៧. វិហារការសិក្ខាបទំ

៣៦៥. តេន សមយេន ពុទ្ធោ ភគវា កោសម្ពិយំ វិហរតិ ឃោសិតារាមេ. តេន ខោ បន សមយេន អាយស្មតោ ឆន្នស្ស ឧបដ្ឋាកោ គហបតិ អាយស្មន្តំ ឆន្នំ ឯតទវោច – ‘‘វិហារវត្ថុំ, ភន្តេ, ជានាហិ អយ្យស្ស វិហារំ ការាបេស្សាមី’’តិ. អថ ខោ អាយស្មា ឆន្នោ វិហារវត្ថុំ សោធេន្តោ អញ្ញតរំ ចេតិយរុក្ខំ ឆេទាបេសិ គាមបូជិតំ និគមបូជិតំ នគរបូជិតំ ជនបទបូជិតំ រដ្ឋបូជិតំ. មនុស្សា ឧជ្ឈាយន្តិ ខិយ្យន្តិ វិបាចេន្តិ – ‘‘កថញ្ហិ នាម សមណា សក្យបុត្តិយា ចេតិយរុក្ខំ ឆេទាបេស្សន្តិ គាមបូជិតំ និគមបូជិតំ នគរបូជិតំ ជនបទបូជិតំ រដ្ឋបូជិតំ! ឯកិន្ទ្រិយំ សមណា សក្យបុត្តិយា ជីវំ វិហេឋេន្តី’’ [វិហេឋេស្សន្តិ (កត្ថចិ)] តិ. អស្សោសុំ ខោ ភិក្ខូ តេសំ មនុស្សានំ ឧជ្ឈាយន្តានំ ខិយ្យន្តានំ វិបាចេន្តានំ. យេ តេ ភិក្ខូ អប្បិច្ឆា…បេ… តេ ឧជ្ឈាយន្តិ ខិយ្យន្តិ វិបាចេន្តិ – ‘‘កថញ្ហិ នាម អាយស្មា ឆន្នោ ចេតិយរុក្ខំ ឆេទាបេស្សតិ គាមបូជិតំ…បេ… រដ្ឋបូជិត’’ន្តិ! អថ ខោ តេ ភិក្ខូ អាយស្មន្តំ ឆន្នំ អនេកបរិយាយេន វិគរហិត្វា ភគវតោ ឯតមត្ថំ អារោចេសុំ…បេ… ‘‘សច្ចំ កិរ ត្វំ, ឆន្ន, ចេតិយរុក្ខំ ឆេទាបេសិ គាមបូជិតំ…បេ… រដ្ឋបូជិត’’ន្តិ? ‘‘សច្ចំ, ភគវា’’តិ. វិគរហិ ពុទ្ធោ ភគវា…បេ… ‘‘កថញ្ហិ នាម ត្វំ, មោឃបុរិស, ចេតិយរុក្ខំ ឆេទាបេស្សសិ គាមបូជិតំ និគមបូជិតំ នគរបូជិតំ ជនបទបូជិតំ រដ្ឋបូជិតំ! ជីវសញ្ញិនោ ហិ, មោឃបុរិស, មនុស្សា រុក្ខស្មិំ. នេតំ, មោឃបុរិស, អប្បសន្នានំ វា បសាទាយ…បេ… ឯវញ្ច បន, ភិក្ខវេ, ឥមំ សិក្ខាបទំ ឧទ្ទិសេយ្យាថ –

៣៦៦. ‘‘មហល្លកំ បន ភិក្ខុនា វិហារំ ការយមានេន សស្សាមិកំ អត្តុទ្ទេសំ ភិក្ខូ អភិនេតព្ពា វត្ថុទេសនាយ. តេហិ ភិក្ខូហិ វត្ថុ ទេសេតព្ពំ អនារម្ភំ សបរិក្កមនំ. សារម្ភេ ចេ ភិក្ខុ វត្ថុស្មិំ អបរិក្កមនេ មហល្លកំ វិហារំ ការេយ្យ ភិក្ខូ វា អនភិនេយ្យ វត្ថុទេសនាយ, សង្ឃាទិសេសោ’’តិ.

៣៦៧. មហល្លកោ នាម វិហារោ សស្សាមិកោ វុច្ចតិ.

វិហារោ នាម ឧល្លិត្តោ វា ហោតិ អវលិត្តោ វា ឧល្លិត្តាវលិត្តោ វា.

ការយមានេនាតិ ករោន្តោ វា ការាបេន្តោ វា.

សស្សាមិកន្តិ អញ្ញោ កោចិ សាមិកោ ហោតិ ឥត្ថី វា បុរិសោ វា គហដ្ឋោ វា បព្ពជិតោ វា.

អត្តុទ្ទេសន្តិ អត្តនោ អត្ថាយ.

ភិក្ខូ អភិនេតព្ពា វត្ថុទេសនាយាតិ តេន វិហារការកេន ភិក្ខុនា វិហារវត្ថុំ សោធេត្វា សង្ឃំ ឧបសង្កមិត្វា ឯកំសំ ឧត្តរាសង្គំ ករិត្វា វុឌ្ឍានំ ភិក្ខូនំ បាទេ វន្ទិត្វា ឧក្កុដិកំ និសីទិត្វា អញ្ជលិំ បគ្គហេត្វា ឯវមស្ស វចនីយោ – ‘‘អហំ, ភន្តេ, មហល្លកំ វិហារំ កត្តុកាមោ សស្សាមិកំ អត្តុទ្ទេសំ. សោហំ, ភន្តេ, សង្ឃំ វិហារវត្ថុឱលោកនំ យាចាមី’’តិ. ទុតិយម្បិ យាចិតព្ពា. តតិយម្បិ យាចិតព្ពា. សចេ សព្ពោ សង្ឃោ ឧស្សហតិ វិហារវត្ថុំ ឱលោកេតុំ សព្ពេន សង្ឃេន ឱលោកេតព្ពំ. នោ ចេ សព្ពោ សង្ឃោ ឧស្សហតិ វិហារវត្ថុំ ឱលោកេតុំ, យេ តត្ថ ហោន្តិ ភិក្ខូ ព្យត្តា បដិពលា សារម្ភំ អនារម្ភំ សបរិក្កមនំ អបរិក្កមនំ ជានិតុំ តេ យាចិត្វា សម្មន្និតព្ពា. ឯវញ្ច បន, ភិក្ខវេ, សម្មន្និតព្ពា. ព្យត្តេន ភិក្ខុនា បដិពលេន សង្ឃោ ញាបេតព្ពោ –

៣៦៨. ‘‘សុណាតុ មេ, ភន្តេ, សង្ឃោ. អយំ ឥត្ថន្នាមោ ភិក្ខុ មហល្លកំ វិហារំ កត្តុកាមោ សស្សាមិកំ អត្តុទ្ទេសំ. សោ សង្ឃំ វិហារវត្ថុឱលោកនំ យាចតិ. យទិ សង្ឃស្ស បត្តកល្លំ, សង្ឃោ ឥត្ថន្នាមញ្ច ឥត្ថន្នាមញ្ច ភិក្ខុ សម្មន្នេយ្យ ឥត្ថន្នាមស្ស ភិក្ខុនោ វិហារវត្ថុំ ឱលោកេតុំ. ឯសា ញត្តិ.

‘‘សុណាតុ មេ, ភន្តេ, សង្ឃោ. អយំ ឥត្ថន្នាមោ ភិក្ខុ មហល្លកំ វិហារំ កត្តុកាមោ សស្សាមិកំ អត្តុទ្ទេសំ. សោ សង្ឃំ វិហារវត្ថុឱលោកនំ យាចតិ. សង្ឃោ ឥត្ថន្នាមញ្ច ឥត្ថន្នាមញ្ច ភិក្ខូ សម្មន្នតិ ឥត្ថន្នាមស្ស ភិក្ខុនោ វិហារវត្ថុំ ឱលោកេតុំ. យស្សាយស្មតោ ខមតិ ឥត្ថន្នាមស្ស ច ឥត្ថន្នាមស្ស ច ភិក្ខូនំ សម្មុតិ ឥត្ថន្នាមស្ស ភិក្ខុនោ វិហារវត្ថុំ ឱលោកេតុំ, សោ តុណ្ហស្ស; យស្ស នក្ខមតិ, សោ ភាសេយ្យ.

‘‘សម្មតា សង្ឃេន ឥត្ថន្នាមោ ច ឥត្ថន្នាមោ ច ភិក្ខូ ឥត្ថន្នាមស្ស ភិក្ខុនោ វិហារវត្ថុំ ឱលោកេតុំ. ខមតិ សង្ឃស្ស, តស្មា តុណ្ហី, ឯវមេតំ ធារយាមី’’តិ.

៣៦៩. តេហិ សម្មតេហិ ភិក្ខូហិ តត្ថ គន្ត្វា វិហារវត្ថុ ឱលោកេតព្ពំ; សារម្ភំ អនារម្ភំ សបរិក្កមនំ អបរិក្កមនំ ជានិតព្ពំ. សចេ សារម្ភំ ហោតិ អបរិក្កមនំ, ‘មាយិធ ករី’តិ វត្តព្ពោ. សចេ អនារម្ភំ ហោតិ សបរិក្កមនំ, សង្ឃស្ស អារោចេតព្ពំ – ‘អនារម្ភំ សបរិក្កមន’ន្តិ. តេន វិហារការកេន ភិក្ខុនា សង្ឃំ ឧបសង្កមិត្វា ឯកំសំ ឧត្តរាសង្គំ ករិត្វា វុឌ្ឍានំ ភិក្ខូនំ បាទេ វន្ទិត្វា ឧក្កុដិកំ និសីទិត្វា អញ្ជលិំ បគ្គហេត្វា ឯវមស្ស វចនីយោ – ‘‘អហំ, ភន្តេ, មហល្លកំ វិហារំ កត្តុកាមោ សស្សាមិកំ អត្តុទ្ទេសំ. សោហំ, ភន្តេ, សង្ឃំ វិហារវត្ថុទេសនំ យាចាមី’’តិ. ទុតិយម្បិ យាចិតព្ពា. តតិយម្បិ យាចិតព្ពា. ព្យត្តេន ភិក្ខុនា បដិពលេន សង្ឃោ ញាបេតព្ពោ –

៣៧០. ‘‘សុណាតុ មេ, ភន្តេ, សង្ឃោ. អយំ ឥត្ថន្នាមោ ភិក្ខុ មហល្លកំ វិហារំ កត្តុកាមោ សស្សាមិកំ អត្តុទ្ទេសំ. សោ សង្ឃំ វិហារវត្ថុទេសនំ យាចតិ. យទិ សង្ឃស្ស បត្តកល្លំ, សង្ឃោ ឥត្ថន្នាមស្ស ភិក្ខុនោ វិហារវត្ថុំ ទេសេយ្យ. ឯសា ញត្តិ.

‘‘សុណាតុ មេ, ភន្តេ, សង្ឃោ. អយំ ឥត្ថន្នាមោ ភិក្ខុ មហល្លកំ វិហារំ កត្តុកាមោ សស្សាមិកំ អត្តុទ្ទេសំ. សោ សង្ឃំ វិហារវត្ថុទេសនំ យាចតិ. សង្ឃោ ឥត្ថន្នាមស្ស ភិក្ខុនោ វិហារវត្ថុំ ទេសេតិ. យស្សាយស្មតោ ខមតិ ឥត្ថន្នាមស្ស ភិក្ខុនោ វិហារវត្ថុស្ស ទេសនា, សោ តុណ្ហស្ស; យស្ស នក្ខមតិ, សោ ភាសេយ្យ.

‘‘ទេសិតំ សង្ឃេន ឥត្ថន្នាមស្ស ភិក្ខុនោ វិហារវត្ថុំ. ខមតិ សង្ឃស្ស, តស្មា តុណ្ហី, ឯវមេតំ ធារយាមី’’តិ.

៣៧១. សារម្ភំ នាម កិបិល្លិកានំ វា អាសយោ ហោតិ, ឧបចិកានំ វា អាសយោ ហោតិ, ឧន្ទូរានំ វា…បេ… អហីនំ វា វិច្ឆិកានំ វា សតបទីនំ វា ហត្ថីនំ វា អស្សានំ វា សីហានំ វា ព្យគ្ឃានំ វា ទីបីនំ វា អច្ឆានំ វា តរច្ឆានំ វា អាសយោ ហោតិ, យេសំ កេសញ្ចិ តិរច្ឆានគតានំ បាណានំ អាសយោ ហោតិ, បុព្ពណ្ណនិស្សិតំ វា ហោតិ, អបរណ្ណនិស្សិតំ វា ហោតិ, អព្ភាឃាតនិស្សិតំ វា ហោតិ, អាឃាតននិស្សិតំ វា ហោតិ, សុសាននិស្សិតំ វា ហោតិ, ឧយ្យាននិស្សិតំ វា ហោតិ, រាជវត្ថុនិស្សិតំ វា ហោតិ, ហត្ថិសាលានិស្សិតំ វា ហោតិ, អស្សសាលានិស្សិតំ វា ហោតិ, ពន្ធនាគារនិស្សិតំ វា ហោតិ, បានាគារនិស្សិតំ វា ហោតិ, សូននិស្សិតំ វា ហោតិ, រច្ឆានិស្សិតំ វា ហោតិ, ចច្ចរនិស្សិតំ វា ហោតិ, សភានិស្សិតំ វា ហោតិ, សំសរណនិស្សិតំ វា ហោតិ. ឯតំ សារម្ភំ នាម.

អបរិក្កមនំ នាម ន សក្កា ហោតិ យថាយុត្តេន សកដេន អនុបរិគន្តុំ, សមន្តា និស្សេណិយា អនុបរិគន្តុំ. ឯតំ អបរិក្កមនំ នាម.

អនារម្ភំ នាម ន កិបិល្លិកានំ វា អាសយោ ហោតិ…បេ… ន សំសរណនិស្សិតំ វា ហោតិ. ឯតំ អនារម្ភំ នាម.

សបរិក្កមនំ នាម សក្កា ហោតិ យថាយុត្តេន សកដេន អនុបរិគន្តុំ, សមន្តា និស្សេណិយា អនុបរិគន្តុំ. ឯតំ សបរិក្កមនំ នាម.

មហល្លកោ នាម វិហារោ សស្សាមិកោ វុច្ចតិ.

វិហារោ នាម ឧល្លិត្តោ វា ហោតិ អវលិត្តោ វា ឧល្លិត្តាវលិត្តោ វា.

ការេយ្យាតិ ករោតិ វា ការាបេតិ វា.

ភិក្ខូ វា អនភិនេយ្យ វត្ថុទេសនាយាតិ ញត្តិទុតិយេន កម្មេន វិហារវត្ថុំ ន ទេសាបេត្វា ករោតិ វា ការាបេតិ វា, បយោគេ ទុក្កដំ. ឯកំ បិណ្ឌំ អនាគតេ, អាបត្តិ ថុល្លច្ចយស្ស. តស្មិំ បិណ្ឌេ អាគតេ, អាបត្តិ សង្ឃាទិសេសស្ស.

សង្ឃាទិសេសោតិ…បេ… តេនបិ វុច្ចតិ – ‘សង្ឃាទិសេសោ’តិ.

៣៧២. ភិក្ខុ វិហារំ ករោតិ អទេសិតវត្ថុកំ សារម្ភំ អបរិក្កមនំ, អាបត្តិ សង្ឃាទិសេសេន ទ្វិន្នំ ទុក្កដានំ. ភិក្ខុ វិហារំ ករោតិ អទេសិតវត្ថុកំ សារម្ភំ សបរិក្កមនំ, អាបត្តិ សង្ឃាទិសេសេន ទុក្កដស្ស. ភិក្ខុ វិហារំ ករោតិ អទេសិតវត្ថុកំ អនារម្ភំ អបរិក្កមនំ, អាបត្តិ សង្ឃាទិសេសេន ទុក្កដស្ស. ភិក្ខុ វិហារំ ករោតិ អទេសិតវត្ថុកំ អនារម្ភំ សបរិក្កមនំ, អាបត្តិ សង្ឃាទិសេសស្ស.

ភិក្ខុ វិហារំ ករោតិ ទេសិតវត្ថុកំ សារម្ភំ អបរិក្កមនំ, អាបត្តិ ទ្វិន្នំ ទុក្កដានំ. ភិក្ខុ វិហារំ ករោតិ ទេសិតវត្ថុកំ សារម្ភំ សបរិក្កមនំ, អាបត្តិ ទុក្កដស្ស. ភិក្ខុ វិហារំ ករោតិ ទេសិតវត្ថុកំ អនារម្ភំ អបរិក្កមនំ, អាបត្តិ ទុក្កដស្ស. ភិក្ខុ វិហារំ ករោតិ ទេសិតវត្ថុកំ អនារម្ភំ សបរិក្កមនំ, អនាបត្តិ.

៣៧៣. ភិក្ខុ សមាទិសតិ – ‘‘វិហារំ មេ ករោថា’’តិ. តស្ស វិហារំ ករោន្តិ អទេសិតវត្ថុកំ សារម្ភំ អបរិក្កមនំ, អាបត្តិ សង្ឃាទិសេសេន ទ្វិន្នំ ទុក្កដានំ…បេ… សារម្ភំ សបរិក្កមនំ, អាបត្តិ សង្ឃាទិសេសេន ទុក្កដស្ស…បេ… អនារម្ភំ អបរិក្កមនំ, អាបត្តិ សង្ឃាទិសេសេន ទុក្កដស្ស…បេ… អនារម្ភំ សបរិក្កមនំ, អាបត្តិ សង្ឃាទិសេសស្ស.

ភិក្ខុ សមាទិសតិ – ‘‘វិហារំ មេ ករោថា’’តិ. តស្ស វិហារំ ករោន្តិ ទេសិតវត្ថុកំ សារម្ភំ អបរិក្កមនំ, អាបត្តិ ទ្វិន្នំ ទុក្កដានំ…បេ… សារម្ភំ សបរិក្កមនំ, អាបត្តិ ទុក្កដស្ស…បេ… អនារម្ភំ អបរិក្កមនំ, អាបត្តិ ទុក្កដស្ស…បេ… អនារម្ភំ សបរិក្កមនំ, អនាបត្តិ.

៣៧៤. ភិក្ខុ សមាទិសិត្វា បក្កមតិ – ‘‘វិហារំ មេ ករោថា’’តិ. ន ច សមាទិសតិ – ‘‘ទេសិតវត្ថុកោ ច ហោតុ អនារម្ភោ ច សបរិក្កមនោ ចា’’តិ. តស្ស វិហារំ ករោន្តិ អទេសិតវត្ថុកំ សារម្ភំ អបរិក្កមនំ, អាបត្តិ សង្ឃាទិសេសេន ទ្វិន្នំ ទុក្កដានំ…បេ… សារម្ភំ សបរិក្កមនំ, អាបត្តិ សង្ឃាទិសេសេន ទុក្កដស្ស…បេ… អនារម្ភំ អបរិក្កមនំ, អាបត្តិ សង្ឃាទិសេសេន ទុក្កដស្ស…បេ… អនារម្ភំ សបរិក្កមនំ, អាបត្តិ សង្ឃាទិសេសស្ស.

ភិក្ខុ សមាទិសិត្វា បក្កមតិ – ‘‘វិហារំ មេ ករោថា’’តិ. ន ច សមាទិសតិ – ‘‘ទេសិតវត្ថុកោ ច ហោតុ អនារម្ភោ ច សបរិក្កមនោ ចា’’តិ. តស្ស វិហារំ ករោន្តិ ទេសិតវត្ថុកំ សារម្ភំ អបរិក្កមនំ, អាបត្តិ ទ្វិន្នំ ទុក្កដានំ…បេ… សារម្ភំ សបរិក្កមនំ, អាបត្តិ ទុក្កដស្ស…បេ… អនារម្ភំ អបរិក្កមនំ, អាបត្តិ ទុក្កដស្ស…បេ… អនារម្ភំ សបរិក្កមនំ, អនាបត្តិ.

៣៧៥. ភិក្ខុ សមាទិសិត្វា បក្កមតិ – ‘‘វិហារំ មេ ករោថា’’តិ. សមាទិសតិ ច – ‘‘ទេសិតវត្ថុកោ ច ហោតុ អនារម្ភោ ច សបរិក្កមនោ ចា’’តិ. តស្ស វិហារំ ករោន្តិ អទេសិតវត្ថុកំ សារម្ភំ អបរិក្កមនំ. សោ សុណាតិ – ‘‘វិហារោ កិរ មេ កយិរតិ អទេសិតវត្ថុកោ សារម្ភោ អបរិក្កមនោ’’តិ. តេន ភិក្ខុនា សាមំ វា គន្តព្ពំ ទូតោ វា បាហេតព្ពោ – ‘‘ទេសិតវត្ថុកោ ច ហោតុ អនារម្ភោ ច សបរិក្កមនោ ចា’’តិ …បេ… ‘‘ទេសិតវត្ថុកោ ច ហោតុ អនារម្ភោ ចា’’តិ…បេ… ‘‘ទេសិតវត្ថុកោ ច ហោតុ សបរិក្កមនោ ចា’’តិ …បេ… ‘‘ទេសិតវត្ថុកោ ហោតូ’’តិ. នោ ចេ សាមំ វា គច្ឆេយ្យ ទូតំ វា បហិណេយ្យ, អាបត្តិ ទុក្កដស្ស.

ភិក្ខុ សមាទិសិត្វា បក្កមតិ – ‘‘វិហារំ មេ ករោថា’’តិ. សមាទិសតិ ច – ‘‘ទេសិតវត្ថុកោ ច ហោតុ អនារម្ភោ ច សបរិក្កមនោ ចា’’តិ. តស្ស វិហារំ ករោន្តិ ទេសិតវត្ថុកំ សារម្ភំ អបរិក្កមនំ. សោ សុណាតិ – ‘‘វិហារោ កិរ មេ កយិរតិ ទេសិតវត្ថុកោ សារម្ភោ អបរិក្កមនោ’’តិ. តេន ភិក្ខុនា សាមំ វា គន្តព្ពំ ទូតោ វា បាហេតព្ពោ – ‘‘អនារម្ភោ ច ហោតុ សបរិក្កមនោ ចា’’តិ…បេ… ‘‘អនារម្ភោ ហោតូ’’តិ ‘‘សបរិក្កមនោ ហោតូ’’តិ, អនាបត្តិ.

៣៧៦. ភិក្ខុ សមាទិសិត្វា បក្កមតិ – ‘‘វិហារំ មេ ករោថា’’តិ. សមាទិសតិ ច – ‘‘ទេសិតវត្ថុកោ ច ហោតុ អនារម្ភោ ច សបរិក្កមនោ ចា’’តិ. តស្ស វិហារំ ករោន្តិ អទេសិតវត្ថុកំ សារម្ភំ អបរិក្កមនំ, អាបត្តិ ការុកានំ តិណ្ណំ ទុក្កដានំ…បេ… សារម្ភំ សបរិក្កមនំ, អាបត្តិ ការុកានំ ទ្វិន្នំ ទុក្កដានំ…បេ… អនារម្ភំ អបរិក្កមនំ, អាបត្តិ ការុកានំ ទ្វិន្នំ ទុក្កដានំ…បេ… អនារម្ភំ សបរិក្កមនំ, អាបត្តិ ការុកានំ ទុក្កដស្ស.

ភិក្ខុ សមាទិសិត្វា បក្កមតិ – ‘‘វិហារំ មេ ករោថា’’តិ. សមាទិសតិ ច – ‘‘ទេសិតវត្ថុកោ ច ហោតុ អនារម្ភោ ច សបរិក្កមនោ ចា’’តិ. តស្ស វិហារំ ករោន្តិ ទេសិតវត្ថុកំ សារម្ភំ អបរិក្កមនំ, អាបត្តិ ការុកានំ ទ្វិន្នំ ទុក្កដានំ…បេ… សារម្ភំ សបរិក្កមនំ, អាបត្តិ ការុកានំ ទុក្កដស្ស…បេ… អនារម្ភំ អបរិក្កមនំ, អាបត្តិ ការុកានំ ទុក្កដស្ស…បេ… អនារម្ភំ សបរិក្កមនំ, អនាបត្តិ.

៣៧៧. ភិក្ខុ សមាទិសិត្វា បក្កមតិ – ‘‘វិហារំ មេ ករោថា’’តិ. តស្ស វិហារំ ករោន្តិ អទេសិតវត្ថុកំ សារម្ភំ អបរិក្កមនំ. សោ ចេ វិប្បកតេ អាគច្ឆតិ, តេន ភិក្ខុនា សោ វិហារោ អញ្ញស្ស វា ទាតព្ពោ ភិន្ទិត្វា វា បុន កាតព្ពោ. នោ ចេ អញ្ញស្ស វា ទទេយ្យ ភិន្ទិត្វា វា បុន ការេយ្យ, អាបត្តិ សង្ឃាទិសេសេន ទ្វិន្នំ ទុក្កដានំ…បេ… សារម្ភំ សបរិក្កមនំ, អាបត្តិ សង្ឃាទិសេសេន ទុក្កដស្ស…បេ… អនារម្ភំ អបរិក្កមនំ, អាបត្តិ សង្ឃាទិសេសេន ទុក្កដស្ស…បេ… អនារម្ភំ សបរិក្កមនំ, អាបត្តិ សង្ឃាទិសេសស្ស.

ភិក្ខុ សមាទិសិត្វា បក្កមតិ – ‘‘វិហារំ មេ ករោថា’’តិ. តស្ស វិហារំ ករោន្តិ ទេសិតវត្ថុកំ សារម្ភំ អបរិក្កមនំ. សោ ចេ វិប្បកតេ អាគច្ឆតិ, តេន ភិក្ខុនា សោ វិហារោ អញ្ញស្ស វា ទាតព្ពោ ភិន្ទិត្វា វា បុន កាតព្ពោ. នោ ចេ អញ្ញស្ស វា ទទេយ្យ ភិន្ទិត្វា វា បុន ការេយ្យ, អាបត្តិ ទ្វិន្នំ ទុក្កដានំ…បេ… សារម្ភំ សបរិក្កមនំ, អាបត្តិ ទុក្កដស្ស…បេ… អនារម្ភំ អបរិក្កមនំ, អាបត្តិ ទុក្កដស្ស…បេ… អនារម្ភំ សបរិក្កមនំ, អនាបត្តិ.

៣៧៨. អត្តនា វិប្បកតំ អត្តនា បរិយោសាបេតិ, អាបត្តិ សង្ឃាទិសេសស្ស.

អត្តនា វិប្បកតំ បរេហិ បរិយោសាបេតិ, អាបត្តិ សង្ឃាទិសេសស្ស.

បរេហិ វិប្បកតំ អត្តនា បរិយោសាបេតិ, អាបត្តិ សង្ឃាទិសេសស្ស.

បរេហិ វិប្បកតំ បរេហិ បរិយោសាបេតិ, អាបត្តិ សង្ឃាទិសេសស្ស.

៣៧៩. អនាបត្តិ លេណេ គុហាយ តិណកុដិកាយ អញ្ញស្សត្ថាយ វាសាគារំ ឋបេត្វា សព្ពត្ថ. អនាបត្តិ ឧម្មត្តកស្ស, អាទិកម្មិកស្សាតិ.

វិហារការសិក្ខាបទំ និដ្ឋិតំ សត្តមំ.