៥. អធិករណាធិប្បាយោ

៣៤៨. វិវាទាធិករណំ ហោតិ អនុវាទាធិករណំ, ហោតិ អាបត្តាធិករណំ, ហោតិ កិច្ចាធិករណំ. វិវាទាធិករណំ ន ហោតិ អនុវាទាធិករណំ, ន ហោតិ អាបត្តាធិករណំ, ន ហោតិ កិច្ចាធិករណំ; អបិ ច, វិវាទាធិករណបច្ចយា ហោតិ អនុវាទាធិករណំ, ហោតិ អាបត្តាធិករណំ, ហោតិ កិច្ចាធិករណំ. យថា កថំ វិយ? [ចូឡវ. ២១៥; បរិ. ៣១៤] ឥធ ភិក្ខូ វិវទន្តិ – ធម្មោតិ វា អធម្មោតិ វា ទុដ្ឋុល្លាបត្តីតិ វា អទុដ្ឋុល្លាបត្តីតិ វា. យំ តត្ថ ភណ្ឌនំ កលហោ វិគ្គហោ វិវាទោ នានាវាទោ អញ្ញថាវាទោ វិបច្ចតាយ វោហារោ មេធកំ, ឥទំ វុច្ចតិ វិវាទាធិករណំ. វិវាទាធិករណេ សង្ឃោ វិវទតិ វិវាទាធិករណំ. វិវទមានោ អនុវទតិ អនុវាទាធិករណំ. អនុវទមានោ អាបត្តិំ អាបជ្ជតិ អាបត្តាធិករណំ. តាយ អាបត្តិយា សង្ឃោ កម្មំ ករោតិ កិច្ចាធិករណំ. ឯវំ វិវាទាធិករណបច្ចយា ហោតិ អនុវាទាធិករណំ, ហោតិ អាបត្តាធិករណំ, ហោតិ កិច្ចាធិករណំ.

អនុវាទាធិករណំ ហោតិ អាបត្តាធិករណំ, ហោតិ កិច្ចាធិករណំ, ហោតិ វិវាទាធិករណំ. អនុវាទាធិករណំ ន ហោតិ អាបត្តាធិករណំ, ន ហោតិ កិច្ចាធិករណំ, ន ហោតិ វិវាទាធិករណំ; អបិ ច, អនុវាទាធិករណបច្ចយា ហោតិ អាបត្តាធិករណំ, ហោតិ កិច្ចាធិករណំ, ហោតិ វិវាទាធិករណំ. យថា កថំ វិយ? ឥធ ភិក្ខូ ភិក្ខុំ អនុវទន្តិ សីលវិបត្តិយា វា អាចារវិបត្តិយា វា ទិដ្ឋិវិបត្តិយា វា អាជីវវិបត្តិយា វា. យោ តត្ថ អនុវាទោ អនុវទនា អនុល្លបនា អនុភណនា អនុសម្បវង្កតា អព្ភុស្សហនតា អនុពលប្បទានំ, ឥទំ វុច្ចតិ អនុវាទាធិករណំ. អនុវាទាធិករណេ សង្ឃោ វិវទតិ, វិវាទាធិករណំ. វិវទមានោ អនុវទតិ, អនុវាទាធិករណំ. អនុវទមានោ អាបត្តិំ អាបជ្ជតិ, អាបត្តាធិករណំ. តាយ អាបត្តិយា សង្ឃោ កម្មំ ករោតិ, កិច្ចាធិករណំ. ឯវំ អនុវាទាធិករណបច្ចយា ហោតិ អាបត្តាធិករណំ, ហោតិ កិច្ចាធិករណំ, ហោតិ វិវាទាធិករណំ.

អាបត្តាធិករណំ ហោតិ កិច្ចាធិករណំ, ហោតិ វិវាទាធិករណំ, ហោតិ អនុវាទាធិករណំ. អាបត្តាធិករណំ ន ហោតិ កិច្ចាធិករណំ, ន ហោតិ វិវាទាធិករណំ, ន ហោតិ អនុវាទាធិករណំ; អបិ ច, អាបត្តាធិករណបច្ចយា ហោតិ កិច្ចាធិករណំ, ហោតិ វិវាទាធិករណំ, ហោតិ អនុវាទាធិករណំ. យថា កថំ វិយ? [ចូឡវ. ២១៥; បរិ. ៣៤៨] បញ្ចបិ អាបត្តិក្ខន្ធា អាបត្តាធិករណំ, សត្តបិ អាបត្តិក្ខន្ធា អាបត្តាធិករណំ, ឥទំ វុច្ចតិ អាបត្តាធិករណំ. អាបត្តាធិករណេ សង្ឃោ វិវទតិ វិវាទាធិករណំ. វិវទមានោ អនុវទតិ អនុវាទាធិករណំ. អនុវទមានោ អាបត្តិំ អាបជ្ជតិ អាបត្តាធិករណំ. តាយ អាបត្តិយា សង្ឃោ កម្មំ ករោតិ កិច្ចាធិករណំ. ឯវំ អាបត្តាធិករណបច្ចយា ហោតិ កិច្ចាធិករណំ, ហោតិ វិវាទាធិករណំ, ហោតិ អនុវាទាធិករណំ.

កិច្ចាធិករណំ ហោតិ វិវាទាធិករណំ, ហោតិ អនុវាទាធិករណំ, ហោតិ អាបត្តាធិករណំ. កិច្ចាធិករណំ ន ហោតិ វិវាទាធិករណំ, ន ហោតិ អនុវាទាធិករណំ, ន ហោតិ អាបត្តាធិករណំ; អបិ ច, កិច្ចាធិករណបច្ចយា ហោតិ វិវាទាធិករណំ, ហោតិ អនុវាទាធិករណំ, ហោតិ អាបត្តាធិករណំ. យថា កថំ វិយ? យា សង្ឃស្ស កិច្ចយតា ករណីយតា អបលោកនកម្មំ ញត្តិកម្មំ ញត្តិទុតិយកម្មំ ញត្តិចតុត្ថកម្មំ, ឥទំ វុច្ចតិ កិច្ចាធិករណំ. កិច្ចាធិករណេ សង្ឃោ វិវទតិ វិវាទាធិករណំ. វិវទមានោ អនុវទតិ អនុវាទាធិករណំ. អនុវទមានោ អាបត្តិំ អាបជ្ជតិ អាបត្តាធិករណំ. តាយ អាបត្តិយា សង្ឃោ កម្មំ ករោតិ កិច្ចាធិករណំ. ឯវំ កិច្ចាធិករណបច្ចយា ហោតិ វិវាទាធិករណំ, ហោតិ អនុវាទាធិករណំ, ហោតិ អាបត្តាធិករណំ.