ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ

ಅಙ್ಗುತ್ತರನಿಕಾಯೋ

ಏಕಕನಿಪಾತಪಾಳಿ

೧. ರೂಪಾದಿವಗ್ಗೋ

೧. ಏವಂ ಮೇ ಸುತಂ – ಏಕಂ ಸಮಯಂ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತತ್ರ ಖೋ ಭಗವಾ ಭಿಕ್ಖೂ ಆಮನ್ತೇಸಿ – ‘‘ಭಿಕ್ಖವೋ’’ತಿ. ‘‘ಭದನ್ತೇ’’ತಿ ತೇ ಭಿಕ್ಖೂ ಭಗವತೋ ಪಚ್ಚಸ್ಸೋಸುಂ. ಭಗವಾ ಏತದವೋಚ –

‘‘ನಾಹಂ, ಭಿಕ್ಖವೇ, ಅಞ್ಞಂ ಏಕರೂಪಮ್ಪಿ ಸಮನುಪಸ್ಸಾಮಿ ಯಂ ಏವಂ ಪುರಿಸಸ್ಸ ಚಿತ್ತಂ ಪರಿಯಾದಾಯ ತಿಟ್ಠತಿ ಯಥಯಿದಂ, ಭಿಕ್ಖವೇ, ಇತ್ಥಿರೂಪಂ. ಇತ್ಥಿರೂಪಂ, ಭಿಕ್ಖವೇ, ಪುರಿಸಸ್ಸ ಚಿತ್ತಂ ಪರಿಯಾದಾಯ ತಿಟ್ಠತೀ’’ತಿ. ಪಠಮಂ.

೨. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಸದ್ದಮ್ಪಿ ಸಮನುಪಸ್ಸಾಮಿ ಯಂ ಏವಂ ಪುರಿಸಸ್ಸ ಚಿತ್ತಂ ಪರಿಯಾದಾಯ ತಿಟ್ಠತಿ ಯಥಯಿದಂ, ಭಿಕ್ಖವೇ, ಇತ್ಥಿಸದ್ದೋ. ಇತ್ಥಿಸದ್ದೋ, ಭಿಕ್ಖವೇ, ಪುರಿಸಸ್ಸ ಚಿತ್ತಂ ಪರಿಯಾದಾಯ ತಿಟ್ಠತೀ’’ತಿ. ದುತಿಯಂ.

೩. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಗನ್ಧಮ್ಪಿ ಸಮನುಪಸ್ಸಾಮಿ ಯಂ ಏವಂ ಪುರಿಸಸ್ಸ ಚಿತ್ತಂ ಪರಿಯಾದಾಯ ತಿಟ್ಠತಿ ಯಥಯಿದಂ, ಭಿಕ್ಖವೇ, ಇತ್ಥಿಗನ್ಧೋ. ಇತ್ಥಿಗನ್ಧೋ, ಭಿಕ್ಖವೇ, ಪುರಿಸಸ್ಸ ಚಿತ್ತಂ ಪರಿಯಾದಾಯ ತಿಟ್ಠತೀ’’ತಿ. ತತಿಯಂ.

೪. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕರಸಮ್ಪಿ ಸಮನುಪಸ್ಸಾಮಿ ಯಂ ಏವಂ ಪುರಿಸಸ್ಸ ಚಿತ್ತಂ ಪರಿಯಾದಾಯ ತಿಟ್ಠತಿ ಯಥಯಿದಂ, ಭಿಕ್ಖವೇ, ಇತ್ಥಿರಸೋ. ಇತ್ಥಿರಸೋ, ಭಿಕ್ಖವೇ, ಪುರಿಸಸ್ಸ ಚಿತ್ತಂ ಪರಿಯಾದಾಯ ತಿಟ್ಠತೀ’’ತಿ. ಚತುತ್ಥಂ.

೫. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಫೋಟ್ಠಬ್ಬಮ್ಪಿ ಸಮನುಪಸ್ಸಾಮಿ ಯಂ ಏವಂ ಪುರಿಸಸ್ಸ ಚಿತ್ತಂ ಪರಿಯಾದಾಯ ತಿಟ್ಠತಿ ಯಥಯಿದಂ, ಭಿಕ್ಖವೇ, ಇತ್ಥಿಫೋಟ್ಠಬ್ಬೋ. ಇತ್ಥಿಫೋಟ್ಠಬ್ಬೋ, ಭಿಕ್ಖವೇ, ಪುರಿಸಸ್ಸ ಚಿತ್ತಂ ಪರಿಯಾದಾಯ ತಿಟ್ಠತೀ’’ತಿ. ಪಞ್ಚಮಂ.

೬. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕರೂಪಮ್ಪಿ ಸಮನುಪಸ್ಸಾಮಿ ಯಂ ಏವಂ ಇತ್ಥಿಯಾ ಚಿತ್ತಂ ಪರಿಯಾದಾಯ ತಿಟ್ಠತಿ ಯಥಯಿದಂ, ಭಿಕ್ಖವೇ, ಪುರಿಸರೂಪಂ. ಪುರಿಸರೂಪಂ, ಭಿಕ್ಖವೇ, ಇತ್ಥಿಯಾ ಚಿತ್ತಂ ಪರಿಯಾದಾಯ ತಿಟ್ಠತೀ’’ತಿ. ಛಟ್ಠಂ.

೭. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಸದ್ದಮ್ಪಿ ಸಮನುಪಸ್ಸಾಮಿ ಯಂ ಏವಂ ಇತ್ಥಿಯಾ ಚಿತ್ತಂ ಪರಿಯಾದಾಯ ತಿಟ್ಠತಿ ಯಥಯಿದಂ, ಭಿಕ್ಖವೇ, ಪುರಿಸಸದ್ದೋ. ಪುರಿಸಸದ್ದೋ, ಭಿಕ್ಖವೇ, ಇತ್ಥಿಯಾ ಚಿತ್ತಂ ಪರಿಯಾದಾಯ ತಿಟ್ಠತೀ’’ತಿ. ಸತ್ತಮಂ.

೮. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಗನ್ಧಮ್ಪಿ ಸಮನುಪಸ್ಸಾಮಿ ಯಂ ಏವಂ ಇತ್ಥಿಯಾ ಚಿತ್ತಂ ಪರಿಯಾದಾಯ ತಿಟ್ಠತಿ ಯಥಯಿದಂ, ಭಿಕ್ಖವೇ, ಪುರಿಸಗನ್ಧೋ. ಪುರಿಸಗನ್ಧೋ, ಭಿಕ್ಖವೇ, ಇತ್ಥಿಯಾ ಚಿತ್ತಂ ಪರಿಯಾದಾಯ ತಿಟ್ಠತೀ’’ತಿ. ಅಟ್ಠಮಂ.

೯. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕರಸಮ್ಪಿ ಸಮನುಪಸ್ಸಾಮಿ ಯಂ ಏವಂ ಇತ್ಥಿಯಾ ಚಿತ್ತಂ ಪರಿಯಾದಾಯ ತಿಟ್ಠತಿ ಯಥಯಿದಂ, ಭಿಕ್ಖವೇ, ಪುರಿಸರಸೋ. ಪುರಿಸರಸೋ, ಭಿಕ್ಖವೇ, ಇತ್ಥಿಯಾ ಚಿತ್ತಂ ಪರಿಯಾದಾಯ ತಿಟ್ಠತೀ’’ತಿ. ನವಮಂ.

೧೦. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಫೋಟ್ಠಬ್ಬಮ್ಪಿ ಸಮನುಪಸ್ಸಾಮಿ ಯಂ ಏವಂ ಇತ್ಥಿಯಾ ಚಿತ್ತಂ ಪರಿಯಾದಾಯ ತಿಟ್ಠತಿ ಯಥಯಿದಂ, ಭಿಕ್ಖವೇ, ಪುರಿಸಫೋಟ್ಠಬ್ಬೋ. ಪುರಿಸಫೋಟ್ಠಬ್ಬೋ, ಭಿಕ್ಖವೇ, ಇತ್ಥಿಯಾ ಚಿತ್ತಂ ಪರಿಯಾದಾಯ ತಿಟ್ಠತೀ’’ತಿ. ದಸಮಂ.

ರೂಪಾದಿವಗ್ಗೋ ಪಠಮೋ.

೨. ನೀವರಣಪ್ಪಹಾನವಗ್ಗೋ

೧೧. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನೋ ವಾ ಕಾಮಚ್ಛನ್ದೋ ಉಪ್ಪಜ್ಜತಿ ಉಪ್ಪನ್ನೋ ವಾ ಕಾಮಚ್ಛನ್ದೋ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಸುಭನಿಮಿತ್ತಂ. ಸುಭನಿಮಿತ್ತಂ, ಭಿಕ್ಖವೇ, ಅಯೋನಿಸೋ ಮನಸಿ ಕರೋತೋ ಅನುಪ್ಪನ್ನೋ ಚೇವ ಕಾಮಚ್ಛನ್ದೋ ಉಪ್ಪಜ್ಜತಿ ಉಪ್ಪನ್ನೋ ಚ ಕಾಮಚ್ಛನ್ದೋ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತತೀ’’ತಿ. ಪಠಮಂ.

೧೨. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನೋ ವಾ ಬ್ಯಾಪಾದೋ ಉಪ್ಪಜ್ಜತಿ ಉಪ್ಪನ್ನೋ ವಾ ಬ್ಯಾಪಾದೋ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಪಟಿಘನಿಮಿತ್ತಂ. ಪಟಿಘನಿಮಿತ್ತಂ, ಭಿಕ್ಖವೇ, ಅಯೋನಿಸೋ ಮನಸಿ ಕರೋತೋ ಅನುಪ್ಪನ್ನೋ ಚೇವ ಬ್ಯಾಪಾದೋ ಉಪ್ಪಜ್ಜತಿ ಉಪ್ಪನ್ನೋ ಚ ಬ್ಯಾಪಾದೋ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತತೀ’’ತಿ. ದುತಿಯಂ.

೧೩. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಂ ವಾ ಥಿನಮಿದ್ಧಂ [ಥೀನಮಿದ್ಧಂ (ಸೀ. ಸ್ಯಾ. ಕಂ. ಪೀ.)] ಉಪ್ಪಜ್ಜತಿ ಉಪ್ಪನ್ನಂ ವಾ ಥಿನಮಿದ್ಧಂ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಅರತಿ ತನ್ದೀ [ತನ್ದಿ (ಕ.)] ವಿಜಮ್ಭಿತಾ [ವಿಜಮ್ಭಿಕಾ (ಸೀ. ಸ್ಯಾ. ಕಂ. ಪೀ.)] ಭತ್ತಸಮ್ಮದೋ ಚೇತಸೋ ಚ ಲೀನತ್ತಂ. ಲೀನಚಿತ್ತಸ್ಸ, ಭಿಕ್ಖವೇ, ಅನುಪ್ಪನ್ನಞ್ಚೇವ ಥಿನಮಿದ್ಧಂ ಉಪ್ಪಜ್ಜತಿ ಉಪ್ಪನ್ನಞ್ಚ ಥಿನಮಿದ್ಧಂ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತತೀ’’ತಿ. ತತಿಯಂ.

೧೪. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಂ ವಾ ಉದ್ಧಚ್ಚಕುಕ್ಕುಚ್ಚಂ ಉಪ್ಪಜ್ಜತಿ ಉಪ್ಪನ್ನಂ ವಾ ಉದ್ಧಚ್ಚಕುಕ್ಕುಚ್ಚಂ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಚೇತಸೋ ಅವೂಪಸಮೋ. ಅವೂಪಸನ್ತಚಿತ್ತಸ್ಸ, ಭಿಕ್ಖವೇ, ಅನುಪ್ಪನ್ನಞ್ಚೇವ ಉದ್ಧಚ್ಚಕುಕ್ಕುಚ್ಚಂ ಉಪ್ಪಜ್ಜತಿ ಉಪ್ಪನ್ನಞ್ಚ ಉದ್ಧಚ್ಚಕುಕ್ಕುಚ್ಚಂ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತತೀ’’ತಿ. ಚತುತ್ಥಂ.

೧೫. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ವಿಚಿಕಿಚ್ಛಾ ಉಪ್ಪಜ್ಜತಿ ಉಪ್ಪನ್ನಾ ವಾ ವಿಚಿಕಿಚ್ಛಾ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಅಯೋನಿಸೋಮನಸಿಕಾರೋ. ಅಯೋನಿಸೋ, ಭಿಕ್ಖವೇ, ಮನಸಿ ಕರೋತೋ ಅನುಪ್ಪನ್ನಾ ಚೇವ ವಿಚಿಕಿಚ್ಛಾ ಉಪ್ಪಜ್ಜತಿ ಉಪ್ಪನ್ನಾ ಚ ವಿಚಿಕಿಚ್ಛಾ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತತೀ’’ತಿ. ಪಞ್ಚಮಂ.

೧೬. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನೋ ವಾ ಕಾಮಚ್ಛನ್ದೋ ನುಪ್ಪಜ್ಜತಿ ಉಪ್ಪನ್ನೋ ವಾ ಕಾಮಚ್ಛನ್ದೋ ಪಹೀಯತಿ ಯಥಯಿದಂ, ಭಿಕ್ಖವೇ, ಅಸುಭನಿಮಿತ್ತಂ. ಅಸುಭನಿಮಿತ್ತಂ, ಭಿಕ್ಖವೇ, ಯೋನಿಸೋ ಮನಸಿ ಕರೋತೋ ಅನುಪ್ಪನ್ನೋ ಚೇವ ಕಾಮಚ್ಛನ್ದೋ ನುಪ್ಪಜ್ಜತಿ ಉಪ್ಪನ್ನೋ ಚ ಕಾಮಚ್ಛನ್ದೋ ಪಹೀಯತೀ’’ತಿ. ಛಟ್ಠಂ.

೧೭. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನೋ ವಾ ಬ್ಯಾಪಾದೋ ನುಪ್ಪಜ್ಜತಿ ಉಪ್ಪನ್ನೋ ವಾ ಬ್ಯಾಪಾದೋ ಪಹೀಯತಿ ಯಥಯಿದಂ, ಭಿಕ್ಖವೇ, ಮೇತ್ತಾ ಚೇತೋವಿಮುತ್ತಿ. ಮೇತ್ತಂ, ಭಿಕ್ಖವೇ, ಚೇತೋವಿಮುತ್ತಿಂ ಯೋನಿಸೋ ಮನಸಿ ಕರೋತೋ ಅನುಪ್ಪನ್ನೋ ಚೇವ ಬ್ಯಾಪಾದೋ ನುಪ್ಪಜ್ಜತಿ ಉಪ್ಪನ್ನೋ ಚ ಬ್ಯಾಪಾದೋ ಪಹೀಯತೀ’’ತಿ. ಸತ್ತಮಂ.

೧೮. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಂ ವಾ ಥಿನಮಿದ್ಧಂ ನುಪ್ಪಜ್ಜತಿ ಉಪ್ಪನ್ನಂ ವಾ ಥಿನಮಿದ್ಧಂ ಪಹೀಯತಿ ಯಥಯಿದಂ, ಭಿಕ್ಖವೇ, ಆರಮ್ಭಧಾತು ನಿಕ್ಕಮಧಾತು ಪರಕ್ಕಮಧಾತು. ಆರದ್ಧವೀರಿಯಸ್ಸ, ಭಿಕ್ಖವೇ, ಅನುಪ್ಪನ್ನಞ್ಚೇವ ಥಿನಮಿದ್ಧಂ ನುಪ್ಪಜ್ಜತಿ ಉಪ್ಪನ್ನಞ್ಚ ಥಿನಮಿದ್ಧಂ ಪಹೀಯತೀ’’ತಿ. ಅಟ್ಠಮಂ.

೧೯. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಂ ವಾ ಉದ್ಧಚ್ಚಕುಕ್ಕುಚ್ಚಂ ನುಪ್ಪಜ್ಜತಿ ಉಪ್ಪನ್ನಂ ವಾ ಉದ್ಧಚ್ಚಕುಕ್ಕುಚ್ಚಂ ಪಹೀಯತಿ ಯಥಯಿದಂ, ಭಿಕ್ಖವೇ, ಚೇತಸೋ ವೂಪಸಮೋ. ವೂಪಸನ್ತಚಿತ್ತಸ್ಸ, ಭಿಕ್ಖವೇ, ಅನುಪ್ಪನ್ನಞ್ಚೇವ ಉದ್ಧಚ್ಚಕುಕ್ಕುಚ್ಚಂ ನುಪ್ಪಜ್ಜತಿ ಉಪ್ಪನ್ನಞ್ಚ ಉದ್ಧಚ್ಚಕುಕ್ಕುಚ್ಚಂ ಪಹೀಯತೀ’’ತಿ. ನವಮಂ.

೨೦. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ವಿಚಿಕಿಚ್ಛಾ ನುಪ್ಪಜ್ಜತಿ ಉಪ್ಪನ್ನಾ ವಾ ವಿಚಿಕಿಚ್ಛಾ ಪಹೀಯತಿ ಯಥಯಿದಂ, ಭಿಕ್ಖವೇ, ಯೋನಿಸೋಮನಸಿಕಾರೋ. ಯೋನಿಸೋ, ಭಿಕ್ಖವೇ, ಮನಸಿ ಕರೋತೋ ಅನುಪ್ಪನ್ನಾ ಚೇವ ವಿಚಿಕಿಚ್ಛಾ ನುಪ್ಪಜ್ಜತಿ ಉಪ್ಪನ್ನಾ ಚ ವಿಚಿಕಿಚ್ಛಾ ಪಹೀಯತೀ’’ತಿ. ದಸಮಂ.

ನೀವರಣಪ್ಪಹಾನವಗ್ಗೋ ದುತಿಯೋ.

೩. ಅಕಮ್ಮನಿಯವಗ್ಗೋ

೨೧. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯಂ ಏವಂ ಅಭಾವಿತಂ ಅಕಮ್ಮನಿಯಂ ಹೋತಿ ಯಥಯಿದಂ, ಭಿಕ್ಖವೇ, ಚಿತ್ತಂ [ಯಥಯಿದಂ ಚಿತ್ತಂ (ಸೀ. ಪೀ.) ಏವಮುಪರಿಪಿ]. ಚಿತ್ತಂ, ಭಿಕ್ಖವೇ, ಅಭಾವಿತಂ ಅಕಮ್ಮನಿಯಂ ಹೋತೀ’’ತಿ. ಪಠಮಂ.

೨೨. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯಂ ಏವಂ ಭಾವಿತಂ ಕಮ್ಮನಿಯಂ ಹೋತಿ ಯಥಯಿದಂ, ಭಿಕ್ಖವೇ, ಚಿತ್ತಂ. ಚಿತ್ತಂ, ಭಿಕ್ಖವೇ, ಭಾವಿತಂ ಕಮ್ಮನಿಯಂ ಹೋತೀ’’ತಿ. ದುತಿಯಂ.

೨೩. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯಂ ಏವಂ ಅಭಾವಿತಂ ಮಹತೋ ಅನತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಚಿತ್ತಂ. ಚಿತ್ತಂ, ಭಿಕ್ಖವೇ, ಅಭಾವಿತಂ ಮಹತೋ ಅನತ್ಥಾಯ ಸಂವತ್ತತೀ’’ತಿ. ತತಿಯಂ.

೨೪. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯಂ ಏವಂ ಭಾವಿತಂ ಮಹತೋ ಅತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಚಿತ್ತಂ. ಚಿತ್ತಂ, ಭಿಕ್ಖವೇ, ಭಾವಿತಂ ಮಹತೋ ಅತ್ಥಾಯ ಸಂವತ್ತತೀ’’ತಿ. ಚತುತ್ಥಂ.

೨೫. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯಂ ಏವಂ ಅಭಾವಿತಂ ಅಪಾತುಭೂತಂ ಮಹತೋ ಅನತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಚಿತ್ತಂ. ಚಿತ್ತಂ, ಭಿಕ್ಖವೇ, ಅಭಾವಿತಂ ಅಪಾತುಭೂತಂ ಮಹತೋ ಅನತ್ಥಾಯ ಸಂವತ್ತತೀ’’ತಿ. ಪಞ್ಚಮಂ.

೨೬. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯಂ ಏವಂ ಭಾವಿತಂ ಪಾತುಭೂತಂ ಮಹತೋ ಅತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಚಿತ್ತಂ. ಚಿತ್ತಂ, ಭಿಕ್ಖವೇ, ಭಾವಿತಂ ಪಾತುಭೂತಂ ಮಹತೋ ಅತ್ಥಾಯ ಸಂವತ್ತತೀ’’ತಿ. ಛಟ್ಠಂ.

೨೭. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯಂ ಏವಂ ಅಭಾವಿತಂ ಅಬಹುಲೀಕತಂ ಮಹತೋ ಅನತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಚಿತ್ತಂ. ಚಿತ್ತಂ, ಭಿಕ್ಖವೇ, ಅಭಾವಿತಂ ಅಬಹುಲೀಕತಂ ಮಹತೋ ಅನತ್ಥಾಯ ಸಂವತ್ತತೀ’’ತಿ. ಸತ್ತಮಂ.

೨೮. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯಂ ಏವಂ ಭಾವಿತಂ ಬಹುಲೀಕತಂ ಮಹತೋ ಅತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಚಿತ್ತಂ. ಚಿತ್ತಂ, ಭಿಕ್ಖವೇ, ಭಾವಿತಂ ಬಹುಲೀಕತಂ ಮಹತೋ ಅತ್ಥಾಯ ಸಂವತ್ತತೀ’’ತಿ. ಅಟ್ಠಮಂ.

೨೯. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯಂ ಏವಂ ಅಭಾವಿತಂ ಅಬಹುಲೀಕತಂ ದುಕ್ಖಾಧಿವಹಂ ಹೋತಿ ಯಥಯಿದಂ, ಭಿಕ್ಖವೇ, ಚಿತ್ತಂ. ಚಿತ್ತಂ, ಭಿಕ್ಖವೇ, ಅಭಾವಿತಂ ಅಬಹುಲೀಕತಂ ದುಕ್ಖಾಧಿವಹಂ ಹೋತೀ’’ತಿ. ನವಮಂ.

೩೦. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯಂ ಏವಂ ಭಾವಿತಂ ಬಹುಲೀಕತಂ ಸುಖಾಧಿವಹಂ ಹೋತಿ ಯಥಯಿದಂ, ಭಿಕ್ಖವೇ, ಚಿತ್ತಂ. ಚಿತ್ತಂ, ಭಿಕ್ಖವೇ, ಭಾವಿತಂ ಬಹುಲೀಕತಂ ಸುಖಾಧಿವಹಂ ಹೋತೀ’’ತಿ. ದಸಮಂ.

ಅಕಮ್ಮನಿಯವಗ್ಗೋ ತತಿಯೋ.

೪. ಅದನ್ತವಗ್ಗೋ

೩೧. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯಂ ಏವಂ ಅದನ್ತಂ ಮಹತೋ ಅನತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಚಿತ್ತಂ. ಚಿತ್ತಂ, ಭಿಕ್ಖವೇ, ಅದನ್ತಂ ಮಹತೋ ಅನತ್ಥಾಯ ಸಂವತ್ತತೀ’’ತಿ. ಪಠಮಂ.

೩೨. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯಂ ಏವಂ ದನ್ತಂ ಮಹತೋ ಅತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಚಿತ್ತಂ. ಚಿತ್ತಂ, ಭಿಕ್ಖವೇ, ದನ್ತಂ ಮಹತೋ ಅತ್ಥಾಯ ಸಂವತ್ತತೀ’’ತಿ. ದುತಿಯಂ.

೩೩. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯಂ ಏವಂ ಅಗುತ್ತಂ ಮಹತೋ ಅನತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಚಿತ್ತಂ. ಚಿತ್ತಂ, ಭಿಕ್ಖವೇ, ಅಗುತ್ತಂ ಮಹತೋ ಅನತ್ಥಾಯ ಸಂವತ್ತತೀ’’ತಿ. ತತಿಯಂ.

೩೪. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯಂ ಏವಂ ಗುತ್ತಂ ಮಹತೋ ಅತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಚಿತ್ತಂ. ಚಿತ್ತಂ, ಭಿಕ್ಖವೇ, ಗುತ್ತಂ ಮಹತೋ ಅತ್ಥಾಯ ಸಂವತ್ತತೀ’’ತಿ. ಚತುತ್ಥಂ.

೩೫. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯಂ ಏವಂ ಅರಕ್ಖಿತಂ ಮಹತೋ ಅನತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಚಿತ್ತಂ. ಚಿತ್ತಂ, ಭಿಕ್ಖವೇ, ಅರಕ್ಖಿತಂ ಮಹತೋ ಅನತ್ಥಾಯ ಸಂವತ್ತತೀ’’ತಿ. ಪಞ್ಚಮಂ.

೩೬. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯಂ ಏವಂ ರಕ್ಖಿತಂ ಮಹತೋ ಅತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಚಿತ್ತಂ. ಚಿತ್ತಂ, ಭಿಕ್ಖವೇ, ರಕ್ಖಿತಂ ಮಹತೋ ಅತ್ಥಾಯ ಸಂವತ್ತತೀ’’ತಿ. ಛಟ್ಠಂ.

೩೭. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯಂ ಏವಂ ಅಸಂವುತಂ ಮಹತೋ ಅನತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಚಿತ್ತಂ. ಚಿತ್ತಂ, ಭಿಕ್ಖವೇ, ಅಸಂವುತಂ ಮಹತೋ ಅನತ್ಥಾಯ ಸಂವತ್ತತೀ’’ತಿ. ಸತ್ತಮಂ.

೩೮. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯಂ ಏವಂ ಸಂವುತಂ ಮಹತೋ ಅತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಚಿತ್ತಂ. ಚಿತ್ತಂ, ಭಿಕ್ಖವೇ, ಸಂವುತಂ ಮಹತೋ ಅತ್ಥಾಯ ಸಂವತ್ತತೀ’’ತಿ. ಅಟ್ಠಮಂ.

೩೯. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯಂ ಏವಂ ಅದನ್ತಂ ಅಗುತ್ತಂ ಅರಕ್ಖಿತಂ ಅಸಂವುತಂ ಮಹತೋ ಅನತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಚಿತ್ತಂ. ಚಿತ್ತಂ, ಭಿಕ್ಖವೇ, ಅದನ್ತಂ ಅಗುತ್ತಂ ಅರಕ್ಖಿತಂ ಅಸಂವುತಂ ಮಹತೋ ಅನತ್ಥಾಯ ಸಂವತ್ತತೀ’’ತಿ. ನವಮಂ.

೪೦. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯಂ ಏವಂ ದನ್ತಂ ಗುತ್ತಂ ರಕ್ಖಿತಂ ಸಂವುತಂ ಮಹತೋ ಅತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಚಿತ್ತಂ. ಚಿತ್ತಂ, ಭಿಕ್ಖವೇ, ದನ್ತಂ ಗುತ್ತಂ ರಕ್ಖಿತಂ ಸಂವುತಂ ಮಹತೋ ಅತ್ಥಾಯ ಸಂವತ್ತತೀ’’ತಿ. ದಸಮಂ.

ಅದನ್ತವಗ್ಗೋ ಚತುತ್ಥೋ.

೫. ಪಣಿಹಿತಅಚ್ಛವಗ್ಗೋ

೪೧. ‘‘ಸೇಯ್ಯಥಾಪಿ, ಭಿಕ್ಖವೇ, ಸಾಲಿಸೂಕಂ ವಾ ಯವಸೂಕಂ ವಾ ಮಿಚ್ಛಾಪಣಿಹಿತಂ ಹತ್ಥೇನ ವಾ ಪಾದೇನ ವಾ ಅಕ್ಕನ್ತಂ ಹತ್ಥಂ ವಾ ಪಾದಂ ವಾ ಭೇಚ್ಛತಿ [ಭಿಜ್ಜಿಸ್ಸತಿ (ಸ್ಯಾ. ಕಂ. ಕ.), ಭೇಜ್ಜತಿ (ಸೀ.) ಮೋಗ್ಗಲ್ಲಾನಬ್ಯಾಕರಣಂ ಪಸ್ಸಿತಬ್ಬಂ] ಲೋಹಿತಂ ವಾ ಉಪ್ಪಾದೇಸ್ಸತೀತಿ ನೇತಂ ಠಾನಂ ವಿಜ್ಜತಿ. ತಂ ಕಿಸ್ಸ ಹೇತು? ಮಿಚ್ಛಾಪಣಿಹಿತತ್ತಾ, ಭಿಕ್ಖವೇ, ಸೂಕಸ್ಸ. ಏವಮೇವಂ ಖೋ, ಭಿಕ್ಖವೇ, ಸೋ ವತ ಭಿಕ್ಖು ಮಿಚ್ಛಾಪಣಿಹಿತೇನ ಚಿತ್ತೇನ ಅವಿಜ್ಜಂ ಭೇಚ್ಛತಿ, ವಿಜ್ಜಂ ಉಪ್ಪಾದೇಸ್ಸತಿ, ನಿಬ್ಬಾನಂ ಸಚ್ಛಿಕರಿಸ್ಸತೀತಿ ನೇತಂ ಠಾನಂ ವಿಜ್ಜತಿ. ತಂ ಕಿಸ್ಸ ಹೇತು? ಮಿಚ್ಛಾಪಣಿಹಿತತ್ತಾ, ಭಿಕ್ಖವೇ, ಚಿತ್ತಸ್ಸಾ’’ತಿ. ಪಠಮಂ.

೪೨. ‘‘ಸೇಯ್ಯಥಾಪಿ, ಭಿಕ್ಖವೇ, ಸಾಲಿಸೂಕಂ ವಾ ಯವಸೂಕಂ ವಾ ಸಮ್ಮಾಪಣಿಹಿತಂ ಹತ್ಥೇನ ವಾ ಪಾದೇನ ವಾ ಅಕ್ಕನ್ತಂ ಹತ್ಥಂ ವಾ ಪಾದಂ ವಾ ಭೇಚ್ಛತಿ ಲೋಹಿತಂ ವಾ ಉಪ್ಪಾದೇಸ್ಸತೀತಿ ಠಾನಮೇತಂ ವಿಜ್ಜತಿ. ತಂ ಕಿಸ್ಸ ಹೇತು? ಸಮ್ಮಾಪಣಿಹಿತತ್ತಾ, ಭಿಕ್ಖವೇ, ಸೂಕಸ್ಸ. ಏವಮೇವಂ ಖೋ, ಭಿಕ್ಖವೇ, ಸೋ ವತ ಭಿಕ್ಖು ಸಮ್ಮಾಪಣಿಹಿತೇನ ಚಿತ್ತೇನ ಅವಿಜ್ಜಂ ಭೇಚ್ಛತಿ, ವಿಜ್ಜಂ ಉಪ್ಪಾದೇಸ್ಸತಿ, ನಿಬ್ಬಾನಂ ಸಚ್ಛಿಕರಿಸ್ಸತೀತಿ ಠಾನಮೇತಂ ವಿಜ್ಜತಿ. ತಂ ಕಿಸ್ಸ ಹೇತು? ಸಮ್ಮಾಪಣಿಹಿತತ್ತಾ, ಭಿಕ್ಖವೇ, ಚಿತ್ತಸ್ಸಾ’’ತಿ. ದುತಿಯಂ.

೪೩. ‘‘ಇಧಾಹಂ [ಇದಾಹಂ (ಸೀ.)], ಭಿಕ್ಖವೇ, ಏಕಚ್ಚಂ ಪುಗ್ಗಲಂ ಪದುಟ್ಠಚಿತ್ತಂ ಏವಂ ಚೇತಸಾ ಚೇತೋ ಪರಿಚ್ಚ ಪಜಾನಾಮಿ – ‘ಇಮಮ್ಹಿ ಚೇ ಅಯಂ ಸಮಯೇ ಪುಗ್ಗಲೋ ಕಾಲಂ ಕರೇಯ್ಯ, ಯಥಾಭತಂ ನಿಕ್ಖಿತ್ತೋ ಏವಂ ನಿರಯೇ’. ತಂ ಕಿಸ್ಸ ಹೇತು? ಚಿತ್ತಂ ಹಿಸ್ಸ, ಭಿಕ್ಖವೇ, ಪದುಟ್ಠಂ. ‘‘ಚೇತೋಪದೋಸಹೇತು ಪನ, ಭಿಕ್ಖವೇ, ಏವಮಿಧೇಕಚ್ಚೇ ಸತ್ತಾ ಕಾಯಸ್ಸ ಭೇದಾ ಪರಂ ಮರಣಾ ಅಪಾಯಂ ದುಗ್ಗತಿಂ ವಿನಿಪಾತಂ ನಿರಯಂ ಉಪಪಜ್ಜನ್ತೀ’’ತಿ. ತತಿಯಂ.

೪೪. ‘‘ಇಧಾಹಂ, ಭಿಕ್ಖವೇ, ಏಕಚ್ಚಂ ಪುಗ್ಗಲಂ ಪಸನ್ನಚಿತ್ತಂ ಏವಂ ಚೇತಸಾ ಚೇತೋ ಪರಿಚ್ಚ ಪಜಾನಾಮಿ – ‘ಇಮಮ್ಹಿ ಚೇ ಅಯಂ ಸಮಯೇ ಪುಗ್ಗಲೋ ಕಾಲಂ ಕರೇಯ್ಯ, ಯಥಾಭತಂ ನಿಕ್ಖಿತ್ತೋ ಏವಂ ಸಗ್ಗೇ’. ತಂ ಕಿಸ್ಸ ಹೇತು? ಚಿತ್ತಂ ಹಿಸ್ಸ, ಭಿಕ್ಖವೇ, ಪಸನ್ನಂ. ‘‘ಚೇತೋಪಸಾದಹೇತು ಪನ, ಭಿಕ್ಖವೇ, ಏವಮಿಧೇಕಚ್ಚೇ ಸತ್ತಾ ಕಾಯಸ್ಸ ಭೇದಾ ಪರಂ ಮರಣಾ ಸುಗತಿಂ ಸಗ್ಗಂ ಲೋಕಂ ಉಪಪಜ್ಜನ್ತೀ’’ತಿ. ಚತುತ್ಥಂ.

೪೫. ‘‘ಸೇಯ್ಯಥಾಪಿ, ಭಿಕ್ಖವೇ, ಉದಕರಹದೋ ಆವಿಲೋ ಲುಳಿತೋ ಕಲಲೀಭೂತೋ ತತ್ಥ ಚಕ್ಖುಮಾ ಪುರಿಸೋ ತೀರೇ ಠಿತೋ ನ ಪಸ್ಸೇಯ್ಯ ಸಿಪ್ಪಿಸಮ್ಬುಕಮ್ಪಿ [ಸಿಪ್ಪಿಕಸಮ್ಬುಕಮ್ಪಿ (ಕ.)] ಸಕ್ಖರಕಠಲಮ್ಪಿ ಮಚ್ಛಗುಮ್ಬಮ್ಪಿ ಚರನ್ತಮ್ಪಿ ತಿಟ್ಠನ್ತಮ್ಪಿ. ತಂ ಕಿಸ್ಸ ಹೇತು? ಆವಿಲತ್ತಾ, ಭಿಕ್ಖವೇ, ಉದಕಸ್ಸ. ಏವಮೇವಂ ಖೋ, ಭಿಕ್ಖವೇ, ಸೋ ವತ ಭಿಕ್ಖು ಆವಿಲೇನ ಚಿತ್ತೇನ ಅತ್ತತ್ಥಂ ವಾ ಞಸ್ಸತಿ ಪರತ್ಥಂ ವಾ ಞಸ್ಸತಿ ಉಭಯತ್ಥಂ ವಾ ಞಸ್ಸತಿ ಉತ್ತರಿಂ ವಾ ಮನುಸ್ಸಧಮ್ಮಾ ಅಲಮರಿಯಞಾಣದಸ್ಸನವಿಸೇಸಂ ಸಚ್ಛಿಕರಿಸ್ಸತೀತಿ ನೇತಂ ಠಾನಂ ವಿಜ್ಜತಿ. ತಂ ಕಿಸ್ಸ ಹೇತು? ಆವಿಲತ್ತಾ, ಭಿಕ್ಖವೇ, ಚಿತ್ತಸ್ಸಾ’’ತಿ. ಪಞ್ಚಮಂ.

೪೬. ‘‘ಸೇಯ್ಯಥಾಪಿ, ಭಿಕ್ಖವೇ, ಉದಕರಹದೋ ಅಚ್ಛೋ ವಿಪ್ಪಸನ್ನೋ ಅನಾವಿಲೋ ತತ್ಥ ಚಕ್ಖುಮಾ ಪುರಿಸೋ ತೀರೇ ಠಿತೋ ಪಸ್ಸೇಯ್ಯ ಸಿಪ್ಪಿಸಮ್ಬುಕಮ್ಪಿ ಸಕ್ಖರಕಠಲಮ್ಪಿ ಮಚ್ಛಗುಮ್ಬಮ್ಪಿ ಚರನ್ತಮ್ಪಿ ತಿಟ್ಠನ್ತಮ್ಪಿ. ತಂ ಕಿಸ್ಸ ಹೇತು? ಅನಾವಿಲತ್ತಾ, ಭಿಕ್ಖವೇ, ಉದಕಸ್ಸ. ಏವಮೇವಂ ಖೋ, ಭಿಕ್ಖವೇ, ಸೋ ವತ ಭಿಕ್ಖು ಅನಾವಿಲೇನ ಚಿತ್ತೇನ ಅತ್ತತ್ಥಂ ವಾ ಞಸ್ಸತಿ ಪರತ್ಥಂ ವಾ ಞಸ್ಸತಿ ಉಭಯತ್ಥಂ ವಾ ಞಸ್ಸತಿ ಉತ್ತರಿಂ ವಾ ಮನುಸ್ಸಧಮ್ಮಾ ಅಲಮರಿಯಞಾಣದಸ್ಸನವಿಸೇಸಂ ಸಚ್ಛಿಕರಿಸ್ಸತೀತಿ ಠಾನಮೇತಂ ವಿಜ್ಜತಿ. ತಂ ಕಿಸ್ಸ ಹೇತು? ಅನಾವಿಲತ್ತಾ, ಭಿಕ್ಖವೇ, ಚಿತ್ತಸ್ಸಾ’’ತಿ. ಛಟ್ಠಂ.

೪೭. ‘‘ಸೇಯ್ಯಥಾಪಿ, ಭಿಕ್ಖವೇ, ಯಾನಿ ಕಾನಿಚಿ ರುಕ್ಖಜಾತಾನಂ ಫನ್ದನೋ ತೇಸಂ ಅಗ್ಗಮಕ್ಖಾಯತಿ ಯದಿದಂ ಮುದುತಾಯ ಚೇವ ಕಮ್ಮಞ್ಞತಾಯ ಚ. ಏವಮೇವಂ ಖೋ ಅಹಂ, ಭಿಕ್ಖವೇ, ನಾಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯಂ ಏವಂ ಭಾವಿತಂ ಬಹುಲೀಕತಂ ಮುದು ಚ ಹೋತಿ ಕಮ್ಮಞ್ಞಞ್ಚ ಯಥಯಿದಂ ಚಿತ್ತಂ. ಚಿತ್ತಂ, ಭಿಕ್ಖವೇ, ಭಾವಿತಂ ಬಹುಲೀಕತಂ ಮುದು ಚ ಹೋತಿ ಕಮ್ಮಞ್ಞಞ್ಚ ಹೋತೀ’’ತಿ. ಸತ್ತಮಂ.

೪೮. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯಂ ಏವಂ ಲಹುಪರಿವತ್ತಂ ಯಥಯಿದಂ ಚಿತ್ತಂ. ಯಾವಞ್ಚಿದಂ, ಭಿಕ್ಖವೇ, ಉಪಮಾಪಿ ನ ಸುಕರಾ ಯಾವ ಲಹುಪರಿವತ್ತಂ ಚಿತ್ತ’’ನ್ತಿ. ಅಟ್ಠಮಂ.

೪೯. ‘‘ಪಭಸ್ಸರಮಿದಂ, ಭಿಕ್ಖವೇ, ಚಿತ್ತಂ. ತಞ್ಚ ಖೋ ಆಗನ್ತುಕೇಹಿ ಉಪಕ್ಕಿಲೇಸೇಹಿ ಉಪಕ್ಕಿಲಿಟ್ಠ’’ನ್ತಿ. ನವಮಂ.

೫೦. ‘‘ಪಭಸ್ಸರಮಿದಂ, ಭಿಕ್ಖವೇ, ಚಿತ್ತಂ. ತಞ್ಚ ಖೋ ಆಗನ್ತುಕೇಹಿ ಉಪಕ್ಕಿಲೇಸೇಹಿ ವಿಪ್ಪಮುತ್ತ’’ನ್ತಿ. ದಸಮಂ.

ಪಣಿಹಿತಅಚ್ಛವಗ್ಗೋ ಪಞ್ಚಮೋ.

೬. ಅಚ್ಛರಾಸಙ್ಘಾತವಗ್ಗೋ

೫೧. ‘‘ಪಭಸ್ಸರಮಿದಂ, ಭಿಕ್ಖವೇ, ಚಿತ್ತಂ. ತಞ್ಚ ಖೋ ಆಗನ್ತುಕೇಹಿ ಉಪಕ್ಕಿಲೇಸೇಹಿ ಉಪಕ್ಕಿಲಿಟ್ಠಂ. ತಂ ಅಸ್ಸುತವಾ ಪುಥುಜ್ಜನೋ ಯಥಾಭೂತಂ ನಪ್ಪಜಾನಾತಿ. ತಸ್ಮಾ ‘ಅಸ್ಸುತವತೋ ಪುಥುಜ್ಜನಸ್ಸ ಚಿತ್ತಭಾವನಾ ನತ್ಥೀ’ತಿ ವದಾಮೀ’’ತಿ. ಪಠಮಂ.

೫೨. ‘‘ಪಭಸ್ಸರಮಿದಂ, ಭಿಕ್ಖವೇ, ಚಿತ್ತಂ. ತಞ್ಚ ಖೋ ಆಗನ್ತುಕೇಹಿ ಉಪಕ್ಕಿಲೇಸೇಹಿ ವಿಪ್ಪಮುತ್ತಂ. ತಂ ಸುತವಾ ಅರಿಯಸಾವಕೋ ಯಥಾಭೂತಂ ಪಜಾನಾತಿ. ತಸ್ಮಾ ‘ಸುತವತೋ ಅರಿಯಸಾವಕಸ್ಸ ಚಿತ್ತಭಾವನಾ ಅತ್ಥೀ’ತಿ ವದಾಮೀ’’ತಿ. ದುತಿಯಂ.

೫೩. ‘‘ಅಚ್ಛರಾಸಙ್ಘಾತಮತ್ತಮ್ಪಿ ಚೇ, ಭಿಕ್ಖವೇ, ಭಿಕ್ಖು ಮೇತ್ತಾಚಿತ್ತಂ [ಮೇತ್ತಂ ಚಿತ್ತಂ (ಸೀ.), ಮೇತ್ತಚಿತ್ತಂ (ಸ್ಯಾ. ಕಂ. ಪೀ. ಕ.)] ಆಸೇವತಿ; ಅಯಂ ವುಚ್ಚತಿ, ಭಿಕ್ಖವೇ – ‘ಭಿಕ್ಖು ಅರಿತ್ತಜ್ಝಾನೋ ವಿಹರತಿ ಸತ್ಥುಸಾಸನಕರೋ ಓವಾದಪತಿಕರೋ, ಅಮೋಘಂ ರಟ್ಠಪಿಣ್ಡಂ ಭುಞ್ಜತಿ’. ಕೋ ಪನ ವಾದೋ ಯೇ ನಂ ಬಹುಲೀಕರೋನ್ತೀ’’ತಿ! ತತಿಯಂ.

೫೪. ‘‘ಅಚ್ಛರಾಸಙ್ಘಾತಮತ್ತಮ್ಪಿ ಚೇ, ಭಿಕ್ಖವೇ, ಭಿಕ್ಖು ಮೇತ್ತಾಚಿತ್ತಂ ಭಾವೇತಿ; ಅಯಂ ವುಚ್ಚತಿ, ಭಿಕ್ಖವೇ – ‘ಭಿಕ್ಖು ಅರಿತ್ತಜ್ಝಾನೋ ವಿಹರತಿ ಸತ್ಥುಸಾಸನಕರೋ ಓವಾದಪತಿಕರೋ, ಅಮೋಘಂ ರಟ್ಠಪಿಣ್ಡಂ ಭುಞ್ಜತಿ’. ಕೋ ಪನ ವಾದೋ ಯೇ ನಂ ಬಹುಲೀಕರೋನ್ತೀ’’ತಿ! ಚತುತ್ಥಂ.

೫೫. ‘‘ಅಚ್ಛರಾಸಙ್ಘಾತಮತ್ತಮ್ಪಿ ಚೇ, ಭಿಕ್ಖವೇ, ಭಿಕ್ಖು ಮೇತ್ತಾಚಿತ್ತಂ ಮನಸಿ ಕರೋತಿ; ಅಯಂ ವುಚ್ಚತಿ, ಭಿಕ್ಖವೇ – ‘ಭಿಕ್ಖು ಅರಿತ್ತಜ್ಝಾನೋ ವಿಹರತಿ ಸತ್ಥುಸಾಸನಕರೋ ಓವಾದಪತಿಕರೋ ಅಮೋಘಂ ರಟ್ಠಪಿಣ್ಡಂ ಭುಞ್ಜತಿ’. ಕೋ ಪನ ವಾದೋ ಯೇ ನಂ ಬಹುಲೀಕರೋನ್ತೀ’’ತಿ! ಪಞ್ಚಮಂ.

೫೬. ‘‘ಯೇ ಕೇಚಿ, ಭಿಕ್ಖವೇ, ಧಮ್ಮಾ ಅಕುಸಲಾ ಅಕುಸಲಭಾಗಿಯಾ ಅಕುಸಲಪಕ್ಖಿಕಾ, ಸಬ್ಬೇ ತೇ ಮನೋಪುಬ್ಬಙ್ಗಮಾ. ಮನೋ ತೇಸಂ ಧಮ್ಮಾನಂ ಪಠಮಂ ಉಪ್ಪಜ್ಜತಿ, ಅನ್ವದೇವ ಅಕುಸಲಾ ಧಮ್ಮಾ’’ತಿ. ಛಟ್ಠಂ.

೫೭. ‘‘ಯೇ ಕೇಚಿ, ಭಿಕ್ಖವೇ, ಧಮ್ಮಾ ಕುಸಲಾ ಕುಸಲಭಾಗಿಯಾ ಕುಸಲಪಕ್ಖಿಕಾ, ಸಬ್ಬೇ ತೇ ಮನೋಪುಬ್ಬಙ್ಗಮಾ. ಮನೋ ತೇಸಂ ಧಮ್ಮಾನಂ ಪಠಮಂ ಉಪ್ಪಜ್ಜತಿ, ಅನ್ವದೇವ ಕುಸಲಾ ಧಮ್ಮಾ’’ತಿ. ಸತ್ತಮಂ.

೫೮. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ಅಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ವಾ ಕುಸಲಾ ಧಮ್ಮಾ ಪರಿಹಾಯನ್ತಿ ಯಥಯಿದಂ, ಭಿಕ್ಖವೇ, ಪಮಾದೋ. ಪಮತ್ತಸ್ಸ, ಭಿಕ್ಖವೇ, ಅನುಪ್ಪನ್ನಾ ಚೇವ ಅಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ಚ ಕುಸಲಾ ಧಮ್ಮಾ ಪರಿಹಾಯನ್ತೀ’’ತಿ. ಅಟ್ಠಮಂ.

೫೯. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ವಾ ಅಕುಸಲಾ ಧಮ್ಮಾ ಪರಿಹಾಯನ್ತಿ ಯಥಯಿದಂ, ಭಿಕ್ಖವೇ, ಅಪ್ಪಮಾದೋ. ಅಪ್ಪಮತ್ತಸ್ಸ, ಭಿಕ್ಖವೇ, ಅನುಪ್ಪನ್ನಾ ಚೇವ ಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ಚ ಅಕುಸಲಾ ಧಮ್ಮಾ ಪರಿಹಾಯನ್ತೀ’’ತಿ. ನವಮಂ.

೬೦. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ಅಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ವಾ ಕುಸಲಾ ಧಮ್ಮಾ ಪರಿಹಾಯನ್ತಿ ಯಥಯಿದಂ, ಭಿಕ್ಖವೇ, ಕೋಸಜ್ಜಂ. ಕುಸೀತಸ್ಸ, ಭಿಕ್ಖವೇ, ಅನುಪ್ಪನ್ನಾ ಚೇವ ಅಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ಚ ಕುಸಲಾ ಧಮ್ಮಾ ಪರಿಹಾಯನ್ತೀ’’ತಿ. ದಸಮಂ.

ಅಚ್ಛರಾಸಙ್ಘಾತವಗ್ಗೋ ಛಟ್ಠೋ.

೭. ವೀರಿಯಾರಮ್ಭಾದಿವಗ್ಗೋ

೬೧. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ವಾ ಅಕುಸಲಾ ಧಮ್ಮಾ ಪರಿಹಾಯನ್ತಿ ಯಥಯಿದಂ, ಭಿಕ್ಖವೇ, ವೀರಿಯಾರಮ್ಭೋ [ವಿರಿಯಾರಮ್ಭೋ (ಸೀ. ಸ್ಯಾ. ಕಂ. ಪೀ.)]. ಆರದ್ಧವೀರಿಯಸ್ಸ, ಭಿಕ್ಖವೇ, ಅನುಪ್ಪನ್ನಾ ಚೇವ ಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ಚ ಅಕುಸಲಾ ಧಮ್ಮಾ ಪರಿಹಾಯನ್ತೀ’’ತಿ. ಪಠಮಂ.

೬೨. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ಅಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ವಾ ಕುಸಲಾ ಧಮ್ಮಾ ಪರಿಹಾಯನ್ತಿ ಯಥಯಿದಂ, ಭಿಕ್ಖವೇ, ಮಹಿಚ್ಛತಾ. ಮಹಿಚ್ಛಸ್ಸ, ಭಿಕ್ಖವೇ, ಅನುಪ್ಪನ್ನಾ ಚೇವ ಅಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ಚ ಕುಸಲಾ ಧಮ್ಮಾ ಪರಿಹಾಯನ್ತೀ’’ತಿ. ದುತಿಯಂ.

೬೩. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ವಾ ಅಕುಸಲಾ ಧಮ್ಮಾ ಪರಿಹಾಯನ್ತಿ ಯಥಯಿದಂ, ಭಿಕ್ಖವೇ, ಅಪ್ಪಿಚ್ಛತಾ. ಅಪ್ಪಿಚ್ಛಸ್ಸ, ಭಿಕ್ಖವೇ, ಅನುಪ್ಪನ್ನಾ ಚೇವ ಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ಚ ಅಕುಸಲಾ ಧಮ್ಮಾ ಪರಿಹಾಯನ್ತೀ’’ತಿ. ತತಿಯಂ.

೬೪. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ಅಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ವಾ ಕುಸಲಾ ಧಮ್ಮಾ ಪರಿಹಾಯನ್ತಿ ಯಥಯಿದಂ, ಭಿಕ್ಖವೇ, ಅಸನ್ತುಟ್ಠಿತಾ. ಅಸನ್ತುಟ್ಠಸ್ಸ, ಭಿಕ್ಖವೇ, ಅನುಪ್ಪನ್ನಾ ಚೇವ ಅಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ಚ ಕುಸಲಾ ಧಮ್ಮಾ ಪರಿಹಾಯನ್ತೀ’’ತಿ. ಚತುತ್ಥಂ.

೬೫. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ವಾ ಅಕುಸಲಾ ಧಮ್ಮಾ ಪರಿಹಾಯನ್ತಿ ಯಥಯಿದಂ, ಭಿಕ್ಖವೇ, ಸನ್ತುಟ್ಠಿತಾ. ಸನ್ತುಟ್ಠಸ್ಸ, ಭಿಕ್ಖವೇ, ಅನುಪ್ಪನ್ನಾ ಚೇವ ಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ಚ ಅಕುಸಲಾ ಧಮ್ಮಾ ಪರಿಹಾಯನ್ತೀ’’ತಿ. ಪಞ್ಚಮಂ.

೬೬. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ಅಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ವಾ ಕುಸಲಾ ಧಮ್ಮಾ ಪರಿಹಾಯನ್ತಿ ಯಥಯಿದಂ, ಭಿಕ್ಖವೇ, ಅಯೋನಿಸೋಮನಸಿಕಾರೋ. ಅಯೋನಿಸೋ, ಭಿಕ್ಖವೇ, ಮನಸಿ ಕರೋತೋ ಅನುಪ್ಪನ್ನಾ ಚೇವ ಅಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ಚ ಕುಸಲಾ ಧಮ್ಮಾ ಪರಿಹಾಯನ್ತೀ’’ತಿ. ಛಟ್ಠಂ.

೬೭. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ವಾ ಅಕುಸಲಾ ಧಮ್ಮಾ ಪರಿಹಾಯನ್ತಿ ಯಥಯಿದಂ, ಭಿಕ್ಖವೇ, ಯೋನಿಸೋಮನಸಿಕಾರೋ. ಯೋನಿಸೋ, ಭಿಕ್ಖವೇ, ಮನಸಿ ಕರೋತೋ ಅನುಪ್ಪನ್ನಾ ಚೇವ ಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ಚ ಅಕುಸಲಾ ಧಮ್ಮಾ ಪರಿಹಾಯನ್ತೀ’’ತಿ. ಸತ್ತಮಂ.

೬೮. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ಅಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ವಾ ಕುಸಲಾ ಧಮ್ಮಾ ಪರಿಹಾಯನ್ತಿ ಯಥಯಿದಂ, ಭಿಕ್ಖವೇ, ಅಸಮ್ಪಜಞ್ಞಂ. ಅಸಮ್ಪಜಾನಸ್ಸ, ಭಿಕ್ಖವೇ, ಅನುಪ್ಪನ್ನಾ ಚೇವ ಅಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ಚ ಕುಸಲಾ ಧಮ್ಮಾ ಪರಿಹಾಯನ್ತೀ’’ತಿ. ಅಟ್ಠಮಂ.

೬೯. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ವಾ ಅಕುಸಲಾ ಧಮ್ಮಾ ಪರಿಹಾಯನ್ತಿ ಯಥಯಿದಂ, ಭಿಕ್ಖವೇ, ಸಮ್ಪಜಞ್ಞಂ. ಸಮ್ಪಜಾನಸ್ಸ, ಭಿಕ್ಖವೇ, ಅನುಪ್ಪನ್ನಾ ಚೇವ ಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ಚ ಅಕುಸಲಾ ಧಮ್ಮಾ ಪರಿಹಾಯನ್ತೀ’’ತಿ. ನವಮಂ.

೭೦. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ಅಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ವಾ ಕುಸಲಾ ಧಮ್ಮಾ ಪರಿಹಾಯನ್ತಿ ಯಥಯಿದಂ, ಭಿಕ್ಖವೇ, ಪಾಪಮಿತ್ತತಾ. ಪಾಪಮಿತ್ತಸ್ಸ, ಭಿಕ್ಖವೇ, ಅನುಪ್ಪನ್ನಾ ಚೇವ ಅಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ಚ ಕುಸಲಾ ಧಮ್ಮಾ ಪರಿಹಾಯನ್ತೀ’’ತಿ. ದಸಮಂ.

ವೀರಿಯಾರಮ್ಭಾದಿವಗ್ಗೋ ಸತ್ತಮೋ.

೮. ಕಲ್ಯಾಣಮಿತ್ತಾದಿವಗ್ಗೋ

೭೧. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ವಾ ಅಕುಸಲಾ ಧಮ್ಮಾ ಪರಿಹಾಯನ್ತಿ ಯಥಯಿದಂ, ಭಿಕ್ಖವೇ, ಕಲ್ಯಾಣಮಿತ್ತತಾ. ಕಲ್ಯಾಣಮಿತ್ತಸ್ಸ, ಭಿಕ್ಖವೇ, ಅನುಪ್ಪನ್ನಾ ಚೇವ ಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ಚ ಅಕುಸಲಾ ಧಮ್ಮಾ ಪರಿಹಾಯನ್ತೀ’’ತಿ. ಪಠಮಂ.

೭೨. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ಅಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ವಾ ಕುಸಲಾ ಧಮ್ಮಾ ಪರಿಹಾಯನ್ತಿ ಯಥಯಿದಂ, ಭಿಕ್ಖವೇ, ಅನುಯೋಗೋ ಅಕುಸಲಾನಂ ಧಮ್ಮಾನಂ, ಅನನುಯೋಗೋ ಕುಸಲಾನಂ ಧಮ್ಮಾನಂ. ಅನುಯೋಗಾ, ಭಿಕ್ಖವೇ, ಅಕುಸಲಾನಂ ಧಮ್ಮಾನಂ, ಅನನುಯೋಗಾ ಕುಸಲಾನಂ ಧಮ್ಮಾನಂ ಅನುಪ್ಪನ್ನಾ ಚೇವ ಅಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ಚ ಕುಸಲಾ ಧಮ್ಮಾ ಪರಿಹಾಯನ್ತೀ’’ತಿ. ದುತಿಯಂ.

೭೩. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ವಾ ಅಕುಸಲಾ ಧಮ್ಮಾ ಪರಿಹಾಯನ್ತಿ ಯಥಯಿದಂ, ಭಿಕ್ಖವೇ, ಅನುಯೋಗೋ ಕುಸಲಾನಂ ಧಮ್ಮಾನಂ, ಅನನುಯೋಗೋ ಅಕುಸಲಾನಂ ಧಮ್ಮಾನಂ. ಅನುಯೋಗಾ, ಭಿಕ್ಖವೇ, ಕುಸಲಾನಂ ಧಮ್ಮಾನಂ, ಅನನುಯೋಗಾ ಅಕುಸಲಾನಂ ಧಮ್ಮಾನಂ ಅನುಪ್ಪನ್ನಾ ಚೇವ ಕುಸಲಾ ಧಮ್ಮಾ ಉಪ್ಪಜ್ಜನ್ತಿ ಉಪ್ಪನ್ನಾ ಚ ಅಕುಸಲಾ ಧಮ್ಮಾ ಪರಿಹಾಯನ್ತೀ’’ತಿ. ತತಿಯಂ.

೭೪. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ಬೋಜ್ಝಙ್ಗಾ ನುಪ್ಪಜ್ಜನ್ತಿ ಉಪ್ಪನ್ನಾ ವಾ ಬೋಜ್ಝಙ್ಗಾ ನ ಭಾವನಾಪಾರಿಪೂರಿಂ ಗಚ್ಛನ್ತಿ ಯಥಯಿದಂ, ಭಿಕ್ಖವೇ, ಅಯೋನಿಸೋಮನಸಿಕಾರೋ. ಅಯೋನಿಸೋ, ಭಿಕ್ಖವೇ, ಮನಸಿ ಕರೋತೋ ಅನುಪ್ಪನ್ನಾ ಚೇವ ಬೋಜ್ಝಙ್ಗಾ ನುಪ್ಪಜ್ಜನ್ತಿ ಉಪ್ಪನ್ನಾ ಚ ಬೋಜ್ಝಙ್ಗಾ ನ ಭಾವನಾಪಾರಿಪೂರಿಂ ಗಚ್ಛನ್ತೀ’’ತಿ. ಚತುತ್ಥಂ.

೭೫. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೇನ ಅನುಪ್ಪನ್ನಾ ವಾ ಬೋಜ್ಝಙ್ಗಾ ಉಪ್ಪಜ್ಜನ್ತಿ ಉಪ್ಪನ್ನಾ ವಾ ಬೋಜ್ಝಙ್ಗಾ ಭಾವನಾಪಾರಿಪೂರಿಂ ಗಚ್ಛನ್ತಿ ಯಥಯಿದಂ, ಭಿಕ್ಖವೇ, ಯೋನಿಸೋಮನಸಿಕಾರೋ. ಯೋನಿಸೋ, ಭಿಕ್ಖವೇ, ಮನಸಿ ಕರೋತೋ ಅನುಪ್ಪನ್ನಾ ಚೇವ ಬೋಜ್ಝಙ್ಗಾ ಉಪ್ಪಜ್ಜನ್ತಿ ಉಪ್ಪನ್ನಾ ಚ ಬೋಜ್ಝಙ್ಗಾ ಭಾವನಾಪಾರಿಪೂರಿಂ ಗಚ್ಛನ್ತೀ’’ತಿ. ಪಞ್ಚಮಂ.

೭೬. ‘‘ಅಪ್ಪಮತ್ತಿಕಾ ಏಸಾ, ಭಿಕ್ಖವೇ, ಪರಿಹಾನಿ ಯದಿದಂ ಞಾತಿಪರಿಹಾನಿ. ಏತಂ ಪತಿಕಿಟ್ಠಂ, ಭಿಕ್ಖವೇ, ಪರಿಹಾನೀನಂ ಯದಿದಂ ಪಞ್ಞಾಪರಿಹಾನೀ’’ತಿ. ಛಟ್ಠಂ.

೭೭. ‘‘ಅಪ್ಪಮತ್ತಿಕಾ ಏಸಾ, ಭಿಕ್ಖವೇ, ವುದ್ಧಿ ಯದಿದಂ ಞಾತಿವುದ್ಧಿ. ಏತದಗ್ಗಂ, ಭಿಕ್ಖವೇ, ವುದ್ಧೀನಂ ಯದಿದಂ ಪಞ್ಞಾವುದ್ಧಿ. ತಸ್ಮಾತಿಹ, ಭಿಕ್ಖವೇ, ಏವಂ ಸಿಕ್ಖಿತಬ್ಬಂ – ‘ಪಞ್ಞಾವುದ್ಧಿಯಾ ವದ್ಧಿಸ್ಸಾಮಾ’ತಿ. ಏವಞ್ಹಿ ವೋ, ಭಿಕ್ಖವೇ, ಸಿಕ್ಖಿತಬ್ಬ’’ನ್ತಿ. ಸತ್ತಮಂ.

೭೮. ‘‘ಅಪ್ಪಮತ್ತಿಕಾ ಏಸಾ, ಭಿಕ್ಖವೇ, ಪರಿಹಾನಿ ಯದಿದಂ ಭೋಗಪರಿಹಾನಿ. ಏತಂ ಪತಿಕಿಟ್ಠಂ, ಭಿಕ್ಖವೇ, ಪರಿಹಾನೀನಂ ಯದಿದಂ ಪಞ್ಞಾಪರಿಹಾನೀ’’ತಿ. ಅಟ್ಠಮಂ.

೭೯. ‘‘ಅಪ್ಪಮತ್ತಿಕಾ ಏಸಾ, ಭಿಕ್ಖವೇ, ವುದ್ಧಿ ಯದಿದಂ ಭೋಗವುದ್ಧಿ. ಏತದಗ್ಗಂ, ಭಿಕ್ಖವೇ, ವುದ್ಧೀನಂ ಯದಿದಂ ಪಞ್ಞಾವುದ್ಧಿ. ತಸ್ಮಾತಿಹ, ಭಿಕ್ಖವೇ, ಏವಂ ಸಿಕ್ಖಿತಬ್ಬಂ – ‘ಪಞ್ಞಾವುದ್ಧಿಯಾ ವದ್ಧಿಸ್ಸಾಮಾ’ತಿ. ಏವಞ್ಹಿ ವೋ, ಭಿಕ್ಖವೇ, ಸಿಕ್ಖಿತಬ್ಬ’’ನ್ತಿ. ನವಮಂ.

೮೦. ‘‘ಅಪ್ಪಮತ್ತಿಕಾ ಏಸಾ, ಭಿಕ್ಖವೇ, ಪರಿಹಾನಿ ಯದಿದಂ ಯಸೋಪರಿಹಾನಿ. ಏತಂ ಪತಿಕಿಟ್ಠಂ, ಭಿಕ್ಖವೇ, ಪರಿಹಾನೀನಂ ಯದಿದಂ ಪಞ್ಞಾಪರಿಹಾನೀ’’ತಿ. ದಸಮಂ.

ಕಲ್ಯಾಣಮಿತ್ತಾದಿವಗ್ಗೋ ಅಟ್ಠಮೋ.

೯. ಪಮಾದಾದಿವಗ್ಗೋ

೮೧. ‘‘ಅಪ್ಪಮತ್ತಿಕಾ ಏಸಾ, ಭಿಕ್ಖವೇ, ವುದ್ಧಿ ಯದಿದಂ ಯಸೋವುದ್ಧಿ. ಏತದಗ್ಗಂ, ಭಿಕ್ಖವೇ, ವುದ್ಧೀನಂ ಯದಿದಂ ಪಞ್ಞಾವುದ್ಧಿ. ತಸ್ಮಾತಿಹ, ಭಿಕ್ಖವೇ, ಏವಂ ಸಿಕ್ಖಿತಬ್ಬಂ – ‘ಪಞ್ಞಾವುದ್ಧಿಯಾ ವದ್ಧಿಸ್ಸಾಮಾ’ತಿ. ಏವಞ್ಹಿ ವೋ, ಭಿಕ್ಖವೇ, ಸಿಕ್ಖಿತಬ್ಬ’’ನ್ತಿ. ಪಠಮಂ.

೮೨. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೋ ಏವಂ ಮಹತೋ ಅನತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಪಮಾದೋ. ಪಮಾದೋ, ಭಿಕ್ಖವೇ, ಮಹತೋ ಅನತ್ಥಾಯ ಸಂವತ್ತತೀ’’ತಿ. ದುತಿಯಂ.

೮೩. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೋ ಏವಂ ಮಹತೋ ಅತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಅಪ್ಪಮಾದೋ. ಅಪ್ಪಮಾದೋ, ಭಿಕ್ಖವೇ, ಮಹತೋ ಅತ್ಥಾಯ ಸಂವತ್ತತೀ’’ತಿ. ತತಿಯಂ.

೮೪. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೋ ಏವಂ ಮಹತೋ ಅನತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಕೋಸಜ್ಜಂ. ಕೋಸಜ್ಜಂ, ಭಿಕ್ಖವೇ, ಮಹತೋ ಅನತ್ಥಾಯ ಸಂವತ್ತತೀ’’ತಿ. ಚತುತ್ಥಂ.

೮೫. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೋ ಏವಂ ಮಹತೋ ಅತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ವೀರಿಯಾರಮ್ಭೋ. ವೀರಿಯಾರಮ್ಭೋ, ಭಿಕ್ಖವೇ, ಮಹತೋ ಅತ್ಥಾಯ ಸಂವತ್ತತೀ’’ತಿ. ಪಞ್ಚಮಂ.

೮೬. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೋ ಏವಂ ಮಹತೋ ಅನತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಮಹಿಚ್ಛತಾ. ಮಹಿಚ್ಛತಾ, ಭಿಕ್ಖವೇ, ಮಹತೋ ಅನತ್ಥಾಯ ಸಂವತ್ತತೀ’’ತಿ. ಛಟ್ಠಂ.

೮೭. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೋ ಏವಂ ಮಹತೋ ಅತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಅಪ್ಪಿಚ್ಛತಾ. ಅಪ್ಪಿಚ್ಛತಾ, ಭಿಕ್ಖವೇ, ಮಹತೋ ಅತ್ಥಾಯ ಸಂವತ್ತತೀ’’ತಿ. ಸತ್ತಮಂ.

೮೮. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೋ ಏವಂ ಮಹತೋ ಅನತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಅಸನ್ತುಟ್ಠಿತಾ. ಅಸನ್ತುಟ್ಠಿತಾ, ಭಿಕ್ಖವೇ, ಮಹತೋ ಅನತ್ಥಾಯ ಸಂವತ್ತತೀ’’ತಿ. ಅಟ್ಠಮಂ.

೮೯. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೋ ಏವಂ ಮಹತೋ ಅತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಸನ್ತುಟ್ಠಿತಾ. ಸನ್ತುಟ್ಠಿತಾ, ಭಿಕ್ಖವೇ, ಮಹತೋ ಅತ್ಥಾಯ ಸಂವತ್ತತೀ’’ತಿ. ನವಮಂ.

೯೦. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೋ ಏವಂ ಮಹತೋ ಅನತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಅಯೋನಿಸೋ ಮನಸಿಕಾರೋ. ಅಯೋನಿಸೋಮನಸಿಕಾರೋ, ಭಿಕ್ಖವೇ, ಮಹತೋ ಅನತ್ಥಾಯ ಸಂವತ್ತತೀ’’ತಿ. ದಸಮಂ.

೯೧. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೋ ಏವಂ ಮಹತೋ ಅತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಯೋನಿಸೋ ಮನಸಿಕಾರೋ. ಯೋನಿಸೋಮನಸಿಕಾರೋ, ಭಿಕ್ಖವೇ, ಮಹತೋ ಅತ್ಥಾಯ ಸಂವತ್ತತೀ’’ತಿ. ಏಕಾದಸಮಂ.

೯೨. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೋ ಏವಂ ಮಹತೋ ಅನತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಅಸಮ್ಪಜಞ್ಞಂ. ಅಸಮ್ಪಜಞ್ಞಂ, ಭಿಕ್ಖವೇ, ಮಹತೋ ಅನತ್ಥಾಯ ಸಂವತ್ತತೀ’’ತಿ. ದ್ವಾದಸಮಂ.

೯೩. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೋ ಏವಂ ಮಹತೋ ಅತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಸಮ್ಪಜಞ್ಞಂ. ಸಮ್ಪಜಞ್ಞಂ, ಭಿಕ್ಖವೇ, ಮಹತೋ ಅತ್ಥಾಯ ಸಂವತ್ತತೀ’’ತಿ. ತೇರಸಮಂ.

೯೪. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೋ ಏವಂ ಮಹತೋ ಅನತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಪಾಪಮಿತ್ತತಾ. ಪಾಪಮಿತ್ತತಾ, ಭಿಕ್ಖವೇ, ಮಹತೋ ಅನತ್ಥಾಯ ಸಂವತ್ತತೀ’’ತಿ. ಚುದ್ದಸಮಂ.

೯೫. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೋ ಏವಂ ಮಹತೋ ಅತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಕಲ್ಯಾಣಮಿತ್ತತಾ. ಕಲ್ಯಾಣಮಿತ್ತತಾ, ಭಿಕ್ಖವೇ, ಮಹತೋ ಅತ್ಥಾಯ ಸಂವತ್ತತೀ’’ತಿ. ಪನ್ನರಸಮಂ.

೯೬. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೋ ಏವಂ ಮಹತೋ ಅನತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಅನುಯೋಗೋ ಅಕುಸಲಾನಂ ಧಮ್ಮಾನಂ, ಅನನುಯೋಗೋ ಕುಸಲಾನಂ ಧಮ್ಮಾನಂ. ಅನುಯೋಗೋ, ಭಿಕ್ಖವೇ, ಅಕುಸಲಾನಂ ಧಮ್ಮಾನಂ, ಅನನುಯೋಗೋ ಕುಸಲಾನಂ ಧಮ್ಮಾನಂ ಮಹತೋ ಅನತ್ಥಾಯ ಸಂವತ್ತತೀ’’ತಿ. ಸೋಳಸಮಂ.

೯೭. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೋ ಏವಂ ಮಹತೋ ಅತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಅನುಯೋಗೋ ಕುಸಲಾನಂ ಧಮ್ಮಾನಂ, ಅನನುಯೋಗೋ ಅಕುಸಲಾನಂ ಧಮ್ಮಾನಂ. ಅನುಯೋಗೋ, ಭಿಕ್ಖವೇ, ಕುಸಲಾನಂ ಧಮ್ಮಾನಂ, ಅನನುಯೋಗೋ ಅಕುಸಲಾನಂ ಧಮ್ಮಾನಂ ಮಹತೋ ಅತ್ಥಾಯ ಸಂವತ್ತತೀ’’ತಿ. ಸತ್ತರಸಮಂ.

ಪಮಾದಾದಿವಗ್ಗೋ ನವಮೋ.

೧೦. ದುತಿಯಪಮಾದಾದಿವಗ್ಗೋ

೯೮. ‘‘ಅಜ್ಝತ್ತಿಕಂ, ಭಿಕ್ಖವೇ, ಅಙ್ಗನ್ತಿ ಕರಿತ್ವಾ ನಾಞ್ಞಂ ಏಕಙ್ಗಮ್ಪಿ ಸಮನುಪಸ್ಸಾಮಿ ಯಂ ಏವಂ ಮಹತೋ ಅನತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಪಮಾದೋ. ಪಮಾದೋ, ಭಿಕ್ಖವೇ, ಮಹತೋ ಅನತ್ಥಾಯ ಸಂವತ್ತತೀ’’ತಿ. ಪಠಮಂ.

೯೯. ‘‘ಅಜ್ಝತ್ತಿಕಂ, ಭಿಕ್ಖವೇ, ಅಙ್ಗನ್ತಿ ಕರಿತ್ವಾ ನಾಞ್ಞಂ ಏಕಙ್ಗಮ್ಪಿ ಸಮನುಪಸ್ಸಾಮಿ ಯಂ ಏವಂ ಮಹತೋ ಅತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಅಪ್ಪಮಾದೋ. ಅಪ್ಪಮಾದೋ, ಭಿಕ್ಖವೇ, ಮಹತೋ ಅತ್ಥಾಯ ಸಂವತ್ತತೀ’’ತಿ. ದುತಿಯಂ.

೧೦೦. ‘‘ಅಜ್ಝತ್ತಿಕಂ, ಭಿಕ್ಖವೇ, ಅಙ್ಗನ್ತಿ ಕರಿತ್ವಾ ನಾಞ್ಞಂ ಏಕಙ್ಗಮ್ಪಿ ಸಮನುಪಸ್ಸಾಮಿ ಯಂ ಏವಂ ಮಹತೋ ಅನತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಕೋಸಜ್ಜಂ. ಕೋಸಜ್ಜಂ, ಭಿಕ್ಖವೇ, ಮಹತೋ ಅನತ್ಥಾಯ ಸಂವತ್ತತೀ’’ತಿ. ತತಿಯಂ.

೧೦೧. ‘‘ಅಜ್ಝತ್ತಿಕಂ, ಭಿಕ್ಖವೇ, ಅಙ್ಗನ್ತಿ ಕರಿತ್ವಾ ನಾಞ್ಞಂ ಏಕಙ್ಗಮ್ಪಿ ಸಮನುಪಸ್ಸಾಮಿ ಯಂ ಏವಂ ಮಹತೋ ಅತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ವೀರಿಯಾರಮ್ಭೋ. ವೀರಿಯಾರಮ್ಭೋ, ಭಿಕ್ಖವೇ, ಮಹತೋ ಅತ್ಥಾಯ ಸಂವತ್ತತೀ’’ತಿ. ಚತುತ್ಥಂ.

೧೦೨-೧೦೯. ‘‘ಅಜ್ಝತ್ತಿಕಂ, ಭಿಕ್ಖವೇ, ಅಙ್ಗನ್ತಿ ಕರಿತ್ವಾ ನಾಞ್ಞಂ ಏಕಙ್ಗಮ್ಪಿ ಸಮನುಪಸ್ಸಾಮಿ ಯಂ ಏವಂ ಮಹತೋ ಅನತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಮಹಿಚ್ಛತಾ…ಪೇ… ಅಪ್ಪಿಚ್ಛತಾ… ಅಸನ್ತುಟ್ಠಿತಾ… ಸನ್ತುಟ್ಠಿತಾ… ಅಯೋನಿಸೋಮನಸಿಕಾರೋ… ಯೋನಿಸೋಮನಸಿಕಾರೋ… ಅಸಮ್ಪಜಞ್ಞಂ… ಸಮ್ಪಜಞ್ಞಂ… ದ್ವಾದಸಮಂ.

೧೧೦. ‘‘ಬಾಹಿರಂ, ಭಿಕ್ಖವೇ, ಅಙ್ಗನ್ತಿ ಕರಿತ್ವಾ ನಾಞ್ಞಂ ಏಕಙ್ಗಮ್ಪಿ ಸಮನುಪಸ್ಸಾಮಿ ಯಂ ಏವಂ ಮಹತೋ ಅನತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಪಾಪಮಿತ್ತತಾ. ಪಾಪಮಿತ್ತತಾ, ಭಿಕ್ಖವೇ, ಮಹತೋ ಅನತ್ಥಾಯ ಸಂವತ್ತತೀ’’ತಿ. ತೇರಸಮಂ.

೧೧೧. ‘‘ಬಾಹಿರಂ, ಭಿಕ್ಖವೇ, ಅಙ್ಗನ್ತಿ ಕರಿತ್ವಾ ನಾಞ್ಞಂ ಏಕಙ್ಗಮ್ಪಿ ಸಮನುಪಸ್ಸಾಮಿ ಯಂ ಏವಂ ಮಹತೋ ಅತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಕಲ್ಯಾಣಮಿತ್ತತಾ. ಕಲ್ಯಾಣಮಿತ್ತತಾ, ಭಿಕ್ಖವೇ, ಮಹತೋ ಅತ್ಥಾಯ ಸಂವತ್ತತೀ’’ತಿ. ಚುದ್ದಸಮಂ.

೧೧೨. ‘‘ಅಜ್ಝತ್ತಿಕಂ, ಭಿಕ್ಖವೇ, ಅಙ್ಗನ್ತಿ ಕರಿತ್ವಾ ನಾಞ್ಞಂ ಏಕಙ್ಗಮ್ಪಿ ಸಮನುಪಸ್ಸಾಮಿ ಯಂ ಏವಂ ಮಹತೋ ಅನತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಅನುಯೋಗೋ ಅಕುಸಲಾನಂ ಧಮ್ಮಾನಂ, ಅನನುಯೋಗೋ ಕುಸಲಾನಂ ಧಮ್ಮಾನಂ. ಅನುಯೋಗೋ, ಭಿಕ್ಖವೇ, ಅಕುಸಲಾನಂ ಧಮ್ಮಾನಂ, ಅನನುಯೋಗೋ ಕುಸಲಾನಂ ಧಮ್ಮಾನಂ ಮಹತೋ ಅನತ್ಥಾಯ ಸಂವತ್ತತೀ’’ತಿ. ಪನ್ನರಸಮಂ.

೧೧೩. ‘‘ಅಜ್ಝತ್ತಿಕಂ, ಭಿಕ್ಖವೇ, ಅಙ್ಗನ್ತಿ ಕರಿತ್ವಾ ನಾಞ್ಞಂ ಏಕಙ್ಗಮ್ಪಿ ಸಮನುಪಸ್ಸಾಮಿ ಯಂ ಏವಂ ಮಹತೋ ಅತ್ಥಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಅನುಯೋಗೋ ಕುಸಲಾನಂ ಧಮ್ಮಾನಂ, ಅನನುಯೋಗೋ ಅಕುಸಲಾನಂ ಧಮ್ಮಾನಂ. ಅನುಯೋಗೋ, ಭಿಕ್ಖವೇ, ಕುಸಲಾನಂ ಧಮ್ಮಾನಂ, ಅನನುಯೋಗೋ ಅಕುಸಲಾನಂ ಧಮ್ಮಾನಂ ಮಹತೋ ಅತ್ಥಾಯ ಸಂವತ್ತತೀ’’ತಿ. ಸೋಳಸಮಂ.

೧೧೪. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೋ ಏವಂ ಸದ್ಧಮ್ಮಸ್ಸ ಸಮ್ಮೋಸಾಯ ಅನ್ತರಧಾನಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಪಮಾದೋ. ಪಮಾದೋ, ಭಿಕ್ಖವೇ, ಸದ್ಧಮ್ಮಸ್ಸ ಸಮ್ಮೋಸಾಯ ಅನ್ತರಧಾನಾಯ ಸಂವತ್ತತೀ’’ತಿ. ಸತ್ತರಸಮಂ.

೧೧೫. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೋ ಏವಂ ಸದ್ಧಮ್ಮಸ್ಸ ಠಿತಿಯಾ ಅಸಮ್ಮೋಸಾಯ ಅನನ್ತರಧಾನಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಅಪ್ಪಮಾದೋ. ಅಪ್ಪಮಾದೋ, ಭಿಕ್ಖವೇ, ಸದ್ಧಮ್ಮಸ್ಸ ಠಿತಿಯಾ ಅಸಮ್ಮೋಸಾಯ ಅನನ್ತರಧಾನಾಯ ಸಂವತ್ತತೀ’’ತಿ. ಅಟ್ಠಾರಸಮಂ.

೧೧೬. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೋ ಏವಂ ಸದ್ಧಮ್ಮಸ್ಸ ಸಮ್ಮೋಸಾಯ ಅನ್ತರಧಾನಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಕೋಸಜ್ಜಂ. ಕೋಸಜ್ಜಂ, ಭಿಕ್ಖವೇ, ಸದ್ಧಮ್ಮಸ್ಸ ಸಮ್ಮೋಸಾಯ ಅನ್ತರಧಾನಾಯ ಸಂವತ್ತತೀ’’ತಿ. ಏಕೂನವೀಸತಿಮಂ.

೧೧೭. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೋ ಏವಂ ಸದ್ಧಮ್ಮಸ್ಸ ಠಿತಿಯಾ ಅಸಮ್ಮೋಸಾಯ ಅನನ್ತರಧಾನಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ವೀರಿಯಾರಮ್ಭೋ. ವೀರಿಯಾರಮ್ಭೋ, ಭಿಕ್ಖವೇ, ಸದ್ಧಮ್ಮಸ್ಸ ಠಿತಿಯಾ ಅಸಮ್ಮೋಸಾಯ ಅನನ್ತರಧಾನಾಯ ಸಂವತ್ತತೀ’’ತಿ. ವೀಸತಿಮಂ.

೧೧೮-೧೨೮. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೋ ಏವಂ ಸದ್ಧಮ್ಮಸ್ಸ ಸಮ್ಮೋಸಾಯ ಅನ್ತರಧಾನಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಮಹಿಚ್ಛತಾ…ಪೇ… ಅಪ್ಪಿಚ್ಛತಾ… ಅಸನ್ತುಟ್ಠಿತಾ… ಸನ್ತುಟ್ಠಿತಾ… ಅಯೋನಿಸೋಮನಸಿಕಾರೋ… ಯೋನಿಸೋಮನಸಿಕಾರೋ… ಅಸಮ್ಪಜಞ್ಞಂ… ಸಮ್ಪಜಞ್ಞಂ … ಪಾಪಮಿತ್ತತಾ… ಕಲ್ಯಾಣಮಿತ್ತತಾ… ಅನುಯೋಗೋ ಅಕುಸಲಾನಂ ಧಮ್ಮಾನಂ, ಅನನುಯೋಗೋ ಕುಸಲಾನಂ ಧಮ್ಮಾನಂ. ಅನುಯೋಗೋ, ಭಿಕ್ಖವೇ, ಅಕುಸಲಾನಂ ಧಮ್ಮಾನಂ, ಅನನುಯೋಗೋ ಕುಸಲಾನಂ ಧಮ್ಮಾನಂ ಸದ್ಧಮ್ಮಸ್ಸ ಸಮ್ಮೋಸಾಯ ಅನ್ತರಧಾನಾಯ ಸಂವತ್ತತೀ’’ತಿ. ಏಕತ್ತಿಂಸತಿಮಂ.

೧೨೯. ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ ಯೋ ಏವಂ ಸದ್ಧಮ್ಮಸ್ಸ ಠಿತಿಯಾ ಅಸಮ್ಮೋಸಾಯ ಅನನ್ತರಧಾನಾಯ ಸಂವತ್ತತಿ ಯಥಯಿದಂ, ಭಿಕ್ಖವೇ, ಅನುಯೋಗೋ ಕುಸಲಾನಂ ಧಮ್ಮಾನಂ, ಅನನುಯೋಗೋ ಅಕುಸಲಾನಂ ಧಮ್ಮಾನಂ. ಅನುಯೋಗೋ, ಭಿಕ್ಖವೇ, ಕುಸಲಾನಂ ಧಮ್ಮಾನಂ, ಅನನುಯೋಗೋ ಅಕುಸಲಾನಂ ಧಮ್ಮಾನಂ ಸದ್ಧಮ್ಮಸ್ಸ ಠಿತಿಯಾ ಅಸಮ್ಮೋಸಾಯ ಅನನ್ತರಧಾನಾಯ ಸಂವತ್ತತೀ’’ತಿ. ಚತುಕ್ಕೋಟಿಕಂ ನಿಟ್ಠಿತಂ. ಬಾತ್ತಿಂಸತಿಮಂ.

೧೩೦. ‘‘ಯೇ ತೇ, ಭಿಕ್ಖವೇ, ಭಿಕ್ಖೂ ಅಧಮ್ಮಂ ಧಮ್ಮೋತಿ ದೀಪೇನ್ತಿ ತೇ, ಭಿಕ್ಖವೇ, ಭಿಕ್ಖೂ ಬಹುಜನಅಹಿತಾಯ ಪಟಿಪನ್ನಾ ಬಹುಜನಅಸುಖಾಯ, ಬಹುನೋ ಜನಸ್ಸ ಅನತ್ಥಾಯ ಅಹಿತಾಯ ದುಕ್ಖಾಯ ದೇವಮನುಸ್ಸಾನಂ. ಬಹುಞ್ಚ ತೇ, ಭಿಕ್ಖವೇ, ಭಿಕ್ಖೂ ಅಪುಞ್ಞಂ ಪಸವನ್ತಿ, ತೇ ಚಿಮಂ [ತೇಪಿಮಂ (ಸೀ.)] ಸದ್ಧಮ್ಮಂ ಅನ್ತರಧಾಪೇನ್ತೀ’’ತಿ. ತೇತ್ತಿಂಸತಿಮಂ.

೧೩೧. ‘‘ಯೇ ತೇ, ಭಿಕ್ಖವೇ, ಭಿಕ್ಖೂ ಧಮ್ಮಂ ಅಧಮ್ಮೋತಿ ದೀಪೇನ್ತಿ ತೇ, ಭಿಕ್ಖವೇ, ಭಿಕ್ಖೂ ಬಹುಜನಅಹಿತಾಯ ಪಟಿಪನ್ನಾ ಬಹುಜನಅಸುಖಾಯ, ಬಹುನೋ ಜನಸ್ಸ ಅನತ್ಥಾಯ ಅಹಿತಾಯ ದುಕ್ಖಾಯ ದೇವಮನುಸ್ಸಾನಂ. ಬಹುಞ್ಚ ತೇ, ಭಿಕ್ಖವೇ, ಭಿಕ್ಖೂ ಅಪುಞ್ಞಂ ಪಸವನ್ತಿ, ತೇ ಚಿಮಂ ಸದ್ಧಮ್ಮಂ ಅನ್ತರಧಾಪೇನ್ತೀ’’ತಿ. ಚತುತ್ತಿಂಸತಿಮಂ.

೧೩೨-೧೩೯. ‘‘ಯೇ ತೇ, ಭಿಕ್ಖವೇ, ಭಿಕ್ಖೂ ಅವಿನಯಂ ವಿನಯೋತಿ ದೀಪೇನ್ತಿ…ಪೇ… ವಿನಯಂ ಅವಿನಯೋತಿ ದೀಪೇನ್ತಿ…ಪೇ… ಅಭಾಸಿತಂ ಅಲಪಿತಂ ತಥಾಗತೇನ ಭಾಸಿತಂ ಲಪಿತಂ ತಥಾಗತೇನಾತಿ ದೀಪೇನ್ತಿ…ಪೇ… ಭಾಸಿತಂ ಲಪಿತಂ ತಥಾಗತೇನ ಅಭಾಸಿತಂ ಅಲಪಿತಂ ತಥಾಗತೇನಾತಿ ದೀಪೇನ್ತಿ…ಪೇ… ಅನಾಚಿಣ್ಣಂ ತಥಾಗತೇನ ಆಚಿಣ್ಣಂ ತಥಾಗತೇನಾತಿ ದೀಪೇನ್ತಿ…ಪೇ… ಆಚಿಣ್ಣಂ ತಥಾಗತೇನ ಅನಾಚಿಣ್ಣಂ ತಥಾಗತೇನಾತಿ ದೀಪೇನ್ತಿ…ಪೇ… ಅಪಞ್ಞತ್ತಂ ತಥಾಗತೇನ ಪಞ್ಞತ್ತಂ ತಥಾಗತೇನಾತಿ ದೀಪೇನ್ತಿ…ಪೇ… ಪಞ್ಞತ್ತಂ ತಥಾಗತೇನ ಅಪಞ್ಞತ್ತಂ ತಥಾಗತೇನಾತಿ ದೀಪೇನ್ತಿ ತೇ, ಭಿಕ್ಖವೇ, ಭಿಕ್ಖೂ ಬಹುಜನಅಹಿತಾಯ ಪಟಿಪನ್ನಾ ಬಹುಜನಅಸುಖಾಯ, ಬಹುನೋ ಜನಸ್ಸ ಅನತ್ಥಾಯ ಅಹಿತಾಯ ದುಕ್ಖಾಯ ದೇವಮನುಸ್ಸಾನಂ. ಬಹುಞ್ಚ ತೇ, ಭಿಕ್ಖವೇ, ಭಿಕ್ಖೂ ಅಪುಞ್ಞಂ ಪಸವನ್ತಿ, ತೇ ಚಿಮಂ ಸದ್ಧಮ್ಮಂ ಅನ್ತರಧಾಪೇನ್ತೀ’’ತಿ. ದ್ವಾಚತ್ತಾಲೀಸತಿಮಂ.

ದುತಿಯಪಮಾದಾದಿವಗ್ಗೋ ದಸಮೋ.

೧೧. ಅಧಮ್ಮವಗ್ಗೋ

೧೪೦. ‘‘ಯೇ ತೇ, ಭಿಕ್ಖವೇ, ಭಿಕ್ಖೂ ಅಧಮ್ಮಂ ಅಧಮ್ಮೋತಿ ದೀಪೇನ್ತಿ ತೇ, ಭಿಕ್ಖವೇ, ಭಿಕ್ಖೂ ಬಹುಜನಹಿತಾಯ ಪಟಿಪನ್ನಾ ಬಹುಜನಸುಖಾಯ, ಬಹುನೋ ಜನಸ್ಸ ಅತ್ಥಾಯ ಹಿತಾಯ ಸುಖಾಯ ದೇವಮನುಸ್ಸಾನಂ. ಬಹುಞ್ಚ ತೇ, ಭಿಕ್ಖವೇ, ಭಿಕ್ಖೂ ಪುಞ್ಞಂ ಪಸವನ್ತಿ, ತೇ ಚಿಮಂ ಸದ್ಧಮ್ಮಂ ಠಪೇನ್ತೀ’’ತಿ [ಥಪೇನ್ತೀತಿ (ಕ.)]. ಪಠಮಂ.

೧೪೧. ‘‘ಯೇ ತೇ, ಭಿಕ್ಖವೇ, ಭಿಕ್ಖೂ ಧಮ್ಮಂ ಧಮ್ಮೋತಿ ದೀಪೇನ್ತಿ ತೇ, ಭಿಕ್ಖವೇ, ಭಿಕ್ಖೂ ಬಹುಜನಹಿತಾಯ ಪಟಿಪನ್ನಾ ಬಹುಜನಸುಖಾಯ, ಬಹುನೋ ಜನಸ್ಸ ಅತ್ಥಾಯ ಹಿತಾಯ ಸುಖಾಯ ದೇವಮನುಸ್ಸಾನಂ. ಬಹುಞ್ಚ ತೇ, ಭಿಕ್ಖವೇ, ಭಿಕ್ಖೂ ಪುಞ್ಞಂ ಪಸವನ್ತಿ, ತೇ ಚಿಮಂ ಸದ್ಧಮ್ಮಂ ಠಪೇನ್ತೀ’’ತಿ. ದುತಿಯಂ.

೧೪೨-೧೪೯. ‘‘ಯೇ ತೇ, ಭಿಕ್ಖವೇ, ಭಿಕ್ಖೂ ಅವಿನಯಂ ಅವಿನಯೋತಿ ದೀಪೇನ್ತಿ…ಪೇ… ವಿನಯಂ ವಿನಯೋತಿ ದೀಪೇನ್ತಿ…ಪೇ… ಅಭಾಸಿತಂ ಅಲಪಿತಂ ತಥಾಗತೇನ ಅಭಾಸಿತಂ ಅಲಪಿತಂ ತಥಾಗತೇನಾತಿ ದೀಪೇನ್ತಿ…ಪೇ… ಭಾಸಿತಂ ಲಪಿತಂ ತಥಾಗತೇನ ಭಾಸಿತಂ ಲಪಿತಂ ತಥಾಗತೇನಾತಿ ದೀಪೇನ್ತಿ…ಪೇ… ಅನಾಚಿಣ್ಣಂ ತಥಾಗತೇನ ಅನಾಚಿಣ್ಣಂ ತಥಾಗತೇನಾತಿ ದೀಪೇನ್ತಿ…ಪೇ… ಆಚಿಣ್ಣಂ ತಥಾಗತೇನ ಆಚಿಣ್ಣಂ ತಥಾಗತೇನಾತಿ ದೀಪೇನ್ತಿ…ಪೇ… ಅಪಞ್ಞತ್ತಂ ತಥಾಗತೇನ ಅಪಞ್ಞತ್ತಂ ತಥಾಗತೇನಾತಿ ದೀಪೇನ್ತಿ…ಪೇ… ಪಞ್ಞತ್ತಂ ತಥಾಗತೇನ ಪಞ್ಞತ್ತಂ ತಥಾಗತೇನಾತಿ ದೀಪೇನ್ತಿ ತೇ, ಭಿಕ್ಖವೇ, ಭಿಕ್ಖೂ ಬಹುಜನಹಿತಾಯ ಪಟಿಪನ್ನಾ ಬಹುಜನಸುಖಾಯ, ಬಹುನೋ ಜನಸ್ಸ ಅತ್ಥಾಯ ಹಿತಾಯ ಸುಖಾಯ ದೇವಮನುಸ್ಸಾನಂ. ಬಹುಞ್ಚ ತೇ, ಭಿಕ್ಖವೇ, ಭಿಕ್ಖೂ ಪುಞ್ಞಂ ಪಸವನ್ತಿ, ತೇ ಚಿಮಂ ಸದ್ಧಮ್ಮಂ ಠಪೇನ್ತೀ’’ತಿ. ದಸಮಂ.

ಅಧಮ್ಮವಗ್ಗೋ ಏಕಾದಸಮೋ.

೧೨. ಅನಾಪತ್ತಿವಗ್ಗೋ

೧೫೦. ‘‘ಯೇ ತೇ, ಭಿಕ್ಖವೇ, ಭಿಕ್ಖೂ ಅನಾಪತ್ತಿಂ ಆಪತ್ತೀತಿ ದೀಪೇನ್ತಿ ತೇ, ಭಿಕ್ಖವೇ, ಭಿಕ್ಖೂ ಬಹುಜನಅಹಿತಾಯ ಪಟಿಪನ್ನಾ ಬಹುಜನಅಸುಖಾಯ, ಬಹುನೋ ಜನಸ್ಸ ಅನತ್ಥಾಯ ಅಹಿತಾಯ ದುಕ್ಖಾಯ ದೇವಮನುಸ್ಸಾನಂ. ಬಹುಞ್ಚ ತೇ, ಭಿಕ್ಖವೇ, ಭಿಕ್ಖೂ ಅಪುಞ್ಞಂ ಪಸವನ್ತಿ, ತೇ ಚಿಮಂ ಸದ್ಧಮ್ಮಂ ಅನ್ತರಧಾಪೇನ್ತೀ’’ತಿ. ಪಠಮಂ.

೧೫೧. ‘‘ಯೇ ತೇ, ಭಿಕ್ಖವೇ, ಭಿಕ್ಖೂ ಆಪತ್ತಿಂ ಅನಾಪತ್ತೀತಿ ದೀಪೇನ್ತಿ ತೇ, ಭಿಕ್ಖವೇ, ಭಿಕ್ಖೂ ಬಹುಜನಅಹಿತಾಯ ಪಟಿಪನ್ನಾ ಬಹುಜನಅಸುಖಾಯ, ಬಹುನೋ ಜನಸ್ಸ ಅನತ್ಥಾಯ ಅಹಿತಾಯ ದುಕ್ಖಾಯ ದೇವಮನುಸ್ಸಾನಂ. ಬಹುಞ್ಚ ತೇ, ಭಿಕ್ಖವೇ, ಭಿಕ್ಖೂ ಅಪುಞ್ಞಂ ಪಸವನ್ತಿ, ತೇ ಚಿಮಂ ಸದ್ಧಮ್ಮಂ ಅನ್ತರಧಾಪೇನ್ತೀ’’ತಿ. ದುತಿಯಂ.

೧೫೨-೧೫೯. ‘‘ಯೇ ತೇ, ಭಿಕ್ಖವೇ, ಭಿಕ್ಖೂ ಲಹುಕಂ ಆಪತ್ತಿಂ ಗರುಕಾ ಆಪತ್ತೀತಿ ದೀಪೇನ್ತಿ…ಪೇ… ಗರುಕಂ ಆಪತ್ತಿಂ ಲಹುಕಾ ಆಪತ್ತೀತಿ ದೀಪೇನ್ತಿ…ಪೇ… ದುಟ್ಠುಲ್ಲಂ ಆಪತ್ತಿಂ ಅದುಟ್ಠುಲ್ಲಾ ಆಪತ್ತೀತಿ ದೀಪೇನ್ತಿ…ಪೇ… ಅದುಟ್ಠುಲ್ಲಂ ಆಪತ್ತಿಂ ದುಟ್ಠುಲ್ಲಾ ಆಪತ್ತೀತಿ ದೀಪೇನ್ತಿ…ಪೇ… ಸಾವಸೇಸಂ ಆಪತ್ತಿಂ ಅನವಸೇಸಾ ಆಪತ್ತೀತಿ ದೀಪೇನ್ತಿ…ಪೇ… ಅನವಸೇಸಂ ಆಪತ್ತಿಂ ಸಾವಸೇಸಾ ಆಪತ್ತೀತಿ ದೀಪೇನ್ತಿ…ಪೇ… ಸಪ್ಪಟಿಕಮ್ಮಂ ಆಪತ್ತಿಂ ಅಪ್ಪಟಿಕಮ್ಮಾ ಆಪತ್ತೀತಿ ದೀಪೇನ್ತಿ…ಪೇ… ಅಪ್ಪಟಿಕಮ್ಮಂ ಆಪತ್ತಿಂ ಸಪ್ಪಟಿಕಮ್ಮಾ ಆಪತ್ತೀತಿ ದೀಪೇನ್ತಿ ತೇ, ಭಿಕ್ಖವೇ, ಭಿಕ್ಖೂ ಬಹುಜನಅಹಿತಾಯ ಪಟಿಪನ್ನಾ ಬಹುಜನಅಸುಖಾಯ, ಬಹುನೋ ಜನಸ್ಸ ಅನತ್ಥಾಯ ಅಹಿತಾಯ ದುಕ್ಖಾಯ ದೇವಮನುಸ್ಸಾನಂ. ಬಹುಞ್ಚ ತೇ, ಭಿಕ್ಖವೇ, ಭಿಕ್ಖೂ ಅಪುಞ್ಞಂ ಪಸವನ್ತಿ, ತೇ ಚಿಮಂ ಸದ್ಧಮ್ಮಂ ಅನ್ತರಧಾಪೇನ್ತೀ’’ತಿ. ದಸಮಂ.

೧೬೦. ‘‘ಯೇ ತೇ, ಭಿಕ್ಖವೇ, ಭಿಕ್ಖೂ ಅನಾಪತ್ತಿಂ ಅನಾಪತ್ತೀತಿ ದೀಪೇನ್ತಿ ತೇ, ಭಿಕ್ಖವೇ, ಭಿಕ್ಖೂ ಬಹುಜನಹಿತಾಯ ಪಟಿಪನ್ನಾ ಬಹುಜನಸುಖಾಯ, ಬಹುನೋ ಜನಸ್ಸ ಅತ್ಥಾಯ ಹಿತಾಯ ಸುಖಾಯ ದೇವಮನುಸ್ಸಾನಂ. ಬಹುಞ್ಚ ತೇ, ಭಿಕ್ಖವೇ, ಭಿಕ್ಖೂ ಪುಞ್ಞಂ ಪಸವನ್ತಿ, ತೇ ಚಿಮಂ ಸದ್ಧಮ್ಮಂ ಠಪೇನ್ತೀ’’ತಿ. ಏಕಾದಸಮಂ.

೧೬೧. ‘‘ಯೇ ತೇ, ಭಿಕ್ಖವೇ, ಭಿಕ್ಖೂ ಆಪತ್ತಿಂ ಆಪತ್ತೀತಿ ದೀಪೇನ್ತಿ ತೇ, ಭಿಕ್ಖವೇ, ಭಿಕ್ಖೂ ಬಹುಜನಹಿತಾಯ ಪಟಿಪನ್ನಾ ಬಹುಜನಸುಖಾಯ, ಬಹುನೋ ಜನಸ್ಸ ಅತ್ಥಾಯ ಹಿತಾಯ ಸುಖಾಯ ದೇವಮನುಸ್ಸಾನಂ. ಬಹುಞ್ಚ ತೇ, ಭಿಕ್ಖವೇ, ಭಿಕ್ಖೂ ಪುಞ್ಞಂ ಪಸವನ್ತಿ, ತೇ ಚಿಮಂ ಸದ್ಧಮ್ಮಂ ಠಪೇನ್ತೀ’’ತಿ. ದ್ವಾದಸಮಂ.