៨. អដ្ឋកវារោ

៣២៨. អដ្ឋានិសំសេ សម្បស្សមានេន ន សោ ភិក្ខុ អាបត្តិយា អទស្សនេ ឧក្ខិបិតព្ពោ. អដ្ឋានិសំសេ សម្បស្សមានេន បរេសម្បិ សទ្ធាយ សា អាបត្តិ ទេសេតព្ពា. អដ្ឋ យាវតតិយកា. អដ្ឋហាការេហិ កុលានិ ទូសេតិ. អដ្ឋ មាតិកា ចីវរស្ស ឧប្បាទាយ. អដ្ឋ មាតិកា កថិនស្ស ឧព្ភារាយ. អដ្ឋ បានានិ. [ចូឡវ. ៣៤៨; អ. និ. ៨.៧] អដ្ឋហិ អសទ្ធម្មេហិ អភិភូតោ បរិយាទិន្នចិត្តោ ទេវទត្តោ អាបាយិកោ នេរយិកោ កប្បដ្ឋោ អតេកិច្ឆោ. អដ្ឋ លោកធម្មា. អដ្ឋ គរុធម្មា. អដ្ឋ បាដិទេសនីយា. អដ្ឋង្គិកោ មុសាវាទោ. អដ្ឋ ឧបោសថង្គានិ. អដ្ឋ ទូតេយ្យង្គានិ. អដ្ឋ តិត្ថិយវត្តានិ. អដ្ឋ អច្ឆរិយា អព្ភុតធម្មា មហាសមុទ្ទេ. អដ្ឋ អច្ឆរិយា អព្ភុតធម្មា ឥមស្មិំ ធម្មវិនយេ. អដ្ឋ អនតិរិត្តា. អដ្ឋ អតិរិត្តា. អដ្ឋមេ អរុណុគ្គមនេ និស្សគ្គិយំ ហោតិ. អដ្ឋ បារាជិកា. អដ្ឋមំ វត្ថុំ បរិបូរេន្តី នាសេតព្ពា. អដ្ឋមំ វត្ថុំ បរិបូរេន្តិយា ទេសិតាបិ អទេសិតា ហោតិ. អដ្ឋវាចិកា ឧបសម្បទា. អដ្ឋន្នំ បច្ចុដ្ឋាតព្ពំ. អដ្ឋន្នំ អាសនំ ទាតព្ពំ. ឧបាសិកា អដ្ឋ វរានិ យាចតិ. អដ្ឋហង្គេហិ សមន្នាគតោ ភិក្ខុ ភិក្ខុនោវាទកោ សម្មន្និតព្ពោ [សម្មនិតព្ពោ (ក.)]. អដ្ឋានិសំសា វិនយធរេ. អដ្ឋ បរមានិ. តស្សបាបិយសិកកម្មកតេន ភិក្ខុនា អដ្ឋសុ ធម្មេសុ សម្មា វត្តិតព្ពំ. អដ្ឋ អធម្មិកានិ បាតិមោក្ខដ្ឋបនានិ អដ្ឋ ធម្មិកានិ បាតិមោក្ខដ្ឋបនានីតិ.

អដ្ឋកំ និដ្ឋិតំ.

តស្សុទ្ទានំ –

ន សោ ភិក្ខុ បរេសម្បិ, យាវតតិយទូសនា;

មាតិកា កថិនុព្ភារា, បានា អភិភូតេន ច.

លោកធម្មា គរុធម្មា, បាដិទេសនីយា មុសា;

ឧបោសថា ច ទូតង្គា, តិត្ថិយា សមុទ្ទេបិ ច.

អព្ភុតា អនតិរិត្តំ, អតិរិត្តំ និស្សគ្គិយំ;

បារាជិកដ្ឋមំ វត្ថុ, អទេសិតូបសម្បទា.

បច្ចុដ្ឋានាសនញ្ចេវ, វរំ ឱវាទកេន ច;

អានិសំសា បរមានិ, អដ្ឋធម្មេសុ វត្តនា;

អធម្មិកា ធម្មិកា ច, អដ្ឋកា សុប្បកាសិតាតិ.