(೧೨) ೨. ಅನ್ಧಕವಿನ್ದವಗ್ಗೋ

೧. ಕುಲೂಪಕಸುತ್ತಂ

೧೧೧. ‘‘ಪಞ್ಚಹಿ, ಭಿಕ್ಖವೇ, ಧಮ್ಮೇಹಿ ಸಮನ್ನಾಗತೋ ಕುಲೂಪಕೋ ಭಿಕ್ಖು ಕುಲೇಸು ಅಪ್ಪಿಯೋ ಚ ಹೋತಿ ಅಮನಾಪೋ ಚ ಅಗರು ಚ ಅಭಾವನೀಯೋ ಚ. ಕತಮೇಹಿ ಪಞ್ಚಹಿ? ಅಸನ್ಥವವಿಸ್ಸಾಸೀ [ಅಸನ್ಥುತವಿಸ್ಸಾಸೀ (ಸೀ.), ಅಸನ್ಧವವಿಸ್ಸಾಸೀ (ಕ.)] ಚ ಹೋತಿ, ಅನಿಸ್ಸರವಿಕಪ್ಪೀ ಚ, ವಿಸ್ಸಟ್ಠುಪಸೇವೀ [ವಿಯತ್ಥುಪಸೇವೀ (ಸೀ.), ಬ್ಯತ್ಥುಪಸೇವೀ (ಸ್ಯಾ. ಕಂ.), ವ್ಯತ್ತೂಪಸೇವೀ (ಪೀ.)] ಚ, ಉಪಕಣ್ಣಕಜಪ್ಪೀ ಚ, ಅತಿಯಾಚನಕೋ ಚ. ಇಮೇಹಿ ಖೋ, ಭಿಕ್ಖವೇ, ಪಞ್ಚಹಿ ಧಮ್ಮೇಹಿ ಸಮನ್ನಾಗತೋ ಕುಲೂಪಕೋ ಭಿಕ್ಖು ಕುಲೇಸು ಅಪ್ಪಿಯೋ ಚ ಹೋತಿ ಅಮನಾಪೋ ಚ ಅಗರು ಚ ಅಭಾವನೀಯೋ ಚ.

‘‘ಪಞ್ಚಹಿ, ಭಿಕ್ಖವೇ, ಧಮ್ಮೇಹಿ ಸಮನ್ನಾಗತೋ ಕುಲೂಪಕೋ ಭಿಕ್ಖು ಕುಲೇಸು ಪಿಯೋ ಚ ಹೋತಿ ಮನಾಪೋ ಚ ಗರು ಚ ಭಾವನೀಯೋ ಚ. ಕತಮೇಹಿ ಪಞ್ಚಹಿ? ನ ಅಸನ್ಥವವಿಸ್ಸಾಸೀ ಚ ಹೋತಿ, ನ ಅನಿಸ್ಸರವಿಕಪ್ಪೀ ಚ, ನ ವಿಸ್ಸಟ್ಠುಪಸೇವೀ ಚ, ನ ಉಪಕಣ್ಣಕಜಪ್ಪೀ ಚ, ನ ಅತಿಯಾಚನಕೋ ಚ. ಇಮೇಹಿ ಖೋ, ಭಿಕ್ಖವೇ, ಪಞ್ಚಹಿ ಧಮ್ಮೇಹಿ ಸಮನ್ನಾಗತೋ ಕುಲೂಪಕೋ ಭಿಕ್ಖು ಕುಲೇಸು ಪಿಯೋ ಚ ಹೋತಿ ಮನಾಪೋ ಚ ಗರು ಚ ಭಾವನೀಯೋ ಚಾ’’ತಿ. ಪಠಮಂ.

೨. ಪಚ್ಛಾಸಮಣಸುತ್ತಂ

೧೧೨. ‘‘ಪಞ್ಚಹಿ, ಭಿಕ್ಖವೇ, ಧಮ್ಮೇಹಿ ಸಮನ್ನಾಗತೋ ಪಚ್ಛಾಸಮಣೋ ನ ಆದಾತಬ್ಬೋ. ಕತಮೇಹಿ ಪಞ್ಚಹಿ? ಅತಿದೂರೇ ವಾ ಗಚ್ಛತಿ ಅಚ್ಚಾಸನ್ನೇ ವಾ, ನ ಪತ್ತಪರಿಯಾಪನ್ನಂ ಗಣ್ಹತಿ, ಆಪತ್ತಿಸಾಮನ್ತಾ ಭಣಮಾನಂ ನ ನಿವಾರೇತಿ, ಭಣಮಾನಸ್ಸ ಅನ್ತರನ್ತರಾ ಕಥಂ ಓಪಾತೇತಿ, ದುಪ್ಪಞ್ಞೋ ಹೋತಿ ಜಳೋ ಏಳಮೂಗೋ. ಇಮೇಹಿ ಖೋ, ಭಿಕ್ಖವೇ, ಪಞ್ಚಹಿ ಧಮ್ಮೇಹಿ ಸಮನ್ನಾಗತೋ ಪಚ್ಛಾಸಮಣೋ ನ ಆದಾತಬ್ಬೋ.

‘‘ಪಞ್ಚಹಿ, ಭಿಕ್ಖವೇ, ಧಮ್ಮೇಹಿ ಸಮನ್ನಾಗತೋ ಪಚ್ಛಾಸಮಣೋ ಆದಾತಬ್ಬೋ. ಕತಮೇಹಿ ಪಞ್ಚಹಿ? ನಾತಿದೂರೇ ಗಚ್ಛತಿ ನ ಅಚ್ಚಾಸನ್ನೇ, ಪತ್ತಪರಿಯಾಪನ್ನಂ ಗಣ್ಹತಿ, ಆಪತ್ತಿಸಾಮನ್ತಾ ಭಣಮಾನಂ ನಿವಾರೇತಿ, ಭಣಮಾನಸ್ಸ ನ ಅನ್ತರನ್ತರಾ ಕಥಂ ಓಪಾತೇತಿ, ಪಞ್ಞವಾ ಹೋತಿ ಅಜಳೋ ಅನೇಳಮೂಗೋ. ಇಮೇಹಿ ಖೋ, ಭಿಕ್ಖವೇ, ಪಞ್ಚಹಿ ಧಮ್ಮೇಹಿ ಸಮನ್ನಾಗತೋ ಪಚ್ಛಾಸಮಣೋ ಆದಾತಬ್ಬೋ’’ತಿ. ದುತಿಯಂ.

೩. ಸಮ್ಮಾಸಮಾಧಿಸುತ್ತಂ

೧೧೩. ‘‘ಪಞ್ಚಹಿ, ಭಿಕ್ಖವೇ, ಧಮ್ಮೇಹಿ ಸಮನ್ನಾಗತೋ ಭಿಕ್ಖು ಅಭಬ್ಬೋ ಸಮ್ಮಾಸಮಾಧಿಂ ಉಪಸಮ್ಪಜ್ಜ ವಿಹರಿತುಂ. ಕತಮೇಹಿ ಪಞ್ಚಹಿ? ಇಧ, ಭಿಕ್ಖವೇ, ಭಿಕ್ಖು ಅಕ್ಖಮೋ ಹೋತಿ ರೂಪಾನಂ, ಅಕ್ಖಮೋ ಸದ್ದಾನಂ, ಅಕ್ಖಮೋ ಗನ್ಧಾನಂ, ಅಕ್ಖಮೋ ರಸಾನಂ, ಅಕ್ಖಮೋ ಫೋಟ್ಠಬ್ಬಾನಂ. ಇಮೇಹಿ ಖೋ, ಭಿಕ್ಖವೇ, ಪಞ್ಚಹಿ ಧಮ್ಮೇಹಿ ಸಮನ್ನಾಗತೋ ಭಿಕ್ಖು ಅಭಬ್ಬೋ ಸಮ್ಮಾಸಮಾಧಿಂ ಉಪಸಮ್ಪಜ್ಜ ವಿಹರಿತುಂ.

‘‘ಪಞ್ಚಹಿ, ಭಿಕ್ಖವೇ, ಧಮ್ಮೇಹಿ ಸಮನ್ನಾಗತೋ ಭಿಕ್ಖು ಭಬ್ಬೋ ಸಮ್ಮಾಸಮಾಧಿಂ ಉಪಸಮ್ಪಜ್ಜ ವಿಹರಿತುಂ. ಕತಮೇಹಿ ಪಞ್ಚಹಿ? ಇಧ, ಭಿಕ್ಖವೇ, ಭಿಕ್ಖು ಖಮೋ ಹೋತಿ ರೂಪಾನಂ, ಖಮೋ ಸದ್ದಾನಂ, ಖಮೋ ಗನ್ಧಾನಂ, ಖಮೋ ರಸಾನಂ, ಖಮೋ ಫೋಟ್ಠಬ್ಬಾನಂ. ಇಮೇಹಿ ಖೋ, ಭಿಕ್ಖವೇ, ಪಞ್ಚಹಿ ಧಮ್ಮೇಹಿ ಸಮನ್ನಾಗತೋ ಭಿಕ್ಖು ಭಬ್ಬೋ ಸಮ್ಮಾಸಮಾಧಿಂ ಉಪಸಮ್ಪಜ್ಜ ವಿಹರಿತು’’ನ್ತಿ. ತತಿಯಂ.

೪. ಅನ್ಧಕವಿನ್ದಸುತ್ತಂ

೧೧೪. ಏಕಂ ಸಮಯಂ ಭಗವಾ ಮಗಧೇಸು ವಿಹರತಿ ಅನ್ಧಕವಿನ್ದೇ. ಅಥ ಖೋ ಆಯಸ್ಮಾ ಆನನ್ದೋ ಯೇನ ಭಗವಾ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿ. ಏಕಮನ್ತಂ ನಿಸಿನ್ನಂ ಖೋ ಆಯಸ್ಮನ್ತಂ ಆನನ್ದಂ ಭಗವಾ ಏತದವೋಚ –

‘‘ಯೇ ತೇ, ಆನನ್ದ, ಭಿಕ್ಖೂ ನವಾ ಅಚಿರಪಬ್ಬಜಿತಾ ಅಧುನಾಗತಾ ಇಮಂ ಧಮ್ಮವಿನಯಂ, ತೇ ವೋ, ಆನನ್ದ, ಭಿಕ್ಖೂ ಪಞ್ಚಸು ಧಮ್ಮೇಸು ಸಮಾದಪೇತಬ್ಬಾ [ಸಮಾದಾಪೇತಬ್ಬಾ (?)] ನಿವೇಸೇತಬ್ಬಾ ಪತಿಟ್ಠಾಪೇತಬ್ಬಾ. ಕತಮೇಸು ಪಞ್ಚಸು? ‘ಏಥ ತುಮ್ಹೇ, ಆವುಸೋ, ಸೀಲವಾ ಹೋಥ, ಪಾತಿಮೋಕ್ಖಸಂವರಸಂವುತಾ ವಿಹರಥ ಆಚಾರಗೋಚರಸಮ್ಪನ್ನಾ ಅಣುಮತ್ತೇಸು ವಜ್ಜೇಸು ಭಯದಸ್ಸಾವಿನೋ, ಸಮಾದಾಯ ಸಿಕ್ಖಥ ಸಿಕ್ಖಾಪದೇಸೂ’ತಿ – ಇತಿ ಪಾತಿಮೋಕ್ಖಸಂವರೇ ಸಮಾದಪೇತಬ್ಬಾ ನಿವೇಸೇತಬ್ಬಾ ಪತಿಟ್ಠಾಪೇತಬ್ಬಾ.

‘‘‘ಏಥ ತುಮ್ಹೇ, ಆವುಸೋ, ಇನ್ದ್ರಿಯೇಸು ಗುತ್ತದ್ವಾರಾ ವಿಹರಥ ಆರಕ್ಖಸತಿನೋ ನಿಪಕ್ಕಸತಿನೋ [ನಿಪಕಸತಿನೋ (ಸೀ. ಸ್ಯಾ.), ನೇಪಕ್ಕಸತಿನೋ (?)], ಸಾರಕ್ಖಿತಮಾನಸಾ ಸತಾರಕ್ಖೇನ ಚೇತಸಾ ಸಮನ್ನಾಗತಾ’ತಿ – ಇತಿ ಇನ್ದ್ರಿಯಸಂವರೇ ಸಮಾದಪೇತಬ್ಬಾ ನಿವೇಸೇತಬ್ಬಾ ಪತಿಟ್ಠಾಪೇತಬ್ಬಾ.

‘‘‘ಏಥ ತುಮ್ಹೇ, ಆವುಸೋ, ಅಪ್ಪಭಸ್ಸಾ ಹೋಥ, ಭಸ್ಸೇ ಪರಿಯನ್ತಕಾರಿನೋ’ತಿ – ಇತಿ ಭಸ್ಸಪರಿಯನ್ತೇ ಸಮಾದಪೇತಬ್ಬಾ ನಿವೇಸೇತಬ್ಬಾ ಪತಿಟ್ಠಾಪೇತಬ್ಬಾ.

‘‘‘ಏಥ ತುಮ್ಹೇ, ಆವುಸೋ, ಆರಞ್ಞಿಕಾ ಹೋಥ, ಅರಞ್ಞವನಪತ್ಥಾನಿ ಪನ್ತಾನಿ ಸೇನಾಸನಾನಿ ಪಟಿಸೇವಥಾ’ತಿ – ಇತಿ ಕಾಯವೂಪಕಾಸೇ ಸಮಾದಪೇತಬ್ಬಾ ನಿವೇಸೇತಬ್ಬಾ ಪತಿಟ್ಠಾಪೇತಬ್ಬಾ.

‘‘‘ಏಥ ತುಮ್ಹೇ, ಆವುಸೋ, ಸಮ್ಮಾದಿಟ್ಠಿಕಾ ಹೋಥ ಸಮ್ಮಾದಸ್ಸನೇನ ಸಮನ್ನಾಗತಾ’ತಿ – ಇತಿ ಸಮ್ಮಾದಸ್ಸನೇ ಸಮಾದಪೇತಬ್ಬಾ ನಿವೇಸೇತಬ್ಬಾ ಪತಿಟ್ಠಾಪೇತಬ್ಬಾ. ಯೇ ತೇ, ಆನನ್ದ, ಭಿಕ್ಖೂ ನವಾ ಅಚಿರಪಬ್ಬಜಿತಾ ಅಧುನಾಗತಾ ಇಮಂ ಧಮ್ಮವಿನಯಂ, ತೇ ವೋ, ಆನನ್ದ, ಭಿಕ್ಖೂ ಇಮೇಸು ಪಞ್ಚಸು ಧಮ್ಮೇಸು ಸಮಾದಪೇತಬ್ಬಾ ನಿವೇಸೇತಬ್ಬಾ ಪತಿಟ್ಠಾಪೇತಬ್ಬಾ’’ತಿ. ಚತುತ್ಥಂ.

೫. ಮಚ್ಛರಿನೀಸುತ್ತಂ

೧೧೫. ‘‘ಪಞ್ಚಹಿ, ಭಿಕ್ಖವೇ, ಧಮ್ಮೇಹಿ ಸಮನ್ನಾಗತಾ ಭಿಕ್ಖುನೀ ಯಥಾಭತಂ ನಿಕ್ಖಿತ್ತಾ ಏವಂ ನಿರಯೇ. ಕತಮೇಹಿ ಪಞ್ಚಹಿ? ಆವಾಸಮಚ್ಛರಿನೀ ಹೋತಿ, ಕುಲಮಚ್ಛರಿನೀ ಹೋತಿ, ಲಾಭಮಚ್ಛರಿನೀ ಹೋತಿ, ವಣ್ಣಮಚ್ಛರಿನೀ ಹೋತಿ, ಧಮ್ಮಮಚ್ಛರಿನೀ ಹೋತಿ. ಇಮೇಹಿ ಖೋ, ಭಿಕ್ಖವೇ, ಪಞ್ಚಹಿ ಧಮ್ಮೇಹಿ ಸಮನ್ನಾಗತಾ ಭಿಕ್ಖುನೀ ಯಥಾಭತಂ ನಿಕ್ಖಿತ್ತಾ ಏವಂ ನಿರಯೇ.

‘‘ಪಞ್ಚಹಿ, ಭಿಕ್ಖವೇ, ಧಮ್ಮೇಹಿ ಸಮನ್ನಾಗತಾ ಭಿಕ್ಖುನೀ ಯಥಾಭತಂ ನಿಕ್ಖಿತ್ತಾ ಏವಂ ಸಗ್ಗೇ. ಕತಮೇಹಿ ಪಞ್ಚಹಿ? ನ ಆವಾಸಮಚ್ಛರಿನೀ ಹೋತಿ, ನ ಕುಲಮಚ್ಛರಿನೀ ಹೋತಿ, ನ ಲಾಭಮಚ್ಛರಿನೀ ಹೋತಿ, ನ ವಣ್ಣಮಚ್ಛರಿನೀ ಹೋತಿ, ನ ಧಮ್ಮಮಚ್ಛರಿನೀ ಹೋತಿ. ಇಮೇಹಿ ಖೋ, ಭಿಕ್ಖವೇ, ಪಞ್ಚಹಿ ಧಮ್ಮೇಹಿ ಸಮನ್ನಾಗತಾ ಭಿಕ್ಖುನೀ ಯಥಾಭತಂ ನಿಕ್ಖಿತ್ತಾ ಏವಂ ಸಗ್ಗೇ’’ತಿ. ಪಞ್ಚಮಂ.

೬. ವಣ್ಣನಾಸುತ್ತಂ

೧೧೬. ‘‘ಪಞ್ಚಹಿ, ಭಿಕ್ಖವೇ, ಧಮ್ಮೇಹಿ ಸಮನ್ನಾಗತಾ ಭಿಕ್ಖುನೀ ಯಥಾಭತಂ ನಿಕ್ಖಿತ್ತಾ ಏವಂ ನಿರಯೇ. ಕತಮೇಹಿ ಪಞ್ಚಹಿ? ಅನನುವಿಚ್ಚ ಅಪರಿಯೋಗಾಹೇತ್ವಾ ಅವಣ್ಣಾರಹಸ್ಸ ವಣ್ಣಂ ಭಾಸತಿ, ಅನನುವಿಚ್ಚ ಅಪರಿಯೋಗಾಹೇತ್ವಾ ವಣ್ಣಾರಹಸ್ಸ ಅವಣ್ಣಂ ಭಾಸತಿ, ಅನನುವಿಚ್ಚ ಅಪರಿಯೋಗಾಹೇತ್ವಾ ಅಪ್ಪಸಾದನೀಯೇ ಠಾನೇ ಪಸಾದಂ ಉಪದಂಸೇತಿ, ಅನನುವಿಚ್ಚ ಅಪರಿಯೋಗಾಹೇತ್ವಾ ಪಸಾದನೀಯೇ ಠಾನೇ ಅಪ್ಪಸಾದಂ ಉಪದಂಸೇತಿ, ಸದ್ಧಾದೇಯ್ಯಂ ವಿನಿಪಾತೇತಿ. ಇಮೇಹಿ ಖೋ, ಭಿಕ್ಖವೇ, ಪಞ್ಚಹಿ ಧಮ್ಮೇಹಿ ಸಮನ್ನಾಗತಾ ಭಿಕ್ಖುನೀ ಯಥಾಭತಂ ನಿಕ್ಖಿತ್ತಾ ಏವಂ ನಿರಯೇ.

‘‘ಪಞ್ಚಹಿ, ಭಿಕ್ಖವೇ, ಧಮ್ಮೇಹಿ ಸಮನ್ನಾಗತಾ ಭಿಕ್ಖುನೀ ಯಥಾಭತಂ ನಿಕ್ಖಿತ್ತಾ ಏವಂ ಸಗ್ಗೇ. ಕತಮೇಹಿ ಪಞ್ಚಹಿ? ಅನುವಿಚ್ಚ ಪರಿಯೋಗಾಹೇತ್ವಾ ಅವಣ್ಣಾರಹಸ್ಸ ಅವಣ್ಣಂ ಭಾಸತಿ, ಅನುವಿಚ್ಚ ಪರಿಯೋಗಾಹೇತ್ವಾ ವಣ್ಣಾರಹಸ್ಸ ವಣ್ಣಂ ಭಾಸತಿ, ಅನುವಿಚ್ಚ ಪರಿಯೋಗಾಹೇತ್ವಾ ಅಪ್ಪಸಾದನೀಯೇ ಠಾನೇ ಅಪ್ಪಸಾದಂ ಉಪದಂಸೇತಿ, ಅನುವಿಚ್ಚ ಪರಿಯೋಗಾಹೇತ್ವಾ ಪಸಾದನೀಯೇ ಠಾನೇ ಪಸಾದಂ ಉಪದಂಸೇತಿ, ಸದ್ಧಾದೇಯ್ಯಂ ನ ವಿನಿಪಾತೇತಿ. ಇಮೇಹಿ ಖೋ, ಭಿಕ್ಖವೇ, ಪಞ್ಚಹಿ ಧಮ್ಮೇಹಿ ಸಮನ್ನಾಗತಾ ಭಿಕ್ಖುನೀ ಯಥಾಭತಂ ನಿಕ್ಖಿತ್ತಾ ಏವಂ ಸಗ್ಗೇ’’ತಿ. ಛಟ್ಠಂ.

೭. ಇಸ್ಸುಕಿನೀಸುತ್ತಂ

೧೧೭. ‘‘ಪಞ್ಚಹಿ, ಭಿಕ್ಖವೇ, ಧಮ್ಮೇಹಿ ಸಮನ್ನಾಗತಾ ಭಿಕ್ಖುನೀ ಯಥಾಭತಂ ನಿಕ್ಖಿತ್ತಾ ಏವಂ ನಿರಯೇ. ಕತಮೇಹಿ ಪಞ್ಚಹಿ? ಅನನುವಿಚ್ಚ ಅಪರಿಯೋಗಾಹೇತ್ವಾ ಅವಣ್ಣಾರಹಸ್ಸ ವಣ್ಣಂ ಭಾಸತಿ, ಅನನುವಿಚ್ಚ ಅಪರಿಯೋಗಾಹೇತ್ವಾ ವಣ್ಣಾರಹಸ್ಸ ಅವಣ್ಣಂ ಭಾಸತಿ, ಇಸ್ಸುಕಿನೀ ಚ ಹೋತಿ, ಮಚ್ಛರಿನೀ ಚ, ಸದ್ಧಾದೇಯ್ಯಂ [ಸದ್ಧಾದೇಯ್ಯಞ್ಚ (ಸ್ಯಾ.)] ವಿನಿಪಾತೇತಿ. ಇಮೇಹಿ ಖೋ, ಭಿಕ್ಖವೇ, ಪಞ್ಚಹಿ ಧಮ್ಮೇಹಿ ಸಮನ್ನಾಗತಾ ಭಿಕ್ಖುನೀ ಯಥಾಭತಂ ನಿಕ್ಖಿತ್ತಾ ಏವಂ ನಿರಯೇ.

‘‘ಪಞ್ಚಹಿ, ಭಿಕ್ಖವೇ, ಧಮ್ಮೇಹಿ ಸಮನ್ನಾಗತಾ ಭಿಕ್ಖುನೀ ಯಥಾಭತಂ ನಿಕ್ಖಿತ್ತಾ ಏವಂ ಸಗ್ಗೇ. ಕತಮೇಹಿ ಪಞ್ಚಹಿ? ಅನುವಿಚ್ಚ ಪರಿಯೋಗಾಹೇತ್ವಾ ಅವಣ್ಣಾರಹಸ್ಸ ಅವಣ್ಣಂ ಭಾಸತಿ, ಅನುವಿಚ್ಚ ಪರಿಯೋಗಾಹೇತ್ವಾ ವಣ್ಣಾರಹಸ್ಸ ವಣ್ಣಂ ಭಾಸತಿ, ಅನಿಸ್ಸುಕಿನೀ ಚ ಹೋತಿ, ಅಮಚ್ಛರಿನೀ ಚ, ಸದ್ಧಾದೇಯ್ಯಂ ನ ವಿನಿಪಾತೇತಿ. ಇಮೇಹಿ ಖೋ, ಭಿಕ್ಖವೇ, ಪಞ್ಚಹಿ ಧಮ್ಮೇಹಿ ಸಮನ್ನಾಗತಾ ಭಿಕ್ಖುನೀ ಯಥಾಭತಂ ನಿಕ್ಖಿತ್ತಾ ಏವಂ ಸಗ್ಗೇ’’ತಿ. ಸತ್ತಮಂ.

೮. ಮಿಚ್ಛಾದಿಟ್ಠಿಕಸುತ್ತಂ

೧೧೮. ‘‘ಪಞ್ಚಹಿ, ಭಿಕ್ಖವೇ, ಧಮ್ಮೇಹಿ ಸಮನ್ನಾಗತಾ ಭಿಕ್ಖುನೀ ಯಥಾಭತಂ ನಿಕ್ಖಿತ್ತಾ ಏವಂ ನಿರಯೇ. ಕತಮೇಹಿ ಪಞ್ಚಹಿ? ಅನನುವಿಚ್ಚ ಅಪರಿಯೋಗಾಹೇತ್ವಾ ಅವಣ್ಣಾರಹಸ್ಸ ವಣ್ಣಂ ಭಾಸತಿ, ಅನನುವಿಚ್ಚ ಅಪರಿಯೋಗಾಹೇತ್ವಾ ವಣ್ಣಾರಹಸ್ಸ ಅವಣ್ಣಂ ಭಾಸತಿ, ಮಿಚ್ಛಾದಿಟ್ಠಿಕಾ ಚ ಹೋತಿ, ಮಿಚ್ಛಾಸಙ್ಕಪ್ಪಾ ಚ, ಸದ್ಧಾದೇಯ್ಯಂ ವಿನಿಪಾತೇತಿ. ಇಮೇಹಿ ಖೋ, ಭಿಕ್ಖವೇ, ಪಞ್ಚಹಿ ಧಮ್ಮೇಹಿ ಸಮನ್ನಾಗತಾ ಭಿಕ್ಖುನೀ ಯಥಾಭತಂ ನಿಕ್ಖಿತ್ತಾ ಏವಂ ನಿರಯೇ.

‘‘ಪಞ್ಚಹಿ, ಭಿಕ್ಖವೇ, ಧಮ್ಮೇಹಿ ಸಮನ್ನಾಗತಾ ಭಿಕ್ಖುನೀ ಯಥಾಭತಂ ನಿಕ್ಖಿತ್ತಾ ಏವಂ ಸಗ್ಗೇ. ಕತಮೇಹಿ ಪಞ್ಚಹಿ? ಅನುವಿಚ್ಚ ಪರಿಯೋಗಾಹೇತ್ವಾ ಅವಣ್ಣಾರಹಸ್ಸ ಅವಣ್ಣಂ ಭಾಸತಿ, ಅನುವಿಚ್ಚ ಪರಿಯೋಗಾಹೇತ್ವಾ ವಣ್ಣಾರಹಸ್ಸ ವಣ್ಣಂ ಭಾಸತಿ, ಸಮ್ಮಾದಿಟ್ಠಿಕಾ ಚ, ಹೋತಿ, ಸಮ್ಮಾಸಙ್ಕಪ್ಪಾ ಚ, ಸದ್ಧಾದೇಯ್ಯಂ ನ ವಿನಿಪಾತೇತಿ. ಇಮೇಹಿ ಖೋ, ಭಿಕ್ಖವೇ, ಪಞ್ಚಹಿ ಧಮ್ಮೇಹಿ ಸಮನ್ನಾಗತಾ ಭಿಕ್ಖುನೀ ಯಥಾಭತಂ ನಿಕ್ಖಿತ್ತಾ ಏವಂ ಸಗ್ಗೇ’’ತಿ. ಅಟ್ಠಮಂ.

೯. ಮಿಚ್ಛಾವಾಚಾಸುತ್ತಂ

೧೧೯. ‘‘ಪಞ್ಚಹಿ, ಭಿಕ್ಖವೇ, ಧಮ್ಮೇಹಿ ಸಮನ್ನಾಗತಾ ಭಿಕ್ಖುನೀ ಯಥಾಭತಂ ನಿಕ್ಖಿತ್ತಾ ಏವಂ ನಿರಯೇ. ಕತಮೇಹಿ ಪಞ್ಚಹಿ? ಅನನುವಿಚ್ಚ ಅಪರಿಯೋಗಾಹೇತ್ವಾ ಅವಣ್ಣಾರಹಸ್ಸ ವಣ್ಣಂ ಭಾಸತಿ, ಅನನುವಿಚ್ಚ ಅಪರಿಯೋಗಾಹೇತ್ವಾ ವಣ್ಣಾರಹಸ್ಸ ಅವಣ್ಣಂ ಭಾಸತಿ, ಮಿಚ್ಛಾವಾಚಾ ಚ ಹೋತಿ, ಮಿಚ್ಛಾಕಮ್ಮನ್ತಾ ಚ, ಸದ್ಧಾದೇಯ್ಯಂ ವಿನಿಪಾತೇತಿ. ಇಮೇಹಿ ಖೋ, ಭಿಕ್ಖವೇ, ಪಞ್ಚಹಿ ಧಮ್ಮೇಹಿ ಸಮನ್ನಾಗತಾ ಭಿಕ್ಖುನೀ ಯಥಾಭತಂ ನಿಕ್ಖಿತ್ತಾ ಏವಂ ನಿರಯೇ.

‘‘ಪಞ್ಚಹಿ, ಭಿಕ್ಖವೇ, ಧಮ್ಮೇಹಿ ಸಮನ್ನಾಗತಾ ಭಿಕ್ಖುನೀ ಯಥಾಭತಂ ನಿಕ್ಖಿತ್ತಾ ಏವಂ ಸಗ್ಗೇ. ಕತಮೇಹಿ ಪಞ್ಚಹಿ? ಅನುವಿಚ್ಚ ಪರಿಯೋಗಾಹೇತ್ವಾ ಅವಣ್ಣಾರಹಸ್ಸ ಅವಣ್ಣಂ ಭಾಸತಿ, ಅನುವಿಚ್ಚ ಪರಿಯೋಗಾಹೇತ್ವಾ ವಣ್ಣಾರಹಸ್ಸ ವಣ್ಣಂ ಭಾಸತಿ, ಸಮ್ಮಾವಾಚಾ ಚ ಹೋತಿ, ಸಮ್ಮಾಕಮ್ಮನ್ತಾ ಚ, ಸದ್ಧಾದೇಯ್ಯಂ ನ ವಿನಿಪಾತೇತಿ. ಇಮೇಹಿ ಖೋ ಭಿಕ್ಖವೇ, ಪಞ್ಚಹಿ ಧಮ್ಮೇಹಿ ಸಮನ್ನಾಗತಾ ಭಿಕ್ಖುನೀ ಯಥಾಭತಂ ನಿಕ್ಖಿತ್ತಾ ಏವಂ ಸಗ್ಗೇ’’ತಿ. ನವಮಂ.

೧೦. ಮಿಚ್ಛಾವಾಯಾಮಸುತ್ತಂ

೧೨೦. ‘‘ಪಞ್ಚಹಿ, ಭಿಕ್ಖವೇ, ಧಮ್ಮೇಹಿ ಸಮನ್ನಾಗತಾ ಭಿಕ್ಖುನೀ ಯಥಾಭತಂ ನಿಕ್ಖಿತ್ತಾ ಏವಂ ನಿರಯೇ. ಕತಮೇಹಿ ಪಞ್ಚಹಿ? ಅನನುವಿಚ್ಚ ಅಪರಿಯೋಗಾಹೇತ್ವಾ ಅವಣ್ಣಾರಹಸ್ಸ ವಣ್ಣಂ ಭಾಸತಿ, ಅನನುವಿಚ್ಚ ಅಪರಿಯೋಗಾಹೇತ್ವಾ ವಣ್ಣಾರಹಸ್ಸ ಅವಣ್ಣಂ ಭಾಸತಿ, ಮಿಚ್ಛಾವಾಯಾಮಾ ಚ ಹೋತಿ, ಮಿಚ್ಛಾಸತಿನೀ ಚ [ಮಿಚ್ಛಾಸತಿ ಚ (ಸ್ಯಾ.)], ಸದ್ಧಾದೇಯ್ಯಂ ವಿನಿಪಾತೇತಿ. ಇಮೇಹಿ ಖೋ, ಭಿಕ್ಖವೇ, ಪಞ್ಚಹಿ ಧಮ್ಮೇಹಿ ಸಮನ್ನಾಗತಾ ಭಿಕ್ಖುನೀ ಯಥಾಭತಂ ನಿಕ್ಖಿತ್ತಾ ಏವಂ ನಿರಯೇ.

‘‘ಪಞ್ಚಹಿ, ಭಿಕ್ಖವೇ, ಧಮ್ಮೇಹಿ ಸಮನ್ನಾಗತಾ ಭಿಕ್ಖುನೀ ಯಥಾಭತಂ ನಿಕ್ಖಿತ್ತಾ ಏವಂ ಸಗ್ಗೇ. ಕತಮೇಹಿ ಪಞ್ಚಹಿ? ಅನುವಿಚ್ಚ ಪರಿಯೋಗಾಹೇತ್ವಾ ಅವಣ್ಣಾರಹಸ್ಸ ಅವಣ್ಣಂ ಭಾಸತಿ, ಅನುವಿಚ್ಚ ಪರಿಯೋಗಾಹೇತ್ವಾ ವಣ್ಣಾರಹಸ್ಸ ವಣ್ಣಂ ಭಾಸತಿ, ಸಮ್ಮಾವಾಯಾಮಾ ಚ ಹೋತಿ, ಸಮ್ಮಾಸತಿನೀ ಚ, ಸದ್ಧಾದೇಯ್ಯಂ ನ ವಿನಿಪಾತೇತಿ. ಇಮೇಹಿ ಖೋ, ಭಿಕ್ಖವೇ, ಪಞ್ಚಹಿ ಧಮ್ಮೇಹಿ ಸಮನ್ನಾಗತಾ ಭಿಕ್ಖುನೀ ಯಥಾಭತಂ ನಿಕ್ಖಿತ್ತಾ ಏವಂ ಸಗ್ಗೇ’’ತಿ. ದಸಮಂ.

ಅನ್ಧಕವಿನ್ದವಗ್ಗೋ ದುತಿಯೋ.