೪. ಬಹುಭಾಣಿಸುತ್ತಂ

೨೧೪. ‘‘ಪಞ್ಚಿಮೇ, ಭಿಕ್ಖವೇ, ಆದೀನವಾ ಬಹುಭಾಣಿಸ್ಮಿಂ ಪುಗ್ಗಲೇ. ಕತಮೇ ಪಞ್ಚ? ಮುಸಾ ಭಣತಿ, ಪಿಸುಣಂ ಭಣತಿ, ಫರುಸಂ ಭಣತಿ, ಸಮ್ಫಪ್ಪಲಾಪಂ ಭಣತಿ, ಕಾಯಸ್ಸ ಭೇದಾ ಪರಂ ಮರಣಾ ಅಪಾಯಂ ದುಗ್ಗತಿಂ ವಿನಿಪಾತಂ ನಿರಯಂ ಉಪಪಜ್ಜತಿ. ಇಮೇ ಖೋ, ಭಿಕ್ಖವೇ, ಪಞ್ಚ ಆದೀನವಾ ಬಹುಭಾಣಿಸ್ಮಿಂ ಪುಗ್ಗಲೇ.

‘‘ಪಞ್ಚಿಮೇ, ಭಿಕ್ಖವೇ, ಆನಿಸಂಸಾ ಮನ್ತಭಾಣಿಸ್ಮಿಂ ಪುಗ್ಗಲೇ. ಕತಮೇ ಪಞ್ಚ? ನ ಮುಸಾ ಭಣತಿ, ನ ಪಿಸುಣಂ ಭಣತಿ, ನ ಫರುಸಂ ಭಣತಿ, ನ ಸಮ್ಫಪ್ಪಲಾಪಂ ಭಣತಿ, ಕಾಯಸ್ಸ ಭೇದಾ ಪರಂ ಮರಣಾ ಸುಗತಿಂ ಸಗ್ಗಂ ಲೋಕಂ ಉಪಪಜ್ಜತಿ. ಇಮೇ ಖೋ, ಭಿಕ್ಖವೇ, ಪಞ್ಚ ಆನಿಸಂಸಾ ಮನ್ತಭಾಣಿಸ್ಮಿಂ ಪುಗ್ಗಲೇ’’ತಿ. ಚತುತ್ಥಂ.