១៣. អាវាសិកវគ្គោ

៤៦១. ‘‘កតិហិ នុ ខោ, ភន្តេ, អង្គេហិ សមន្នាគតោ អាវាសិកោ ភិក្ខុ យថាភតំ និក្ខិត្តោ ឯវំ និរយេ’’តិ? ‘‘បញ្ចហុបាលិ, អង្គេហិ សមន្នាគតោ អាវាសិកោ ភិក្ខុ យថាភតំ និក្ខិត្តោ ឯវំ និរយេ. កតមេហិ បញ្ចហិ? ឆន្ទាគតិំ គច្ឆតិ, ទោសាគតិំ គច្ឆតិ, មោហាគតិំ គច្ឆតិ, ភយាគតិំ គច្ឆតិ, សង្ឃិកំ បុគ្គលិកបរិភោគេន បរិភុញ្ជតិ – ឥមេហិ ខោ, ឧបាលិ, បញ្ចហង្គេហិ សមន្នាគតោ អាវាសិកោ ភិក្ខុ យថាភតំ និក្ខិត្តោ ឯវំ និរយេ.

‘‘បញ្ចហុបាលិ, អង្គេហិ សមន្នាគតោ អាវាសិកោ ភិក្ខុ យថាភតំ និក្ខិត្តោ ឯវំ សគ្គេ. កតមេហិ បញ្ចហិ? ន ឆន្ទាគតិំ គច្ឆតិ, ន ទោសាគតិំ គច្ឆតិ, ន មោហាគតិំ គច្ឆតិ, ន ភយាគតិំ គច្ឆតិ, សង្ឃិកំ ន បុគ្គលិកបរិភោគេន បរិភុញ្ជតិ – ឥមេហិ ខោ, ឧបាលិ, បញ្ចហង្គេហិ សមន្នាគតោ អាវាសិកោ ភិក្ខុ យថាភតំ និក្ខិត្តោ ឯវំ សគ្គេ’’តិ.

៤៦២. ‘‘កតិ នុ ខោ, ភន្តេ, អធម្មិកា វិនយព្យាករណា’’តិ? ‘‘បញ្ចិមេ, ឧបាលិ, អធម្មិកា វិនយព្យាករណា. កតមេ បញ្ច? ឥធុបាលិ, ភិក្ខុ អធម្មំ ធម្មោតិ បរិណាមេតិ, ធម្មំ អធម្មោតិ បរិណាមេតិ, អវិនយំ វិនយោតិ បរិណាមេតិ, វិនយំ អវិនយោតិ បរិណាមេតិ, អបញ្ញត្តំ បញ្ញាបេតិ, បញ្ញត្តំ សមុច្ឆិន្ទតិ – ឥមេ ខោ, ឧបាលិ, បញ្ច អធម្មិកា វិនយព្យាករណា. បញ្ចិមេ, ឧបាលិ, ធម្មិកា វិនយព្យាករណា. កតមេ បញ្ច? ឥធុបាលិ, ភិក្ខុ អធម្មំ អធម្មោតិ បរិណាមេតិ, ធម្មំ ធម្មោតិ បរិណាមេតិ, អវិនយំ អវិនយោតិ បរិណាមេតិ, វិនយំ វិនយោតិ បរិណាមេតិ, អបញ្ញត្តំ ន បញ្ញបេតិ, បញ្ញត្តំ ន សមុច្ឆិន្ទតិ – ឥមេ ខោ, ឧបាលិ, បញ្ច ធម្មិកា វិនយព្យាករណា’’តិ.

៤៦៣. [អ. និ. ៥.២៧២-២៨៥] ‘‘កតិហិ នុ ខោ, ភន្តេ, អង្គេហិ សមន្នាគតោ ភត្តុទ្ទេសកោ យថាភតំ និក្ខិត្តោ ឯវំ និរយេ’’តិ? ‘‘បញ្ចហុបាលិ, អង្គេហិ សមន្នាគតោ ភត្តុទ្ទេសកោ យថាភតំ និក្ខិត្តោ ឯវំ និរយេ. កតមេហិ បញ្ចហិ? ឆន្ទាគតិំ គច្ឆតិ, ទោសាគតិំ គច្ឆតិ, មោហាគតិំ គច្ឆតិ, ភយាគតិំ គច្ឆតិ, ឧទ្ទិដ្ឋានុទ្ទិដ្ឋំ ន ជានាតិ – ឥមេហិ ខោ, ឧបាលិ, បញ្ចហង្គេហិ សមន្នាគតោ ភត្តុទ្ទេសកោ យថាភតំ និក្ខិត្តោ ឯវំ និរយេ.

[អ. និ. ៥.២៧២-២៨៥] ‘‘បញ្ចហុបាលិ, អង្គេហិ សមន្នាគតោ ភត្តុទ្ទេសកោ យថាភតំ និក្ខិត្តោ ឯវំ សគ្គេ. កតមេហិ បញ្ចហិ? ន ឆន្ទាគតិំ គច្ឆតិ, ន ទោសាគតិំ គច្ឆតិ, ន មោហាគតិំ គច្ឆតិ, ន ភយាគតិំ គច្ឆតិ, ឧទ្ទិដ្ឋានុទ្ទិដ្ឋំ ជានាតិ – ឥមេហិ ខោ, ឧបាលិ, បញ្ចហង្គេហិ សមន្នាគតោ ភត្តុទ្ទេសកោ យថាភតំ និក្ខិត្តោ ឯវំ សគ្គេ’’តិ.

៤៦៤. ‘‘កតិហិ នុ ខោ, ភន្តេ, អង្គេហិ សមន្នាគតោ សេនាសនបញ្ញាបកោ…បេ… ភណ្ឌាគារិកោ…បេ… ចីវរបដិគ្គាហកោ…បេ… ចីវរភាជកោ…បេ… យាគុភាជកោ…បេ… ផលភាជកោ…បេ… ខជ្ជភាជកោ…បេ… អប្បមត្តកវិស្សជ្ជកោ…បេ… សាដិយគ្គាហាបកោ…បេ… បត្តគ្គាហាបកោ…បេ… អារាមិកបេសកោ…បេ… សាមណេរបេសកោ យថាភតំ និក្ខិត្តោ ឯវំ និរយេ’’តិ? ‘‘បញ្ចហុបាលិ, អង្គេហិ សមន្នាគតោ សាមណេរបេសកោ យថាភតំ និក្ខិត្តោ ឯវំ និរយេ. កតមេហិ បញ្ចហិ? ឆន្ទាគតិំ គច្ឆតិ, ទោសាគតិំ គច្ឆតិ, មោហាគតិំ គច្ឆតិ, ភយាគតិំ គច្ឆតិ, បេសិតាបេសិតំ ន ជានាតិ – ឥមេហិ ខោ, ឧបាលិ, បញ្ចហង្គេហិ សមន្នាគតោ សាមណេរបេសកោ យថាភតំ និក្ខិត្តោ ឯវំ និរយេ. បញ្ចហុបាលិ, អង្គេហិ សមន្នាគតោ សាមណេរបេសកោ យថាភតំ និក្ខិត្តោ ឯវំ សគ្គេ. កតមេហិ បញ្ចហិ? ន ឆន្ទាគតិំ គច្ឆតិ, ន ទោសាគតិំ គច្ឆតិ, ន មោហាគតិំ គច្ឆតិ, ន ភយាគតិំ គច្ឆតិ, បេសិតាបេសិតំ ជានាតិ – ឥមេហិ ខោ, ឧបាលិ, បញ្ចហង្គេហិ សមន្នាគតោ សាមណេរបេសកោ យថាភតំ និក្ខិត្តោ ឯវំ សគ្គេ’’តិ.

អាវាសិកវគ្គោ និដ្ឋិតោ តេរសមោ.

តស្សុទ្ទានំ –

អាវាសិកព្យាករណា, ភត្តុសេនាសនានិ ច;

ភណ្ឌចីវរគ្គាហោ ច, ចីវរស្ស ច ភាជកោ.

យាគុ ផលំ ខជ្ជកញ្ច, អប្បសាដិយគាហកោ;

បត្តោ អារាមិកោ ចេវ, សាមណេរេន បេសកោតិ.