೧. ವಿಸೇಸ್ಯಾಧೀನವಗ್ಗ

೬೯೧. ವಿಸೇಸ್ಯಾಧೀನ ಸಂಕಿಣ್ಣಾ, ನೇಕತ್ಥೇಹ್ಯ’ಬ್ಯಯೇಹಿ ಚ;

ಸಾ’ಙ್ಗೋ’ಪಾಙ್ಗೇಹಿ ಕಥ್ಯನ್ತೇ, ಕಣ್ಡೇ ವಗ್ಗಾ ಇಹ ಕ್ಕಮಾ.

೬೯೨. ಗುಣದಬ್ಬಕ್ರಿಯಾಸದ್ದಾ, ಸಿಯುಂ ಸಬ್ಬೇ ವಿಸೇಸನಾ;

ವಿಸೇಸ್ಯಾಧೀನಭಾವೇನ, ವಿಸೇಸ್ಯಸಮಲಿಙ್ಗಿನೋ.

೬೯೩. ಸೋಭನಂ ರುಚಿರಂ ಸಾಧು, ಮನುಞ್ಞಂ ಚಾರು ಸುನ್ದರಂ;

ವಗ್ಗು ಮನೋರಮಂ ಕನ್ತಂ, ಹಾರೀ ಮಞ್ಜು ಚ ಪೇಸಲಂ.

೬೯೪. ಭದ್ದಂ ವಾಮಞ್ಚ ಕಲ್ಯಾಣಂ, ಮನಾಪಂ ಲದ್ಧಕಂ ಸುಭಂ;

ಉತ್ತಮೋ ಪವರೋ ಜೇಟ್ಠೋ, ಪಮುಖಾ’ನುತ್ತರೋ ವರೋ.

೬೯೫. ಮುಖ್ಯೋ ಪಧಾನಂ ಪಾಮೋಕ್ಖೋ, ಪರ ಮಗ್ಗಞ್ಞ ಮುತ್ತರಂ;

ಪಣೀತಂ ಪರಮಂ ಸೇಯ್ಯೋ, ಗಾಮಣೀ ಸೇಟ್ಠ ಸತ್ತಮಾ.

೬೯೬. ವಿಸಿಟ್ಠಾ’ರಿಯ ನಾಗೇ’ಕೋ, ಸಭಗ್ಗಾ ಮೋಕ್ಖ ಪುಙ್ಗವಾ;

ಸೀಹ ಕುಞ್ಜರ ಸದ್ದೂಲಾ, ದೀ ತು ಸಮಾಸಗಾ ಪುಮೇ.

೬೯೭. ಚಿತ್ತ’ಕ್ಖಿ ಪೀತಿಜನನ, ಮಬ್ಯಾಸೇಕ ಮಸೇಚನಂ;

ಇಟ್ಠಂ ತು ಸುಭಗಂ ಹಜ್ಜಂ, ದಯಿತಂ ವಲ್ಲಭಂ ಪಿಯಂ.

೬೯೮. ತುಚ್ಛಞ್ಚ ರಿತ್ತಕಂ ಸುಞ್ಞಂ, ಅಥಾ’ಸಾರಞ್ಚ ಫೇಗ್ಗು ಚ;

ಮೇಜ್ಝಂ ಪೂತಂ ಪವಿತ್ತೋ ಥ, ಅವಿರದ್ಧೋ ಅಪಣ್ಣಕೋ.

೬೯೯. ಉಕ್ಕಟ್ಠೋ ಚ ಪಕಟ್ಠೋ ಥ, ನಿಹೀನೋ ಹೀನ ಲಾಮಕಾ;

ಪತಿಕಿಟ್ಠಂ ನಿಕಿಟ್ಠಞ್ಚ, ಇತ್ತರಾ’ವಜ್ಜ ಕುಚ್ಛಿತಾ.

೭೦೦. ಅಧಮೋ’ಮಕ ಗಾರಯ್ಹಾ,

ಮಲೀನೋ ತು ಮಲೀಮಸೋ;

ಬ್ರಹಾ ಮಹನ್ತಂ ವಿಪುಲಂ, ವಿಸಾಲಂ ಪುಥುಲಂ ಪುಥು.

೭೦೧. ಗರು’ರು ವಿತ್ಥಿಣ್ಣ ಮಥೋ, ಪೀನಂ ಥೂಲಞ್ಚ ಪೀವರಂ;

ಥುಲ್ಲಞ್ಚ ವಠರಞ್ಚಾ ಥ, ಆಚಿತಂ ನಿಚಿತಂ ಭವೇ.

೭೦೨. ಸಬ್ಬಂ ಸಮತ್ತ ಮಖಿಲಂ, ನಿಖಿಲಂ ಸಕಲಂ ತಥಾ;

ನಿಸ್ಸೇಸಂ ಕಸಿಣಾ’ಸೇಸಂ, ಸಮಗ್ಗಞ್ಚ ಅನೂನಕಂ,

೭೦೩. ಭೂರಿ ಪಹುತಂ ಪಚುರಂ, ಭಿಯ್ಯೋ ಸಮ್ಬಹುಲಂ ಬಹು;

ಯೇಭುಯ್ಯಂ ಬಹುಲಂ ಚಾಥ, ಬಾಹಿರಂ ಪರಿಬಾಹಿರಂ.

೭೦೪. ಪರೋಸತಾದೀ ತೇ, ಯೇಸಂ, ಪರಂ ಮತ್ತಂ ಸತಾದಿತೋ;

ಪರಿತ್ತಂ ಸುಖುಮಂ ಖುದ್ದಂ, ಥೋಕ ಮಪ್ಪಂ ಕಿಸಂ ತನು.

೭೦೫. ಚುಲ್ಲಂ ಮತ್ತೇ’ತ್ಥಿಯಂ ಲೇಸ,

ಲವಾ’ಣುಹಿ ಕಣೋ ಪುಮೇ;

ಸಮೀಪಂ ನಿಕಟಾ’ಸನ್ನೋ, ಪಕಟ್ಠಾ’ಭ್ಯಾಸ ಸನ್ತಿಕಂ.

೭೦೬. ಅವಿದೂರಞ್ಚ ಸಾಮನ್ತಂ, ಸನ್ನಿಕಟ್ಠ ಮುಪನ್ತಿಕಂ;

ಸಕಾಸಂ ಅನ್ತಿಕಂ ಞತ್ತಂ, ದೂರಂ ತು ವಿಪ್ಪಕಟ್ಠಕಂ.

೭೦೭. ನಿರನ್ತರಂ ಘನಂ ಸನ್ದಂ, ವಿರಳಂ ಪೇಲವಂ ತನು;

ಅಥಾ ಯತಂ ದೀಘ ಮಥೋ, ನಿತ್ತಲಂ ವಟ್ಟ ವಟ್ಟುಲಂ.

೭೦೮. ಉಚ್ಚೋ ತು ಉನ್ನತೋ ತುಙ್ಗೋ, ಉದಗ್ಗೋ ಚೇವ ಉಚ್ಛಿತೋ;

ನೀಚೋ ರಸ್ಸೋ ವಾಮನೋ ಥ, ಅಜಿಮ್ಹೋ ಪಗುಣೋ ಉಜು.

೭೦೯. ಅಳಾರಂ ವೇಲ್ಲಿತಂ ವಙ್ಕಂ, ಕುಟಿಲಂ ಜಿಮ್ಹ ಕುಞ್ಚಿತಂ;

ಧುವೋ ಚ ಸಸ್ಸತೋ ನಿಚ್ಚೋ, ಸದಾತನ ಸನನ್ತನಾ.

೭೧೦. ಕೂಟಟ್ಠೋ ತ್ವೇ’ಕರೂಪೇನ, ಕಾಲಬ್ಯಾಪೀ ಪಕಾಸಿತೋ;

ಲಹು ಸಲ್ಲಹುಕಂ ಚಾಥ, ಸಙ್ಖ್ಯಾತಂ ಗಣಿತಂ ಮಿತಂ.

೭೧೧. ತಿಣ್ಹಂ ತು ತಿಖಿಣಂ ತಿಬ್ಬಂ, ಚಣ್ಡಂ ಉಗ್ಗಂ ಖರಂ ಭವೇ;

ಜಙ್ಗಮಞ್ಚ ಚರಞ್ಚೇವ, ತಸಂ ಞೇಯ್ಯಂ ಚರಾಚರಂ.

೭೧೨. ಕಮ್ಪನಂ ಚಲನಂ ಚಾಥ, ಅತಿರಿತ್ತೋ ತಥಾ’ಧಿಕೋ;

ಥಾವರೋ ಜಙ್ಗಮಾ ಅಞ್ಞೋ, ಲೋಲಂ ತು ಚಞ್ಚಲಂ ಚಲಂ.

೭೧೩. ತರಲಞ್ಚ ಪುರಾಣೋ ತು, ಪುರಾತನ ಸನನ್ತನಾ;

ಚಿರನ್ತನೋ ಥ ಪಚ್ಚಗ್ಘೋ, ನೂತನೋ’ಭಿನವೋ ನವೋ.

೭೧೪. ಕುರೂರಂ ಕಠಿನಂ ದಳ್ಹಂ, ನಿಟ್ಠುರಂ ಕಕ್ಖಳಂ ಭವೇ;

ಅನಿತ್ಥ್ಯ’ನ್ತೋ ಪರಿಯನ್ತೋ, ಪನ್ತೋ ಚ ಪಚ್ಛಿಮ’ನ್ತಿಮಾ.

೭೧೫. ಜಿಘಞ್ಞಂ ಚರಿಮಂ ಪುಬ್ಬಂ, ತ್ವ’ಗ್ಗಂ ಪಠಮ ಮಾದಿ ಸೋ;

ಪತಿರೂಪೋ ನುಚ್ಛವಿಕಂ, ಅಥ ಮೋಘಂ ನಿರತ್ಥಕಂ.

೭೧೬. ಬ್ಯತ್ತಂ ಪುಟ [ಫುಟಂ (ಸೀ.)] ಞ್ಚ ಮುದು ತು, ಸುಕುಮಾರಞ್ಚ ಕೋಮಲಂ;

ಪಚ್ಚಕ್ಖಂ ಇನ್ದ್ರಿಯಗ್ಗಯ್ಹಂ, ಅಪಚ್ಚಕ್ಖಂ ಅತಿನ್ದ್ರಿಯಂ.

೭೧೭. ಇತರಾ’ಞ್ಞತರೋ ಏಕೋ, ಅಞ್ಞೋ ಬಹುವಿಧೋ ತು ಚ;

ನಾನಾರೂಪೋ ಚ ವಿವಿಧೋ, ಅಬಾಧಂ ತು ನಿರಗ್ಗಲಂ.

೭೧೮. ಅಥೇ’ಕಾಕೀ ಚ ಏಕಚ್ಚೋ, ಏಕೋ ಚ ಏಕಕೋ ಸಮಾ;

ಸಾಧಾರಣಞ್ಚ ಸಾಮಞ್ಞಂ, ಸಮ್ಬಾಧೋ ತು ಚ ಸಂಕಟಂ.

೭೧೯. ವಾಮಂ ಕಳೇವರಂ ಸಬ್ಯಂ; ಅಪಸಬ್ಯಂ ತು ದಕ್ಖಿಣಂ;

ಪಟಿಕೂಲಂ ತ್ವ’ಪಸಬ್ಯಂ, ಗಹನಂ ಕಲಿಲಂ ಸಮಾ.

೭೨೦. ಉಚ್ಚಾವಚಂ ಬಹುಭೇದಂ, ಸಂಕಿಣ್ಣಾ’ ಕಿಣ್ಣ ಸಂಕುಲಾ;

ಕತಹತ್ಥೋ ಚ ಕುಸಲೋ, ಪವೀಣಾ’ಭಿಞ್ಞ ಸಿಕ್ಖಿತಾ.

೭೨೧. ನಿಪುಣೋ ಚ ಪಟು ಛೇಕೋ, ಚಾತುರೋ ದಕ್ಖ ಪೇಸಲಾ;

ಬಾಲೋ ದತ್ತು ಜಲೋ ಮೂಳ್ಹೋ, ಮನ್ದೋ ವಿಞ್ಞೂ ಚ ಬಾಲಿಸೋ.

೭೨೨. ಪುಞ್ಞವಾ ಸುಕತೀ ಧಞ್ಞೋ, ಮಹುಸ್ಸಾಹೋ ಮಹಾಧಿತಿ;

ಮಹಾತಣ್ಹೋ ಮಹಿಚ್ಛೋ ಥ, ಹದಯೀ ಹದಯಾಲು ಚ.

೭೨೩. ಸುಮನೋ ಹಟ್ಠಚಿತ್ತೋ ಥ, ದುಮ್ಮನೋ ವಿಮನೋ ಪ್ಯಥ;

ವದಾನಿಯೋ ವದಞ್ಞೂ ಚ, ದಾನಸೋಣ್ಡೋ ಬಹುಪ್ಪದೋ.

೭೨೪. ಖ್ಯಾತೋ ಪತೀತೋ ಪಞ್ಞಾತೋ,

ಭಿಞ್ಞಾತೋ ಪಥಿತೋ ಸುತೋ,

ವಿಸ್ಸುತೋ ವಿದಿತೋ ಚೇವ, ಪಸಿದ್ಧೋ ಪಾಕಟೋ ಭವೇ.

೭೨೫. ಇಸ್ಸರೋ ನಾಯಕೋ ಸಾಮೀ, ಪತೀ’ಸಾ’ಧಿಪತೀ ಪಭೂ;

ಅಯ್ಯಾ’ಧಿಪಾ’ಧಿಭೂ ನೇತಾ,

ಇಬ್ಭೋ ತ್ವ’ಡ್ಢೋ ತಥಾ ಧನೀ.

೭೨೬. ದಾನಾರಹೋ ದಕ್ಖಿಣೇಯ್ಯೋ, ಸಿನಿದ್ಧೋ ತು ಚ ವಚ್ಛಲೋ;

ಪರಿಕ್ಖಕೋ ಕಾರಣಿಕೋ,

ಆಸತ್ತೋ ತು ಚ ತಪ್ಪರೋ.

೭೨೭. ಕಾರುಣಿಕೋ ದಯಾಲುಪಿ, ಸೂರತೋ ಉಸ್ಸುಕೋ ತು ಚ;

ಇಟ್ಠತ್ಥೇ ಉಯ್ಯುತೋ ಚಾಥ, ದೀಘಸುತ್ತೋ ಚಿರಕ್ರಿಯೋ.

೭೨೮. ಪರಾಧೀನೋ ಪರಾಯತ್ತೋ, ಆಯತ್ತೋ ತು ಚ ಸನ್ತಕೋ;

ಪರಿಗ್ಗಹೋ ಅಧೀನೋ ಚ, ಸಚ್ಛನ್ದೋ ತು ಚ ಸೇರಿನಿ.

೭೨೯. ಅನಿಸಮ್ಮಕಾರೀ ಜಮ್ಮೋ, ಅತಿತಣ್ಹೋ ತು ಲೋಲುಪೋ;

ಗಿದ್ಧೋ ತು ಲುದ್ಧೋ ಲೋಲೋ ಥ,

ಕುಣ್ಠೋ ಮನ್ದೋ ಕ್ರಿಯಾಸು ಹಿ.

೭೩೦. ಕಾಮಯಿತಾ ತು ಕಮಿತಾ, ಕಾಮನೋ ಕಾಮಿ ಕಾಮುಕೋ;

ಸೋಣ್ಡೋ ಮತ್ತೋ ವಿಧೇಯ್ಯೋ ತು,

ಅಸ್ಸವೋ ಸುಬ್ಬಚೋ ಸಮಾ.

೭೩೧. ಪಗಬ್ಭೋ ಪಟಿಭಾಯುತ್ತೋ, ಭೀಸೀಲೋ ಭೀರು ಭೀರುಕೋ;

ಅಧೀರೋ [ಅವೀರೋ (ಟೀ.)] ಕಾತರೋ ಚಾಥ,

ಹಿಂಸಾಸೀಲೋ ಚ ಘಾತುಕೋ.

೭೩೨. ಕೋಧನೋ ರೋಸನೋ [ದೋಸನೋ (ಸೀ.)] ಕೋಪೀ,

ಚಣ್ಡೋ ತ್ವಚ್ಚನ್ತಕೋಧನೋ;

ಸಹನೋ ಖಮನೋ ಖನ್ತಾ, ತಿತಿಕ್ಖವಾ ಚ ಖನ್ತಿಮಾ.

೭೩೩. ಸದ್ಧಾಯುತ್ತೋ ತು ಸದ್ಧಾಲು, ಧಜವಾ ತು ಧಜಾಲು ಚ [ಲಜ್ಜಾಲುತು ಚ ಲಜ್ಜವಾ (ಕ.)];

ನಿದ್ದಾಲು ನಿದ್ದಾಸೀಲೋ ಥ, ಭಸ್ಸರೋ ಭಾಸುರೋ ಭವೇ.

೭೩೪. ನಗ್ಗೋ ದಿಗಮ್ಬರೋ’ವತ್ಥೋ, ಘಸ್ಮರೋ ತು ಚ ಭಕ್ಖಕೋ;

ಏಳಮೂಗೋ ತು ವತ್ತುಞ್ಚ, ಸೋತುಂ ಚಾ’ಕುಸಲೋ ಭವೇ.

೭೩೫. ಮುಖರೋ ದುಮ್ಮುಖಾ’ಬದ್ಧ, ಮುಖಾ ಚಾಪ್ಪಿಯವಾದಿನಿ;

ವಾಚಾಲೋ ಬಹುಗಾರಯ್ಹ, ವಚೇ ವತ್ತಾ ತು ಸೋ ವದೋ.

೭೩೬. ನಿಜೋ ಸಕೋ ಅತ್ತನಿಯೋ,

ವಿಮ್ಹಯೋ’ಚ್ಛರಿಯ’ಬ್ಭುತೋ;

ವಿಹತ್ಥೋ ಬ್ಯಾಕುಲೋ ಚಾಥ,

ಆತತಾಯೀ ವಧುದ್ಯತೋ.

೭೩೭. ಸೀಸಚ್ಛೇಜ್ಜಮ್ಹಿ ವಜ್ಝೋ ಥ, ನಿಕತೋ ಚ ಸಠೋ’ನುಜು;

ಸೂಚಕೋ ಪಿಸುಣೋ ಕಣ್ಣೇ,

ಜಪೋ ಧುತ್ತೋ ತು ವಞ್ಚಕೋ.

೭೩೮. ಅನಿಸಮ್ಮ ಹಿ ಯೋ ಕಿಚ್ಚಂ, ಪುರಿಸೋ ವಧಬನ್ಧನಾದಿ ಮಾಚರತಿ;

ಅವಿನಿಚ್ಛಿತಕಾರಿತ್ತಾ, ಸೋಖಲು ಚಪಲೋತಿ ವಿಞ್ಞೇಯ್ಯೋ.

೭೩೯. ಖುದ್ದೋ ಕದರಿಯೋ ಥದ್ಧ, ಮಚ್ಛರೀ ಕಪಣೋ ಪ್ಯಥ;

ಅಕಿಞ್ಚನೋ ದಲಿದ್ದೋ ಚ, ದೀನೋ ನಿದ್ಧನ ದುಗ್ಗತಾ.

೭೪೦. ಅಸಮ್ಭಾವಿತಸಮ್ಪತ್ತಂ, ಕಾಕತಾಲಿಯ ಮುಚ್ಚತೇ;

ಅಥ ಯಾಚನಕೋ ಅತ್ಥೀ, ಯಾಚಕೋ ಚ ವನಿಬ್ಬಕೋ.

೭೪೧. ಅಣ್ಡಜಾ ಪಕ್ಖಿಸಪ್ಪಾದೀ, ನರಾದೀ ತು ಜಲಾಬುಜಾ;

ಸೇದಜಾ ಕಿಮಿಡಂಸಾದೀ, ದೇವಾದೀ ತ್ವೋ’ ಪಪಾತಿಕಾ.

೭೪೨. ಜಣ್ಣುತಗ್ಘೋ ಜಣ್ಣುಮತ್ತೋ, ಕಪ್ಪೋ ತು ಕಿಞ್ಚಿದೂನಕೇ;

ಅನ್ತಗ್ಗತಂ ಭು ಪರಿಯಾ, ಪನ್ನ ಮನ್ತೋಗಧೋ’ಗಧಾ.

೭೪೩. ರಾಧಿತೋ ಸಾಧಿತೋ ಚಾಥ, ನಿಪ್ಪಕ್ಕಂ ಕುಥಿತಂ ಭವೇ;

ಆಪನ್ನೋ ತ್ವಾ’ಪದಪ್ಪತ್ತೋ, ವಿವಸೋ ತ್ವವಸೋ ಭವೇ.

೭೪೪. ನುಣ್ಣೋ ನುತ್ತಾ’ತ್ತ, ಖಿತ್ತಾ ಚೇ’, ರಿತಾ ವಿದ್ಧಾ ಥ ಕಮ್ಪಿತೋ;

ಧೂತೋ ಆಧೂತ ಚಲಿತಾ, ನಿಸಿತಂ ತು ಚ ತೇಜಿತಂ.

೭೪೫. ಪತ್ತಬ್ಬಂ ಗಮ್ಮ ಮಾಪಜ್ಜಂ [ಆಸಜ್ಜಂ (ಕ.)], ಪಕ್ಕಂ ಪರಿಣತಂ ಸಮಾ;

ವೇಠಿತಂ ತು ವಲಯಿತಂ, ರುದ್ಧಂ ಸಂವುತ ಮಾವುತಂ.

೭೪೬. ಪರಿಕ್ಖಿತ್ತಞ್ಚ ನಿವುತಂ, ವಿಸಟಂ ವಿತ್ಥತಂ ತತಂ;

ಲಿತ್ತೋ ತು ದಿದ್ಧೋ ಗೂಳ್ಹೋ ತು,

ಗುತ್ತೋ ಪುಟ್ಠೋ ತು ಪೋಸಿತೋ.

೭೪೭. ಲಜ್ಜಿತೋ ಹೀಳಿತೋ ಚಾಥ, ಸನಿತಂ ಧನಿತಂ ಪ್ಯಥ;

ಸನ್ದಾನಿತೋ ಸಿತೋ ಬದ್ಧೋ,

ಕೀಲಿತೋ ಸಂಯತೋ ಭವೇ.

೭೪೮. ಸಿದ್ಧೇ ನಿಪ್ಫನ್ನ ನಿಬ್ಬತ್ತಾ, ದಾರಿತೇ ಭಿನ್ನ ಭೇದಿತಾ;

ಛನ್ನೋ ತು ಛಾದಿತೇ ಚಾಥ, ವಿದ್ಧೇ ಛಿದ್ದಿತ ವೇಧಿತಾ.

೭೪೯. ಆಹಟೋ ಆಭತಾ’ನೀತಾ,

ದನ್ತೋ ತು ದಮಿತೋ ಸಿಯಾ;

ಸನ್ತೋ ತು ಸಮಿತೋ ಚೇವ,

ಪುಣ್ಣೋ ತು ಪೂರಿತೋ ಭವೇ.

೭೫೦. ಅಪಚಾಯಿತೋ ಮಹಿತೋ, ಪೂಜಿತಾ’ರಹಿತೋ’ಚ್ಚಿತೋ;

ಮಾನಿತೋ ಚಾ’ಪಚಿತೋ ಚ, ತಚ್ಛಿತಂ ತುತನೂಕತೇ.

೭೫೧. ಸನ್ತತ್ತೋ ಧೂಪಿತೋ ಚೋಪ,

ಚರಿತೋ ತು ಉಪಾಸಿತೋ;

ಭಟ್ಠಂ ತು ಗಲಿತಂ ಪನ್ನಂ, ಚುತಞ್ಚ ಧಂಸಿತಂ ಭವೇ.

೭೫೨. ಪೀತೋ ಪಮುದಿತೋ ಹಟ್ಠೋ,

ಮತ್ತೋ ತುಟ್ಠೋ ಥ ಕನ್ತಿತೋ;

ಸಞ್ಛಿನ್ನೋ ಲೂನ ದಾತಾ ಥ,

ಪಸತ್ಥೋ ವಣ್ಣಿತೋ ಥುತೋ.

೭೫೩. ತಿನ್ತೋ’ಲ್ಲ’ದ್ದ ಕಿಲಿನ್ನೋ’ನ್ನಾ, ಮಗ್ಗಿತಂ ಪರಿಯೇಸಿತಂ;

ಅನ್ವೇಸಿತಂ ಗವೇಸಿತಂ, ಲದ್ಧಂ ತು ಪತ್ತ ಮುಚ್ಚತೇ.

೭೫೪. ರಕ್ಖಿತಂ ಗೋಪಿತಂ ಗುತ್ತಂ, ತಾತಂ ಗೋಪಾಯಿತಾ’ವಿತಾ;

ಪಾಲಿತಂ ಅಥ ಓಸ್ಸಟ್ಠಂ, ಚತ್ತಂ ಹೀನಂ ಸಮುಜ್ಝಿತಂ.

೭೫೫. ಭಾಸಿತಂ ಲಪಿತಂ ವುತ್ತಾ, ಭಿಹಿತಾ’ಖ್ಯಾತ ಜಪ್ಪಿತಾ;

ಉದೀರಿತಞ್ಚ ಕಥಿತಂ, ಗದಿತಂ ಭಣಿತೋ’ದಿತಾ.