(೧೫) ೫. ಆಭಾವಗ್ಗೋ

೧. ಆಭಾಸುತ್ತಂ

೧೪೧. ‘‘ಚತಸ್ಸೋ ಇಮಾ, ಭಿಕ್ಖವೇ, ಆಭಾ. ಕತಮಾ ಚತಸ್ಸೋ? ಚನ್ದಾಭಾ, ಸೂರಿಯಾಭಾ, ಅಗ್ಗಾಭಾ, ಪಞ್ಞಾಭಾ – ಇಮಾ ಖೋ, ಭಿಕ್ಖವೇ, ಚತಸ್ಸೋ ಆಭಾ. ಏತದಗ್ಗಂ, ಭಿಕ್ಖವೇ, ಇಮಾಸಂ ಚತುನ್ನಂ [ಚತಸ್ಸನ್ನಂ (ಸ್ಯಾ. ಕಂ.) ಸದ್ದನೀತಿಪದಮಾಲಾ ಪಸ್ಸಿತಬ್ಬಾ] ಆಭಾನಂ ಯದಿದಂ ಪಞ್ಞಾಭಾ’’ತಿ. ಪಠಮಂ.

೨. ಪಭಾಸುತ್ತಂ

೧೪೨. ‘‘ಚತಸ್ಸೋ ಇಮಾ, ಭಿಕ್ಖವೇ, ಪಭಾ. ಕತಮಾ ಚತಸ್ಸೋ? ಚನ್ದಪ್ಪಭಾ, ಸೂರಿಯಪ್ಪಭಾ, ಅಗ್ಗಿಪ್ಪಭಾ, ಪಞ್ಞಾಪಭಾ – ಇಮಾ ಖೋ, ಭಿಕ್ಖವೇ, ಚತಸ್ಸೋ ಪಭಾ. ಏತದಗ್ಗಂ, ಭಿಕ್ಖವೇ, ಇಮಾಸಂ ಚತುನ್ನಂ ಪಭಾನಂ ಯದಿದಂ ಪಞ್ಞಾಪಭಾ’’ತಿ. ದುತಿಯಂ.

೩. ಆಲೋಕಸುತ್ತಂ

೧೪೩. ‘‘ಚತ್ತಾರೋಮೇ, ಭಿಕ್ಖವೇ, ಆಲೋಕಾ. ಕತಮೇ ಚತ್ತಾರೋ? ಚನ್ದಾಲೋಕೋ, ಸೂರಿಯಾಲೋಕೋ, ಅಗ್ಗಾಲೋಕೋ, ಪಞ್ಞಾಲೋಕೋ – ಇಮೇ ಖೋ, ಭಿಕ್ಖವೇ, ಚತ್ತಾರೋ ಆಲೋಕಾ. ಏತದಗ್ಗಂ, ಭಿಕ್ಖವೇ, ಇಮೇಸಂ ಚತುನ್ನಂ ಆಲೋಕಾನಂ ಯದಿದಂ ಪಞ್ಞಾಲೋಕೋ’’ತಿ. ತತಿಯಂ.

೪. ಓಭಾಸಸುತ್ತಂ

೧೪೪. ‘‘ಚತ್ತಾರೋಮೇ, ಭಿಕ್ಖವೇ, ಓಭಾಸಾ. ಕತಮೇ ಚತ್ತಾರೋ? ಚನ್ದೋಭಾಸೋ, ಸೂರಿಯೋಭಾಸೋ, ಅಗ್ಗೋಭಾಸೋ, ಪಞ್ಞೋಭಾಸೋ – ಇಮೇ ಖೋ, ಭಿಕ್ಖವೇ, ಚತ್ತಾರೋ ಓಭಾಸಾ. ಏತದಗ್ಗಂ, ಭಿಕ್ಖವೇ, ಇಮೇಸಂ ಚತುನ್ನಂ ಓಭಾಸಾನಂ ಯದಿದಂ ಪಞ್ಞೋಭಾಸೋ’’ತಿ. ಚತುತ್ಥಂ.

೫. ಪಜ್ಜೋತಸುತ್ತಂ

೧೪೫. ‘‘ಚತ್ತಾರೋಮೇ, ಭಿಕ್ಖವೇ, ಪಜ್ಜೋತಾ. ಕತಮೇ ಚತ್ತಾರೋ? ಚನ್ದಪಜ್ಜೋತೋ, ಸೂರಿಯಪಜ್ಜೋತೋ, ಅಗ್ಗಿಪಜ್ಜೋತೋ, ಪಞ್ಞಾಪಜ್ಜೋತೋ – ಇಮೇ ಖೋ, ಭಿಕ್ಖವೇ, ಚತ್ತಾರೋ ಪಜ್ಜೋತಾ. ಏತದಗ್ಗಂ, ಭಿಕ್ಖವೇ, ಇಮೇಸಂ ಚತುನ್ನಂ ಪಜ್ಜೋತಾನಂ ಯದಿದಂ ಪಞ್ಞಾಪಜ್ಜೋತೋ’’ತಿ. ಪಞ್ಚಮಂ.

೬. ಪಠಮಕಾಲಸುತ್ತಂ

೧೪೬. ‘‘ಚತ್ತಾರೋಮೇ, ಭಿಕ್ಖವೇ, ಕಾಲಾ. ಕತಮೇ ಚತ್ತಾರೋ? ಕಾಲೇನ ಧಮ್ಮಸ್ಸವನಂ, ಕಾಲೇನ ಧಮ್ಮಸಾಕಚ್ಛಾ, ಕಾಲೇನ ಸಮ್ಮಸನಾ [ಕಾಲೇನ ಸಮಥೋ (ಸೀ. ಸ್ಯಾ. ಕಂ. ಪೀ.)], ಕಾಲೇನ ವಿಪಸ್ಸನಾ – ಇಮೇ ಖೋ, ಭಿಕ್ಖವೇ, ಚತ್ತಾರೋ ಕಾಲಾ’’ತಿ. ಛಟ್ಠಂ.

೭. ದುತಿಯಕಾಲಸುತ್ತಂ

೧೪೭. ‘‘ಚತ್ತಾರೋಮೇ, ಭಿಕ್ಖವೇ, ಕಾಲಾ ಸಮ್ಮಾ ಭಾವಿಯಮಾನಾ ಸಮ್ಮಾ ಅನುಪರಿವತ್ತಿಯಮಾನಾ ಅನುಪುಬ್ಬೇನ ಆಸವಾನಂ ಖಯಂ ಪಾಪೇನ್ತಿ. ಕತಮೇ ಚತ್ತಾರೋ? ಕಾಲೇನ ಧಮ್ಮಸ್ಸವನಂ, ಕಾಲೇನ ಧಮ್ಮಸಾಕಚ್ಛಾ, ಕಾಲೇನ ಸಮ್ಮಸನಾ, ಕಾಲೇನ ವಿಪಸ್ಸನಾ – ಇಮೇ ಖೋ, ಭಿಕ್ಖವೇ, ಚತ್ತಾರೋ ಕಾಲಾ ಸಮ್ಮಾ ಭಾವಿಯಮಾನಾ ಸಮ್ಮಾ ಅನುಪರಿವತ್ತಿಯಮಾನಾ ಅನುಪುಬ್ಬೇನ ಆಸವಾನಂ ಖಯಂ ಪಾಪೇನ್ತಿ.

‘‘ಸೇಯ್ಯಥಾಪಿ, ಭಿಕ್ಖವೇ, ಉಪರಿಪಬ್ಬತೇ ಥುಲ್ಲಫುಸಿತಕೇ ದೇವೇ ವಸ್ಸನ್ತೇ ತಂ ಉದಕಂ ಯಥಾನಿನ್ನಂ ಪವತ್ತಮಾನಂ ಪಬ್ಬತಕನ್ದರಪದರಸಾಖಾ ಪರಿಪೂರೇತಿ; ಪಬ್ಬತಕನ್ದರಪದರಸಾಖಾ ಪರಿಪೂರಾ ಕುಸೋಬ್ಭೇ ಪರಿಪೂರೇನ್ತಿ; ಕುಸೋಬ್ಭಾ ಪರಿಪೂರಾ ಮಹಾಸೋಬ್ಭೇ ಪರಿಪೂರೇನ್ತಿ; ಮಹಾಸೋಬ್ಭಾ ಪರಿಪೂರಾ ಕುನ್ನದಿಯೋ ಪರಿಪೂರೇನ್ತಿ; ಕುನ್ನದಿಯೋ ಪರಿಪೂರಾ ಮಹಾನದಿಯೋ ಪರಿಪೂರೇನ್ತಿ; ಮಹಾನದಿಯೋ ಪರಿಪೂರಾ ಸಮುದ್ದಂ [ಸಮುದ್ದಂ ಸಾಗರಂ (ಸೀ. ಪೀ. ಕ.), ಸಮುದ್ದಸಾಗರಂ (ಸ್ಯಾ. ಕಂ.)] ಪರಿಪೂರೇನ್ತಿ. ಏವಮೇವಂ ಖೋ, ಭಿಕ್ಖವೇ, ಇಮೇ ಚತ್ತಾರೋ ಕಾಲಾ ಸಮ್ಮಾ ಭಾವಿಯಮಾನಾ ಸಮ್ಮಾ ಅನುಪರಿವತ್ತಿಯಮಾನಾ ಅನುಪುಬ್ಬೇನ ಆಸವಾನಂ ಖಯಂ ಪಾಪೇನ್ತೀ’’ತಿ. ಸತ್ತಮಂ.

೮. ದುಚ್ಚರಿತಸುತ್ತಂ

೧೪೮. ‘‘ಚತ್ತಾರಿಮಾನಿ, ಭಿಕ್ಖವೇ, ವಚೀದುಚ್ಚರಿತಾನಿ. ಕತಮಾನಿ ಚತ್ತಾರಿ? ಮುಸಾವಾದೋ, ಪಿಸುಣಾ ವಾಚಾ, ಫರುಸಾ ವಾಚಾ, ಸಮ್ಫಪ್ಪಲಾಪೋ – ಇಮಾನಿ ಖೋ, ಭಿಕ್ಖವೇ, ಚತ್ತಾರಿ ವಚೀದುಚ್ಚರಿತಾನೀ’’ತಿ. ಅಟ್ಠಮಂ.

೯. ಸುಚರಿತಸುತ್ತಂ

೧೪೯. ‘‘ಚತ್ತಾರಿಮಾನಿ, ಭಿಕ್ಖವೇ, ವಚೀಸುಚರಿತಾನಿ. ಕತಮಾನಿ ಚತ್ತಾರಿ? ಸಚ್ಚವಾಚಾ, ಅಪಿಸುಣಾ ವಾಚಾ, ಸಣ್ಹಾ ವಾಚಾ, ಮನ್ತಭಾಸಾ – ಇಮಾನಿ ಖೋ, ಭಿಕ್ಖವೇ, ಚತ್ತಾರಿ ವಚೀಸುಚರಿತಾನೀ’’ತಿ. ನವಮಂ.

೧೦. ಸಾರಸುತ್ತಂ

೧೫೦. ‘‘ಚತ್ತಾರೋಮೇ, ಭಿಕ್ಖವೇ, ಸಾರಾ. ಕತಮೇ ಚತ್ತಾರೋ? ಸೀಲಸಾರೋ, ಸಮಾಧಿಸಾರೋ, ಪಞ್ಞಾಸಾರೋ, ವಿಮುತ್ತಿಸಾರೋ – ಇಮೇ ಖೋ, ಭಿಕ್ಖವೇ, ಚತ್ತಾರೋ ಸಾರಾ’’ತಿ. ದಸಮಂ.

ಆಭಾವಗ್ಗೋ ಪಞ್ಚಮೋ.