៦. សុរាមេរយវគ្គោ

១៧០. មជ្ជំ បិវន្តោ ទ្វេ អាបត្តិយោ អាបជ្ជតិ. ‘‘បិវិស្សាមី’’តិ បដិគ្គណ្ហាតិ, អាបត្តិ ទុក្កដស្ស; អជ្ឈោហារេ អជ្ឈោហារេ អាបត្តិ បាចិត្តិយស្ស.

ភិក្ខុំ អង្គុលិបតោទកេន ហាសេន្តោ ទ្វេ អាបត្តិយោ អាបជ្ជតិ. ហាសេតិ, បយោគេ ទុក្កដំ; ហសិតេ អាបត្តិ បាចិត្តិយស្ស.

ឧទកេ កីឡន្តោ ទ្វេ អាបត្តិយោ អាបជ្ជតិ. ហេដ្ឋាគោប្ផកេ ឧទកេ កីឡតិ, អាបត្តិ ទុក្កដស្ស; ឧបរិគោប្ផកេ កីឡតិ, អាបត្តិ បាចិត្តិយស្ស.

អនាទរិយំ ករោន្តោ ទ្វេ អាបត្តិយោ អាបជ្ជតិ. ករោតិ, បយោគេ ទុក្កដំ; កតេ អាបត្តិ បាចិត្តិយស្ស.

ភិក្ខុំ ភិំសាបេន្តោ ទ្វេ អាបត្តិយោ អាបជ្ជតិ. ភិំសាបេតិ, បយោគេ ទុក្កដំ; ភិំសាបិតេ អាបត្តិ បាចិត្តិយស្ស.

ជោតិំ សមាទហិត្វា វិសិព្ពេន្តោ ទ្វេ អាបត្តិយោ អាបជ្ជតិ. សមាទហតិ, បយោគេ ទុក្កដំ; សមាទហិតេ អាបត្តិ បាចិត្តិយស្ស.

ឱរេនទ្ធមាសំ នហាយន្តោ ទ្វេ អាបត្តិយោ អាបជ្ជតិ. នហាយតិ, បយោគេ ទុក្កដំ; នហានបរិយោសានេ អាបត្តិ បាចិត្តិយស្ស.

អនាទិយិត្វា តិណ្ណំ ទុព្ពណ្ណករណានំ អញ្ញតរំ ទុព្ពណ្ណករណំ នវំ ចីវរំ បរិភុញ្ជន្តោ ទ្វេ អាបត្តិយោ អាបជ្ជតិ. បរិភុញ្ជតិ, បយោគេ ទុក្កដំ; បរិភុត្តេ អាបត្តិ បាចិត្តិយស្ស.

ភិក្ខុស្ស វា ភិក្ខុនិយា វា សិក្ខមានាយ វា សាមណេរស្ស វា សាមណេរិយា វា សាមំ ចីវរំ វិកប្បេត្វា អប្បច្ចុទ្ធារណំ បរិភុញ្ជន្តោ ទ្វេ អាបត្តិយោ អាបជ្ជតិ. បរិភុញ្ជតិ, បយោគេ ទុក្កដំ; បរិភុត្តេ អាបត្តិ បាចិត្តិយស្ស.

ភិក្ខុស្ស បត្តំ វា ចីវរំ វា និសីទនំ វា សូចិឃរំ វា កាយពន្ធនំ វា អបនិធេន្តោ ទ្វេ អាបត្តិយោ អាបជ្ជតិ. អបនិធេតិ, បយោគេ ទុក្កដំ; អបនិធិតេ អាបត្តិ បាចិត្តិយស្ស.

សុរាមេរយវគ្គោ ឆដ្ឋោ.