៨. ភិក្ខុនោវាទវគ្គោ

៤៥០. ‘‘កតិហិ នុ ខោ, ភន្តេ, អង្គេហិ សមន្នាគតស្ស ភិក្ខុនោ ភិក្ខុនិសង្ឃេនេវ កម្មំ កាតព្ព’’ន្តិ? ‘‘បញ្ចហុបាលិ, អង្គេហិ សមន្នាគតស្ស ភិក្ខុនោ ភិក្ខុនិសង្ឃេនេវ កម្មំ កាតព្ពំ, អវន្ទិយោ សោ ភិក្ខុ ភិក្ខុនិសង្ឃេន. កតមេហិ បញ្ចហិ? វិវរិត្វា កាយំ ភិក្ខុនីនំ ទស្សេតិ, ឩរុំ ទស្សេតិ, អង្គជាតំ ទស្សេតិ, ឧភោ អំសកូដេ ទស្សេតិ, ឱភាសតិ, គិហី សម្បយោជេតិ – ឥមេហិ ខោ, ឧបាលិ, បញ្ចហង្គេហិ សមន្នាគតស្ស ភិក្ខុនោ ភិក្ខុនិសង្ឃេនេវ កម្មំ កាតព្ពំ. អវន្ទិយោ សោ ភិក្ខុ ភិក្ខុនិសង្ឃេន.

‘‘អបរេហិបិ, ឧបាលិ, បញ្ចហង្គេហិ សមន្នាគតស្ស ភិក្ខុនោ ភិក្ខុនិសង្ឃេនេវ កម្មំ កាតព្ពំ, អវន្ទិយោ សោ ភិក្ខុ ភិក្ខុនិសង្ឃេន. កតមេហិ បញ្ចហិ? ភិក្ខុនីនំ អលាភាយ បរិសក្កតិ, ភិក្ខុនីនំ អនត្ថាយ បរិសក្កតិ, ភិក្ខុនីនំ អវាសាយ បរិសក្កតិ, ភិក្ខុនិយោ អក្កោសតិ បរិភាសតិ, ភិក្ខូ ភិក្ខុនីហិ ភេទេតិ – ឥមេហិ ខោ, ឧបាលិ, បញ្ចហង្គេហិ សមន្នាគតស្ស ភិក្ខុនោ ភិក្ខុនិសង្ឃេនេវ កម្មំ កាតព្ពំ, អវន្ទិយោ សោ ភិក្ខុ ភិក្ខុនិសង្ឃេន.

‘‘អបរេហិបិ, ឧបាលិ, បញ្ចហង្គេហិ សមន្នាគតស្ស ភិក្ខុនោ ភិក្ខុនិសង្ឃេនេវ កម្មំ កាតព្ពំ, អវន្ទិយោ សោ ភិក្ខុ ភិក្ខុនិសង្ឃេន. កតមេហិ បញ្ចហិ? ភិក្ខុនីនំ អលាភាយ បរិសក្កតិ, ភិក្ខុនីនំ អនត្ថាយ បរិសក្កតិ, ភិក្ខុនីនំ អវាសាយ បរិសក្កតិ, ភិក្ខុនិយោ អក្កោសតិ បរិភាសតិ, ភិក្ខូ ភិក្ខុនីហិ សម្បយោជេតិ – ឥមេហិ ខោ, ឧបាលិ, បញ្ចហង្គេហិ សមន្នាគតស្ស ភិក្ខុនោ ភិក្ខុនិសង្ឃេនេវ កម្មំ កាតព្ពំ, អវន្ទិយោ សោ ភិក្ខុ ភិក្ខុនិសង្ឃេនា’’តិ.

៤៥១. ‘‘កតិហិ នុ ខោ, ភន្តេ, អង្គេហិ សមន្នាគតាយ ភិក្ខុនិយា កម្មំ កាតព្ព’’ន្តិ? បញ្ចហុបាលិ, អង្គេហិ សមន្នាគតាយ ភិក្ខុនិយា កម្មំ កាតព្ពំ. កតមេហិ បញ្ចហិ? វិវរិត្វា កាយំ ភិក្ខូនំ ទស្សេតិ, ឩរុំ ទស្សេតិ, អង្គជាតំ ទស្សេតិ, ឧភោ អំសកូដេ ទស្សេតិ, ឱភាសតិ, គិហី សម្បយោជេតិ – ឥមេហិ ខោ, ឧបាលិ, បញ្ចហង្គេហិ សមន្នាគតាយ ភិក្ខុនិយា កម្មំ កាតព្ពំ.

‘‘អបរេហិបិ, ឧបាលិ, បញ្ចហង្គេហិ សមន្នាគតាយ ភិក្ខុនិយា កម្មំ កាតព្ពំ. កតមេហិ បញ្ចហិ? ភិក្ខូនំ អលាភាយ បរិសក្កតិ, ភិក្ខូនំ អនត្ថាយ បរិសក្កតិ, ភិក្ខូនំ អវាសាយ បរិសក្កតិ, ភិក្ខូ អក្កោសតិ បរិភាសតិ, ភិក្ខុនិយោ ភិក្ខូហិ ភេទេតិ – ឥមេហិ ខោ, ឧបាលិ, បញ្ចហង្គេហិ សមន្នាគតាយ ភិក្ខុនិយា កម្មំ កាតព្ពំ.

‘‘អបរេហិបិ, ឧបាលិ, បញ្ចហង្គេហិ សមន្នាគតាយ ភិក្ខុនិយា កម្មំ កាតព្ពំ. កតមេហិ បញ្ចហិ? ភិក្ខូនំ អលាភាយ បរិសក្កតិ, ភិក្ខូនំ អនត្ថាយ បរិសក្កតិ, ភិក្ខូនំ អវាសាយ បរិសក្កតិ, ភិក្ខូ អក្កោសតិ បរិភាសតិ, ភិក្ខុនិយោ ភិក្ខូហិ សម្បយោជេតិ – ឥមេហិ ខោ, ឧបាលិ, បញ្ចហង្គេហិ សមន្នាគតាយ ភិក្ខុនិយា កម្មំ កាតព្ព’’ន្តិ.

៤៥២. ‘‘កតិហិ នុ ខោ, ភន្តេ, អង្គេហិ សមន្នាគតេន ភិក្ខុនា ភិក្ខុនីនំ ឱវាទោ ន ឋបេតព្ពោ’’តិ? ‘‘បញ្ចហុបាលិ, អង្គេហិ សមន្នាគតេន ភិក្ខុនា ភិក្ខុនីនំ ឱវាទោ ន ឋបេតព្ពោ. កតមេហិ បញ្ចហិ? អលជ្ជី ច ហោតិ, ពាលោ ច, អបកតត្តោ ច, ចាវនាធិប្បាយោ វត្តា ហោតិ, នោ វុដ្ឋានាធិប្បាយោ – ឥមេហិ ខោ, ឧបាលិ, បញ្ចហង្គេហិ សមន្នាគតេន ភិក្ខុនា ភិក្ខុនីនំ ឱវាទោ ន ឋបេតព្ពោ.

‘‘អបរេហិបិ, ឧបាលិ, បញ្ចហង្គេហិ សមន្នាគតេន ភិក្ខុនា ភិក្ខុនីនំ ឱវាទោ ន ឋបេតព្ពោ. កតមេហិ បញ្ចហិ? អបរិសុទ្ធកាយសមាចារោ ហោតិ, អបរិសុទ្ធវចីសមាចារោ ហោតិ, អបរិសុទ្ធាជីវោ ហោតិ, ពាលោ ហោតិ, អព្យត្តោ, ន បដិពលោ អនុយុញ្ជិយមានោ អនុយោគំ ទាតុំ – ឥមេហិ ខោ, ឧបាលិ, បញ្ចហង្គេហិ សមន្នាគតេន ភិក្ខុនា ភិក្ខុនីនំ ឱវាទោ ន ឋបេតព្ពោ.

‘‘អបរេហិបិ, ឧបាលិ, បញ្ចហង្គេហិ សមន្នាគតេន ភិក្ខុនា ភិក្ខុនីនំ ឱវាទោ ន ឋបេតព្ពោ. កតមេហិ បញ្ចហិ? កាយិកេន អនាចារេន សមន្នាគតោ ហោតិ, វាចសិកេន អនាចារេន សមន្នាគតោ ហោតិ, កាយិកវាចសិកេន អនាចារេន សមន្នាគតោ ហោតិ, ភិក្ខុនីនំ អក្កោសកបរិភាសកោ ហោតិ, ភិក្ខុនីហិ សទ្ធិំ សំសដ្ឋោ វិហរតិ អននុលោមិកេន សំសគ្គេន – ឥមេហិ ខោ, ឧបាលិ, បញ្ចហង្គេហិ សមន្នាគតេន ភិក្ខុនា ភិក្ខុនីនំ ឱវាទោ ន ឋបេតព្ពោ.

‘‘អបរេហិបិ, ឧបាលិ, បញ្ចហង្គេហិ សមន្នាគតេន ភិក្ខុនា ភិក្ខុនីនំ ឱវាទោ ន ឋបេតព្ពោ. កតមេហិ បញ្ចហិ? អលជ្ជី ច ហោតិ, ពាលោ ច, អបកតត្តោ ច, ភណ្ឌនការកោ ច ហោតិ កលហការកោ, សិក្ខាយ ច ន បរិបូរិការី – ឥមេហិ ខោ, ឧបាលិ, បញ្ចហង្គេហិ សមន្នាគតេន ភិក្ខុនា ភិក្ខុនីនំ ឱវាទោ ន ឋបេតព្ពោ’’តិ.

៤៥៣. ‘‘កតិហិ នុ ខោ, ភន្តេ, អង្គេហិ សមន្នាគតេន ភិក្ខុនា ភិក្ខុនីនំ ឱវាទោ ន គហេតព្ពោ’’តិ? ‘‘បញ្ចហុបាលិ, អង្គេហិ សមន្នាគតេន ភិក្ខុនា ភិក្ខុនីនំ ឱវាទោ ន គហេតព្ពោ. កតមេហិ បញ្ចហិ? កាយិកេន អនាចារេន សមន្នាគតោ ហោតិ, វាចសិកេន អនាចារេន សមន្នាគតោ ហោតិ, កាយិកវាចសិកេន អនាចារេន សមន្នាគតោ ហោតិ, ភិក្ខុនីនំ អក្កោសកបរិភាសកោ ហោតិ, ភិក្ខុនីហិ សទ្ធិំ សំសដ្ឋោ វិហរតិ អននុលោមិកេន សំសគ្គេន – ឥមេហិ ខោ, ឧបាលិ, បញ្ចហង្គេហិ សមន្នាគតេន ភិក្ខុនា ភិក្ខុនីនំ ឱវាទោ ន គហេតព្ពោ.

‘‘អបរេហិបិ, ឧបាលិ, បញ្ចហង្គេហិ សមន្នាគតេន ភិក្ខុនា ភិក្ខុនីនំ ឱវាទោ ន គហេតព្ពោ. កតមេហិ បញ្ចហិ? អលជ្ជី ច ហោតិ, ពាលោ ច, អបកតត្តោ ច, គមិកោ វា ហោតិ, គិលានោ វា – ឥមេហិ ខោ, ឧបាលិ, បញ្ចហង្គេហិ សមន្នាគតេន ភិក្ខុនា ភិក្ខុនីនំ ឱវាទោ ន គហេតព្ពោ’’តិ.

៤៥៤. ‘‘កតិហិ នុ ខោ, ភន្តេ, អង្គេហិ សមន្នាគតេន ភិក្ខុនា សទ្ធិំ ន សាកច្ឆិតព្ពោ’’តិ? ‘‘បញ្ចហុបាលិ, អង្គេហិ សមន្នាគតេន ភិក្ខុនា សទ្ធិំ ន សាកច្ឆិតព្ពោ. កតមេហិ បញ្ចហិ? ន អសេក្ខេន សីលក្ខន្ធេន សមន្នាគតោ ហោតិ, ន អសេក្ខេន សមាធិក្ខន្ធេន សមន្នាគតោ ហោតិ, ន អសេក្ខេន បញ្ញាក្ខន្ធេន សមន្នាគតោ ហោតិ, ន អសេក្ខេន វិមុត្តិក្ខន្ធេន សមន្នាគតោ ហោតិ, ន អសេក្ខេន វិមុត្តិញាណទស្សនក្ខន្ធេន សមន្នាគតោ ហោតិ – ឥមេហិ ខោ, ឧបាលិ, បញ្ចហង្គេហិ សមន្នាគតេន ភិក្ខុនា សទ្ធិំ ន សាកច្ឆិតព្ពោ. បញ្ចហុបាលិ, អង្គេហិ សមន្នាគតេន ភិក្ខុនា សទ្ធិំ សាកច្ឆិតព្ពោ. កតមេហិ បញ្ចហិ? អសេក្ខេន សីលក្ខន្ធេន សមន្នាគតោ ហោតិ, អសេក្ខេន សមាធិក្ខន្ធេន សមន្នាគតោ ហោតិ, អសេក្ខេន បញ្ញាក្ខន្ធេន សមន្នាគតោ ហោតិ, អសេក្ខេន វិមុត្តិក្ខន្ធេន សមន្នាគតោ ហោតិ, អសេក្ខេន វិមុត្តិញាណទស្សនក្ខន្ធេន សមន្នាគតោ ហោតិ – ឥមេហិ ខោ, ឧបាលិ, បញ្ចហង្គេហិ សមន្នាគតេន ភិក្ខុនា សទ្ធិំ សាកច្ឆិតព្ពោ.

‘‘អបរេហិបិ, ឧបាលិ, បញ្ចហង្គេហិ សមន្នាគតេន ភិក្ខុនា សទ្ធិំ ន សាកច្ឆិតព្ពោ. កតមេហិ បញ្ចហិ? ន អត្ថបដិសម្ភិទាបត្តោ ហោតិ, ន ធម្មបដិសម្ភិទាបត្តោ ហោតិ, ន និរុត្តិបដិសម្ភិទាបត្តោ ហោតិ, ន បដិភានបដិសម្ភិទាបត្តោ ហោតិ, យថាវិមុត្តំ ចិត្តំ ន បច្ចវេក្ខិតា – ឥមេហិ ខោ, ឧបាលិ, បញ្ចហង្គេហិ សមន្នាគតេន ភិក្ខុនា សទ្ធិំ ន សាកច្ឆិតព្ពោ. បញ្ចហុបាលិ, អង្គេហិ សមន្នាគតេន ភិក្ខុនា សទ្ធិំ សាកច្ឆិតព្ពោ. កតមេហិ បញ្ចហិ? អត្ថបដិសម្ភិទាបត្តោ ហោតិ, ធម្មបដិសម្ភិទាបត្តោ ហោតិ, និរុត្តិបដិសម្ភិទាបត្តោ ហោតិ, បដិភានបដិសម្ភិទាបត្តោ ហោតិ, យថាវិមុត្តំ ចិត្តំ បច្ចវេក្ខិតា – ឥមេហិ ខោ, ឧបាលិ, បញ្ចហង្គេហិ សមន្នាគតេន ភិក្ខុនា សទ្ធិំ សាកច្ឆិតព្ពោ’’តិ.

ភិក្ខុនោវាទវគ្គោ និដ្ឋិតោ អដ្ឋមោ.

តស្សុទ្ទានំ –

ភិក្ខុនីហេវ កាតព្ពំ, អបរេហិ តថា ទុវេ;

ភិក្ខុនីនំ តយោ កម្មា, ន ឋបេតព្ពា ទ្វេ ទុកា;

ន គហេតព្ពា ទ្វេ វុត្តា, សាកច្ឆាសុ ច ទ្វេ ទុកាតិ.