೩. ಅನೇಕತ್ಥವಗ್ಗ

೭೭೭. ಅನೇಕತ್ಥೇ ಪವಕ್ಖಾಮಿ, ಗಾಥಾ’ದ್ಧಪಾದತೋ ಕಮಾ;

ಏತ್ಥ ಲಿಙ್ಗವಿಸೇಸತ್ಥ, ಮೇಕಸ್ಸ ಪುನರುತ್ತತಾ.

೭೭೮. ಸಮಯೋ ಸಮವಾಯೇ ಚ, ಸಮೂಹೇ ಕಾರಣೇ ಖಣೇ;

ಪಟಿವೇಧೇ ಸಿಯಾ ಕಾಲೇ, ಪಹಾನೇ ಲಾಭ ದಿಟ್ಠಿಸು.

೭೭೯. ವಣ್ಣೋ ಸಣ್ಠಾನ ರೂಪೇಸು, ಜಾತಿ,ಚ್ಛವೀಸು ಕಾರಣೇ;

ಪಮಾಣೇ ಚ ಪಸಂಸಾಯಂ, ಅಕ್ಖರೇ ಚ ಯಸೇ ಗುಣೇ.

೭೮೦. ಉದ್ದೇಸೇ ಪಾತಿಮೋಕ್ಖಸ್ಸ, ಪಣ್ಣತ್ತಿಯ ಮುಪೋಸಥೋ;

ಉಪವಾಸೇ ಚ ಅಟ್ಠಙ್ಗೇ, ಉಪೋಸಥದಿನೇ ಸಿಯಾ.

೭೮೧. ರಥಙ್ಗೇ ಲಕ್ಖಣೇ ಧಮ್ಮೋ, ರಚಕ್ಕೇ’ಸ್ವೀರಿಯಾಪಥೇ;

ಚಕ್ಕಂ ಸಮ್ಪತ್ತಿಯಂ ಚಕ್ಕ, ರತನೇ ಮಣ್ಡಲೇ ಬಲೇ.

೭೮೨. ಕುಲಾಲಭಣ್ಡೇ ಆಣಾಯ, ಮಾಯುಧೇ ದಾನ ರಾಸಿಸು;

೭೮೩. ದಾನಸ್ಮಿಂ ಬ್ರಹ್ಮಚರಿಯ, ಮಪ್ಪಮಞ್ಞಾಸು ಸಾಸನೇ;

ಮೇಥುನಾರತಿಯಂ ವೇಯ್ಯಾ, ವಚ್ಚೇ ಸದಾರತುಟ್ಠಿಯಂ;

ಪಞ್ಚಸೀಲಾ’ರಿಯಮಗ್ಗೋ, ಪೋಸಥಙ್ಗ ಧಿತೀಸು [ಠಿತೀಸು (ಕ.)] ಚ.

೭೮೪. ಧಮ್ಮೋ ಸಭಾವೇ ಪರಿಯತ್ತಿಪಞ್ಞಾ,

ಞಾಯೇಸು ಸಚ್ಚಪ್ಪಕತೀಸು ಪುಞ್ಞೇ;

ಞೇಯ್ಯೇ ಗುಣಾ’ಚಾರ ಸಮಾಧಿಸೂಪಿ,

ನಿಸ್ಸತ್ತತಾ’ಪತ್ತಿಸು ಕಾರಣಾದೋ.

೭೮೫. ಅತ್ಥೋ ಪಯೋಜನೇ ಸದ್ದಾ, ಭಿಧೇಯ್ಯೇ ವುದ್ಧಿಯಂ ಧನೇ;

ವತ್ಥುಮ್ಹಿ ಕಾರಣೇ ನಾಸೇ, ಹಿತೇ ಪಚ್ಛಿಮಪಬ್ಬತೇ.

೭೮೬. ಯೇಭುಯ್ಯತಾ’ಬ್ಯಾಮಿಸ್ಸೇಸು, ವಿಸಂಯೋಗೇ ಚ ಕೇವಲಂ;

ದಳ್ಹತ್ಥೇ’ನತಿರೇಕೇ ಚಾ, ನವಸೇಸಮ್ಹಿ ತಂ ತಿಸು.

೭೮೭. ಗುಣೋ ಪಟಲ ರಾಸೀಸು, ಆನಿಸಂಸೇ ಚ ಬನ್ಧನೇ;

ಅಪ್ಪಧಾನೇ ಚ ಸೀಲಾದೋ, ಸುಕ್ಕಾದಿಮ್ಹಿ ಜಿಯಾಯ ಚ.

೭೮೮. ರುಕ್ಖಾದೋ ವಿಜ್ಜಮಾನೇ ಚಾ, ರಹನ್ತೇ ಖನ್ಧಪಞ್ಚಕೇ;

ಭೂತೋ ಸತ್ತ ಮಹಾಭೂತಾ, ಮನುಸ್ಸೇಸು ನ ನಾರಿಯಂ.

೭೮೯. ವಾಚ್ಚಲಿಙ್ಗೋ ಅತೀತಸ್ಮಿಂ, ಜಾತೇ ಪತ್ತೇ ಸಮೇ ಮತೋ;

೭೯೦. ಸುನ್ದರೇ ದಳ್ಹಿಕಮ್ಮೇ ಚಾ, ಯಾಚನೇ ಸಮ್ಪಟಿಚ್ಛನೇ;

ಸಜ್ಜನೇ ಸಮ್ಪಹಂಸಾಯಂ, ಸಾಧ್ವಾ’ಭಿಧೇಯ್ಯಲಿಙ್ಗಿಕಂ.

೭೯೧. ಅನ್ತೋ ನಿತ್ಥೀ ಸಮೀಪೇ ಚಾ, ವಸಾನೇ ಪದಪೂರಣೇ;

ದೇಹಾವಯವೇ ಕೋಟ್ಠಾಸೇ, ನಾಸ ಸೀಮಾಸು ಲಾಮಕೇ.

೭೯೨. ನಿಕಾಯೇ ಸನ್ಧಿ ಸಾಮಞ್ಞ, ಪ್ಪಸೂತೀಸು ಕುಲೇ ಭವೇ;

ವಿಸೇಸೇ ಸುಮನಾಯಞ್ಚ, ಜಾತಿ ಸಙ್ಖತಲಕ್ಖಣೇ.

೭೯೩. ಭವಭೇದೇ ಪತಿಟ್ಠಾಯಂ, ನಿಟ್ಠಾ’ಜ್ಝಾಸಯಬುದ್ಧಿಸು;

ವಾಸಟ್ಠಾನೇ ಚ ಗಮನೇ, ವಿಸಟತ್ತೇ [ವಿಸರತ್ತ ವಿಸದತ್ತೇ] ಗತೀರಿತಾ.

೭೯೪. ಫಲೇ ವಿಪಸ್ಸನಾ ದಿಬ್ಬ, ಚಕ್ಖು ಸಬ್ಬಞ್ಞುತಾಸು ಚ;

ಪಚ್ಚವೇಕ್ಖಣಞಾಣಮ್ಹಿ, ಮಗ್ಗೇ ಚ ಞಾಣದಸ್ಸನಂ.

೭೯೫. ಕಮ್ಮಾರುದ್ಧನ ಅಙ್ಗಾರ, ಕಪಲ್ಲ ದೀಪಿಕಾಸು ಚ;

ಸುವಣ್ಣಕಾರಮೂಸಾಯಂ, ಉಕ್ಕಾ ವೇಗೇ ಚ ವಾಯುನೋ.

೭೯೬. ಕೇಸೋಹಾರಣ, ಜೀವಿತ, ವುತ್ತಿಸು ವಪನೇ ಚ ವಾಪಸಮಕರಣೇ;

ಕಥನೇ ಪಮುತ್ತಭಾವ, ಜ್ಝೇನಾದೋ [ಜ್ಝೇಸನಾದೋ (ಸೀ.)] ವುತ್ತ ಮಪಿ ತೀಸು.

೭೯೭. ಗಮನೇ ವಿಸ್ಸುತೇ ಚಾ’ವ, ಧಾರಿತೋ’ಪಚಿತೇಸು ಚ;

ಅನುಯೋಗೇ ಕಿಲಿನ್ನೇ ಚ, ಸುತೋ’ ಭಿಧೇಯ್ಯಲಿಙ್ಗಿಕೋ.

೭೯೮. ಸೋತವಿಞ್ಞೇಯ್ಯ ಸತ್ಥೇಸು, ಸುತಂ ಪುತ್ತೇ ಸುತೋ ಸಿಯಾ;

೭೯೯. ಕಪ್ಪೋ ಕಾಲೇ ಯುಗೇ ಲೇಸೇ, ಪಞ್ಞತ್ತಿ ಪರಮಾಯುಸು;

ಸದಿಸೇ ತೀಸು ಸಮಣ, ವೋಹಾರ ಕಪ್ಪಬಿನ್ದುಸು;

ಸಮನ್ತತ್ಥೇ’ನ್ತರಕಪ್ಪಾ, ದಿಕೇ ತಕ್ಕೇ ವಿಧಿಮ್ಹಿ ಚ.

೮೦೦. ನಿಬ್ಬಾನ ಮಗ್ಗ ವಿರತಿ, ಸಪಥೇ ಸಚ್ಚಭಾಸಿತೇ;

ತಚ್ಛೇ ಚಾ’ರಿಯಸಚ್ಚಮ್ಹಿ, ದಿಟ್ಠಿಯಂ ಸಚ್ಚ ಮೀರಿತಂ.

೮೦೧. ಸಞ್ಜಾತಿದೇಸೇ ಹೇತುಮ್ಹಿ, ವಾಸಟ್ಠಾನಾ’ಕರೇಸು ಚ;

ಸಮೋಸರಣಟ್ಠಾನೇ ಚಾ, ಯತನಂ ಪದಪೂರಣೇ.

೮೦೨. ಅನ್ತರಂ ಮಜ್ಝ ವತ್ಥ’ಞ್ಞ, ಖಣೋ’ಕಾಸೋ’ಧಿ ಹೇತುಸು;

ಬ್ಯವಧಾನೇ ವಿನಟ್ಠೇ ಚ, ಭೇದೇ ಛಿದ್ದೇ ಮನಸ್ಯ’ಪಿ.

೮೦೩. ಆರೋಗ್ಯೇ ಕುಸಲಂ ಇಟ್ಠ, ವಿಪಾಕೇ ಕುಸಲೋ ತಥಾ;

ಅನವಜ್ಜಮ್ಹಿ ಛೇಕೇ ಚ, ಕಥಿತೋ ವಾಚ್ಚಲಿಙ್ಗಿಕೋ.

೮೦೪. ದ್ರವಾ’ಚಾರೇಸು ವೀರಿಯೇ, ಮಧುರಾದೀಸು ಪಾರದೇ;

ಸಿಙ್ಗಾರಾದೋ ಧಾತುಭೇದೇ, ಕಿಚ್ಚೇ ಸಮ್ಪತ್ತಿಯಂ ರಸೋ.

೮೦೫. ಬೋಧಿ ಸಬ್ಬಞ್ಞುತಞ್ಞಾಣೇ, ರಿಯಮಗ್ಗೇ ಚ ನಾರಿಯಂ;

ಪಞ್ಞತ್ತಿಯಂ ಪುಮೇ’ ಸ್ಸತ್ಥ, ರುಕ್ಖಮ್ಹಿ ಪುರಿಸಿತ್ಥಿಯಂ.

೮೦೬. ಸೇವಿತೋ ಯೇನ ಯೋ ನಿಚ್ಚಂ, ತತ್ಥಾಪಿ ವಿಸಯೋ ಸಿಯಾ;

ರೂಪಾದಿಕೇ ಜನಪದೇ, ತಥಾ ದೇಸೇ ಚ ಗೋಚರೇ.

೮೦೭. ಭಾವೋ ಪದತ್ಥೇ ಸತ್ತಾಯ, ಮಧಿಪ್ಪಾಯ ಕ್ರಿಯಾಸು ಚ;

ಸಭಾವಸ್ಮಿಞ್ಚ ಲೀಲಾಯಂ, ಪುರಿಸಿ’ತ್ಥಿನ್ದ್ರಿಯೇಸು ಚ.

೮೦೮. ಸೋ ಬನ್ಧವೇ’ತ್ತನಿ ಚ ಸಂ, ಸೋ ಧನಸ್ಮಿ ಮನಿತ್ಥಿಯಂ;

ಸಾ ಪುಮೇ ಸುನಖೇ ವುತ್ತೋ, ತ್ತನಿಯೇ ಸೋ ತಿಲಿಙ್ಗಿಕೋ.

೮೦೯. ಸುವಣ್ಣಂ ಕನಕೇ ವುತ್ತಂ, ಸುವಣ್ಣೋ ಗರುಳೇ ತಥಾ;

ಪಞ್ಚಧರಣಮತ್ತೇ ಚ, ಛವಿ ಸಮ್ಪತ್ತಿಯಮ್ಪಿ ಚ.

೮೧೦. ವರೋ ದೇವಾದಿಕಾ [ದೇವಾದಿತೋ (ಸೀ.)] ಇಟ್ಠೇ, ಜಾಮಾತರಿ ಪತಿಮ್ಹಿ ಚ,

ಉತ್ತಮೇ ವಾಚ್ಚಲಿಙ್ಗೋ ಸೋ, ವರಂ ಮನ್ದಪ್ಪಿಯೇ ಬ್ಯಯಂ.

೮೧. ೧.

ಮಕುಲೇ ಧನರಾಸಿಮ್ಹಿ, ಸಿಯಾ ಕೋಸ ಮನಿತ್ಥಿಯಂ;

ನೇತ್ತಿಂಸಾದಿ ಪಿಧಾನೇ ಚ, ಧನುಪಞ್ಚಸತೇಪಿ ಚ.

೮೧೨. ಪಿತಾಮಹೇ ಜಿನೇ ಸೇಟ್ಠೇ, ಬ್ರಾಹ್ಮಣೇ ಚ ಪಿತೂಸ್ವಪಿ;

ಬ್ರಹ್ಮಾ ವುತ್ತೋ ತಥಾ ಬ್ರಹ್ಮಂ, ವೇದೇ ತಪಸಿ ವುಚ್ಚತೇ.

೮೧೩. ಹತ್ಥೀನಂ ಮಜ್ಝಬನ್ಧೇ ಚ, ಪಕೋಟ್ಠೇ ಕಚ್ಛಬನ್ಧನೇ;

ಮೇಖಲಾಯಂ ಮತಾ ಕಚ್ಛಾ, ಕಚ್ಛೋ ವುತ್ತೋ ಲತಾಯ ಚ.

೮೧೪. ತಥೇವ ಬಾಹುಮೂಲಮ್ಹಿ, ಅನೂಪಮ್ಹಿ ತಿಣೇಪಿ ಚ;

೮೧೫. ಪಮಾಣಂ ಹೇತು ಸತ್ಥೇಸು, ಮಾನೇ ಚ ಸಚ್ಚವಾದಿನಿ;

ಪಮಾತರಿ ಚ ನಿಚ್ಚಮ್ಹಿ, ಮರಿಯಾದಾಯ ಮುಚ್ಚತೇ.

೮೧೬. ಸತ್ತಂ ದಬ್ಬ’ತ್ತಭಾವೇಸು, ಪಾಣೇಸು ಚ ಬಲೇ, ಸಿಯಾ [ಬಲೇ ಸಕ್ಕಾ (ಟೀ.)];

ಸತ್ತಾಯಞ್ಚ, ಜನೇಸತ್ತೋ, ಆಸತ್ತೇ ಸೋ ತಿಲಿಙ್ಗಿಕೋ.

೮೧೭. ಸೇಮ್ಹಾದೋ ರಸರತ್ತಾದೋ, ಮಹಾಭೂತೇ ಪಭಾದಿಕೇ;

ಧಾತು ದ್ವೀಸ್ವ’ಟ್ಠಿಚಕ್ಖಾ’ದಿ, ಭ್ವಾ’ದೀಸು ಗೇರಿಕಾದಿಸು.

೮೧೮. ಅಮಚ್ಚಾದೋ ಸಭಾವೇ ಚ, ಯೋನಿಯಂ ಪಕತೀ’ರಿತಾ;

ಸತ್ವಾದಿಸಾಮ್ಯಾ’ವತ್ಥಾಯಂ, ಪಚ್ಚಯಾ ಪಠಮೇಪಿ ಚ.

೮೧೯. ಪದಂ ಠಾನೇ ಪರಿತ್ತಾಣೇ, ನಿಬ್ಬಾನಮ್ಹಿ ಚ ಕಾರಣೇ;

ಸದ್ದೇ ವತ್ಥುಮ್ಹಿ ಕೋಟ್ಠಾಸೇ, ಪಾದೇ ತಲ್ಲಞ್ಛನೇ ಮತಂ.

೮೨೦. ಲೋಹಮುಗ್ಗರ ಮೇಘೇಸು, ಘನೋ, ತಾಲಾದಿಕೇ ಘನಂ,;

ನಿರನ್ತರೇ ಚ ಕಠಿನೇ, ವಾಚ್ಚಲಿಙ್ಗಿಕ ಮುಚ್ಚತೇ.

೮೨೧. ಖುದ್ದಾ ಚ ಮಕ್ಖಿಕಾಭೇದೇ, ಮಧುಮ್ಹಿ ಖುದ್ದ, ಮಪ್ಪಕೇ;

ಅಧಮೇ ಕಪಣೇ ಚಾಪಿ, ಬಹುಮ್ಹಿ ಚತೂಸು ತ್ತಿಸು.

೮೨೨. ತಕ್ಕೇ ಮರಣಲಿಙ್ಗೇ ಚ, ಅರಿಟ್ಠಂ ಅಸುಭೇ ಸುಭೇ,;

ಅರಿಟ್ಠೋ ಆಸವೇ ಕಾಕೇ, ನಿಮ್ಬೇ ಚ ಫೇನಿಲದ್ದುಮೇ.

೮೨೩. ಮಾನಭಣ್ಡೇ ಪಲಸತೇ, ಸದಿಸತ್ತೇ ತುಲಾ ತಥಾ;

ಗೇಹಾನಂ ದಾರುಬನ್ಧತ್ಥ, ಪೀಠಿಕಾಯಞ್ಚ ದಿಸ್ಸತಿ.

೮೨೪. ಮಿತ್ತಕಾರೇ ಲಞ್ಜದಾನೇ, ಬಲೇ ರಾಸಿ ವಿಪತ್ತಿಸು [ಬಲರಾಸಿ ವಿಪತ್ತಿಸು (ಕ.)];

ಯುದ್ಧೇ ಚೇವ ಪಟಿಞ್ಞಾಯಂ, ಸಙ್ಗರೋ ಸಮ್ಪಕಾಸಿತೋ.

೮೨೫. ಖನ್ಧೇ ಭವೇ ನಿಮಿತ್ತಮ್ಹಿ, ರೂಪಂ ವಣ್ಣೇ ಚ ಪಚ್ಚಯೇ;

ಸಭಾವ ಸದ್ದ ಸಣ್ಠಾನ, ರೂಪಜ್ಝಾನ ವಪೂಸು ಚ.

೮೨೬. ವತ್ಥು ಕಿಲೇಸ ಕಾಮೇಸು, ಇಚ್ಛಾಯಂ ಮದನೇ ರತೇ;

ಕಾಮೋ, ಕಾಮಂ ನಿಕಾಮೇ, ಚಾ, ನುಞ್ಞಾಯಂ ಕಾಮ ಮಬ್ಯಯಂ.

೮೨೭. ಪೋಕ್ಖರಂ ಪದುಮೇ ದೇಹೇ, ವಜ್ಜಭಣ್ಡಮುಖೇಪಿ ಚ;

ಸುನ್ದರತ್ತೇ ಚ ಸಲಿಲೇ, ಮಾತಙ್ಗಕರಕೋಟಿಯಂ.

೮೨೮. ರಾಸಿನಿಚ್ಚಲ ಮಾಯಾಸು, ದಮ್ಭಾ’ಸಚ್ಚೇಸ್ವ’ಯೋಘನೇ;

ಗಿರಿಸಿಙ್ಗಮ್ಹಿ ಸೀರಙ್ಗೇ, ಯನ್ತೇ ಕೂಟ ಮನಿತ್ಥಿಯಂ.

೮೨೯. ವುದ್ಧಿಯಂ ಜನನೇ ಕಾಮ, ಧಾತ್ವಾದೀಮ್ಹಿ ಚ ಪತ್ತಿಯಂ;

ಸತ್ತಾಯಞ್ಚೇವ ಸಂಸಾರೇ, ಭವೋ ಸಸ್ಸತದಿಟ್ಠಿಯಂ.

೮೩೦. ಪಟಿವಾಕ್ಯೋ’ತ್ತರಾಸಙ್ಗೇ, ಸು’ತ್ತರಂ ಉತ್ತರೋ ತಿಸು;

ಸೇಟ್ಠೇ ದಿಸಾದಿಭೇದೇ ಚ, ಪರಸ್ಮಿ ಮುಪರೀ’ರಿತೋ.

೮೩೧. ನೇಕ್ಖಮ್ಮಂ ಪಠಮಜ್ಝಾನೇ, ಪಬ್ಬಜ್ಜಾಯಂ ವಿಮುತ್ತಿಯಂ;

ವಿಪಸ್ಸನಾಯ ನಿಸ್ಸೇಸ, ಕುಸಲಮ್ಹಿ ಚ ದಿಸ್ಸತಿ.

೮೩೨. ಸಙ್ಖಾರೋ ಸಙ್ಖತೇ ಪುಞ್ಞಾ, ಭಿಸಙ್ಖಾರಾದಿಕೇಪಿ ಚ;

ಪಯೋಗೇ ಕಾಯಸಙ್ಖಾರಾ, ದ್ಯ’ಭಿಸಙ್ಖರಣೇಸು ಚ.

೮೩೩. ಆರಮ್ಮಣೇ ಚ ಸಂಸಟ್ಠೇ, ವೋಕಿಣ್ಣೇ ನಿಸ್ಸಯೇ ತಥಾ;

ತಬ್ಭಾವೇ ಚಾಪ್ಯಭಿಧೇಯ್ಯ, ಲಿಙ್ಗೋ ಸಹಗತೋ ಭವೇ.

೮೩೪. ತೀಸು ಛನ್ನಂ ಪತಿರೂಪೇ, ಛಾದಿತೇ ಚ ನಿಗೂಹಿತೇ;

ನಿವಾಸನ ಪಾರುಪನೇ, ರಹೋ ಪಞ್ಞತ್ತಿಯಂ ಪುಮೇ.

೮೩೫. ಬುದ್ಧಸಮನ್ತಚಕ್ಖೂಸು, ಚಕ್ಖು ಪಞ್ಞಾಯ ಮೀರಿತಂ;

ಧಮ್ಮಚಕ್ಖುಮ್ಹಿ ಚ ಮಂಸ, ದಿಬ್ಬಚಕ್ಖುದ್ವಯೇಸು ಚ.

೮೩೬. ವಾಚ್ಚಲಿಙ್ಗೋ ಅಭಿಕ್ಕನ್ತೋ, ಸುನ್ದರಮ್ಹಿ ಅಭಿಕ್ಕಮೇ;

ಅಭಿರೂಪೇ ಖಯೇ ವುತ್ತೋ, ತಥೇವ’ಬ್ಭನುಮೋದನೇ.

೮೩೭. ಕಾರಣೇ ದೇಸನಾಯಞ್ಚ, ವಾರೇ ವೇವಚನೇಪಿ ಚ;

ಪಾಕಾರಸ್ಮಿಂ [ಪಕಾರಸ್ಮಿಂ (ಕ.)] ಅವಸರೇ, ಪರಿಯಾಯೋ ಕಥೀಯತಿ.

೮೩೮. ವಿಞ್ಞಾಣೇ ಚಿತ್ತಕಮ್ಮೇ ಚ, ವಿಚಿತ್ತೇ ಚಿತ್ತ ಮುಚ್ಚತೇ;

ಪಞ್ಞತ್ತಿ ಚಿತ್ತಮಾಸೇಸು, ಚಿತ್ತೋ, ತಾರನ್ತರೇ ಥಿಯಂ.

೮೩೯. ಸಾಮಂ ವೇದನ್ತರೇ ಸಾನ್ತ್ವೇ, ತಂ ಪೀತೇ ಸಾಮಲೇ ತಿಸು;

ಸಯಮತ್ಥೇ ಬ್ಯಯಂ ಸಾಮಂ, ಸಾಮಾ ಚ ಸಾರಿವಾಯಪಿ.

೮೪೦. ಪುಮೇ ಆಚರಿಯಾದಿಮ್ಹಿ, ಗರು [ಗುರು (ಕ. ಟೀ.)] ಮಾತಾಪಿತೂಸ್ವಪಿ;

ಗರು ತೀಸು ಮಹನ್ತೇ ಚ, ದುಜ್ಜರಾ’ಲಹುಕೇಸು ಚ.

೮೪೧. ಅಚ್ಚಿತೇ ವಿಜ್ಜಮಾನೇ ಚ, ಪಸತ್ಥೇ ಸಚ್ಚ ಸಾಧುಸು;

ಖಿನ್ನೇ ಚ ಸಮಿತೇ ಚೇವ, ಸನ್ತೋಭಿಧೇಯ್ಯಲಿಙ್ಗಿಕೋತಿ.

ಇತಿ ಗಾಥಾಅನೇಕತ್ಥವಗ್ಗೋ.

೮೪೨. ದೇವೋ ವಿಸುದ್ಧಿದೇವಾ’ದೋ, ಮೇಘ ಮಚ್ಚು ನಭೇಸು ಚ;

ಅಥೋಪಿ ತರುಣೇ ಸತ್ತೇ, ಚೋರೇಪಿ ಮಾಣವೋ ಭವೇ.

೮೪೩. ಆದಿ ಕೋಟ್ಠಾಸ ಕೋಟೀಸು, ಪುರತೋ’ಗ್ಗಂವರೇ ತೀಸು;

ಪಚ್ಚನೀಕೋ’ತ್ತಮೇಸ್ವ’ಞ್ಞೇ, ಪಚ್ಛಾಭಾಗೇ ಪರೋ ತಿಸು.

೮೪೪. ಯೋನಿ ಕಾಮ ಸಿರಿ’ಸ್ಸರೇ, ಧಮ್ಮು’ಯ್ಯಾಮ ಯಸೇ ಭಗಂ;

ಉಳಾರೋ ತೀಸು ವಿಪುಲೇ, ಸೇಟ್ಠೇ ಚ ಮಧುರೇ ಸಿಯಾ.

೮೪೫. ಸಮ್ಪನ್ನೋ ತೀಸು ಸಮ್ಪುಣ್ಣೇ, ಮಧುರೇ ಚ ಸಮಙ್ಗಿನಿ;

ಸಙ್ಖಾ ತು ಞಾಣೇ ಕೋಟ್ಠಾಸ, ಪಞ್ಞತ್ತಿ ಗಣನೇಸು ಚ.

೮೪೬. ಠಾನಂ ಇಸ್ಸರಿಯೋ’ಕಾಸ, ಹೇತೂಸು ಠಿತಿಯಮ್ಪಿ ಚ;

ಅಥೋ ಮಾನೇ ಪಕಾರೇಚ, ಕೋಟ್ಠಾಸೇಚ ವಿಧೋ ದ್ವಿಸು.

೮೪೭. ಪಞ್ಞೋ’ಪವಾಸ ಖನ್ತೀಸು, ದಮೋ ಇನ್ದ್ರಿಯಸಂವರೇ;

ಞಾಣೇ ಚ ಸೋಮನಸ್ಸೇಚ, ವೇದೋ ಛನ್ದಸಿ ಚೋ’ಚ್ಚತೇ.

೮೪೮. ಖನ್ಧಕೋಟ್ಠಾಸ, ಪಸ್ಸಾವ, ಮಗ್ಗ, ಹೇತೂಸು ಯೋನಿ ಸಾ [ಯೋನಿ ಸೋ (ಟೀ.)];

ಕಾಲೇ ತು ಕೂಲೇ ಸೀಮಾಯಂ, ವೇಲಾ ರಾಸಿಮ್ಹಿ ಭಾಸಿತಾ.

೮೪೯. ವೋಹಾರೋ ಸದ್ದ ಪಣ್ಣತ್ತಿ, ವಣಿಜ್ಜಾ ಚೇತನಾಸು ಚ;

ನಾಗೋ ತು’ರಗ ಹತ್ಥೀಸು, ನಾಗರುಕ್ಖೇ ತಥು’ತ್ತಮೇ.

೮೫೦. ಸೇಟ್ಠಾ’ಸಹಾಯ ಸಙ್ಖ್ಯಾ’ಞ್ಞ,