೧೧. ದಾರುಕ್ಖನ್ಧಸುತ್ತಂ

೪೧. ಏವಂ ಮೇ ಸುತಂ – ಏಕಂ ಸಮಯಂ ಆಯಸ್ಮಾ ಸಾರಿಪುತ್ತೋ ರಾಜಗಹೇ ವಿಹರತಿ ಗಿಜ್ಝಕೂಟೇ ಪಬ್ಬತೇ. ಅಥ ಖೋ ಆಯಸ್ಮಾ ಸಾರಿಪುತ್ತೋ ಪುಬ್ಬಣ್ಹಸಮಯಂ ನಿವಾಸೇತ್ವಾ ಪತ್ತಚೀವರಮಾದಾಯ ಸಮ್ಬಹುಲೇಹಿ ಭಿಕ್ಖೂಹಿ ಸದ್ಧಿಂ ಗಿಜ್ಝಕೂಟಾ ಪಬ್ಬತಾ ಓರೋಹನ್ತೋ ಅದ್ದಸ ಅಞ್ಞತರಸ್ಮಿಂ ಪದೇಸೇ ಮಹನ್ತಂ ದಾರುಕ್ಖನ್ಧಂ. ದಿಸ್ವಾ ಭಿಕ್ಖೂ ಆಮನ್ತೇಸಿ – ‘‘ಪಸ್ಸಥ ನೋ, ಆವುಸೋ, ತುಮ್ಹೇ ಅಮುಂ ಮಹನ್ತಂ ದಾರುಕ್ಖನ್ಧ’’ನ್ತಿ? ‘‘ಏವಮಾವುಸೋ’’ತಿ.

‘‘ಆಕಙ್ಖಮಾನೋ, ಆವುಸೋ, ಭಿಕ್ಖು ಇದ್ಧಿಮಾ ಚೇತೋವಸಿಪ್ಪತ್ತೋ ಅಮುಂ ದಾರುಕ್ಖನ್ಧಂ ಪಥವೀತ್ವೇವ ಅಧಿಮುಚ್ಚೇಯ್ಯ. ತಂ ಕಿಸ್ಸ ಹೇತು? ಅತ್ಥಿ, ಆವುಸೋ, ಅಮುಮ್ಹಿ ದಾರುಕ್ಖನ್ಧೇ ಪಥವೀಧಾತು, ಯಂ ನಿಸ್ಸಾಯ ಭಿಕ್ಖು ಇದ್ಧಿಮಾ ಚೇತೋವಸಿಪ್ಪತ್ತೋ ಅಮುಂ ದಾರುಕ್ಖನ್ಧಂ ಪಥವೀತ್ವೇವ ಅಧಿಮುಚ್ಚೇಯ್ಯ. ಆಕಙ್ಖಮಾನೋ, ಆವುಸೋ, ಭಿಕ್ಖು ಇದ್ಧಿಮಾ ಚೇತೋವಸಿಪ್ಪತ್ತೋ ಅಮುಂ ದಾರುಕ್ಖನ್ಧಂ ಆಪೋತ್ವೇವ ಅಧಿಮುಚ್ಚೇಯ್ಯ …ಪೇ… ತೇಜೋತ್ವೇವ ಅಧಿಮುಚ್ಚೇಯ್ಯ… ವಾಯೋತ್ವೇವ ಅಧಿಮುಚ್ಚೇಯ್ಯ… ಸುಭನ್ತ್ವೇವ ಅಧಿಮುಚ್ಚೇಯ್ಯ… ಅಸುಭನ್ತ್ವೇವ ಅಧಿಮುಚ್ಚೇಯ್ಯ. ತಂ ಕಿಸ್ಸ ಹೇತು? ಅತ್ಥಿ, ಆವುಸೋ, ಅಮುಮ್ಹಿ ದಾರುಕ್ಖನ್ಧೇ ಅಸುಭಧಾತು, ಯಂ ನಿಸ್ಸಾಯ ಭಿಕ್ಖು ಇದ್ಧಿಮಾ ಚೇತೋವಸಿಪ್ಪತ್ತೋ ಅಮುಂ ದಾರುಕ್ಖನ್ಧಂ ಅಸುಭನ್ತ್ವೇವ ಅಧಿಮುಚ್ಚೇಯ್ಯಾ’’ತಿ. ಏಕಾದಸಮಂ.