೧. ಆವಾಸಿಕಸುತ್ತಂ

೨೩೧. ‘‘ಪಞ್ಚಹಿ, ಭಿಕ್ಖವೇ, ಧಮ್ಮೇಹಿ ಸಮನ್ನಾಗತೋ ಆವಾಸಿಕೋ ಭಿಕ್ಖು ಅಭಾವನೀಯೋ ಹೋತಿ. ಕತಮೇಹಿ ಪಞ್ಚಹಿ? ನ ಆಕಪ್ಪಸಮ್ಪನ್ನೋ ಹೋತಿ ನ ವತ್ತಸಮ್ಪನ್ನೋ; ನ ಬಹುಸ್ಸುತೋ ಹೋತಿ ನ ಸುತಧರೋ; ನ ಪಟಿಸಲ್ಲೇಖಿತಾ [ಸಲ್ಲೇಖಿತಾ (ಕ. ಸೀ.)] ಹೋತಿ ನ ಪಟಿಸಲ್ಲಾನಾರಾಮೋ; ನ ಕಲ್ಯಾಣವಾಚೋ ಹೋತಿ ನ ಕಲ್ಯಾಣವಾಕ್ಕರಣೋ; ದುಪ್ಪಞ್ಞೋ ಹೋತಿ ಜಳೋ ಏಳಮೂಗೋ. ಇಮೇಹಿ ಖೋ, ಭಿಕ್ಖವೇ, ಪಞ್ಚಹಿ ಧಮ್ಮೇಹಿ ಸಮನ್ನಾಗತೋ ಆವಾಸಿಕೋ ಭಿಕ್ಖು ಅಭಾವನೀಯೋ ಹೋತಿ.

‘‘ಪಞ್ಚಹಿ, ಭಿಕ್ಖವೇ, ಧಮ್ಮೇಹಿ ಸಮನ್ನಾಗತೋ ಆವಾಸಿಕೋ ಭಿಕ್ಖು ಭಾವನೀಯೋ ಹೋತಿ. ಕತಮೇಹಿ ಪಞ್ಚಹಿ? ಆಕಪ್ಪಸಮ್ಪನ್ನೋ ಹೋತಿ ವತ್ತಸಮ್ಪನ್ನೋ; ಬಹುಸ್ಸುತೋ ಹೋತಿ ಸುತಧರೋ; ಪಟಿಸಲ್ಲೇಖಿತಾ ಹೋತಿ ಪಟಿಸಲ್ಲಾನಾರಾಮೋ; ಕಲ್ಯಾಣವಾಚೋ ಹೋತಿ ಕಲ್ಯಾಣವಾಕ್ಕರಣೋ; ಪಞ್ಞವಾ ಹೋತಿ ಅಜಳೋ ಅನೇಳಮೂಗೋ. ಇಮೇಹಿ ಖೋ, ಭಿಕ್ಖವೇ, ಪಞ್ಚಹಿ ಧಮ್ಮೇಹಿ ಸಮನ್ನಾಗತೋ ಆವಾಸಿಕೋ ಭಿಕ್ಖು ಭಾವನೀಯೋ ಹೋತೀ’’ತಿ. ಪಠಮಂ.