៣. ខម្ភកតវគ្គោ

៥៩៦. តេន សមយេន ពុទ្ធោ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ. តេន ខោ បន សមយេន ឆព្ពគ្គិយា ភិក្ខូ ខម្ភកតា អន្តរឃរេ គច្ឆន្តិ…បេ….

‘‘ន ខម្ភកតោ អន្តរឃរេ គមិស្សាមីតិ សិក្ខា ករណីយា’’តិ.

ន ខម្ភកតេន អន្តរឃរេ គន្តព្ពំ. យោ អនាទរិយំ បដិច្ច ឯកតោ វា ឧភតោ វា ខម្ភំ កត្វា អន្តរឃរេ គច្ឆតិ, អាបត្តិ ទុក្កដស្ស.

អនាបត្តិ អសញ្ចិច្ច…បេ… អាទិកម្មិកស្សាតិ.

បឋមសិក្ខាបទំ និដ្ឋិតំ.

៥៩៧. តេន សមយេន ពុទ្ធោ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ. តេន ខោ បន សមយេន ឆព្ពគ្គិយា ភិក្ខូ ខម្ភកតា អន្តរឃរេ និសីទន្តិ…បេ….

‘‘ន ខម្ភកតោ អន្តរឃរេ និសីទិស្សាមីតិ សិក្ខា ករណីយា’’តិ.

ន ខម្ភកតេន អន្តរឃរេ និសីទិតព្ពំ. យោ អនាទរិយំ បដិច្ច ឯកតោ វា ឧភតោ វា ខម្ភំ កត្វា អន្តរឃរេ និសីទតិ, អាបត្តិ ទុក្កដស្ស.

អនាបត្តិ អសញ្ចិច្ច, អស្សតិយា, អជានន្តស្ស, គិលានស្ស, វាសូបគតស្ស, អាបទាសុ, ឧម្មត្តកស្ស, អាទិកម្មិកស្សាតិ.

ទុតិយសិក្ខាបទំ និដ្ឋិតំ.

៥៩៨. តេន សមយេន ពុទ្ធោ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ. តេន ខោ បន សមយេន ឆព្ពគ្គិយា ភិក្ខូ សសីសំ បារុបិត្វា អន្តរឃរេ គច្ឆន្តិ…បេ….

‘‘ន ឱគុណ្ឋិតោ អន្តរឃរេ គមិស្សាមីតិ សិក្ខា ករណីយា’’តិ.

ន ឱគុណ្ឋិតេន អន្តរឃរេ គន្តព្ពំ. យោ អនាទរិយំ បដិច្ច សសីសំ បារុបិត្វា អន្តរឃរេ គច្ឆតិ, អាបត្តិ ទុក្កដស្ស.

អនាបត្តិ អសញ្ចិច្ច…បេ… អាទិកម្មិកស្សាតិ.

តតិយសិក្ខាបទំ និដ្ឋិតំ.

៥៩៩. តេន សមយេន ពុទ្ធោ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ. តេន ខោ បន សមយេន ឆព្ពគ្គិយា ភិក្ខូ សសីសំ បារុបិត្វា អន្តរឃរេ និសីទន្តិ…បេ….

‘‘ន ឱគុណ្ឋិតោ អន្តរឃរេ និសីទិស្សាមីតិ សិក្ខា ករណីយា’’តិ.

ន ឱគុណ្ឋិតេន អន្តរឃរេ និសីទិតព្ពំ. យោ អនាទរិយំ បដិច្ច សសីសំ បារុបិត្វា អន្តរឃរេ និសីទតិ, អាបត្តិ ទុក្កដស្ស.

អនាបត្តិ អសញ្ចិច្ច, អស្សតិយា, អជានន្តស្ស, គិលានស្ស, វាសូបគតស្ស, អាបទាសុ, ឧម្មត្តកស្ស, អាទិកម្មិកស្សាតិ.

ចតុត្ថសិក្ខាបទំ និដ្ឋិតំ.

៦០០. តេន សមយេន ពុទ្ធោ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ. តេន ខោ បន សមយេន ឆព្ពគ្គិយា ភិក្ខូ ឧក្កុដិកាយ អន្តរឃរេ គច្ឆន្តិ…បេ….

‘‘ន ឧក្កុដិកាយ អន្តរឃរេ គមិស្សាមីតិ សិក្ខា ករណីយា’’តិ.

ន ឧក្កុដិកាយ អន្តរឃរេ គន្តព្ពំ. យោ អនាទរិយំ បដិច្ច ឧក្កុដិកាយ អន្តរឃរេ គច្ឆតិ, អាបត្តិ ទុក្កដស្ស.

អនាបត្តិ អសញ្ចិច្ច…បេ… អាទិកម្មិកស្សាតិ.

បញ្ចមសិក្ខាបទំ និដ្ឋិតំ.

៦០១. តេន សមយេន ពុទ្ធោ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ. តេន ខោ បន សមយេន ឆព្ពគ្គិយា ភិក្ខូ បល្លត្ថិកាយ [បល្លត្តិកាយ (ក.)] អន្តរឃរេ និសីទន្តិ…បេ….

‘‘ន បល្លត្ថិកាយ អន្តរឃរេ និសីទិស្សាមីតិ សិក្ខា ករណីយា’’តិ.

ន បល្លត្ថិកាយ អន្តរឃរេ និសីទិតព្ពំ. យោ អនាទរិយំ បដិច្ច ហត្ថបល្លត្ថិកាយ វា ទុស្សបល្លត្ថិកាយ វា អន្តរឃរេ និសីទតិ, អាបត្តិ ទុក្កដស្ស.

អនាបត្តិ អសញ្ចិច្ច, អស្សតិយា, អជានន្តស្ស, គិលានស្ស, វាសូបគតស្ស, អាបទាសុ,

ឧម្មត្តកស្ស, អាទិកម្មិកស្សាតិ.

ឆដ្ឋសិក្ខាបទំ និដ្ឋិតំ.

៦០២. តេន សមយេន ពុទ្ធោ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ. តេន ខោ បន សមយេន ឆព្ពគ្គិយា ភិក្ខូ អសក្កច្ចំ បិណ្ឌបាតំ បដិគ្គណ្ហន្តិ ឆឌ្ឌេតុកាមា វិយ…បេ….

‘‘សក្កច្ចំ បិណ្ឌបាតំ បដិគ្គហេស្សាមីតិ សិក្ខា ករណីយា’’តិ.

សក្កច្ចំ បិណ្ឌបាតោ បដិគ្គហេតព្ពោ. យោ អនាទរិយំ បដិច្ច អសក្កច្ចំ បិណ្ឌបាតំ បដិគ្គណ្ហាតិ ឆឌ្ឌេតុកាមោ វិយ, អាបត្តិ ទុក្កដស្ស.

អនាបត្តិ អសញ្ចិច្ច…បេ… អាទិកម្មិកស្សាតិ.

សត្តមសិក្ខាបទំ និដ្ឋិតំ.

៦០៣. តេន សមយេន ពុទ្ធោ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ. តេន ខោ បន សមយេន ឆព្ពគ្គិយា ភិក្ខូ តហំ តហំ ឱលោកេន្តា បិណ្ឌបាតំ បដិគ្គណ្ហន្តិ, អាកិរន្តេបិ អតិក្កន្តេបិ [អតិក្កមន្តេបិ (សី.)] ន ជានន្តិ…បេ….

‘‘បត្តសញ្ញី បិណ្ឌបាតំ បដិគ្គហេស្សាមីតិ សិក្ខា ករណីយា’’តិ.

បត្តសញ្ញិនា បិណ្ឌបាតោ បដិគ្គហេតព្ពោ. យោ អនាទរិយំ បដិច្ច តហំ តហំ ឱលោកេន្តោ បិណ្ឌបាតំ បដិគ្គណ្ហាតិ, អាបត្តិ ទុក្កដស្ស.

អនាបត្តិ អសញ្ចិច្ច…បេ… អាទិកម្មិកស្សាតិ.

អដ្ឋមសិក្ខាបទំ និដ្ឋិតំ.

៦០៤. តេន សមយេន ពុទ្ធោ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ. តេន ខោ បន សមយេន ឆព្ពគ្គិយា ភិក្ខូ បិណ្ឌបាតំ បដិគ្គណ្ហន្តា សូបញ្ញេវ ពហុំ បដិគ្គណ្ហន្តិ…បេ….

‘‘សមសូបកំ បិណ្ឌបាតំ បដិគ្គហេស្សាមីតិ សិក្ខា ករណីយា’’តិ.

សូបោ នាម ទ្វេ សូបា – មុគ្គសូបោ, មាសសូបោ. ហត្ថហារិយោ សមសូបកោ បិណ្ឌបាតោ បដិគ្គហេតព្ពោ. យោ អនាទរិយំ បដិច្ច សូបញ្ញេវ ពហុំ បដិគ្គណ្ហាតិ, អាបត្តិ ទុក្កដស្ស.

អនាបត្តិ អសញ្ចិច្ច, អស្សតិយា, អជានន្តស្ស, គិលានស្ស, រសរសេ, ញាតកានំ បវារិតានំ, អញ្ញស្សត្ថាយ, អត្តនោ ធនេន, អាបទាសុ, ឧម្មត្តកស្ស, អាទិកម្មិកស្សាតិ.

នវមសិក្ខាបទំ និដ្ឋិតំ.

៦០៥. តេន សមយេន ពុទ្ធោ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ. តេន ខោ បន សមយេន ឆព្ពគ្គិយា ភិក្ខូ ថូបីកតំ បិណ្ឌបាតំ បដិគ្គណ្ហន្តិ…បេ….

‘‘សមតិត្តិកំ [សមតិត្ថិកំ (ក.)] បិណ្ឌបាតំ បដិគ្គហេស្សាមីតិ សិក្ខា ករណីយា’’តិ.

សមតិត្តិកោ [សមតិត្ថិកំ (ក.)] បិណ្ឌបាតោ បដិគ្គហេតព្ពោ. យោ អនាទរិយំ បដិច្ច ថូបីកតំ បិណ្ឌបាតំ បដិគ្គណ្ហាតិ, អាបត្តិ ទុក្កដស្ស.

អនាបត្តិ អសញ្ចិច្ច, អស្សតិយា, អជានន្តស្ស, អាបទាសុ, ឧម្មត្តកស្ស, អាទិកម្មិកស្សាតិ.

ទសមសិក្ខាបទំ និដ្ឋិតំ.

ខម្ភកតវគ្គោ តតិយោ.