೨. ಸತ್ತಸೂರಿಯಸುತ್ತಂ

೬೬. ಏವಂ ಮೇ ಸುತಂ – ಏಕಂ ಸಮಯಂ ಭಗವಾ ವೇಸಾಲಿಯಂ ವಿಹರತಿ ಅಮ್ಬಪಾಲಿವನೇ. ತತ್ರ ಖೋ ಭಗವಾ ಭಿಕ್ಖೂ ಆಮನ್ತೇಸಿ – ‘‘ಭಿಕ್ಖವೋ’’ತಿ. ‘‘ಭದನ್ತೇ’’ತಿ ತೇ ಭಿಕ್ಖೂ ಭಗವತೋ ಪಚ್ಚಸ್ಸೋಸುಂ. ಭಗವಾ ಏತದವೋಚ –

‘‘ಅನಿಚ್ಚಾ, ಭಿಕ್ಖವೇ, ಸಙ್ಖಾರಾ; ಅಧುವಾ, ಭಿಕ್ಖವೇ, ಸಙ್ಖಾರಾ; ಅನಸ್ಸಾಸಿಕಾ, ಭಿಕ್ಖವೇ, ಸಙ್ಖಾರಾ. ಯಾವಞ್ಚಿದಂ, ಭಿಕ್ಖವೇ, ಅಲಮೇವ ಸಬ್ಬಸಙ್ಖಾರೇಸು ನಿಬ್ಬಿನ್ದಿತುಂ ಅಲಂ ವಿರಜ್ಜಿತುಂ ಅಲಂ ವಿಮುಚ್ಚಿತುಂ.

‘‘ಸಿನೇರು, ಭಿಕ್ಖವೇ, ಪಬ್ಬತರಾಜಾ ಚತುರಾಸೀತಿಯೋಜನಸಹಸ್ಸಾನಿ ಆಯಾಮೇನ, ಚತುರಾಸೀತಿಯೋಜನಸಹಸ್ಸಾನಿ ವಿತ್ಥಾರೇನ, ಚತುರಾಸೀತಿಯೋಜನಸಹಸ್ಸಾನಿ ಮಹಾಸಮುದ್ದೇ ಅಜ್ಝೋಗಾಳ್ಹೋ, ಚತುರಾಸೀತಿಯೋಜನಸಹಸ್ಸಾನಿ ಮಹಾಸಮುದ್ದಾ ಅಚ್ಚುಗ್ಗತೋ. ಹೋತಿ ಖೋ ಸೋ, ಭಿಕ್ಖವೇ, ಸಮಯೋ ಯಂ ಕದಾಚಿ ಕರಹಚಿ ದೀಘಸ್ಸ ಅದ್ಧುನೋ ಅಚ್ಚಯೇನ ಬಹೂನಿ ವಸ್ಸಾನಿ ಬಹೂನಿ ವಸ್ಸಸತಾನಿ ಬಹೂನಿ ವಸ್ಸಸಹಸ್ಸಾನಿ ಬಹೂನಿ ವಸ್ಸಸತಸಹಸ್ಸಾನಿ ದೇವೋ ನ ವಸ್ಸತಿ. ದೇವೇ ಖೋ ಪನ, ಭಿಕ್ಖವೇ, ಅವಸ್ಸನ್ತೇ ಯೇ ಕೇಚಿಮೇ ಬೀಜಗಾಮಭೂತಗಾಮಾ ಓಸಧಿತಿಣವನಪ್ಪತಯೋ ತೇ ಉಸ್ಸುಸ್ಸನ್ತಿ ವಿಸುಸ್ಸನ್ತಿ, ನ ಭವನ್ತಿ. ಏವಂ ಅನಿಚ್ಚಾ, ಭಿಕ್ಖವೇ, ಸಙ್ಖಾರಾ; ಏವಂ ಅಧುವಾ, ಭಿಕ್ಖವೇ, ಸಙ್ಖಾರಾ…ಪೇ… ಅಲಂ ವಿಮುಚ್ಚಿತುಂ.

‘‘ಹೋತಿ ಖೋ ಸೋ, ಭಿಕ್ಖವೇ, ಸಮಯೋ ಯಂ ಕದಾಚಿ ಕರಹಚಿ ದೀಘಸ್ಸ ಅದ್ಧುನೋ ಅಚ್ಚಯೇನ ದುತಿಯೋ ಸೂರಿಯೋ ಪಾತುಭವತಿ. ದುತಿಯಸ್ಸ, ಭಿಕ್ಖವೇ, ಸೂರಿಯಸ್ಸ ಪಾತುಭಾವಾ ಯಾ ಕಾಚಿ ಕುನ್ನದಿಯೋ ಕುಸೋಬ್ಭಾ [ಕುಸ್ಸುಬ್ಭೋ (ಸೀ.), ಕುಸ್ಸೋಬ್ಭಾ (ಸ್ಯಾ.)] ತಾ ಉಸ್ಸುಸ್ಸನ್ತಿ ವಿಸುಸ್ಸನ್ತಿ, ನ ಭವನ್ತಿ. ಏವಂ ಅನಿಚ್ಚಾ, ಭಿಕ್ಖವೇ, ಸಙ್ಖಾರಾ…ಪೇ… ಅಲಂ ವಿಮುಚ್ಚಿತುಂ.

‘‘ಹೋತಿ ಖೋ ಸೋ, ಭಿಕ್ಖವೇ, ಸಮಯೋ ಯಂ ಕದಾಚಿ ಕರಹಚಿ ದೀಘಸ್ಸ ಅದ್ಧುನೋ ಅಚ್ಚಯೇನ ತತಿಯೋ ಸೂರಿಯೋ ಪಾತುಭವತಿ. ತತಿಯಸ್ಸ, ಭಿಕ್ಖವೇ, ಸೂರಿಯಸ್ಸ ಪಾತುಭಾವಾ ಯಾ ಕಾಚಿ ಮಹಾನದಿಯೋ, ಸೇಯ್ಯಥಿದಂ – ಗಙ್ಗಾ, ಯಮುನಾ, ಅಚಿರವತೀ, ಸರಭೂ, ಮಹೀ, ತಾ ಉಸ್ಸುಸ್ಸನ್ತಿ ವಿಸುಸ್ಸನ್ತಿ, ನ ಭವನ್ತಿ. ಏವಂ ಅನಿಚ್ಚಾ, ಭಿಕ್ಖವೇ, ಸಙ್ಖಾರಾ…ಪೇ… ಅಲಂ ವಿಮುಚ್ಚಿತುಂ.

‘‘ಹೋತಿ ಖೋ ಸೋ, ಭಿಕ್ಖವೇ, ಸಮಯೋ ಯಂ ಕದಾಚಿ ಕರಹಚಿ ದೀಘಸ್ಸ ಅದ್ಧುನೋ ಅಚ್ಚಯೇನ ಚತುತ್ಥೋ ಸೂರಿಯೋ ಪಾತುಭವತಿ. ಚತುತ್ಥಸ್ಸ, ಭಿಕ್ಖವೇ, ಸೂರಿಯಸ್ಸ ಪಾತುಭಾವಾ ಯೇ ತೇ ಮಹಾಸರಾ ಯತೋ ಇಮಾ ಮಹಾನದಿಯೋ ಪವತ್ತನ್ತಿ, ಸೇಯ್ಯಥಿದಂ – ಅನೋತತ್ತಾ, ಸೀಹಪಪಾತಾ, ರಥಕಾರಾ, ಕಣ್ಣಮುಣ್ಡಾ, ಕುಣಾಲಾ, ಛದ್ದನ್ತಾ, ಮನ್ದಾಕಿನಿಯಾ, ತಾ ಉಸ್ಸುಸ್ಸನ್ತಿ ವಿಸುಸ್ಸನ್ತಿ, ನ ಭವನ್ತಿ. ಏವಂ ಅನಿಚ್ಚಾ, ಭಿಕ್ಖವೇ, ಸಙ್ಖಾರಾ…ಪೇ… ಅಲಂ ವಿಮುಚ್ಚಿತುಂ.

‘‘ಹೋತಿ ಖೋ ಸೋ, ಭಿಕ್ಖವೇ, ಸಮಯೋ ಯಂ ಕದಾಚಿ ಕರಹಚಿ ದೀಘಸ್ಸ ಅದ್ಧುನೋ ಅಚ್ಚಯೇನ ಪಞ್ಚಮೋ ಸೂರಿಯೋ ಪಾತುಭವತಿ. ಪಞ್ಚಮಸ್ಸ, ಭಿಕ್ಖವೇ, ಸೂರಿಯಸ್ಸ ಪಾತುಭಾವಾ ಯೋಜನಸತಿಕಾನಿಪಿ ಮಹಾಸಮುದ್ದೇ ಉದಕಾನಿ ಓಗಚ್ಛನ್ತಿ, ದ್ವಿಯೋಜನಸತಿಕಾನಿಪಿ ಮಹಾಸಮುದ್ದೇ ಉದಕಾನಿ ಓಗಚ್ಛನ್ತಿ, ತಿಯೋಜನಸತಿಕಾನಿಪಿ, ಚತುಯೋಜನಸತಿಕಾನಿಪಿ, ಪಞ್ಚಯೋಜನಸತಿಕಾನಿಪಿ, ಛಯೋಜನಸತಿಕಾನಿಪಿ, ಸತ್ತಯೋಜನಸತಿಕಾನಿಪಿ ಮಹಾಸಮುದ್ದೇ ಉದಕಾನಿ ಓಗಚ್ಛನ್ತಿ; ಸತ್ತತಾಲಮ್ಪಿ ಮಹಾಸಮುದ್ದೇ ಉದಕಂ ಸಣ್ಠಾತಿ, ಛತಾಲಮ್ಪಿ, ಪಞ್ಚತಾಲಮ್ಪಿ, ಚತುತಾಲಮ್ಪಿ, ತಿತಾಲಮ್ಪಿ, ದ್ವಿತಾಲಮ್ಪಿ, ತಾಲಮತ್ತಮ್ಪಿ ಮಹಾಸಮುದ್ದೇ ಉದಕಂ ಸಣ್ಠಾತಿ; ಸತ್ತಪೋರಿಸಮ್ಪಿ ಮಹಾಸಮುದ್ದೇ ಉದಕಂ ಸಣ್ಠಾತಿ, ಛಪೋರಿಸಮ್ಪಿ, ಪಞ್ಚಪೋರಿಸಮ್ಪಿ, ಚತುಪೋರಿಸಮ್ಪಿ, ತಿಪೋರಿಸಮ್ಪಿ, ದ್ವಿಪೋರಿಸಮ್ಪಿ, ಪೋರಿಸಮ್ಪಿ [ಪೋರಿಸಮತ್ತಮ್ಪಿ (ಸ್ಯಾ.)], ಅಡ್ಢಪೋರಿಸಮ್ಪಿ, ಕಟಿಮತ್ತಮ್ಪಿ, ಜಣ್ಣುಕಾಮತ್ತಮ್ಪಿ, ಗೋಪ್ಫಕಮತ್ತಮ್ಪಿ ಮಹಾಸಮುದ್ದೇ ಉದಕಂ ಸಣ್ಠಾತಿ. ಸೇಯ್ಯಥಾಪಿ, ಭಿಕ್ಖವೇ, ಸರದಸಮಯೇ ಥುಲ್ಲಫುಸಿತಕೇ ದೇವೇ ವಸ್ಸನ್ತೇ ತತ್ಥ ತತ್ಥ ಗೋಪದೇಸು [ಗೋಪ್ಫಕಪದೇಸೇಸು (ಕ.)] ಉದಕಾನಿ ಠಿತಾನಿ ಹೋನ್ತಿ; ಏವಮೇವಂ ಖೋ, ಭಿಕ್ಖವೇ, ತತ್ಥ ತತ್ಥ ಗೋಪ್ಫಕಮತ್ತಾನಿ [ಗೋಪದಮತ್ತಾನಿ (ಸೀ. ಸ್ಯಾ.)] ಮಹಾಸಮುದ್ದೇ ಉದಕಾನಿ ಠಿತಾನಿ ಹೋನ್ತಿ. ಪಞ್ಚಮಸ್ಸ, ಭಿಕ್ಖವೇ, ಸೂರಿಯಸ್ಸ ಪಾತುಭಾವಾ ಅಙ್ಗುಲಿಪಬ್ಬಮತ್ತಮ್ಪಿ ಮಹಾಸಮುದ್ದೇ ಉದಕಂ ನ ಹೋತಿ. ಏವಂ ಅನಿಚ್ಚಾ, ಭಿಕ್ಖವೇ, ಸಙ್ಖಾರಾ…ಪೇ… ಅಲಂ ವಿಮುಚ್ಚಿತುಂ.

‘‘ಹೋತಿ ಖೋ ಸೋ, ಭಿಕ್ಖವೇ, ಸಮಯೋ ಯಂ ಕದಾಚಿ ಕರಹಚಿ ದೀಘಸ್ಸ ಅದ್ಧುನೋ ಅಚ್ಚಯೇನ ಛಟ್ಠೋ ಸೂರಿಯೋ ಪಾತುಭವತಿ. ಛಟ್ಠಸ್ಸ, ಭಿಕ್ಖವೇ, ಸೂರಿಯಸ್ಸ ಪಾತುಭಾವಾ ಅಯಞ್ಚ ಮಹಾಪಥವೀ ಸಿನೇರು ಚ ಪಬ್ಬತರಾಜಾ ಧೂಮಾಯನ್ತಿ ಸಂಧೂಮಾಯನ್ತಿ ಸಮ್ಪಧೂಮಾಯನ್ತಿ [ಧೂಪಾಯನ್ತಿ ಸನ್ಧೂಪಾಯನ್ತಿ ಸಮ್ಪಧೂಪಾಯನ್ತಿ (ಸೀ. ಸ್ಯಾ.)]. ಸೇಯ್ಯಥಾಪಿ, ಭಿಕ್ಖವೇ, ಕುಮ್ಭಕಾರಪಾಕೋ ಆಲೇಪಿತೋ [ಆಲಿಮ್ಪಿತೋ (ಸೀ. ಸ್ಯಾ.)] ಪಠಮಂ ಧೂಮೇತಿ ಸಂಧೂಮೇತಿ ಸಮ್ಪಧೂಮೇತಿ; ಏವಮೇವಂ ಖೋ, ಭಿಕ್ಖವೇ, ಛಟ್ಠಸ್ಸ ಸೂರಿಯಸ್ಸ ಪಾತುಭಾವಾ ಅಯಞ್ಚ ಮಹಾಪಥವೀ ಸಿನೇರು ಚ ಪಬ್ಬತರಾಜಾ ಧೂಮಾಯನ್ತಿ ಸಂಧೂಮಾಯನ್ತಿ ಸಮ್ಪಧೂಮಾಯನ್ತಿ. ಏವಂ ಅನಿಚ್ಚಾ, ಭಿಕ್ಖವೇ, ಸಙ್ಖಾರಾ…ಪೇ… ಅಲಂ ವಿಮುಚ್ಚಿತುಂ.

‘‘ಹೋತಿ ಖೋ ಸೋ, ಭಿಕ್ಖವೇ, ಸಮಯೋ ಯಂ ಕದಾಚಿ ಕರಹಚಿ ದೀಘಸ್ಸ ಅದ್ಧುನೋ ಅಚ್ಚಯೇನ ಸತ್ತಮೋ ಸೂರಿಯೋ ಪಾತುಭವತಿ. ಸತ್ತಮಸ್ಸ, ಭಿಕ್ಖವೇ, ಸೂರಿಯಸ್ಸ ಪಾತುಭಾವಾ ಅಯಞ್ಚ ಮಹಾಪಥವೀ ಸಿನೇರು ಚ ಪಬ್ಬತರಾಜಾ ಆದಿಪ್ಪನ್ತಿ ಪಜ್ಜಲನ್ತಿ ಏಕಜಾಲಾ ಭವನ್ತಿ. ಇಮಿಸ್ಸಾ ಚ, ಭಿಕ್ಖವೇ, ಮಹಾಪಥವಿಯಾ ಸಿನೇರುಸ್ಸ ಚ ಪಬ್ಬತರಾಜಸ್ಸ ಝಾಯಮಾನಾನಂ ದಯ್ಹಮಾನಾನಂ ಅಚ್ಚಿ ವಾತೇನ ಖಿತ್ತಾ ಯಾವ ಬ್ರಹ್ಮಲೋಕಾಪಿ ಗಚ್ಛತಿ. ಸಿನೇರುಸ್ಸ, ಭಿಕ್ಖವೇ, ಪಬ್ಬತರಾಜಸ್ಸ ಝಾಯಮಾನಸ್ಸ ದಯ್ಹಮಾನಸ್ಸ ವಿನಸ್ಸಮಾನಸ್ಸ ಮಹತಾ ತೇಜೋಖನ್ಧೇನ ಅಭಿಭೂತಸ್ಸ ಯೋಜನಸತಿಕಾನಿಪಿ ಕೂಟಾನಿ ಪಲುಜ್ಜನ್ತಿ ದ್ವಿಯೋಜನಸತಿಕಾನಿಪಿ, ತಿಯೋಜನಸತಿಕಾನಿಪಿ, ಚತುಯೋಜನಸತಿಕಾನಿಪಿ, ಪಞ್ಚಯೋಜನಸತಿಕಾನಿಪಿ ಕೂಟಾನಿ ಪಲುಜ್ಜನ್ತಿ. ಇಮಿಸ್ಸಾ ಚ, ಭಿಕ್ಖವೇ, ಮಹಾಪಥವಿಯಾ ಸಿನೇರುಸ್ಸ ಚ ಪಬ್ಬತರಾಜಸ್ಸ ಝಾಯಮಾನಾನಂ ದಯ್ಹಮಾನಾನಂ ನೇವ ಛಾರಿಕಾ ಪಞ್ಞಾಯತಿ ನ ಮಸಿ. ಸೇಯ್ಯಥಾಪಿ, ಭಿಕ್ಖವೇ, ಸಪ್ಪಿಸ್ಸ ವಾ ತೇಲಸ್ಸ ವಾ ಝಾಯಮಾನಸ್ಸ ದಯ್ಹಮಾನಸ್ಸ ನೇವ ಛಾರಿಕಾ ಪಞ್ಞಾಯತಿ ನ ಮಸಿ; ಏವಮೇವಂ ಖೋ, ಭಿಕ್ಖವೇ, ಇಮಿಸ್ಸಾ ಚ ಮಹಾಪಥವಿಯಾ ಸಿನೇರುಸ್ಸ ಚ ಪಬ್ಬತರಾಜಸ್ಸ ಝಾಯಮಾನಾನಂ ದಯ್ಹಮಾನಾನಂ ನೇವ ಛಾರಿಕಾ ಪಞ್ಞಾಯತಿ ನ ಮಸಿ. ಏವಂ ಅನಿಚ್ಚಾ, ಭಿಕ್ಖವೇ, ಸಙ್ಖಾರಾ; ಏವಂ ಅಧುವಾ, ಭಿಕ್ಖವೇ, ಸಙ್ಖಾರಾ; ಏವಂ ಅನಸ್ಸಾಸಿಕಾ, ಭಿಕ್ಖವೇ, ಸಙ್ಖಾರಾ. ಯಾವಞ್ಚಿದಂ, ಭಿಕ್ಖವೇ, ಅಲಮೇವ ಸಬ್ಬಸಙ್ಖಾರೇಸು ನಿಬ್ಬಿನ್ದಿತುಂ ಅಲಂ ವಿರಜ್ಜಿತುಂ ಅಲಂ ವಿಮುಚ್ಚಿತುಂ.

‘‘ತತ್ರ, ಭಿಕ್ಖವೇ, ಕೋ ಮನ್ತಾ ಕೋ ಸದ್ಧಾತಾ – ‘ಅಯಞ್ಚ ಪಥವೀ ಸಿನೇರು ಚ ಪಬ್ಬತರಾಜಾ ದಯ್ಹಿಸ್ಸನ್ತಿ ವಿನಸ್ಸಿಸ್ಸನ್ತಿ, ನ ಭವಿಸ್ಸನ್ತೀ’ತಿ ಅಞ್ಞತ್ರ ದಿಟ್ಠಪದೇಹಿ?

[ಅ. ನಿ. ೬.೫೪; ೭.೭೩] ‘‘ಭೂತಪುಬ್ಬಂ, ಭಿಕ್ಖವೇ, ಸುನೇತ್ತೋ ನಾಮ ಸತ್ಥಾ ಅಹೋಸಿ ತಿತ್ಥಕರೋ ಕಾಮೇಸು ವೀತರಾಗೋ. ಸುನೇತ್ತಸ್ಸ ಖೋ ಪನ, ಭಿಕ್ಖವೇ, ಸತ್ಥುನೋ ಅನೇಕಾನಿ ಸಾವಕಸತಾನಿ ಅಹೇಸುಂ. ಸುನೇತ್ತೋ, ಭಿಕ್ಖವೇ, ಸತ್ಥಾ ಸಾವಕಾನಂ ಬ್ರಹ್ಮಲೋಕಸಹಬ್ಯತಾಯ ಧಮ್ಮಂ ದೇಸೇಸಿ. ಯೇ ಖೋ ಪನ, ಭಿಕ್ಖವೇ, ಸುನೇತ್ತಸ್ಸ ಸತ್ಥುನೋ ಬ್ರಹ್ಮಲೋಕಸಹಬ್ಯತಾಯ ಧಮ್ಮಂ ದೇಸೇನ್ತಸ್ಸ ಸಬ್ಬೇನ ಸಬ್ಬಂ ಸಾಸನಂ ಆಜಾನಿಂಸು ತೇ ಕಾಯಸ್ಸ ಭೇದಾ ಪರಂ ಮರಣಾ ಸುಗತಿಂ ಬ್ರಹ್ಮಲೋಕಂ ಉಪಪಜ್ಜಿಂಸು. ಯೇ ನ ಸಬ್ಬೇನ ಸಬ್ಬಂ ಸಾಸನಂ ಆಜಾನಿಂಸು ತೇ ಕಾಯಸ್ಸ ಭೇದಾ ಪರಂ ಮರಣಾ ಅಪ್ಪೇಕಚ್ಚೇ ಪರನಿಮ್ಮಿತವಸವತ್ತೀನಂ ದೇವಾನಂ ಸಹಬ್ಯತಂ ಉಪಪಜ್ಜಿಂಸು, ಅಪ್ಪೇಕಚ್ಚೇ ನಿಮ್ಮಾನರತೀನಂ ದೇವಾನಂ ಸಹಬ್ಯತಂ ಉಪಪಜ್ಜಿಂಸು, ಅಪ್ಪೇಕಚ್ಚೇ ತುಸಿತಾನಂ ದೇವಾನಂ ಸಹಬ್ಯತಂ ಉಪಪಜ್ಜಿಂಸು, ಅಪ್ಪೇಕಚ್ಚೇ ಯಾಮಾನಂ ದೇವಾನಂ ಸಹಬ್ಯತಂ ಉಪಪಜ್ಜಿಂಸು, ಅಪ್ಪೇಕಚ್ಚೇ ತಾವತಿಂಸಾನಂ ದೇವಾನಂ ಸಹಬ್ಯತಂ ಉಪಪಜ್ಜಿಂಸು, ಅಪ್ಪೇಕಚ್ಚೇ ಚಾತುಮಹಾರಾಜಿಕಾನಂ ದೇವಾನಂ ಸಹಬ್ಯತಂ ಉಪಪಜ್ಜಿಂಸು, ಅಪ್ಪೇಕಚ್ಚೇ ಖತ್ತಿಯಮಹಾಸಾಲಾನಂ ಸಹಬ್ಯತಂ ಉಪಪಜ್ಜಿಂಸು, ಅಪ್ಪೇಕಚ್ಚೇ ಬ್ರಾಹ್ಮಣಮಹಾಸಾಲಾನಂ ಸಹಬ್ಯತಂ ಉಪಪಜ್ಜಿಂಸು, ಅಪ್ಪೇಕಚ್ಚೇ ಗಹಪತಿಮಹಾಸಾಲಾನಂ ಸಹಬ್ಯತಂ ಉಪಪಜ್ಜಿಂಸು.

‘‘ಅಥ ಖೋ, ಭಿಕ್ಖವೇ, ಸುನೇತ್ತಸ್ಸ ಸತ್ಥುನೋ ಏತದಹೋಸಿ – ‘ನ ಖೋ ಮೇತಂ ಪತಿರೂಪಂ ಯೋಹಂ ಸಾವಕಾನಂ ಸಮಸಮಗತಿಯೋ ಅಸ್ಸಂ ಅಭಿಸಮ್ಪರಾಯಂ, ಯಂನೂನಾಹಂ ಉತ್ತರಿ ಮೇತ್ತಂ [ಉತ್ತರಿ ಮಗ್ಗಂ (ಕ.)] ಭಾವೇಯ್ಯ’’’ನ್ತಿ.

‘‘ಅಥ ಖೋ, ಭಿಕ್ಖವೇ, ಸುನೇತ್ತೋ ಸತ್ಥಾ ಸತ್ತ ವಸ್ಸಾನಿ ಮೇತ್ತಂ ಚಿತ್ತಂ ಭಾವೇಸಿ. ಸತ್ತ ವಸ್ಸಾನಿ ಮೇತ್ತಂ ಚಿತ್ತಂ ಭಾವೇತ್ವಾ ಸತ್ತ ಸಂವಟ್ಟವಿವಟ್ಟಕಪ್ಪೇ ನಯಿಮಂ ಲೋಕಂ ಪುನರಾಗಮಾಸಿ. ಸಂವಟ್ಟಮಾನೇ ಸುದಂ, ಭಿಕ್ಖವೇ, ಲೋಕೇ ಆಭಸ್ಸರೂಪಗೋ ಹೋತಿ. ವಿವಟ್ಟಮಾನೇ ಲೋಕೇ ಸುಞ್ಞಂ ಬ್ರಹ್ಮವಿಮಾನಂ ಉಪಪಜ್ಜತಿ. ತತ್ರ ಸುದಂ, ಭಿಕ್ಖವೇ, ಬ್ರಹ್ಮಾ ಹೋತಿ ಮಹಾಬ್ರಹ್ಮಾ ಅಭಿಭೂ ಅನಭಿಭೂತೋ ಅಞ್ಞದತ್ಥುದಸೋ ವಸವತ್ತೀ. ಛತ್ತಿಂಸಕ್ಖತ್ತುಂ ಖೋ ಪನ, ಭಿಕ್ಖವೇ, ಸಕ್ಕೋ ಅಹೋಸಿ ದೇವಾನಮಿನ್ದೋ. ಅನೇಕಸತಕ್ಖತ್ತುಂ ರಾಜಾ ಅಹೋಸಿ ಚಕ್ಕವತ್ತೀ ಧಮ್ಮಿಕೋ ಧಮ್ಮರಾಜಾ ಚಾತುರನ್ತೋ ವಿಜಿತಾವೀ ಜನಪದತ್ಥಾವರಿಯಪ್ಪತ್ತೋ ಸತ್ತರತನಸಮನ್ನಾಗತೋ. ಪರೋಸಹಸ್ಸಂ ಖೋ ಪನಸ್ಸ ಪುತ್ತಾ ಅಹೇಸುಂ ಸೂರಾ ವೀರಙ್ಗರೂಪಾ ಪರಸೇನಪ್ಪಮದ್ದನಾ. ಸೋ ಇಮಂ ಪಥವಿಂ ಸಾಗರಪರಿಯನ್ತಂ ಅದಣ್ಡೇನ ಅಸತ್ಥೇನ ಧಮ್ಮೇನ ಅಭಿವಿಜಿಯ ಅಜ್ಝಾವಸಿ. ಸೋ ಹಿ ನಾಮ, ಭಿಕ್ಖವೇ, ಸುನೇತ್ತೋ ಸತ್ಥಾ ಏವಂ ದೀಘಾಯುಕೋ ಸಮಾನೋ ಏವಂ ಚಿರಟ್ಠಿತಿಕೋ ಅಪರಿಮುತ್ತೋ ಅಹೋಸಿ – ‘ಜಾತಿಯಾ ಜರಾಯ ಮರಣೇನ ಸೋಕೇಹಿ ಪರಿದೇವೇಹಿ ದುಕ್ಖೇಹಿ ದೋಮನಸ್ಸೇಹಿ ಉಪಾಯಾಸೇಹಿ, ಅಪರಿಮುತ್ತೋ ದುಕ್ಖಸ್ಮಾ’ತಿ ವದಾಮಿ’’.

‘‘ತಂ ಕಿಸ್ಸ ಹೇತು? ಚತುನ್ನಂ ಧಮ್ಮಾನಂ ಅನನುಬೋಧಾ ಅಪ್ಪಟಿವೇಧಾ. ಕತಮೇಸಂ ಚತುನ್ನಂ? ಅರಿಯಸ್ಸ, ಭಿಕ್ಖವೇ, ಸೀಲಸ್ಸ ಅನನುಬೋಧಾ ಅಪ್ಪಟಿವೇಧಾ, ಅರಿಯಸ್ಸ ಸಮಾಧಿಸ್ಸ ಅನನುಬೋಧಾ ಅಪ್ಪಟಿವೇಧಾ, ಅರಿಯಾಯ ಪಞ್ಞಾಯ ಅನನುಬೋಧಾ ಅಪ್ಪಟಿವೇಧಾ, ಅರಿಯಾಯ ವಿಮುತ್ತಿಯಾ ಅನನುಬೋಧಾ ಅಪ್ಪಟಿವೇಧಾ. ತಯಿದಂ, ಭಿಕ್ಖವೇ, ಅರಿಯಂ ಸೀಲಂ ಅನುಬುದ್ಧಂ ಪಟಿವಿದ್ಧಂ, ಅರಿಯೋ ಸಮಾಧಿ ಅನುಬೋಧೋ ಪಟಿವಿದ್ಧೋ, ಅರಿಯಾ ಪಞ್ಞಾ ಅನುಬೋಧಾ ಪಟಿವಿದ್ಧಾ, ಅರಿಯಾ ವಿಮುತ್ತಿ ಅನುಬೋಧಾ ಪಟಿವಿದ್ಧಾ, ಉಚ್ಛಿನ್ನಾ ಭವತಣ್ಹಾ, ಖೀಣಾ ಭವನೇತ್ತಿ, ನತ್ಥಿ ದಾನಿ ಪುನಬ್ಭವೋ’’ತಿ. ಇದಮವೋಚ ಭಗವಾ. ಇದಂ ವತ್ವಾನ ಸುಗತೋ ಅಥಾಪರಂ ಏತದವೋಚ ಸತ್ಥಾ –

‘‘ಸೀಲಂ ಸಮಾಧಿ ಪಞ್ಞಾ ಚ, ವಿಮುತ್ತಿ ಚ ಅನುತ್ತರಾ;

ಅನುಬುದ್ಧಾ ಇಮೇ ಧಮ್ಮಾ, ಗೋತಮೇನ ಯಸಸ್ಸಿನಾ.

‘‘ಇತಿ ಬುದ್ಧೋ ಅಭಿಞ್ಞಾಯ, ಧಮ್ಮಮಕ್ಖಾಸಿ ಭಿಕ್ಖುನಂ;

ದುಕ್ಖಸ್ಸನ್ತಕರೋ ಸತ್ಥಾ, ಚಕ್ಖುಮಾ ಪರಿನಿಬ್ಬುತೋ’’ತಿ. ದುತಿಯಂ;