೧೦. ಭತ್ತುದ್ದೇಸಕಸುತ್ತಂ

೨೦. ‘‘ಚತೂಹಿ, ಭಿಕ್ಖವೇ, ಧಮ್ಮೇಹಿ ಸಮನ್ನಾಗತೋ ಭತ್ತುದ್ದೇಸಕೋ ಯಥಾಭತಂ ನಿಕ್ಖಿತ್ತೋ ಏವಂ ನಿರಯೇ. ಕತಮೇಹಿ ಚತೂಹಿ? ಛನ್ದಾಗತಿಂ ಗಚ್ಛತಿ, ದೋಸಾಗತಿಂ ಗಚ್ಛತಿ, ಮೋಹಾಗತಿಂ ಗಚ್ಛತಿ, ಭಯಾಗತಿಂ ಗಚ್ಛತಿ – ಇಮೇಹಿ ಖೋ, ಭಿಕ್ಖವೇ, ಚತೂಹಿ ಧಮ್ಮೇಹಿ ಸಮನ್ನಾಗತೋ ಭತ್ತುದ್ದೇಸಕೋ ಯಥಾಭತಂ ನಿಕ್ಖಿತ್ತೋ ಏವಂ ನಿರಯೇ.

‘‘ಚತೂಹಿ, ಭಿಕ್ಖವೇ, ಧಮ್ಮೇಹಿ ಸಮನ್ನಾಗತೋ ಭತ್ತುದ್ದೇಸಕೋ ಯಥಾಭತಂ ನಿಕ್ಖಿತ್ತೋ ಏವಂ ಸಗ್ಗೇ. ಕತಮೇಹಿ ಚತೂಹಿ? ನ ಛನ್ದಾಗತಿಂ ಗಚ್ಛತಿ, ನ ದೋಸಾಗತಿಂ ಗಚ್ಛತಿ, ನ ಮೋಹಾಗತಿಂ ಗಚ್ಛತಿ, ನ ಭಯಾಗತಿಂ ಗಚ್ಛತಿ – ಇಮೇಹಿ ಖೋ, ಭಿಕ್ಖವೇ, ಚತೂಹಿ ಧಮ್ಮೇಹಿ ಸಮನ್ನಾಗತೋ ಭತ್ತುದ್ದೇಸಕೋ ಯಥಾಭತಂ ನಿಕ್ಖಿತ್ತೋ ಏವಂ ಸಗ್ಗೇ’’ತಿ.

‘‘ಯೇ ಕೇಚಿ ಕಾಮೇಸು ಅಸಞ್ಞತಾ ಜನಾ,

ಅಧಮ್ಮಿಕಾ ಹೋನ್ತಿ ಅಧಮ್ಮಗಾರವಾ;

ಛನ್ದಾ ದೋಸಾ ಮೋಹಾ ಚ ಭಯಾ ಗಾಮಿನೋ [ಛನ್ದಾ ಚ ದೋಸಾ ಚ ಭಯಾ ಚ ಗಾಮಿನೋ (ಸೀ. ಸ್ಯಾ. ಕಂ. ಪೀ)],

ಪರಿಸಾಕಸಟೋ [ಪರಿಸಕ್ಕಸಾವೋ (ಸೀ. ಸ್ಯಾ. ಕಂ. ಪೀ.)] ಚ ಪನೇಸ ವುಚ್ಚತಿ.

‘‘ಏವಞ್ಹಿ ವುತ್ತಂ ಸಮಣೇನ ಜಾನತಾ,

ತಸ್ಮಾ ಹಿ ತೇ ಸಪ್ಪುರಿಸಾ ಪಸಂಸಿಯಾ;

ಧಮ್ಮೇ ಠಿತಾ ಯೇ ನ ಕರೋನ್ತಿ ಪಾಪಕಂ,

ನ ಛನ್ದಾ ನ ದೋಸಾ ನ ಮೋಹಾ ನ ಭಯಾ ಚ ಗಾಮಿನೋ [ನ ಛನ್ದದೋಸಾ ನ ಭಯಾ ಚ ಗಾಮಿನೋ (ಸೀ. ಸ್ಯಾ. ಕಂ. ಪೀ.)];

‘‘ಪರಿಸಾಯ ಮಣ್ಡೋ ಚ ಪನೇಸ ವುಚ್ಚತಿ,

ಏವಞ್ಹಿ ವುತ್ತಂ ಸಮಣೇನ ಜಾನತಾ’’ತಿ. ದಸಮಂ;

ಚರವಗ್ಗೋ ದುತಿಯೋ.