೧೦. ದುತಿಯಇಧಲೋಕಿಕಸುತ್ತಂ

೫೦. ‘‘ಚತೂಹಿ, ಭಿಕ್ಖವೇ, ಧಮ್ಮೇಹಿ ಸಮನ್ನಾಗತೋ ಮಾತುಗಾಮೋ ಇಧಲೋಕವಿಜಯಾಯ ಪಟಿಪನ್ನೋ ಹೋತಿ, ಅಯಂಸ ಲೋಕೋ ಆರದ್ಧೋ ಹೋತಿ. ಕತಮೇಹಿ ಚತೂಹಿ? ಇಧ, ಭಿಕ್ಖವೇ, ಮಾತುಗಾಮೋ ಸುಸಂವಿಹಿತಕಮ್ಮನ್ತೋ ಹೋತಿ, ಸಙ್ಗಹಿತಪರಿಜನೋ, ಭತ್ತು ಮನಾಪಂ ಚರತಿ, ಸಮ್ಭತಂ ಅನುರಕ್ಖತಿ.

‘‘ಕಥಞ್ಚ, ಭಿಕ್ಖವೇ, ಮಾತುಗಾಮೋ ಸುಸಂವಿಹಿತಕಮ್ಮನ್ತೋ ಹೋತಿ? ಇಧ, ಭಿಕ್ಖವೇ, ಮಾತುಗಾಮೋ ಯೇ ತೇ ಭತ್ತು ಅಬ್ಭನ್ತರಾ ಕಮ್ಮನ್ತಾ…ಪೇ… ಏವಂ ಖೋ, ಭಿಕ್ಖವೇ, ಮಾತುಗಾಮೋ ಸುಸಂವಿಹಿತಕಮ್ಮನ್ತೋ ಹೋತಿ.

‘‘ಕಥಞ್ಚ, ಭಿಕ್ಖವೇ, ಮಾತುಗಾಮೋ ಸಙ್ಗಹಿತಪರಿಜನೋ ಹೋತಿ? ಇಧ, ಭಿಕ್ಖವೇ, ಮಾತುಗಾಮೋ ಯೋ ಸೋ ಭತ್ತು ಅಬ್ಭನ್ತರೋ ಅನ್ತೋಜನೋ…ಪೇ… ಏವಂ ಖೋ, ಭಿಕ್ಖವೇ, ಮಾತುಗಾಮೋ ಸಙ್ಗಹಿತಪರಿಜನೋ ಹೋತಿ.

‘‘ಕಥಞ್ಚ, ಭಿಕ್ಖವೇ, ಮಾತುಗಾಮೋ ಭತ್ತು ಮನಾಪಂ ಚರತಿ? ಇಧ, ಭಿಕ್ಖವೇ, ಮಾತುಗಾಮೋ ಯಂ ಭತ್ತು ಅಮನಾಪಸಙ್ಖಾತಂ ತಂ ಜೀವಿತಹೇತುಪಿ ನ ಅಜ್ಝಾಚರತಿ. ಏವಂ ಖೋ, ಭಿಕ್ಖವೇ, ಮಾತುಗಾಮೋ ಭತ್ತು ಮನಾಪಂ ಚರತಿ.

‘‘ಕಥಞ್ಚ, ಭಿಕ್ಖವೇ, ಮಾತುಗಾಮೋ ಸಮ್ಭತಂ ಅನುರಕ್ಖತಿ? ಇಧ, ಭಿಕ್ಖವೇ, ಮಾತುಗಾಮೋ ಯಂ ಭತ್ತಾ ಆಹರತಿ…ಪೇ… ಏವಂ ಖೋ, ಭಿಕ್ಖವೇ, ಮಾತುಗಾಮೋ ಸಮ್ಭತಂ ಅನುರಕ್ಖತಿ. ಇಮೇಹಿ ಖೋ, ಭಿಕ್ಖವೇ, ಚತೂಹಿ ಧಮ್ಮೇಹಿ ಸಮನ್ನಾಗತೋ ಮಾತುಗಾಮೋ ಇಧಲೋಕವಿಜಯಾಯ ಪಟಿಪನ್ನೋ ಹೋತಿ, ಅಯಂಸ ಲೋಕೋ ಆರದ್ಧೋ ಹೋತಿ.

‘‘ಚತೂಹಿ, ಭಿಕ್ಖವೇ, ಧಮ್ಮೇಹಿ ಸಮನ್ನಾಗತೋ ಮಾತುಗಾಮೋ ಪರಲೋಕವಿಜಯಾಯ ಪಟಿಪನ್ನೋ ಹೋತಿ, ಪರಲೋಕೋ ಆರದ್ಧೋ ಹೋತಿ. ಕತಮೇಹಿ ಚತೂಹಿ? ಇಧ, ಭಿಕ್ಖವೇ, ಮಾತುಗಾಮೋ ಸದ್ಧಾಸಮ್ಪನ್ನೋ ಹೋತಿ, ಸೀಲಸಮ್ಪನ್ನೋ ಹೋತಿ, ಚಾಗಸಮ್ಪನ್ನೋ ಹೋತಿ, ಪಞ್ಞಾಸಮ್ಪನ್ನೋ ಹೋತಿ.

‘‘ಕಥಞ್ಚ, ಭಿಕ್ಖವೇ, ಮಾತುಗಾಮೋ ಸದ್ಧಾಸಮ್ಪನ್ನೋ ಹೋತಿ? ಇಧ, ಭಿಕ್ಖವೇ, ಮಾತುಗಾಮೋ ಸದ್ಧೋ ಹೋತಿ…ಪೇ… ಏವಂ ಖೋ, ಭಿಕ್ಖವೇ, ಮಾತುಗಾಮೋ ಸದ್ಧಾಸಮ್ಪನ್ನೋ ಹೋತಿ.

‘‘ಕಥಞ್ಚ, ಭಿಕ್ಖವೇ, ಮಾತುಗಾಮೋ ಸೀಲಸಮ್ಪನ್ನೋ ಹೋತಿ? ಇಧ, ಭಿಕ್ಖವೇ, ಮಾತುಗಾಮೋ ಪಾಣಾತಿಪಾತಾ ಪಟಿವಿರತೋ ಹೋತಿ…ಪೇ… ಸುರಾಮೇರಯಮಜ್ಜಪಮಾದಟ್ಠಾನಾ ಪಟಿವಿರತೋ ಹೋತಿ. ಏವಂ ಖೋ, ಭಿಕ್ಖವೇ, ಮಾತುಗಾಮೋ ಸೀಲಸಮ್ಪನ್ನೋ ಹೋತಿ.

‘‘ಕಥಞ್ಚ, ಭಿಕ್ಖವೇ, ಮಾತುಗಾಮೋ ಚಾಗಸಮ್ಪನ್ನೋ ಹೋತಿ? ಇಧ, ಭಿಕ್ಖವೇ, ಮಾತುಗಾಮೋ ವಿಗತಮಲಮಚ್ಛೇರೇನ ಚೇತಸಾ ಅಗಾರಂ ಅಜ್ಝಾವಸತಿ…ಪೇ… ಏವಂ ಖೋ, ಭಿಕ್ಖವೇ, ಮಾತುಗಾಮೋ ಚಾಗಸಮ್ಪನ್ನೋ ಹೋತಿ.

‘‘ಕಥಞ್ಚ, ಭಿಕ್ಖವೇ, ಮಾತುಗಾಮೋ ಪಞ್ಞಾಸಮ್ಪನ್ನೋ ಹೋತಿ? ಇಧ, ಭಿಕ್ಖವೇ, ಮಾತುಗಾಮೋ ಪಞ್ಞವಾ ಹೋತಿ…ಪೇ… ಏವಂ ಖೋ, ಭಿಕ್ಖವೇ, ಮಾತುಗಾಮೋ ಪಞ್ಞಾಸಮ್ಪನ್ನೋ ಹೋತಿ. ಇಮೇಹಿ ಖೋ, ಭಿಕ್ಖವೇ, ಚತೂಹಿ ಧಮ್ಮೇಹಿ ಸಮನ್ನಾಗತೋ ಮಾತುಗಾಮೋ ಪರಲೋಕವಿಜಯಾಯ ಪಟಿಪನ್ನೋ ಹೋತಿ, ಪರಲೋಕೋ ಆರದ್ಧೋ ಹೋತೀ’’ತಿ.

‘‘ಸುಸಂವಿಹಿತಕಮ್ಮನ್ತಾ, ಸಙ್ಗಹಿತಪರಿಜ್ಜನಾ;

ಭತ್ತು ಮನಾಪಂ ಚರತಿ, ಸಮ್ಭತಂ ಅನುರಕ್ಖತಿ.

‘‘ಸದ್ಧಾ ಸೀಲೇನ ಸಮ್ಪನ್ನಾ, ವದಞ್ಞೂ ವೀತಮಚ್ಛರಾ;

ನಿಚ್ಚಂ ಮಗ್ಗಂ ವಿಸೋಧೇತಿ, ಸೋತ್ಥಾನಂ ಸಮ್ಪರಾಯಿಕಂ.

‘‘ಇಚ್ಚೇತೇ ಅಟ್ಠ ಧಮ್ಮಾ ಚ, ಯಸ್ಸಾ ವಿಜ್ಜನ್ತಿ ನಾರಿಯಾ;

ತಮ್ಪಿ ಸೀಲವತಿಂ ಆಹು, ಧಮ್ಮಟ್ಠಂ ಸಚ್ಚವಾದಿನಿಂ.

‘‘ಸೋಳಸಾಕಾರಸಮ್ಪನ್ನಾ, ಅಟ್ಠಙ್ಗಸುಸಮಾಗತಾ;

ತಾದಿಸೀ ಸೀಲವತೀ ಉಪಾಸಿಕಾ, ಉಪಪಜ್ಜತಿ ದೇವಲೋಕಂ ಮನಾಪ’’ನ್ತಿ. ದಸಮಂ;

ಉಪೋಸಥವಗ್ಗೋ ಪಞ್ಚಮೋ.