ನೇತೀತಿ ನೇತ್ತಂ, ನೇತ್ರಂ. ಸತ್ತೇ ಇಚ್ಛಿತಟ್ಠಾನಂ ನೇನ್ತಿ ಏತೇನಾತಿ ವಾ ನೇತ್ತಂ, ನೇತ್ರಂ. ಪಕಾರೇನ ವಿದತೀತಿ ಪವಿತ್ತಂ, ಪವಿತ್ರಂ. ವಿವಿಧೇನ ಆಕಾರೇನ ಮಙ್ಗ ಪಾಪಂ ಪುನಾತಿ, ಸೋಧೇತೀತಿ ಪವಿತ್ತಂ, ಪವಿತ್ರಂ. ಸುಚಿಭಾವಂ ವಾ ಪಾಪುಣಾತೀತಿ ಪವಿತ್ತಂ, ಪವಿತ್ರಂ. ಪದತಿ ಪಾಪುಣಾತೀತಿ ಪತ್ತೋ, ಪತ್ರೋ. ಆಹಾರಾ ಪತನ್ತಿ ಏತ್ಥ ಭಾಜನೇತಿ ಪತ್ತಂ, ಪತ್ರಂ. ಪದತಿ ಪವತ್ತತೀತಿ ವಾ ಪತ್ತಂ, ಪತ್ರಂ. ತನೋತಿ ವಿತ್ಥಾರೇತೀತಿ ತನ್ತಂ, ತನ್ತ್ರಂ, ತನಿತಬ್ಬಂ ವಿತ್ಥಾರೇತಬ್ಬನ್ತಿ ವಾ ತನ್ತಂ, ತನ್ತ್ರ. ಯತತೀತಿ ಯತ್ತಂ, ಯತ್ರಂ. ಯತತಿ ವೀರಿಯಂ ಕರೋತಿ ಏತೇನಾತಿ ವಾ ಯತ್ತಂ, ಯತ್ರಂ. ಯತನಂ ವಾ ಯತ್ತಂ, ಯತ್ರಂ. ಸುಖದುಕ್ಖಂ ಅದತಿ ಭಕ್ಖತೀತಿ ಅತ್ತಾ, ಅತ್ರಾ. ಮದತೀತಿ ಮತ್ತಂ, ಮತ್ರಂ. ವತ್ಥುಂ ಯುಜ್ಜನ್ತಿ ಏತೇನಾತಿ ಯೋತ್ತಂ, ಯೋತ್ರಂ. ವತ್ತತೀತಿ ವತ್ತಂ, ವತ್ರಂ. ಮಿದತಿ ಸಿನೇಹಂ ಕರೋತೀತಿ ಮಿತ್ತಂ. ಮಿತ್ರಂ. ಮಿದತಿ ಸಿನೇಹತಿ ಏತಾಯಾತಿ ಮೇತ್ತಾ, ಮೇತ್ರಾ. ಪರಿ ಸಮನ್ತ ತೋ ಸಬ್ಬಾಕಾರೇನ ಮಿನನ್ತಿ ಏತಾಯಾತಿ ಮತ್ತಾ, ಮತ್ರಾ. ಮಾನನಂ ವಾ ಮತ್ತಂ, ಮತ್ರಂ. ಅತ್ತನೋ ಕುಲಂ ಪುನಾತಿ ಸೋಧೇತೀತಿ ಪುತ್ತೋ, ಪುತ್ರೋ. ಕಲಿತಬ್ಬಂ ಸಙ್ಖ್ಯಾತಬ್ಬನ್ತಿ ಕಲತ್ತಂ, ಕಲತ್ರಂ. ಸಂಸುಟ್ಠು ವಾರೇತಿ ಏತೇನಾತಿ ವರತ್ತಂ, ವರತ್ರಂ. ವೇಪತಿ ಕಮ್ಪತೀತಿ ವೇತ್ತಂ, ವೇತ್ರಂ. ಗೋಪಿತಬ್ಬಂ ರಕ್ಖಿತಬ್ಬನ್ತಿ ಗುತ್ತಂ. ಗುತ್ರಂ, ಗೋತ್ತಂ, ಗೋತ್ರಂ. ದಾತಿ ಅವಖಣ್ಡತಿ ಏತೇನಾತಿ ದಾತ್ತಂ, ದಾತ್ರಂ ಇಚ್ಚೇವಮಾದಿ.

೬೫೭. , ೬೬೭. ವದಾದೀಹಿ ಣಿತ್ತೋ ಗಣೇ.

ವದ ಚರ ವರಇಚ್ಚೇವಮಾದೀಹಿ ಧಾತೂಹಿ ಣಿತ್ತಪಚ್ಚಯೋ ಹೋತಿ ಗಣತ್ಥೇ.

ವಾದಿತಾನಂ ಗಣೋ ವಾದಿತ್ತಂ. ಏವಂ ಚಾರಿತ್ತಂ, ವಾರಿತ್ತಂ, ಇಚ್ಚೇವಮಾದಿ.

೬೫೮. , ೬೬೮. ಮಿದಾದೀಹಿ ತ್ತಿತಿಯೋ.

ಮಿದ ಪದ ರನ್ಜ ತನು ಧಾಇಚ್ಚೇವಮಾದೀಹಿ ಧಾತೂಹಿ ತ್ತಿ ತಿ ಇಚ್ಚೇತೇ ಪಚ್ಚಯಾ ಹೋನ್ತಿ.

ಮಿದತಿ ಸಿನೇಹತೀತಿ ಮೇತ್ತಿ, ಪದತಿ ಗಚ್ಛತೀತಿ ಪತ್ತಿ, ರನ್ಜತಿ ಏತ್ಥಾತಿ ರತ್ತಿ, ತನೋತಿ ವಿತ್ಥಾರೇತೀತಿ ತನ್ತಿ, ಅತ್ತನೋ ಕುಲಂ ತನೋತಿ ವಿತ್ಥಾರೇತೀತಿ ವಾ ತನ್ತಿ, ಪರೇಸಂ ಇತ್ಥೀನಂ ಪುತ್ತಂ ಧಾರೇತೀತಿ ಧಾತಿ, ಖೀರಂ ಧಾರೇತೀತಿ ವಾ ಧಾತಿ, ಅತ್ತನೋ ಸಭಾವಂ ಧಾರೇತೀತಿ ವಾ ಧಾತಿ ಇಚ್ಚೇವಮಾದಿ.

೬೫೯. , ೬೬೯. ಉಸು ರನ್ಜ ದಂಸಾನಂ ದಂಸಸ್ಸ ದಡ್ಢೋಢ ಠಾ ಚ.

ಉಸು ರನ್ಜ ದಂಸಇಚ್ಚೇತೇಸಂ ಧಾತೂನಂ ದಂಸಸ್ಸ ದಡ್ಢಾದೇಸೋ ಹೋತಿ, ಢ ಠಪಚ್ಚಯಾ ಚ ಹೋನ್ತಿ.

ಉಸೀಯತೇ ಉಡ್ಢೋ, ರನ್ಜನ್ತಿ ಏತ್ಥಾತಿ ರಟ್ಠಂ, ದಂಸೀಯತೇತಿ ದಡ್ಢೋ.

೬೬೦. , ೬೭೦. ಸೂವುಸಾನಮೂವುಸಾನಮತೋಥೋಚ.

ಸೂವು ಅಸಇಚ್ಚೇತೇಸಂ ಧಾತೂನಂ ಊಉಅಸಾನಂ ಅತಾದೇಸೋ ಹೋತಿ, ಥಪಚ್ಚಯೋ ಚ.

ಸವತಿ ಹಿಂಸತಿ ಏತೇನಾತಿ ಸತ್ಥಂ, ಹಿರೋತ್ತಪ್ಪಂ ಸಂವರತಿ ಏತೇನಾತಿವತ್ಥಂ, ಸದ್ದಾನುರೂಪಂ ಅಸತಿಭವತೀತಿ ಅತ್ಥೋ,

೬೬೧. , ೬೭೧. ರನ್ಜುದಾದೀಹಿ ಧ ದಿದ್ದ ಕಿರಾ ಕ್ವಚಿ ಜದಲೋಪೋಚ.

ರನ್ಜ ಉದ ಇದಿ ಚದಿ ಮದಿ ಖುದ ಛಿದಿ ರುದಿ ದಲ ಸುಸ ಸುಚ ವಚ ವಜ ಇಚ್ಚೇವಮಾದೀಹಿ ಧಾತೂಹಿ ಧ ದ ಇದ್ದ ಕ ಇರಇಚ್ಚೇತೇ ಪಚ್ಚಯಾ ಹೋನ್ತಿ, ಕ್ವಚಿ ಜ ದ ಲೋಪೋ ಚ, ಪುನ ನಿಪ್ಪಜ್ಜನ್ತೇ.

ರಞ್ಜಿತಬ್ಬನ್ತಿ ರನ್ಧಂ, ರನ್ಜಯಿತ್ಥಾತಿ ವಾ ರನ್ಧಂ, ಅತ್ತನಿ ಸನ್ನಿಸ್ಸಿತಾನಂ ಮಚ್ಛಮಕರಾನಂ ಪೀತಿಸೋಮನಸ್ಸಂ ಉನ್ದತಿ ಪಸವತಿ ಜನೇತೀತಿ ಸಮುದ್ದೋ, ಇನ್ದತಿ ಪರಮಿಸ್ಸರಿಯಂ ಕರೋತೀತಿ ಇನ್ದೋ, ಇನ್ದತ್ತಂ ಅಧಿಪತಿಭಾವಂ ಕರೋತೀತಿ ವಾ ಇನ್ದೋ, ಚನ್ದಿತಬ್ಬೋ ಇಚ್ಛಿತಬ್ಬೋತಿ ಚನ್ದೋ, ಮನ್ದತಿ ಹಾಸೇತೀತಿ ಮನ್ದೋ, ಮದಿತಬ್ಬೋ ಹಾಸೇತಬ್ಬೋತಿ ವಾ ಮನ್ದೋ, ಖುದತಿ ಪಿಪಾಸೇತೀತಿ ಖುದ್ದೋ, ಛಿನ್ದಿತಬ್ಬೋತಿ ಛಿದ್ದೋ, ರುದತಿ ಹಿಂಸತೀತಿ ರುದ್ದೋ, ದಲತಿ ದುಗ್ಗತಭಾವಂ ಗಚ್ಛತೀತಿ ದಲಿದ್ದೋ, ಸುಸ್ಸತೀತಿ ಸುಕ್ಕಂ, ಸುಚತೀತಿಸೋಕೋ, ವಚಿತಬ್ಬನ್ತಿ ವಕ್ಕಂ, ಅಪ್ಪಟಿಹತೋ ಹುತ್ವಾ ವಜತಿ ಗಚ್ಛತೀತಿ ವಜಿರಂ ಇಚ್ಚೇವಮಾದಿ.

೬೬೨. , ೬೭೨. ಪಟಿತೋ ಹಿಸ್ಸ ಹೇರಣ ಹೀರಣ.

ಪಟಿಇಚ್ಚೇತಸ್ಮಾ ಹಿಸ್ಸ ಧಾತುಸ್ಸ ಹೇರಣ ಹೀರಣ ಆದೇಸಾ ಹೋನ್ತಿ.

ಪಟಿಪಕ್ಖೇಮದ್ದಿತ್ವಾಗಚ್ಛತಿ ಪವತ್ತತೀತಿ ಪಾಟಿಹೇರಂ, ಪಾಟಿಹೀರಂ.

೬೬೩. , ೬೭೩. ಕಡ್ಯಾದೀಹಿ ಕೋ.

ಕಡಿ ಘಡಿ ವಡಿ ಕರಡಿ ಮಡಿ ಸಡಿ ಕುಠಿ ಭಡಿ ಪಡಿ ದಡಿ ರಡಿ ತಡಿ ಇಸಿಡಿ ಚಡಿ ಗಡಿ ಅಡಿ ಲಡಿ ಮೇಡಿ ಏರಡಿ ಖಡಿ ಇಚ್ಚೇವಮಾದೀಹಿ ಧಾತೂಹಿ ಕಪಚ್ಚಯೋ ಹೋತಿ ಸಹ ಪಚ್ಚಯೇನ ಚ ನಿಪ್ಪಜ್ಜನ್ತೇ ಯಥಾಸಮ್ಭವಂ.

ಕಣ್ಡಿತಬ್ಬೋ ಛಿನ್ದಿತಬ್ಬೋತಿ ಕಣ್ಡೋ, ಘಣ್ಡಿತಬ್ಬೋ ಘಟೇತಬ್ಬೋತಿ ಘಣ್ಡೋ, ವಣ್ಡನ್ತಿ ಏತ್ಥಾತಿ ವಣ್ಡೋ, ಕರಣ್ಡಿತಬ್ಬೋ ಭಾಜೇತಬ್ಬೋತಿ ಕರಣ್ಡೋ, ಮಣ್ಡೀಯತೇ ವಿಭೂಸೀಯತೇ ಏತೇನಾತಿ ಮಣ್ಡೋ, ಸಣ್ಡನ್ತಿ ಗುಮ್ಬನ್ತಿ ಏತ್ಥಾತಿ ಸಣ್ಡೋ, ಅಙ್ಗಮಙ್ಗಾನಿ ಕುಣ್ಠತಿ ಛಿನ್ದತೀತಿ ಕುಟ್ಠಂ, ಭಣ್ಡಿತಬ್ಬನ್ತಿ ಭಣ್ಡಂ, ಪಣ್ಡತಿ ಲಿಙ್ಗವೇಕಲ್ಲಭಾವಂ ಗಚ್ಛತೀತಿ ಪಣ್ಡಕೋ. ದಣ್ಡತಿ ಆಣಂ ಕರೋತಿ ಏತೇನಾತಿ ದಣ್ಡೋ, ರಣ್ಡತಿ ಹಿಂಸತೀತಿ ರಣ್ಡೋ, ವಿಸೇಸೇನ ತಣ್ಡತಿ ಚಾಲೇತಿ ಪರೇಸಂ ವಿಞ್ಞೂನಂ ಹದಯಂ ಕಮ್ಪೇತೀತಿ ವಿತಣ್ಡೋ, ಇಸಿಣ್ಡತಿ ಪರೇಸಂ ಮದ್ದತೀತಿ ಇಸಿಣ್ಡೋ, ಚಣ್ಡತಿ ಚಣ್ಡಿಕ್ಕಭಾವಂ ಕರೋತೀತಿ ಚಣ್ಡೋ, ಗಣ್ಡತಿ ಸನ್ನಿಚಯತಿ ಸಮೂಹಂ ಕರೋತಿ ಏತ್ಥಾತಿ ಗಣ್ಡೋ, ಅಣ್ಡೀಯತಿ ನಿಬ್ಬತ್ತೀಯತೀತಿ ಅಣ್ಡೋ, ಲಣ್ಡಿತಬ್ಬೋ ಜಿಗುಚ್ಛಿತಬ್ಬೋತಿ ಲಣ್ಡೋ, ಮೇಣ್ಡತಿ ಕುಟಿಲಭಾವಂ ಗಚ್ಛತೀತಿ ಮೇಣ್ಡೋ, ಏರಣ್ಡತಿ ರೋಗಂ ಹಿಂಸತೀತಿ ಏರಣ್ಡೋ, ಖಣ್ಡಿತಬ್ಬೋ ಛಿನ್ದಿತಬ್ಬೋತಿ ಖಣ್ಡೋ ಇಚ್ಚೇವಮಾದಿ.

೬೬೪. , ೬೭೪. ಖಾದಾಮಗಮಾನಂ ಖ ನ್ಧ’ನ್ಧ ಗನ್ಧಾ.

ಖಾದ ಅಮ ಗಮುಇಚ್ಚೇತೇಸಂ ಧಾತೂನಂ ಖನ್ಧ ಅನ್ಧ ಗನ್ಧಾದೇಸಾ ಹೋನ್ತಿ, ಕಪಚ್ಚಯೋ ಚ ಹೋತಿ.

ಜಾತಿಜರಾಮರಣಾದೀಹಿ ಸಂಸಾರದುಕ್ಖೇಹಿ ಖಾದಿತಬ್ಬೋತಿ ಖನ್ಧೋ, ಅಮತಿ ಅಙ್ಗಮಙ್ಗಸ್ಸ ರುಜ್ಜನಭಾವಂ ಗಚ್ಛತೀತಿ ಅನ್ಧೋ, ಚಕ್ಖುನಾ ಅಮತಿ ರುಜ್ಜತೀತಿ ವಾ ಅನ್ಧೋ, ತಂ ತಂ ಠಾನಂ ವಾತೇನ ಗಚ್ಛತೀತಿ ಗನ್ಧೋ. ಏವಂ ಖನ್ಧಕೋ, ಅನ್ಧಕೋ, ಗನ್ಧಕೋ.

೬೬೫. , ೬೭೫. ಪಟಾದೀಹ್ಯಲಂ.

ಪಟ ಕಲ ಕುಸ ಕದ ಭಗನ್ದ ಮೇಖ ವಕ್ಕ ತಕ್ಕ ಪಲ್ಲ ಸದ್ದ ಮೂಲ ಬಿಲ ವಿದ ಚಡಂ ಪಞ್ಚ ವಾ ವಸ ಪಚಿ ಮಚ ಮುಸ ಗೋತ್ಥು ಪುಥು ಬಹು ಮಙ್ಗ ಬಹ ಕಮ್ಬ ಸಮ್ಬ ಅಗ್ಗಇಚ್ಚೇವಮಾದೀಹಿ ಧಾತೂಹಿ ಪಾಟಿ ಪದಿಕೇಹಿ ಚ ಉತ್ತರಪದೇಸು ಅಲಪಚ್ಚಯೋ ಹೋತಿ, ಪಚ್ಛಾ ಪುನ ನಿಪ್ಪಜ್ಜನ್ತೇ.

ಪಟೇ ಅಲನ್ತಿ ಪಟಲಂ, ಕಲೇ ಅಲನ್ತಿ ಕಲಲಂ, ಪಾಪಕೇ ಅಕುಸಲೇ ಧಮ್ಮೇ ಕುಸತಿ ಛಿನ್ದತೀತಿ ಕುಸಲಂ, ಕುಸಭೂತೇ ಯಥಾಸಭಾವಧಮ್ಮೇ ಅಲನ್ತಿ ವಾ ಕುಸಲಂ, ಕುಸೇ ಉದ್ದಿಸ್ಸ ದಾನೇ ಅಲನ್ತಿ ವಾ ಕುಸಲಂ, ಕುಸೇ ಸಞ್ಚಯೇ ಧಮ್ಮಸಮುದಾಯೇ ಅಲನ್ತಿ ವಾ ಕುಸಲಂ, ಕದ್ದೇ ಮದ್ದೇ ಅಲನ್ತಿ ಕದಲಂ, ಭಗನ್ದೇ ಸೇಚನೇ ಅಲನ್ತಿ ಭಗನ್ದಲಂ, ಭಗನ್ದೇ ಮುತ್ತಕರೀಸಹರಣೇ ಅಲನ್ತಿ ವಾ ಭಗನ್ದಲಂ, ಮೇಖೇ ಕಟಿವಿಚಿತ್ತೇ ಅಲನ್ತಿ ಮೇಖಲಂ, ವಕ್ಕೇ ರುಕ್ಖತಚೇ ಅಲನ್ತಿ ವಕ್ಕಲಂ, ತಕ್ಕೇ ರುಕ್ಖಸಿಲೇಸೇ ಅಲನ್ತಿ ತಕ್ಕಲಂ, ಪಲ್ಲೇ ನಿನ್ನಟ್ಠಾನೇ ಅಲನ್ತಿ ಪಲ್ಲಲಂ, ಸದ್ದೇ ಹರಿತೇ ಅಲನ್ತಿ ಸದ್ದಲಂ, ಮೂಲೇ ಪತಿಟ್ಠಾನೇ ಅಲನ್ತಿ ಮುಲಾಲಂ, ಬಿಳೇ ನಿಸ್ಸಯೇ ಅಲನ್ತಿ ಬಿಲಾಲಂ, ವಿದೇ ವಿಜ್ಜಮಾನೇ ಅಲನ್ತಿ ವಿದಲಂ, ಚಣ್ಡೇ ಅಲನ್ತಿ ಚಣ್ಡಾಲೋ, ಪಞ್ಚನ್ನಂ ರಾಜೂನಂ ಅಲನ್ತಿ ಪಞ್ಚಾಲೋ, ವಾ ಗತಿಗನ್ಧನೇಸು ಅಲನ್ತಿ ವಾಲಂ, ವಾ ಪದಗಮನೇ ಅಲನ್ತಿ ವಾ ವಾಳೋ, ವಸೇ ಅಚ್ಛಾದನೇ ಅಲನ್ತಿ ವಸಲೋ, ಪಚೇ ವಿತ್ಥಾರೇ ಅಲನ್ತಿ ಪಚಲೋ, ಮಚೇ ಚೋರಕಮ್ಮೇ ಅಲನ್ತಿ ಮಚಲೋ, ಮುಸೇ ಥೇಯ್ಯೇ, ಮುಸೇ ಪಾಣಚಾಗೇ ವಾ ಅಲನ್ತಿ ಮುಸಲೋ, ಗೋತ್ತೇ ವಂಸೇ ಸಿಙ್ಗಾಲಜಾತಿಯಂ ಅಲನ್ತಿ ಗೋತ್ಥುಲೋ, ಪುಥುಮ್ಹಿ ವಿತ್ಥಾರೇ ಅಲನ್ತಿ ಪುಥುಲೋ, ಬಹುಮ್ಹಿ ಸಙ್ಖ್ಯಾನೇ ಅಲನ್ತಿ ಬಹುಲೋ, ಬಹುಮ್ಹಿ ವುದ್ಧಿಮ್ಹಿ ಅಲನ್ತಿ ವಾ ಬಹುಲೋ, ಮಙ್ಗಮ್ಹಿ ಗಮನೇ ಅಲನ್ತಿ ಮಙ್ಗಲಂ, ಬಹುಮ್ಹಿ ವುದ್ಧಿಮ್ಹಿ ಅಲನ್ತಿ ಬಹಲಂ, ಕಮ್ಬಮ್ಹಿ ಸಞ್ಚಲನೇ ಅಲನ್ತಿ ಕಮ್ಬಲಂ. ಸಮ್ಬಮ್ಹಿ ಮಣ್ಡಲೇ ಅಲನ್ತಿ ಸಮ್ಬಲಂ, ಅಗ್ಗೇ ಗತಿಕೋಟಿಲ್ಲೇ ಅಲನ್ತಿ ಅಗ್ಗಳಂ. ಇಚ್ಚೇವಮಾದಯೋ ಅಞ್ಞೇಪಿ ಸದ್ದಾ ಭವನ್ತಿ.

೬೬೬. , ೬೭೬. ಪುಥಸ್ಸ ಪುಥು ಪಥಾ ಮೋ ವಾ.

ಪುಥಇಚ್ಚೇತಸ್ಸ ಪಾಟಿಪದಿಕಸ್ಸ ಪುಥು ಪಥಾದೇಸಾ ಹೋನ್ತಿ, ಕ್ವಚಿ ಅಮಪಚ್ಚಯೋ ಹೋತಿ.

ಪುಥ ಹುತ್ವಾ ಜಾತನ್ತಿ ಪುಥವೀ ಪಥಮೇ ಜಾತೋ ಪಥಮೋ, ಪಥವೀ, ಪಠಮೋ ವಾ, ಪುಥು ಕಿಲೇಸೇ ಜನೇತೀತಿ ಪುಥುಜ್ಜನೋ, ಪುಥು ಹುತ್ವಾ ಜಾತನ್ತಿ ಪಥವೀ, ಪಥವೀ ವಾ.

೬೬೭. , ೬೭೭. ಸಸ್ವಾದೀಹಿ ತು ದವೋ.

ಸಸು ದದ ಅದ ಮದಇಚ್ಚೇವಮಾದೀಹಿ ಧಾತೂಹಿ ತು ದುಇಚ್ಚೇತೇ ಪಚ್ಚಯಾ ಹೋನ್ತಿ.

ಅಞ್ಞೇ ಸತ್ತೇ ಸಸತಿ ಹಿಂಸತೀತಿ ಸತ್ತು, ದುಕ್ಖಂ ದದಾತೀತಿ ದದ್ದು, ದುಕ್ಖೇನ ಅದತಿ ಭಕ್ಖತಿ ಏತ್ಥಾತಿ ಅದ್ದು, ದುಕ್ಖಂ ಅದತಿ ಅನುಭವತಿ ಜನೋ ಏತೇನಾತಿ ವಾ ಅದ್ದು, ದುಕ್ಖಂ ಭಾಜನಂ ಆಧಾರಂ ಭಾವತೀತಿ ವಾ ಅದ್ದು, ಮದತಿ ಉಮ್ಮತ್ತಂ ಕರೋತೀತಿ ಮದ್ದು, ಮದತಿ ಮದ್ದಭಾವಂ ಕರೋತೀತಿ ವಾ ಮದ್ದು.

೬೬೮. , ೬೭೮. ಝಾದೀಹಿ ಈವರೋ.

ಚಿ ಪಾ ಧಾಇಚ್ಚೇವಮಾದೀಹಿ ಧಾತೂಹಿ ಈವರಪಚ್ಚಯೋಹೋತಿ.

ಚೀಯತೀತಿ ಚೀವರಂ, ಪಿವತೀತಿ ಪೀವರೋ, ಪಾತಬ್ಬಂ ರಕ್ಖಿತಬ್ಬನ್ತಿ ವಾ ಪೀವರಂ. ಧಾರೇತಿ ಧಾರೇತ್ವಾ ಜೀವಿತಂ ಕಪ್ಪೇತೀತಿ ಧೀವರೋ, ಧೀವರಂ.

೬೬೯. , ೬೭೯. ಮುನಾದೀಹಿ ಚಿ.

ಮುನ ಯತ ಅಗ್ಗ ಪತ ಕವ ಸುಚ ರುಚ ಮಹಾಲ ಭದ್ದಾಲ ಮನಇಇಚ್ಚೇವಮಾದೀಹಿ ಧಾತೂಹಿ, ಪಾಟಿಪದಿಕೇಹಿ ಚ ಇಪಚ್ಚಯೋ ಹೋತಿ.