៧. សប្បាណកវគ្គោ

១៧១. សញ្ចិច្ច បាណំ ជីវិតា វោរោបេន្តោ កតិ អាបត្តិយោ អាបជ្ជតិ? សញ្ចិច្ច បាណំ ជីវិតា វោរោបេន្តោ ចតស្សោ អាបត្តិយោ អាបជ្ជតិ. អនោទិស្ស ឱបាតំ ខណតិ – ‘‘យោ កោចិ បបតិត្វា មរិស្សតី’’តិ, អាបត្តិ ទុក្កដស្ស; មនុស្សោ តស្មិំ បបតិត្វា មរតិ, អាបត្តិ បារាជិកស្ស; យក្ខោ វា បេតោ វា តិរច្ឆានគតមនុស្សវិគ្គហោ វា តស្មិំ បបតិត្វា មរតិ, អាបត្តិ ថុល្លច្ចយស្ស; តិរច្ឆានគតោ តស្មិំ បបតិត្វា មរតិ, អាបត្តិ បាចិត្តិយស្ស – សញ្ចិច្ច បាណំ ជីវិតា វោរោបេន្តោ ឥមា ចតស្សោ អាបត្តិយោ អាបជ្ជតិ.

ជានំ សប្បាណកំ ឧទកំ បរិភុញ្ជន្តោ ទ្វេ អាបត្តិយោ អាបជ្ជតិ. បរិភុញ្ជតិ, បយោគេ ទុក្កដំ; បរិភុត្តេ អាបត្តិ បាចិត្តិយស្ស.

ជានំ យថាធម្មំ និហតាធិករណំ បុនកម្មាយ ឧក្កោដេន្តោ ទ្វេ អាបត្តិយោ អាបជ្ជតិ. ឧក្កោដេតិ, បយោគេ ទុក្កដំ; ឧក្កោដិតេ អាបត្តិ បាចិត្តិយស្ស.

ភិក្ខុស្ស ជានំ ទុដ្ឋុល្លំ អាបត្តិំ បដិច្ឆាទេន្តោ ឯកំ អាបត្តិំ អាបជ្ជតិ. បាចិត្តិយំ.

ជានំ ឩនវីសតិវស្សំ បុគ្គលំ ឧបសម្បាទេន្តោ ទ្វេ អាបត្តិយោ អាបជ្ជតិ. ឧបសម្បាទេតិ, បយោគេ ទុក្កដំ; ឧបសម្បាទិតេ អាបត្តិ បាចិត្តិយស្ស.

ជានំ ថេយ្យសត្ថេន សទ្ធិំ សំវិធាយ ឯកទ្ធានមគ្គំ បដិបជ្ជន្តោ ទ្វេ អាបត្តិយោ អាបជ្ជតិ. បដិបជ្ជតិ, បយោគេ ទុក្កដំ; បដិបន្នេ អាបត្តិ បាចិត្តិយស្ស.

មាតុគាមេន សទ្ធិំ សំវិធាយ ឯកទ្ធានមគ្គំ បដិបជ្ជន្តោ ទ្វេ អាបត្តិយោ អាបជ្ជតិ. បដិបជ្ជតិ, បយោគេ ទុក្កដំ; បដិបន្នេ អាបត្តិ បាចិត្តិយស្ស.

បាបិកាយ ទិដ្ឋិយា យាវតតិយំ សមនុភាសនាយ ន បដិនិស្សជ្ជន្តោ ទ្វេ អាបត្តិយោ អាបជ្ជតិ. ញត្តិយា ទុក្កដំ; កម្មវាចាបរិយោសានេ អាបត្តិ បាចិត្តិយស្ស.

ជានំ តថាវាទិនា ភិក្ខុនា អកដានុធម្មេន តំ ទិដ្ឋិំ អប្បដិនិស្សដ្ឋេន សទ្ធិំ សម្ភុញ្ជន្តោ ទ្វេ អាបត្តិយោ អាបជ្ជតិ. សម្ភុញ្ជតិ, បយោគេ ទុក្កដំ; សម្ភុត្តេ អាបត្តិ បាចិត្តិយស្ស.

ជានំ តថានាសិតំ សមណុទ្ទេសំ ឧបលាបេន្តោ ទ្វេ អាបត្តិយោ អាបជ្ជតិ. ឧបលាបេតិ, បយោគេ ទុក្កដំ; ឧបលាបិតេ អាបត្តិ បាចិត្តិយស្ស.

សប្បាណកវគ្គោ សត្តមោ.