೬. ಪಟಿಸಮ್ಭಿದಾಪತ್ತಸುತ್ತಂ

೮೬. ‘‘ಪಞ್ಚಹಿ, ಭಿಕ್ಖವೇ, ಧಮ್ಮೇಹಿ ಸಮನ್ನಾಗತೋ ಥೇರೋ ಭಿಕ್ಖು ಸಬ್ರಹ್ಮಚಾರೀನಂ ಪಿಯೋ ಚ ಹೋತಿ ಮನಾಪೋ ಚ ಗರು ಚ ಭಾವನೀಯೋ ಚ. ಕತಮೇಹಿ ಪಞ್ಚಹಿ? ಅತ್ಥಪಟಿಸಮ್ಭಿದಾಪತ್ತೋ ಹೋತಿ, ಧಮ್ಮಪಟಿಸಮ್ಭಿದಾಪತ್ತೋ ಹೋತಿ, ನಿರುತ್ತಿಪಟಿಸಮ್ಭಿದಾಪತ್ತೋ ಹೋತಿ, ಪಟಿಭಾನಪಟಿಸಮ್ಭಿದಾಪತ್ತೋ ಹೋತಿ, ಯಾನಿ ತಾನಿ ಸಬ್ರಹ್ಮಚಾರೀನಂ ಉಚ್ಚಾವಚಾನಿ ಕಿಂಕರಣೀಯಾನಿ ತತ್ಥ ದಕ್ಖೋ ಹೋತಿ ಅನಲಸೋ ತತ್ರುಪಾಯಾಯ ವೀಮಂಸಾಯ ಸಮನ್ನಾಗತೋ ಅಲಂ ಕಾತುಂ ಅಲಂ ಸಂವಿಧಾತುಂ – ಇಮೇಹಿ ಖೋ, ಭಿಕ್ಖವೇ, ಪಞ್ಚಹಿ ಧಮ್ಮೇಹಿ ಸಮನ್ನಾಗತೋ ಥೇರೋ ಭಿಕ್ಖು ಸಬ್ರಹ್ಮಚಾರೀನಂ ಪಿಯೋ ಚ ಹೋತಿ ಮನಾಪೋ ಚ ಗರು ಚ ಭಾವನೀಯೋ ಚಾ’’ತಿ. ಛಟ್ಠಂ.