೧೦. ಚತುತ್ಥಅನಾಗತಭಯಸುತ್ತಂ

೮೦. ‘‘ಪಞ್ಚಿಮಾನಿ, ಭಿಕ್ಖವೇ, ಅನಾಗತಭಯಾನಿ ಏತರಹಿ ಅಸಮುಪ್ಪನ್ನಾನಿ ಆಯತಿಂ ಸಮುಪ್ಪಜ್ಜಿಸ್ಸನ್ತಿ. ತಾನಿ ವೋ ಪಟಿಬುಜ್ಝಿತಬ್ಬಾನಿ; ಪಟಿಬುಜ್ಝಿತ್ವಾ ಚ ತೇಸಂ ಪಹಾನಾಯ ವಾಯಮಿತಬ್ಬಂ.

‘‘ಕತಮಾನಿ ಪಞ್ಚ? ಭವಿಸ್ಸನ್ತಿ, ಭಿಕ್ಖವೇ, ಭಿಕ್ಖೂ ಅನಾಗತಮದ್ಧಾನಂ ಚೀವರೇ ಕಲ್ಯಾಣಕಾಮಾ. ತೇ ಚೀವರೇ ಕಲ್ಯಾಣಕಾಮಾ ಸಮಾನಾ ರಿಞ್ಚಿಸ್ಸನ್ತಿ ಪಂಸುಕೂಲಿಕತ್ತಂ, ರಿಞ್ಚಿಸ್ಸನ್ತಿ ಅರಞ್ಞವನಪತ್ಥಾನಿ ಪನ್ತಾನಿ ಸೇನಾಸನಾನಿ; ಗಾಮನಿಗಮರಾಜಧಾನೀಸು ಓಸರಿತ್ವಾ ವಾಸಂ ಕಪ್ಪೇಸ್ಸನ್ತಿ, ಚೀವರಹೇತು ಚ ಅನೇಕವಿಹಿತಂ ಅನೇಸನಂ ಅಪ್ಪತಿರೂಪಂ ಆಪಜ್ಜಿಸ್ಸನ್ತಿ. ಇದಂ, ಭಿಕ್ಖವೇ, ಪಠಮಂ ಅನಾಗತಭಯಂ ಏತರಹಿ ಅಸಮುಪ್ಪನ್ನಂ ಆಯತಿಂ ಸಮುಪ್ಪಜ್ಜಿಸ್ಸತಿ. ತಂ ವೋ ಪಟಿಬುಜ್ಝಿತಬ್ಬಂ; ಪಟಿಬುಜ್ಝಿತ್ವಾ ಚ ತಸ್ಸ ಪಹಾನಾಯ ವಾಯಮಿತಬ್ಬಂ.

‘‘ಪುನ ಚಪರಂ, ಭಿಕ್ಖವೇ, ಭವಿಸ್ಸನ್ತಿ ಭಿಕ್ಖೂ ಅನಾಗತಮದ್ಧಾನಂ ಪಿಣ್ಡಪಾತೇ ಕಲ್ಯಾಣಕಾಮಾ. ತೇ ಪಿಣ್ಡಪಾತೇ ಕಲ್ಯಾಣಕಾಮಾ ಸಮಾನಾ ರಿಞ್ಚಿಸ್ಸನ್ತಿ ಪಿಣ್ಡಪಾತಿಕತ್ತಂ, ರಿಞ್ಚಿಸ್ಸನ್ತಿ ಅರಞ್ಞವನಪತ್ಥಾನಿ ಪನ್ತಾನಿ ಸೇನಾಸನಾನಿ; ಗಾಮನಿಗಮರಾಜಧಾನೀಸು ಓಸರಿತ್ವಾ ವಾಸಂ ಕಪ್ಪೇಸ್ಸನ್ತಿ ಜಿವ್ಹಗ್ಗೇನ ರಸಗ್ಗಾನಿ ಪರಿಯೇಸಮಾನಾ, ಪಿಣ್ಡಪಾತಹೇತು ಚ ಅನೇಕವಿಹಿತಂ ಅನೇಸನಂ ಅಪ್ಪತಿರೂಪಂ ಆಪಜ್ಜಿಸ್ಸನ್ತಿ. ಇದಂ, ಭಿಕ್ಖವೇ, ದುತಿಯಂ ಅನಾಗತಭಯಂ ಏತರಹಿ ಅಸಮುಪ್ಪನ್ನಂ ಆಯತಿಂ ಸಮುಪ್ಪಜ್ಜಿಸ್ಸತಿ. ತಂ ವೋ ಪಟಿಬುಜ್ಝಿತಬ್ಬಂ; ಪಟಿಬುಜ್ಝಿತ್ವಾ ಚ ತಸ್ಸ ಪಹಾನಾಯ ವಾಯಮಿತಬ್ಬಂ.

‘‘ಪುನ ಚಪರಂ, ಭಿಕ್ಖವೇ, ಭವಿಸ್ಸನ್ತಿ ಭಿಕ್ಖೂ ಅನಾಗತಮದ್ಧಾನಂ ಸೇನಾಸನೇ ಕಲ್ಯಾಣಕಾಮಾ. ತೇ ಸೇನಾಸನೇ ಕಲ್ಯಾಣಕಾಮಾ ಸಮಾನಾ ರಿಞ್ಚಿಸ್ಸನ್ತಿ ರುಕ್ಖಮೂಲಿಕತ್ತಂ [ಆರಞ್ಞಕತ್ತಂ (ಸ್ಯಾ. ಕಂ.)], ರಿಞ್ಚಿಸ್ಸನ್ತಿ ಅರಞ್ಞವನಪತ್ಥಾನಿ ಪನ್ತಾನಿ ಸೇನಾಸನಾನಿ; ಗಾಮನಿಗಮರಾಜಧಾನೀಸು ಓಸರಿತ್ವಾ ವಾಸಂ ಕಪ್ಪೇಸ್ಸನ್ತಿ, ಸೇನಾಸನಹೇತು ಚ ಅನೇಕವಿಹಿತಂ ಅನೇಸನಂ ಅಪ್ಪತಿರೂಪಂ ಆಪಜ್ಜಿಸ್ಸನ್ತಿ. ಇದಂ, ಭಿಕ್ಖವೇ, ತತಿಯಂ ಅನಾಗತಭಯಂ ಏತರಹಿ ಅಸಮುಪ್ಪನ್ನಂ ಆಯತಿಂ ಸಮುಪ್ಪಜ್ಜಿಸ್ಸತಿ. ತಂ ವೋ ಪಟಿಬುಜ್ಝಿತಬ್ಬಂ; ಪಟಿಬುಜ್ಝಿತ್ವಾ ಚ ತಸ್ಸ ಪಹಾನಾಯ ವಾಯಮಿತಬ್ಬಂ.

‘‘ಪುನ ಚಪರಂ, ಭಿಕ್ಖವೇ, ಭವಿಸ್ಸನ್ತಿ ಭಿಕ್ಖೂ ಅನಾಗತಮದ್ಧಾನಂ ಭಿಕ್ಖುನೀಸಿಕ್ಖಮಾನಾಸಮಣುದ್ದೇಸೇಹಿ ಸಂಸಟ್ಠಾ ವಿಹರಿಸ್ಸನ್ತಿ. ಭಿಕ್ಖುನೀಸಿಕ್ಖಮಾನಾಸಮಣುದ್ದೇಸೇಹಿ ಸಂಸಗ್ಗೇ ಖೋ ಪನ, ಭಿಕ್ಖವೇ, ಸತಿ ಏತಂ ಪಾಟಿಕಙ್ಖಂ – ‘ಅನಭಿರತಾ ವಾ ಬ್ರಹ್ಮಚರಿಯಂ ಚರಿಸ್ಸನ್ತಿ, ಅಞ್ಞತರಂ ವಾ ಸಂಕಿಲಿಟ್ಠಂ ಆಪತ್ತಿಂ ಆಪಜ್ಜಿಸ್ಸನ್ತಿ, ಸಿಕ್ಖಂ ವಾ ಪಚ್ಚಕ್ಖಾಯ ಹೀನಾಯಾವತ್ತಿಸ್ಸನ್ತಿ’. ಇದಂ, ಭಿಕ್ಖವೇ, ಚತುತ್ಥಂ ಅನಾಗತಭಯಂ ಏತರಹಿ ಅಸಮುಪ್ಪನ್ನಂ ಆಯತಿಂ ಸಮುಪ್ಪಜ್ಜಿಸ್ಸತಿ. ತಂ ವೋ ಪಟಿಬುಜ್ಝಿತಬ್ಬಂ; ಪಟಿಬುಜ್ಝಿತ್ವಾ ಚ ತಸ್ಸ ಪಹಾನಾಯ ವಾಯಮಿತಬ್ಬಂ.

‘‘ಪುನ ಚಪರಂ, ಭಿಕ್ಖವೇ, ಭವಿಸ್ಸನ್ತಿ ಭಿಕ್ಖೂ ಅನಾಗತಮದ್ಧಾನಂ ಆರಾಮಿಕಸಮಣುದ್ದೇಸೇಹಿ ಸಂಸಟ್ಠಾ ವಿಹರಿಸ್ಸನ್ತಿ. ಆರಾಮಿಕಸಮಣುದ್ದೇಸೇಹಿ ಸಂಸಗ್ಗೇ ಖೋ ಪನ, ಭಿಕ್ಖವೇ, ಸತಿ ಏತಂ ಪಾಟಿಕಙ್ಖಂ – ‘ಅನೇಕವಿಹಿತಂ ಸನ್ನಿಧಿಕಾರಪರಿಭೋಗಂ ಅನುಯುತ್ತಾ ವಿಹರಿಸ್ಸನ್ತಿ, ಓಳಾರಿಕಮ್ಪಿ ನಿಮಿತ್ತಂ ಕರಿಸ್ಸನ್ತಿ, ಪಥವಿಯಾಪಿ ಹರಿತಗ್ಗೇಪಿ’. ಇದಂ, ಭಿಕ್ಖವೇ, ಪಞ್ಚಮಂ ಅನಾಗತಭಯಂ ಏತರಹಿ ಅಸಮುಪ್ಪನ್ನಂ ಆಯತಿಂ ಸಮುಪ್ಪಜ್ಜಿಸ್ಸತಿ. ತಂ ವೋ ಪಟಿಬುಜ್ಝಿತಬ್ಬಂ; ಪಟಿಬುಜ್ಝಿತ್ವಾ ಚ ತಸ್ಸ ಪಹಾನಾಯ ವಾಯಮಿತಬ್ಬಂ.

‘‘ಇಮಾನಿ ಖೋ, ಭಿಕ್ಖವೇ, ಪಞ್ಚ ಅನಾಗತಭಯಾನಿ ಏತರಹಿ ಅಸಮುಪ್ಪನ್ನಾನಿ ಆಯತಿಂ ಸಮುಪ್ಪಜ್ಜಿಸ್ಸನ್ತಿ. ತಾನಿ ವೋ ಪಟಿಬುಜ್ಝಿತಬ್ಬಾನಿ; ಪಟಿಬುಜ್ಝಿತ್ವಾ ಚ ತೇಸಂ ಪಹಾನಾಯ ವಾಯಮಿತಬ್ಬ’’ನ್ತಿ. ದಸಮಂ.

ಯೋಧಾಜೀವವಗ್ಗೋ ತತಿಯೋ.