២. ឧជ្ជគ្ឃិកវគ្គោ

៥៨៦. តេន សមយេន ពុទ្ធោ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ. តេន ខោ បន សមយេន ឆព្ពគ្គិយា ភិក្ខូ មហាហសិតំ ហសន្តា អន្តរឃរេ គច្ឆន្តិ…បេ….

‘‘ន ឧជ្ជគ្ឃិកាយ អន្តរឃរេ គមិស្សាមីតិ សិក្ខា ករណីយា’’តិ.

ន ឧជ្ជគ្ឃិកាយ អន្តរឃរេ គន្តព្ពំ. យោ អនាទរិយំ បដិច្ច មហាហសិតំ ហសន្តោ អន្តរឃរេ គច្ឆតិ, អាបត្តិ ទុក្កដស្ស.

អនាបត្តិ អសញ្ចិច្ច, អស្សតិយា, អជានន្តស្ស, គិលានស្ស, ហសនីយស្មិំ វត្ថុស្មិំ មិហិតមត្តំ ករោតិ, អាបទាសុ, ឧម្មត្តកស្ស, អាទិកម្មិកស្សាតិ.

បឋមសិក្ខាបទំ និដ្ឋិតំ.

៥៨៧. តេន សមយេន ពុទ្ធោ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ. តេន ខោ បន សមយេន ឆព្ពគ្គិយា ភិក្ខូ មហាហសិតំ ហសន្តា អន្តរឃរេ និសីទន្តិ…បេ….

‘‘ន ឧជ្ជគ្ឃិកាយ អន្តរឃរេ និសីទិស្សាមីតិ សិក្ខា ករណីយា’’តិ.

ន ឧជ្ជគ្ឃិកាយ អន្តរឃរេ និសីទិតព្ពំ. យោ អនាទរិយំ បដិច្ច មហាហសិតំ ហសន្តោ អន្តរឃរេ និសីទតិ, អាបត្តិ ទុក្កដស្ស.

អនាបត្តិ អសញ្ចិច្ច, អស្សតិយា, អជានន្តស្ស, គិលានស្ស, ហសនីយស្មិំ វត្ថុស្មិំ មិហិតមត្តំ ករោតិ, អាបទាសុ, ឧម្មត្តកស្ស, អាទិកម្មិកស្សាតិ.

ទុតិយសិក្ខាបទំ និដ្ឋិតំ.

៥៨៨. តេន សមយេន ពុទ្ធោ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ. តេន ខោ បន សមយេន ឆព្ពគ្គិយា ភិក្ខូ ឧច្ចាសទ្ទំ មហាសទ្ទំ ករោន្តា អន្តរឃរេ គច្ឆន្តិ…បេ….

‘‘អប្បសទ្ទោ អន្តរឃរេ គមិស្សាមីតិ សិក្ខា ករណីយា’’តិ.

អប្បសទ្ទេន អន្តរឃរេ គន្តព្ពំ. យោ អនាទរិយំ បដិច្ច ឧច្ចាសទ្ទំ មហាសទ្ទំ ករោន្តោ អន្តរឃរេ គច្ឆតិ, អាបត្តិ ទុក្កដស្ស.

អនាបត្តិ អសញ្ចិច្ច, អស្សតិយា, អជានន្តស្ស, គិលានស្ស, អាបទាសុ, ឧម្មត្តកស្ស, អាទិកម្មិកស្សាតិ.

តតិយសិក្ខាបទំ និដ្ឋិតំ.

៥៨៩. តេន សមយេន ពុទ្ធោ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ. តេន ខោ បន សមយេន ឆព្ពគ្គិយា ភិក្ខូ ឧច្ចាសទ្ទំ មហាសទ្ទំ ករោន្តា អន្តរឃរេ និសីទន្តិ…បេ….

‘‘អប្បសទ្ទោ អន្តរឃរេ និសីទិស្សាមីតិ សិក្ខា ករណីយា’’តិ.

អប្បសទ្ទេន អន្តរឃរេ និសីទិតព្ពំ. យោ អនាទរិយំ បដិច្ច ឧច្ចាសទ្ទំ មហាសទ្ទំ ករោន្តោ អន្តរឃរេ និសីទតិ, អាបត្តិ ទុក្កដស្ស.

អនាបត្តិ អសញ្ចិច្ច…បេ… អាទិកម្មិកស្សាតិ.

ចតុត្ថសិក្ខាបទំ និដ្ឋិតំ.

៥៩០. តេន សមយេន ពុទ្ធោ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ. តេន ខោ បន សមយេន ឆព្ពគ្គិយា ភិក្ខូ កាយប្បចាលកំ អន្តរឃរេ គច្ឆន្តិ កាយំ ឱលម្ពេន្តា…បេ….

‘‘ន កាយប្បចាលកំ អន្តរឃរេ គមិស្សាមីតិ សិក្ខា ករណីយា’’តិ.

ន កាយប្បចាលកំ អន្តរឃរេ គន្តព្ពំ. កាយំ បគ្គហេត្វា គន្តព្ពំ. យោ អនាទរិយំ បដិច្ច កាយប្បចាលកំ អន្តរឃរេ គច្ឆតិ កាយំ ឱលម្ពេន្តោ, អាបត្តិ ទុក្កដស្ស.

អនាបត្តិ អសញ្ចិច្ច…បេ… អាទិកម្មិកស្សាតិ.

បញ្ចមសិក្ខាបទំ និដ្ឋិតំ.

៥៩១. តេន សមយេន ពុទ្ធោ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ. តេន ខោ បន សមយេន ឆព្ពគ្គិយា ភិក្ខូ កាយប្បចាលកំ អន្តរឃរេ និសីទន្តិ, កាយំ ឱលម្ពេន្តា…បេ….

‘‘ន កាយប្បចាលកំ អន្តរឃរេ និសីទិស្សាមីតិ សិក្ខា ករណីយា’’តិ.

ន កាយប្បចាលកំ អន្តរឃរេ និសីទិតព្ពំ. កាយំ បគ្គហេត្វា និសីទិតព្ពំ. យោ អនាទរិយំ បដិច្ច កាយប្បចាលកំ អន្តរឃរេ និសីទតិ កាយំ ឱលម្ពេន្តោ, អាបត្តិ ទុក្កដស្ស.

អនាបត្តិ អសញ្ចិច្ច, អស្សតិយា, អជានន្តស្ស, គិលានស្ស, វាសូបគតស្ស, អាបទាសុ, ឧម្មត្តកស្ស, អាទិកម្មិកស្សាតិ.

ឆដ្ឋសិក្ខាបទំ និដ្ឋិតំ.

៥៩២. តេន សមយេន ពុទ្ធោ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ. តេន ខោ បន សមយេន ឆព្ពគ្គិយា ភិក្ខូ ពាហុប្បចាលកំ អន្តរឃរេ គច្ឆន្តិ ពាហុំ ឱលម្ពេន្តា…បេ….

‘‘ន ពាហុប្បចាលកំ អន្តរឃរេ គមិស្សាមីតិ សិក្ខា ករណីយា’’តិ.

ន ពាហុប្បចាលកំ អន្តរឃរេ គន្តព្ពំ. ពាហុំ បគ្គហេត្វា គន្តព្ពំ. យោ អនាទរិយំ បដិច្ច ពាហុប្បចាលកំ អន្តរឃរេ គច្ឆតិ ពាហុំ ឱលម្ពេន្តោ, អាបត្តិ ទុក្កដស្ស.

អនាបត្តិ អសញ្ចិច្ច…បេ… អាទិកម្មិកស្សាតិ.

សត្តមសិក្ខាបទំ និដ្ឋិតំ.

៥៩៣. តេន សមយេន ពុទ្ធោ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ. តេន ខោ បន សមយេន ឆព្ពគ្គិយា ភិក្ខូ ពាហុប្បចាលកំ អន្តរឃរេ និសីទន្តិ ពាហុំ ឱលម្ពេន្តា…បេ….

‘‘ន ពាហុប្បចាលកំ អន្តរឃរេ និសីទិស្សាមីតិ សិក្ខា ករណីយា’’តិ.

ន ពាហុប្បចាលកំ អន្តរឃរេ និសីទិតព្ពំ. ពាហុំ បគ្គហេត្វា និសីទិតព្ពំ. យោ អនាទរិយំ បដិច្ច ពាហុប្បចាលកំ អន្តរឃរេ និសីទតិ ពាហុំ ឱលម្ពេន្តោ, អាបត្តិ ទុក្កដស្ស.

អនាបត្តិ អសញ្ចិច្ច, អស្សតិយា, អជានន្តស្ស, គិលានស្ស, វាសូបគតស្ស, អាបទាសុ, ឧម្មត្តកស្ស, អាទិកម្មិកស្សាតិ.

អដ្ឋមសិក្ខាបទំ និដ្ឋិតំ.

៥៩៤. តេន សមយេន ពុទ្ធោ ភគវា សាវត្ថិយំ វិហរតិ ជេតវនេ អនាថបិណ្ឌកស្ស អារាមេ. តេន ខោ បន សមយេន ឆព្ពគ្គិយា ភិក្ខូ សីសប្បចាលកំ អន្តរឃរេ គច្ឆន្តិ សីសំ ឱលម្ពេន្តា…បេ….

‘‘ន សីសប្បចាលកំ អន្តរឃរេ គមិស្សាមីតិ សិក្ខា ករណីយា’’តិ.

ន សីសប្បចាលកំ អន្តរឃរេ គន្តព្ពំ. សីសំ បគ្គហេត្វា គន្តព្ពំ. យោ អនាទរិយំ បដិច្ច សីសប្បចាលកំ អន្តរឃរេ គច្ឆតិ សីសំ ឱលម្ពេន្តោ, អាបត្តិ ទុក្កដស្ស.

អនាបត្តិ អសញ្ចិច្ច…បេ… អាទិកម្មិកស្សាតិ.

នវមសិក្ខាបទំ និដ្ឋិតំ.

៥៩៥. តេន សមយេន ពុទ្ធោ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ. តេន ខោ បន សមយេន ឆព្ពគ្គិយា ភិក្ខូ សីសប្បចាលកំ អន្តរឃរេ និសីទន្តិ សីសំ ឱលម្ពេន្តា…បេ….

‘‘ន សីសប្បចាលកំ អន្តរឃរេ និសីទិស្សាមីតិ សិក្ខា ករណីយា’’តិ.

ន សីសប្បចាលកំ អន្តរឃរេ និសីទិតព្ពំ. សីសំ បគ្គហេត្វា និសីទិតព្ពំ. យោ អនាទរិយំ បដិច្ច សីសប្បចាលកំ អន្តរឃរេ និសីទតិ សីសំ ឱលម្ពេន្តោ, អាបត្តិ ទុក្កដស្ស.

អនាបត្តិ អសញ្ចិច្ច, អស្សតិយា, អជានន្តស្ស, គិលានស្ស, វាសូបគតស្ស, អាបទាសុ, ឧម្មត្តកស្ស, អាទិកម្មិកស្សាតិ.

ទសមសិក្ខាបទំ និដ្ឋិតំ.

ឧជ្ជគ្ឃិកវគ្គោ ទុតិយោ.