೯. ಅಕುಸಲಮೂಲಸುತ್ತಂ

೭೦. ‘‘ತೀಣಿಮಾನಿ, ಭಿಕ್ಖವೇ, ಅಕುಸಲಮೂಲಾನಿ. ಕತಮಾನಿ ತೀಣಿ? ಲೋಭೋ ಅಕುಸಲಮೂಲಂ, ದೋಸೋ ಅಕುಸಲಮೂಲಂ, ಮೋಹೋ ಅಕುಸಲಮೂಲಂ.

‘‘ಯದಪಿ, ಭಿಕ್ಖವೇ, ಲೋಭೋ ತದಪಿ ಅಕುಸಲಮೂಲಂ [ಅಕುಸಲಂ (ಸೀ. ಸ್ಯಾ. ಕಂ. ಪೀ.)]; ಯದಪಿ ಲುದ್ಧೋ ಅಭಿಸಙ್ಖರೋತಿ ಕಾಯೇನ ವಾಚಾಯ ಮನಸಾ ತದಪಿ ಅಕುಸಲಂ [ಅಕುಸಲಮೂಲಂ (ಕ.)]; ಯದಪಿ ಲುದ್ಧೋ ಲೋಭೇನ ಅಭಿಭೂತೋ ಪರಿಯಾದಿನ್ನಚಿತ್ತೋ ಪರಸ್ಸ ಅಸತಾ ದುಕ್ಖಂ ಉಪ್ಪಾದಯತಿ [ಉಪದಹತಿ (ಸೀ. ಸ್ಯಾ. ಕಂ. ಪೀ.)] ವಧೇನ ವಾ ಬನ್ಧನೇನ ವಾ ಜಾನಿಯಾ ವಾ ಗರಹಾಯ ವಾ ಪಬ್ಬಾಜನಾಯ ವಾ ಬಲವಮ್ಹಿ ಬಲತ್ಥೋ ಇತಿಪಿ ತದಪಿ ಅಕುಸಲಂ [ಇದಂ ಪನ ಸಬ್ಬತ್ಥಪಿ ಏವಮೇವ ದಿಸ್ಸತಿ]. ಇತಿಸ್ಸಮೇ ಲೋಭಜಾ ಲೋಭನಿದಾನಾ ಲೋಭಸಮುದಯಾ ಲೋಭಪಚ್ಚಯಾ ಅನೇಕೇ ಪಾಪಕಾ ಅಕುಸಲಾ ಧಮ್ಮಾ ಸಮ್ಭವನ್ತಿ.

‘‘ಯದಪಿ, ಭಿಕ್ಖವೇ, ದೋಸೋ ತದಪಿ ಅಕುಸಲಮೂಲಂ; ಯದಪಿ ದುಟ್ಠೋ ಅಭಿಸಙ್ಖರೋತಿ ಕಾಯೇನ ವಾಚಾಯ ಮನಸಾ ತದಪಿ ಅಕುಸಲಂ; ಯದಪಿ ದುಟ್ಠೋ ದೋಸೇನ ಅಭಿಭೂತೋ ಪರಿಯಾದಿನ್ನಚಿತ್ತೋ ಪರಸ್ಸ ಅಸತಾ ದುಕ್ಖಂ ಉಪ್ಪಾದಯತಿ ವಧೇನ ವಾ ಬನ್ಧನೇನ ವಾ ಜಾನಿಯಾ ವಾ ಗರಹಾಯ ವಾ ಪಬ್ಬಾಜನಾಯ ವಾ ಬಲವಮ್ಹಿ ಬಲತ್ಥೋ ಇತಿಪಿ ತದಪಿ ಅಕುಸಲಂ. ಇತಿಸ್ಸಮೇ ದೋಸಜಾ ದೋಸನಿದಾನಾ ದೋಸಸಮುದಯಾ ದೋಸಪಚ್ಚಯಾ ಅನೇಕೇ ಪಾಪಕಾ ಅಕುಸಲಾ ಧಮ್ಮಾ ಸಮ್ಭವನ್ತಿ.

‘‘ಯದಪಿ, ಭಿಕ್ಖವೇ, ಮೋಹೋ ತದಪಿ ಅಕುಸಲಮೂಲಂ; ಯದಪಿ ಮೂಳ್ಹೋ ಅಭಿಸಙ್ಖರೋತಿ ಕಾಯೇನ ವಾಚಾಯ ಮನಸಾ ತದಪಿ ಅಕುಸಲಂ; ಯದಪಿ ಮೂಳ್ಹೋ ಮೋಹೇನ ಅಭಿಭೂತೋ ಪರಿಯಾದಿನ್ನಚಿತ್ತೋ ಪರಸ್ಸ ಅಸತಾ ದುಕ್ಖಂ ಉಪ್ಪಾದಯತಿ ವಧೇನ ವಾ ಬನ್ಧನೇನ ವಾ ಜಾನಿಯಾ ವಾ ಗರಹಾಯ ವಾ ಪಬ್ಬಾಜನಾಯ ವಾ ಬಲವಮ್ಹಿ ಬಲತ್ಥೋ ಇತಿಪಿ ತದಪಿ ಅಕುಸಲಂ. ಇತಿಸ್ಸಮೇ ಮೋಹಜಾ ಮೋಹನಿದಾನಾ ಮೋಹಸಮುದಯಾ ಮೋಹಪಚ್ಚಯಾ ಅನೇಕೇ ಪಾಪಕಾ ಅಕುಸಲಾ ಧಮ್ಮಾ ಸಮ್ಭವನ್ತಿ. ಏವರೂಪೋ ಚಾಯಂ, ಭಿಕ್ಖವೇ, ಪುಗ್ಗಲೋ ವುಚ್ಚತಿ ಅಕಾಲವಾದೀತಿಪಿ, ಅಭೂತವಾದೀತಿಪಿ, ಅನತ್ಥವಾದೀತಿಪಿ, ಅಧಮ್ಮವಾದೀತಿಪಿ, ಅವಿನಯವಾದೀತಿಪಿ.

‘‘ಕಸ್ಮಾ ಚಾಯಂ, ಭಿಕ್ಖವೇ, ಏವರೂಪೋ ಪುಗ್ಗಲೋ ವುಚ್ಚತಿ ಅಕಾಲವಾದೀತಿಪಿ, ಅಭೂತವಾದೀತಿಪಿ, ಅನತ್ಥವಾದೀತಿಪಿ, ಅಧಮ್ಮವಾದೀತಿಪಿ, ಅವಿನಯವಾದೀತಿಪಿ? ತಥಾಹಾಯಂ, ಭಿಕ್ಖವೇ, ಪುಗ್ಗಲೋ ಪರಸ್ಸ ಅಸತಾ ದುಕ್ಖಂ ಉಪ್ಪಾದಯತಿ ವಧೇನ ವಾ ಬನ್ಧನೇನ ವಾ ಜಾನಿಯಾ ವಾ ಗರಹಾಯ ವಾ ಪಬ್ಬಾಜನಾಯ ವಾ ಬಲವಮ್ಹಿ ಬಲತ್ಥೋ ಇತಿಪಿ. ಭೂತೇನ ಖೋ ಪನ ವುಚ್ಚಮಾನೋ ಅವಜಾನಾತಿ, ನೋ ಪಟಿಜಾನಾತಿ; ಅಭೂತೇನ ವುಚ್ಚಮಾನೋ ನ ಆತಪ್ಪಂ ಕರೋತಿ, ತಸ್ಸ ನಿಬ್ಬೇಠನಾಯ ಇತಿಪೇತಂ ಅತಚ್ಛಂ ಇತಿಪೇತಂ ಅಭೂತನ್ತಿ. ತಸ್ಮಾ ಏವರೂಪೋ ಪುಗ್ಗಲೋ ವುಚ್ಚತಿ ಅಕಾಲವಾದೀತಿಪಿ, ಅಭೂತವಾದೀತಿಪಿ, ಅನತ್ಥವಾದೀತಿಪಿ, ಅಧಮ್ಮವಾದೀತಿಪಿ, ಅವಿನಯವಾದೀತಿಪಿ.

‘‘ಏವರೂಪೋ, ಭಿಕ್ಖವೇ, ಪುಗ್ಗಲೋ ಲೋಭಜೇಹಿ ಪಾಪಕೇಹಿ ಅಕುಸಲೇಹಿ ಧಮ್ಮೇಹಿ ಅಭಿಭೂತೋ ಪರಿಯಾದಿನ್ನಚಿತ್ತೋ ದಿಟ್ಠೇ ಚೇವ ಧಮ್ಮೇ ದುಕ್ಖಂ ವಿಹರತಿ, ಸವಿಘಾತಂ ಸಉಪಾಯಾಸಂ ಸಪರಿಳಾಹಂ. ಕಾಯಸ್ಸ ಚ ಭೇದಾ ಪರಂ ಮರಣಾ ದುಗ್ಗತಿ ಪಾಟಿಕಙ್ಖಾ.

‘‘ದೋಸಜೇಹಿ…ಪೇ… ಮೋಹಜೇಹಿ ಪಾಪಕೇಹಿ ಅಕುಸಲೇಹಿ ಧಮ್ಮೇಹಿ ಅಭಿಭೂತೋ ಪರಿಯಾದಿನ್ನಚಿತ್ತೋ ದಿಟ್ಠೇ ಚೇವ ಧಮ್ಮೇ ದುಕ್ಖಂ ವಿಹರತಿ, ಸವಿಘಾತಂ ಸಉಪಾಯಾಸಂ ಸಪರಿಳಾಹಂ. ಕಾಯಸ್ಸ ಚ ಭೇದಾ ಪರಂ ಮರಣಾ ದುಗ್ಗತಿ ಪಾಟಿಕಙ್ಖಾ. ಸೇಯ್ಯಥಾಪಿ, ಭಿಕ್ಖವೇ, ಸಾಲೋ ವಾ ಧವೋ ವಾ ಫನ್ದನೋ ವಾ ತೀಹಿ ಮಾಲುವಾಲತಾಹಿ ಉದ್ಧಸ್ತೋ ಪರಿಯೋನದ್ಧೋ ಅನಯಂ ಆಪಜ್ಜತಿ, ಬ್ಯಸನಂ ಆಪಜ್ಜತಿ, ಅನಯಬ್ಯಸನಂ ಆಪಜ್ಜತಿ; ಏವಮೇವಂ ಖೋ, ಭಿಕ್ಖವೇ, ಏವರೂಪೋ ಪುಗ್ಗಲೋ ಲೋಭಜೇಹಿ ಪಾಪಕೇಹಿ ಅಕುಸಲೇಹಿ ಧಮ್ಮೇಹಿ ಅಭಿಭೂತೋ ಪರಿಯಾದಿನ್ನಚಿತ್ತೋ ದಿಟ್ಠೇ ಚೇವ ಧಮ್ಮೇ ದುಕ್ಖಂ ವಿಹರತಿ, ಸವಿಘಾತಂ ಸಉಪಾಯಾಸಂ ಸಪರಿಳಾಹಂ. ಕಾಯಸ್ಸ ಚ ಭೇದಾ ಪರಂ ಮರಣಾ ದುಗ್ಗತಿ ಪಾಟಿಕಙ್ಖಾ.

‘‘ದೋಸಜೇಹಿ…ಪೇ… ಮೋಹಜೇಹಿ ಪಾಪಕೇಹಿ ಅಕುಸಲೇಹಿ ಧಮ್ಮೇಹಿ ಅಭಿಭೂತೋ ಪರಿಯಾದಿನ್ನಚಿತ್ತೋ ದಿಟ್ಠೇ ಚೇವ ಧಮ್ಮೇ ದುಕ್ಖಂ ವಿಹರತಿ ಸವಿಘಾತಂ ಸಉಪಾಯಾಸಂ ಸಪರಿಳಾಹಂ. ಕಾಯಸ್ಸ ಚ ಭೇದಾ ಪರಂ ಮರಣಾ ದುಗ್ಗತಿ ಪಾಟಿಕಙ್ಖಾ. ಇಮಾನಿ ಖೋ, ಭಿಕ್ಖವೇ, ತೀಣಿ ಅಕುಸಲಮೂಲಾನೀತಿ.

‘‘ತೀಣಿಮಾನಿ, ಭಿಕ್ಖವೇ, ಕುಸಲಮೂಲಾನಿ. ಕತಮಾನಿ ತೀಣಿ? ಅಲೋಭೋ ಕುಸಲಮೂಲಂ, ಅದೋಸೋ ಕುಸಲಮೂಲಂ, ಅಮೋಹೋ ಕುಸಲಮೂಲಂ.

‘‘ಯದಪಿ, ಭಿಕ್ಖವೇ, ಅಲೋಭೋ ತದಪಿ ಕುಸಲಮೂಲಂ [ಕುಸಲಂ (ಸೀ. ಸ್ಯಾ. ಕಂ. ಪೀ.)]; ಯದಪಿ ಅಲುದ್ಧೋ ಅಭಿಸಙ್ಖರೋತಿ ಕಾಯೇನ ವಾಚಾಯ ಮನಸಾ ತದಪಿ ಕುಸಲಂ [ಕುಸಲಮೂಲಂ (ಕ.)]; ಯದಪಿ ಅಲುದ್ಧೋ ಲೋಭೇನ ಅನಭಿಭೂತೋ ಅಪರಿಯಾದಿನ್ನಚಿತ್ತೋ ನ ಪರಸ್ಸ ಅಸತಾ ದುಕ್ಖಂ ಉಪ್ಪಾದಯತಿ ವಧೇನ ವಾ ಬನ್ಧನೇನ ವಾ ಜಾನಿಯಾ ವಾ ಗರಹಾಯ ವಾ ಪಬ್ಬಾಜನಾಯ ವಾ ಬಲವಮ್ಹಿ ಬಲತ್ಥೋ ಇತಿಪಿ ತದಪಿ ಕುಸಲಂ. ಇತಿಸ್ಸಮೇ ಅಲೋಭಜಾ ಅಲೋಭನಿದಾನಾ ಅಲೋಭಸಮುದಯಾ ಅಲೋಭಪಚ್ಚಯಾ ಅನೇಕೇ ಕುಸಲಾ ಧಮ್ಮಾ ಸಮ್ಭವನ್ತಿ.

‘‘ಯದಪಿ, ಭಿಕ್ಖವೇ, ಅದೋಸೋ ತದಪಿ ಕುಸಲಮೂಲಂ; ಯದಪಿ ಅದುಟ್ಠೋ ಅಭಿಸಙ್ಖರೋತಿ ಕಾಯೇನ ವಾಚಾಯ ಮನಸಾ ತದಪಿ ಕುಸಲಂ; ಯದಪಿ ಅದುಟ್ಠೋ ದೋಸೇನ ಅನಭಿಭೂತೋ ಅಪರಿಯಾದಿನ್ನಚಿತ್ತೋ ನ ಪರಸ್ಸ ಅಸತಾ ದುಕ್ಖಂ ಉಪ್ಪಾದಯತಿ ವಧೇನ ವಾ ಬನ್ಧನೇನ ವಾ ಜಾನಿಯಾ ವಾ ಗರಹಾಯ ವಾ ಪಬ್ಬಾಜನಾಯ ವಾ ಬಲವಮ್ಹಿ ಬಲತ್ಥೋ ಇತಿಪಿ ತದಪಿ ಕುಸಲಂ. ಇತಿಸ್ಸಮೇ ಅದೋಸಜಾ ಅದೋಸನಿದಾನಾ ಅದೋಸಸಮುದಯಾ ಅದೋಸಪಚ್ಚಯಾ ಅನೇಕೇ ಕುಸಲಾ ಧಮ್ಮಾ ಸಮ್ಭವನ್ತಿ.

‘‘ಯದಪಿ, ಭಿಕ್ಖವೇ, ಅಮೋಹೋ ತದಪಿ ಕುಸಲಮೂಲಂ; ಯದಪಿ ಅಮೂಳ್ಹೋ ಅಭಿಸಙ್ಖರೋತಿ ಕಾಯೇನ ವಾಚಾಯ ಮನಸಾ ತದಪಿ ಕುಸಲಂ; ಯದಪಿ ಅಮೂಳ್ಹೋ ಮೋಹೇನ ಅನಭಿಭೂತೋ ಅಪರಿಯಾದಿನ್ನಚಿತ್ತೋ ನ ಪರಸ್ಸ ಅಸತಾ ದುಕ್ಖಂ ಉಪ್ಪಾದಯತಿ ವಧೇನ ವಾ ಬನ್ಧನೇನ ವಾ ಜಾನಿಯಾ ವಾ ಗರಹಾಯ ವಾ ಪಬ್ಬಾಜನಾಯ ವಾ ಬಲವಮ್ಹಿ ಬಲತ್ಥೋ ಇತಿಪಿ ತದಪಿ ಕುಸಲಂ. ಇತಿಸ್ಸಮೇ ಅಮೋಹಜಾ ಅಮೋಹನಿದಾನಾ ಅಮೋಹಸಮುದಯಾ ಅಮೋಹಪಚ್ಚಯಾ ಅನೇಕೇ ಕುಸಲಾ ಧಮ್ಮಾ ಸಮ್ಭವನ್ತಿ. ಏವರೂಪೋ ಚಾಯಂ, ಭಿಕ್ಖವೇ, ಪುಗ್ಗಲೋ ವುಚ್ಚತಿ ಕಾಲವಾದೀತಿಪಿ, ಭೂತವಾದೀತಿಪಿ, ಅತ್ಥವಾದೀತಿಪಿ, ಧಮ್ಮವಾದೀತಿಪಿ, ವಿನಯವಾದೀತಿಪಿ.

‘‘ಕಸ್ಮಾ ಚಾಯಂ, ಭಿಕ್ಖವೇ, ಏವರೂಪೋ ಪುಗ್ಗಲೋ ವುಚ್ಚತಿ ಕಾಲವಾದೀತಿಪಿ, ಭೂತವಾದೀತಿಪಿ, ಅತ್ಥವಾದೀತಿಪಿ, ಧಮ್ಮವಾದೀತಿಪಿ, ವಿನಯವಾದೀತಿಪಿ? ತಥಾಹಾಯಂ, ಭಿಕ್ಖವೇ, ಪುಗ್ಗಲೋ ನ ಪರಸ್ಸ ಅಸತಾ ದುಕ್ಖಂ ಉಪ್ಪಾದಯತಿ ವಧೇನ ವಾ ಬನ್ಧನೇನ ವಾ ಜಾನಿಯಾ ವಾ ಗರಹಾಯ ವಾ ಪಬ್ಬಾಜನಾಯ ವಾ ಬಲವಮ್ಹಿ ಬಲತ್ಥೋ ಇತಿಪಿ. ಭೂತೇನ ಖೋ ಪನ ವುಚ್ಚಮಾನೋ ಪಟಿಜಾನಾತಿ ನೋ ಅವಜಾನಾತಿ; ಅಭೂತೇನ ವುಚ್ಚಮಾನೋ ಆತಪ್ಪಂ ಕರೋತಿ ತಸ್ಸ ನಿಬ್ಬೇಠನಾಯ – ‘ಇತಿಪೇತಂ ಅತಚ್ಛಂ, ಇತಿಪೇತಂ ಅಭೂತ’ನ್ತಿ. ತಸ್ಮಾ ಏವರೂಪೋ ಪುಗ್ಗಲೋ ವುಚ್ಚತಿ ಕಾಲವಾದೀತಿಪಿ, ಅತ್ಥವಾದೀತಿಪಿ, ಧಮ್ಮವಾದೀತಿಪಿ, ವಿನಯವಾದೀತಿಪಿ.

‘‘ಏವರೂಪಸ್ಸ, ಭಿಕ್ಖವೇ, ಪುಗ್ಗಲಸ್ಸ ಲೋಭಜಾ ಪಾಪಕಾ ಅಕುಸಲಾ ಧಮ್ಮಾ ಪಹೀನಾ ಉಚ್ಛಿನ್ನಮೂಲಾ ತಾಲಾವತ್ಥುಕತಾ ಅನಭಾವಂಕತಾ ಆಯತಿಂ ಅನುಪ್ಪಾದಧಮ್ಮಾ. ದಿಟ್ಠೇವ ಧಮ್ಮೇ ಸುಖಂ ವಿಹರತಿ ಅವಿಘಾತಂ ಅನುಪಾಯಾಸಂ ಅಪರಿಳಾಹಂ. ದಿಟ್ಠೇವ ಧಮ್ಮೇ ಪರಿನಿಬ್ಬಾಯತಿ.

‘‘ದೋಸಜಾ…ಪೇ… ಪರಿನಿಬ್ಬಾಯತಿ. ಮೋಹಜಾ…ಪೇ… ಪರಿನಿಬ್ಬಾಯತಿ. ಸೇಯ್ಯಥಾಪಿ ಭಿಕ್ಖವೇ, ಸಾಲೋ ವಾ ಧವೋ ವಾ ಫನ್ದನೋ ವಾ ತೀಹಿ ಮಾಲುವಾಲತಾಹಿ ಉದ್ಧಸ್ತೋ ಪರಿಯೋನದ್ಧೋ. ಅಥ ಪುರಿಸೋ ಆಗಚ್ಛೇಯ್ಯ ಕುದ್ದಾಲ-ಪಿಟಕಂ [ಕುದ್ದಾಲಪಿಟಕಂ (ಸೀ. ಸ್ಯಾ. ಕಂ. ಪೀ.)] ಆದಾಯ. ಸೋ ತಂ ಮಾಲುವಾಲತಂ ಮೂಲೇ ಛಿನ್ದೇಯ್ಯ, ಮೂಲೇ ಛೇತ್ವಾ ಪಲಿಖಣೇಯ್ಯ, ಪಲಿಖಣಿತ್ವಾ ಮೂಲಾನಿ ಉದ್ಧರೇಯ್ಯ, ಅನ್ತಮಸೋ ಉಸೀರನಾಳಿಮತ್ತಾನಿಪಿ [ಉಸೀರನಾಳಮತ್ತಾನಿಪಿ (ಸೀ. ಸ್ಯಾ. ಕಂ. ಪೀ.)]. ಸೋ ತಂ ಮಾಲುವಾಲತಂ ಖಣ್ಡಾಖಣ್ಡಿಕಂ ಛಿನ್ದೇಯ್ಯ, ಖಣ್ಡಾಖಣ್ಡಿಕಂ ಛೇತ್ವಾ ಫಾಲೇಯ್ಯ, ಫಾಲೇತ್ವಾ ಸಕಲಿಕಂ ಸಕಲಿಕಂ ಕರೇಯ್ಯ, ಸಕಲಿಕಂ ಸಕಲಿಕಂ ಕರಿತ್ವಾ ವಾತಾತಪೇ ವಿಸೋಸೇಯ್ಯ, ವಾತಾತಪೇ ವಿಸೋಸೇತ್ವಾ ಅಗ್ಗಿನಾ ಡಹೇಯ್ಯ, ಅಗ್ಗಿನಾ ಡಹಿತ್ವಾ ಮಸಿಂ ಕರೇಯ್ಯ, ಮಸಿಂ ಕರಿತ್ವಾ ಮಹಾವಾತೇ ವಾ ಓಫುಣೇಯ್ಯ ನದಿಯಾ ವಾ ಸೀಘಸೋತಾಯ ಪವಾಹೇಯ್ಯ. ಏವಮಸ್ಸ [ಏವಮಸ್ಸು (ಸೀ.), ಏವಸ್ಸು (ಕ.)] ತಾ, ಭಿಕ್ಖವೇ, ಮಾಲುವಾಲತಾ ಉಚ್ಛಿನ್ನಮೂಲಾ ತಾಲಾವತ್ಥುಕತಾ ಅನಭಾವಂಕತಾ ಆಯತಿಂ ಅನುಪ್ಪಾದಧಮ್ಮಾ. ಏವಮೇವಂ ಖೋ, ಭಿಕ್ಖವೇ, ಏವರೂಪಸ್ಸ ಪುಗ್ಗಲಸ್ಸ ಲೋಭಜಾ ಪಾಪಕಾ ಅಕುಸಲಾ ಧಮ್ಮಾ ಪಹೀನಾ ಉಚ್ಛಿನ್ನಮೂಲಾ ತಾಲಾವತ್ಥುಕತಾ ಅನಭಾವಂಕತಾ ಆಯತಿಂ ಅನುಪ್ಪಾದಧಮ್ಮಾ. ದಿಟ್ಠೇವ ಧಮ್ಮೇ ಸುಖಂ ವಿಹರತಿ ಅವಿಘಾತಂ ಅನುಪಾಯಾಸಂ ಅಪರಿಳಾಹಂ. ದಿಟ್ಠೇವ ಧಮ್ಮೇ ಪರಿನಿಬ್ಬಾಯತಿ.

‘‘ದೋಸಜಾ …ಪೇ… ಮೋಹಜಾ ಪಾಪಕಾ ಅಕುಸಲಾ ಧಮ್ಮಾ ಪಹೀನಾ ಉಚ್ಛಿನ್ನಮೂಲಾ ತಾಲಾವತ್ಥುಕತಾ ಅನಭಾವಂಕತಾ ಆಯತಿಂ ಅನುಪ್ಪಾದಧಮ್ಮಾ. ದಿಟ್ಠೇವ ಧಮ್ಮೇ ಸುಖಂ ವಿಹರತಿ ಅವಿಘಾತಂ ಅನುಪಾಯಾಸಂ ಅಪರಿಳಾಹಂ. ದಿಟ್ಠೇವ ಧಮ್ಮೇ ಪರಿನಿಬ್ಬಾಯತಿ. ಇಮಾನಿ ಖೋ, ಭಿಕ್ಖವೇ, ತೀಣಿ ಕುಸಲಮೂಲಾನೀ’’ತಿ. ನವಮಂ.