೩. ಸಪ್ಪುರಿಸಸುತ್ತಂ

೭೩. ‘‘ಚತೂಹಿ, ಭಿಕ್ಖವೇ, ಧಮ್ಮೇಹಿ ಸಮನ್ನಾಗತೋ ಅಸಪ್ಪುರಿಸೋ ವೇದಿತಬ್ಬೋ. ಕತಮೇಹಿ ಚತೂಹಿ? ಇಧ, ಭಿಕ್ಖವೇ, ಅಸಪ್ಪುರಿಸೋ ಯೋ ಹೋತಿ ಪರಸ್ಸ ಅವಣ್ಣೋ ತಂ ಅಪುಟ್ಠೋಪಿ ಪಾತು ಕರೋತಿ, ಕೋ ಪನ ವಾದೋ ಪುಟ್ಠಸ್ಸ! ಪುಟ್ಠೋ ಖೋ ಪನ ಪಞ್ಹಾಭಿನೀತೋ ಅಹಾಪೇತ್ವಾ ಅಲಮ್ಬಿತ್ವಾ ಪರಿಪೂರಂ ವಿತ್ಥಾರೇನ ಪರಸ್ಸ ಅವಣ್ಣಂ ಭಾಸಿತಾ ಹೋತಿ. ವೇದಿತಬ್ಬಮೇತಂ, ಭಿಕ್ಖವೇ, ಅಸಪ್ಪುರಿಸೋ ಅಯಂ ಭವನ್ತಿ.

‘‘ಪುನ ಚಪರಂ, ಭಿಕ್ಖವೇ, ಅಸಪ್ಪುರಿಸೋ ಯೋ ಹೋತಿ ಪರಸ್ಸ ವಣ್ಣೋ ತಂ ಪುಟ್ಠೋಪಿ ನ ಪಾತು ಕರೋತಿ, ಕೋ ಪನ ವಾದೋ ಅಪುಟ್ಠಸ್ಸ! ಪುಟ್ಠೋ ಖೋ ಪನ ಪಞ್ಹಾಭಿನೀತೋ ಹಾಪೇತ್ವಾ ಲಮ್ಬಿತ್ವಾ ಅಪರಿಪೂರಂ ಅವಿತ್ಥಾರೇನ ಪರಸ್ಸ ವಣ್ಣಂ ಭಾಸಿತಾ ಹೋತಿ. ವೇದಿತಬ್ಬಮೇತಂ, ಭಿಕ್ಖವೇ, ಅಸಪ್ಪುರಿಸೋ ಅಯಂ ಭವನ್ತಿ.

‘‘ಪುನ ಚಪರಂ, ಭಿಕ್ಖವೇ, ಅಸಪ್ಪುರಿಸೋ ಯೋ ಹೋತಿ ಅತ್ತನೋ ಅವಣ್ಣೋ ತಂ ಪುಟ್ಠೋಪಿ ನ ಪಾತು ಕರೋತಿ, ಕೋ ಪನ ವಾದೋ ಅಪುಟ್ಠಸ್ಸ! ಪುಟ್ಠೋ ಖೋ ಪನ ಪಞ್ಹಾಭಿನೀತೋ ಹಾಪೇತ್ವಾ ಲಮ್ಬಿತ್ವಾ ಅಪರಿಪೂರಂ ಅವಿತ್ಥಾರೇನ ಅತ್ತನೋ ಅವಣ್ಣಂ ಭಾಸಿತಾ ಹೋತಿ. ವೇದಿತಬ್ಬಮೇತಂ, ಭಿಕ್ಖವೇ, ಅಸಪ್ಪುರಿಸೋ ಅಯಂ ಭವನ್ತಿ.

‘‘ಪುನ ಚಪರಂ, ಭಿಕ್ಖವೇ, ಅಸಪ್ಪುರಿಸೋ ಯೋ ಹೋತಿ ಅತ್ತನೋ ವಣ್ಣೋ ತಂ ಅಪುಟ್ಠೋಪಿ ಪಾತು ಕರೋತಿ, ಕೋ ಪನ ವಾದೋ ಪುಟ್ಠಸ್ಸ! ಪುಟ್ಠೋ ಖೋ ಪನ ಪಞ್ಹಾಭಿನೀತೋ ಅಹಾಪೇತ್ವಾ ಅಲಮ್ಬಿತ್ವಾ ಪರಿಪೂರಂ ವಿತ್ಥಾರೇನ ಅತ್ತನೋ ವಣ್ಣಂ ಭಾಸಿತಾ ಹೋತಿ. ವೇದಿತಬ್ಬಮೇತಂ, ಭಿಕ್ಖವೇ, ಅಸಪ್ಪುರಿಸೋ ಅಯಂ ಭವನ್ತಿ. ಇಮೇಹಿ ಖೋ, ಭಿಕ್ಖವೇ, ಚತೂಹಿ ಧಮ್ಮೇಹಿ ಸಮನ್ನಾಗತೋ ಅಸಪ್ಪುರಿಸೋ ವೇದಿತಬ್ಬೋ.

‘‘ಚತೂಹಿ, ಭಿಕ್ಖವೇ, ಧಮ್ಮೇಹಿ ಸಮನ್ನಾಗತೋ ಸಪ್ಪುರಿಸೋ ವೇದಿತಬ್ಬೋ. ಕತಮೇಹಿ ಚತೂಹಿ? ಇಧ, ಭಿಕ್ಖವೇ, ಸಪ್ಪುರಿಸೋ ಯೋ ಹೋತಿ ಪರಸ್ಸ ಅವಣ್ಣೋ ತಂ ಪುಟ್ಠೋಪಿ ನ ಪಾತು ಕರೋತಿ, ಕೋ ಪನ ವಾದೋ ಅಪುಟ್ಠಸ್ಸ! ಪುಟ್ಠೋ ಖೋ ಪನ ಪಞ್ಹಾಭಿನೀತೋ ಹಾಪೇತ್ವಾ ಲಮ್ಬಿತ್ವಾ ಅಪರಿಪೂರಂ ಅವಿತ್ಥಾರೇನ ಪರಸ್ಸ ಅವಣ್ಣಂ ಭಾಸಿತಾ ಹೋತಿ. ವೇದಿತಬ್ಬಮೇತಂ, ಭಿಕ್ಖವೇ, ಸಪ್ಪುರಿಸೋ ಅಯಂ ಭವನ್ತಿ.

‘‘ಪುನ ಚಪರಂ, ಭಿಕ್ಖವೇ, ಸಪ್ಪುರಿಸೋ ಯೋ ಹೋತಿ ಪರಸ್ಸ ವಣ್ಣೋ ತಂ ಅಪುಟ್ಠೋಪಿ ಪಾತು ಕರೋತಿ, ಕೋ ಪನ ವಾದೋ ಪುಟ್ಠಸ್ಸ! ಪುಟ್ಠೋ ಖೋ ಪನ ಪಞ್ಹಾಭಿನೀತೋ ಅಹಾಪೇತ್ವಾ ಅಲಮ್ಬಿತ್ವಾ ಪರಿಪೂರಂ ವಿತ್ಥಾರೇನ ಪರಸ್ಸ ವಣ್ಣಂ ಭಾಸಿತಾ ಹೋತಿ. ವೇದಿತಬ್ಬಮೇತಂ, ಭಿಕ್ಖವೇ, ಸಪ್ಪುರಿಸೋ ಅಯಂ ಭವನ್ತಿ.

‘‘ಪುನ ಚಪರಂ, ಭಿಕ್ಖವೇ, ಸಪ್ಪುರಿಸೋ ಯೋ ಹೋತಿ ಅತ್ತನೋ ಅವಣ್ಣೋ ತಂ ಅಪುಟ್ಠೋಪಿ ಪಾತು ಕರೋತಿ, ಕೋ ಪನ ವಾದೋ ಪುಟ್ಠಸ್ಸ! ಪುಟ್ಠೋ ಖೋ ಪನ ಪಞ್ಹಾಭಿನೀತೋ ಅಹಾಪೇತ್ವಾ ಅಲಮ್ಬಿತ್ವಾ ಪರಿಪೂರಂ ವಿತ್ಥಾರೇನ ಅತ್ತನೋ ಅವಣ್ಣಂ ಭಾಸಿತಾ ಹೋತಿ. ವೇದಿತಬ್ಬಮೇತಂ, ಭಿಕ್ಖವೇ, ಸಪ್ಪುರಿಸೋ ಅಯಂ ಭವನ್ತಿ.

‘‘ಪುನ ಚಪರಂ, ಭಿಕ್ಖವೇ, ಸಪ್ಪುರಿಸೋ ಯೋ ಹೋತಿ ಅತ್ತನೋ ವಣ್ಣೋ ತಂ ಪುಟ್ಠೋಪಿ ನ ಪಾತು ಕರೋತಿ, ಕೋ ಪನ ವಾದೋ ಅಪುಟ್ಠಸ್ಸ! ಪುಟ್ಠೋ ಖೋ ಪನ ಪಞ್ಹಾಭಿನೀತೋ ಹಾಪೇತ್ವಾ ಲಮ್ಬಿತ್ವಾ ಅಪರಿಪೂರಂ ಅವಿತ್ಥಾರೇನ ಅತ್ತನೋ ವಣ್ಣಂ ಭಾಸಿತಾ ಹೋತಿ. ವೇದಿತಬ್ಬಮೇತಂ, ಭಿಕ್ಖವೇ, ಸಪ್ಪುರಿಸೋ ಅಯಂ ಭವನ್ತಿ. ಇಮೇಹಿ ಖೋ, ಭಿಕ್ಖವೇ, ಚತೂಹಿ ಧಮ್ಮೇಹಿ ಸಮನ್ನಾಗತೋ ಸಪ್ಪುರಿಸೋ ವೇದಿತಬ್ಬೋ.

‘‘ಸೇಯ್ಯಥಾಪಿ, ಭಿಕ್ಖವೇ, ವಧುಕಾ ಯಞ್ಞದೇವ ರತ್ತಿಂ ವಾ ದಿವಂ ವಾ ಆನೀತಾ ಹೋತಿ, ತಾವದೇವಸ್ಸಾ ತಿಬ್ಬಂ ಹಿರೋತ್ತಪ್ಪಂ ಪಚ್ಚುಪಟ್ಠಿತಂ ಹೋತಿ ಸಸ್ಸುಯಾಪಿ ಸಸುರೇಪಿ ಸಾಮಿಕೇಪಿ ಅನ್ತಮಸೋ ದಾಸಕಮ್ಮಕರಪೋರಿಸೇಸು. ಸಾ ಅಪರೇನ ಸಮಯೇನ ಸಂವಾಸಮನ್ವಾಯ ವಿಸ್ಸಾಸಮನ್ವಾಯ ಸಸ್ಸುಮ್ಪಿ ಸಸುರಮ್ಪಿ ಸಾಮಿಕಮ್ಪಿ ಏವಮಾಹ – ‘ಅಪೇಥ, ಕಿಂ ಪನ ತುಮ್ಹೇ ಜಾನಾಥಾ’ತಿ! ಏವಮೇವಂ ಖೋ, ಭಿಕ್ಖವೇ, ಇಧೇಕಚ್ಚೋ ಭಿಕ್ಖು ಯಞ್ಞದೇವ ರತ್ತಿಂ ವಾ ದಿವಂ ವಾ ಅಗಾರಸ್ಮಾ ಅನಗಾರಿಯಂ ಪಬ್ಬಜಿತೋ ಹೋತಿ, ತಾವದೇವಸ್ಸ ತಿಬ್ಬಂ ಹಿರೋತ್ತಪ್ಪಂ ಪಚ್ಚುಪಟ್ಠಿತಂ ಹೋತಿ ಭಿಕ್ಖೂಸು ಭಿಕ್ಖುನೀಸು ಉಪಾಸಕೇಸು ಉಪಾಸಿಕಾಸು ಅನ್ತಮಸೋ ಆರಾಮಿಕಸಮಣುದ್ದೇಸೇಸು. ಸೋ ಅಪರೇನ ಸಮಯೇನ ಸಂವಾಸಮನ್ವಾಯ ವಿಸ್ಸಾಸಮನ್ವಾಯ ಆಚರಿಯಮ್ಪಿ ಉಪಜ್ಝಾಯಮ್ಪಿ ಏವಮಾಹ – ‘ಅಪೇಥ, ಕಿಂ ಪನ ತುಮ್ಹೇ ಜಾನಾಥಾ’ತಿ! ತಸ್ಮಾತಿಹ, ಭಿಕ್ಖವೇ, ಏವಂ ಸಿಕ್ಖಿತಬ್ಬಂ – ‘ಅಧುನಾಗತವಧುಕಾಸಮೇನ ಚೇತಸಾ ವಿಹರಿಸ್ಸಾಮಾ’ತಿ. ಏವಞ್ಹಿ ವೋ, ಭಿಕ್ಖವೇ, ಸಿಕ್ಖಿತಬ್ಬ’’ನ್ತಿ. ತತಿಯಂ.