೨. ನಾಮಕಪ್ಪ

ಪಠಮಕಣ್ಡ

೫೨. , ೬೦. ಜಿನವಚನಯುತ್ತಂ ಹಿ.

‘‘ಜಿನವಚನಯುತ್ತಂ ಹಿ’’ ಇಚ್ಚೇತಂ ಅಧಿಕಾರತ್ಥಂ ವೇದಿತಬ್ಬಂ.

೫೩. , ೬೧. ಲಿಙ್ಗಞ್ಚ ನಿಪ್ಪಜ್ಜತೇ.

ಯಥಾ ಯಥಾ ಜಿನವಚನಯುತ್ತಂ ಹಿ ಲಿಙ್ಗಂ, ತಥಾ ತಥಾ ಇಧ ಲಿಙ್ಗಞ್ಚ ನಿಪ್ಪಜ್ಜತೇ.

ತಂ ಯಥಾ? ಏಸೋ ನೋ ಸತ್ಥಾ, ಬ್ರಹ್ಮಾ ಅತ್ತಾ, ಸಖಾ, ರಾಜಾ.

೫೪. , ೬೨. ತತೋ ಚ ವಿಭತ್ತಿಯೋ.

ತತೋ ಜಿನವಚನಯುತ್ತೇಹಿ ಲಿಙ್ಗೇಹಿ ವಿಭತ್ತಿಯೋ ಪರಾ ಹೋನ್ತಿ.

೫೫. , ೬೩. ಸಿ ಯೋ, ಅಂ ಯೋ, ನಾ ಹಿ, ಸ ನಂ, ಸ್ಮಾ ಹಿ, ಸ ನಂ, ಸ್ಮಿಂ ಸು.

ಕಾ ಚ ಪನ ತಾಯೋ ವಿಭತ್ತಿಯೋ? ಸಿ, ಯೋ ಇತಿ ಪಠಮಾ, ಅಂ, ಯೋಇತಿ ದುತಿಯಾ, ನಾ ಹಿ ಇತಿ ತತಿಯಾ, ಸ, ನಂಇತಿ ಚತುತ್ಥೀ, ಸ್ಮಾ, ಹಿ ಇತಿ ಪಞ್ಚಮೀ, ಸ, ನಂ ಇತಿ ಛಟ್ಠೀ, ಸ್ಮಿಂ, ಸು ಇತಿ ಸತ್ತಮೀ.

ವಿಭತ್ತಿಇಚ್ಚನೇನ ಕ್ವತ್ಥೋ? ಅಮ್ಹಸ್ಸ ಮಮಂ ಸವಿಭತ್ತಿಸ್ಸ ಸೇ.

೫೬. , ೬೪. ತದನುಪರೋಧೇನ.

ಯಥಾ ಯಥಾ ತೇಸಂ ಜಿನವಚನಾನಂ ಅನುಪರೋಧೋ. ತಥಾ ತಥಾ ಇಧ ಲಿಙ್ಗಞ್ಚ ನಿಪ್ಪಜ್ಜತೇ.

೫೭. , ೭೧. ಆಲಪನೇ ಸಿ ಗ ಸಞ್ಞೋ.

ಆಲಪನತ್ಥೇ ಸಿ ಗಸಞ್ಞೋ ಹೋತಿ.

ಭೋತಿ ಅಯ್ಯೇ, ಭೋತಿ ಕಞ್ಞೇ, ಭೋತಿ ಖರಾದಿಯೇ.

ಆಲಪನೇತಿ ಕಿಮತ್ಥಂ? ಸಾ ಅಯ್ಯಾ.

ಸೀತಿ ಕಿಮತ್ಥಂ? ಭೋತಿಯೋ ಅಯ್ಯಾಯೋ.

ಗಇಚ್ಚನೇನ ಕ್ವತ್ಥೋ? ಘತೇ ಚ.

೫೮. , ೨೯. ಇವಣ್ಣುವಣ್ಣಾ ಝಲಾ.

ಇವಣ್ಣುವಣ್ಣಾಇಚ್ಚೇತೇ ಝಲಸಞ್ಞಾ ಹೋನ್ತಿ ಯಥಾಸಙ್ಖ್ಯಂ.

ಇಸಿನೋ, ಅಗ್ಗಿನೋ, ಗಹಪತಿನೋ, ದಣ್ಡಿನೋ. ಸೇತುನೋ, ಕೇತುನೋ, ಭಿಕ್ಖುನೋ. ಸಯಮ್ಭುನೋ, ಅಭಿಭುನೋ.

ಝಲಇಚ್ಚನೇನ ಕ್ವತ್ಥೋ? ಝಲತೋ ಸಸ್ಸ ನೋ ವಾ.

೫೯. , ೧೮೨. ತೇ ಇತ್ಥಿಖ್ಯಾ ಪೋ.

ತೇ ಇವಣ್ಣುವಣ್ಣಾ ಯದಾ ಇತ್ಥಿಖ್ಯಾ, ತದಾ ಪಸಞ್ಞಾ ಹೋನ್ತಿ.

ರತ್ತಿಯಾ, ಇತ್ಥಿಯಾ, ಧೇನುಯಾ, ವಧುಯಾ.

ಇತ್ಥಿಖ್ಯಾತಿ ಕಿಮತ್ಥಂ? ಇಸಿನಾ, ಭಿಕ್ಖುನಾ.

ಸಇಚ್ಚನೇನ ಕ್ವತ್ಥೋ? ಪತೋ ಯಾ.

೬೦. , ೧೭೭. ಆ ಘೋ.

ಆಕಾರೋ ಯದಾ ಇತ್ಥಿಖ್ಯೋ, ತದಾ ಘಸಞ್ಞೋ ಹೋತಿ.

ಸದ್ಧಾಯ, ಕಞ್ಞಾಯ, ವೀಣಾಯ, ಗಙ್ಗಾಯ, ದಿಸಾಯ ಸಾಲಾಯ, ಮಾಲಾಯ, ತುಲಾಯ, ದೋಲಾಯ, ಪಭಾಯ, ಸೋಭಾಯ, ಪಞ್ಞಾಯ, ಕರುಣಾಯ ನಾವಾಯ, ಕಪಾಲಿಕಾಯ.

ಆತಿ ಕಿಮತ್ಥಂ? ರತ್ತಿಯಾ, ಇತ್ಥಿಯಾ.

ಇತ್ಥಿಖ್ಯೋತಿ ಕಿಮತ್ಥಂ? ಸತ್ಥಾರಾ ದೇಸಿತೋ ಅಯಂ ಧಮ್ಮೋ.

ಘಇಚ್ಚನೇನ ಕ್ವತ್ಥೋ? ಘತೋ ನಾದೀನಂ.

೬೧. , ೮೬. ಸಾಗಮೋ ಸೇ.

ಸಕಾರಾಗಮೋ ಹೋತಿ ಸೇ ವಿಭತ್ತಿಮ್ಹಿ.

ಪುರಿಸಸ್ಸ, ಅಗ್ಗಿಸ್ಸ, ಇಸಿಸ್ಸ, ದಣ್ಡಿಸ್ಸ, ಭಿಕ್ಖುಸ್ಸ, ಸಯಮ್ಭುಸ್ಸ, ಅಭಿಭುಸ್ಸ.

ಸೇತಿ ಕಿಮತ್ತಂ? ಪುರಿಸಸ್ಮಿಂ.

೬೨. , ೨೦೬. ಸಂಸಾಸ್ವೇಕವಚನೇಸು ಚ.

ಸಂಸಾಸು ಏಕವಚನೇಸು ವಿಭತ್ತಾದೇಸೇಸು ಸಕಾರಾಗಮೋ ಹೋತಿ.

ಏತಿಸ್ಸಂ, ಏತಿಸ್ಸಾ ಇಮಿಸ್ಸಂ, ಇಮಿಸ್ಸಾ, ತಿಸ್ಸಂ, ತಿಸ್ಸಾ,

ತಸ್ಸಂ ತಸ್ಸಾ, ಯಸ್ಸಂ, ಯಸ್ಸಾ, ಅಮುಸ್ಸಂ, ಅಮುಸ್ಸಾ.

ಸಂಸಾಸ್ವೀತಿ ಕಿಮತ್ಥಂ? ಅಗ್ಗಿನಾ, ಪಾಣಿನಾ.

ಏಕವಚನೇಸ್ವೀತಿ ಕಿಮತ್ಥಂ? ತಾಸಂ, ಸಬ್ಬಾಸಂ.

ವಿಭತ್ತಾದೇಸೇಸ್ವೀತಿ ಕಿಮತ್ಥಂ? ಮನಸಾ, ವಚಸಾ, ಥಾಮಸಾ.

೬೩. , ೨೧೭. ಏತಿಮಾಸಮಿ.

ಏತಾಇಮಾಇಚ್ಚೇತೇಸಮನ್ತೋ ಸರೋ ಇಕಾರೋ ಹೋತಿ ಸಂಸಾಸು ಏಕವಚನೇಸು ವಿಭತ್ತಾದೇಸೇಸು.

ಏತಿಸ್ಸಂ, ಏತಿಸ್ಸಾ, ಇಮಿಸ್ಸಂ, ಇಮಿಸ್ಸಾ.

ಸಂಸಾಸ್ವೀತಿ ಕಿಮತ್ಥಂ? ಏತಾಯ, ಇಮಾಯ.

ಏಕವಚನೇಸ್ವೀತಿ ಕಿಮತ್ಥಂ? ಏತಾಸಂ, ಇಮಾಸಂ.

೬೪. , ೨೧೬. ತಸ್ಸಾ ವಾ.

ತಸ್ಸಾ ಇತ್ಥಿಯಂ ವತ್ತಮಾನಸ್ಸ ಅನ್ತಸ್ಸ ಆಕಾರಸ್ಸ ಇಕಾರೋ ಹೋತಿ ವಾ ಸಂಸಾಸು ಏಕವಚನೇಸು ವಿಭತ್ತಾದೇಸೇಸು.

ತಿಸ್ಸಂ, ತಿಸ್ಸಾ, ತಸ್ಸಂ, ತಸ್ಸಾ.

೬೫. , ೨೧೫. ತತೋ ಸಸ್ಸ ಸ್ಸಾಯ.

ತತೋ ತಾ ಏತಾ ಇಮಾತೋ ಸಸ್ಸ ವಿಭತ್ತಿಸ್ಸ ಸ್ಸಾಯಾದೇಸೋ ಹೋತಿ ವಾ.

ತಿಸ್ಸಾಯ, ಏತಿಸ್ಸಾಯ, ಇಮಿಸ್ಸಾಯ.

ವಾತಿ ಕಿಮತ್ಥಂ? ತಿಸ್ಸಾ, ಏತಿಸ್ಸಾ, ಇಮಿಸ್ಸಾ.

೬೬. , ೨೦೫. ಘೋ ರಸ್ಸಂ.

ಘೋ ರಸ್ಸಮಾಪಜ್ಜತೇ ಸಂಸಾಸು ಏಕವಚನೇಸು ವಿಭತ್ತಾದೇಸೇಸು.

ತಸ್ಸಂ, ತಸ್ಸಾ, ಯಸ್ಸಂ, ಯಸ್ಸಾ, ಸಬ್ಬಸ್ಸಂ, ಸಬ್ಬಸ್ಸಾ.

ಸಂಸಾಸ್ವೀತಿ ಕಿಮತ್ಥಂ? ತಾಯ, ಸಬ್ಬಾಯ.

ಏಕವಚನೇಸ್ವೀತಿ ಕಿಮತ್ಥಂ? ತಾಸಂ, ಸಬ್ಬಾಸಂ.

೬೭. , ೨೨೯. ನೋ ಚ ದ್ವಾದಿತೋ ನಂಮ್ಹಿ.

ದ್ವಿಇಚ್ಚೇವಮಾದಿತೋ ಸಙ್ಖ್ಯಾತೋ ನಕಾರಾಗಮೋ ಹೋತಿ ನಂಮ್ಹಿ ವಿಭತ್ತಿಮ್ಹಿ.

ದ್ವಿನ್ನಂ, ತಿನ್ನಂ, ಚತುನ್ನಂ, ಪಞ್ಚನ್ನಂ, ಛನ್ನಂ, ಸತ್ತನ್ನಂ, ಅಟ್ಠನ್ನಂ, ನವನ್ನಂ, ದಸನ್ನಂ.

ದ್ವಾದಿತೋತಿ ಕಿಮತ್ಥಂ? ಸಹಸ್ಸಾನಂ.

ನಂಮ್ಹೀತಿ ಕಿಮತ್ಥಂ? ದ್ವೀಸು, ತೀಸು.

ಚಗ್ಗಹಣೇನಸ್ಸಞ್ಚಾಗಮೋ ಹೋತಿ. ಚತಸ್ಸನ್ನಂ ಇತ್ಥೀನಂ ತಿಸ್ಸನ್ನಂ ವೇದನಾನಂ.

೬೮. , ೧೮೪. ಅಮಾ ಪತೋ ಸ್ಮಿಂಸ್ಮಾನಂ ವಾ.

ಪಇಚ್ಚೇತಸ್ಮಾ ಸ್ಮಿಂಸ್ಮಾಇಚ್ಚೇತೇಸಂ ಅಂಆಆದೇಸಾ ಹೋನ್ತಿ ವಾ ಯಥಾಸಙ್ಖ್ಯಂ.

ಮತ್ಯಂ, ಮತಿಯಂ, ಮತ್ಯಾ, ಮತಿಯಾ, ನಿಕತ್ಯಂ. ನಿಕತಿಯಂ, ನಿಕತ್ಯಾ, ನಿಕತಿಯಾ, ವಿಕತ್ಯಂ, ವಿಕತಿಯಂ, ವಿಕತ್ಯಾ, ವಿಕತಿಯಾ, ವಿರತ್ಯಂ, ವಿರತಿಯಂ, ವಿರತ್ಯಾ, ವಿರತಿಯಾ, ರತ್ಯಂ, ರತಿಯಂ, ರತ್ಯಾ, ರತಿಯಾ, ಪುಥಬ್ಯಂ, ಪುಥವಿಯಂ, ಪುಥಬ್ಯಾ, ಪುಥವಿಯಾ, ಪವತ್ಯಂ, ಪವತ್ಯಾ, ಪವತ್ತಿಯಂ, ಪವತ್ತಿಯಾ.

೬೯. , ೧೮೬. ಆದಿತೋ ಓ ಚ.

ಆದಿಇಚ್ಚೇತಸ್ಮಾ ಸ್ಮಿಂವಚನಸ್ಸ ಅಂಓಆದೇಸಾ ಹೋನ್ತಿ ವಾ.

ಆದೀಂ, ಆದೋ.

ವಾತಿ ಕಿಮತ್ಥಂ? ಆದಿಸ್ಮಿಂ, ಆದಿಮ್ಹಿ ನಾಥಂ ನಮಸ್ಸಿತ್ವಾನ,

ಚಗ್ಗಹಣೇನ ಅಞ್ಞಸ್ಮಾಪಿ ಸ್ಮಿಂ ವಚನಸ್ಸ ಆ ಓ ಅಂಆದೇಸಾ ಹೋನ್ತಿ. ದಿವಾ ಚ ರತ್ತೋ ಚ ಹರನ್ತಿ ಯೇ ಬಲಿ. ಬಾರಾಣಸಿಂ ಅಹು ರಾಜಾ.

೭೦. , ೩೦. ಝಲಾನಮಿಯುವಾ ಸರೇ ವಾ.

ಝಲಇಚ್ಚೇತೇಸಂ ಇಯ ಉವಇಚ್ಚೇತೇ ಆದೇಸಾ ಹೋನ್ತಿ ವಾ ಸರೇ ಪರೇ ಯಥಾಸಙ್ಖ್ಯಂ.

ತಿಯನ್ತಂ ಪಚ್ಛಿಯಾಗಾರೇ, ಅಗ್ಗಿಯಾಗಾರೇ, ಭಿಕ್ಖುವಾಸನೇ ನಿಸೀದತಿ, ವುಥುವಾಸನೇ ನಿಸೀದತಿ.

ಸರೇತಿ ಕಿಮತ್ಥಂ? ತಿಮಲಂ, ತಿಫಲಂ, ತಿಚತುಕ್ಕಂ, ತಿದಣ್ಡಂ, ತಿಲೋಕಂ, ತಿನಯನಂ, ತಿಪಾಸಂ, ತಿಹಂಸಂ, ತಿಭವಂ, ತಿಖನ್ಧಂ, ತಿಪಿಟಕಂ, ತಿವೇದನಂ, ಚತುದ್ದಿಸಂ, ಪುಥುಭೂತಂ.

ವಾತಿ ಕಿಮತ್ಥಂ? ಪಞ್ಚಹಙ್ಗೇಹಿ ತೀಹಾಕಾರೇಹಿ. ಚಕ್ಖಾಯತನಂ.

ವಾತಿ ವಿಕಪ್ಪನತ್ಥಂ, ಇಕಾರಸ್ಸ ಅಯಾದೇಸೋ ಹೋತಿ, ವತ್ಥುತ್ತಯಂ.

೭೧. , ೫೦೫. ಯವಕಾರಾ ಚ.

ಝಲಾನಂ ಯಕಾರ ವಕಾರಾದೇಸಾ ಹೋನ್ತಿ ಸರೇ ಪರೇ ಯಥಾಸಙ್ಖ್ಯಂ.

ಅಗ್ಯಾಗಾರಂ, ಪಕ್ಖಾಯತನಂ, ಸ್ವಾಗತಂ, ತೇ ಮಹಾವೀರ.

ಚಗ್ಗಹಣಂ ಸಮ್ಪಿಣ್ಡನತ್ಥಂ.

೭೨. , ೧೮೫. ಪಸಞ್ಞಸ್ಸ ಚ.

ಪಸಞ್ಞಸ್ಸ ಚ ಇವಣ್ಣಸ್ಸ ವಿಭತ್ತಾದೇಸೇ ಸರೇ ಪರೇ ಯಕಾರಾದೇಸೋ ಹೋತಿ.

ಪುಥಬ್ಯಾ, ರತ್ಯಾ, ಮತ್ಯಾ.

ಸರೇತಿ ಕಿಮತ್ಥಂ? ಪುಥವಿಯಂ.

೭೩. , ೧೭೪. ಗಾವ ಸೇ.

ಗೋಇಚ್ಚೇತಸ್ಸ ಓಕಾರಸ್ಸ ಆವಾದೇಸೋ ಹೋತಿ ಸೇ ವಿಭತ್ತಿಮ್ಹಿ.

ಗಾವಸ್ಸ.

೭೪. , ೧೬೯. ಯೋಸು ಚ.

ಗೋಇಚ್ಚೇತಸ್ಸ ಓಕಾರಸ್ಸ ಆವಾದೇಸೋ ಹೋತಿ ಯೋಇಚ್ಚೇತೇಸು ಪರೇಸು.

ಗಾವೋ ಗಚ್ಛನ್ತಿ, ಗಾವೋ ಪಸ್ಸನ್ತಿ, ಗಾವೀ ಗಚ್ಛನ್ತಿ, ಗಾವೀ ಪಸ್ಸನ್ತಿ.

ಚಗ್ಗಹಣಂ ಕಿಮತ್ಥಂ? ನಾಸ್ಮಾಸ್ಮಿಂಸು ವಚನೇಸು ಆವಾ ದೇಸೋ ಹೋತಿ.

ಗಾವೇನ, ಗಾವಾ, ಗಾವೇ, ಗಾವೇಸು.

೭೫. , ೧೭೦. ಅವಮ್ಹಿ ಚ.

ಗೋಇಚ್ಚೇತಸ್ಸ ಓಕಾರಸ್ಸ ಆವಅವಇಚ್ಚೇತೇ ಆದೇಸಾ ಹೋನ್ತಿ ಅಂಮ್ಹಿ ವಿಭತ್ತಿಮ್ಹಿ.

ಗಾವಂ, ಗವಂ.

ಚಗ್ಗಹಣೇನ ಸಾದಿಸೇಸೇಸು ಪುಬ್ಬುತ್ತವಚನೇಸು ಗೋಇಚ್ಚೇತಸ್ಸ ಓಕಾರಸ್ಸ ಅವಾದೇಸೋ ಹೋತಿ.

ಗವಸ್ಸ, ಗವೋ, ಗವೇನ, ಗವಾ, ಗವೇ, ಗವೇಸು.

೭೬. , ೧೭೧. ಆವಸ್ಸು ವಾ.

ಆವಇಚ್ಚೇತಸ್ಸ ಗಾವಾದೇಸಸ್ಸ ಅನ್ತ ಸರಸ್ಸ ಉಕಾರಾದೇಸೋ ಹೋತಿ ವಾ ಅಂಮ್ಹಿ ವಿಭತ್ತಿಮ್ಹಿ.

ಗಾವುಂ, ಗಾವಂ.

ಆವಸ್ಸೇತಿ ಕಿಮತ್ಥಂ? ಗಾವೋ ತಿಟ್ಠನ್ತಿ.

೭೭. , ೧೭೫. ತತೋ ನಮಂ ಪತಿಮ್ಹಾ ಲುತ್ತೇ ಚ ಸಮಾಸೇ.

ತತೋ ಗೋಸದ್ದತೋ ನಂವಚನಸ್ಸ ಅಂಆದೇಸೋ ಹೋತಿ, ಗೋಇಚ್ಚೇತಸ್ಸ ಓಕಾರಸ್ಸ ಅವಾದೇಸೋ ಹೋತಿ ಪತಿಮ್ಹಿ ಪರೇ ಅಲುತ್ತೇ ಚ ಸಮಾಸೇ.

ಗವಪತಿ.

ಅಲುತ್ತೇತಿ ಕಿಮತ್ಥಂ? ಗೋಪತಿ.

ಚಗ್ಗಹಣೇನ ಅಸಮಾಸೇಪಿ ನಂವಚನಸ್ಸ ಅಂಆದೇಸೋ ಹೋತಿ, ಗೋಇಚ್ಚೇತಸ್ಸ ಓಕಾರಸ್ಸ ಅವಾದೇಸೋ ಹೋತಿ.

ಗವಂ.

೭೮. , ೩. ಓಸರೇ ಚ.

ಗೋಇಚ್ಚೇತಸ್ಸ ಓಕಾರಸ್ಸ ಅವಾದೇಸೋ ಹೋತಿ ಸಮಾಸೇ ಚ ಸರೇ ಪರೇ.

ಗವಸ್ಸಕಂ, ಗವೇಳಕಂ, ಗವಾಜಿನಂ.

ಚಗ್ಗಹಣೇನ ಉವಣ್ಣಇಚ್ಚೇವಮನ್ತಾನಂ ಲಿಙ್ಗಾನಂ ಉವಅವಉರಾದೇಸಾ ಹೋನ್ತಿ ಸ್ಮಿಂಯೋಇಚ್ಚೇತೇಸು ಕ್ವಚಿ.

ಭುವಿ, ಪಸವೋ, ಗುರವೋ, ಚತುರೋ.

ಸರೇತಿ ಕಿಮತ್ಥಂ? ಗೋಧನೋ, ಗೋವಿನ್ದೋ.

೭೯. , ೪೬. ತಬ್ಬಿಪರೀತೂಪಪದೇ ಬ್ಯಞ್ಜನೇ ಚ.

ತಸ್ಸ ಅವಸದ್ದಸ್ಸ ಯದಾ ಉಪಪದೇ ತಿಟ್ಠಮಾನಸ್ಸ ತಸ್ಸ ಓಕಾರಸ್ಸ ವಿಪರೀತೋ ಹೋತಿ ಬ್ಯಞ್ಜನೇ ಪರೇ.

ಉಗ್ಗತೇ ಸೂರಿಯೇ, ಉಗ್ಗಚ್ಛತಿ, ಉಗ್ಗಹೇತ್ವಾ.

ಚಗ್ಗಹಣಮವಧಾರಣತ್ಥಂ. ಅವಸಾನೇ, ಅವಕಿರಣೇ, ಅವಕಿರತಿ.

೮೦. , ೧೭೩. ಗೋಣ ನಂಮ್ಹಿ ವಾ.

ಸಬ್ಬಸ್ಸೇವ ಗೋಸದ್ದಸ್ಸ ಗೋಣಾದೇಸೋ ಹೋತಿ ವಾ ನಂಮ್ಹಿ ವಿಭತ್ತಿಮ್ಹಿ.

ಗೋಣಾನಂ ಸತ್ತನ್ನಂ.

ವಾತಿ ಕಿಮತ್ಥಂ?

ಗೋನಞ್ಚೇ ತರಮಾನಾನಂ, ಉಜುಂ ಗಚ್ಛತಿ ಪುಙ್ಗವೋ.

ಸಬ್ಬಾ ಗಾವೀ ಉಜುಂ ಯನ್ತಿ, ನೇತ್ತೇ ಉಜುಂ ಗತೇ ಸತಿ.

ಯೋಗವಿಭಾಗೇನ ಅಞ್ಞತ್ರಾಪಿ ಗೋಣಾದೇಸೋ ಹೋತಿ. ಗೋಣಭೂತಾನಂ.

೮೧. , ೧೭೨. ಸುಹಿನಾಸು ಚ.

ಸುಹಿನಾಇಚ್ಚೇತೇಸು ಸಬ್ಬಸ್ಸ ಗೋಸದ್ದಸ್ಸ ಗೋಣಾದೇಸೋ ಹೋತಿ ವಾ.

ಗೋಣೇಸು, ಗೋಣೇಹಿ, ಗೋಣೇಭಿ, ಗೋಣೇನ.

ವಾತಿ ಕಿಮತ್ಥಂ? ಗೋಸು, ಗೋಹಿ, ಗೋಭಿ, ಗವೇನ.

ಚಗ್ಗಹಣೇನ ಸ್ಯಾದಿಸೇಸೇಸು ಪುಬ್ಬುತ್ತರವಚನೇಸುಪಿ ಗೋಣ ಗು ಗವಯಾದೇಸಾ ಹೋನ್ತಿ. ಗೋಣೋ, ಗೋಣಾ, ಗೋಣಂ, ಗೋಣೇ, ಗೋಣಸ್ಸ, ಗೋಣಮ್ಹಾ. ಗೋಣಮ್ಹಿ, ಗುನ್ನಂ, ಗವಯೇಹಿ, ಗವಯೇಭಿ.

೮೨. , ೧೪೯. ಅಂಮೋ ನಿಗ್ಗಹಿತಂ ಝಲಪೇಹಿ.

ಅಂವಚನಸ್ಸ ಮಕಾರಸ್ಸ ಚ ಝಲಪಇಚ್ಚೇತೇಹಿ ನಿಗ್ಗಹಿತಂ ಹೋತಿ

ಅಗ್ಗಿಂ, ಇಸಿಂ, ಗಹಪತಿಂ, ದಣ್ಡಿಂ, ಮಹೇಸಿಂ, ಭಿಕ್ಖುಂ, ಪಟುಂ, ಸಯಮ್ಭುಂ, ಅಭಿಭುಂ, ರತ್ತಿಂ, ಇತ್ಥಿಂ, ವಧುಂ, ಪುಲ್ಲಿಙ್ಗಂ, ಪುಮ್ಭಾವೋ, ಪುಙ್ಕೋಕಿಲೋ.

ಅಂಮೋತಿ ಕಿಮತ್ಥಂ? ಅಗ್ಗಿನಾ, ಪಾಣಿನಾ, ಭಿಕ್ಖುನಾ, ರತ್ತಿಯಾ, ಇತ್ಥಿಯಾ, ವಧುಯಾ.

ಝಲಪೇಹೀತಿ ಕಿಮತ್ಥಂ? ಸುಖಂ, ದುಕ್ಖಂ.

ಪುನಾರಮ್ಭ ಹಣಂ ವಿಭಾಸಾನಿವತ್ತನತ್ಥಂ. ಅಗ್ಗಿಂ, ಪಟುಂ, ಬುದ್ಧಿಂ, ವಧುಂ.

೮೩. , ೬೭. ಸರಲೋಪೋ’ ಮಾದೇಸ ಪಚ್ಚಯಾದಿಮ್ಹಿ ಸರಲೋಪೇ ತು ಪಕತಿ.

ಸರಲೋಪೋ ಹೋತಿ ಅಮಾದೇಸಪಚ್ಚಯಾದಿಮ್ಹಿ ಸರ ಲೋಪೇ ತು ಪಕತಿ ಹೋತಿ.

ಪುರಿಸಂ, ಪುರಿಸೇ, ಪಾಪಂ, ಪಾಪೇ, ಪಾಪಿಯೋ, ಪಾಪಿಟ್ಠೋ.

ಅಮಾದೇಸಪಚ್ಚಯಾದಿಮ್ಹೀತಿ ಕಿ ತ್ಥಂ? ಅಪ್ಪಮಾದೋ ಅಮತಂ ಪದಂ.

ಸರಲೋಪೇತಿ ಕಿಮತ್ಥಂ? ಪುರಿಸಸ್ಸ, ದಣ್ಡಿನಂ.

ತುಗ್ಗಹಣಮವಧಾರಣತ್ಥಂ. ಭಿಕ್ಖುನೀ, ಗಹಪತಾನೀ.

ಪಕತಿಗ್ಗಹಣಸಾಮತ್ಥೇನ ಪುನ ಸನ್ಧಿಭಾವೋ ಚ ಹೋತಿ. ಸೇಯ್ಯೋ, ಸೇಟ್ಠೋ, ಜೇಯ್ಯೋ, ಜೇಟ್ಠೋ.

೮೪. , ೧೪೪. ಅಘೋರಸ್ಸಮೇಕವಚನಯೋಸ್ವಪಿ ಚ.