೩. ಕಾರಕಕಪ್ಪ

ಛಟ್ಠಕಣ್ಡ

೨೭೧. , ೮೮, ೩೦೮. ಯಸ್ಮಾ ದಪೇತಿ ಭಯಮಾದತ್ತೇ ವಾ ತದಪಾದಾನಂ.

ಯಸ್ಮಾ ವಾ ಅಪೇತಿ, ಯಸ್ಮಾ ವಾ ಭಯಂ ಜಾಯತೇ, ಯಸ್ಮಾ ವಾ ಆದತ್ತೇ, ತಂ ಕಾರಕಂ ಅಪಾದಾನಸಞ್ಞಂ ಹೋತಿ.

ತಂ ಯಥಾ? ಗಾಮಾ ಅಪೇನ್ತಿ ಮುನಯೋ, ನಗರಾ ನಿಗ್ಗತೋ ರಾಜಾ, ಚೋರಾ ಭಯಂ ಜಾಯತೇ, ಆಚರಿಯುಪಜ್ಝಾಯೇಹಿ ಸಿಕ್ಖಂ ಗಣ್ಹಾತಿ ಸಿಸ್ಸೋ.

ಅಪಾದಾನಮಿಚ್ಚನೇನ ಕ್ವತ್ಥೋ? ಅಪಾದಾನೇ ಪಞ್ಚಮೀ.

೨೭೨. , ೩೦೯. ಧಾತುನಾ ಮಾನಮುಪಸಗ್ಗಯೋಗಾದ್ವೀಸ್ವಪಿ ಚ.

ಧಾತುನಾಮಾನಂ ಪಯೋಗೇ ಚ ಉಪಸಗ್ಗಯೋಗಾದೀಸ್ವಪಿ ಚ ತಂ ಕಾರಕಂ ಅಪಾದಾನಸಞ್ಞಂ ಹೋತಿ.

ಧಾತೂನಂ ಪಯೋಗೇ ತಾವ ಜಿಇಚ್ಚೇತಸ್ಸ ಧಾತುಸ್ಸ ಪರಾಪುಬ್ಬಸ್ಸ ಪಯೋಗೇ ಯೋ ಅಸಹೋ, ಸೋ ಅಪಾದಾನಸಞ್ಞೋ ಹೋತಿ.

ತಂ ಯಥಾ? ಬುದ್ಧಸ್ಮಾ ಪರಾಜೇನ್ತಿ ಅಞ್ಞತಿತ್ಥಿಯಾ.

ಭೂಇಚ್ಚೇತಸ್ಸ ಧಾತುಸ್ಸ ಪಪುಬ್ಬಸ್ಸ ಪಯೋಗೇ ಯತೋ ಅಚ್ಛಿನ್ನಪ್ಪಭವೋ, ಸೋ ಅಪಾದಾನಸಞ್ಞೋ ಹೋತಿ.

ತಂ ಯಥಾ? ಹಿಮವತಾ ಪಭವನ್ತಿ ಪಞ್ಚ ಮಹಾನದಿಯೋ, ಅನವತತ್ತಮ್ಹಾ ಪಭವನ್ತಿ ಮಹಾಸರಾ, ಅಚಿರವತಿಯಾ ಪಭವನ್ತಿ ಕುನ್ನದಿಯೋ.

ನಾಮಪ್ಪಯೋಗೇಪಿ ತಂ ಕಾರಕಂ ಅಪಾದಾನಸಞ್ಞಂ ಹೋತಿ.

ತಂ ಯಥಾ? ಉರಸ್ಮಾ ಜಾತೋ ಪುತ್ತೋ, ಭೂಮಿತೋ ನಿಗ್ಗತೋ ರಸೋ, ಉಭತೋ ಸುಜಾತೋ ಪುತ್ತೋ ಮಾತಿತೋ ಚ ಪಿತಿತೋ ಚ.

ಉಪಸಗ್ಗಯೋಗೇ ತಂ ಕಾರಕಂ ಅಪಾದಾನಸಞ್ಞಂ ಹೋತಿ.

ತಂ ಯಥಾ? ಅಪಸಾಲಾಯ ಆಯನ್ತಿ ವಾಣಿಜಾ, ಆಬ್ರಹ್ಮಲೋಕಾ ಸದ್ದೋ ಅಬ್ಭುಗ್ಗಚ್ಛತಿ ಉಪರಿ ಪಬ್ಬತಾ ದೇವೋ ವಸ್ಸತಿ, ಬುದ್ಧಸ್ಮಾ ಪತಿ ಸಾರಿಪುತ್ತೋ ಧಮ್ಮದೇಸನಾಯ ಭಿಕ್ಖೂ ಆಲಪತಿ ತೇಮಾಸಂ, ಘತಮಸ್ಸ ತೇಲಸ್ಮಾ ಪತಿ ದದಾತಿ, ಉಪ್ಪಲಮಸ್ಸ ಪದುಮಸ್ಮಾ ಪತಿ ದದಾತಿ, ಕನಕಮಸ್ಸ ಹಿರಞ್ಞಸ್ಮಾ ಪತಿ ದದಾತಿ.

ಆದಿಗ್ಗಹಣೇನ ಕಾರಕಮಜ್ಝೇಪಿ ಪಞ್ಚಮೀವಿಭತ್ತಿ ಹೋತಿ. ಇತೋ ಪಕ್ಖಸ್ಮಾ ವಿಜ್ಝತಿ ಮಿಗಂ ಲುದ್ದಕೋ, ಕೋಸಾ ವಿಜ್ಝತಿ ಕುಞ್ಜರಂ, ಮಾಸಸ್ಮಾ ಭುಞ್ಜತಿ ಭೋಜನಂ.

ಅಪಿಗ್ಗಹಣೇನ ನಿಪಾತಪಯೋಗೇಪಿ ಪಞ್ಚಮೀವಿಭತ್ತಿ ಹೋತಿ ದುತಿಯಾ ಚ ತತಿಯಾ ಚ. ರಹಿತಾ ಮಾತುಜಾ ಪುಞ್ಞಂ ಕತ್ವಾ ದಾನಂ ದೇತಿ, ರಹಿತಾ ಮಾತುಜಂ, ರಹಿತಾ ಮಾತುಜೇನ ವಾ. ರಿತೇ ಸದ್ಧಮ್ಮಾ ಕುತೋ ಸುಖಂ ಲಭತಿ, ರಿತೇ ಸದ್ಧಮ್ಮಂ, ರಿತೇ ಸದ್ಧಮ್ಮೇನ ವಾ. ತೇ ಭಿಕ್ಖೂ ನಾನಾ ಕುಲಾ ಪಬ್ಬಜಿತಾ, ವಿನಾ ಸದ್ಧಮ್ಮಾ ನತ್ಥಞ್ಞೋ ಕೋಚಿ ನಾಥೋ ಲೋಕೇ ವಿಜ್ಜತಿ, ವಿನಾ ಸದ್ಧಮ್ಮಂ, ವಿನಾ ಸದ್ಧಮ್ಮೇನ ವಾ. ವಿನಾ ಬುದ್ಧಸ್ಮಾ, ವಿನಾ ಬುದ್ಧಂ, ವಿನಾ ಬುದ್ಧೇನ ವಾ.

ಚಗ್ಗಹಣೇನ ಅಞ್ಞತ್ಥಾಪಿ ಪಞ್ಚಮೀವಿಭತ್ತಿ ಹೋತಿ. ಯತೋಹಂ ಭಗಿನಿ ಅರಿಯಾಯ ಜಾತಿಯಾ ಜಾತೋ. ಯತೋ ಸರಾಮಿ ಅತ್ತಾನಂ, ಯತೋ ಪತ್ತೋಸ್ಮಿ ವಿಞ್ಞುತಂ, ಯತ್ವಾಧಿಕರಣಮೇನಂ ಚಕ್ಖುನ್ದ್ರಿಯಂ ಅಸಂವುತಂ ವಿಹರನ್ತಂ ಅಭಿಜ್ಝಾದೋಮನಸ್ಸಾ ಪಾಪಕಾ ಅಕುಸಲಾ ಧಮ್ಮಾ ಅನ್ವಾಸವೇಯ್ಯುಂ.

೨೭೩. , ೩೧೦. ರಕ್ಖಣತ್ಥಾನಮಿಚ್ಛಿತಂ.

ರಕ್ಖಣತ್ಥಾನಂ ಧಾತೂನಂ ಪಯೋಗೇ ಯಂ ಇಚ್ಛಿತಂ, ತಂ ಕಾರಕಂ ಅಪಾದಾನಸಞ್ಞಂ ಹೋತಿ.

ಕಾಕೇ ರಕ್ಖನ್ತಿ ತಣ್ಡುಲಾ, ಯವಾ ಪಟಿಸೇಧೇನ್ತಿ ಗಾವೋ.

೨೭೪. , ೩೧೧. ಯೇನ ವಾ’ ದಸ್ಸನಂ.

ಯೇನ ವಾ ಅದಸ್ಸನಮಿಚ್ಛಿತಂ, ತಂ ಕಾರಕಂ ಅಪಾದಾನಸಞ್ಞಂ ಹೋತಿ.

ಉಪಜ್ಝಾಯಾ ಅನ್ತರಧಾಯತಿ ಸಿಸ್ಸೋ, ಮಾತರಾ ಚ ಪಿತರಾ ಚ ಅನ್ತರಧಾಯತಿ ಪುತ್ತೋ.

ವಾತಿ ಕಿಮತ್ಥಂ? ಸತ್ತಮೀವಿಭತ್ಯತ್ತಂ. ಜೇತವನೇ ಅನ್ತರಧಾಯತಿ ಭಗವಾ.

೨೭೫. , ೩೧೨. ದೂರನ್ತಿ ಕದ್ಧ ಕಾಲ ನಿಮ್ಮಾನ ತ್ವಾಲೋಪ ದಿಸಾಯೋಗವಿಭತ್ತಾರಪ್ಪಯೋಗ ಸುದ್ಧಪ್ಪಮೋಚನ ಹೇತು ವಿವಿತ್ತಪ್ಪಮಾಣ ಪುಬ್ಬಯೋಗಬನ್ಧನ ಗುಣವಚನ ಪಞ್ಹ ಕಥನ ಥೋಕಾಕತ್ತೂಸು ಚ.

ದೂರತ್ಥೇ, ಅನ್ತಿಕತ್ಥೇ, ಅದ್ಧನಿಮ್ಮಾನೇ, ಕಾಲನಿಮ್ಮಾನೇ, ತ್ವಾಲೋಪೇ, ದಿಸಾಯೋಗೇ, ವಿಭತ್ತೇ, ಆರಪ್ಪಯೋಗೇ, ಸುದ್ಧೇ, ಪಮೋಚನೇ, ಹೇತ್ವತ್ಥೇ, ವಿವಿತ್ತತ್ಥೇ, ಪಮಾಣೇ, ಪುಬ್ಬಯೋಗೇ, ಬನ್ಧನತ್ಥೇ, ಗುಣವಚನೇ, ಪಞ್ಹೇ, ಕಥನೇ, ಥೋಕೇ, ಅಕತ್ತರಿ ಚ ಇಚ್ಚೇತೇಸ್ವತ್ಥೇಸು, ಪಯೋಗೇಸು ಚ, ತಂ ಕಾರಕಂ ಅಪಾದಾನಸಞ್ಞಂ ಹೋತಿ.

ದೂರತ್ಥೇತಾವ – ಕೀವ ದೂರೋ ಇತೋ ನಳಕಾರಗಾಮೋ, ದೂರತೋ ವಾ ಗಮ್ಮ, ಆರಕಾ ತೇ ಮೋಘಪುರಿಸಾ ಇಮಸ್ಮಾ ಧಮ್ಮವಿನಯಾ. ದುತಿಯಾ ಚ ತತಿಯಾ ಚ, ದೂರಂ ಗಾಮಂ ಆವತೋ, ದೂರೇನ ಗಾಮೇನ ವಾ ಆಗತೋ. ಆರಕಾ ಇಮಂ ಧಮ್ಮವಿನಯಂ, ಅನೇನ ಧಮ್ಮವಿನಯೇನ ವಾ ಇಚ್ಚೇವಮಾದಿ.

ಅನ್ತಿಕತ್ಥೇ – ಅನ್ತಿಕಂ ಗಾಮಾ, ಆಸನ್ನಂ ಗಾಮಾ, ಸಮೀಪಂ ಗಾಮಾ, ಸಮೀಪಂ ಸದ್ಧಮ್ಮಾ. ದುತಿಯಾ ಚ ತತಿಯಾ ಚ, ಅನ್ತಿಕಂ ಗಾಮಂ, ಅನ್ತಿಕಂ ಗಾಮೇನ ವಾ. ಆಸನ್ನಂ ಗಾಮಂ, ಆಸನ್ನಂ ಗಾಮೇನ ವಾ. ಸಮೀಪಂ ಗಾಮಂ. ಸಮೀಪಂ ಗಾಮೇನ ವಾ. ಸಮೀಪಂ ಸದ್ಧಮ್ಮಂ, ಸಮೀಪಂ ಸದ್ಧಮ್ಮೇನ ವಾ ಇಚ್ಚೇವಮಾದಿ.

ಅದ್ಧನಿಮ್ಮಾನೇ – ಇತೋ ಮಥುರಾಯ ಚತೂಸು ಯೋಜನೇಸು ಸಙ್ಕಸ್ಸಂ ನಾಮ ನಗರಂ ಅತ್ಥಿ, ತತ್ಥ ಬಹೂ ಜನಾ ವಸನ್ತಿ ಇಚ್ಚೇವಮಾದಿ.

ಕಾಲನಿಮ್ಮಾನೇ – ಇತೋ ಭಿಕ್ಖವೇ ಏಕನವುತಿಕಪ್ಪೇ ವಿಪಸ್ಸೀ ನಾಮ ಭಗವಾ ಲೋಕೇ ಉದಪಾದಿ, ಇತೋ ತಿಣ್ಣಂ ಮಾಸಾನಂ ಅಚ್ಚಯೇನ ಪರಿನಿಬ್ಬಾಯಿಸ್ಸತಿ ಇಚ್ಚೇವಮಾದಿ.

ತ್ವಾಲೋಪೇ ಕಮ್ಮಾಧಿಕರಣೇಸು – ಪಾಸಾದಾ ಸಙ್ಕಮೇಯ್ಯ, ಪಾಸಾದಂ ಅಭಿರುಹಿತ್ವಾ ವಾ. ಪಬ್ಬತಾ ಸಙ್ಕಮೇಯ್ಯ, ಪಬ್ಬತಂ ಅಭಿರುಹಿತ್ವಾ ವಾ. ಹತ್ಥಿಕ್ಖನ್ಧಾ ಸಙ್ಕಮೇಯ್ಯ, ಹತ್ಥಿಕ್ಖನ್ಧಂ ಅಭಿರುಹಿತ್ವಾ ವಾ. ಆಸನಾ ವುಟ್ಠಹೇಯ್ಯ. ಆಸನೇ ನಿಸೀದಿತ್ವಾ ವಾ ಇಚ್ಚೇವಮಾದಿ.

ದಿಸಾಯೋಗೇ – ಅವಿಚಿತೋ ಯಾವ ಉಪರಿಭವಗ್ಗಮನ್ತರೇ ಬಹೂ ಸತ್ತನಿಕಾಯಾ ವಸನ್ತಿ, ಯತೋ ಖೇಮಂ ತತೋ ಭಯಂ, ಪುರತ್ಥಿಮತೋ, ದಕ್ಖಿಣತೋ, ಪಚ್ಛಿಮತೋ, ಉತ್ತರತೋ ಅಗ್ಗೀ ಪಜ್ಜಲನ್ತಿ, ಯತೋ ಅಸ್ಸೋಸುಂ ಭಗವನ್ತಂ, ಉದ್ಧಂ ಪಾದತಲಾ ಅಧೋ ಕೇಸಮತ್ಥಕಾ ಇಚ್ಚೇವಮಾದಿ.

ವಿಭತ್ತೇ – ಯತೋ ಪಣೀತತರೋ ವಾ ವಿಸಿಟ್ಠತರೋ ವಾ ನತ್ಥಿ. ಛಟ್ಠೀ ಚ, ಛನ್ನವುತೀನಂ ಪಾಸಣ್ಡಾನಂ, ಧಮ್ಮಾನಂ ಪವರಂ ಯದಿದಂ ಸುಗತವಿನಯೋ ಇಚ್ಚೇವಮಾದಿ.

ಆರಪ್ಪಯೋಗೇ – ಗಾಮಧಮ್ಮಾ ವಸಲಧಮ್ಮಾ ಅಸದ್ಧಮ್ಮಾ ಆರತಿ ವಿರತಿ ಪಟಿವಿರತಿ, ಪಾಣಾತಿಪಾತಾ ವೇರಮಣೀ ಇಚ್ಚೇವಮಾದಿ.

ಸುದ್ಧೇ – ಲೋಭನಿಯೇಹಿ ಧಮ್ಮೇಹಿ ಸುದ್ಧೋ ಅಸಂಸಟ್ಠೋ, ಮಾತಿತೋ ಚ ಪಿತಿತೋ ಚ ಸುದ್ಧೋ ಅಸಂಸಟ್ಠೋ ಅನುಪಕುದ್ಧೋ ಅಗರಹಿತೋ ಇಚ್ಚೇವಮಾದಿ.

ಪಮೋಚನೇ – ಪರಿಮುತ್ತೋ ದುಕ್ಖಸ್ಮಾತಿ ವದಾಮಿ, ಮುತ್ತೋಸ್ಮಿ ಮಾರಬನ್ಧನಾ, ನ ತೇ ಮುಚ್ಚನ್ತಿ ಮಚ್ಚುನಾ ಇಚ್ಚೇವಮಾದಿ.

ಹೇತ್ವತ್ಥೇ – ಕಸ್ಮಾ ಹೇತುನಾ, ಕೇನ ಹೇತುನಾ, ಕಿಸ್ಸ ಹೇತುನಾ, ಕಸ್ಮಾ ನು ತುಮ್ಹಂ ದಹರಾ ನ ಮೀಯರೇ, ಕಸ್ಮಾ ಇಧೇವ ಮರಣಂ ಭವಿಸ್ಸತಿ ಇಚ್ಚೇವಮಾದಿ.

ವಿವಿತ್ತತ್ಥೇ – ವಿವಿತ್ತೋ ಪಾಪಕಾ ಧಮ್ಮಾ, ವಿವಿಚ್ಚೇವ ಕಾಮೇಹಿ ವಿವಿಚ್ಚ ಅಕುಸಲೇಹಿ ಧಮ್ಮೇಹಿ ಇಚ್ಚೇವಮಾದಿ.

ಪಮಾಣೇ – ದೀಘಸೋ ನವವಿದತ್ಥಿಯೋ ಸುಗತವಿದತ್ಥಿಯಾ ಪಮಾಣಿಕಾ ಕಾರೇತಬ್ಬಾ, ಮಜ್ಝಿಮಸ್ಸ ಪುರಿಸಸ್ಸ ಅಡ್ಢ ತೇಳಸಹತ್ಥಾ ಇಚ್ಚೇವಮಾದಿ.

ಪುಬ್ಬಯೋಗೇ – ಪುಬ್ಬೇವ ಸಮ್ಮೋಧಾ ಇಚ್ಚೇವಮಾದಿ.

ಬನ್ಧನತ್ಥೇ – ಸತಸ್ಮಾ ಬನ್ಧೋ ನರೋ. ತತಿಯಾ ಚ, ಸತೇನ ಬನ್ಧೋ ನರೋ ರಞ್ಞಾ ಇಣತ್ಥೇನ ಇಚ್ಚೇವಮಾದಿ.

ಗುಣವಚನೇ – ಪುಞ್ಞಾಯ ಸುಗತಿಂ ಯನ್ತಿ, ಚಾಗಾಯ ವಿಪುಲಂ ಧನಂ, ಪಞ್ಞಾಯ ವಿಮುತ್ತಿಮನೋ, ಇಸ್ಸರಿಯಾಯ ಜನಂ ರಕ್ಖತಿ ರಾಜಾ ಇಚ್ಚೇವಮಾದಿ.

ಪಞ್ಹೇ ತ್ವಾಲೋಪೇ ಕಮ್ಮಾಧಿಕರಣೇಸು – ಅಭಿಧಮ್ಮಾ ಪುಚ್ಛನ್ತಿ, ಅಭಿಧಮ್ಮಂ ಸುತ್ವಾ, ಅಭಿಧಮ್ಮೇ ಠತ್ವಾ ವಾ. ವಿನಯಾ ಪುಚ್ಛನ್ತಿ, ವಿನಯಂ ಸುತ್ವಾ, ವಿನಯೇ ಠತ್ವಾ ವಾ. ದುತಿಯಾ ಚ ತತಿಯಾ ಚ, ಅಭಿಧಮ್ಮಂ, ಅಭಿಧಮ್ಮೇನ ವಾ. ವಿನಯಂ, ವಿನಯೇನ ವಾ. ಏವ ಸುತ್ತಾ, ಗೇಯ್ಯಾ, ಗಾಥಾಯ, ವೇಯ್ಯಾಕರಣಾ, ಉದಾನಾ, ಇತಿವುತ್ತಕಾ, ಜಾತಕಾ, ಅಬ್ಭುತಧಮ್ಮಾ, ವೇದಲ್ಲಾ ಇಚ್ಚೇವಮಾದಿ.

ಕಥನೇ ತ್ವಾಲೋಪೇ ಕಮ್ಮಾಧಿಕರಣೇಸು – ಅಭಿಧಮ್ಮಾ ಕಥಯನ್ತಿ, ಅಭಿಧಮ್ಮಂ ಸುತ್ವಾ, ಅಭಿಧಮ್ಮೇ ಠತ್ವಾ ವಾ. ವಿನಯಾ ಕಥಯನ್ತಿ, ವಿನಯಂ ಸುತ್ವಾ, ವಿನಯೇ ಠತ್ವಾ ವಾ. ದುತಿಯಾ ಚ ತತಿಯಾ ಚ, ಅಭಿಧಮ್ಮಂ, ಅಭಿಧಮ್ಮೇನ ವಾ. ವಿನಯಂ ವಿನಯೇನ ವಾ. ಏವಂ ಸುತ್ತಾ, ಗೇಯ್ಯಾ, ಗಾಥಾಯ, ವೇಯ್ಯಾಕರಣಾ, ಉದಾನಾ, ಇತಿವುತ್ತಕಾ, ಜಾತಕಾ, ಅಬ್ಭುತಧಮ್ಮಾ, ವೇದಲ್ಲಾ ಇಚ್ಚೇವಮಾದಿ.

ಥೋಕೇ – ಥೋಕಾ ಮುಚ್ಚನ್ತಿ. ಅಪ್ಪಮತ್ತಕಾ ಮುಚ್ಚನ್ತಿ, ಕಿಚ್ಛಾ ಮುಚ್ಚನ್ತಿ. ತತಿಯಾ ಚ. ಥೋಕೇನ, ಅಪ್ಪಮತ್ತಕೇನ, ಕಿಚ್ಛೇನ ವಾ ಇಚ್ಚೇವಮಾದಿ.

ಅಕತ್ತರಿಚ – ಕಮ್ಮಸ್ಸ ಕತತ್ತಾ ಉಪಚಿತತ್ತಾ ಉಸ್ಸನ್ನತ್ತಾ ವಿಪುಲತ್ತಾ ಚಕ್ಖುವಿಞ್ಞಾಣಂ ಉಪ್ಪನ್ನಂ ಹೋತಿ ಇಚ್ಚೇವಮಾದಿ.

ಚಗ್ಗಹಣೇನ ಸೇಸೇಸುಪಿ ಯೇ ಮಯಾ ನೋಪದಿಟ್ಠಾ ಅಪಾದಾನಪಯೋಗಿಕಾ, ತೇ ಪಯೋಗವಿಚಕ್ಖಣೇಹಿ ಯಥಾಯೋಗಂ ಯೋಜೇತಬ್ಬಾ.

೨೭೬. , ೩೦೨. ಯಸ್ಸ ದಾತುಕಾಮೋ ರೋಚತೇ ಧಾರಯತೇ ವಾ ತಂ ಸಮ್ಪದಾನಂ.

ಯಸ್ಸ ವಾ ದಾತುಕಾಮೋ ಯಸ್ಸ ವಾರೋಚತೇ, ಯಸ್ಸ ವಾ ಧಾರಯತೇ, ತಂ ಕಾರಕಂ ಸಮ್ಪದಾನಸಞ್ಞಂ ಹೋತಿ.

ಸಮಣಸ್ಸ ಚೀವರಂ ದದಾತಿ, ಸಮಣಸ್ಸ ರೋಚತೇ ಸಚ್ಚಂ, ದೇವದತ್ತಸ್ಸ ಸುವಣ್ಣಚ್ಛತ್ತಂ ಧಾರಯತೇ ಯಞ್ಞದತ್ತೋ.

ಸಮ್ಪದಾನಮಿಚ್ಚನೇನ ಕ್ವತ್ಥೋ? ಸಮ್ಪದಾನೇ ಚತುತ್ಥೀ.

ವಾತಿ ವಿಕಪ್ಪನತ್ಥಂ, ಧಾತುನಾಮಾನಂ ಪಯೋಗೇ ವಾ ಉಪಸಗ್ಗಪ್ಪಯೋಗೇ ವಾ ನಿಪಾತಪ್ಪಯೋಗೇ ವಾ ಸತಿ ಅತ್ಥವಿಕಪ್ಪನತ್ಥಂ ವಾತಿ ಪದಂ ಪಯುಜ್ಜತಿ.

೨೭೭. , ೩೦೩. ಸಿಲಾಘ ಹನು ಠಾ ಸಪ ಧಾರ ಪಿಹ ಕುಧ ದುಹಿಸ್ಸೋಸೂಯ ರಾಧಿಕ್ಖ ಪಚ್ಚಾಸುಣ ಅನುಪತಿಗಿಣ ಪುಬ್ಬಕತ್ತಾರೋಚನತ್ಥ ತದತ್ಥ ತುಮತ್ಥಾಲಮತ್ಥ ಮಞ್ಞಾನಾದರಪ್ಪಾಣಿನಿ, ಗತ್ಯತ್ಥಕಮ್ಮನಿ, ಆಸೀಸತ್ಥ ಸಮ್ಮುತಿ ಭಿಯ್ಯ ಸತ್ತಮ್ಯತ್ಥೇಸು ಚ.

ಸಿಲಾಘ ಹನು ಠಾ ಸಪ ಧಾರ ಪಿಹ ಕುಧ ದುಹ ಇಸ್ಸಇಚ್ಚೇತೇಸಂ ಧಾತೂನಂ ಪಯೋಗೇ, ಉಸೂಯತ್ಥಾನಞ್ಚ ಪಯೋಗೇ, ರಾಧಿಕ್ಖಪ್ಪಯೋಗೇ, ಪಚ್ಚಾಸುಣಅನುಪತಿಗಿಣಾನಂ ಪುಬ್ಬಕತ್ತರಿ, ಆರೋಚನತ್ಥೇ, ತದತ್ಥೇ, ತುಮತ್ಥೇ, ಅಲಮತ್ಥೇ, ಮಞ್ಞತಿಪ್ಪಯೋಗೇ ಅನಾದರೇ ಅಪ್ಪಾಣಿನಿ, ಗತ್ಯತ್ಥಾನಂ ಧಾತೂನಂ ಕಮ್ಮನಿ, ಆಸೀಸತ್ಥೇ ಚ ಸಮ್ಮುತಿ ಭಿಯ್ಯ ಸತ್ತಮ್ಯತ್ಥೇಸು ಚ, ತಂ ಕಾರಕಂ ಸಮ್ಪದಾನಸಞ್ಞಂ ಹೋತಿ.

ಸಿಲಾಘಪ್ಪಯೋಗೇ ತಾವ – ಬುದ್ಧಸ್ಸ ಸಿಲಾಘತೇ, ಧಮ್ಮಸ್ಸ ಸಿಲಾಘತೇ, ಸಙ್ಘಸ್ಸ ಸಿಲಾಘತೇ, ಸಕಂಉಪಜ್ಝಾಯಸ್ಸ ಸಿಲಾಘತೇ, ತವ ಸಿಲಾಘತೇ ಮಮ ಸಿಲಾಘತೇ ಇಚ್ಚೇವಮಾದಿ.

ಹನುಪ್ಪಯೋಗೇ – ಹನುತೇ ತುಯ್ಹಮೇವ, ಹನುತೇ ಮಯ್ಹಮೇವ ಇಚ್ಚೇವಮಾದಿ.

ಠಾಪಯೋಗೇ – ಉಪತಿಟ್ಠೇಯ್ಯ ಸಕ್ಯಪುತ್ತಾನಂ ವಡ್ಢಕೀ, ಭಿಕ್ಖುಸ್ಸ ಭುಞ್ಜನ್ತಸ್ಸ ಪಾನೀಯೇನ ವಾ ವಿಧೂಪನೇನ ವಾ ಉಪತಿಟ್ಠೇಯ್ಯ ಭಿಕ್ಖುನೀ ಇಚ್ಚೇವಮಾದಿ.

ಸಪಪ್ಪಯೋಗೇ – ತುಯ್ಹಂ ಸಪತೇ, ಮಯ್ಹಂ ಸಪತೇ ಇಚ್ಚೇವಮಾದಿ.

ಧಾರಪ್ಪಯೋಗೇ – ಸುವಣ್ಣಂ ತೇ ಧಾರಯತೇ ಇಚ್ಚೇವಮಾದಿ.

ಪಿಹಪ್ಪಯೋಗೇ – ಬುದ್ಧಸ್ಸ ಅಞ್ಞತಿತ್ಥಿಯಾ ಪಿಹಯನ್ತಿ, ದೇವಾ ದಸ್ಸನಕಾಮಾ ತೇ, ಯತೋ ಇಚ್ಛಾಮಿ ಭದ್ದನ್ತಸ್ಸ, ಸಮಿದ್ಧಾನಂ ಪಿಹಯನ್ತಿ ದಲಿದ್ದಾ ಇಚ್ಚೇವಮಾದಿ.

ಕುಧದುಹಇಸ್ಸಉಸೂಯಪ್ಪಯೋಗೇ – ಕೋಧಯತಿ ದೇವ ದತ್ತಸ್ಸ, ತಸ್ಸ ಕುಜ್ಝ ಮಹಾವೀರ, ಮಾ ರಟ್ಠಂ ವಿನಸ್ಸ ಇದಂ. ದುಹಯತಿ ದಿಸಾನಂ ಮೇಘೋ, ತಿತ್ಥಿಯಾ ಸಮಣಾನಂ ಇಸ್ಸಯನ್ತಿ ಗುಣಗಿದ್ಧೇನ, ತಿತ್ಥಿಯಾ ಸಮಣಾನಂ ಇಸ್ಸಯನ್ತಿ ಲಾಭಗಿದ್ಧೇನ, ದುಜ್ಜನಾ ಗುಣವನ್ತಾನಂ ಉಸೂಯನ್ತಿ ಗುಣಗಿದ್ಧೇನ, ಕಾ ಉಸೂಯಾ ವಿಜಾನತಂ ಇಚ್ಚೇವಮಾದಿ.

ರಾಧ ಇಕ್ಖ ಇಚ್ಚೇತೇಸಂ ಧಾತೂನಂ ಪಯೋಗೇ ಯಸ್ಸ ಅಕಥಿತಸ್ಸ ಪುಚ್ಛನಂ ಕಮ್ಮವಿಕ್ಖ್ಯಾಪನತ್ಥಞ್ಚ, ತಂ ಕಾರಕಂ ಸಮ್ಪದಾನಸಞ್ಞಂ ಹೋತಿ, ದುತಿಯಾ ಚ.

ಆರಾಧೋಹಂ ರಞ್ಞೋ, ಆರಾಧೋಹಂ ರಾಜಾನಂ, ಕ್ಯಾಹಂ ಅಯ್ಯಾನಂ ಅಪರಜ್ಝಾಮಿ, ಕ್ಯಾಹಂ ಅಯ್ಯೇ ಅಪರಜ್ಝಾಮಿ, ಚಕ್ಖುಂ ಜನಸ್ಸ ದಸ್ಸನಾಯ ತಂ ವಿಯ ಮಞ್ಞೇ, ಆಯಸ್ಮತೋ ಉಪಾಲಿತ್ಥೇರಸ್ಸ ಉಪಸಮ್ಪದಾಪೇಕ್ಖೋ ಉಪತಿಸ್ಸೋ, ಆಯಸ್ಮನ್ತಂ ವಾ ಇಚ್ಚೇವಮಾದಿ.

ಪಚ್ಚಾಸುಣ ಅನುಪತಿಗಿಣಾನಂ ಪುಬ್ಬಕತ್ತರಿ ಸುಣೋತಿಸ್ಸ ಪಚ್ಚಾಯೋಗೇ ಯಸ್ಸ ಕಮ್ಮುನೋ ಪುಬ್ಬಸ್ಸ ಯೋ ಕತ್ತಾ, ಸೋ ಸಮ್ಪದಾನಸಞ್ಞೋ ಹೋತಿ.

ತಂ ಯಥಾ? ಭಗವಾ ಭಿಕ್ಖೂ ಏತದವೋಚ.

ಭಿಕ್ಖೂತಿ ಅಕಥೀತ ಕಮ್ಮಂ, ಏತನ್ತಿ ಕಥಿತಕಮ್ಮಂ. ಯಸ್ಸ ಕಮ್ಮುನೋ ಪುಬ್ಬಸ್ಸ ಯೋ ಕತ್ತಾ, ಸೋ‘ಭಗವಾ’ತಿ ‘‘ಯೋ ಕರೋತಿ ಸ ಕತ್ತಾ’’ತಿ ಸುತ್ತವಚನೇನ ಕತ್ತುಸಞ್ಞೋ. ಏವಂ ಯಸ್ಸ ಕಮ್ಮುನೋ ಪುಬ್ಬಸ್ಸ ಯೋ ಕತ್ತಾ, ಸೋ ಸಮ್ಪದಾನಸಞ್ಞೋ ಹೋತಿ.

ತಂ ಯಥಾ? ತೇ ಭಿಕ್ಖೂ ಭಗವತೋ ಪಚ್ಚಸ್ಸೋಸುಂ, ಆಸುಣನ್ತಿ ಬುದ್ಧಸ್ಸ ಭಿಕ್ಖೂ.

ಗಿಣಸ್ಸ ಅನುಪತಿಯೋಗೇ ಯಸ್ಸ ಕಮ್ಮುನೋ ಪುಬ್ಬಸ್ಸ ಯೋ ಕತ್ತಾ, ಸೋ ಸಮ್ಪದಾನಸಞ್ಞೋ ಹೋತಿ.

ತಂ ಯಥಾ? ಭಿಕ್ಖು ಜನಂ ಧಮ್ಮಂ ಸಾವೇತಿ, ತಸ್ಸ ಭಿಕ್ಖುನೋ ಜನೋ ಅನುಗಿಣಾತಿ, ತಸ್ಸ ಭಿಕ್ಖುನೋ ಜನೋ ಪತಿಗಿಣಾತಿ.

ಯೋ ವದೇತಿ ಸ‘ಕತ್ತಾ’ತಿ,

ವುತ್ತಂ ‘ಕಮ್ಮ’ನ್ತಿ ವುಚ್ಚತಿ;

ಯೋ ಪಟಿಗ್ಗಾಹಕೋ ತಸ್ಸ,

‘ಸಮ್ಪದಾನಂ’ ವಿಜಾನಿಯಾ.

ಇಚ್ಚೇವಮಾದಿ.

ಆರೋಚನತ್ಥೇ – ಆರೋಚಯಾಮಿ ವೋ ಭಿಕ್ಖವೇ, ಆಮನ್ತಯಾಮಿ ವೋ ಭಿಕ್ಖವೇ, ಪಟಿವೇದಯಾಮಿ ವೋ ಭಿಕ್ಖವೇ, ಆರೋಚಯಾಮಿ ತೇ ಮಹಾರಾಜ, ಆಮನ್ತಯಾಮಿ ತೇ ಮಹಾರಾಜ, ಪಟಿವೇದಯಾಮಿ ತೇ ಮಹಾರಾಜ ಇಚ್ಚೇವಮಾದಿ.

ತದತ್ಥೇ – ಊನಸ್ಸ ಪಾರಿಪೂರಿಯಾ ತಂ ಚೀವರಂ ನಿಕ್ಖಿಪಿತಬ್ಬಂ. ಬುದ್ಧಸ್ಸ ಅತ್ಥಾಯ, ಧಮ್ಮಸ್ಸ ಅತ್ಥಾಯ, ಸಙ್ಘಸ್ಸ ಅತ್ಥಾಯ, ಜೀವಿತಂ ಪರಿಚ್ಚಜಾಮಿ ಇಚ್ಚೇವಮಾದಿ.

ತುಮತ್ಥೇ -ಲೋಕಾನುಕಮ್ಪಾಯ ಅತ್ಥಾಯ ಹಿತಾಯ ಸುಖಾಯ ದೇವಮನುಸ್ಸಾನಂ ಬುದ್ಧೋ ಲೋಕೇ ಉಪ್ಪಜ್ಜತಿ. ಭಿಕ್ಖೂನಂ ಫಾಸುವಿಹಾರಾಯ ವಿನಯೋ ಪಞ್ಞತ್ತೋ ಇಚ್ಚೇವಮಾದಿ.

ಅಲಮತ್ಥಪ್ಪಯೋಗೇ-ಅಲಮಿತಿ ಅರಹತಿ ಪಟಿಕ್ಖಿತ್ತೇಸು. ಅಲಂ ಮೇ ಬುದ್ಧೋ, ಅಲಂ ಮೇ ರಜ್ಜಂ, ಅಲಂ ಭಿಕ್ಖು ಪತ್ತಸ್ಸ, ಅಲಂ ಮಲ್ಲೋ ಮಲ್ಲಸ್ಸ, ಅರಹತಿ ಮಲ್ಲೋ ಮಲ್ಲಸ್ಸ. ಪಟಿಕ್ಖಿತ್ತೇ ಅಲಂ ತೇ ರೂಪಂ ಕರಣೀಯಂ, ಅಲಂ ಮೇ ಹಿರಞ್ಞಸುವಣ್ಣೇನ ಇಚ್ಚೇವಮಾದಿ.

ಮಞ್ಞತಿಪ್ಪಯೋಗೇ ಅನಾದರೇ ಅಪ್ಪಾಣಿನಿ-ಕಟ್ಠಸ್ಸ ತುವಂ ಮಞ್ಞೇ, ಕಲಿಙ್ಗರಸ್ಸ ತುವಂ ಮಞ್ಞೇ.

ಅನಾದರೇತಿ ಕಿಮತ್ಥಂ? ಸುವಣ್ಣಂ ವಿಯ ತಂ ಮಞ್ಞೇ.

ಅಪ್ಪಾಣಿನೀತಿ ಕಿಮತ್ಥಂ? ಗದ್ರಭಂ ತುವಂ ಮಞ್ಞೇ ಇಚ್ಚೇವಮಾದಿ.

ಗತ್ಯತ್ಥಕಮ್ಮನಿ-ಗಾಮಸ್ಸ ಪಾದೇನ ಗತೋ, ನಗರಸ್ಸ ಪಾದೇನ ಗತೋ, ಅಪ್ಪೋ ಸಗ್ಗಾಯ ಗಚ್ಛತಿ, ಸಗ್ಗಸ್ಸ ಗಮನೇನ ವಾ, ಮೂಲಾಯ ಪಟಿಕಸ್ಸೇಯ್ಯ ಸಙ್ಘೋ. ದುತಿಯಾ ಚ, ಗಾಮಂ ಪಾದೇನ ಗತೋ, ನಗರಂ ಪಾದೇನ ಗತೋ, ಅಪ್ಪೋ ಸಗ್ಗಂ ಗಚ್ಛತಿ, ಸಗ್ಗಂ ಗಮನೇನ ವಾ, ಮೂಲಂ ಪಟಿಕಸ್ಸೇಯ್ಯ ಸಙ್ಘೋ ಇಚ್ಚೇವಮಾದಿ.

ಆಸೀಸತ್ಥೇ-ಆಯಸ್ಮತೋ ದೀಘಾಯುಕೋ ಹೋತು, ಭದ್ದಂ ಭವತೋ ಹೋತು, ಕುಸಲಂ ಭವತೋ ಹೋತು, ಅನಾಮಯಂ ಭವತೋ ಹೋತು, ಸುಖಂ ಭವತೋ ಹೋತು, ಸ್ವಾಗತಂ ಭವತೋ ಹೋತು, ಅತ್ಥೋ ಭವತೋ ಹೋತು, ಹಿತಂ ಭವತೋ ಹೋತು ಇಚ್ಚೇವಮಾದಿ.

ಸಮ್ಮುತಿಪ್ಪಯೋಗೇ– ಅಞ್ಞತ್ರ ಸಙ್ಘಸಮ್ಮುತಿಯಾ ಭಿಕ್ಖುಸ್ಸ ವಿಪ್ಪವತ್ಥುಂ ನ ವಟ್ಟತಿ, ಸಾಧು ಸಮ್ಮುತಿ ಮೇ ತಸ್ಸ ಭಗವತೋ ದಸ್ಸನಾಯ ಇಚ್ಚೇವಮಾದಿ.

ಭಿಯ್ಯಪ್ಪಯೋಗೇ – ಭಿಯ್ಯೋಸೋ ಮತ್ತಾಯಂ ಇಚ್ಚೇವಮಾದಿ.

ಸತ್ತಮ್ಯತ್ಥೇ – ತುಯ್ಹಞ್ಚಸ್ಸ ಆವಿ ಕರೋಮಿ, ತಸ್ಸ ಮೇ ಸಕ್ಕೋ ಪಾತುರಹೋಸಿ ಇಚ್ಚೇವಮಾದಿ.

ಅತ್ಥಗ್ಗಹಣೇನ ಬಹೂಸು ಅಕ್ಖರಪ್ಪಯೋಗೇಸು ದಿಸ್ಸತಿ.

ತಂ ಯಥಾ? ಉಪಮಂ ಮತ ಕರಿಸ್ಸಾಮಿ, ಧಮ್ಮಂ ವೋ ದೇಸೇಸ್ಸಾಮಿ.

ಸಾರತ್ಥೇ ಚ – ದೇಸೇತು ಭನ್ತೇ ಭಗವಾ ಧಮ್ಮಂ ಭಿಕ್ಖೂನಂ. ತಸ್ಸ ಫಾಸು ವಿಹಾರಾಯ ಹೋತಿ, ಏತಸ್ಸ ಪಹಿಣೇಯ್ಯ, ಯಥಾ ನೋ ಭಗವಾ ಬ್ಯಾಕರೇಯ್ಯ, ತಥಾಪಿ ತೇಸಂ ಬ್ಯಾಕರಿಸ್ಸಾಮ, ಕಪ್ಪತಿ ಸಮಣಾನಂ ಆಯೋಗೋ, ಅಮ್ಹಾಕಂ ಮಣಿನಾ ಅತ್ಥೋ, ಕಿಮತ್ಥೋ ಮೇ ಬುದ್ಧೇನ, ಸೇಯ್ಯೋ ಮೇ ಅತ್ಥೋ, ಬಹೂಪಕಾರಾ ಭನ್ತೇ ಮಹಾಪಜಾ ಪತಿಗೋತಮೀ ಭಗವತೋ, ಬಹೂಪಕಾರಾ ಭಿಕ್ಖವೇ ಮಾತಾಪಿತರೋ ಪುತ್ತಾನಂ ಇಚ್ಚೇವಮಾದಿ.

ಸೇಸೇಸು ಅಕ್ಖರಪ್ಪಯೋಗೇಸುಪಿ ಅಞ್ಞೇಪಿ ಪಯೋಗಾ ಪಯೋಗವಿಚಕ್ಖಣೇಹಿ ಯೋಜೇತಬ್ಬಾ.

ಚಗ್ಗಹಣಂ ವಿಕಪ್ಪನತ್ಥವಾಗ್ಗಹಣಾನುಕಡ್ಢನತ್ಥಂ. ಯೇ ಕೇಚಿ ಸದ್ದಾ ಸಮ್ಪದಾನಪ್ಪಯೋಗಿಕಾ ಮಯಾ ನೋಪದಿಟ್ಠಾ, ತೇಸಂ ಗಹಣತ್ಥಂ ಇಧ ವಿಕಪ್ಪೀಯತಿ ವಾಸದ್ದೋ.

ತಂ ಯಥಾ? ಭಿಕ್ಖುಸಙ್ಘಸ್ಸ ಪಭೂ ಅಯಂ ಭಗವಾ, ದೇಸಸ್ಸ ಪಭೂ ಅಯಂ ರಾಜಾ. ಖೇತ್ತಸ್ಸ ಪಭೂ ಅಯಂ ಗಹಪತಿ, ಅರಞ್ಞಸ್ಸ ಪಭೂ ಅಯಂ ಲುದ್ದಕೋ ಇಚ್ಚೇವಮಾದಿ. ಕ್ವಚಿ ದುತಿಯಾ ತತಿಯಾ ಪಞ್ಚಮೀ ಛಟ್ಠೀ ಸತ್ತಮ್ಯತ್ಥೇಸು ಚ.

೧೭೮. , ೩೨೦. ಯೋಧಾರೋ ತಮೋಕಾಸಂ.

ಯೋ ಆಧಾರೋ, ತಂ ಓಕಾಸಸಞ್ಞಂ ಹೋತಿ. ಸ್ವಾಧಾರೋ ಚತುಬ್ಬಿಧೋ ಬ್ಯಾಪಿಕೋ, ಓಪಸಿಲೇಸಿಕೋ, ವೇಸಯಿಕೋ ಸಾಮೀಪಿಕೋ ಚಾತಿ.

ತತ್ಥ ಬ್ಯಾಪಿಕೋ ತಾವ–ಜಲೇಸು ಖೀರಂ ತಿಟ್ಠತಿ, ತಿಲೇಸು ತೇಲಂ, ಉಚ್ಛೂಸು ರಸೋ.

ಓಪಸಿಲೇಸಿಕೋ–ಪರಿಯಙ್ಕೇ ರಾಜಾ ಸೇತಿ, ಆಸನೇ ಉಪವಿಟ್ಠೋ ಸಙ್ಘೋ.

ವೇಸಯಿಕೋ–ಭೂಮೀಸು ಮನುಸ್ಸಾ ಚರನ್ತಿ, ಅನ್ತಲಿಕ್ಖೇ ವಾಯೂ ವಾಯನ್ತಿ. ಆಕಾಸೇ ಸಕುಣಾ ಪಕ್ಖನ್ದನ್ತಿ.

ಸಾಮೀಪಿಕೋ–ವನೇ ಹತ್ಥಿನೋ ಚರನ್ತಿ, ಗಙ್ಗಾಯಂ ಘೋಸೋ ತಿಟ್ಠತಿ, ವಜೇ ಗಾವೋ ದುಹನ್ತಿ, ಸಾವತ್ಥಿಯಂ ವಿಹರತಿ ಜೇತವನೇ.

ಓಕಾಸಮಿಚ್ಚನೇನ ಕ್ವತ್ಥೋ? ಓಕಾಸೇ ಸತ್ತಮೀ.

೨೭೯. , ೨೯೨. ಯೇನ ವಾ ಕಯಿರತೇ ತಂ ಕರಣಂ.

ಯೇನ ವಾ ಕಯಿರತೇ, ಯೇನ ವಾ ಪಸ್ಸತಿ, ಯೇನ ವಾ ಸುಣಾತಿ, ತಂ ಕಾರಕಂ ಕರಣಸಞ್ಞಂ ಹೋತಿ.

ದತ್ತೇನ ವಿಹಿಂ ಲುನಾತಿ, ವಾಸಿಯಾ ಕಟ್ಠಂ ತಚ್ಛತಿ, ಫರಸುನಾ ರುಕ್ಖಂ ಛಿನ್ದತಿ, ಕುದಾಲೇನ ಪಥವಿಂ ಖಣತಿ, ಸತ್ಥೇನ ಕಮ್ಮಂ ಕರೋತಿ. ಚಕ್ಖುನಾ ರೂಪಂ ಪಸ್ಸತಿ.

ಕರಣಮಿಚ್ಚನೇನ ಕ್ವತ್ಥೋ? ಕರಣೇ ತತಿಯಾ.

೨೮೦. , ೨೮೫. ಯಂ ಕರೋತಿ ತಂ ಕಮ್ಮಂ.

ಯಂ ವಾ ಕರೋತಿ, ಯಂ ವಾ ಪಸ್ಸತಿ, ಯಂ ವಾ ಸುಣಾತಿ, ತಂ ಕಾರಕಂ ಕಮ್ಮಸಞ್ಞಂ ಹೋತಿ.

ಛತ್ತಂ ಕರೋತಿ, ರಥಂ ಕರೋತಿ, ರೂಪಂ ಪಸ್ಸತಿ, ಸದ್ದಂ ಸುಣಾತಿ, ಕಣ್ಟಕಂ ಮದ್ದತಿ, ವಿಸಂ ಗಿಲತಿ.

ಕಮ್ಮಮಿಚ್ಚನೇನ ಕ್ವತ್ಥೋ? ಕಮ್ಮತ್ಥೇ ದುತಿಯಾ.

೨೮೧. , ೨೯೪. ಯೋ ಕರೋತಿ ಸ ಕತ್ತಾ.

ಯೋ ಕರೋತಿ, ಸೋ ಕತ್ತುಸಞ್ಞೋ ಹೋತಿ.

ಅಹಿನಾ ದಟ್ಠೋ ನರೋ, ಗರುಳೇನ ಹತೋ ನಾಗೋ. ಬುದ್ಧೇನ ಜಿತೋ ಮಾರೋ, ಉಪಗುತ್ತೇನ ಮಾರೋ ಬನ್ಧೋ.

ಕತ್ತುಇಚ್ಚನೇನ ಕ್ವತ್ಥೋ? ಕತ್ತರಿ ಚ.

೨೮೨. , ೨೯೫. ಯೋ ಕಾರೇತಿ ಸ ಹೇತು.

ಯೋ ಕತ್ತಾರಂ ಕಾರೇತಿ, ಸೋ ಹೇತುಸಞ್ಞೋ ಹೋತಿ, ಕತ್ತಾ ಚ.

ಸೋ ಪುರಿಸೋ ತಂ ಪುರಿಸಂ ಕಮ್ಮಂ ಕಾರೇತಿ ಸೋ ಪುರಿಸೋ ತೇನ ಪುರಿಸೇನ ಕಮ್ಮಂ ಕಾರೇತಿ, ಸೋ ಪುರಿಸೋ ತಸ್ಸ ಪುರಿಸಸ್ಸ ಕಮ್ಮಂ ಕಾರೇತಿ. ಏವಂ ಹಾರೇತಿ ಪಾಠೇತಿ ಪಾಚೇತಿ, ಧಾರೇತಿ.

ಹೇತುಇಚ್ಚನೇನ ಕ್ವತ್ಥೋ? ಧಾತೂಹಿ ಣೇ ಣಯ ಣಾಪೇ ಣಾಪಯಾ ಕಾರಿತಾನಿ ಹೇತ್ವತ್ಥೇ.

೨೮೩. , ೩೧೬. ಯಸ್ಸ ವಾ ಪರಿಗ್ಗಹೋ ತಂ ಸಾಮೀ.

ಯಸ್ಸ ವಾ ಪರಿಗ್ಗಹೋ, ತಂ ಸಾಮೀಸಞ್ಞಂ ಹೋತಿ.

ತಸ್ಸ ಭಿಕ್ಖುನೋ ಪಟಿವೀಸೋ, ತಸ್ಸ ಭಿಕ್ಖುನೋ ಪತ್ತೋ, ತಸ್ಸ ಭಿಕ್ಖುನೋ ಚೀವರಂ, ಅತ್ತನೋ ಮುಖಂ.

ಸಾಮೀಇಚ್ಚನೇನ ಕ್ವತ್ಥೋ? ಸಾಮಿಸ್ಮಿಂ ಛಟ್ಠೀ.

೨೮೪. , ೨೮೩. ಲಿಙ್ಗತ್ಥೇ ಪಠಮಾ.

ಲಿಙ್ಗತ್ಥಾಭಿಧಾನಮತ್ತೇ ಪಠಮಾವಿಭತ್ತಿ ಹೋತಿ.

ಪುರಿಸೋ, ಪುರಿಸಾ, ಏಕೋ, ದ್ವೇ, ಚ, ವಾ, ಹೇ, ಅಹೇ, ರೇ, ಅರೇ.

೨೮೫. , ೭೦. ಆಲಪನೇ ಚ.

ಆಲಪನತ್ಥಾ ಧಿಕೇ ಲಿಙ್ಗತ್ಥಾಭಿಧಾನಮತ್ತೇ ಚ ಪಠಮಾವಿಭತ್ತಿ ಹೋತಿ.

ಭೋ ಪುರಿಸ, ಭವನ್ತೋ ಪುರಿಸಾ, ಭೋ ರಾಜ, ಭವನ್ತೋ ರಾಜಾನೋ, ಹೇ ಸಖೇ, ಹೇ ಸಖಿನೋ.

೨೮೬. , ೨೯೧. ಕರಣೇ ತತಿಯಾ.

ಕರಣಕಾರಕೇ ತತಿಯಾವಿಭತ್ತಿ ಹೋತಿ.

ಅಗ್ಗಿನಾ ಕುಟಿಂ ಝಾಪೇತಿ, ಮನಸಾ ಚೇ ಪದುಟ್ಠೇನ, ಮನಸಾ ಚೇ ಪಸನ್ನೇನ, ಕಾಯೇನ ಕಮ್ಮಂ ಕರೋತಿ.

೨೮೭. , ೨೯೯. ಸಹಾದಿಯೋಗೇ ಚ.

ಸಹಾದಿಯೋಗತ್ಥೇ ಚ ತತಿಯಾವಿಭತ್ತಿ ಹೋತಿ.

ಸಹಾಪಿ ಗಗ್ಗೇನ ಸಙ್ಘೋ ಉಪೋಸಥಂ ಕರೇಯ್ಯ, ವಿನಾಪಿ ಗಗ್ಗೇನ, ಮಹತಾ ಭಿಕ್ಖುಸಙ್ಘೇನ ಸದ್ಧಿಂ, ಸಹಸ್ಸೇನ ಸಮಂ ಮಿತಾ.

೨೮೮. , ೨೯೩. ಕತ್ತರಿ ಚ.

ಕತ್ತರಿ ಚ ತತಿಯಾವಿಭತ್ತಿ ಹೋತಿ.

ರಞ್ಞಾ ಹತೋ ಪೋಸೋ, ಯಕ್ಖೇನ ದಿನ್ನೋ ವರೋ, ಅಹಿನಾ ದಟ್ಠೋ ನರೋ.

೨೮೯. , ೨೯೭. ಹೇತ್ವತ್ಥೇ ಚ.

ಹೇತ್ವತ್ಥೇ ಚ ತತಿಯಾವಿಭತ್ತಿ ಹೋತಿ.

ಅನ್ನೇನ ವಸತಿ, ಧಮ್ಮೇನ ವಸತಿ, ವಿಜ್ಜಾಯ ವಸತಿ, ಸಕ್ಕಾರೇನ ವಸತಿ.

೨೯೦. , ೨೯೮. ಸತ್ತಮ್ಯತ್ಥೇ ಚ.

ಸತ್ತಮ್ಯತ್ಥೇ ಚ ತತಿಯಾವಿಭತ್ತಿ ಹೋತಿ.

ತೇನ ಕಾಲೇನ, ತೇನ ಸಮಯೇನ. (ಯೇನ ಕಾಲೇನ, ಯೇನ ಸಮಯೇನ,) ತೇನ ಖೋ ಪನ ಸಮಯೇನ.

೨೯೧. , ೨೯೯. ಯೇನಙ್ಗವಿಕಾರೋ.

ಯೇನ ಬ್ಯಾಧಿಮತಾ ಅಙ್ಗೇನ ಅಙ್ಗಿನೋ ವಿಕಾರೋ ಲಕ್ಖೀಯತೇ. ತತ್ಥ ತತಿಯಾವಿಭತ್ತಿ ಹೋತಿ.

ಅಕ್ಖಿನಾ ಕಾಣೋ, ಹತ್ಥೇನ ಕುಣೀ, ಕಾಣಂ ಪಸ್ಸತಿ ನೇತ್ತೇನ, ಪಾದೇನ ಖಞ್ಜೋ, ಪಿಟ್ಠಿಯಾ ಖುಜ್ಜೋ.

೨೯೨. , ೩೦೦. ವಿಸೇಸನೇ ಚ.

ವಿಸೇಸನತ್ಥೇ ಚ ತತಿಯಾವಿಭತ್ತಿ ಹೋತಿ.

ಗೋತ್ತೇನ ಗೋತಮೋ ನಾಥೋ, ಸುವಣ್ಣೇನ ಅಭಿರೂಪೋ, ತಪಸಾ ಉತ್ತಮೋ.

೨೯೩. , ೩೦೧. ಸಮ್ಪದಾನೇ ಚತುತ್ಥೀ.

ಸಮ್ಪದಾನಕಾರಕೇ ಚತುತ್ಥೀವಿಭತ್ತಿ ಹೋತಿ.