೮. ಬಲಸುತ್ತಂ

೭೨. ‘‘ಛಹಿ, ಭಿಕ್ಖವೇ, ಧಮ್ಮೇಹಿ ಸಮನ್ನಾಗತೋ ಭಿಕ್ಖು ಅಭಬ್ಬೋ ಸಮಾಧಿಸ್ಮಿಂ [ಸಮಾಧಿಮ್ಹಿ (ಕ.)] ಬಲತಂ ಪಾಪುಣಿತುಂ. ಕತಮೇಹಿ ಛಹಿ? ಇಧ, ಭಿಕ್ಖವೇ, ಭಿಕ್ಖು ನ ಸಮಾಧಿಸ್ಸ ಸಮಾಪತ್ತಿಕುಸಲೋ ಹೋತಿ, ನ ಸಮಾಧಿಸ್ಸ ಠಿತಿಕುಸಲೋ ಹೋತಿ, ನ ಸಮಾಧಿಸ್ಸ [ನ ಸಮಾಧಿಮ್ಹಾ (ಕ.) ಉಪರಿಸತ್ತಕನಿಪಾತೇ ದೇವತಾವಗ್ಗೇ ಪನ ಸಬ್ಬತ್ಥಪಿ ‘‘ಸಮಾಧಿಸ್ಸ’’ಇತ್ವೇವ ದಿಸ್ಸತಿ] ವುಟ್ಠಾನಕುಸಲೋ ಹೋತಿ, ಅಸಕ್ಕಚ್ಚಕಾರೀ ಚ ಹೋತಿ, ಅಸಾತಚ್ಚಕಾರೀ ಚ, ಅಸಪ್ಪಾಯಕಾರೀ ಚ. ಇಮೇಹಿ ಖೋ, ಭಿಕ್ಖವೇ, ಛಹಿ ಧಮ್ಮೇಹಿ ಸಮನ್ನಾಗತೋ ಭಿಕ್ಖು ಅಭಬ್ಬೋ ಸಮಾಧಿಸ್ಮಿಂ ಬಲತಂ ಪಾಪುಣಿತುಂ.

‘‘ಛಹಿ, ಭಿಕ್ಖವೇ, ಧಮ್ಮೇಹಿ ಸಮನ್ನಾಗತೋ ಭಿಕ್ಖು ಭಬ್ಬೋ ಸಮಾಧಿಸ್ಮಿಂ ಬಲತಂ ಪಾಪುಣಿತುಂ. ಕತಮೇಹಿ ಛಹಿ? ಇಧ, ಭಿಕ್ಖವೇ, ಭಿಕ್ಖು ಸಮಾಧಿಸ್ಸ ಸಮಾಪತ್ತಿಕುಸಲೋ ಹೋತಿ, ಸಮಾಧಿಸ್ಸ ಠಿತಿಕುಸಲೋ ಹೋತಿ, ಸಮಾಧಿಸ್ಸ ವುಟ್ಠಾನಕುಸಲೋ ಹೋತಿ, ಸಕ್ಕಚ್ಚಕಾರೀ ಚ ಹೋತಿ, ಸಾತಚ್ಚಕಾರೀ ಚ, ಸಪ್ಪಾಯಕಾರೀ ಚ. ಇಮೇಹಿ ಖೋ, ಭಿಕ್ಖವೇ, ಛಹಿ ಧಮ್ಮೇಹಿ ಸಮನ್ನಾಗತೋ ಭಿಕ್ಖು ಭಬ್ಬೋ ಸಮಾಧಿಸ್ಮಿಂ ಬಲತಂ ಪಾಪುಣಿತು’’ನ್ತಿ. ಅಟ್ಠಮಂ.