೫. ಗಣ್ಡಸುತ್ತಂ

೧೫. ‘‘ಸೇಯ್ಯಥಾಪಿ, ಭಿಕ್ಖವೇ, ಗಣ್ಡೋ ಅನೇಕವಸ್ಸಗಣಿಕೋ. ತಸ್ಸಸ್ಸು ಗಣ್ಡಸ್ಸ ನವ ವಣಮುಖಾನಿ ನವ ಅಭೇದನಮುಖಾನಿ. ತತೋ ಯಂ ಕಿಞ್ಚಿ ಪಗ್ಘರೇಯ್ಯ – ಅಸುಚಿಯೇವ ಪಗ್ಘರೇಯ್ಯ, ದುಗ್ಗನ್ಧಂಯೇವ ಪಗ್ಘರೇಯ್ಯ, ಜೇಗುಚ್ಛಿಯಂಯೇವ [ಜೇಗುಚ್ಛಿಯೇವ (ಕ.)] ಪಗ್ಘರೇಯ್ಯ; ಯಂ ಕಿಞ್ಚಿ ಪಸವೇಯ್ಯ – ಅಸುಚಿಯೇವ ಪಸವೇಯ್ಯ, ದುಗ್ಗನ್ಧಂಯೇವ ಪಸವೇಯ್ಯ, ಜೇಗುಚ್ಛಿಯಂಯೇವ ಪಸವೇಯ್ಯ.

‘‘ಗಣ್ಡೋತಿ ಖೋ, ಭಿಕ್ಖವೇ, ಇಮಸ್ಸೇತಂ ಚಾತುಮಹಾಭೂತಿಕಸ್ಸ [ಚಾತುಮ್ಮಹಾಭೂತಿಕಸ್ಸ (ಸೀ. ಸ್ಯಾ. ಪೀ.)] ಕಾಯಸ್ಸ ಅಧಿವಚನಂ ಮಾತಾಪೇತ್ತಿಕಸಮ್ಭವಸ್ಸ ಓದನಕುಮ್ಮಾಸೂಪಚಯಸ್ಸ ಅನಿಚ್ಚುಚ್ಛಾದನಪರಿಮದ್ದನಭೇದನವಿದ್ಧಂಸನಧಮ್ಮಸ್ಸ. ತಸ್ಸಸ್ಸು ಗಣ್ಡಸ್ಸ ನವ ವಣಮುಖಾನಿ ನವ ಅಭೇದನಮುಖಾನಿ. ತತೋ ಯಂ ಕಿಞ್ಚಿ ಪಗ್ಘರತಿ – ಅಸುಚಿಯೇವ ಪಗ್ಘರತಿ, ದುಗ್ಗನ್ಧಂಯೇವ ಪಗ್ಘರತಿ, ಜೇಗುಚ್ಛಿಯಂಯೇವ ಪಗ್ಘರತಿ; ಯಂ ಕಿಞ್ಚಿ ಪಸವತಿ – ಅಸುಚಿಯೇವ ಪಸವತಿ, ದುಗ್ಗನ್ಧಂಯೇವ ಪಸವತಿ, ಜೇಗುಚ್ಛಿಯಂಯೇವ ಪಸವತಿ. ತಸ್ಮಾತಿಹ, ಭಿಕ್ಖವೇ, ಇಮಸ್ಮಿಂ ಕಾಯೇ ನಿಬ್ಬಿನ್ದಥಾ’’ತಿ. ಪಞ್ಚಮಂ.