೧೪. ಏತದಗ್ಗವಗ್ಗೋ

೧. ಪಠಮವಗ್ಗೋ

೧೮೮. ‘‘ಏತದಗ್ಗಂ, ಭಿಕ್ಖವೇ, ಮಮ ಸಾವಕಾನಂ ಭಿಕ್ಖೂನಂ ರತ್ತಞ್ಞೂನಂ ಯದಿದಂ ಅಞ್ಞಾಸಿಕೋಣ್ಡಞ್ಞೋ’’ [ಅಞ್ಞಾತಕೋಣ್ಡಞ್ಞೋತಿ (ಕ.), ಅಞ್ಞಾಕೋಣ್ಡಞ್ಞೋ (ಸೀ. ಸ್ಯಾ. ಕಂ. ಪೀ.)].

೧೮೯. … ಮಹಾಪಞ್ಞಾನಂ ಯದಿದಂ ಸಾರಿಪುತ್ತೋ.

೧೯೦. … ಇದ್ಧಿಮನ್ತಾನಂ ಯದಿದಂ ಮಹಾಮೋಗ್ಗಲ್ಲಾನೋ.

೧೯೧. … ಧುತವಾದಾನಂ [ಧುತಙ್ಗಧರಾನಂ (ಕತ್ಥಚಿ)] ಯದಿದಂ ಮಹಾಕಸ್ಸಪೋ.

೧೯೨. … ದಿಬ್ಬಚಕ್ಖುಕಾನಂ ಯದಿದಂ ಅನುರುದ್ಧೋ.

೧೯೩. … ಉಚ್ಚಾಕುಲಿಕಾನಂ ಯದಿದಂ ಭದ್ದಿಯೋ ಕಾಳಿಗೋಧಾಯಪುತ್ತೋ.

೧೯೪. … ಮಞ್ಜುಸ್ಸರಾನಂ ಯದಿದಂ ಲಕುಣ್ಡಕ [ಲಕುಣ್ಟಕ (ಸ್ಯಾ. ಕಂ.)] ಭದ್ದಿಯೋ.

೧೯೫. … ಸೀಹನಾದಿಕಾನಂ ಯದಿದಂ ಪಿಣ್ಡೋಲಭಾರದ್ವಾಜೋ.

೧೯೬. … ಧಮ್ಮಕಥಿಕಾನಂ ಯದಿದಂ ಪುಣ್ಣೋ ಮನ್ತಾಣಿಪುತ್ತೋ.

೧೯೭. … ಸಂಖಿತ್ತೇನ ಭಾಸಿತಸ್ಸ ವಿತ್ಥಾರೇನ ಅತ್ಥಂ ವಿಭಜನ್ತಾನಂ ಯದಿದಂ ಮಹಾಕಚ್ಚಾನೋತಿ.

ವಗ್ಗೋ ಪಠಮೋ.

೨. ದುತಿಯವಗ್ಗೋ

೧೯೮. ‘‘ಏತದಗ್ಗಂ, ಭಿಕ್ಖವೇ, ಮಮ ಸಾವಕಾನಂ ಭಿಕ್ಖೂನಂ ಮನೋಮಯಂ ಕಾಯಂ ಅಭಿನಿಮ್ಮಿನನ್ತಾನಂ ಯದಿದಂ ಚೂಳಪನ್ಥಕೋ’’ [ಚುಲ್ಲಪನ್ಥಕೋ (ಸೀ. ಸ್ಯಾ. ಕಂ. ಪೀ.)].

೧೯೯. … ಚೇತೋವಿವಟ್ಟಕುಸಲಾನಂ ಯದಿದಂ ಚೂಳಪನ್ಥಕೋ.

೨೦೦. … ಸಞ್ಞಾವಿವಟ್ಟಕುಸಲಾನಂ ಯದಿದಂ ಮಹಾಪನ್ಥಕೋ.

೨೦೧. … ಅರಣವಿಹಾರೀನಂ ಯದಿದಂ ಸುಭೂತಿ.

೨೦೨. … ದಕ್ಖಿಣೇಯ್ಯಾನಂ ಯದಿದಂ ಸುಭೂತಿ.

೨೦೩. … ಆರಞ್ಞಕಾನಂ ಯದಿದಂ ರೇವತೋ ಖದಿರವನಿಯೋ.

೨೦೪. … ಝಾಯೀನಂ ಯದಿದಂ ಕಙ್ಖಾರೇವತೋ.

೨೦೫. … ಆರದ್ಧವೀರಿಯಾನಂ ಯದಿದಂ ಸೋಣೋ ಕೋಳಿವಿಸೋ.

೨೦೬. … ಕಲ್ಯಾಣವಾಕ್ಕರಣಾನಂ ಯದಿದಂ ಸೋಣೋ ಕುಟಿಕಣ್ಣೋ.

೨೦೭. … ಲಾಭೀನಂ ಯದಿದಂ ಸೀವಲಿ.

೨೦೮. … ಸದ್ಧಾಧಿಮುತ್ತಾನಂ ಯದಿದಂ ವಕ್ಕಲೀತಿ.

ವಗ್ಗೋ ದುತಿಯೋ.

೩. ತತಿಯವಗ್ಗೋ

೨೦೯. ‘‘ಏತದಗ್ಗಂ, ಭಿಕ್ಖವೇ, ಮಮ ಸಾವಕಾನಂ ಭಿಕ್ಖೂನಂ ಸಿಕ್ಖಾಕಾಮಾನಂ ಯದಿದಂ ರಾಹುಲೋ’’.

೨೧೦. … ಸದ್ಧಾಪಬ್ಬಜಿತಾನಂ ಯದಿದಂ ರಟ್ಠಪಾಲೋ.

೨೧೧. … ಪಠಮಂ ಸಲಾಕಂ ಗಣ್ಹನ್ತಾನಂ ಯದಿದಂ ಕುಣ್ಡಧಾನೋ.

೨೧೨. … ಪಟಿಭಾನವನ್ತಾನಂ ಯದಿದಂ ವಙ್ಗೀಸೋ.

೨೧೩. … ಸಮನ್ತಪಾಸಾದಿಕಾನಂ ಯದಿದಂ ಉಪಸೇನೋ ವಙ್ಗನ್ತಪುತ್ತೋ.

೨೧೪. … ಸೇನಾಸನಪಞ್ಞಾಪಕಾನಂ ಯದಿದಂ ದಬ್ಬೋ ಮಲ್ಲಪುತ್ತೋ.

೨೧೫. … ದೇವತಾನಂ ಪಿಯಮನಾಪಾನಂ ಯದಿದಂ ಪಿಲಿನ್ದವಚ್ಛೋ.

೨೧೬. … ಖಿಪ್ಪಾಭಿಞ್ಞಾನಂ ಯದಿದಂ ಬಾಹಿಯೋ ದಾರುಚೀರಿಯೋ.

೨೧೭. … ಚಿತ್ತಕಥಿಕಾನಂ ಯದಿದಂ ಕುಮಾರಕಸ್ಸಪೋ.

೨೧೮. … ಪಟಿಸಮ್ಭಿದಾಪತ್ತಾನಂ ಯದಿದಂ ಮಹಾಕೋಟ್ಠಿತೋತಿ [ಮಹಾಕೋಟ್ಠಿಕೋತಿ (ಅಞ್ಞೇಸು ಸುತ್ತೇಸು ಮರಮ್ಮಪೋತ್ಥಕೇ)].

ವಗ್ಗೋ ತತಿಯೋ.

೪. ಚತುತ್ಥವಗ್ಗೋ

೨೧೯. ‘‘ಏತದಗ್ಗಂ, ಭಿಕ್ಖವೇ, ಮಮ ಸಾವಕಾನಂ ಭಿಕ್ಖೂನಂ ಬಹುಸ್ಸುತಾನಂ ಯದಿದಂ ಆನನ್ದೋ’’.

೨೨೦. … ಸತಿಮನ್ತಾನಂ ಯದಿದಂ ಆನನ್ದೋ.

೨೨೧. … ಗತಿಮನ್ತಾನಂ ಯದಿದಂ ಆನನ್ದೋ.

೨೨೨. … ಧಿತಿಮನ್ತಾನಂ ಯದಿದಂ ಆನನ್ದೋ.

೨೨೩. … ಉಪಟ್ಠಾಕಾನಂ ಯದಿದಂ ಆನನ್ದೋ.

೨೨೪. … ಮಹಾಪರಿಸಾನಂ ಯದಿದಂ ಉರುವೇಲಕಸ್ಸಪೋ.

೨೨೫. … ಕುಲಪ್ಪಸಾದಕಾನಂ ಯದಿದಂ ಕಾಳುದಾಯೀ.

೨೨೬. … ಅಪ್ಪಾಬಾಧಾನಂ ಯದಿದಂ ಬಾಕುಲೋ [ಬಕ್ಕುಲೋ (ಸೀ. ಸ್ಯಾ. ಕಂ. ಪೀ.)].

೨೨೭. … ಪುಬ್ಬೇನಿವಾಸಂ ಅನುಸ್ಸರನ್ತಾನಂ ಯದಿದಂ ಸೋಭಿತೋ.

೨೨೮. … ವಿನಯಧರಾನಂ ಯದಿದಂ ಉಪಾಲಿ.

೨೨೯. … ಭಿಕ್ಖುನೋವಾದಕಾನಂ ಯದಿದಂ ನನ್ದಕೋ.

೨೩೦. … ಇನ್ದ್ರಿಯೇಸು ಗುತ್ತದ್ವಾರಾನಂ ಯದಿದಂ ನನ್ದೋ.

೨೩೧. … ಭಿಕ್ಖುಓವಾದಕಾನಂ ಯದಿದಂ ಮಹಾಕಪ್ಪಿನೋ.

೨೩೨. … ತೇಜೋಧಾತುಕುಸಲಾನಂ ಯದಿದಂ ಸಾಗತೋ.

೨೩೩. … ಪಟಿಭಾನೇಯ್ಯಕಾನಂ ಯದಿದಂ ರಾಧೋ.

೨೩೪. … ಲೂಖಚೀವರಧರಾನಂ ಯದಿದಂ ಮೋಘರಾಜಾತಿ.

ವಗ್ಗೋ ಚತುತ್ಥೋ.

೫. ಪಞ್ಚಮವಗ್ಗೋ

೨೩೫. ‘‘ಏತದಗ್ಗಂ, ಭಿಕ್ಖವೇ, ಮಮ ಸಾವಿಕಾನಂ ಭಿಕ್ಖುನೀನಂ ರತ್ತಞ್ಞೂನಂ ಯದಿದಂ ಮಹಾಪಜಾಪತಿಗೋತಮೀ’’.

೨೩೬. … ಮಹಾಪಞ್ಞಾನಂ ಯದಿದಂ ಖೇಮಾ.

೨೩೭. … ಇದ್ಧಿಮನ್ತೀನಂ ಯದಿದಂ ಉಪ್ಪಲವಣ್ಣಾ.

೨೩೮. … ವಿನಯಧರಾನಂ ಯದಿದಂ ಪಟಾಚಾರಾ.

೨೩೯. … ಧಮ್ಮಕಥಿಕಾನಂ ಯದಿದಂ ಧಮ್ಮದಿನ್ನಾ.

೨೪೦. … ಝಾಯೀನಂ ಯದಿದಂ ನನ್ದಾ.

೨೪೧. … ಆರದ್ಧವೀರಿಯಾನಂ ಯದಿದಂ ಸೋಣಾ.

೨೪೨. … ದಿಬ್ಬಚಕ್ಖುಕಾನಂ ಯದಿದಂ ಬಕುಲಾ [ಸಕುಲಾ (ಸೀ. ಸ್ಯಾ. ಕಂ. ಪೀ.)].

೨೪೩. … ಖಿಪ್ಪಾಭಿಞ್ಞಾನಂ ಯದಿದಂ ಭದ್ದಾ ಕುಣ್ಡಲಕೇಸಾ.

೨೪೪. … ಪುಬ್ಬೇನಿವಾಸಂ ಅನುಸ್ಸರನ್ತೀನಂ ಯದಿದಂ ಭದ್ದಾ ಕಾಪಿಲಾನೀ.

೨೪೫. … ಮಹಾಭಿಞ್ಞಪ್ಪತ್ತಾನಂ ಯದಿದಂ ಭದ್ದಕಚ್ಚಾನಾ.

೨೪೬. … ಲೂಖಚೀವರಧರಾನಂ ಯದಿದಂ ಕಿಸಾಗೋತಮೀ.

೨೪೭. … ಸದ್ಧಾಧಿಮುತ್ತಾನಂ ಯದಿದಂ ಸಿಙ್ಗಾಲಕಮಾತಾತಿ [ಸಿಗಾಲಮಾತಾತಿ (ಸೀ. ಸ್ಯಾ. ಕಂ. ಪೀ.)].

ವಗ್ಗೋ ಪಞ್ಚಮೋ.

೬. ಛಟ್ಠವಗ್ಗೋ

೨೪೮. ‘‘ಏತದಗ್ಗಂ, ಭಿಕ್ಖವೇ, ಮಮ ಸಾವಕಾನಂ ಉಪಾಸಕಾನಂ ಪಠಮಂ ಸರಣಂ ಗಚ್ಛನ್ತಾನಂ ಯದಿದಂ ತಪುಸ್ಸಭಲ್ಲಿಕಾ [ತಪಸ್ಸುಭಲ್ಲಿಕಾ (ಸೀ. ಪೀ.)] ವಾಣಿಜಾ’’.

೨೪೯. … ದಾಯಕಾನಂ ಯದಿದಂ ಸುದತ್ತೋ ಗಹಪತಿ ಅನಾಥಪಿಣ್ಡಿಕೋ.

೨೫೦. … ಧಮ್ಮಕಥಿಕಾನಂ ಯದಿದಂ ಚಿತ್ತೋ ಗಹಪತಿ ಮಚ್ಛಿಕಾಸಣ್ಡಿಕೋ.

೨೫೧. … ಚತೂಹಿ ಸಙ್ಗಹವತ್ಥೂಹಿ ಪರಿಸಂ ಸಙ್ಗಣ್ಹನ್ತಾನಂ ಯದಿದಂ ಹತ್ಥಕೋ ಆಳವಕೋ.

೨೫೨. … ಪಣೀತದಾಯಕಾನಂ ಯದಿದಂ ಮಹಾನಾಮೋ ಸಕ್ಕೋ.

೨೫೩. … ಮನಾಪದಾಯಕಾನಂ ಯದಿದಂ ಉಗ್ಗೋ ಗಹಪತಿ ವೇಸಾಲಿಕೋ.

೨೫೪. … ಸಙ್ಘುಪಟ್ಠಾಕಾನಂ ಯದಿದಂ ಹತ್ಥಿಗಾಮಕೋ ಉಗ್ಗತೋ ಗಹಪತಿ.

೨೫೫. … ಅವೇಚ್ಚಪ್ಪಸನ್ನಾನಂ ಯದಿದಂ ಸೂರಮ್ಬಟ್ಠೋ [ಸೂರೋ ಅಮ್ಬಟ್ಠೋ (ಸೀ. ಸ್ಯಾ. ಕಂ. ಪೀ.) ಸುರೇಬನ್ಧೋ (ಕ.)].

೨೫೬. … ಪುಗ್ಗಲಪ್ಪಸನ್ನಾನಂ ಯದಿದಂ ಜೀವಕೋ ಕೋಮಾರಭಚ್ಚೋ.

೨೫೭. … ವಿಸ್ಸಾಸಕಾನಂ ಯದಿದಂ ನಕುಲಪಿತಾ ಗಹಪತೀತಿ.

ವಗ್ಗೋ ಛಟ್ಠೋ.

೭. ಸತ್ತಮವಗ್ಗೋ

೨೫೮. ‘‘ಏತದಗ್ಗಂ, ಭಿಕ್ಖವೇ, ಮಮ ಸಾವಿಕಾನಂ ಉಪಾಸಿಕಾನಂ ಪಠಮಂ ಸರಣಂ ಗಚ್ಛನ್ತೀನಂ ಯದಿದಂ ಸುಜಾತಾ ಸೇನಿಯಧೀತಾ’’ [ಸೇನಾನೀ ಧೀತಾ (ಸೀ. ಸ್ಯಾ. ಕಂ. ಪೀ.)].

೨೫೯. … ದಾಯಿಕಾನಂ ಯದಿದಂ ವಿಸಾಖಾ ಮಿಗಾರಮಾತಾ.

೨೬೦. … ಬಹುಸ್ಸುತಾನಂ ಯದಿದಂ ಖುಜ್ಜುತ್ತರಾ.

೨೬೧. … ಮೇತ್ತಾವಿಹಾರೀನಂ ಯದಿದಂ ಸಾಮಾವತೀ.

೨೬೨. … ಝಾಯೀನಂ ಯದಿದಂ ಉತ್ತರಾನನ್ದಮಾತಾ.

೨೬೩. … ಪಣೀತದಾಯಿಕಾನಂ ಯದಿದಂ ಸುಪ್ಪವಾಸಾ ಕೋಲಿಯಧೀತಾ.

೨೬೪. … ಗಿಲಾನುಪಟ್ಠಾಕೀನಂ ಯದಿದಂ ಸುಪ್ಪಿಯಾ ಉಪಾಸಿಕಾ.

೨೬೫. … ಅವೇಚ್ಚಪ್ಪಸನ್ನಾನಂ ಯದಿದಂ ಕಾತಿಯಾನೀ.

೨೬೬. … ವಿಸ್ಸಾಸಿಕಾನಂ ಯದಿದಂ ನಕುಲಮಾತಾ ಗಹಪತಾನೀ.

೨೬೭. … ಅನುಸ್ಸವಪ್ಪಸನ್ನಾನಂ ಯದಿದಂ ಕಾಳೀ ಉಪಾಸಿಕಾ ಕುಲಘರಿಕಾ [ಕುಲಘರಿಕಾ (ಕ.)] ತಿ.

ವಗ್ಗೋ ಸತ್ತಮೋ.

ಏತದಗ್ಗವಗ್ಗೋ ಚುದ್ದಸಮೋ.