៩. ទុតិយទុដ្ឋទោសសិក្ខាបទំ

៣៩១. តេន សមយេន ពុទ្ធោ ភគវា រាជគហេ វិហរតិ វេឡុវនេ កលន្ទកនិវាបេ. តេន ខោ បន សមយេន មេត្តិយភូមជកា ភិក្ខូ គិជ្ឈកូដា បព្ពតា ឱរោហន្តា អទ្ទសំសុ ឆគលកំ [ឆកលកំ (ស្យា.)] អជិកាយ វិប្បដិបជ្ជន្តំ. ទិស្វាន ឯវមាហំសុ – ‘‘ហន្ទ មយំ, អាវុសោ, ឥមំ ឆគលកំ ទព្ពំ មល្លបុត្តំ នាម ករោម. ឥមំ អជិកំ មេត្តិយំ នាម ភិក្ខុនិំ ករោម. ឯវំ មយំ វោហរិស្សាម. បុព្ពេ មយំ, អាវុសោ, ទព្ពំ មល្លបុត្តំ សុតេន អវោចុម្ហា. ឥទានិ បន អម្ហេហិ សាមំ ទិដ្ឋោ មេត្តិយាយ ភិក្ខុនិយា វិប្បដិបជ្ជន្តោ’’តិ. តេ តំ ឆគលកំ ទព្ពំ មល្លបុត្តំ នាម អកំសុ. តំ អជិកំ មេត្តិយំ នាម ភិក្ខុនិំ អកំសុ. តេ ភិក្ខូនំ អារោចេសុំ – ‘‘បុព្ពេ មយំ, អាវុសោ, ទព្ពំ មល្លបុត្តំ សុតេន អវោចុម្ហា. ឥទានិ បន អម្ហេហិ សាមំ ទិដ្ឋោ មេត្តិយាយ ភិក្ខុនិយា វិប្បដិបជ្ជន្តោ’’តិ. ភិក្ខូ ឯវមាហំសុ – ‘‘មាវុសោ, ឯវំ អវចុត្ថ. នាយស្មា ទព្ពោ មល្លបុត្តោ ឯវំ ករិស្សតី’’តិ.

អថ ខោ តេ ភិក្ខូ ភគវតោ ឯតមត្ថំ អារោចេសុំ. អថ ខោ ភគវា ឯតស្មិំ និទានេ ឯតស្មិំ បករណេ ភិក្ខុសង្ឃំ សន្និបាតាបេត្វា អាយស្មន្តំ ទព្ពំ មល្លបុត្តំ បដិបុច្ឆិ – ‘‘សរសិ ត្វំ, ទព្ព, ឯវរូបំ កត្តា យថយិមេ ភិក្ខូ អាហំសូ’’តិ? ‘‘យថា មំ, ភន្តេ, ភគវា ជានាតី’’តិ. ទុតិយម្បិ ខោ ភគវា…បេ… តតិយម្បិ ខោ ភគវា អាយស្មន្តំ ទព្ពំ មល្លបុត្តំ ឯតទវោច – ‘‘សរសិ ត្វំ, ទព្ព, ឯវរូបំ កត្តា យថយិមេ ភិក្ខូ អាហំសូ’’តិ? ‘‘យថា មំ, ភន្តេ, ភគវា ជានាតី’’តិ. ‘‘ន ខោ, ទព្ព, ទព្ពា ឯវំ និព្ពេឋេន្តិ. សចេ តយា កតំ កតន្តិ វទេហិ, សចេ តយា អកតំ អកតន្តិ វទេហី’’តិ. ‘‘យតោ អហំ, ភន្តេ, ជាតោ នាភិជានាមិ សុបិនន្តេនបិ មេថុនធម្មំ បដិសេវិតា, បគេវ ជាគរោ’’តិ! អថ ខោ ភគវា ភិក្ខូ អាមន្តេសិ – ‘‘តេន ហិ, ភិក្ខុវេ, ឥមេ ភិក្ខូ អនុយុញ្ជថា’’តិ. ឥទំ វត្វា ភគវា ឧដ្ឋាយាសនា វិហារំ បាវិសិ.

អថ ខោ តេ ភិក្ខូ មេត្តិយភូមជកេ ភិក្ខូ អនុយុញ្ជិំសុ. តេ ភិក្ខូហិ អនុយុញ្ជីយមានា ភិក្ខូនំ ឯតមត្ថំ អារោចេសុំ – ‘‘កិំ បន តុម្ហេ, អាវុសោ, អាយស្មន្តំ ទព្ពំ មល្លបុត្តំ អញ្ញភាគិយស្ស អធិករណស្ស កិញ្ចិទេសំ លេសមត្តំ ឧបាទាយ បារាជិកេន ធម្មេន អនុទ្ធំសេថា’’តិ? ‘‘ឯវមាវុសោ’’តិ. យេ តេ ភិក្ខូ អប្បិច្ឆា…បេ… តេ ឧជ្ឈាយន្តិ ខិយ្យន្តិ វិបាចេន្តិ – ‘‘កថញ្ហិ នាម មេត្តិយភូមជកា ភិក្ខូ អាយស្មន្តំ ទព្ពំ មល្លបុត្តំ អញ្ញភាគិយស្ស អធិករណស្ស កិញ្ចិ ទេសំ លេសមត្តំ ឧបាទាយ បារាជិកេន ធម្មេន អនុទ្ធំសេស្សន្តី’’តិ! អថ ខោ តេ ភិក្ខូ មេត្តិយភូមជកេ ភិក្ខូ អនេកបរិយាយេន វិគរហិត្វា ភគវតោ ឯតមត្ថំ អារោចេសុំ…បេ… ‘‘សច្ចំ កិរ តុម្ហេ, ភិក្ខវេ, ទព្ពំ មល្លបុត្តំ អញ្ញភាគិយស្ស អធិករណស្ស កិញ្ចិ ទេសំ លេសមត្តំ ឧបាទាយ បារាជិកេន ធម្មេន អនុទ្ធំសេថា’’តិ? ‘‘សច្ចំ, ភគវា’’តិ. វិគរហិ ពុទ្ធោ ភគវា…បេ… ‘‘កថញ្ហិ នាម តុម្ហេ, មោឃបុរិសា, ទព្ពំ មល្លបុត្តំ អញ្ញភាគិយស្ស អធិករណស្ស កិញ្ចិ ទេសំ លេសមត្តំ ឧបាទាយ បារាជិកេន ធម្មេន អនុទ្ធំសេស្សថ! នេតំ, មោឃបុរិសា, អប្បសន្នានំ វា បសាទាយ…បេ… ឯវញ្ច បន, ភិក្ខវេ, ឥមំ សិក្ខាបទំ ឧទ្ទិសេយ្យាថ –

៣៩២. ‘‘យោ បន ភិក្ខុ ភិក្ខុំ ទុដ្ឋោ ទោសោ អប្បតីតោ អញ្ញភាគិយស្ស អធិករណស្ស កិញ្ចិទេសំ លេសមត្តំ ឧបាទាយ បារាជិកេន ធម្មេន អនុទ្ធំសេយ្យ – ‘អប្បេវ នាម នំ ឥមម្ហា ព្រហ្មចរិយា ចាវេយ្យ’ន្តិ. តតោ អបរេន សមយេន សមនុគ្គាហីយមានោ វា អសមនុគ្គាហីយមានោ វា អញ្ញភាគិយញ្ចេវ តំ អធិករណំ ហោតិ កោចិទេសោ លេសមត្តោ ឧបាទិន្នោ, ភិក្ខុ ច ទោសំ បតិដ្ឋាតិ, សង្ឃាទិសេសោ’’តិ.

៣៩៣. យោ បនាតិ យោ យាទិសោ…បេ… ភិក្ខូតិ…បេ… អយំ ឥមស្មិំ អត្ថេ អធិប្បេតោ ភិក្ខូតិ.

ភិក្ខុន្តិ អញ្ញំ ភិក្ខុំ.

ទុដ្ឋោ ទោសោតិ កុបិតោ អនត្តមនោ អនភិរទ្ធោ អាហតចិត្តោ ខិលជាតោ.

អប្បតីតោតិ តេន ច កោបេន, តេន ច ទោសេន, តាយ ច អនត្តមនតាយ, តាយ ច អនភិរទ្ធិយា អប្បតីតោ ហោតិ.

អញ្ញភាគិយស្ស អធិករណស្សាតិ អាបត្តញ្ញភាគិយំ វា ហោតិ អធិករណញ្ញភាគិយំ វា. កថំ អធិករណំ អធិករណស្ស អញ្ញភាគិយំ? វិវាទាធិករណំ អនុវាទាធិករណស្ស អាបត្តាធិករណស្ស កិច្ចាធិករណស្ស អញ្ញភាគិយំ. អនុវាទាធិករណំ អាបត្តាធិករណស្ស កិច្ចាធិករណស្ស វិវាទាធិករណស្ស អញ្ញភាគិយំ. អាបត្តាធិករណំ កិច្ចាធិករណស្ស វិវាទាធិករណស្ស អនុវាទាធិករណស្ស អញ្ញភាគិយំ. កិច្ចាធិករណំ វិវាទាធិករណស្ស អនុវាទាធិករណស្ស អាបត្តាធិករណស្ស អញ្ញភាគិយំ. ឯវំ អធិករណំ អធិករណស្ស អញ្ញភាគិយំ.

កថំ អធិករណំ អធិករណស្ស តព្ភាគិយំ? វិវាទាធិករណំ វិវាទាធិករណស្ស តព្ភាគិយំ. អនុវាទាធិករណំ អនុវាទាធិករណស្ស តព្ភាគិយំ. អាបត្តាធិករណំ អាបត្តាធិករណស្ស សិយា តព្ភាគិយំ សិយា អញ្ញភាគិយំ.

កថំ អាបត្តាធិករណំ អាបត្តាធិករណស្ស អញ្ញភាគិយំ? មេថុនធម្មបារាជិកាបត្តិ អទិន្នាទានបារាជិកាបត្តិយា មនុស្សវិគ្គហបារាជិកាបត្តិយា ឧត្តរិមនុស្សធម្មបារាជិកាបត្តិយា អញ្ញភាគិយា. អទិន្នាទានបារាជិកាបត្តិ មនុស្សវិគ្គហបារាជិកាបត្តិយា ឧត្តរិមនុស្សធម្មបារាជិកាបត្តិយា មេថុនធម្មបារាជិកាបត្តិយា អញ្ញភាគិយា. មនុស្សវិគ្គហបារាជិកាបត្តិ ឧត្តរិមនុស្សធម្មបារាជិកាបត្តិយា មេថុនធម្មបារាជិកាបត្តិយា អទិន្នាទានបារាជិកាបត្តិយា អញ្ញភាគិយា. ឧត្តរិមនុស្សធម្មបារាជិកាបត្តិ មេថុនធម្មបារាជិកាបត្តិយា អទិន្នាទានបារាជិកាបត្តិយា មនុស្សវិគ្គហបារាជិកាបត្តិយា អញ្ញភាគិយា. ឯវំ អាបត្តាធិករណំ អាបត្តាធិករណស្ស អញ្ញភាគិយំ.

កថំ អាបត្តាធិករណំ អាបត្តាធិករណស្ស តព្ភាគិយំ? មេថុនធម្មបារាជិកាបត្តិ មេថុនធម្មបារាជិកាបត្តិយា តព្ភាគិយា. អទិន្នាទានបារាជិកាបត្តិ អទិន្នាទានបារាជិកាបត្តិយា តព្ភាគិយា. មនុស្សវិគ្គហបារាជិកាបត្តិ មនុស្សវិគ្គហបារាជិកាបត្តិយា តព្ភាគិយា. ឧត្តរិមនុស្សធម្មបារាជិកាបត្តិ ឧត្តរិមនុស្សធម្មបារាជិកាបត្តិយា តព្ភាគិយា. ឯវំ អាបត្តាធិករណំ អាបត្តាធិករណស្ស តព្ភាគិយំ.

កិច្ចាធិករណំ កិច្ចាធិករណស្ស តព្ភាគិយំ. ឯវំ អធិករណំ អធិករណស្ស តព្ភាគិយំ.

៣៩៤. កិញ្ចិ ទេសំ លេសមត្តំ ឧបាទាយាតិ លេសោ នាម ទស លេសា – ជាតិលេសោ, នាមលេសោ, គោត្តលេសោ, លិង្គលេសោ, អាបត្តិលេសោ, បត្តលេសោ, ចីវរលេសោ, ឧបជ្ឈាយលេសោ, អាចរិយលេសោ, សេនាសនលេសោ.

៣៩៥. ជាតិលេសោ នាម ខត្តិយោ ទិដ្ឋោ ហោតិ បារាជិកំ ធម្មំ អជ្ឈាបជ្ជន្តោ. អញ្ញំ ខត្តិយំ បស្សិត្វា ចោទេតិ – ‘‘ខត្តិយោ មយា ទិដ្ឋោ [ឯត្ថ ‘‘បារាជិកំ ធម្មំ អជ្ឈាបជ្ជន្តោ’’តិ បាឋោ ឩនោ មញ្ញេ, អដ្ឋកថាយំ ហិ ‘‘ខត្តិយោ មយា ទិដ្ឋោ បារាជិកំ ធម្មំ អជ្ឈាបជ្ជន្តោ’’តិ ទិស្សតិ]. បារាជិកំ ធម្មំ អជ្ឈាបន្នោសិ, អស្សមណោសិ, អសក្យបុត្តិយោសិ, នត្ថិ តយា សទ្ធិំ ឧបោសថោ វា បវារណា វា សង្ឃកម្មំ វា’’តិ, អាបត្តិ វាចាយ, វាចាយ សង្ឃាទិសេសស្ស.

ព្រាហ្មណោ ទិដ្ឋោ ហោតិ…បេ… វេស្សោ ទិដ្ឋោ ហោតិ…បេ… សុទ្ទោ ទិដ្ឋោ ហោតិ បារាជិកំ ធម្មំ អជ្ឈាបជ្ជន្តោ. អញ្ញំ សុទ្ទំ បស្សិត្វា ចោទេតិ – ‘‘សុទ្ទោ មយា ទិដ្ឋោ. បារាជិកំ ធម្មំ អជ្ឈាបន្នោសិ, អស្សមណោសិ, អសក្យបុត្តិយោសិ’’…បេ… អាបត្តិ វាចាយ, វាចាយ សង្ឃាទិសេសស្ស.

៣៩៦. នាមលេសោ នាម ពុទ្ធរក្ខិតោ ទិដ្ឋោ ហោតិ…បេ… ធម្មរក្ខិតោ ទិដ្ឋោ ហោតិ…បេ… សង្ឃរក្ខិតោ ទិដ្ឋោ ហោតិ បារាជិកំ ធម្មំ អជ្ឈាបជ្ជន្តោ. អញ្ញំ សង្ឃរក្ខិតំ បស្សិត្វា ចោទេតិ – ‘‘សង្ឃរក្ខិតោ មយា ទិដ្ឋោ. បារាជិកំ ធម្មំ អជ្ឈាបន្នោសិ, អស្សមណោសិ, អសក្យបុត្តិយោសិ’’…បេ… អាបត្តិ វាចាយ, វាចាយ សង្ឃាទិសេសស្ស.

៣៩៧. គោត្តលេសោ នាម គោតមោ ទិដ្ឋោ ហោតិ…បេ… មោគ្គល្លានោ ទិដ្ឋោ ហោតិ…បេ… កច្ចាយនោ ទិដ្ឋោ ហោតិ…បេ… វាសិដ្ឋោ ទិដ្ឋោ ហោតិ បារាជិកំ ធម្មំ អជ្ឈាបជ្ជន្តោ. អញ្ញំ វាសិដ្ឋំ បស្សិត្វា ចោទេតិ – ‘‘វាសិដ្ឋោ មយា ទិដ្ឋោ. បារាជិកំ ធម្មំ អជ្ឈាបន្នោសិ, អស្សមណោសិ, អសក្យបុត្តិយោសិ’’…បេ… អាបត្តិ វាចាយ, វាចាយ សង្ឃាទិសេសស្ស.

៣៩៨. លិង្គលេសោ នាម ទីឃោ ទិដ្ឋោ ហោតិ…បេ… រស្សោ ទិដ្ឋោ ហោតិ…បេ… កណ្ហោ ទិដ្ឋោ ហោតិ…បេ… ឱទាតោ ទិដ្ឋោ ហោតិ បារាជិកំ ធម្មំ អជ្ឈាបជ្ជន្តោ. អញ្ញំ ឱទាតំ បស្សិត្វា ចោទេតិ – ‘‘ឱទាតោ មយា ទិដ្ឋោ. បារាជិកំ ធម្មំ អជ្ឈាបន្នោសិ, អស្សមណោសិ, អសក្យបុត្តិយោសិ’’…បេ… អាបត្តិ វាចាយ, វាចាយ សង្ឃាទិសេសស្ស.

៣៩៩. អាបត្តិលេសោ នាម លហុកំ អាបត្តិំ អាបជ្ជន្តោ ទិដ្ឋោ ហោតិ. តញ្ចេ បារាជិកេន ចោទេតិ – ‘‘អស្សមណោសិ, អសក្យបុត្តិយោសិ…បេ… អាបត្តិ វាចាយ, វាចាយ សង្ឃាទិសេសស្ស.

៤០០. បត្តលេសោ នាម លោហបត្តធរោ ទិដ្ឋោ ហោតិ…បេ… សាដកបត្តធរោ ទិដ្ឋោ ហោតិ…បេ… សុម្ភកបត្តធរោ ទិដ្ឋោ ហោតិ បារាជិកំ ធម្មំ អជ្ឈាបជ្ជន្តោ. អញ្ញំ សុម្ភកបត្តធរំ បស្សិត្វា ចោទេតិ – ‘‘សុម្ភកបត្តធរោ មយា ទិដ្ឋោ. បារាជិកំ ធម្មំ អជ្ឈាបន្នោសិ, អស្សមណោសិ, អសក្យបុត្តិយោសិ’’…បេ… អាបត្តិ វាចាយ, វាចាយ សង្ឃាទិសេសស្ស.

៤០១. ចីវរលេសោ នាម បំសុកូលិកោ ទិដ្ឋោ ហោតិ…បេ… គហបតិចីវរធរោ ទិដ្ឋោ ហោតិ បារាជិកំ ធម្មំ អជ្ឈាបជ្ជន្តោ. អញ្ញំ គហបតិចីវរធរំ បស្សិត្វា ចោទេតិ – ‘‘គហបតិចីវរធរោ មយា ទិដ្ឋោ. បារាជិកំ ធម្មំ អជ្ឈាបន្នោសិ, អស្សមណោសិ, អសក្យបុត្តិយោសិ’’…បេ… អាបត្តិ វាចាយ, វាចាយ សង្ឃាទិសេសស្ស.

៤០២. ឧបជ្ឈាយលេសោ នាម ឥត្ថន្នាមស្ស សទ្ធិវិហារិកោ ទិដ្ឋោ ហោតិ បារាជិកំ ធម្មំ អជ្ឈាបជ្ជន្តោ. អញ្ញំ ឥត្ថន្នាមស្ស សទ្ធិវិហារិកំ បស្សិត្វា ចោទេតិ – ‘‘ឥត្ថន្នាមស្ស សទ្ធិវិហារិកោ មយា ទិដ្ឋោ. បារាជិកំ ធម្មំ អជ្ឈាបន្នោសិ, អស្សមណោសិ, អសក្យបុត្តិយោសិ’’…បេ… អាបត្តិ វាចាយ, វាចាយ សង្ឃាទិសេសស្ស.

៤០៣. អាចរិយលេសោ នាម ឥត្ថន្នាមស្ស អន្តេវាសិកោ ទិដ្ឋោ ហោតិ បារាជិកំ ធម្មំ អជ្ឈាបជ្ជន្តោ. អញ្ញំ ឥត្ថន្នាមស្ស អន្តេវាសិកំ បស្សិត្វា ចោទេតិ – ‘‘ឥត្ថន្នាមស្ស អន្តេវាសិកោ មយា ទិដ្ឋោ. បារាជិកំ ធម្មំ អជ្ឈាបន្នោសិ, អស្សមណោសិ, អសក្យបុត្តិយោសិ’’…បេ… អាបត្តិ វាចាយ, វាចាយ សង្ឃាទិសេសស្ស.

៤០៤. សេនាសនលេសោ នាម ឥត្ថន្នាមសេនាសនវាសិកោ ទិដ្ឋោ ហោតិ បារាជិកំ ធម្មំ អជ្ឈាបជ្ជន្តោ. អញ្ញំ ឥត្ថន្នាមសេនាសនវាសិកំ បស្សិត្វា ចោទេតិ – ‘‘ឥត្ថន្នាមសេនាសនវាសិកោ មយា ទិដ្ឋោ. បារាជិកំ ធម្មំ អជ្ឈាបន្នោសិ, អស្សមណោសិ, អសក្យបុត្តិយោសិ, នត្ថិ តយា សទ្ធិំ ឧបោសថោ វា បវារណា វា សង្ឃកម្មំ វា’’តិ, អាបត្តិ វាចាយ, វាចាយ សង្ឃាទិសេសស្ស.

៤០៥. បារាជិកេន ធម្មេនាតិ ចតុន្នំ អញ្ញតរេន.

អនុទ្ធំសេយ្យាតិ ចោទេតិ វា ចោទាបេតិ វា.

អប្បេវ នាម នំ ឥមម្ហា ព្រហ្មចរិយាចាវេយ្យន្តិ ភិក្ខុភាវា ចាវេយ្យំ, សមណធម្មា ចាវេយ្យំ, សីលក្ខន្ធា ចាវេយ្យំ, តបោគុណា ចាវេយ្យំ.

តតោ អបរេន សមយេនាតិ យស្មិំ ខណេ អនុទ្ធំសិតោ ហោតិ, តំ ខណំ តំ លយំ តំ មុហុត្តំ វីតិវត្តេ.

សមនុគ្គាហីយមានោតិ យេន វត្ថុនា អនុទ្ធំសិតោ ហោតិ តស្មិំ វត្ថុស្មិំ សមនុគ្គាហីយមានោ.

អសមនុគ្គាហីយមានោតិ ន កេនចិ វុច្ចមានោ.

អធិករណំ នាម ចត្តារិ អធិករណានិ – វិវាទាធិករណំ, អនុវាទាធិករណំ, អាបត្តាធិករណំ, កិច្ចាធិករណំ.

កោចិ ទេសោ លេសមត្តោ ឧបាទិន្នោតិ តេសំ ទសន្នំ លេសានំ អញ្ញតរោ លេសោ ឧបាទិន្នោ ហោតិ.

ភិក្ខុ ច ទោសំ បតិដ្ឋាតីតិ តុច្ឆកំ មយា ភណិតំ, មុសា មយា ភណិតំ, អភូតំ មយា ភណិតំ, អជានន្តេន មយា ភណិតំ.

សង្ឃាទិសេសោតិ …បេ… តេនបិ វុច្ចតិ សង្ឃាទិសេសោតិ.

៤០៦. ភិក្ខុ សង្ឃាទិសេសំ អជ្ឈាបជ្ជន្តោ ទិដ្ឋោ ហោតិ, សង្ឃាទិសេសេ សង្ឃាទិសេសទិដ្ឋិ ហោតិ. តញ្ចេ បារាជិកេន ចោទេតិ – ‘‘អស្សមណោសិ, អសក្យបុត្តិយោសិ, នត្ថិ តយា សទ្ធិំ ឧបោសថោ វា បវារណា វា សង្ឃកម្មំ វា’’តិ, ឯវម្បិ អាបត្តញ្ញភាគិយំ ហោតិ លេសោ ច ឧបាទិន្នោ, អាបត្តិ វាចាយ, វាចាយ សង្ឃាទិសេសស្ស.

ភិក្ខុ សង្ឃាទិសេសំ អជ្ឈាបជ្ជន្តោ ទិដ្ឋោ ហោតិ, សង្ឃាទិសេសេ ថុល្លច្ចយទិដ្ឋិ ហោតិ…បេ… បាចិត្តិយទិដ្ឋិ ហោតិ… បាដិទេសនីយទិដ្ឋិ ហោតិ… ទុក្កដទិដ្ឋិ ហោតិ… ទុព្ភាសិតទិដ្ឋិ ហោតិ. តញ្ចេ បារាជិកេន ចោទេតិ – ‘‘អស្សមណោសិ’’…បេ… ឯវម្បិ អាបត្តញ្ញភាគិយំ ហោតិ លេសោ ច ឧបាទិន្នោ, អាបត្តិ វាចាយ, វាចាយ សង្ឃាទិសេសស្ស.

ភិក្ខុ ថុល្លច្ចយំ អជ្ឈាបជ្ជន្តោ ទិដ្ឋោ ហោតិ ថុល្លច្ចយេ ថុល្លច្ចយទិដ្ឋិ ហោតិ…បេ… ថុល្លច្ចយេ បាចិត្តិយទិដ្ឋិ ហោតិ… បាដិទេសនីយទិដ្ឋិ ហោតិ… ទុក្កដទិដ្ឋិ ហោតិ… ទុព្ភាសិតទិដ្ឋិ ហោតិ… សង្ឃាទិសេសទិដ្ឋិ ហោតិ. តញ្ចេ បារាជិកេន ចោទេតិ – ‘‘អស្សមណោសិ’’ …បេ… ឯវម្បិ អាបត្តញ្ញភាគិយំ ហោតិ លេសោ ច ឧបាទិន្នោ, អាបត្តិ វាចាយ, វាចាយ សង្ឃាទិសេសស្ស.

ភិក្ខុ បាចិត្តិយំ…បេ… បាដិទេសនីយំ… ទុក្កដំ… ទុព្ភាសិតំ អជ្ឈាបជ្ជន្តោ ទិដ្ឋោ ហោតិ, ទុព្ភាសិតេ ទុព្ភាសិតទិដ្ឋិ ហោតិ…បេ… ទុព្ភាសិតេ សង្ឃាទិសេសទិដ្ឋិ ហោតិ… ថុល្លច្ចយទិដ្ឋិ ហោតិ… បាចិត្តិយទិដ្ឋិ ហោតិ… បាដិទេសនីយទិដ្ឋិ ហោតិ… ទុក្កដទិដ្ឋិ ហោតិ. តញ្ចេ បារាជិកេន ចោទេតិ – ‘‘អស្សមណោសិ, អសក្យបុត្តិយោសិ, នត្ថិ តយា សទ្ធិំ ឧបោសថោ វា បវារណា វា សង្ឃកម្មំ វា’’តិ, ឯវម្បិ អាបត្តញ្ញភាគិយំ ហោតិ លេសោ ច ឧបាទិន្នោ, អាបត្តិ វាចាយ, វាចាយ សង្ឃាទិសេសស្ស.

ឯកេកំ មូលំ កាតុន ចក្កំ ពន្ធិតព្ពំ.

៤០៧. ភិក្ខុ សង្ឃាទិសេសំ អជ្ឈាបជ្ជន្តោ ទិដ្ឋោ ហោតិ សង្ឃាទិសេសេ សង្ឃាទិសេសទិដ្ឋិ ហោតិ. តញ្ចេ បារាជិកេន ចោទាបេតិ – ‘‘អស្សមណោសិ’’…បេ… ឯវម្បិ អាបត្តញ្ញភាគិយំ ហោតិ លេសោ ច ឧបាទិន្នោ, អាបត្តិ វាចាយ, វាចាយ សង្ឃាទិសេសស្ស.

ភិក្ខុ សង្ឃាទិសេសំ អជ្ឈាបជ្ជន្តោ ទិដ្ឋោ ហោតិ, សង្ឃាទិសេសេ ថុល្លច្ចយទិដ្ឋិ ហោតិ…បេ… បាចិត្តិយទិដ្ឋិ ហោតិ… បាដិទេសនីយទិដ្ឋិ ហោតិ… ទុក្កដទិដ្ឋិ ហោតិ… ទុព្ភាសិតទិដ្ឋិ ហោតិ. តញ្ចេ បារាជិកេន ចោទាបេតិ – ‘‘អស្សមណោសិ’’…បេ… ឯវម្បិ អាបត្តញ្ញភាគិយំ ហោតិ លេសោ ច ឧបាទិន្នោ, អាបត្តិ វាចាយ, វាចាយ សង្ឃាទិសេសស្ស.

ភិក្ខុ ថុល្លច្ចយំ អជ្ឈាបជ្ជន្តោ ទិដ្ឋោ ហោតិ ថុល្លច្ចយេ ថុល្លច្ចយទិដ្ឋិ ហោតិ…បេ… ថុល្លច្ចយេ បាចិត្តិយទិដ្ឋិ ហោតិ… បាដិទេសនីយទិដ្ឋិ ហោតិ… ទុក្កដទិដ្ឋិ ហោតិ… ទុព្ភាសិតទិដ្ឋិ ហោតិ… សង្ឃាទិសេសទិដ្ឋិ ហោតិ. តញ្ចេ បារាជិកេន ចោទាបេតិ – ‘‘អស្សមណោសិ’’…បេ… ឯវម្បិ អាបត្តញ្ញភាគិយំ ហោតិ លេសោ ច ឧបាទិន្នោ, អាបត្តិ វាចាយ, វាចាយ សង្ឃាទិសេសស្ស.

ភិក្ខុ បាចិត្តិយំ…បេ… បាដិទេសនីយំ… ទុក្កដំ… ទុព្ភាសិតំ អជ្ឈាបជ្ជន្តោ ទិដ្ឋោ ហោតិ ទុព្ភាសិតេ ទុព្ភាសិតទិដ្ឋិ ហោតិ…បេ… ទុព្ភាសិតេ សង្ឃាទិសេសទិដ្ឋិ ហោតិ… ថុល្លច្ចយទិដ្ឋិ ហោតិ… បាចិត្តិយទិដ្ឋិ ហោតិ… បាដិទេសនីយទិដ្ឋិ ហោតិ… ទុក្កដទិដ្ឋិ ហោតិ. តញ្ចេ បារាជិកេន ចោទាបេតិ – ‘‘អស្សមណោសិ, អសក្យបុត្តិយោសិ, នត្ថិ តយា សទ្ធិំ ឧបោសថោ វា បវារណា វា សង្ឃកម្មំ វា’’តិ, ឯវម្បិ អាបត្តញ្ញភាគិយំ ហោតិ លេសោ ច ឧបាទិន្នោ, អាបត្តិ វាចាយ, វាចាយ សង្ឃាទិសេសស្ស.

៤០៨. អនាបត្តិ តថាសញ្ញី ចោទេតិ វា ចោទាបេតិ វា, ឧម្មត្តកស្ស, អាទិកម្មិកស្សាតិ.

ទុតិយទុដ្ឋទោសសិក្ខាបទំ និដ្ឋិតំ នវមំ.