២០. សមុដ្ឋាបនវារោ

៣១៤. វិវាទាធិករណំ ចតុន្នំ អធិករណានំ កតមំ អធិករណំ សមុដ្ឋាបេតិ? វិវាទាធិករណំ ចតុន្នំ អធិករណានំ ន កតមំ អធិករណំ សមុដ្ឋាបេតិ; អបិច, វិវាទាធិករណបច្ចយា ចត្តារោ អធិករណា ជាយន្តិ. យថា កថំ វិយ? [ចូឡវ. ២១៥; បរិ. ៣៤៨ អាទយោ] ឥធ ភិក្ខូ វិវទន្តិ – ‘‘ធម្មោតិ វា, អធម្មោតិ វា, វិនយោតិ វា, អវិនយោតិ វា, អភាសិតំ អលបិតំ តថាគតេនាតិ វា, ភាសិតំ លបិតំ តថាគតេនាតិ វា, អនាចិណ្ណំ តថាគតេនាតិ វា, អាចិណ្ណំ តថាគតេនាតិ វា, អបញ្ញត្តំ តថាគតេនាតិ វា, បញ្ញត្តំ តថាគតេនាតិ វា, អាបត្តីតិ វា, អនាបត្តីតិ វា, លហុកា អាបត្តីតិ វា, គរុកា អាបត្តីតិ វា, សាវសេសា អាបត្តីតិ វា, អនវសេសា អាបត្តីតិ វា, ទុដ្ឋុល្លា អាបត្តីតិ វា អទុដ្ឋុល្លា អាបត្តីតិ វា’’. យំ តត្ថ ភណ្ឌនំ កលហោ វិគ្គហោ វិវាទោ នានាវាទោ អញ្ញថាវាទោ វិបច្ចតាយ វោហារោ មេធកំ [មេធគំ (ក.)], ឥទំ វុច្ចតិ វិវាទាធិករណំ. វិវាទាធិករណេ សង្ឃោ វិវទតិ. វិវាទាធិករណំ វិវទមានោ អនុវទតិ. អនុវាទាធិករណំ អនុវទមានោ អាបត្តិំ អាបជ្ជតិ អាបត្តាធិករណំ. តាយ អាបត្តិយា សង្ឃោ កម្មំ ករោតិ កិច្ចាធិករណំ. ឯវំ វិវាទាធិករណបច្ចយា ចត្តារោ អធិករណា ជាយន្តិ.

៣១៥. អនុវាទាធិករណំ ចតុន្នំ អធិករណានំ កតមំ អធិករណំ សមុដ្ឋាបេតិ? អនុវាទាធិករណំ ចតុន្នំ អធិករណានំ ន កតមំ អធិករណំ សមុដ្ឋាបេតិ; អបិច, អនុវាទាធិករណបច្ចយា ចត្តារោ អធិករណា ជាយន្តិ. យថា កថំ វិយ? [ចូឡវ. ២១៥; បរិ. ៣៤៨ អាទយោ] ឥធ ភិក្ខូ ភិក្ខុំ អនុវទន្តិ សីលវិបត្តិយា វា អាចារវិបត្តិយា វា ទិដ្ឋិវិបត្តិយា វា អាជីវវិបត្តិយា វា. យោ តត្ថ អនុវាទោ អនុវទនា អនុល្លបនា អនុភណនា អនុសម្បវង្កតា អព្ភុស្សហនតា អនុពលប្បទានំ, ឥទំ វុច្ចតិ អនុវាទាធិករណំ. អនុវាទាធិករណេ សង្ឃោ វិវទតិ. វិវាទាធិករណំ វិវទមានោ អនុវទតិ. អនុវាទាធិករណំ អនុវទមានោ អាបត្តិំ អាបជ្ជតិ អាបត្តាធិករណំ. តាយ អាបត្តិយា សង្ឃោ កម្មំ ករោតិ កិច្ចាធិករណំ. ឯវំ អនុវាទាធិករណបច្ចយា ចត្តារោ អធិករណា ជាយន្តិ.

៣១៦. អាបត្តាធិករណំ ចតុន្នំ អធិករណានំ កតមំ អធិករណំ សមុដ្ឋាបេតិ? អាបត្តាធិករណំ ចតុន្នំ អធិករណានំ ន កតមំ អធិករណំ សមុដ្ឋាបេតិ; អបិច, អាបត្តាធិករណបច្ចយា ចត្តារោ អធិករណា ជាយន្តិ. យថា កថំ វិយ? បញ្ចបិ អាបត្តិក្ខន្ធា អាបត្តាធិករណំ, សត្តបិ អាបត្តិក្ខន្ធា អាបត្តាធិករណំ, ឥទំ វុច្ចតិ អាបត្តាធិករណំ. អាបត្តាធិករណេ សង្ឃោ វិវទតិ. វិវាទាធិករណំ វិវទមានោ អនុវទតិ. អនុវាទាធិករណំ អនុវទមានោ អាបត្តិំ អាបជ្ជតិ អាបត្តាធិករណំ. តាយ អាបត្តិយា សង្ឃោ កម្មំ ករោតិ កិច្ចាធិករណំ. ឯវំ អាបត្តាធិករណបច្ចយា ចត្តារោ អធិករណា ជាយន្តិ.

៣១៧. កិច្ចាធិករណំ ចតុន្នំ អធិករណានំ កតមំ អធិករណំ សមុដ្ឋាបេតិ? កិច្ចាធិករណំ ចតុន្នំ អធិករណានំ ន កតមំ អធិករណំ សមុដ្ឋាបេតិ, អបិច កិច្ចាធិករណបច្ចយា ចត្តារោ អធិករណា ជាយន្តិ. យថា កថំ វិយ? យា សង្ឃស្ស កិច្ចយតា ករណីយតា អបលោកនកម្មំ ញត្តិកម្មំ ញត្តិទុតិយកម្មំ ញត្តិចតុត្ថកម្មំ, ឥទំ វុច្ចតិ កិច្ចាធិករណំ. កិច្ចាធិករណេ សង្ឃោ វិវទតិ. វិវាទាធិករណំ វិវទមានោ អនុវទតិ. អនុវាទាធិករណំ អនុវទមានោ អាបត្តិំ អាបជ្ជតិ អាបត្តាធិករណំ. តាយ អាបត្តិយា សង្ឃោ កម្មំ ករោតិ កិច្ចាធិករណំ. ឯវំ កិច្ចាធិករណបច្ចយា ចត្តារោ អធិករណា ជាយន្តិ.

សមុដ្ឋាបនវារោ និដ្ឋិតោ វីសតិមោ.