೫. ಕೇಸಕಮ್ಬಲಸುತ್ತಂ

೧೩೮. ‘‘ಸೇಯ್ಯಥಾಪಿ, ಭಿಕ್ಖವೇ, ಯಾನಿ ಕಾನಿಚಿ ತನ್ತಾವುತಾನಂ ವತ್ಥಾನಂ, ಕೇಸಕಮ್ಬಲೋ ತೇಸಂ ಪಟಿಕಿಟ್ಠೋ ಅಕ್ಖಾಯತಿ. ಕೇಸಕಮ್ಬಲೋ, ಭಿಕ್ಖವೇ, ಸೀತೇ ಸೀತೋ, ಉಣ್ಹೇ ಉಣ್ಹೋ, ದುಬ್ಬಣ್ಣೋ, ದುಗ್ಗನ್ಧೋ, ದುಕ್ಖಸಮ್ಫಸ್ಸೋ. ಏವಮೇವಂ ಖೋ, ಭಿಕ್ಖವೇ, ಯಾನಿ ಕಾನಿಚಿ ಪುಥುಸಮಣಬ್ರಾಹ್ಮಣವಾದಾನಂ [ಸಮಣಪ್ಪವಾದಾನಂ (ಸೀ. ಸ್ಯಾ. ಕಂ. ಪೀ.)] ಮಕ್ಖಲಿವಾದೋ ತೇಸಂ ಪಟಿಕಿಟ್ಠೋ ಅಕ್ಖಾಯತಿ.

‘‘ಮಕ್ಖಲಿ, ಭಿಕ್ಖವೇ, ಮೋಘಪುರಿಸೋ ಏವಂವಾದೀ ಏವಂದಿಟ್ಠಿ – ‘ನತ್ಥಿ ಕಮ್ಮಂ, ನತ್ಥಿ ಕಿರಿಯಂ, ನತ್ಥಿ ವೀರಿಯ’ನ್ತಿ. ಯೇಪಿ ತೇ, ಭಿಕ್ಖವೇ, ಅಹೇಸುಂ ಅತೀತಮದ್ಧಾನಂ ಅರಹನ್ತೋ ಸಮ್ಮಾಸಮ್ಬುದ್ಧಾ, ತೇಪಿ ಭಗವನ್ತೋ ಕಮ್ಮವಾದಾ ಚೇವ ಅಹೇಸುಂ ಕಿರಿಯವಾದಾ ಚ ವೀರಿಯವಾದಾ ಚ. ತೇಪಿ, ಭಿಕ್ಖವೇ, ಮಕ್ಖಲಿ ಮೋಘಪುರಿಸೋ ಪಟಿಬಾಹತಿ – ‘ನತ್ಥಿ ಕಮ್ಮಂ, ನತ್ಥಿ ಕಿರಿಯಂ, ನತ್ಥಿ ವೀರಿಯ’ನ್ತಿ. ಯೇಪಿ ತೇ, ಭಿಕ್ಖವೇ, ಭವಿಸ್ಸನ್ತಿ ಅನಾಗತಮದ್ಧಾನಂ ಅರಹನ್ತೋ ಸಮ್ಮಾಸಮ್ಬುದ್ಧಾ, ತೇಪಿ ಭಗವನ್ತೋ ಕಮ್ಮವಾದಾ ಚೇವ ಭವಿಸ್ಸನ್ತಿ ಕಿರಿಯವಾದಾ ಚ ವೀರಿಯವಾದಾ ಚ. ತೇಪಿ, ಭಿಕ್ಖವೇ, ಮಕ್ಖಲಿ ಮೋಘಪುರಿಸೋ ಪಟಿಬಾಹತಿ – ‘ನತ್ಥಿ ಕಮ್ಮಂ, ನತ್ಥಿ ಕಿರಿಯಂ, ನತ್ಥಿ ವೀರಿಯ’ನ್ತಿ. ಅಹಮ್ಪಿ, ಭಿಕ್ಖವೇ, ಏತರಹಿ ಅರಹಂ ಸಮ್ಮಾಸಮ್ಬುದ್ಧೋ ಕಮ್ಮವಾದೋ ಚೇವ ಕಿರಿಯವಾದೋ ಚ ವೀರಿಯವಾದೋ ಚ. ಮಮ್ಪಿ, ಭಿಕ್ಖವೇ, ಮಕ್ಖಲಿ ಮೋಘಪುರಿಸೋ ಪಟಿಬಾಹತಿ – ‘ನತ್ಥಿ ಕಮ್ಮಂ, ನತ್ಥಿ ಕಿರಿಯಂ, ನತ್ಥಿ ವೀರಿಯ’’’ನ್ತಿ.

‘‘ಸೇಯ್ಯಥಾಪಿ, ಭಿಕ್ಖವೇ, ನದೀಮುಖೇ ಖಿಪ್ಪಂ ಉಡ್ಡೇಯ್ಯ [ಓಡ್ಡೇಯ್ಯ (ಸೀ.)] ಬಹೂನಂ [ಬಹುನ್ನಂ (ಸೀ. ಸ್ಯಾ. ಕಂ. ಪೀ.)] ಮಚ್ಛಾನಂ ಅಹಿತಾಯ ದುಕ್ಖಾಯ ಅನಯಾಯ ಬ್ಯಸನಾಯ; ಏವಮೇವಂ ಖೋ, ಭಿಕ್ಖವೇ, ಮಕ್ಖಲಿ ಮೋಘಪುರಿಸೋ ಮನುಸ್ಸಖಿಪ್ಪಂ ಮಞ್ಞೇ ಲೋಕೇ ಉಪ್ಪನ್ನೋ ಬಹೂನಂ ಸತ್ತಾನಂ ಅಹಿತಾಯ ದುಕ್ಖಾಯ ಅನಯಾಯ ಬ್ಯಸನಾಯಾ’’ತಿ. ಪಞ್ಚಮಂ.