೮. ಸುದತ್ತಸುತ್ತಂ

೫೮. ಅಥ ಖೋ ಅನಾಥಪಿಣ್ಡಿಕೋ ಗಹಪತಿ ಯೇನ ಭಗವಾ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿ. ಏಕಮನ್ತಂ ನಿಸಿನ್ನಂ ಖೋ ಅನಾಥಪಿಣ್ಡಿಕಂ ಗಹಪತಿಂ ಭಗವಾ ಏತದವೋಚ –

‘‘ಭೋಜನಂ, ಗಹಪತಿ, ದದಮಾನೋ ಅರಿಯಸಾವಕೋ ಪಟಿಗ್ಗಾಹಕಾನಂ ಚತ್ತಾರಿ ಠಾನಾನಿ ದೇತಿ. ಕತಮಾನಿ ಚತ್ತಾರಿ? ಆಯುಂ ದೇತಿ, ವಣ್ಣಂ ದೇತಿ, ಸುಖಂ ದೇತಿ, ಬಲಂ ದೇತಿ. ಆಯುಂ ಖೋ ಪನ ದತ್ವಾ ಆಯುಸ್ಸ ಭಾಗೀ ಹೋತಿ ದಿಬ್ಬಸ್ಸ ವಾ ಮಾನುಸಸ್ಸ ವಾ. ವಣ್ಣಂ ದತ್ವಾ… ಸುಖಂ ದತ್ವಾ… ಬಲಂ ದತ್ವಾ ಬಲಸ್ಸ ಭಾಗೀ ಹೋತಿ ದಿಬ್ಬಸ್ಸ ವಾ ಮಾನುಸಸ್ಸ ವಾ. ಭೋಜನಂ, ಗಹಪತಿ, ದದಮಾನೋ ಅರಿಯಸಾವಕೋ ಪಟಿಗ್ಗಾಹಕಾನಂ ಇಮಾನಿ ಚತ್ತಾರಿ ಠಾನಾನಿ ದೇತೀ’’ತಿ.

[ಮಹಾವ. ೨೮೨] ‘‘ಯೋ ಸಞ್ಞತಾನಂ ಪರದತ್ತಭೋಜಿನಂ,

ಕಾಲೇನ ಸಕ್ಕಚ್ಚ ದದಾತಿ ಭೋಜನಂ;

ಚತ್ತಾರಿ ಠಾನಾನಿ ಅನುಪ್ಪವೇಚ್ಛತಿ,

ಆಯುಞ್ಚ ವಣ್ಣಞ್ಚ ಸುಖಂ ಬಲಞ್ಚ.

‘‘ಸೋ ಆಯುದಾಯೀ ವಣ್ಣದಾಯೀ [ಸೋ ಆಯುದಾಯೀ ಬಲದಾಯೀ (ಸೀ. ಪೀ.), ಆಯುದಾಯೀ ಬಲದಾಯೀ (ಸ್ಯಾ. ಕಂ.)], ಸುಖಂ ಬಲಂ ದದೋ [ಸುಖಂ ವಣ್ಣಂ ದದೋ (ಸೀ. ಸ್ಯಾ. ಕಂ. ಪೀ.), ಸುಖಬಲದದೋ (ಕ.)] ನರೋ;

ದೀಘಾಯು ಯಸವಾ ಹೋತಿ, ಯತ್ಥ ಯತ್ಥೂಪಪಜ್ಜತೀ’’ತಿ. ಅಟ್ಠಮಂ;