೪. ಸಮಾಸಕಪ್ಪ

ಸತ್ತಮಕಣ್ಡ

೩೧೬. , ೩೩೧. ನಾಮಾನಂ ಸಮಾಸೋ ಯುತ್ತತ್ಥೋ.

ತೇಸಂ ನಾಮಾನಂ ಪಯುಜ್ಜಮಾನಪದತ್ಥಾನಂ ಯೋ ಯುತ್ತತ್ಥೋ, ಸೋ ಸಮಾಸಸಞ್ಞೋ ಹೋತಿ.

ಕಥಿನದುಸ್ಸಂ, ಆಗನ್ತುಕಭತ್ತಂ, ಜೀವಿತಿನ್ದ್ರಿಯಂ, ಸಮಣಬ್ರಾಹ್ಮಣಾ, ಸಾರಿಪುತ್ತಮೋಗ್ಗಲ್ಲಾನಾ, ಬ್ರಾಹ್ಮಣ ಗಹಪತಿಕಾ.

ನಾಮಾನಮಿತಿ ಕಿಮತ್ಥಂ? ದೇವದತ್ತೋ ಪಚತಿ, ಯಞ್ಞದತ್ತೋ ಪಚತಿ.

ಯುತ್ತತ್ಥೋತಿ ಕಿಮತ್ಥಂ? ಭತೋ ರಞ್ಞೋ ಪುತ್ತೋ ದೇವದತ್ತಸ್ಸ.

ಸಮಾಸಇಚ್ಚನೇನ ಕ್ವತ್ಥೋ? ಕ್ವಚಿ ಸಮಾಸನ್ತಗತಾನಮಕಾರನ್ತೋ.

೩೧೭. , ೩೩೨. ತೇಸಂ ವಿಭತ್ತಿಯೋ ಲೋಪಾ ಚ.

ತೇಸಂ ಯುತ್ತತ್ಥಾನಂ ಸಮಾಸಾನಂ ವಿಭತ್ತಿಯೋ ಲೋಪಾ ಚ ಹೋನ್ತಿ.

ಕಥಿನದುಸ್ಸಂ, ಆಗನ್ತುಕಭತ್ತಂ.

ತೇಸಂಗಹಣೇನ ಸಮಾಸತದ್ಧಿತಾಖ್ಯಾತಕಿತಕಾನಂ ವಿಭತ್ತಿಪಚ್ಚಯಪದಕ್ಖರಾಗಮಾ ಚ ಲೋಪಾ ಹೋನ್ತಿ. ವಾಸಿಟ್ಠೋ, ವೇನತೇಯ್ಯೋ.

ಚಗ್ಗಹಣ ಮವಧಾರಣತ್ಥಂ, ಪಭಙ್ಕರೋ, ಅಮತದ್ದದೋ, ಮೇಧಙ್ಕರೋ, ದೀಪಙ್ಕರೋ.

೩೧೮. , ೩೩೩. ಪಕತಿ ಚಸ್ಸ ಸರನ್ತಸ್ಸ.

ಲುತ್ತಾಸು ವಿಭತ್ತೀಸು ಅಸ್ಸ ಸರನ್ತಸ್ಸ ಲಿಙ್ಗಸ್ಸ ಪಕತಿರೂಪಾನಿ ಹೋನ್ತಿ.

ಚಕ್ಖುಸೋತಂ, ಮುಖನಾಸಿಕಂ, ರಾಜಪುತ್ತೋ, ರಾಜಪುರಿಸೋ.

೩೧೯. , ೩೩೦. ಉಪಸಗ್ಗನಿಪಾತಪುಬ್ಬಕೋ ಅಬ್ಯಯೀಭಾವೋ.

ಉಪಸಗ್ಗನಿಪಾತಪುಬ್ಬಕೋ ಸಮಾಸೋ ಅಬ್ಯಯೀಭಾವಸಞ್ಞೋ ಹೋತಿ.

ನಗರಸ್ಸ ಸಮೀಪೇ ಪವತ್ತತಿ ಕಥಾ ಇತಿ ಉಪನಗರಂ, ದರಥಾನಂ ಅಭಾವೋ ನಿದ್ದರಥಂ, ಮಕಸಾನಂ ಅಭಾವೋ ನಿಮ್ಮಕಸಂ, ವುಡ್ಢಾನಂ ಪಟಿಪಾಟಿ ಯಥಾವುಡ್ಢಂ, ಯೇ ಯೇ ವುಡ್ಢಾ ವಾ ಯಥಾವುಡ್ಢಂ, ಜೀವಸ್ಸ ಯತ್ತಕೋ ಪರಿಚ್ಛೇದೋ ಯಾವಜೀವಂ, ಚಿತ್ತಮಧಿಕಿಚ್ಚ ಪವತ್ತನ್ತಿ ತೇ ಧಮ್ಮಾತಿ ಅಧಿಚಿತ್ತಂ, ಪಬ್ಬತಸ್ಸ ತಿರೋ ತಿರೋಪಬ್ಬತಂ, ಸೋತಸ್ಸ ಪತಿ ಪವತ್ತತಿ ನಾವಾ ಇತಿ ಪತಿಸೋತಂ, ಪಾಸಾದಸ್ಸ ಅನ್ತೋ ಅನ್ತೋಪಾಸಾದಂ.

ಅಬ್ಯಯೀಭಾವಮಿಚ್ಚನೇನ ಕ್ವತ್ಥೋ? ಅಂವಿಭತ್ತೀನ ಮಕಾರನ್ತಾ ಅಬ್ಯಯೀಭಾವಾ.

೩೨೦. , ೩೩೫. ಸೋ ನಪುಂಸಕಲಿಙ್ಗೋ.

ಸೋ ಅಬ್ಯಯೀಭಾವಸಮಾಸೋ ನಪುಂಸಕಲಿಙ್ಗೋವ ದಟ್ಠಬ್ಬೋ.

ಕುಮಾರೀಸು ಅಧಿಕಿಚ್ಚ ಪವತ್ತತಿ ಕಥಾ ಇತಿ ಅಧಿಕುಮಾರಿ, ವಧುಯಾ ಸಮೀಪೇ ಪವತ್ತತಿ ಕಥಾ ಇತಿ ಉಪವಧು, ಗಙ್ಗಾಯ ಸಮೀಪೇ ಪವತ್ತತಿ ಕಥಾ ಇತಿ ಉಪಗಙ್ಗಂ, ಮಣಿಕಾಯ ಸಮೀಪೇ ಪವತ್ತತಿ ಕಥಾ ಇತಿ ಉಪಮಣಿಕಂ.

೩೨೧. , ೩೪೯. ದಿಗುಸ್ಸೇಕತ್ತಂ.

ದಿಗುಸ್ಸ ಸಮಾಸಸ್ಸ ಏಕತ್ತಂ ಹೋತಿ, ನಪುಂಸಕಲಿಙ್ಗತ್ತಞ್ಚ.

ತಯೋ ಲೋಕಾ ತಿಲೋಕಂ, ತಯೋ ದಣ್ಡಾ ತಿದಣ್ಡಂ, ತೀಣಿ ನಯನಾನಿ ತಿನಯನಂ, ತಯೋ ಸಿಙ್ಗಾ ತಿಸಿಙ್ಗಂ. ಚತಸ್ಸೋ ದಿಸಾ ಚತುದ್ದಿಸಂ, ಪಞ್ಚ ಇನ್ದ್ರಿಯಾನಿ ಪಞ್ಚಿನ್ದ್ರಿಯಂ.

೩೨೨. , ೩೫೯. ತಥಾ ದ್ವನ್ದೇ ಪಾಣಿ ತೂರಿಯ ಯೋಗ್ಗಸೇನಙ್ಗಖುದ್ದಜನ್ತುಕ ವಿವಿಧವಿರುದ್ಧ ವಿಸಭಾಗತ್ಥಾದೀನಞ್ಚ.

ತಥಾ ದ್ವನ್ದೇ ಸಮಾಸೇ ಪಾಣಿ ತೂರಿಯ ಯೋಗ್ಗ ಸೇನಙ್ಗಖುದ್ದಜನ್ತುಕ ವಿವಿಧವಿರುದ್ಧ ವಿಸಭಾಗತ್ಥಇಚ್ಚೇವಮಾದೀನಂ ಏಕತ್ತಂ ಹೋತಿ, ನಪುಂಸಕಲಿಙ್ಗತ್ತಞ್ಚ.

ತಂ ಯಥಾ? ಚಕ್ಖು ಚ ಸೋತಞ್ಚ ಚಕ್ಖುಸೋತಂ, ಮುಖಞ್ಚ ನಾಸಿಕಾ ಚ ಮುಖನಾಸಿಕಂ, ಛವಿ ಚ ಮಂಸಞ್ಚ ಲೋಹಿತಞ್ಚ ಛವಿಮಂಸಲೋಹಿತಂ. ಏವಂ ಪಾಣ್ಯಙ್ಗತ್ಥೇ.

ಸಙ್ಖೋ ಚ ಪಣವೋ ಚ ಸಙ್ಖಪಣವಂ, ಗೀತಞ್ಚ ವಾದಿತಞ್ಚ ಗೀತವಾದಿತಂ, ದದ್ದರಿ ಚ ಡಿಣ್ಡಿಮೋ ಚ ದದ್ದರಿಡಿಣ್ಡಿಮಂ. ಏವಂ ತೂರಿಯಙ್ಗತ್ಥೇ.

ಫಾಲೋ ಚ ಪಾಚನಞ್ಚ ಫಾಲಪಾಚನಂ, ಯುಗಞ್ಚ ನಙ್ಗಲಞ್ಚ ಯುಗನಙ್ಗಲಂ. ಏವಂ ಯೋಗ್ಗಙ್ಗತ್ಥೇ.

ಅಸಿ ಚ ಚಮ್ಮಞ್ಚ ಅಸಿಚಮ್ಮಂ, ಧನು ಚ ಕಲಾಪೋ ಚ ಧನುಕಲಾಪಂ, ಹತ್ಥೀ ಚ ಅಸ್ಸೋ ಚ ಹತ್ಥಿಅಸ್ಸಂ, ರಥೋ ಚ ಪತ್ತಿಕೋ ಚ ರಥಪತ್ತಿಕಂ. ಏವಂ ಸೇನಙ್ಗತ್ಥೇ.

ಡಂಸಾ ಚ ಮಕಸಾ ಚ ಡಂಸಮಕಸಂ, ಕುನ್ಥೋ ಚ ಕಿಪಿಲ್ಲಿಕೋ ಚ ಕುನ್ಥಕಿಪಿಲ್ಲಿಕಂ, ಕೀಟೋ ಚ ಸರೀಸಪೋ ಚ ಕೀಟಸರೀಸಪಂ. ಏವಂ ಖುದ್ದಜನ್ತುಕತ್ಥೇ.

ಅಹಿ ಚ ನಕುಲೋ ಚ ಅಹಿನಕುಲಂ, ಬಿಳಾರೋ ಚ ಮೂಸಿಕೋ ಚ ಬಿಳಾರಮೂಸಿಕಂ, ಕಾಕೋ ಚ ಉಲೂಕೋ ಚ ಕಾಕೋಲೂಕಂ. ಏವಂ ವಿವಿಧವಿರುದ್ಧತ್ಥೇ.

ಸೀಲಞ್ಚ ಪಞ್ಞಾಣಞ್ಚ ಸೀಲಪಞ್ಞಾಣಂ, ಸಮಥೋ ಚ ವಿಪಸ್ಸನಾ ಚ ಸಮಥವಿಪಸ್ಸನಂ, ವಿಜ್ಜಾ ಚ ಚರಣಞ್ಚ ವಿಜ್ಜಾಚರಣಂ. ಏವಂ ವಿಸಭಾಗತ್ಥೇ.

ಆದಿಗ್ಗಹಣಂ ಕಿಮತ್ಥಂ? ದಾಸೀ ಚ ದಾಸೋ ಚ ದಾಸಿದಾಸಂ, ಇತ್ಥೀ ಚ ಪುಮಾ ಚ ಇತ್ಥಿಪುಮಂ, ಪತ್ತೋ ಚ ಚೀವರಞ್ಚ ಪತ್ತಚೀವರಂ, ಛತ್ತಞ್ಚ ಉಪಾಹನಾ ಚ ಛತ್ತುಪಾಹನಂ, ತಿಕಞ್ಚ ಚತುಕ್ಕಞ್ಚ ತಿಕಚತುಕ್ಕಂ, ವೇನೋ ಚ ರಥಕಾರೋ ಚ ವೇನರಥಕಾರಂ, ಸಾಕುಣಿಕೋ ಚ ಮಾಗವಿಕೋ ಚ ಸವಕುಣಿಕಮಾಗವಿಕಂ, ದೀಘೋ ಚ ಮಜ್ಝಿಮೋ ಚ ದೀಘಮಜ್ಝಿಮಂ ಇಚ್ಚೇವಮಾದಿ.

೩೨೩. , ೩೬೦. ವಿಭಾಸಾ ರುಕ್ಖ ತಿಣ ಪಸುಖ ನ ಧಞ್ಞ ಜನಪದಾದೀನಞ್ಚ.

ರುಕ್ಖತಿಣ ಪಸು ಧನ ಧಞ್ಞ ಜನಪದಇಚ್ಚೇವಮಾದೀನಂ ವಿಭಾಸಾ ಏಕತ್ತಂ ಹೋತಿ, ನಪುಂಸಕಲಿಙ್ಗತ್ತಞ್ಚ ದ್ವನ್ದೇ ಸಮಾಸೇ. ಅಸ್ಸತ್ಥೋ ಚ ಕಪೀತನೋ ಚ ಅಸ್ಸತ್ಥಕಪೀತನಂ, ಅಸ್ಸತ್ಥಕಪೀತನಾ ವಾ. ಉಸೀರಞ್ಚ ಬೀರಣಞ್ಚ ಉಸೀರಬೀರಣಂ, ಉಸೀರಬೀರಣಾ ವಾ. ಅಜೋ ಚ ಏಳಕೋ ಚ ಅಜೇಳಕಂ, ಅಜೇಳಕಾ ವಾ. ಹಿರಞ್ಞಞ್ಚ ಸುವಣ್ಣಞ್ಚ ಹಿರಞ್ಞಸುವಣ್ಣಂ, ಹಿರಞ್ಞಸುವಣ್ಣಾ ವಾ. ಸಾಲಿ ಚ ಯವೋ ಚ ಸಾಲಿಯವಂ, ಸಾಲಿಯವಾ ವಾ. ಕಾಸೀ ಚ ಕೋಸಲಾ ಚ ಕಾಸಿಕೋಸಲಂ, ಕಾಸಿಕೋಸಲಾ ವಾ.

ಆದಿಗ್ಗಹಣಂ ಕಿಮತ್ಥಂ? ಸಾವಜ್ಜಞ್ಚ ಅನವಜ್ಜಞ್ಚ ಸಾವಜ್ಜಾನವಜ್ಜಂ, ಸಾವಜ್ಜಾ ನವಜ್ಜಾ ವಾ. ಹೀನಞ್ಚ ಪಣೀತಞ್ಚ ಹೀನಪಣೀತಂ. ಹೀನಪಣೀತಾ ವಾ. ಕಣ್ಹೋ ಚ ಸುಕ್ಕೋ ಚ ಕಣ್ಹಸುಕ್ಕಂ, ಕಣ್ಹಸುಕ್ಕಾ ವಾ.

೩೨೪. , ೩೩೯. ದ್ವಿಪದೇ ತುಲ್ಯಾಧಿಕರಣೇ ಕಮ್ಮಧಾರಯೋ.

ದ್ವೇ ಪದಾನಿ ತುಲ್ಯಾಧಿಕರಣಾನಿ ಯದಾ ಸಮಸ್ಯನ್ತೇ, ತದಾ ಸೋ ಸಮಾಸೋ ಕಮ್ಮಧಾರಯಸಞ್ಞೋ ಹೋತಿ.

ಮಹನ್ತೋ ಚ ಸೋ ಪುರಿಸೋ ಚಾತಿ ಮಹಾಪುರಿಸೋ, ಕಣ್ಹೋ ಚ ಸೋ ಸಪ್ಪೋ ಚಾತಿ ಕಣ್ಹಸಪ್ಪೋ, ನೀಲಞ್ಚ ತಂ ಉಪ್ಪಲಞ್ಚಾತಿ ನೀಲುಪ್ಪಲಂ, ಲೋಹಿತಞ್ಚ ತಂ ಚನ್ದನಞ್ಚಾತಿ ಲೋಹಿತಚನ್ದನಂ, ಬ್ರಾಹ್ಮಣೀ ಚ ಸಾ ದಾರಿಕಾ ಚಾತಿ ಬ್ರಾಹ್ಮಣದಾರಿಕಾ, ಖತ್ತಿಯಾ ಚ ಸಾ ಕಞ್ಞಾ ಚಾತಿ ಖತ್ತಿಯಕಞ್ಞಾ.

ಕಮ್ಮಧಾರಯಇಚ್ಚನೇನ ಕ್ವತ್ಥೋ? ಕಮ್ಮಧಾರಯಸಞ್ಞೇ ಚ.

೩೨೫. , ೩೪೮. ಸಙ್ಖ್ಯಾಪುಬ್ಬೋ ದಿಗು.

ಸಙ್ಖ್ಯಾಪುಬ್ಬೋ ಕಮ್ಮಧಾರಯಸಮಾಸೋ ದಿಗುಸಞ್ಞೋ ಹೋತಿ.

ತೀಣಿ ಮಲಾನಿ ತಿಮಲಂ, ತೀಣಿ ಫಲಾನಿ ತಿಫಲಂ, ತಯೋ ಲೋಕಾ ತಿಲೋಕಂ, ತಯೋ ದಣ್ಡಾ ತಿದಣ್ಡಂ, ಚತಸ್ಸೋ ದಿಸಾ ಚತುದ್ದಿಸಂ, ಪಞ್ಚ ಇನ್ದ್ರಿಯಾನಿ ಪಞ್ಚಿನ್ದ್ರಿಯಂ, ಸತ್ತ ಗೋದಾವರಿಯೋ ಸತ್ತಗೋದಾವರಂ.

ದಿಗುಇಚ್ಚನೇನ ಕ್ವತ್ಥೋ? ದಿಗುಸ್ಸೇ ಕತ್ತಂ.

೩೨೬. , ೩೪೧. ಉಭೇ ತಪ್ಪುರಿಸಾ.

ಉಭೇ ದಿಗುಕಮ್ಮಧಾರಯಸಮಾಸಾ ತಪ್ಪುರಿಸಸಞ್ಞಾ ಹೋನ್ತಿ.

ನ ಬ್ರಾಹ್ಮಣೋ ಅಬ್ರಾಹ್ಮಣೋ, ನ ವಸಲೋ ಅವಸಲೋ, ನ ಭಿಕ್ಖು ಅಭಿಕ್ಖು, ನ ಪಞ್ಚವಸ್ಸಂ ಅಪಞ್ಚವಸ್ಸಂ, ನ ಪಞ್ಚಪೂಲೀ ಅಪಞ್ಚಪೂಲೀ, ನ ಸತ್ತಗೋದಾವರಂಅಸತ್ತಗೋದಾವರಂ, ನ ದಸಗವಂ ಅದಸಗವಂ, ನ ಪಞ್ಚಗವಂ ಅಪಞ್ಚಗವಂ.

ತಪ್ಪುರಿಸಇಚ್ಚನೇನ ಕ್ವತ್ಥೋ? ಅತ್ತಂ ನಸ್ಸ ತಪ್ಪುರಿಸೇ.

೩೨೭. , ೩೫೧. ಅಮಾದಯೋ ಪರಪದೇಭಿ.

ತಾ ಅಮಾದಯೋ ನಾಮೇಹಿ ಪರಪದೇಭಿ ಯದಾ ಸಮಸ್ಯನ್ತೇ, ತದಾ ಸೋ ಸಮಾಸೋ ತಪ್ಪುರಿಸಸಞ್ಞೋ ಹೋತಿ.

ಭೂಮಿಂ ಗತೋ ಭೂಮಿಗತೋ, ಸಬ್ಬರತ್ತಿಂ ಸೋಭಣೋ ಸಬ್ಬರತ್ತಿಸೋಭಣೋ. ಅಪಾಯಂ ಗತೋ ಅಪಾಯಗತೋ, ಇಸ್ಸರೇನ ಕತಂ ಇಸ್ಸರಕತಂ, ಸಲ್ಲೇನ ವಿದ್ಧೋ ಸಲ್ಲವಿದ್ಧೋ, ಕಥಿನಸ್ಸ ದುಸ್ಸಂ ಕಥಿನದುಸ್ಸಂ, ಆಗನ್ತುಕಸ್ಸ ಭತ್ತಂ ಆಗನ್ತುಕಭತ್ತಂ, ಮೇಥುನಾ ಅಪೇತೋ ಮೇಥುನಾಪೇತೋ, ಚೋರಾ ಭಯಂ ಚೋರಭಯಂ, ರಞ್ಞೋ ಪುತ್ತೋ ರಾಜಪುತ್ತೋ, ಧಞ್ಞಾನಂ ರಾಸಿ ಧಞ್ಞರಾಸಿ, ರೂಪೇ ಸಞ್ಞಾ ರೂಪಸಞ್ಞಾ, ಸಂಸಾರೇ ದುಕ್ಖಂ ಸಂಸಾರದುಕ್ಖಂ.

೩೨೮. , ೩೫೨. ಅಞ್ಞಪದತ್ಥೇಸು ಬಹುಬ್ಬೀಹಿ.

ಅಞ್ಞೇಸಂ ಪದಾನಂ ಅತ್ಥೇಸು ದ್ವೇ ನಾಮಾನಿ ಬಹೂನಿ ನಾಮಾನಿ ಯದಾ ಸಮಸ್ಯನ್ತೇ, ತದಾ ಸೋ ಸಮಾಸೋ ಬಹುಬ್ಬೀಹಿ ಸಞ್ಞೋ ಹೋತಿ.

ಆಗತಾ ಸಮಣಾ ಇಮಂ ಸಙ್ಘಾರಾಮಂ ಸೋಯಂ ಆಗತಸಮಣೋ, ಸಙ್ಘಾರಾಮೋ. ಜಿತಾನಿ ಇನ್ದ್ರಿಯಾನಿ ಅನೇನ ಸಮಣೇನ ಸೋಯಂ ಜಿತಿನ್ದ್ರಿಯೋ, ಸಮಣೋ. ದಿನ್ನೋ ಸುಙ್ಕೋ ಯಸ್ಸ ರಞ್ಞೋ ಸೋಯಂ ದಿನ್ನಸುಙ್ಕೋ, ರಾಜಾ. ನಿಗ್ಗತಾ ಜನಾ ಅಸ್ಮಾ ಗಾಮಾ ಸೋಯಂ ನಿಗ್ಗತಜನೋ, ಗಾಮೋ. ಛಿನ್ನೋ ಹತ್ತೋ ಯಸ್ಸ ಪುರಿಸಸ್ಸ ಸೋಯಂ ಛಿನ್ನಹತ್ಥೋ, ಪುರಿಸೋ. ಸಮ್ಪನ್ನಾನಿ ಸಸ್ಸಾನಿ ಯಸ್ಮಿಂ ಜನಪದೇ ಸೋಯಂ ಸಮ್ಪನ್ನಸಸ್ಸೋ, ಜನಪದೋ.

ನಿಗ್ರೋಧಸ್ಸ ಪರಿಮಣ್ಡಲೋ ನಿಗ್ರೋಧಪರಿಮಣ್ಡಲೋ, ನಿಗ್ರೋಧಪರಿಮಣ್ಡಲೋ ಇವ ಪರಿಮಣ್ಡಲೋ ಯೋ ರಾಜಕುಮಾರೋ ಸೋಯಂ ನಿಗ್ರೋಧಪರಿಮಣ್ಡಲೋ. ಅಥ ವಾ ನಿಗ್ರೋಧಪರಿಮಣ್ಡಲೋ ಇವ ಪರಿಮಣ್ಡಲೋ ಯಸ್ಸ ರಾಜಕುಮಾರಸ್ಸ ಸೋಯಂ ನಿಗ್ರೋಧಪರಿಮಣ್ಡಲೋ, ರಾಜಕುಮಾರೋ.

ಚಕ್ಖುನೋ ಭೂತೋ ಚಕ್ಖುಭೂತೋ, ಚಕ್ಖುಭೂತೋ ಇವ ಭೂತೋ ಯೋ ಭಗವಾ ಸೋಯಂ ಚಕ್ಖುಭೂತೋ, ಭಗವಾ.

ಸುವಣ್ಣಸ್ಸ ವಣ್ಣೋ ಸುವಣ್ಣವಣ್ಣೋ, ಸುವಣ್ಣವಣ್ಣೋ ವಿಯ ವಣ್ಣೋ ಯಸ್ಸ ಭಗವತೋ ಸೋಯಂ ಸುವಣ್ಣವಣ್ಣೋ, ಭಗವಾ.

ಬ್ರಹ್ಮುನೋ ಸರೋ ಬ್ರಹ್ಮಸ್ಸರೋ, ಬ್ರಹ್ಮಸ್ಸರೋ ವಿಯ ಸರೋ ಯಸ್ಸ ಭಗವತೋ ಸೋಯಂ ಬ್ರಹ್ಮಸ್ಸರೋ, ಭಗವಾ.

ಸಯಂ ಪತಿತ ಪಣ್ಣ ಪುಪ್ಫಫಲವಾಯುತೋಯಾಹಾರಾತಿ ಪಣ್ಣಞ್ಚ ಪುಪ್ಫಞ್ಚ ಫಲಞ್ಚ ಪಣ್ಣಪುಪ್ಫಫಲಾನಿ, ಸಯಮೇವ ಪತಿತಾನಿ ಸಯಂಪತಿತಾನಿ, ಸಯಂಪತಿತಾನಿ ಚ ತಾನಿ ಪಣ್ಣಪುಪ್ಫಫಲಾನಿ ಚೇತಿ ಸಯಂಪತಿತಪಣ್ಣಪುಪ್ಫಫಲಾನಿ ವಾಯು ಚ ತೋಯಞ್ಚ ವಾಯುತೋಯಾನಿ, ಸಯಂಪತಿತಪಣ್ಣಪುಪ್ಫಫಲಾನಿ ಚ ವಾಯುತೋಯಾನಿ ಚ ಸಯಂಪತಿತಪಣ್ಣಪುಪ್ಫಫಲವಾಯುತೋಯಾನಿ. ಸಯಂಪತಿತಪಣ್ಣಪುಪ್ಫಫಲವಾಯುತೋಯಾನಿ ಆಹಾರಾ ಯೇಸಂ ತೇ ಸಯಂಪತಿತಪಣ್ಣಪುಪ್ಫಫಲವಾಯುತೋಯಾಹಾರಾ, ಇಸಯೋ. ಯಮೇತ್ಥ ವತ್ತಬ್ಬಂ, ತಂ ಹೇಟ್ಠಾ ವುತ್ತಮೇವ. ಅಯಂ ಪನ ದ್ವನ್ದಕಮ್ಮಧಾರಯಗಬ್ಭೋ ತುಲ್ಯಾಧಿಕರಣಪಹುಬ್ಬೀಹಿ.

ಅಥ ವಾ – ಸಯಂಪತಿತಪಣ್ಣಪುಪ್ಫಫಲವಾಯುತೋಯೇಹಿ ಆಹಾರಾ ಯೇಸಂ ತೇ ಸಯಂಪತಿತಪಣ್ಣಪುಪ್ಫಫಲವಾಯುತೋಯಾಹಾರಾ. ಅಯಂ ಪನ ಭಿನ್ನಾಧಿಕರಣಬಹುಬ್ಬೀಹಿ.

ನಾನಾ ದುಮಪತಿತ ಪುಪ್ಫವಾಸಿತ ಸಾನೂತಿ ನಾನಾಪಕಾರಾ ದುಮಾ ನಾನಾದುಮಾ, ನಾನಾದುಮೇಹಿ ಪತಿತಾನಿ ನಾನಾದುಮಪತಿ ತಾನಿ, ನಾನಾದುಮಪತಿತಾನಿ ಚ ತಾನಿ ಪುಪ್ಫಾನಿ ಚೇತಿ ನಾನಾದುಮಪತಿತಪುಪ್ಫಾನಿ, ನಾನಾದುಮಪತಿತಪುಪ್ಫೇಹಿ ವಾಸಿತಾ ನಾನಾದುಮಪತಿತಪುಪ್ಫವಾಸಿತಾ, ನಾನಾದುಮಪತಿತಪುಪ್ಫವಾಸಿತಾ ಸಾನೂ ಯಸ್ಸ ಪಬ್ಬತರಾಜಸ್ಸ ಸೋಯಂ ನಾನಾದುಮಪತಿತಪುಪ್ಫವಾಸಿತಸಾನು, ಪಬ್ಬತರಾಜಾ. ಅಯಂ ಪನ ಕಮ್ಮಧಾರಯತಪ್ಪುರಿಸಗಬ್ಭೋ ತುಲ್ಯಾಧಿಕರಣಬಹುಬ್ಬೀಹಿ.

ಅಥ ವಾ – ವಾಸಿತಾ ಸಾನೂ ವಾಸಿತಸಾನು, ಸಾಪೇಕ್ಖತ್ತೇ ಸತಿಪಿ ಗಮಕತ್ತಾ ಸಮಾಸೋ. ನಾನಾದುಮಪತಿತಪುಪ್ಫೇಹಿ ವಾಸಿತಸಾನೂ ಯಸ್ಸ ಪಬ್ಬತರಾಜಸ್ಸ ಸೋಯಂ ನಾನಾದುಮಪತಿತಪುಪ್ಫವಾಸಿತಸಾನು, ಪಬ್ಬತರಾಜಾ. ಅಯಂ ಪನ ಭಿನ್ನಾಧಿಕರಣಬಹುಬ್ಬೀಹಿ.

ಬ್ಯಾಲಮ್ಬಮ್ಬುಧರಬಿನ್ದುಚುಮ್ಬಿತಕೂಟೋತಿ ಅಮ್ಬುಂ ಧಾರೇತೀತಿ ಅಮ್ಬುಧರೋ, ಕೋ ಸೋ? ಪಜ್ಜುನ್ನೋ. ವಿವಿಧಾ ಆಲಮ್ಬೋ ಬ್ಯಾಲಮ್ಬೋ, ಬ್ಯಾಲಮ್ಬೋ ಚ ಸೋ ಅಮ್ಬುಧರೋ ಚಾತಿ ಬ್ಯಾಲಮ್ಬಮ್ಬುಧರೋ, ಬ್ಯಾಲಮ್ಬಮ್ಬುಧರಸ್ಸ ಬಿನ್ದೂ ಬ್ಯಾಲಮ್ಬಮ್ಬುಧರಬಿನ್ದೂ, ಬ್ಯಾಲಮ್ಬಮ್ಬುಧರಬಿನ್ದೂಹಿ ಚುಮ್ಬಿತೋ ಬ್ಯಾಲಮ್ಬಮ್ಬುಧರಬಿನ್ದುಚುಮ್ಬಿತೋ, ಬ್ಯಾಲಮ್ಬಮ್ಬುರೇಬಿನ್ದುಚುಮ್ಬಿತೋ ಕೂಟೋ ಯಸ್ಸ ಪಬ್ಬತರಾಜಸ್ಸ ಸೋಯಂ ಬ್ಯಾಲಮ್ಬಮ್ಬುಧರಬಿನ್ದುಚುಮ್ಬಿತಕೂಟೋ. ಅಯಂ ಪನ ಕಮ್ಮಧಾರಯತಪ್ಪುರಿಸಗಬ್ಭೋ ತುಲ್ಯಾಧಿಕರಣಬಹುಬ್ಬೀಹಿ.

ಅಥ ವಾ – ಚುಮ್ಬಿತೋ ಕೂಟೋ ಚುಮ್ಬಿತಕೂಟೋ, ಸಾಪೇಕ್ಖತ್ತೇ ಸತಿಪಿ ಗಮಕತ್ತಾ ಸಮಾಸೋ. ಬ್ಯಾಲಮ್ಬಮ್ಬುಧರಬಿನ್ದೂಹಿ ಚುಮ್ಬಿತಕೂಟೋ ಯಸ್ಸ ಪಬ್ಬತರಾಜಸ್ಸ ಸೋಯಂ ಬ್ಯಾಲಮ್ಬಮ್ಬುಧರಬಿನ್ದುಚುಮ್ಬಿತಕೂಟೋ. ಅಯಂ ಪನ ಭಿನ್ನಾಧಿಕರಣಬಹುಬ್ಬೀಹಿ.

ಅಮಿತ ಬಲ ಪರಕ್ಕಮಜುತೀತಿ ನ ಮಿತಾ ಅಮಿತಾ, ಬಲಞ್ಚ ಪರಕ್ಕಮೋ ಚ ಜುತಿ ಚ ಬಲಪರಕ್ಕಮಜುತಿಯೋ, ಅಮಿತಾ ಬಲಪರಕ್ಕಮಜುತಿಯೋ ಯಸ್ಸ ಸೋಯಂ ಅಮಿತಬಲಪರಕ್ಕಮಜುತಿ, ಅಯಂ ಪನ ಕಮ್ಮಧಾರಯದ್ವನ್ದಗಬ್ಭೋ ತುಲ್ಯಾಧಿಕರಣಬಹುಬ್ಬೀಹಿ.

ಪೀಣೋರಕ್ಖಂಸ ಬಾಹೂತಿ ಉರೋ ಚ ಅಕ್ಖಞ್ಚ ಅಂಸೋ ಚ ಬಾಹು ಚ ಉರಕ್ಖಂಸಬಾಹವೋ, ಪೀಣಾ ಉರಕ್ಖಂಸಬಾಹವೋ ಯಸ್ಸ ಭಗವತೋ ಸೋಯಂ ಪೀಣೋರಕ್ಖಂಸಬಾಹು. ಅಯಂ ಪನ ದ್ವನ್ದವಬ್ಭೋ ತುಲ್ಯಾಧಿಕರಣಬಹುಬ್ಬೀಹಿ.

ಪೀಣ ಗಣ್ಡ ವದನ ಥನೂರುಜಘನಾತಿ ಗಣ್ಡೋ ಚ ವದನಞ್ಚ ಥನೋ ಚ ಊರು ಚ ಜಘನಞ್ಚ ಗಣ್ಡವದನಥನೂರುಜಘನಾ, ಪೀಣಾ ಗಣ್ಡವದನಥನೂರುಜಘನಾ ಯಸ್ಸಾ ಸಾಯಂ ಪೀಣಗಣ್ಡವದನಥನೂರುಜಘನಾ. ಅಯಮ್ಪಿ ದ್ವನ್ದಗಬ್ಭೋ ತುಲ್ಯಾಧಿಕರಣಬಹುಬ್ಬೀಹಿ.

ವವರ ಸುರಾಸುರ ಗರುಡ ಮನುಜ ಭುಜಗ ಗನ್ಧಬ್ಬ ಮಕುಟ ಕೂಟ ಚುಮ್ಬಿತ ಸೇಲಸಙ್ಘಟ್ಟಿತ ಚರಣೋತಿ ಸುರಾ ಚ ಅಸುರಾ ಚ ಗರುಡಾ ಚ ಮನುಜಾ ಚ ಭುಜಗಾ ಚ ಗನ್ಧಬ್ಬಾ ಚ ಸುರಾಸುರಗರುಡಮನುಜಭುಜಗಗನ್ಧಬ್ಬಾ, ಪವರಾ ಚ ತೇ ಸುರಾಸುರಗರುಡಮನುಜಭುಜಗ ಗನ್ಧಬ್ಬಾ ಚೇತಿ ಪವರಸುರಾಸುರಗರುಡಮನುಜಭುಜಗಗನ್ಧಬ್ಬಾ, ಪವರಸುರಾಸುರಗರುಡಮನುಜಭುಜಗಗನ್ಧಬ್ಬಾನಂ ಮಕುಟಾನಿ ಪವರಸುರಾಸುರಗರುಡಮನುಜಭುಜಗಗನ್ಧಬ್ಬಮಕುಟಾನಿ, ಪವರಸುರಾಸುರಗರುಡಮನುಜಭುಜಗಗನ್ಧಬ್ಬಮಕುಟಾನಂ ಕೂಟಾನಿ ಪವರಸುರಾಸುರಗರುಡಮನುಜಭುಜಗಗನ್ಧಬ್ಬಮಕುಟಕೂಟಾನಿ, ಪವರಸುರಾಸುರಗರುಡಮನುಜಭುಜಗಗನ್ಧಬ್ಬಮಕುಟಕೂಟೇಸು ಚುಮ್ಬಿತಾ ಪವರಸುರಾಸುರಗರುಡಮನುಜಭುಜಗಗನ್ಧಬ್ಬಮಕುಟಕೂಟಚುಮ್ಬಿತಾ, ಪವರಸುರಾಸುರಗರುಡಮನುಜಭುಜಗಗನ್ಧಬ್ಬಮಕುಟಕೂಟಚುಮ್ಬಿತಾ ಚ ತೇ ಸೇಲಾ ಚಾತಿ ಪವರಸುರಾಸುರಗರುಡಮನುಜಭುಜಗಗನ್ಧಬ್ಬಮಕುಟಕೂಟಚುಮ್ಬಿತಸೇಲಾ, ಪವರಸುರಾಸುರ ಗರುಡಮನುಜಭುಜಗಗನ್ಧಬ್ಬಮಕುಟಕೂಟಚುಮ್ಬಿತಸೇಲೇಹಿ ಸಙ್ಘಟ್ಟಿತಾ ಪವರಸುರಾಸುರ ಗರುಡಮನುಜಭುಜಗಗನ್ಧಬ್ಬಮಕುಟಕೂಟಚುಮ್ಬಿತಸೇಲಸಙ್ಘಟ್ಟಿತಾ, ಪವರಸುರಾಸುರಗರುಡಮನುಜಭುಜಗಗನ್ಧಬ್ಬಮಕುಟಕೂಟಚುಮ್ಬಿತಸೇಲಸಙ್ಘಟ್ಟಿತಾ ಚರಣಾ ಯಸ್ಸ ತಥಾಗತಸ್ಸ ಸೋಯಂ ಪವರಸುರಾಸುರಗರುಡಮನುಜಭುಜಗಗನ್ಧಬ್ಬಮಕುಟಕೂಟಚುಮ್ಬಿತಸೇಲಸಙ್ಘಟ್ಟಿತಚರಣೋ, ತಥಾಗತೋ, ಅಯಂ ಪನ ದ್ವನ್ದಕಮ್ಮಧಾರಯತಪ್ಪುರಿಸಗಬ್ಭೋ ತುಲ್ಯಾಧಿಕರಣಬಹುಬ್ಬೀಹಿ.

ಅಥ ವಾ–ಸಙ್ಘಟ್ಟಿತಾ ಚರಣಾ ಸಙ್ಘಟ್ಟಿತಚರಣಾ, ಸಾಪೇಕ್ಖತ್ತೇ ಸತಿಪಿ ಗಮಕತ್ತಾ ಸಮಾಸೋ. ಪವರಸುರಾಸುರ ಗರುಡಮನುಜಭುಜಗ ಗನ್ಧಬ್ಬಮಕುಟಕೂಟಚುಮ್ಬಿತಸೇಲೇಹಿ ಸಙ್ಘಟ್ಟಿತಚರಣಾ ಯಸ್ಸ ತಥಾಗತಸ್ಸ ಸೋಯಂ ಪವರಸುರಾಸುರಗರುಡ ಮನುಜಭುಜಗ ಗನ್ಧಬ್ಬಮಕುಟಕೂಟಚುಮ್ಬಿತಸೇಲಸಙ್ಘಟ್ಟಿತ ಚರಣೋ. ಅಯಂ ಪನ ಭಿನ್ನಾಧಿಕರಣಬಹುಬ್ಬೀಹಿ.

ಚತುದ್ದಿಸೋತಿ ಚತಸ್ಸೋ ದಿಸಾ ಯಸ್ಸ ಸೋಯಂ ಚತುದ್ದಿಸೋ, ಭಗವಾ.

ಪಞ್ಚಚಕ್ಖೂತಿ ಪಞ್ಚ ಚಕ್ಖೂನಿ ಯಸ್ಸ ತಥಾಗತಸ್ಸ ಸೋಯಂ ಪಞ್ಚಚಕ್ಖು, ತಥಾಗತೋ.

ದಸಬಲೋತಿ ದಸ ಬಲಾನಿ ಯಸ್ಸ ಸೋಯಂ ದಸಬಲೋ, ಭಗವಾ.

ಅನನ್ತಞಾಣೋತಿ ನಸ್ಸ ಅನ್ತೋ ಅನನ್ತಂ, ಅನನ್ತಂ ಞಾಣಂ ಯಸ್ಸ ತಥಾಗತಸ್ಸ ಸೋಯಂ ಅನನ್ತಞಾಣೋ, ತಥಾಗತೋ.

ಅಮಿತ ಘನ ಸರೀರೋತಿ ನ ಮಿತಂ ಅಮಿತಂ, ಘನಂ ಏವ ಸರೀರಂ ಘನಸರೀರಂ, ಅಮಿತಂ ಘನಸರೀರಂ ಯಸ್ಸ ತಥಾಗತಸ್ಸ ಸೋಯಂ ಅಮಿತಘನಸರೀರೋ, ತಥಾಗತೋ.

ಅಮಿತ ಬಲ ಪರಕ್ಕಮ ಪತ್ತೋತಿ ನ ಮಿತಾ ಅಮಿತಾ, ಬಲಞ್ಚ ಪರಕ್ಕಮೋ ಚ ಬಲಪರಕ್ಕಮಾ, ಅಮಿತಾ ಏವ ಬಲಪರಕ್ಕಮಾ ಅಮಿತಬಲಪರಕ್ಕಮಾ, ಅಮಿತಬಲಪರಕ್ಕಮಾ ಪತ್ತಾ ಯೇನ ಸೋಯಂ ಅಮಿತಬಲಪರಕ್ಕಮಪತ್ತೋ, ಭಗವಾ. ಅಯಂ ಪನ ಕಮ್ಮಧಾರಯದ್ವನ್ದಗಬ್ಭೋ ತುಲ್ಯಾಧಿಕರಣಬಹುಬ್ಬೀಹಿ.

ಮತ್ತ ಭಮರ ಗಣ ಚುಮ್ಬಿತ ವಿಕಸಿತಪುಪ್ಫವಲ್ಲಿನಾಗರುಕ್ಖೋ ಪಸೋಭಿತ ಕನ್ದರೋತಿ ಮತ್ತಾ ಏವ ಭಮರಾ ಮತ್ತಭಮರಾ, ಮತ್ತಭಮರಾನಂ ಗಣಾ ಮತ್ತಭಮರಗಣಾ, ಮತ್ತಭಮರಗಣೇಹಿ ಚುಮ್ಬಿತಾನಿ ಮತ್ತಭಮರಣಚುಮ್ಬಿತಾನಿ, ವಿಕಸಿತಾನಿ ಏವ ಪುಪ್ಫಾನಿ ವಿಕಸಿತಪುಪ್ಫಾನಿ, ಮತ್ತಭಮರಗಣಚುಮ್ಬಿತಾನಿ ವಿಕಸಿತಪುಪ್ಫಾನಿ ಯೇಸಂ ತೇಹಿ ಮತ್ತಭಮರಗಣಚುಮ್ಬಿತವಿಕಸಿತಪುಪ್ಫಾ, ವಲ್ಲಿ ಚ ನಾಗರುಕ್ಖೋ ಚ ಮಲ್ಲಿನಾಗರುಕ್ಖಾ, ಮತ್ತಭಮರಗಣಚುಮ್ಬಿತವಿಕಸಿತಪುಪ್ಫಾ ಚ ತೇ ವಲ್ಲಿನಾಗರುಕ್ಖಾ ಚೇತಿ ಮತ್ತಭಮರಗಣಚುಮ್ಬಿತವಿಕಸಿತಪುಪ್ಫವಲ್ಲಿನಾಗರುಕ್ಖಾ, ಮತ್ತಭಮರಗಣಚುಮ್ಬಿತವಿಕಸಿತಪುಪ್ಫವಲ್ಲಿನಾಗರುಕ್ಖೇಹಿ ಉಪಸೋಭಿತಾನಿ ಮತ್ತಭಮರಗಣಚುಮ್ಬಿತವಿಕಸಿತಪುಪ್ಫವಲ್ಲಿನಾಗರುಕ್ಖೋ ಪಸೋಭಿತಾನಿ, ಮತ್ತಭಮರಗಣಚುಮ್ಬಿತವಿಕಸಿತಪುಪ್ಫವಲ್ಲಿನಾಗರುಕ್ಖೋ ಪಸೋಭಿತಾನಿ ಕನ್ದರಾನಿ ಯಸ್ಸ ಪಬ್ಬತರಾಜಸ್ಸ ಸೋಯಂ ಮತ್ತಭಮರಗಣಚುಮ್ಬಿತವಿಕಸಿತಪುಪ್ಫ ವಲ್ಲಿನಾಗರುಕ್ಖೋ ಪಸೋ ಭಿತಕನ್ದರೋ, ಪಬ್ಬತರಾಜಾ. ಅಯಂ ಪನ ದ್ವನ್ದಕಮ್ಮಧಾರಯತಪ್ಪುರಿಸಗಬ್ಭೋ ತುಲ್ಯಾಧಿಕರಣಬಹುಬ್ಬೀಹಿ.

ಅಥ ವಾ–ಉಪಸೋಭಿತಾನಿ ಕನ್ದರಾನಿ ಉಪಸೋಭಿತಕನ್ದರಾನಿ, ಸಾಪೇಕ್ಖತ್ತೇ ಸತಿಪಿ ಗಮಕತ್ತಾ ಸಮಾಸೋ. ಮತ್ತಭಮರಗಣಚುಮ್ಬಿತವಿಕಸಿತಪುಪ್ಫವಲ್ಲಿನಾಗರುಕ್ಖೇಹಿ ಉಪಸೋಭಿತಕನ್ದರಾನಿ ಯಸ್ಸ ಪಬ್ಬತರಾಜಸ್ಸ ಸೋಯಂ ಮತ್ತಭಮರಗಣಚುಮ್ಬಿತವಿಕಸಿತಪುಪ್ಫವಲ್ಲಿನಾಗರುಕ್ಖೋ ಪಸೋಭಿತಕನ್ದರೋ, ಪಬ್ಬತರಾಜಾ. ಅಯಂ ಪನ ಭಿನ್ನಾಧಿಕರಣಬಹುಬ್ಬೀಹಿ.

ನಾನಾ ರುಕ್ಖ ತಿಣ ಪತಿತ ಪುಪ್ಫೋಪಸೋಭಿತ ಕನ್ದರೋತಿ ರುಕ್ಖೋ ಚ ತಿಣಞ್ಚ ರುಕ್ಖತಿಣಾನಿ, ನಾನಾ ಪಕಾರಾನಿ ಏವ ರುಕ್ಖತಿಣಾನಿ ನಾನಾರುಕ್ಖತಿಣಾನಿ, ನಾನಾರುಕ್ಖತಿಣೇಹಿ ಪತಿತಾನಿ ನಾನಾರುಕ್ಖತಿಣಪತಿತಾನಿ, ನಾನಾರುಕ್ಖತಿಣಪತಿತಾನಿ ಚ ತಾನಿ ಪುಪ್ಫಾನಿ ಚೇತಿ ನಾನಾರುಕ್ಖತಿಣಪತಿತಪುಪ್ಫಾನಿ, ನಾನಾರುಕ್ಖತಿಣಪತಿತಪುಪ್ಫೇಹಿ ಉಪಸೋಭಿತಾನಿ ನಾನಾರುಕ್ಖತಿಣಪತಿತ ಪುಪ್ಫೋಪಸೋಭಿತಾನಿ, ನಾನಾರುಕ್ಖತಿಣಪತಿತಪುಪ್ಫೋಪಸೋಭಿತಾನಿ ಕನ್ದರಾನಿ ಯಸ್ಸ ಪಬ್ಬತರಾಜಸ್ಸ ಸೋಯಂ ನಾನಾರುಕ್ಖತಿಣಪತಿತಪುಪ್ಫೋಪಸೋಭಿತಕನ್ದರೋ, ಪಬ್ಬತರಾಜಾ. ಅಯಂ ಪನ ದ್ವನ್ದಕಮ್ಮಧಾರಯತಪ್ಪುರಿಸಗಬ್ಭೋ ತುಲ್ಯಾಧಿಕರಣಬಹುಬ್ಬೀಹಿ.

ಅಥ ವಾ–ಉಪಸೋಭಿತಾನಿ ಏವ ಕನ್ದರಾನಿ ಉಪಸೋಭಿತಕನ್ದರಾನಿ, (ಸಾಪೇಕ್ಖತ್ತೇ ಸತಿಪಿ ಗಮಕತ್ತಾ ಸಮಾಸೋ.) ನಾನಾರುಕ್ಖತಿಣಪತಿತಪುಪ್ಫೇಹಿ ಉಪಸೋಭಿತಕನ್ದರಾನಿ ಯಸ್ಸ ಪಬ್ಬತರಾಜಸ್ಸ ಸೋಯಂ ನಾನಾರುಕ್ಖತಿಣಪತಿತಪುಪ್ಫೋಪಸೋಭಿತಕನ್ದರೋ, ಪಬ್ಬತರಾಜಾ. ಅಯಂ ಪನ ಭಿನ್ನಾಧಿಕರಣಬಹುಬ್ಬೀಹಿ.

ನಾನಾ ಮುಸಲ ಫಾಲ ಪಬ್ಬತ ತರು ಕಲಿಙ್ಗರ ಸರ ಧನುಗದಾಸಿ ತೋಮರಹತ್ಥಾತಿ ಮುಸಲೋ ಚ ಫಾಲೋ ಚ ಪಬ್ಬತೋ ಚ ತರು ಚ ಕಲಿಙ್ಗರೋ ಚ ಸರೋ ಚ ಧನು ಚ ಗದಾ ಚಅಸಿ ಚ ತೋಮರೋ, ಚ ಮುಸಲಫಾಲಪಬ್ಬತತರುಕಲಿಙ್ಗರಸರಧನುಗದಾಸಿತೋಮರಾ, ನಾನಾ ಪಕಾರಾ ಏವ ಮುಸಲಫಾಲಪಬ್ಬತತರುಕಲಿಙ್ಗರಸರಧನುಗದಾಸಿತೋಮರಾ ನಾನಾಮುಸಲಫಾಲಪಬ್ಬತತರುಕಲಿಙ್ಗರಸರಧನುಗದಾಸಿತೋಮರಾ, ನಾನಾಮುಸಲಫಾಲಪಬ್ಬತತರುಕಲಿಙ್ಗರಸರಧನುಗದಾಸಿತೋಮರಾ ಹತ್ಥೇಸು ಯೇಸಂ ತೇ ನಾನಾಮುಸಲಫಾಲಪಬ್ಬತತರುಕಲಿಙ್ಗರ ಸರಧನುಗದಾಸಿತೋಮರಹತ್ಥಾ. ಅಯಂ ಪನ ದ್ವನ್ದಕಮ್ಮಧಾರಯಗಬ್ಭೋ ಭಿನ್ನಾಧಿಕರಣಬಹುಬ್ಬೀಹಿ.

ಬಹುಬ್ಬೀಹಿ ಇಚ್ಚನೇನ ಕ್ವತ್ಥೋ? ಬಹುಬ್ಬೀಹಿಮ್ಹಿ ಚ.

೩೨೯. , ೩೫೭. ನಾಮಾನಂ ಸಮುಚ್ಚಯೋ ದ್ವನ್ದೋ.

ನಾಮಾನಂ ಏಕವಿಭತ್ತಿಕಾನಂ ಯೋ ಸಮುಚ್ಚಯೋ, ಸೋ ದ್ವನ್ದಸಞ್ಞೋ ಹೋತಿ.

ಚನ್ದಿಮಾ ಚ ಸೂರಿಯೋ ಚ ಚನ್ದಿಮಸೂರಿಯಾ, ಸಮಣೋ ಚ ಬ್ರಾಹ್ಮಣೋ ಚ ಸಮಣಬ್ರಾಹ್ಮಣಾ, ಸಾರಿಪುತ್ತೋ ಚ ಮೋಗ್ಗಲ್ಲಾನೋ ಚ ಸಾರಿಪುತ್ತಮೋಗ್ಗಲ್ಲಾನಾ, ಬ್ರಾಹ್ಮಣೋ ಚ ಗಹಪತಿಕೋ ಚ ಬ್ರಾಹ್ಮಣಗಹಪತಿಕಾ, ಯಮೋ ಚ ವರುಣೋ ಚ ಯಮವರುಣಾ, ಕುವೇರೋ ಚ ವಾಸವೋ ಚ ಕುವೇರವಾಸವಾ.

ದ್ವನ್ದಇಚ್ಚನೇನ ಕ್ವತ್ಥೋ? ದ್ವನ್ದಟ್ಠಾ ವಾ.

೩೩೦. , ೩೪೦. ಮಹತಂ ಮಹಾ ತುಲ್ಯಾಧಿಕರಣೇ ಪದೇ.

ತೇಸಂ ಮಹನ್ತಸದ್ದಾನಂ ಮಹಾಆದೇಸೋ ಹೋತಿ ತುಲ್ಯಾಧಿಕರಣೇ ಪದೇ.

ಮಹನ್ತೋ ಚ ಸೋ ಪುರಿಸೋ ಚಾತಿ ಮಹಾಪುರಿಸೋ, ಮಹನ್ತೀ ಚ ಸಾ ದೇವೀ ಚಾತಿ ಮಹಾದೇವೀ, ಮಹನ್ತಞ್ಚ ತಂ ಬಲಞ್ಚಾತಿ ಮಹಾಬಲಂ, ಮಹನ್ತೋ ಚ ಸೋ ನಾಗೋ ಚಾತಿ ಮಹಾನಾಗೋ, ಮಹನ್ತೋ ಚ ಸೋ ಯಸೋ ಚಾತಿ ಮಹಾಯಸೋ, ಮಹನ್ತಞ್ಚ ತಂ ಪದುಮವನಞ್ಚಾತಿ ಮಹಾಪದುಮವನಂ, ಮಹನ್ತೀ ಚ ಸಾ ನದೀ ಚಾತಿ ಮಹಾನದೀ, ಮಹನ್ತೋ ಚ ಸೋ ಮಣಿ ಚಾತಿ ಮಹಾಮಣಿ, ಮಹನ್ತೋ ಚ ಸೋ ಗಹಪತಿಕೋ ಚಾತಿ ಮಹಾಗಹಪತಿಕೋ, ಮಹನ್ತಞ್ಚ ತಂ ಧನಞ್ಚಾತಿ ಮಹಾಧನಂ, ಮಹನ್ತೋ ಚ ಸೋ ಪುಞ್ಞೋ ಚಾತಿ ಮಹಾಪುಞ್ಞೋ.

ಬಹುವಚನಗ್ಗಹಣೇನ ಕ್ವಚಿ ಮಹನ್ತ ಸದ್ದಸ್ಸ ಮಹಾದೇಸೋ ಹೋತಿ. ಮಹನ್ತಞ್ಚ ತಂ ಫಲಞ್ಚಾತಿ ಮಹಪ್ಫಲಂ, ಮಹಬ್ಬಲಂ, ಏವಂ ಮಹದ್ಧನಂ, ಮಹಬ್ಭಯಂ.

೩೩೧. , ೩೫೩. ಇತ್ಥಿಯಂ ಭಾಸಿತಪುಮಿತ್ಥೀ ಪುಮಾವ ಚೇ.

ಇತ್ಥಿಯಂ ತುಲ್ಯಾಧಿಕರಣೇ ಪದೇ ಚೇ ಭಾಸಿತಪುಮಿತ್ಥೀ ಪುಮಾವ ದಟ್ಠಬ್ಬಾ.

ದೀಘಾ ಜಙ್ಘಾ ಯಸ್ಸ ಸೋಯಂ ದೀಘಜಙ್ಘೋ, ಕಲ್ಯಾಣಭರಿಯೋ, ಪಹೂತಪಞ್ಞೋ.

ಭಾಸಿತಪುಪೇತಿ ಕಿಮತ್ಥಂ? ಬ್ರಾಹ್ಮಣಬನ್ಧು ಚ ಸಾ ಭರಿಯಾ ಚಾತಿಬ್ರಾಹ್ಮಣಬನ್ಧುಭರಿಯಾ.

೩೩೨. , ೩೪೩. ಕಮ್ಮಧಾರಯಸಞ್ಞೇ ಚ.

ಕಮ್ಮಧಾರಯಸಞ್ಞೇ ಚ ಸಮಾಸೇ ಇತ್ಥಿಯಂ ತುಲ್ಯಾಧಿಕರಣೇ ಪದೇ ಪುಬ್ಬೇ ಭಾಸಿತಪುಮಿತ್ಥೀ ಚೇ, ಪುಮಾವ ದಟ್ಠಬ್ಬಾ. ಬ್ರಾಹ್ಮಣದಾರಿಕಾ, ಖತ್ತಿಯಕಞ್ಞಾ, ಖತ್ತಿಯಕುಮಾರಿಕಾ.

ಭಾಸಿತಪುಮೇತಿ ಕಿಮತ್ಥಂ? ಖತ್ತಿಯಬನ್ಧುದಾರಿಕಾ, ಬ್ರಾಹ್ಮಣಬನ್ಧುದಾರಿಕಾ.

೩೩೩. , ೩೪೪. ಅತ್ತಂ ನಸ್ಸ ತಪ್ಪುರಿಸೇ.

ನಸ್ಸ ಪದಸ್ಸ ತಪ್ಪುರಿಸೇ ಉತ್ತರಪದೇ ಅತ್ತಂ ಹೋತಿ.

ನಬ್ರಾಹ್ಮಣೋ ಅಬ್ರಾಹ್ಮಣೋ, ಅವಸಲೋ, ಅಭಿಕ್ಖು, ಅಪಞ್ಚವಸ್ಸಂ, ಅಪಞ್ಚಗವಂ.

೩೩೪. , ೩೪೫. ಸರೇ ಅನ.

ನಸ್ಸ ಪದಸ್ಸ ತಪ್ಪುರಿಸೇ ಅನ ಆದೇಸೋ ಹೋತಿ ಸರೇ ಪರೇ.

ನ ಅಸ್ಸೋ ಅನಸ್ಸೋ, ಅನಿಸ್ಸರೋ, ಅನರಿಯೋ.

೩೩೫. , ೩೪೬. ಕದ ಕುಸ್ಸ.

ಕುಇಚ್ಚೇತಸ್ಸ ಕದ ಹೋತಿ ಸರೇ ಪರೇ.

ಕುಚ್ಛಿತಂ ಅನ್ನಂ ಕದನ್ನಂ, ಕುಚ್ಛಿತಂ ಅಸನಂ ಕದಸ್ಸನಂ.

ಸರೇತಿ ಕಿಮತ್ಥಂ? ಕುಚ್ಛಿತಾ ದಾರಾ ಯೇಸಂ (ಅಪುಞ್ಞಕಾರಾನಂ) ತೇ ಹೋನ್ತೀತಿ ಕುದಾರಾ, ಕುಜನಾ. ಏವಂ ಕುಪುತ್ತಾ, ಕುಗೇಹಾ, ಕುವತ್ಥಾ, ಕುದಾಸಾ.

೩೩೬. , ೩೪೭. ಕಾ’ಪ್ಪತ್ಥೇಸು ಚ.

ಕುಇಚ್ಚೇತಸ್ಸ ಕಾ ಹೋತಿ ಅಪ್ಪತ್ಥೇಸು ಚ.

ಕಾಲವಣಂ, ಕಾಪುಪ್ಫಂ.

ಬಹುವಚನಗ್ಗಹಣಂ ಕಿಮತ್ಥಂ? ಕುಇಚ್ಚೇತಸ್ಸ ಅನಪ್ಪತತ್ಥೇಸುಪಿ ಕ್ವಚಿ ಕಾ ಹೋತಿ, ಕಾಪುರಿಸಾ.

೩೩೭. , ೩೫೦. ಕ್ವಚಿ ಸಮಾಸನ್ತಗತಾನಮಕಾರನ್ತೋ.

ಸಮಾಸನ್ತಗತಾನಂ ನಾಮಾನಮನ್ತೋ ಸರೋ ಕ್ವಚಿ ಅಕಾರೋ ಹೋತಿ.

ದೇವಾನಂ ರಾಜಾ ದೇವರಾಜೋ, ದೇವರಾಜಾ, ದೇವಾನಂ ಸಖಾ ದೇವಸಖೋ, ದೇವಸಖಾ, ಪಞ್ಚ ಅಹಾನಿ ಪಞ್ಚಾಹಂ, ಸತ್ತಾಹಂ, ಪಞ್ಚಗವಂ, ಛತ್ತುಪಾಹನಂ, ಉಪಸರದಂ, ವಿಸಾಲಕ್ಖೋ, ವಿಮುಖೋ.

ಕಾರಗ್ಗಹಣಂ ಕಿಮತ್ಥಂ? ಆಕಾರನ್ತ ಇಕಾರನ್ತಾ ಚ ಹೋನ್ತಿ, ಪಚ್ಚಕ್ಖಾ ಧಮ್ಮಾ ಯಸ್ಸ ಸೋಯನ್ತಿ ಪಚ್ಚಕ್ಖಧಮ್ಮಾ, ಸುರಭಿನೋ ಗನ್ಧೋ ಸುರಭಿಗನ್ಧಿ, ಸುನ್ದರೋ ಗನ್ಧೋ ಸುಗನ್ಧಿ, ಪೂತಿನೋ ಗನ್ಧೋ ಪೂತಿಗನ್ಧಿ, ಕುಚ್ಛಿತೋ ಗನ್ಧೋ ಕುಗನ್ಧಿ, ದುಟ್ಠು ಗನ್ಧೋ ಯಸ್ಸ ಸೋಯನ್ತಿ ದುಗನ್ಧಿ, ಪೂತಿ ಏವ ಗನ್ಧೋ ಪೂತಿಗನ್ಧಿ.

ನದೀಅನ್ತಾ ಚ ಕತ್ತುಅನ್ತಾ ಚ ಕಪಚ್ಚಯೋ ಹೋತಿ ಸಮಾಸನ್ತೇ.

ಬಹೂ ನದಿಯೋ ಯಸ್ಮಿಂ ಸೋಯಂ ಬಹುನದಿಕೋ, ಜನಪದೋ. ಬಹವೋ ಕತ್ತಾರೋ ಯಸ್ಸ ಸೋಯಂ ಬಹುಕತ್ತುಕೋ, ಪುರಿಸೋ.

೩೩೮. , ೩೫೬. ನದಿಮ್ಹಾ ಚ.

ನದಿಮ್ಹಾ ಚ ಕಪಚ್ಚಯೋ ಹೋತಿ ಸಮಾಸನ್ತೇ.

ಬಹೂ ನದಿಯೋ ಯಸ್ಮಿಂ ಸೋಯನ್ತಿ ಬಹುನದಿಕೋ. ಬಹೂ ಕನ್ತಿಯೋ ಯಸ್ಸ ಸೋಯನ್ತಿ ಬಹುಕನ್ತಿಕೋ. ಬಹುನಾರಿಕೋ.

೩೩೯. , ೩೫೮. ಜಾಯಾಯ ತುದಂ ಜಾನಿ ಪತಿಮ್ಹಿ.

ಜಾಯಾಇಚ್ಚೇತಾಯ ತುದಂ ಜಾನಿಇಚ್ಚೇತೇ ಆದೇಸಾ ಹೋನ್ತಿ ಪತಿಮ್ಹಿ ಪರೇ.

ತುದಂಪತೀ, ಜಾನಿಪತೀ.

೩೪೦. , ೩೫೫. ಧನುಮ್ಹಾ ಚ.

ಧನುಮ್ಹಾ ಚ ಆಪಚ್ಚಯೋ ಹೋತಿ ಸಮಾಸನ್ತೇ.

ಗಾಣ್ಡೀವೋ ಧನು ಯಸ್ಸ ಸೋಯಂ ಗಾಣ್ಡೀವಧನ್ವಾ.

೩೪೧. , ೩೩೬. ಅಂ ವಿಭತ್ತೀನಮಕಾರನ್ತಾ ಅಬ್ಯಯೀಭಾವಾ.

ತಸ್ಮಾ ಅಕಾರನ್ತಾ ಅಬ್ಯಯೀಭಾವಸಮಾಸಾ ಪರಾಸಂ ವಿಭತ್ತೀನಂ ಕ್ವಚಿ ಅಂ ಹೋತಿ.

ಅಧಿಚಿತ್ತಂ, ಯಥಾವುಡ್ಢಂ, ಉಪಕುಮ್ಭಂ, ಯಾವಜೀವಂ, ತಿರೋಪಬ್ಬತಂ, ತಿರೋಪಾಕಾರಂ, ತಿರೋಕುಟ್ಟಂ, ಅನ್ತೋಪಾಸಾದಂ.

ಕ್ವಚೀತಿ ಕಿಮತ್ಥಂ? ಅಧಿಚಿತ್ತಸ್ಸ ಭಿಕ್ಖುನೋ.

೩೪೨. , ೩೩೭. ಸರೋ ರಸ್ಸೋ ನಪುಂಸಕೇ.

ನಪುಂಸಕೇ ವತ್ತಮಾನಸ್ಸ ಅಬ್ಯಯೀಭಾವಸಮಾಸಸ್ಸ ಲಿಙ್ಗಸ್ಸ ಸರೋ ರಸ್ಸೋ ಹೋತಿ.

ಕುಮಾರೀಸು ಅಧಿಕಿಚ್ಚ ಪವತ್ತತಿ ಕಥಾ ಇತಿ ಅಧಿಕುಮಾರಿ. ಉಪವಧು, ಉಪಗಙ್ಗಂ, ಉಪಮಣಿಕಂ.

೩೪೩. , ೩೩೮. ಅಞ್ಞಸ್ಮಾ ಲೋಪೋ ಚ.

ಅಞ್ಞಸ್ಮಾ ಅಬ್ಯಯೀಭಾವಸಮಾಸಾ ಅನಕಾರನ್ತಾ ಪರಾಸಂ ವಿಭತ್ತೀನಂ ಲೋಪೋ ಚ ಹೋತಿ.

ಅಧಿತ್ಥಿ, ಅಧಿಕುಮಾರಿ, ಉಪವಧು.

ಇತಿ ನಾಮಕಪ್ಪೇ ಸಮಾಸಕಪ್ಪೋ ಸತ್ತಮೋ ಕಣ್ಡೋ.

ಸಮಾಸಕಪ್ಪೋ ನಿಟ್ಠಿತೋ.