೬. ಸಕ್ಕಚ್ಚಸುತ್ತಂ

೭೦. ಅಥ ಖೋ ಆಯಸ್ಮತೋ ಸಾರಿಪುತ್ತಸ್ಸ ರಹೋಗತಸ್ಸ ಪಟಿಸಲ್ಲೀನಸ್ಸ ಏವಂ ಚೇತಸೋ ಪರಿವಿತಕ್ಕೋ ಉದಪಾದಿ – ‘‘ಕಿಂ ನು ಖೋ, ಭಿಕ್ಖು, ಸಕ್ಕತ್ವಾ ಗರುಂ ಕತ್ವಾ ಉಪನಿಸ್ಸಾಯ ವಿಹರನ್ತೋ ಅಕುಸಲಂ ಪಜಹೇಯ್ಯ, ಕುಸಲಂ ಭಾವೇಯ್ಯಾ’’ತಿ? ಅಥ ಖೋ ಆಯಸ್ಮತೋ ಸಾರಿಪುತ್ತಸ್ಸ ಏತದಹೋಸಿ – ‘‘ಸತ್ಥಾರಂ ಖೋ, ಭಿಕ್ಖು, ಸಕ್ಕತ್ವಾ ಗರುಂ ಕತ್ವಾ ಉಪನಿಸ್ಸಾಯ ವಿಹರನ್ತೋ ಅಕುಸಲಂ ಪಜಹೇಯ್ಯ, ಕುಸಲಂ ಭಾವೇಯ್ಯ. ಧಮ್ಮಂ ಖೋ, ಭಿಕ್ಖು…ಪೇ… ಸಙ್ಘಂ ಖೋ, ಭಿಕ್ಖು…ಪೇ… ಸಿಕ್ಖಂ ಖೋ, ಭಿಕ್ಖು…ಪೇ… ಸಮಾಧಿಂ ಖೋ, ಭಿಕ್ಖು…ಪೇ… ಅಪ್ಪಮಾದಂ ಖೋ, ಭಿಕ್ಖು…ಪೇ… ಪಟಿಸನ್ಥಾರಂ ಖೋ, ಭಿಕ್ಖು ಸಕ್ಕತ್ವಾ ಗರುಂ ಕತ್ವಾ ಉಪನಿಸ್ಸಾಯ ವಿಹರನ್ತೋ ಅಕುಸಲಂ ಪಜಹೇಯ್ಯ, ಕುಸಲಂ ಭಾವೇಯ್ಯಾ’’ತಿ.

ಅಥ ಖೋ ಆಯಸ್ಮತೋ ಸಾರಿಪುತ್ತಸ್ಸ ಏತದಹೋಸಿ – ‘‘ಇಮೇ ಖೋ ಮೇ ಧಮ್ಮಾ ಪರಿಸುದ್ಧಾ ಪರಿಯೋದಾತಾ, ಯಂನೂನಾಹಂ ಇಮೇ ಧಮ್ಮೇ ಗನ್ತ್ವಾ [ಗಹೇತ್ವಾ (ಕ.)] ಭಗವತೋ ಆರೋಚೇಯ್ಯಂ. ಏವಂ ಮೇ ಇಮೇ ಧಮ್ಮಾ ಪರಿಸುದ್ಧಾ ಚೇವ ಭವಿಸ್ಸನ್ತಿ ಪರಿಸುದ್ಧಸಙ್ಖಾತತರಾ ಚ. ಸೇಯ್ಯಥಾಪಿ ನಾಮ ಪುರಿಸೋ ಸುವಣ್ಣನಿಕ್ಖಂ ಅಧಿಗಚ್ಛೇಯ್ಯ ಪರಿಸುದ್ಧಂ ಪರಿಯೋದಾತಂ. ತಸ್ಸ ಏವಮಸ್ಸ – ‘ಅಯಂ ಖೋ ಮೇ ಸುವಣ್ಣನಿಕ್ಖೋ ಪರಿಸುದ್ಧೋ ಪರಿಯೋದಾತೋ, ಯಂನೂನಾಹಂ ಇಮಂ ಸುವಣ್ಣನಿಕ್ಖಂ ಗನ್ತ್ವಾ [ಗಹೇತ್ವಾ (ಕ.)] ಕಮ್ಮಾರಾನಂ ದಸ್ಸೇಯ್ಯಂ. ಏವಂ ಮೇ ಅಯಂ ಸುವಣ್ಣನಿಕ್ಖೋ ಸಕಮ್ಮಾರಗತೋ ಪರಿಸುದ್ಧೋ ಚೇವ ಭವಿಸ್ಸತಿ ಪರಿಸುದ್ಧಸಙ್ಖಾತತರೋ ಚ. ಏವಮೇವಂ [ಖೋ (ಕ.)] ಮೇ ಇಮೇ ಧಮ್ಮಾ ಪರಿಸುದ್ಧಾ ಪರಿಯೋದಾತಾ, ಯಂನೂನಾಹಂ ಇಮೇ ಧಮ್ಮೇ ಗನ್ತ್ವಾ [ಗಹೇತ್ವಾ (ಕ.)] ಭಗವತೋ ಆರೋಚೇಯ್ಯಂ. ಏವಂ ಮೇ ಇಮೇ ಧಮ್ಮಾ ಪರಿಸುದ್ಧಾ ಚೇವ ಭವಿಸ್ಸನ್ತಿ ಪರಿಸುದ್ಧಸಙ್ಖಾತತರಾ ಚಾ’’’ತಿ.

ಅಥ ಖೋ ಆಯಸ್ಮಾ ಸಾರಿಪುತ್ತೋ ಸಾಯನ್ಹಸಮಯಂ ಪಟಿಸಲ್ಲಾನಾ ವುಟ್ಠಿತೋ ಯೇನ ಭಗವಾ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿ. ಏಕಮನ್ತಂ ನಿಸಿನ್ನೋ ಖೋ ಆಯಸ್ಮಾ ಸಾರಿಪುತ್ತೋ ಭಗವನ್ತಂ ಏತದವೋಚ –

‘‘ಇಧ ಮಯ್ಹಂ, ಭನ್ತೇ, ರಹೋಗತಸ್ಸ ಪಟಿಸಲ್ಲೀನಸ್ಸ ಏವಂ ಚೇತಸೋ ಪರಿವಿತಕ್ಕೋ ಉದಪಾದಿ – ‘ಕಿಂ ನು ಖೋ, ಭಿಕ್ಖು, ಸಕ್ಕತ್ವಾ ಗರುಂ ಕತ್ವಾ ಉಪನಿಸ್ಸಾಯ ವಿಹರನ್ತೋ ಅಕುಸಲಂ ಪಜಹೇಯ್ಯ, ಕುಸಲಂ ಭಾವೇಯ್ಯಾ’ತಿ? ಅಥ ಖೋ ತಸ್ಸ ಮಯ್ಹಂ, ಭನ್ತೇ, ಏತದಹೋಸಿ – ‘ಸತ್ಥಾರಂ ಖೋ, ಭಿಕ್ಖು, ಸಕ್ಕತ್ವಾ ಗರುಂ ಕತ್ವಾ ಉಪನಿಸ್ಸಾಯ ವಿಹರನ್ತೋ ಅಕುಸಲಂ ಪಜಹೇಯ್ಯ, ಕುಸಲಂ ಭಾವೇಯ್ಯ. ಧಮ್ಮಂ ಖೋ, ಭಿಕ್ಖು …ಪೇ… ಪಟಿಸನ್ಥಾರಂ ಖೋ, ಭಿಕ್ಖು ಸಕ್ಕತ್ವಾ…ಪೇ… ಕುಸಲಂ ಭಾವೇಯ್ಯಾ’ತಿ. ಅಥ ಖೋ ತಸ್ಸ ಮಯ್ಹಂ, ಭನ್ತೇ, ಏತದಹೋಸಿ – ‘ಇಮೇ ಖೋ ಮೇ ಧಮ್ಮಾ ಪರಿಸುದ್ಧಾ ಪರಿಯೋದಾತಾ, ಯಂನೂನಾಹಂ ಇಮೇ ಧಮ್ಮೇ ಗನ್ತ್ವಾ ಭಗವತೋ ಆರೋಚೇಯ್ಯಂ. ಏವಂ ಮೇ ಇಮೇ ಧಮ್ಮಾ ಪರಿಸುದ್ಧಾ ಚೇವ ಭವಿಸ್ಸನ್ತಿ ಪರಿಸುದ್ಧಸಙ್ಖಾತತರಾ ಚ. ಸೇಯ್ಯಥಾಪಿ ನಾಮ ಪುರಿಸೋ ಸುವಣ್ಣನಿಕ್ಖಂ ಅಧಿಗಚ್ಛೇಯ್ಯ ಪರಿಸುದ್ಧಂ ಪರಿಯೋದಾತಂ. ತಸ್ಸ ಏವಮಸ್ಸ – ಅಯಂ ಖೋ ಮೇ ಸುವಣ್ಣನಿಕ್ಖೋ ಪರಿಸುದ್ಧೋ ಪರಿಯೋದಾತೋ, ಯಂನೂನಾಹಂ ಇಮಂ ಸುವಣ್ಣನಿಕ್ಖಂ ಗನ್ತ್ವಾ ಕಮ್ಮಾರಾನಂ ದಸ್ಸೇಯ್ಯಂ. ಏವಂ ಮೇ ಅಯಂ ಸುವಣ್ಣನಿಕ್ಖೋ ಸಕಮ್ಮಾರಗತೋ ಪರಿಸುದ್ಧೋ ಚೇವ ಭವಿಸ್ಸತಿ ಪರಿಸುದ್ಧಸಙ್ಖಾತತರೋ ಚ. ಏವಮೇವಂ ಮೇ ಇಮೇ ಧಮ್ಮಾ ಪರಿಸುದ್ಧಾ ಪರಿಯೋದಾತಾ, ಯಂನೂನಾಹಂ ಇಮೇ ಧಮ್ಮೇ ಗನ್ತ್ವಾ ಭಗವತೋ ಆರೋಚೇಯ್ಯಂ. ಏವಂ ಮೇ ಇಮೇ ಧಮ್ಮಾ ಪರಿಸುದ್ಧಾ ಚೇವ ಭವಿಸ್ಸನ್ತಿ ಪರಿಸುದ್ಧಸಙ್ಖಾತತರಾ ಚಾ’’’ತಿ.

‘‘ಸಾಧು ಸಾಧು, ಸಾರಿಪುತ್ತ! ಸತ್ಥಾರಂ ಖೋ, ಸಾರಿಪುತ್ತ, ಭಿಕ್ಖು ಸಕ್ಕತ್ವಾ ಗರುಂ ಕತ್ವಾ ಉಪನಿಸ್ಸಾಯ ವಿಹರನ್ತೋ ಅಕುಸಲಂ ಪಜಹೇಯ್ಯ, ಕುಸಲಂ ಭಾವೇಯ್ಯ. ಧಮ್ಮಂ ಖೋ, ಸಾರಿಪುತ್ತ, ಭಿಕ್ಖು ಸಕ್ಕತ್ವಾ ಗರುಂ ಕತ್ವಾ ಉಪನಿಸ್ಸಾಯ ವಿಹರನ್ತೋ ಅಕುಸಲಂ ಪಜಹೇಯ್ಯ, ಕುಸಲಂ ಭಾವೇಯ್ಯ. ಸಙ್ಘಂ ಖೋ…ಪೇ… ಸಿಕ್ಖಂ ಖೋ… ಸಮಾಧಿಂ ಖೋ… ಅಪ್ಪಮಾದಂ ಖೋ… ಪಟಿಸನ್ಥಾರಂ ಖೋ, ಸಾರಿಪುತ್ತ, ಭಿಕ್ಖು ಸಕ್ಕತ್ವಾ ಗರುಂ ಕತ್ವಾ ಉಪನಿಸ್ಸಾಯ ವಿಹರನ್ತೋ ಅಕುಸಲಂ ಪಜಹೇಯ್ಯ, ಕುಸಲಂ ಭಾವೇಯ್ಯಾ’’ತಿ.

ಏವಂ ವುತ್ತೇ ಆಯಸ್ಮಾ ಸಾರಿಪುತ್ತೋ ಭಗವನ್ತಂ ಏತದವೋಚ – ‘‘ಇಮಸ್ಸ ಖೋ ಅಹಂ, ಭನ್ತೇ, ಭಗವತಾ ಸಂಖಿತ್ತೇನ ಭಾಸಿತಸ್ಸ ಏವಂ ವಿತ್ಥಾರೇನ ಅತ್ಥಂ ಆಜಾನಾಮಿ. ಸೋ ವತ, ಭನ್ತೇ, ಭಿಕ್ಖು ಸತ್ಥರಿ ಅಗಾರವೋ ಧಮ್ಮೇ ಸಗಾರವೋ ಭವಿಸ್ಸತೀತಿ ನೇತಂ ಠಾನಂ ವಿಜ್ಜತಿ. ಯೋ ಸೋ, ಭನ್ತೇ, ಭಿಕ್ಖು ಸತ್ಥರಿ ಅಗಾರವೋ ಧಮ್ಮೇಪಿ ಸೋ ಅಗಾರವೋ’’.

‘‘ಸೋ ವತ, ಭನ್ತೇ, ಭಿಕ್ಖು ಸತ್ಥರಿ ಅಗಾರವೋ ಧಮ್ಮೇ ಅಗಾರವೋ ಸಙ್ಘೇ ಸಗಾರವೋ ಭವಿಸ್ಸತೀತಿ ನೇತಂ ಠಾನಂ ವಿಜ್ಜತಿ. ಯೋ ಸೋ, ಭನ್ತೇ, ಭಿಕ್ಖು ಸತ್ಥರಿ ಅಗಾರವೋ ಧಮ್ಮೇ ಅಗಾರವೋ ಸಙ್ಘೇಪಿ ಸೋ ಅಗಾರವೋ.

‘‘ಸೋ ವತ, ಭನ್ತೇ, ಭಿಕ್ಖು ಸತ್ಥರಿ ಅಗಾರವೋ ಧಮ್ಮೇ ಅಗಾರವೋ ಸಙ್ಘೇ ಅಗಾರವೋ ಸಿಕ್ಖಾಯ ಸಗಾರವೋ ಭವಿಸ್ಸತೀತಿ ನೇತಂ ಠಾನಂ ವಿಜ್ಜತಿ. ಯೋ ಸೋ, ಭನ್ತೇ, ಭಿಕ್ಖು ಸತ್ಥರಿ ಅಗಾರವೋ ಧಮ್ಮೇ ಅಗಾರವೋ ಸಙ್ಘೇ ಅಗಾರವೋ ಸಿಕ್ಖಾಯಪಿ ಸೋ ಅಗಾರವೋ.

‘‘ಸೋ ವತ, ಭನ್ತೇ, ಭಿಕ್ಖು ಸತ್ಥರಿ ಅಗಾರವೋ ಧಮ್ಮೇ ಅಗಾರವೋ ಸಙ್ಘೇ ಅಗಾರವೋ ಸಿಕ್ಖಾಯ ಅಗಾರವೋ ಸಮಾಧಿಸ್ಮಿಂ ಸಗಾರವೋ ಭವಿಸ್ಸತೀತಿ ನೇತಂ ಠಾನಂ ವಿಜ್ಜತಿ. ಯೋ ಸೋ, ಭನ್ತೇ, ಭಿಕ್ಖು ಸತ್ಥರಿ ಅಗಾರವೋ ಧಮ್ಮೇ ಅಗಾರವೋ ಸಙ್ಘೇ ಅಗಾರವೋ ಸಿಕ್ಖಾಯ ಅಗಾರವೋ ಸಮಾಧಿಸ್ಮಿಮ್ಪಿ ಸೋ ಅಗಾರವೋ.

‘‘ಸೋ ವತ, ಭನ್ತೇ, ಭಿಕ್ಖು ಸತ್ಥರಿ ಅಗಾರವೋ ಧಮ್ಮೇ ಅಗಾರವೋ ಸಙ್ಘೇ ಅಗಾರವೋ ಸಿಕ್ಖಾಯ ಅಗಾರವೋ ಸಮಾಧಿಸ್ಮಿಂ ಅಗಾರವೋ ಅಪ್ಪಮಾದೇ ಸಗಾರವೋ ಭವಿಸ್ಸತೀತಿ ನೇತಂ ಠಾನಂ ವಿಜ್ಜತಿ. ಯೋ ಸೋ, ಭನ್ತೇ, ಭಿಕ್ಖು ಸತ್ಥರಿ ಅಗಾರವೋ ಧಮ್ಮೇ ಅಗಾರವೋ ಸಙ್ಘೇ ಅಗಾರವೋ ಸಿಕ್ಖಾಯ ಅಗಾರವೋ ಸಮಾಧಿಸ್ಮಿಂ ಅಗಾರವೋ ಅಪ್ಪಮಾದೇಪಿ ಸೋ ಅಗಾರವೋ.

‘‘ಸೋ ವತ, ಭನ್ತೇ, ಭಿಕ್ಖು ಸತ್ಥರಿ ಅಗಾರವೋ ಧಮ್ಮೇ ಅಗಾರವೋ ಸಙ್ಘೇ ಅಗಾರವೋ ಸಿಕ್ಖಾಯ ಅಗಾರವೋ ಸಮಾಧಿಸ್ಮಿಂ ಅಗಾರವೋ ಅಪ್ಪಮಾದೇ ಅಗಾರವೋ ಪಟಿಸನ್ಥಾರೇ ಸಗಾರವೋ ಭವಿಸ್ಸತೀತಿ ನೇತಂ ಠಾನಂ ವಿಜ್ಜತಿ. ಯೋ ಸೋ, ಭನ್ತೇ, ಭಿಕ್ಖು ಸತ್ಥರಿ ಅಗಾರವೋ…ಪೇ… ಅಪ್ಪಮಾದೇ ಅಗಾರವೋ ಪಟಿಸನ್ಥಾರೇಪಿ ಸೋ ಅಗಾರವೋ.

‘‘ಸೋ ವತ, ಭನ್ತೇ, ಭಿಕ್ಖು ಸತ್ಥರಿ ಸಗಾರವೋ ಧಮ್ಮೇ ಅಗಾರವೋ ಭವಿಸ್ಸತೀತಿ ನೇತಂ ಠಾನಂ ವಿಜ್ಜತಿ. ಯೋ ಸೋ, ಭನ್ತೇ, ಭಿಕ್ಖು ಸತ್ಥರಿ ಸಗಾರವೋ ಧಮ್ಮೇಪಿ ಸೋ ಸಗಾರವೋ…ಪೇ….

‘‘ಸೋ ವತ, ಭನ್ತೇ, ಭಿಕ್ಖು ಸತ್ಥರಿ ಸಗಾರವೋ…ಪೇ. … ಅಪ್ಪಮಾದೇ ಸಗಾರವೋ ಪಟಿಸನ್ಥಾರೇ ಅಗಾರವೋ ಭವಿಸ್ಸತೀತಿ ನೇತಂ ಠಾನಂ ವಿಜ್ಜತಿ. ಯೋ ಸೋ, ಭನ್ತೇ, ಭಿಕ್ಖು ಸತ್ಥರಿ ಸಗಾರವೋ…ಪೇ… ಅಪ್ಪಮಾದೇ ಸಗಾರವೋ ಪಟಿಸನ್ಥಾರೇಪಿ ಸೋ ಸಗಾರವೋ.

‘‘ಸೋ ವತ, ಭನ್ತೇ, ಭಿಕ್ಖು ಸತ್ಥರಿ ಸಗಾರವೋ ಧಮ್ಮೇಪಿ ಸಗಾರವೋ ಭವಿಸ್ಸತೀತಿ ಠಾನಮೇತಂ ವಿಜ್ಜತಿ. ಯೋ ಸೋ, ಭನ್ತೇ, ಭಿಕ್ಖು ಸತ್ಥರಿ ಸಗಾರವೋ ಧಮ್ಮೇಪಿ ಸೋ ಸಗಾರವೋ…ಪೇ….

‘‘ಸೋ ವತ, ಭನ್ತೇ, ಭಿಕ್ಖು ಸತ್ಥರಿ ಸಗಾರವೋ…ಪೇ… ಅಪ್ಪಮಾದೇ ಸಗಾರವೋ ಪಟಿಸನ್ಥಾರೇಪಿ ಸಗಾರವೋ ಭವಿಸ್ಸತೀತಿ ಠಾನಮೇತಂ ವಿಜ್ಜತಿ. ಯೋ ಸೋ, ಭನ್ತೇ, ಭಿಕ್ಖು ಸತ್ಥರಿ ಸಗಾರವೋ ಧಮ್ಮೇ ಸಗಾರವೋ ಸಙ್ಘೇ ಸಗಾರವೋ ಸಿಕ್ಖಾಯ ಸಗಾರವೋ ಸಮಾಧಿಸ್ಮಿಂ ಸಗಾರವೋ ಅಪ್ಪಮಾದೇ ಸಗಾರವೋ ಪಟಿಸನ್ಥಾರೇಪಿ ಸೋ ಸಗಾರವೋ’’ತಿ.

‘‘ಇಮಸ್ಸ ಖೋ ಅಹಂ, ಭನ್ತೇ, ಭಗವತಾ ಸಂಖಿತ್ತೇನ ಭಾಸಿತಸ್ಸ ಏವಂ ವಿತ್ಥಾರೇನ ಅತ್ಥಂ ಆಜಾನಾಮೀ’’ತಿ.

‘‘ಸಾಧು ಸಾಧು, ಸಾರಿಪುತ್ತ! ಸಾಧು ಖೋ ತ್ವಂ, ಸಾರಿಪುತ್ತ, ಇಮಸ್ಸ ಮಯಾ ಸಂಖಿತ್ತೇನ ಭಾಸಿತಸ್ಸ ಏವಂ ವಿತ್ಥಾರೇನ ಅತ್ಥಂ ಆಜಾನಾಸಿ. ಸೋ ವತ, ಸಾರಿಪುತ್ತ, ಭಿಕ್ಖು ಸತ್ಥರಿ ಅಗಾರವೋ ಧಮ್ಮೇ ಸಗಾರವೋ ಭವಿಸ್ಸತೀತಿ ನೇತಂ ಠಾನಂ ವಿಜ್ಜತಿ…ಪೇ… ಯೋ ಸೋ, ಸಾರಿಪುತ್ತ, ಭಿಕ್ಖು ಸತ್ಥರಿ ಅಗಾರವೋ ಧಮ್ಮೇ ಅಗಾರವೋ ಸಙ್ಘೇ ಅಗಾರವೋ ಸಿಕ್ಖಾಯ ಅಗಾರವೋ ಸಮಾಧಿಸ್ಮಿಂ ಅಗಾರವೋ ಅಪ್ಪಮಾದೇಪಿ ಸೋ ಅಗಾರವೋ.

‘‘ಸೋ ವತ, ಸಾರಿಪುತ್ತ, ಭಿಕ್ಖು ಸತ್ಥರಿ ಅಗಾರವೋ ಧಮ್ಮೇ ಅಗಾರವೋ ಸಙ್ಘೇ ಅಗಾರವೋ ಸಿಕ್ಖಾಯ ಅಗಾರವೋ ಸಮಾಧಿಸ್ಮಿಂ ಅಗಾರವೋ ಅಪ್ಪಮಾದೇ ಅಗಾರವೋ ಪಟಿಸನ್ಥಾರೇ ಸಗಾರವೋ ಭವಿಸ್ಸತೀತಿ ನೇತಂ ಠಾನಂ ವಿಜ್ಜತಿ. ಯೋ ಸೋ, ಸಾರಿಪುತ್ತ, ಭಿಕ್ಖು ಸತ್ಥರಿ ಅಗಾರವೋ ಧಮ್ಮೇ ಅಗಾರವೋ ಸಙ್ಘೇ ಅಗಾರವೋ ಸಿಕ್ಖಾಯ ಅಗಾರವೋ ಸಮಾಧಿಸ್ಮಿಂ ಅಗಾರವೋ ಅಪ್ಪಮಾದೇ ಅಗಾರವೋ ಪಟಿಸನ್ಥಾರೇಪಿ ಸೋ ಅಗಾರವೋ.

‘‘ಸೋ ವತ, ಸಾರಿಪುತ್ತ, ಭಿಕ್ಖು ಸತ್ಥರಿ ಸಗಾರವೋ ಧಮ್ಮೇ ಅಗಾರವೋ ಭವಿಸ್ಸತೀತಿ ನೇತಂ ಠಾನಂ ವಿಜ್ಜತಿ…ಪೇ… ಯೋ ಸೋ, ಸಾರಿಪುತ್ತ, ಭಿಕ್ಖು ಸತ್ಥರಿ ಸಗಾರವೋ ಧಮ್ಮೇಪಿ ಸೋ ಸಗಾರವೋ …ಪೇ….

‘‘ಸೋ ವತ, ಸಾರಿಪುತ್ತ, ಭಿಕ್ಖು ಸತ್ಥರಿ ಸಗಾರವೋ ಧಮ್ಮೇ ಸಗಾರವೋ…ಪೇ… ಅಪ್ಪಮಾದೇ ಸಗಾರವೋ ಪಟಿಸನ್ಥಾರೇ ಅಗಾರವೋ ಭವಿಸ್ಸತೀತಿ ನೇತಂ ಠಾನಂ ವಿಜ್ಜತಿ. ಯೋ ಸೋ, ಸಾರಿಪುತ್ತ, ಭಿಕ್ಖು ಸತ್ಥರಿ ಸಗಾರವೋ…ಪೇ… ಅಪ್ಪಮಾದೇ ಸಗಾರವೋ ಪಟಿಸನ್ಥಾರೇಪಿ ಸೋ ಸಗಾರವೋ.

‘‘ಸೋ ವತ, ಸಾರಿಪುತ್ತ, ಭಿಕ್ಖು ಸತ್ಥರಿ ಸಗಾರವೋ ಧಮ್ಮೇಪಿ ಸಗಾರವೋ ಭವಿಸ್ಸತೀತಿ ಠಾನಮೇತಂ ವಿಜ್ಜತಿ. ಯೋ ಸೋ, ಸಾರಿಪುತ್ತ, ಭಿಕ್ಖು ಸತ್ಥರಿ ಸಗಾರವೋ ಧಮ್ಮೇಪಿ ಸೋ ಸಗಾರವೋ…ಪೇ….

‘‘ಸೋ ವತ, ಸಾರಿಪುತ್ತ, ಭಿಕ್ಖು ಸತ್ಥರಿ ಸಗಾರವೋ…ಪೇ… ಅಪ್ಪಮಾದೇ ಸಗಾರವೋ ಪಟಿಸನ್ಥಾರೇಪಿ ಸೋ ಸಗಾರವೋ ಭವಿಸ್ಸತೀತಿ ಠಾನಮೇತಂ ವಿಜ್ಜತಿ. ಯೋ ಸೋ, ಸಾರಿಪುತ್ತ, ಭಿಕ್ಖು ಸತ್ಥರಿ ಸಗಾರವೋ…ಪೇ… ಅಪ್ಪಮಾದೇ ಸಗಾರವೋ ಪಟಿಸನ್ಥಾರೇಪಿ ಸೋ ಸಗಾರವೋ’’ತಿ.

‘‘ಇಮಸ್ಸ ಖೋ, ಸಾರಿಪುತ್ತ, ಮಯಾ ಸಂಖಿತ್ತೇನ ಭಾಸಿತಸ್ಸ ಏವಂ ವಿತ್ಥಾರೇನ ಅತ್ಥೋ ದಟ್ಠಬ್ಬೋ’’ತಿ. ಛಟ್ಠಂ.